TBP Balochi

بلوچستان ءِ دمگ پنجگور ءَ سلاہ بندیں مردماں اُرش کتگ دو مردم ٹپی کتگ-

پنجگور ءِ دمگ پروم، جائین ءَ گوستگیں شپ ءَ ناشناسیں سلاہ بندیں مردمانی تیرگواری ءَ چہ محمد اختر ء برکت جھمنند دِز پروم ءُ شبیر ء خدا داد جھمنند پُل آباد ٹپی بیتگ اَنت ءُ پد آ الاج ھاتر ءَ نادُراھجاہ پنجگور ءَ برگ بیتگ اَنت-

اے مردمانی سیادی سرکاری پلامرزی ٹولی ءَ اِنت چہ-

سرجمیں بلوچستان ءَ پاکستانی پلامرزی ٹولی سلاہ پُرکار اَنت کہ آ ڈیتھ اسکواڈ نام ءَ چہ زانگ بنت- راجدوستیں پارٹیانی رِد ءَ اے ٹولی مردمانی بیگواہ کنگ ءُ کوش ءَ اَبید دگہ چاگردی سلّکاریاں ھمگرنچ اَنت ءُ ریاستی پوج ءَ بلوچ زرمبشت ءِ ایرموش کنگ ھاتر ءَ آ سرجمی ءَ بے لگام کتگ اَنت-

بلوچستان ءِ دمگ نوشکی ءُ ھاران ءَ پاکستانی پوج آپریشن کنگ ءَ انت، زمینی لشکر ءَ ھوار ھیلی کاپٹر ھم آپریشن ءَ بھر زیرگ ءَ انت-

مروچی سھب ءَ نوشکی ءَ ھواریں ھاران ءِ کوھی دمگاں پاکستانی پوج ءِ کاروان سُر ءُ پُراں گندگ بیتگ –

دمگی مردمانی رد ءَ لجے ءَ پاکستانی پوج ءَ پوسٹے جوڑ کتگ، ھمے وڑ ‘ بڈو ڈور’ ءَ پیشگامی کنگ ءَ گندگ بیتگ ءُ ھیلی کاپٹر ھم بال ءَ گندگ بیتگ انت-

آپریشن ءِ وھد ءَ دگہ دزگیری ی جانی تاوانانی اھوال دیم ءَ نیتکگ انت ءُ ناکہ واکداراں آپریشن ءِ درگت ءَ دگہ گپ دیم ءَ آورتگ اَنت-

زانگ بہ بیت گوستگیں روچ ءَ نوشکی ءَ پاکستانی پوج ءِ کاروان ءَ ھواریں دو بس نشانگ کنگ بیتگ انت-

اُرش ءِ زمہ واری بلوچ لبریشن آرمی ءَ من اتگ ات – جارکش جیئند بلوش ءَ گوشتگ ات اے اُرش بی ایل اے ءِ مجید بریگیڈ ءِ یک فدائی ءَ بارود ءَ پُریں گاڑی ءِ ھواری ءَ یک بسے نشانگ کتگ ءُ پد ءَ بی ایل اے ءِ فتح اسکواڈ ءَ یک دگہ بسے نشانگ کتگ-

بلوچستان ءِ بنجاھی شھر شال ءَ گوستگیں شپ ءَ پاکستانی پوج ءَ لوگانی سر ءَ بیڑ برتگ، ھمے وھد ءَ ٹکی نامی ئیں مردم ناصر قمبرانی دزگیر کنگ ءُ ناشناسین جاھے ءَ برگ بیتگ-

گوستگیں شپ ءِ ساھت دو ءَ کلی کمبرانی ءَ پاکستانی پوج سی ٹی ڈی ءُ چیریں ادارھانی کارندھاں نیشنل پاٹی ءِ رھشون غفار کمبرانی ءُ ایکٹوسٹ بیبو بلوچ ءِ لوگانی سر ءَ بیڑ برتگ ءُ جاڑیگیں مردم لٹ شاپ کتگ انت-

پد ءَ ٹکی دھشت پنجاہ ءُ نُھ سالی ئیں ناصر قمبرانی ءِ لوگ ءِ سر ءَ بیڑ برتگ ءُ اود ءَ دزگیر کنگ ءُ ناشناسین جاھے ءَ برگ بیتگ-

کھول ءِ گوشگ انت کہ پاکستانی پوج ءَ شپ ءِ نسپ ءَ بیڑ برتگ ءُ لوگ ءِ مردم لٹ شاپ کتگ ءُ لوگ ءَ مردمانی موبائل پچگپتگ ءُ ناصر کمبرانی آوار جتگ ءُ برتگ-

زانگ بہ بیت ناصر قمبرانی 20 اگست 2015 ءَ ھم پوج ءَ بیگواھی ءِ آماچ کتگ بیتگ ءُ پد جون2018 ءَ یل داتگ –

اے وئیل بلوچستان ءَ رپورٹ بیتگیں رپورٹاں یکے کہ زورانسری بیگواھی آماچ بیتگ – گوستگیں روچ ءَ نوشکی ءَ پاکستانی پوج ءَ نُھ مردم آوار جتگ ءُ بیگواہ کتگ انت کہ آیانی ھچ اھوال نیست انت-

کلات ءِ دمگ منگچر ءُ مستونگ ءَ زورانسری بیگواھیں مردمانی کھول زھرشانی ءَ نشتگ انت ءُ دگ اش بند کتگ انت-

جنگ ءِ مٹ بیوکیں رھبند

ٹی بی پی شونگال

بلوچستان ءَ یکیں ھپتگ ءِ توک ءَ پاکستانی پوج ءِ سر ءَ دو ترندیں اُرش بیتگ انت، چریشی ءَ بازیں کچے ءَ جانی تاوانانی چِست کنگ کپتگ- بنداتی اُرش بلوچ لبریشن آرمی ( بی ایل اے) ءَ ڈھاڈر ءِ ھند مشکاپ ءَ جعفر ایکسپریس نشانگ کتگ، چریشی ءَ پاکستان ءِ جتا جتائیں ادارھاں بندوکیں دو سد ءَ گیش سیکیورٹی کارندہ یرگمال کتگ انت – پد ءَ جنگ ءُ چوپانی وھد ءَ اے کارندہ کشگ بیتگ انت- دومی اُرش نوشکی ءَ پوجی کاروان ءِ سر ءَ مجید بریگیڈ ءَ کتگ ، چریشی ءَ بازیں کچے ءَ بیرانی بیتگ انت-

مشکاپ ءَ پاکستانی ریل ءِ جعفر ایکسپریس ءِ دستیگ کنگ ءَ پد چہ بازیں روچاں بی ایل اے ءُ پاکستانی پوج ءِ میان ءَ جنگ ءُ چوپ برجاہ اَنت- بلوچستان ءِ آجوئی ءِ واستا دو دھکاں برجاھیں زرمبشت ءَ اے وئیل یک گچینی پھناتے ءِ منانک ءَ دنت ، پرچاکہ بی ایل اے ءَ اولی رند ءَ یک مساپر ٹرینے دستیگ کتگ ءُ دو سد پوجی کارندہ یرگمال کتگ انت ءُ بازیں روچاں جنگ داشتگ – اے بلوچ جنگ ءِ گوستانک ءَ یک گیر مامولیں تَکے گوشگ بیت اِنت-

پاکستان ءِ پوج ءِ جارکش ( آئی ایس پی آر) ءِ ڈائریکٹر جنرل لیفٹینٹ جنرل احمد شریف چوھدری ءَ جعفر ایکسپریس ءِ یرگمال بیگ ءَ پد یک پریس کانپرنسے ءِ جار پرینتگ ات کہ اے اُرش ءَ جنگ ءِ رھبند مٹ بیتگ انت ءُ بی ایل اے ءَ ترندیں پسو دیگ بیت اِنت – بلے اے جار ءِ پرینگ ءِ دو روچ ءَ پد نوشکی ءَ پوجی کاروان ءِ سر ءَ بیوکیں ھترناکیں فدائی اُرش بی ایل اے ءِ نیمگ ءَ اے کلوہ بیت کنت کہ آ ھم اے “ مٹ بیوکیں رھبند” ءِ رد ءَ جنگ ءِ واستا تیار اِنت-

پاکستان ءِ پوج ءِ جارکش ءُ سرکار ءِ بازیں وزیر بلوچستان ءِ زمینی راستیانی زھرکشیں ٹاھانی چَپ ءَ،جنگی ندارگ تچک کن انت کہ بلوچ زرمبشت ءِ آجوئی ترندی ءَ گیش بوگ ءَ انت – بلوچ جنگولیں گلانی مٹ بیوکیں گامگیجاں اے پدراھی رس ایت کہ آیوکیں وھداں پاکستانی پوج، گچینی زرکاری ءُ درملکی لوٹ کاراں اے دابیں ٹوھیں اُرشانی دیمپانی کنگ کپ ایت-

بلوچستان ءِ جتاجتائیں دمگ گوادر، شال ءُ پنجگور ءَ پاکستانی پوج ءِ دست ءَ چار مردم بیگواہ کنگ بیتگ اَنت-

گیشیں ھالانی رِد ءَ چہ پنجگور ءِ دمگ پروم ءَ پاکستانی پوج ءَ فیصل نامیں ورنایے آوار جنگ ءَ پد وتی ھمراھی ءَ برتگ چریشی ءَ پد آ بیگواہ ءَ اِنت-

دومی نیمگ ءَ چہ پنجگور وشبود ءَ چاردہ مارچ ءَ پوج ءَ اھسان بلوچ ء حاجی زادین آئی ءِ لوگ ءَ چہ آوار جتگ ءُ بیگواہ کتگ-

ھمے وڑ شانزدہ مارچ شپ یازدہ وھد ءَ چہ شال ءَ پاکستانی پوچ ءِ چیریں ادارھانی کارمنداں یک پلیٹے ءِ سر ءَ بیڑبرتگ ءُ اظھار بلوچ نامیں ورنایے آوار جتگ ءُ بیگواہ کتگ-

اظھار بلوچ بلوچستان یونیورسٹی ءَ سوشیالوجی ءِ نودربرے-

نوکیں ھالانی رِد ءَ اظھار پد ءَ یل کنگ بیتگ-

دومی نیمگ ءَ تیاب شھر گوادر ھند نیو ٹاؤن ءَ گوستگیں شپ ءَ پاکستانی چیریں ادارھانی کارندھاں یک دکانے ءَ بیڑ برتگ ءُ ساجد ء عطاالله جھمنند گوادر آوار جنگ ءَ پد بیگواه کتگ-

زانگ بہ بیت بلوچستان ءَ یکشل زورانسری آوار جنی ءِ دْرچ یکشل ءَ برجاہ ءَ اِنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ گوادر، مستونگ، زامران ءُ کولواہ ءَ پوج سر ءَ پنچ جتاجتائیں اُرشانی زمہ واری منّ اِتگ اَنت-

جارکش ءَ گْوشتگ کہ پانزدہ مارچ ءِ بیگاہ ھپت ءُ پانزدہ ءَ بی ایل ایف ءِ سرمچاراں گوادر شھر ءَ کوسٹ گارڈ ءِ بُنجاھی بُنجل ءِ پھازوکی چوکی سر ءَ دستی بمب ءَ چہ اُرش کتگ دو کارمند ٹپی کتگ اَنت – کوسٹ گارڈ ءِ اے پھازوکی چوکی بُنجاھی گیٹ کر ءَ اِنت- سرمچاراں اے اُرش ھما وھد ءَ کتگ وھدے کوسٹ گارڈ ءِ دو کارندہ پھازوکی چوکی دیم ءَ اوشتوک بیتگ اَنت-

آئی ءَ گْوشتگ کہ اُرش ءَ پد سرمچاراں چیرجنگی رپکاں چہ پہ سلامتی دراھگ ءَ سوبمند بیتگ اَنت-

جارکش ءَ گْوشتگ کہ بی ایل ایف ءِ سرمچارانی دگہ یک ٹولی یے شپ ھشت نیم ءَ گوادر ائیرپورٹ دگ سر ءَ برجاھیں پوج ءِ چوکی ءِ سک نزیک ءَ چہ وتکار مزنیں سلاھاں چہ اُرش کتگ چریشی ءَ چہ پوج ءِ یک کارمندے یے مرتگ وھدے کہ یکے ٹپی بیتگ- آئی ءَ گْوشتگ کہ دگہ یک اُرشے بی ایل ایف ءِ سرمچاراں پانزدہ مارچ بیگاہ شش ءُ چل پنچ ءَ مستونگ ءِ دمگ کلی ژلی ءِ ھند سر ءَ برجاھیں پولیس چیک پوسٹ سر ءَ اُرش کتگ ءُ دستیگ کتگ چیک پوسٹ ءَ ساڑی سے پولیس کارمندانی گور ءَ ھستیں دو تُپنگ دستیگ کتگ اَنت-

جارکش ءَ گْوشتگ کہ دگہ یک اُرشے پانزدہ مارچ ءِ نیم روچ ادار سے ءَ زامران ءِ دمگ کوٹان ءَ برجاھیں زورگریں پاکستانی پوج ءِ چوکی سر ءَ بی ایل ایف سرمچاراں دو نیمگی ءَ چہ مزنیں سلاھاں چہ اُرش کتگ چریشی ءِ آسر ءَ دُژمن ءَ مزنیں کچے ءَ جانی ءُ مالی تاوان رس اِتگ-

جارکش ءَ دیمتر ءَ گْوشتگ کہ اشی ءَ ساری چاردہ مارچ بیگاہ وھد ءَ زورگریں پاکستانی پوج ءَ کولواہ ءِ دمگ سگک، شاپکول ءَ لشکر کشی کنان ءَ یک لوگے ءِ سر ءَ بیڑبرتگ- نزیک ءَ ساڑی ئیں بی ایل ایف ءِ سرمچاراں دُژمن ءِ دو ڈرون کیمرہ نشانگ کتگ اَنت کہ آیانی تہ ءَ یکے کپتگ ءُ تباہ بیتگ-

جارکش ءَ گْوشتگ کہ بلوچستان لبریشن فرنٹ اے اُرشانی زمہ واری ءَ منّ اِیت ءُ بلوچ ورنایاں گوشگ لوٹ کہ دُژمنیں توانمندانی بلوچ دُژمنیں پالیسیانی ھلاپ ءَ یکجاہ بہ بنت بلوچ جُھد ءِ آجوئی ءَ وتی کرد ءَ پیلو بہ کن اَنت-

بلوچستان ءُ سیکیورٹی ءِ جاورھال ناگیگ، جعفر ایکسپریس ءُ مروچی نوشکی ءَ اُرش ءَ پد بلوچستان ءِ بنجاھی شھر شال ءَ سیکیورٹی گیش کنگ بیتگ-

اے درچ ءَ امن امان ءِ ناوشیں جاورانی گر ءُ دار ءَ چھاؤنی ءِ نزیک ءَ زھری گلائی روانی ءِ واستا بند کنگ بیتگ-

شھر ءَ پورسز بازیں کچے ءَ گشت کنگ ءَ انت ءُ بازیں جاھاں پورسز ءَ نوکیں چوکی جوڑینتگ انت-

زانگ بہ بیت گوستگیں روچاں واکداراں یک تھریٹ الرٹے شنگ کتگ ءُ گوشتگ ات کہ بلوچ آجوئی ءِ لوٹوکیں 200 گیش جنگول شال ءَ جاڑیگ انت ءُ سرکاری جاگہ، اسمبلی ءَ ھوار شال کینٹ ءَ نشانگ کت کن اَنت-

تھریٹ الرٹ ءَ پد شال ءَ دراھیں شھدگاں اسنیپ چیکنگ بوگ ءَ انت ءُ ھمے وڑ جاہ جاہ ءَ پورسز ءَ چوکی جوڑینتگ انت ءُ سرکار کارندھاں سپری رھبندانی ھکم داتگ انت-

نوشکی تراک ءَ پد پاکستانی پوج ءَ نُھ مردم آوار جتگ ءُ بیگواہ کتگ اَنت-

گیشیں ھالانی رِد ءَ ایس بی کے یونیورسٹی، اسٹیشن ءِ ھند سر ءَ پاکستانی پوج ءَ نُھ مردم آوار جتگ ءُ بیگواہ کتگ اَنت-

بلے تنی وھدے بیگواہ کنگ بیتگیں مردمانی پجّار نہ بیتگ-

زانگ بہ بیت کہ مروچی سُھب ءَ نوشکی ءَ پاکستانی پوج کاروان بمب اُرش ءِ نشانگ کنگ بیتگ – چریشی ءِ آسر ءَ مزنیں کچے ءَ پاکستانی پوج ءِ بیرانیانی ھال اِنت-

بلوچستان ءِ دمگ پنجگور ءَ گوستگیں شپ ءَ ناشناسیں مردماں مردماں یک مردمے ءِ آوار جنگ ءِ جھد کتگ چریشی ءَ گھگیری کنگ ءِ پژدر ءَ تیرگواری ءَ زال کشگ بیتگ ءُ مردین اش برتگ کہ مروچی سھب ءَ آئی ءِ لاش دزکپتگ-

اے وئیل پنجگور ءِ دمگ مزڈالو ءَ پیش اتکگ-

لیویز بنشون ءِ رد ءَ گوستگیں شپ ءَ آوار جنگ بیتگیں مردم ءِ لاش مروچی پنجگور ءِ دمگ کلگ ءَ دزکپتگ –

ھسپتال بنشون ءِ گوشگ انت کہ آ لٹ ءُ کٹانی نشانگ کنگ ءُ کُشگ بیتگ ءُ جسم ءِ سر ءَ کارچ ءُ تیرانی نشان ھست انت-

کھول ءَ وئیل ءِ ھلاپ ءَ ڈپٹی کمشنر پنجگوت ءِ کارگس ءِ دیم ءَ زھرشانی نندانک داتگ – آیانی گوشگ انت دانکہ کوشکار دزگیر کنگ نہ بنت زھرشانی نندانک برجاہ بیت اِنت-

رمزان ءِ ماہ چوں گوازینگی اِنت؟

نبشتہ کار: جاپر مراد بلوچ

دی بلوچستان پوسٹ

بندات گوں اللہ ءِ نام ءَ کہ آ سک باز مھربان ءُ زبریں رھم کنوکے-

رمزان ءِ ماہ ، روچگ ءِ ماہ، کرآن پاک ءِ وانگ ءُ سرپد بوگ ءِ ماہ ، شپانی پاساں پادایگ ءُ تھجد وانگ ءِ ماہ انت – اللہ پاک ءِ دیم ءَ ارسانی ریچگ ءُ دُوا لوٹگ ءِ ماہ اللہ پاک ءِ گْور ءَ برترگ ءُ گوں آئی ءَ وتی سیادی ءِ مھکم کنگ ءِ ماہ وار ءُ بزگانی کمک کنگ ءِ ماہ سدکہ ءُ ھیرات ءِ ماہ-

انچوشکہ اے دگہ کاراں ھاسیں وھد ھست ھمے پیم ءَ اے کارانی ھاسیں وھد رمزان ءِ برکتی ئیں ماہ اِنت-

اے ھما ماہ اِنت کہ ایشی ءِ تہ ءَ شیتان گوں زمزیلاں بندگ بنت، دوزہ ءِ در بندگ بنت، دوزھی چہ دوزہ ءَ آجو کنگ بنت، بھشت ءِ در پچ کنگ بنت، گناھگاراں اللہ پاک وت توار جنت بیا اِت پھلی بہ لوٹ اِت وتی رب ءِ گْور ءَ برتر اِت – اے چشیں جوانین ءُ برکتی ئیں ماھے گڑا اے ماہ ءَ من ءَ ءُ ترا وتی شپ ءُ روچ چوں گوازینگی اَنت؟ اولی ھبر ایش اِنت کہ مردم اللہ پاک ءِ در ءَ دُوا بہ لوٹ اِیت کہ اے اللہ من ءَ اے ماہ ءَ سواب کٹگ ءِ توپیک ءُ ھاٹیگ بدے ءُ ھرچ نیکی یے کہ من اے ماہ ءِ تہ ءَ کن آں آئی ءَ کبول بکن، پرچاکہ بید ءِ اللہ پاک ءِ توپیک ءُ کمک ءَ مردم ھچ کت نہ کنت ءُ اگاں مردم ھرچی نیکی بکنت دانکہ اللہ پاک آیاں کبول مہ کنت ھچ کار ءَ نیا اَنت. دومی ھبر ایش اِنت کہ مردم اے ماہ ءَ پہ ھمک نیکیں کار ءِ واستا تیار ءُ ساڑی بہ بیت، سستی ءُ جان بڈی مہ کنت، روچگ ءِ بندات گوں سھور ءَ اِنت، مردم شپ ءَ ماھلا بہ وپس اِیت دانکہ سھور ءَ پاد اتک بہ کنت، بازیں مردم ھست کہ سھور ءَ دیر ءَ پادکاینت، بانگو ءِ بانگ اِنت ءُ آیانی ورگ بندات بیت، چش کنگی نہ اِنت بلکیں ماھلا پادایگی اِنت ءُ سھور کنگی اِنت، لھتیں مردم ھست کہ آ سھور ءِ جند نہ کن اَنت، سھور الم کنگی اِنت پرچاکہ بے سھور ءَ روچگی مردم ءَ ھلاس کنت ءُ مردم نادراہ ھم بیت ءُ پیگمبر صلی اللہ علیہ وسلم ءَ ھم گوشتگ سھور بکن اِت انچوشکہ ھدیسے ھست: عَنْ أَنَسَ بْنَ مَالِكٍ رَضِيَ اللَّهُ عَنْهُ قَالَ : قَالَ النَّبِيُّ صَلَّى اللَّهُ عَلَيْهِ وَسَلَّمَ : ” تَسَحَّرُوا ؛ فَإِنَّ فِي السَّحُورِ بَرَكَةً “. رجانک: واجہ انس ء مالک گوش اِیت واجہ رسول اللہ صلی اللہ علیہ وسلم ءَ گوشتگ: سھور بکن اِت پرچاکہ سھور ءِ تہ ءَ برکت ھست – صحیح البخاری 1923-

سھور ءَ پد بازیں مردم ھست کہ وپس اَنت ءُ سھب ءِ نماز ءَ یلہ کن اَنت اے سکیں مزنیں گناھے، سھور ءَ پد سھب ءِ نماز الم وانگی اِنت. مردیناں مسیت ءَ روگ ءُ نماز وانگی اِنت ءُ جنین آدماں وتی لوگاں وانگی اِنت، نماز ءَ پد بائد اِنت مردم پاکیں کران ءَ بہ وان اِیت ءُ سرپد بہ بیت پرچاکہ رمزان ءَ کران وانگ ءِ مز سک باز اِنت، دیمتر ءَ پیشیم ءِ نماز اِنت آ ھم وانگی اِنت بازیں مردم ھست کہ آ سھب ءِ نماز ءَ پد وپس اَنت ءُ دانکہ پیشیم ءِ نماز ءَ انگت واب ءَ اَنت، پمیشکا یکے اگاں وپس اِیت گڑا پیشیم ءَ الم پاد بئیت ءُ نماز بہ کنت، ءُ ھمے وڑ ءَ دیگر ءِ نماز اَنت، پد ءَ دبوج بیت ءُ دبوج ءَ پد بازیں نوجوان ھست کہ دبوج کن اَنت ءُ تچک بنت مگرب ءِ نماز ءَ یلہ کن انت، مگرب ءِ نماز ءَ الم بہ وان اِت، پد ءَ اشاء ءِ نماز اِنت ءُ ترابی(تراویح) اِنت، تُرابی کسے ھشت وان ایت جوان اِنت آ پیگمبر صلی اللہ علیہ وسلم ءِ رھبند ءِ سر ءَ اِنت، اگاں کسے بیست وان اِیت ھم جوان اِنت پرچاکہ واجہ امر ءِ زمانگ ءَ بیست اِش ونتگ، نوں ھشت ءُ بیست ءِ سر ءَ مڑگی نہ اِنت، مسیت یلہ کنگی نہ اِنت، مردم گلینگی نہ اَنت، بازیں مردم ھست کہ ھشت وانوکانی سر ءَ زھر اَنت، گْوش اَنت اِش شمئے تُرابی کبول نہ بنت ءُ بازیں ھست کہ بیست وانوکاں گْوش اَنت شمئے نہ بنت، دوئیں شر کنگ ءَ اَنت، کسے ھشت وان اِیت آئی ءَ پیگمبر صلی اللہ علیہ وسلم ءِ سنت زرتگ ءُ کسے بیست وان ایت آ ھم روا اِنت، ھر چنچو وان ئے بْوان بلے چو نماز ءِ پیم ءَ بہ بنت ھُشک ءَ ٹگ جنگ مہ بیت، بازیں مردم تو گند ئے بیست وان اَنت بلے انچو تیز کہ رسینگ نہ بنت، چش شر نہ اِنت اے تُرابی پہ اللہ پاک ءِ رازی کنگ ءِ ھاتر ءَ وانگ بیت اگاں کسے چش ٹگ جنت ءُ تیز وان اِیت گڑا اللہ پاک ناراز بیت، اگاں یکے پہ گْوم ءُ گیگ ھشت وان اِیت گڑا چہ آ مردم ءَ شرتر اِنت کہ بیست وان اِیت بلے نہ زانت من چے وانگ ءَ آں، انچو تیز اِنت کہ رکو ءُ سجدہ ئِے سرجم نہ اَنت، اللہ پاک ءَ ھما کار دوست بیت کہ شر اِنت اگاں چہ کم اِنت انچوشکہ اللہ پاک گوش اِیت: الَّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيُّكُمْ أَحْسَنُ عَمَلًا ۚ وَهُوَ الْعَزِيزُ الْغَفُورُ. رجانک: ھما کہ جوڑ ئِے کتگ مرگ ءُ زند دانکہ بہ چکاس اِیت شمارا کے اِنت شمئے تہ ءَ کہ جوانتریں کار کنت ءُ ھما اِنت زبردست ءُ مزنیں پھل کنوک – نوں دلگوش کن اِت اے آیت ءِ تہ ءَ اللہ پاک ءَ نہ گْوشت کے گیشتر کار کنت بلکیں گوشت ئِے کہ جوانترین ءُ شرتریں کار کنت – نوں المی اِنت کہ ما ءُ شما وتی املاں جوان بہ کن ایں، اللہ پاک ءُ آئی ءِ دیم داتگیں پیگمبر صلی اللہ علیہ وسلم ءِ ھکمانی پیم ءَ اِش بکن ایں. نوں کا ایں کرآن وانی ءِ نیمگ ءَ ، رمزان ءَ وتی گیشتریں وھد ءَ کرآن پاک ءَ بدے اِت، رمزان کران ءِ ماہ اِنت-

لھتیں مردم ھست کہ آ گْوش اَنت ما الم دو رند ءَ یا چار رند ءَ کران ءَ ھلاس کن ایں، اے جوانیں کارے، بلے چہ دو ءُ چار رند ءِ ھلاس کنگ ءَ تو اگاں یک رندے پہ دلگوش پہ گیگ ءُ گْوم ھلاس ئِے کن ئے گھتر اِنت، ایوک ءَ کرآن پاک ءَ مہ وان بلکیں آئی ءِ سرپد بوگ ءِ جھد ءَ بکن، کران پاک ءِ رجانک ءَ بْوان دانکہ تو بزان ئے تئی رب ترا چے گوشگ ءَ اِنت چہ تو چے لوٹگ ءَ اِنت، کران پاک تئی ماتی زبان بلوچی ءَ رجانک بوتگ تو ھمے رجانک ءَ بزور بْوان ءُ سرپد بہ بو پد ءَ وتی زند ءَ ھمے کرآن ءِ رھبندانی پیم ءَ بہ گوازین – رمزان ءَ مردم جھد بہ کنت گیشاں چہ گیش نپل بہ وان اِیت، بید ءِ تُرابیاں مردم شپاں پاد بئیت ءُ نپل بہ وان اِیت پرچاکہ اے نپل کیامت ءِ روچ ءَ مردم ءِ کار ءَ کاینت، اگاں کیامت ءِ روچ ءَ مردم ءِ پرزانی تہ ءَ کمی ھست گڑا چہ نپلاں زورگ ءُ پر کنگ بنت انچوشکہ ھدیسے ھست: عَنْ أَبِي هُرَيْرَةَ ، أَنَّ النَّبِيَّ صَلَّى اللَّهُ عَلَيْهِ وَسَلَّمَ قَالَ : ” إِنَّ أَوَّلَ مَا يُحَاسَبُ بِهِ الْعَبْدُ يَوْمَ الْقِيَامَةِ صَلَاتُهُ، فَإِنْ وُجِدَتْ تَامَّةً كُتِبَتْ تَامَّةً، وَإِنْ كَانَ انْتُقِصَ مِنْهَا شَيْءٌ قَالَ : انْظُرُوا هَلْ تَجِدُونَ لَهُ مِنْ تَطَوُّعٍ، يُكَمِّلُ لَهُ مَا ضَيَّعَ مِنْ فَرِيضَةٍ مِنْ تَطَوُّعِهِ۔ سنن النسائی 466 رجانک: واجہ ابو ھریرہ گوش ایت واجہ رسول اللہ صلی اللہ علیہ وسلم ءَ گْوشتگ: اولی ھساب بندہ ءَ آئی ءِ نماز ءِ گرگ بیت اگاں نماز سرجم اَنت گڑا سرجم ءَ نبشتہ کنگ بنت، اگاں نمازانی تہ ءَ کمی ھست گڑا اللہ پاک گوش اِیت: بچار اِت باریں شما پہ ایشی ءَ نپل گند اِت؟ ھما پرز کہ یلہ ئِے کتگ انت چہ آئی ءِ نپلاں سرجم کنگ بنت۔

نوں اے نپل وانگ ءِ ارژشت اِنت- پمیشکا رمزان ءِ برکتی ئیں شپاں پاد ءَ اِت ءُ نپل بہ وان اِت، ھاسکن شپ ءِ گڈی بھر ءَ سھور ءَ پیسر اے وھد ءَ مئے رب گڈی آزمان ءَ کیت ءُ مارا توار جنت انچوشکہ ھدیسے ھست:عَنْ أَبِي هُرَيْرَةَ رَضِيَ اللَّهُ عَنْهُ، أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : ” يَنْزِلُ رَبُّنَا تَبَارَكَ وَتَعَالَى كُلَّ لَيْلَةٍ إِلَى السَّمَاءِ الدُّنْيَا، حِينَ يَبْقَى ثُلُثُ اللَّيْلِ الْآخِرُ، يَقُولُ : مَنْ يَدْعُونِي فَأَسْتَجِيبَ لَهُ ؟ مَنْ يَسْأَلُنِي فَأُعْطِيَهُ ؟ مَنْ يَسْتَغْفِرُنِي فَأَغْفِرَ لَهُ۔ صحیح البخاری 1145 رجانک: واجہ ابوھریرہ گوش اِیت واجہ رسول اللہ صلی اللہ علیہ وسلم ءَ گوشتگ: وھدیکہ شپ ءِ گڈی سیک پشت کپ اِیت گڑا مئے رب ایر کپ اِیت دنیا ءِ آزمان ءَ ءُ گوش اِیت: کے اِنت چہ من دُوا لوٹ اِیت؟ من آئی ءِ دُوایاں کبول کن آں. کے اِنت چہ من لوٹ اِیت ؟ من آئی ءَ دیاں.کے اِنت چہ من پھلی لوٹ اِیت ؟ من آئی ءَ پھل کن آں- صحیح البخاری 1145-

نوں اے وھد ءَ کہ اللہ پاک وت توار جنگ ءَ اِنت گڑا بائد اِنت کہ ما ءُ شما بیا ایں رب ءِ در ءَ وتی ردیانی پھلی ءَ بہ لوٹ ایں، وتی روزی ءِ تہ ءَ برکت ءُ گیشی بہ لوٹ ایں، وتی واست ءَ جان سلامتی ءُ دراھی ءِ دُوا ءَ بہ لوٹ ایں، وتی سر زمین ءِ واست ءَ امن ءُ ایمنی ءِ دُوا ءَ بہ لوٹ ایں، گار ءُ بیگواھیں مردمانی آجوئی ءِ دُوا ءَ بہ لوٹ اِیں، ھرچی جائزیں لوٹ ءُ واھشت من ءَ ءُ ترا ھست آیاں چہ وتی رب ءَ بہ لوٹ ایں. نوں ھیرات ءِ بابت ءَ کمو نبشتہ کن ایں. ھیرات ءِ سواب سک باز اَنت انچوشکہ واجہ رسول اللہ صلی اللہ علیہ وسلم ءَ گوشت: وَالصَّدَقَةُ تُطْفِئُ الْخَطِيئَةَ كَمَا يُطْفِئُ الْمَاءُ النَّارَ. رجانک:ءُ ھیرات انچش گناھاں ھلین اِیت انچوشکہ آپ آس ءَ کُش اِیت ھیرات ءِ ارزشت ءَ دگہ بازیں ھدیس ھم ھست-

پد ءَ رمزان ءِ ماہ ءَ ھیرات گیشتر سواب اِنت، پیگمبر صلی اللہ علیہ وسلم ءَ مدام ھیرات کتگ، سکیں دست پچیں مردمے بوتگ بلے رمزان ءَ آئی دست پچی گیشتر بوتگ انچوشکہ ھدیساں ھست اِنت: عن أنس قال: كان النبي صلى الله عليه وسلم أحسنَ الناس وأجودَ الناس وأشجعَ الناس رواه البخاري (5686)، ومسلم (2307). رجانک: واجہ انس گوش اِیت: پیگمبر صلی اللہ علیہ وسلم مردمانی تہ ءَ جوانترین ءُ دست پچترین ءُ دلیرتریں مردم بوتگ-

وعن ابن عباس قال: كان رسول الله صلى الله عليه وسلم أجود الناس وكان أجود ما يكون في رمضان حين يلقاه جبريل وكان يلقاه في كل ليلة من رمضان فيدارسه القرآن فلرسول الله صلى الله عليه وسلم أجود بالخير من الريح المرسلة. رواه البخاري (6)، ومسلم (2308) رجانک: واجہ ابداللہ ء اباس گوش اِیت: پیگمبر صلی اللہ علیہ وسلم مردمانی تہ ءَ دست پچتریں مردم بوتگ ءُ رمزان ءَ وھدیکہ جبریل پیگمبر ءِ گور ءَ اتکگ گڑا پیگمبر گیشتر دست پچ بوتگ، ءُ جبریل پیگمبر ءِ گْور ءَ ھمک شپ اتکگ ءُ کرآن ئِے وانینتگ، اے وھد ءَ پیگمبر ھیر ءِ کارانی تہ ءَ چہ ترندیں گْواتاں تیز تر بوتگ-

گڑا رمزان ءَ دست پچ بوگی اِنت، ھیرات کنگی اِنت وتی وس ءَ پرچاکہ ھیرات کنگ ءَ مال ءِ تہ ءَ گیشی کیت ءُ مال پہ ھیرات ءَ بھ کم نہ بیت انچوشکہ ھدیسے ھست: عَنْ أَبِي هُرَيْرَةَ ، عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ” مَا نَقَصَتْ صَدَقَةٌ مِنْ مَال۔ صحیح مسلم 2588 واجہ ابو ھریرہ گوش اِیت واجہ رسول اللہ صلی اللہ علیہ وسلم ءَ گوشتگ: ھیرات کنگ ءَ مال کم نہ بیت – وھدیکہ پہ ھیرات ءَ مال کم نہ کنت گڑا گیشاں چہ گیش رمزان ءَ ھیرات بہ کن اِت ءُ ھیرات ءِ بندات ءَ چہ وتی نزیکیں مردماں بہ کن اِت پرچاکہ آ گیشتر ھکدار اَنت انچوشکہ ھدیسے ھست:عن أبي هُرَيْرَةَ رَضِيَ اللَّهُ عَنْهُ عَنِ النَّبِيِّ صَلَّى اللَّهُ عَلَيْهِ وَسَلَّمَ، قَالَ : ” خَيْرُ الصَّدَقَةِ مَا كَانَ عَنْ ظَهْرِ غِنًی ، وَابْدَأْ بِمَنْ تَعُولُ. صحيح البخاري 1426

رجانک: واجہ ابوھریرہ گوش اِیت واجہ رسول اللہ صلی اللہ علیہ وسلم ءَ گوشتگ: جوانتریں ھیرات ھما اِنت کہ سیری ءَ پد کنگ بیت ءُ بندات چہ ھمائی بکن کہ ڈبہ ئِے تئی سر ءَ اِنت، نوں ھیرات ءَ مدام ھما کس ءَ بدے کہ ترا نزیک تر اِنت، تئی ناکو اِنت ترو اِنت ناکو زتک، ترو زتک اَنت پد ءَ اے دگہ کس ءُ ازیز اَنت، دومی ھبر ایش اِنت کہ ھیرات وتی وس ءُ گنجائش ءِ کد ءَ بدے، چش نہ اِنت کہ تئی کیتو ءِ زر ھزاری یے ءُ تو گوش ئے من ایشی ءَ سرجم ءَ ھیرات کن آں، بلکیں مدام وتی وس ءُ گنجائش ءِ کد ءَ بدے، چش ھم نہ اِنت کہ ترا دہ ھزار ھیرات کنگ ءِ وس نیست نوں تو پنسد کلدار ھم ھیرات نہ کن ئے تو ھمینچو بکن کہ تئی گنجائش اِنت، اگاں تئی گنجائش یک کوٹگے ھمیشی ءَ بگر ءُ بیار وتی ھمساھگ ءَ بدے تئی گنجائش جُپتے جمپل اِنت ھمیشی بیار ءُ واریں مردمے ءَ بدے، مدام وتی وس ءُ گنجائش ءِ کد ءَ بدے اگاں چہ تئی گنجائش سد کلدار اِنت ھمیشی ءَ ھم کم مہ لیک انچوشکہ ھدیسے ھست: عَنْ أَبِي ذَرٍّ ، قَالَ : قَالَ لِيَ النَّبِيُّ صَلَّى اللَّهُ عَلَيْهِ وَسَلَّمَ : ” لَا تَحْقِرَنَّ مِنَ الْمَعْرُوفِ شَيْئًا. صحيح مسلم 2626 رجانک؛ نیکیانی تہ ءَ ھچ ءَ کم سرپد مہ بو – چش مہ بیت کہ تو رمزان ءَ گل ءُ شات ئے وش وشیں ورگ ور ئے بلے تئی ھمساھگ ءَ دبوج نیست، اگاں دبوج ئِے ھست سھور ئِے نیست، وتی ھمساھگانی الم ھیال ءَ بدار اِت آیانی کمک ءَ بکن اِت ءُ سواب بہ کٹ اِت-

رمزان ءِ یک دمانے ھم گناہ ءِ تہ ءَ گوازینگی نہ اِنت، بلکیں ھمک کترہ ءُ دمان اللہ پاک ءِ رازی کنگ ءِ تہ ءَ گوازینگی اِنت، آئی ءِ یات ءَ گوازینگی اِنت-

بلے اپسوز اِنت کہ مئے چاگرد ءِ تہ ءَ مردم ھمے سرپد بنت کہ رمزان اتکگ نوں ما سرجمیں شپ ءَ نند ایں لیب کن ایں ءُ روچ ءَ واب جن ایں، شپ ءَ گوں چکائی ءُ پتائی لیباں گوازین ایں ءُ روچاں واب اَنت اے پیم ءَ رمزان گوازینگی نہ اِنت، بلکیں رمزان ابادت ءِ تہ ءَ گوازینگی اِنت، دکاندار ءُ سوداگر گل اَنت کہ رمزان اتکگ ما چیزانی نھاداں برز کن این ءُ زر مُچ کن ایں بلکیں شمارا اے برکتی ئیں ماہ ءِ تہ ءَ چیزانی نھاد جھل کنگی اِنت دانکہ وار ءُ بزگیں مردم زرت بہ کن اَنت، چش کن اِت شمئے مال ءِ تہ ءَ برکت ءُ گیشی کیت ءُ شمارا سواب ھم رس اِیت انچوشکہ ھدیسے ھست: وَمَنْ يَسَّرَ عَلَى مُعْسِرٍ ؛ يَسَّرَ اللَّهُ عَلَيْهِ فِي الدُّنْيَا وَالْآخِرَةِ.صحیح مسلم:2699

رجانک: ءُ ھرکس پہ تنگدستے ءَ ارزانی کنت اللہ پہ آئی دنیا ءُ آھرت ءَ ارزانی کنت. دگہ یک گپے ایش اِنت کہ ما سرپد بہ ایں کہ روچگی ایوک ءَ ورگ ءُ نوشگ ءِ یلہ کنگ ءِ نام اِنت، بلے ھکیکت چش نہ اِنت، روچگی ءَ ترا درستیں ھرابیں کار یلہ کنگی اَنت، مردمانی پچکاں بوگ، مردماں بد ءُ رد کنگ درست یلہ کنگی اَنت انچوشکہ ھدیسے ھست: واجہ ابو ھریرۃ گوش اِیت : واجہ رسول اللہ صلی علیہ وسلم ءَ گوشتگ: لاللہ پاک گوش اِیت :اگاں یکے روچگ بیت، بدیں گپ مہ کنت ءُ کس ءَ مہ مِڑ اِیت ءُ جاک مہ کنت گوں، اگاں یکے ءَ زاہ ءُ بد کت یا مِڑ اِت گوں گڑا بگوش اِیت من روچگاں۔

حدیث صحیح : دگہ ھدیسے ھست:واجہ ابو ھریرۃ گوش اِیت : واجہ رسول اللہ صلی علیہ وسلم ءَ گوشتگ: ھر کس دروگیں ءُ ناھکیں گپ ءُ کاراں یلو نہ کنت، اللہ پاک آئی ءِ ورگ ءُ آپ ءِ یلو کنگ ءَ ھم نہ لوٹ اِیت ۔

حدیث صحیح :اللہ پاک مارا ءُ شمارا اے ھبرانی سر ءَ کاربند بوگ ءُ رمزان ءِ روچانی گوازینگ ءِ ھاٹیگ ءَ بدیات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-