ھزدار ءِ اندوھناکیں وئیل
ٹی بی پی شونگال
بلوچستان ءِ ھمک گوزوکیں روچ ءِ ھواری ءَ اندوھناکیں وئیلے ترومبشت کنت اِنت- اے دابیں روچ کم گوز ایت کہ زورانسری بیگواھی ءُ ریاستی زُلمانی ھلاپ ءَ کجام یک دمگے ءَ زھرشانی نہ بوگ ءَ انت، پرچاکہ ریاست ءَ بلوچ جنگِ آجوئی ءِ دَکَل کنگ ءِ واستا ھنچیں پالیسی جوڑینتگ انت کہ ایشی ءِ سان ءَ سرجمیں بلوچ چاگرد سانمند بوگ ءَ انت-
چہ ھزدار ءَ بی بی اسمہ جتک کہ ریاستی سروکی ءَ ھلوکیں ڈیتھ اسکواڈ ءِ دست ءَ آوار جنگ بلوچستان ءِ اولی وئیل نہ انت- بلوچستان ءِ جتا جتائیں ھنداں آجوئی لوٹوکانی ھلاپ ءَ پوج ءِ ھمراھداری ءِ پژدر ءَ ڈیتھ اسکواڈ ءِ کارندھاں دزی، آوار جنی ءُ کشت ءُ کوشکاری ءَ مھار گٹ ءُ دیگ بیتگ انت، ایشی ءِ راستی ءِ منانک بلوچستان ءِ اسمبلی ءِ باسکاں بازیں براں وتی درشاناں کتگ انت-
گوستگیں سال ءَ بارکھان ءَ سردار عبدالرھمان کھتران ءَ مری دمگ ءَ زالبول ءُ زھگ آوار جتگ انت ءُ وتی زاتی جیل ءَ بندیگ کتگ انت – میڈیا ءُ سول سوسائٹی ءِ زھرشانی ءِ سبب ءَ آ دزگیر کنگ بیتگ ات، بلے زالبول ءِ آوار جنگ ءُ کوش ءِ منانکاں ابید مزن واکداریں زورانی گون ءَ نزیکی ءِ سبب ءَ آ یل دیگ بیتگ ات ءُ پد ءَ الیکشن ءِ کٹگ ءَ پد بلوچستان ءِ اڑوکی سرکار ءَ وزیر کتگ ات-
بلوچستان ءَ ریاستی ادارہ انساپ ءِ دیگ ءَ بے سوب بیتگ انت، ءُ آئینی ءُ کانونی ادارھاں گوں دل یکم بیگ ءَ پد مھلوک ءِ گور ءَ بس زھرشانی ءَ ابید دگہ راہ نیست انت- بلوچستان ءَ گوستگیں سیاسی برانز ءَ پد مھلوک سیاسی گھگیری ءَ ھک ءِ گرگ ءَ یکیں راہ سرپد بنت اِنت- ءُ ھزدار ءَ بی بی اسمہ جتک ءِ یل دیگ ھمے داب ءَ بیتگ کہ ڈیتھ اسکواڈ ءِ دست ءَ آوار جنگ ءِ ھلاپ ءَ کھول ءُ بلوچ راج ءَ ترندیں زھرشانی ءِ راہ گپتگ-
بلوچستان ءِ جاور ھال چارگ بہ بنت گڑا دیر نہ انت آیوکیں وھداں اے دابیں وئیل ترومبشت کن انت – بلے بلوچ راج ءِ ستک پھتو بیگ ءَ انت مھکمیں زھرشانی ءِ زور ءَ اے وڑیں وئیلانی گر ءُ دار سرجمی انت – ءُ سیاسی گھگیری ءِ سبب ءَ راج ءِ سر ءَ زوراکی ءِ زورانسری ءِ درچ ھلاس کنگ بیت انت-