TBP Balochi

تربت ءِ دمگ چہ بھمن ءُ ڈنک ءَ بیگواہ کنگ بیتگیں ورنایانی یل نہ کنگ ءِ ھلاپ ءَ جدگال ڈن سر ءَ نندانک برجاہ-

گیشیں ھالانی رِد ءَ بھمن ءُ ڈنک ءَ بیگواھیں نعیم بشیر ، اسماعیل ءُ نعمان رفیق ءِ یل نہ کنگ ءِ ھلاپ ءَ آیانی کھول ءُ دمگ مردماں تربت جدگال ڈن ( ڈی بلوچ پوائنٹ ) ایم ایٹ شھدگ سر ءَ نندانک داتگ ءُ بند کتگ-

کھول گوشتگ کہ ما اشی ءَ ساری ھم زھرشانی کتگ بلے دمگی انتزامیہ ءِ نیمگ ءَ چہ مارا دلجمی دیگ ءَ پد زھرشانی ھلاس کتگ-

آیاں گْوشتگ کہ گوستگیں ڈی سی ءَ سے بیگواھیں ورنایانی یل کنگ ھاتر ءَ باز رند ءَ مارا کول کتگ بلے آ کول سرجم کنگ نہ بیتگ اَنت ھمے ھاتر ءَ لاچار بیتگ ءُ رمضان المبارکیں ماہ ءَ دگانی سر ءِ آیگ پیسلہ کتگ-

آیاں گْوشتگ کمشنر مکران ءُ ڈپٹی کمشنر کیچ بشیر احمد بڑیچ ءَ چہ سے بیگواھیں ورنایانی پہ سلامتی یل کنائینگ لوٹ کتگ ءُ دانکہ مئے ورنا یل کنگ نہ بنت لوگاں واتر نیا اَنت ایم ایٹ شھدگ سر ءَ نندانک برجاہ بیت ءُ ھچ وڑ اد ءَ پاد نیا ایں-

چہ پنجگور ءَ پاکستانی پوج ءِ دست ءَ یک مردمے دزگیر کنگ ءَ پد بیگواہ-

کھول ءِ رد ءَ سمیر ء مھمد ولی جھمنند نگور پنجگور رمزان ءِ ماہ ءَ پیش یاسین مارکیٹ ءَ زورانسری بیگواھی ءِ آماچ کنگ بیتگ-

آیانی رد ءَ سمیر بارڈر ءَ واپار ءَ بندوک بیتگ کہ آ گاڑی ءِ ھلائینگ ءَ بیتگ-

کھول ءَ آئی ءِ سلامتی ءِ یل کنگ ءِ لوٹ کتگ-

من بلوچی چون دربُرتگ؟

نبشتہ کار: ماھگل بلوچ

دی بلوچستان پوسٹ

بلوچی مئے وتی جِند ءِ راجی ءُ ماتی زبان اِنت، وتی ماتی ءُ راجی زبان ءِ وانگ ءُ زانگ سک آسان اِنت۔ پہ بلوچی وانگ ءُ دربرگ ءِ جُھد ءَ من چہ دُرستاں پیسر ھمئے توکل کُت ءُ دل بست کہ من راجی زبان ءِ سرمچارے آں پمیشکا باید اِنت مرچیگیں انٹرنیٹ ءِ زمانگ ءَ راجی زبان ءِ جُھد ءَ دلپْروش مہ بَہ آں ءُ ناں کہ اشتاپ بہ کن آں بلکیں یک راجی سرمچارے ءِ وڑ ءَ وتی جُھد ءَ مھکم ءُ برجاہ بدار آں، بِل اِت کہ من ءَ پہ وتی راجی زبان ءِ وانگ ءُ دربرگ ءَ یک ماھے بہ لگ ایت۔

چہ دْرُستاں پیسر من وت بلوچی وٹس ایپی ءُ پیسبوکی وانگجاھاں ھوار کُت۔ ریڈیو زرمبش بلوچی ءُ دِگہ تاکدیمان رندگیر(follower) بوتگ. من وتی موبائل ءِ تہ ءَ بلوچی کیبورڈ ءُ سیدگنج ڈکشنری ایرگیج ءُ ساز اِت ءُ بلوچی دَرونتانی وانگ بندات کُت۔ اولی دوئیں روچاں من بلوچی دربری ءِ سےئیں درونت(سبق) ونت ءُ پد ءَ ھمے بلوچی دَرونت دو رند ءَ دلگوش ھم کُتگ اَنت پرچا کہ پہ وانگ ءُ زانگ ءَ مارا چہ دُرستاں پیسر دَرونت وانگ ءُ دلگوش کنگی اَنت چی ءَ کہ ھر وڑیں سرپدی یے چہ وانگ ءَ رس ایت۔ چہ ایشی ءَ پد تاں سے روچ ءَ زُبان دوستی ءُ راجدوستی نبشتانکانی وانگ ءَ گلائیش بوت آں۔ بلوچی وانگ ءِ وھد ءَ من ءَ سرپدی رس اِت کہ زبان ءُ زبان دوستی ءِ ارزشت چے اِنت؟ وانگ چے ءَ گْوش اَنت؟ ننبشتہ چے ہے ءُ لبزانک ءِ مانا چے اِنت؟

گِند ئے ما بلوچ ایں، بلوچی وَ مئے وتی جِند ءِ زُبان اِنت پمیشکا ما دْراہ بلوچی ونت کن ایں، سرپد ھم بہ ایں۔ گّڑا باید اِنت ما مُدام بلوچی دَرونت ءُ بُنرھبند(گرائمر) ءَ وانان ءَ وتی راجی زبان ءِ دربرگ ءِ جُھد بہ کن ایں۔ اگاں کسے بلوچی وانگ ءَ نزُور اِنت، بزانکہ دَرونتاں سرپد نہ بیت گُڑا چہ شوشل میڈیا ءَ بلوچی دربرگی تامُراں بچار ایت ءُ تامُرانی تہ ءَ ھم شریں وڑے ءَ سرپدی رس ایت ئِے۔ مرچی مئے راج ءِ بازیں بلوچ بْرات ءُ گْوھاراں پہ راجی زُبان ءِ دیمروی ءَ بلوچی وٹس ایپی ءُ پیسبوکی وانگجاہ اڈ کُتگ ءُ راج ءِ نودربراں وانینگ ءَ اَنت کہ زوت بلوچی وانگ ءُ نبیسّگ راج ءِ تہ ءَ البار بہ بیت۔ گُڑا ھورت بچار ئے اے جُھد ءَ ھر زُبان دوست ءُ راجدوستیں مھلوک ءَ باسکی زُورگی اِنت، مارا گوں ھمے زُبان دوستیں جُھدکاراں ھمراھداری کنگ لوٹ ایت پرچا کہ بلوچی وت وانگ ءُ راج ءِ وانینگ مئے تیوگیں راج ءِ زمہ واری اِنت۔

ما گوں شُما دزبندی کن ایں کہ شُما اشتاپ مہ بَہ اِت بلکیں پیش ءَ بلوچی دَرونت ءُ نبشتانکاں وانان ءَ دلگوش بہ کن اِت کہ شما اول بلوچی سْیاھگ ءُ نبشتہ رھبند ءَ سرپد بِہ بَہ اِت ءُ پد ءَ کم کم ءَ نبیسّگ ءَ ھیل بہ کن ات۔ وھدیکہ شما نبشتہ کن اِت گُڑا وتی ھر نبشتگیں گالرِداں وت ھم چمشانکے بدے اِت بزانکہ دوبر وت وانان ءَ وتی رَدیاں وت ھم راست کنگ ءِ جُھد بکن اِت پرچا کہ چہ ردیانی راست کنگ ءَ مارا بلوچی ونتگیں دَرونت ھم تازگ بنت۔

اگاں ما وتی دزھُورکی ءَ بلوچی بِہ وانین ایں گُڑا بزانکہ ما وت دربرگ ءَ ایں، بِل اِت کہ ما رَدی بہ کن ایں۔ اگاں ما رَدی کنگ ءَ ایں گُڑا ایشی ءِ متلب ایش اِنت کہ ما جُھد کنگ ءَ ایں پرچا کہ رَدی وَ کار کنوکیں مردم کن اَنت، تھنا جھدکاریں مردم ءِ دست ءَ ردی بیت، ھما کہ ھچ کار نہ کن اَنت ءُ بے کاری ءَ وتی وھد ءَ زوال کن اَنت گُڑا آیانی دست ردی وَ نہ بیت پمیشکا باید انت ما ھر کس پیسر بلوچی درونتاں وت بہ وان ایں ءُ پد ءَ وتی ھمُک دربُرتگیں دَرونت ءَ راج ءَ ھم بِہ وانین ایں۔

ما چہ رَدیاں مہ تُرس ایں بلکیں چہ ردیاں دربر ایں۔ اگاں شما مرچی بلوچی زُبان ءِ نودربر اِت گُڑا باندات ءِ اُستاد ھم بَہ اِت، بزانکہ دلپروش وَ انّا بلکیں مارا بلوچی زُبان ءِ سرمچار بوگ لوٹ ایت، بلوچی وانینگ لوٹ ایت۔ اگاں ما دْراہ ھمے داب ءَ جُنزان بَہ ایں گُڑا ما زیت وتی راجی زُبان ءِ نبشتہ ءَ دربر ایں ءُ راجی زُبان ءِ بلاھیں نبشتہ کار ءُ شائِر جوڑ بہ ایں۔

بزانکہ باید اِنت ما اِشتاپ مہ بَہ ایں، وتی کسانیں کلوہ ءُ نبشتانکاں یکبرے وت بہ وان این ءُ آیانی رَدیاں راست بِہ کن ایں۔ لبزانکی چیدگاں ماں راستیں جاھاں جن ایں ءُ ھمُک گالرِد ءَ شریں وڑ ءَ سنج بہ کن ایں۔ گِند ئے رَدیاں راست کنان ءَ مئے نبشتہ ءِ سْیاھگ راست بیت، جُھد بہ کن ایں کہ دگرانی نبشتانکاں وانان ءَ آیانی رَدیاں راست بہ کن ایں یا نوٹ بہ کن ایں کہ چے رَد نبشتگ ئِے؟ انچوشکہ ما جُھد ءَ ایں کہ مئے بلوچی نبشتہ راست بہ بیت پمیشکا باید اِنت ما بزان ایں کہ نبشتہ چے ءَ گْوش اَنت ءُ نبشتہ ءَ چُنت کاریچ، بزانکہ گام اَنت؟

نبشتہ ءِ سے مستریں کاریچ اَنت۔ اولی کاریچ ءَ نبیسّوک جیڑ ایت کہ من چے نبشتہ بہ کن آں؟ دومی کاریچ ءَ آ وتی نبشتہ نبیس ایت سرجم کنت۔ سیمی لازم ءُ مستریں کاریچ ءَ آ وتی نبشتہ کُتگین ءَ وت وان ایت ءُ وتی نبشتہ ءِ رَدیاں راست کنت۔ چیزے پہ نبیسگ ءَ شموشتگ ئِے گُڑا ھوار ئِے کنت۔

ھمے وڑ ءَ آئی ءَ دَرونت ھم تازگ ءُ مُدام یات بنت۔ باید ما ھم وتی راجی زبان ءَ ھمے داب ءَ نبیسگ ءُ وان ایں ءُ راج ءَ ھم بہ وانین ایں۔

بلوچ راج ءِ ورناھیں وانِندہ شالا زُبان دوست ءُ راجدوست بہ بات اَنت ءُ بلوچی شالا دیمروی بکنات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

ٹی ٹی پی ءِ جنگ؟

نبشتہ کار: آئیشہ بلوچ

دی بلوچستان پوسٹ

یک نیمگ ءَ بلوچستان ءِ تہ ءَ پاکستانی لشکر چہ راجی لشکر بی ایل اِے ءِ دست ءَ پْروش ورگ ءَ اَنت دومی نیمگ ءَ پشتونستان ءِ تہ ءَ ھم یک بلاھیں جنگے یکشل ءَ برجاہ اَنت کہ اود ءَ ھر روچ پاکستانی پوج ءِ پلہ مرزیں مُلا ءُ بریں مناپک پزالرھمان جمائت ءِ مُلا کُشگ بنت۔ چہ ایشی ءَ ابید نیکراھی گل ٹی ٹی پی(تھریک تالبان پاکستان) ءِ جنگ ھم سک تْرُند اِنت۔ چہ رمزان ماہ ءِ بُنگیج ءَ ٹی ٹی پی ءَ پاکستانی لشکر ءُ پولیس ءِ سر ءَ وتی جنگی اُرش تْرند کنگ بندات کُت۔ چہ گْوستگیں آدینگ بزانکہ 14 مارچ ءَ ٹی ٹی پی ءَ آپریشن الھندک(الخندق) بُنگیج کُت کہ زوت پاکستانی لشکر تیوگیں پشتونستان ءَ بِہ گِر تا روالپنڈی ءُ اسلام آباد ءَ بیرانی ءِ آماچ بہ بیت ءُ زیت پاکستانی پوج پْروش بہ وارت پد ءَ اوگانستان ءِ وڑ ءَ پاکستان ھم شرھی اسلامی رھبندانی رِد ءَ سرکارے اڈ دیگ بہ بیت۔ بزانکہ اے وھد ءَ پاکستان بازیں جنگی سنگراں گٹ اِت۔ توری مشکاپ بولان ءِ ٹرین اُرش ءُ نوشکی ءِ ارش بہ بیت یا توری پشتونستان ءِ دمگ بنون کینٹ کہ اود ءَ ماں یکیں روچ ءَ سد ءُ دو سد کچ ءَ پاکستانی لشکر بیران بوتگ، انی پاکستانی لشکر ءِ سر ءَ ھمے وڑیں جنگی اُرشانی گُمان ھر روچ ءَ اِنت۔

ٹی ٹی پی 2007 پاکستانی جھادی جنگولی گلاں اڈ داتگ کہ آئی ءِ تہ ءَ گیشتر پشتون مُلا اَنت۔ چوناھا ٹی ٹی پی وت یک سرجمیں گلے نہ اِنت بلکیں ایشی ءِ تہ ءَ جمائت الھرار، ھاپز گُلبھادر ءِ گل ٹی ٹی جی اور دِگہ بازیں گلے ھوار اِنت کہ پاکستان ءِ تہ ءَ اسلامی رِد ءُ رھبندے آؤرگ لوٹ اَنت۔ پاکستانی پوج ءُ میڈیا پروپاگنڈہ کنت ءُ گْوش ایت کہ بی ایل سے ءُ ٹی ٹی پی یک اَنت۔ بریں انڈین میڈیا ھم پاکستان ءِ گپاں دپ ءَ زُور ایت کہ ٹی ٹی پی ءَ چہ اوگانستان ءَ کُمک رسگ اَنت، بلوچ بے وارسیں راجے پمیشکا ٹی ٹی الی بلوچ راجدوستی ءِ گل بی ایل اے ءَ کُمک کنگ ءَ اِنت

البت بلوچ راجی آجوئی لوٹوکیں گھیگری گل چہ ٹی ٹی پی ءَ چَپ(اُلٹ) اَنت۔ بلوچ گوں پنجابی ءُ پاکستان ءَ ھچ وڑیں سْیادی یے نہ دار ایت پمیشکا بلوچ راج چہ 27 مارچ 1948 ءَ وتی راج آجوئی ءُ وتی ڈیھ ءِ وتواجھی ءَ جُھد ءَ اِنت۔ بلوچ یک آزاد ھیال ءُ راجمستری ءِ منّوگِریں چاگِردے دار ایت، بلوچ دود ءُ رواج ءِ رِد ءَ بلوچیت وت یک سرجمیں رھبندے ءُ نیکراھی بنی آدم ءُ ھُدا ءِ یک نیکراھی سْیادی یے پمیشکا راجکاری(سْیاست) ءَ گوں نیکراھی ءَ ھچ وڑیں سْیادی نیست پمیشکا نیکراھی گل ٹی ٹی پی ءُ بلوچ راجدوست ءُ سرمچارانی پگر ءُ سسّا جُتا اَنت۔۔گِند ئے ٹی ٹی پی ءِ جنگول گیشتری ءَ پشتون مُلا اَنت۔راجدوستییں پشتون ھم ٹی ٹی پی ءِ ھلاپ اَنت یا گُل ھان اَنت۔

البت بلوچ راجی سرمچار پہ بلوچستان ءَ آجوئی ءُ بلوچ راج ءِ وتواجھی ءَ جنگ ءَ اَنت ءُ سرجمیں بلوچ راج توری دُنیا ءِ ھر کُنڈے ءَ بہ بنت وتی راجی سرمچارانی سر ءَ پھر ءُ ناز کن اَنت۔ بلوچ راجی آشوب بلوچستان ءِ ھر میتگ ءُ ھنکین ءَ سر بوتگ۔ دُنیا ءِ دیم ءَ بلوچ راج ءِ سِلاھبندیں جُھد یک آزات ھیال ءُ وتوجھی ءِ جُنزے زانگ بیت بلے ماں جھان ءَ ٹی ٹی پی یک دھشت گردی پجّارے دار ایت۔ بلوچ یک جُتا ءُ سرجمیں راجے کہ چہ 1948 ءَ پہ وتی راجی آجوئی ءَ جُھد ءَ اِنت۔

البت پاکستان ءِ انیگیں مُلکاری، گوں اوگان تالبان ءُ ھندوستان ءَ زھر ءُ جنگی جاور پنجاب ءِ تہ ءَ پوج ءِ ھلاپ ءَ نپرت ءُ ٹی ٹی پی ءِ جنگ اِے دْراہ بلوچ ءَ پائدگ دے اَنت۔ زوت ٹی ٹی پی جنگ ءَ ھم پنجاب ءِ تہ ءَ بارت ءُ سلام آباد ءُ روالپنڈی ءَ دستیگ کنت۔ پاکستان ءِ اِے نگیگیں جاور پہ بلوچستان ءِ آجوئی ءِ مستاگے۔ باید اِنت بلوچ راج پہ راجی آجوئی ءَ وت ماں وت یکجاہ ءُ ￶یکمُشت بہ بیت۔ بزانکہ ھمے میان ءَ بی ایل اے ھم جنگ ءَ تْرُند کنان کنت۔ پد ءَ پاکستان ءِ لشکر چہ بلوچستان ءَ درکپ ایت ءُ بلوچ راج ڈیرہ گازی ھان ءَ بِگر داں سند ءِ ایردستیں بلوچ دمگ ءُ کراچی ءَ ھوار وتی سرجمیں بلوچستان ءَ دستیگ ءُ واجھی کنت۔

دومی نیمگ ءَ باید اِنت بی ایل اے ءُ راجی لشکر بْراس کوہ سلیمان ءِ دمگ انچوشکہ ڈیرہ مُراد جمالی، جھل مگسی، ڈیرہ بگٹی، جیکب آباد ءُ ڈیرہ گازی ھان ءِ دمگاں ھم بلوچ راجدوستی آشوب ءُ سرمچاراں ودی کنگ ءِ جُھد بہ کنت پرچا کہ مارا وتی سرڈگار ءِ ھمُک انچ آجو کنگ اِنت۔ چہ آجوئی ءَ پد ءَ ھمے بلوچ راج ءَ ماں وانگجاھاں براھوئی ءُ بلوچی زبان ءَ دژمن ءِ زُلم ءُ جبر کِسہ ءُ راجدوستی وانینگ بیت کہ پاکستان ءِ دْروگیں مھر ءُ دوستی شُودگ ءُ ھلاس بہ بنت۔

شالا بلوچ راج وت ماں وت تپاک ءُ بلوچستان آزات بات، بلوچ راج وتی ماں وت ھمکوپگ، ھمگام ءُ ھمدرد بہ بات۔ شالا بلوچ راج یکمُشت ءُ راجمستری(جمھوری) بلوچستان دیمروی بکنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ چہ نوشکی ءَ پاکستانی پوج ءِ دست ءَ بیگواہ بیتگیں یازدہ مردمانی پجّار بیتگ اَنت کہ آیانی وانگجاہ ءِ نودربر ھم ھوار اَنت-

بلوچ یکجھتی کمیٹی نوشکی ءِ رِد ءَ شانژدہ مارچ دوھزار ءُ بیست ءُ پنچ ءِ سُھب ءِ دہ ءِ نزیک ءَ، اسٹیشن ءُ اشی ءِ کش ءُ گوراں چہ پاکستانی پوج ءَ سے کسان سالی ئیں بچک، ڈرائیور، مزدور ءُ راھگوازاں ھوار درزنانی مردم زورانسری بیگواہ کتگ انت-

زورانسری بیگواھیں مردمانی تہ ءَ شش تبک ءِ چاردہ سالی ئیں لیاقت بلوچ ء عبدالخالق، شش تبک ءِ چاردہ سالی ئیں نودربر عدنان بلوچ ء محمد حیات جھمنند غریب آباد، نوشکی، ھپت تبک ءِ نودربر پانزدہ سالی ئیں ضیاء الرحمان ء میر احمد جھمنند غریب آباد نوشکی، محمد عثمان بلوچ ء حاجی محمد حسن جھمنند زور آباد نوشکی، زبیر احمد ء محمد داؤد جھمنند چاگی، عطا الرحمن ء زین العابدین جھمنند چاگی، عمر شاہ ء کرم شاہ جھمنند پدگ چاگی، طاھر خان ء شیر دل خان، جھمنند بدگ چاگی، حافظ شکور ء حامد خان جھمنند پدگ چاگی، جلیل احمد جھمنند کلات، ثناء اللہ جھمنند شال ھوار اَنت-

بی وائی سی ءِ رِد ءَ اے نکش کتگیں ناماں اَبید دگہ مردم ھم بیگواہ انت-

درشان ءِ تہ ءَ گوشگ بیتگ کہ انّیگاں وئیلاں چہ، بیگواھیں مردمانی کھول ءُ مھلوک ءِ تہ ءَ تکانسری ودی بیت کہ آیانی بیگواھیں مردمانی جان ءَ ھترہ ءِ تُرس اِنت-

دیمتر ءَ گْوشتگ کہ کسانی سالی ئیں چُک ءُ بے گناھیں مردمانی بیگواہ کنگ انسانی ھکانی سنگین ءِ ھلاپ ورزی اِنت- بلوچستان ءَ انسانی ھکانی ھلاپ ورزیانی سر ءَ میان اُستمانی ھکانی ادارہ سنجیدگی ءَ دلگوش کنگ ءِ الّمی اِنت-

چہ شال ءَ پاکستانی پوج دست ءَ بیگواہ کنگ بیتگیں کلات ءِ جھمنند فھیم ءُ خادم حسین ءِ کھول ءَ آیانی یل نہ کنگ ءَ منگچر ءِ ھند سر ءَ شال کراچی شھدگ یکرندے پد ءَ بند کتگ-

کھول گوشگ اِنت کہ دمگی انتزامیہ ءَ بیگواھیں فھیم ءُ خادم حسین یل کنائینگ ھاتر ءَ کہ مھادہ کنگ بیتگ اشی ءِ سر ءَ گامگیج زیرگ نہ بیتگ-

شھدگ بندی ءَ چہ دگ دوئیں نیمگاں گاڑیانی دراج دراجیں لین لگ اِیتگ ءُ مزنیں کچے ءَ مساپر پسّ اِتگ اَنت-

سے روچ ءَ ساری بیتگیں فھیم ءُ خادم حسین ءِ کھول ءَ دمگی انتزامیہ گوم ءَ مھادہ ءَ پد چل کلاکاں چہ راجی شھدگ سر ءَ برجاھیں نندانک ھلاس بیتگ-

فھیم احمد ءُ خادم بلوچ دوئیں انٹرمیڈیٹ ءِ نودربر اَنت کہ آ شپ ءِ ساھت یک وھد ءَ سمنگلی دگ ءَ برجاھیں چہ جناح ٹاؤن ءَ آوار جتگ ءُ بیگواہ کتگ اَنت-

پاکستانی لشکر ءَ 23 مردمانی لاش بلوچستان ءِ بنجاھی شھر شال ءِ سول ھسپتال ءَ سر کتگ اَنت۔ گوشگ بیگ انت دیم پہ دیمی ءَ جنگ بیتگ انت-

فورسز ءِ واکداراں اے بابت ءَ ھچ وڑیں ھال ءُ اھوال نہ داتگ کہ اے مردم کجا کُشگ بوتگ اَنت ءُ جتا جتائیں سیکورٹی اھوالانی تہ ءَ ٹاہ دیگ ءَ اَنت کہ اے مردم بولان آپریشن ءَ کُشگ بوتگیں لاش اَنت۔

دومی نیمگ ءَ زورانسری بیگواھیانی ھلاپ ءَ جد ءُ جھد کنوکیں گل وائس فار بلوچ مسنگ پرسنز ءَ شال ءِ ھسپتال ءَ لاشانی آرگ ءِ ھال راست کتگ-

وائس فار بلوچ مسنگ پرسنز ءِ رد ءَ گوستگیں روچ ءَ پورسز ءَ 23 ٹپ ءُ ٹوریں لاش شال ءَ آورتگ اَنت لورسز ءِ ٹاہ اِنت کہ اے لاش یک انکاؤنٹرے ءَ بیران بوتگ اَنت مارا ترس اِنت کہ اے لاش زوراکی ءَ بیگواھیں مردمانی بوت کن اَنت۔

زانگ بہ بیت کہ بلوچستان ءِ بازیں وئیلاں پاکستانی لشکر ءَ پیسر ءَ دزگیریں مردم دروگیں انکاؤنٹر ءِ تہ ءَ کُشتگ اَنت ءُ آ انکاؤنٹر گْوشگ بیتگ اَنت وھدے کہ اے مردم پد ءَ زوراکی ءَ بیگواہ کنگ بیتگیں مردمانی ناماں پجار کنگ بوتگ اَنت۔

اے درگت ءَ گل ءَ چہ بلوچستان ءَ زوراکی ءَ بیگواھی آماچیں مردمانی سیاد ءُ وارساں چہ لوٹ کتگ کہ آ لاشانی چارگ ءِ ھاترا سول ھسپتال شال ءَ بہ رو اَنت۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ جتا جتائیں جاہ شال، تربت، ھرنائی، مستونگ، پنجگور، ھزدار، نصیر آباد ءُ جعفر آباد ءَ 10 جتا جتائیں اُرشاں زوگریں پاکستانی پوج آئی ای ڈی اُرشانی نشانگ کتگ – ھمے وھد ءَ پولیس ءُ لیویز پورسز ءِ سلاہ دستیگ کتگ انت، ھمے وڑ ڈیتھ اسکواڈ ءِ کارندہ نشانگ کتگ – اے اُرشاں پاکستانی پوج ءِ پنچ کارندہ مرتگ انت ءُ 14 زدگ بیتگ انت ءُ سَے گاڑی تباہ بیتگ انت-

جارکش ءَ گوشتگ 15 مارچ ءِ شپ ءَ بی ایل اے ءِ سرمچاراں شال ءَ کرانی دگ ءَ اے ٹی ایف ءِ سَے گاڑیاں ھواریں کاروان ءَ یک گاڑی یے ریموٹ کنٹرول آئی ای ڈی ءِ نشانگ کتگ- تراک ءِ زد ءَ اتکگیں یک کارندھے مرتگ ءُ شش زدگ بیتگ انت – اُرش ءَ آیانی گاڑی سرجم ءَ تباہ بیتگ-

جیئند بلوچ ءَ گوشتگ شال ءَ یک دگہ کاروائی یے 14 مارچ ءَ آدینگ ءِ روچ ءَ سرمچاراں کیچی بیگ تھانہ ءِ سر ءَ دستی بمبے ھما وھد ءَ چگل داتگ کہ پورسز ءِ کارندہ بنجاھی دروازگ ءَ پترگ ءَ بیتگ انت ءُ تراک ءِ زد ءَ تھانہ ءَ اوشتوکیں یک گاڑی ستکگ ءُ پُر بیتگ –

جارکش ءَ گوشتگ 15 مارچ ءِ سھب ءَ بی ایل اے ءِ سرمچاراں تربت ڈی بلوچ ءِ نزیک ءَ سی پیک دگ ءِ سر ءَ زورگریں پاکستانی پوج ءِ کاروان ءَ ھوارین یک گاڑی یے ریموٹ کنٹرول آئی ای ڈی ءِ نشانگ کتگ- تراک ءِ آسر ءَ دشمنیں پوج ءِ سَے کارندہ مرتگ انت ءُ کم چہ کن سَے زدگ بیتگ انت ءُ گاڑی تباہ بیتگ-

جارکش ءَ گوشتگ 14 مارچ ءَ آدینگ ءِ روچ ءَ ھرنائی ءِ دمگ کوچیالی ءَ بی ایل اے ءِ سرمچاراں زورگریں پاکستانی پوج ءِ بمب ڈسپوزل اسکواڈ ءِ سَے پندی کارندہ ریموٹ کنٹرؤل آئی ای ڈی ءِ نشانگ کتگ انت- اے اُرش ھما وھد ءَ کنگ بیتگ کہ آ ریل ءِ ٹریک ءَ کلیئرنس ءَ دزبند بیتگ انت ءُ تراک ءِ آسر ءَ یک کارندھے جاہ پہ جاہ ءَ مرتگ ءُ دو زدگ بیتگ اَنت-

جارکش ءَ گوشتگ 16 مارچ ءِ شپ ءَ پنجگور ءِ دمگ جائین پروم ءَ بی ایل اے ءِ سرمچاراں زورگریں پاکستانی پوج ءِ جوڑ کرتگیں وتگڑیں ڈیتھ اسکواڈ ءِ یک بنجلے ءِ سر ءَ اُرزش کتگ ءُ چریشی ءَ ڈیتھ اسکواڈ ءِ دو کارندہ سک زدگ بیتگ انت-

جارکش ءَ گوشتگ 15 مارچ ءَ سرمچاراں جعفر آباد ءَ یل پولیس ءِ چوکی ءِ سر ءَ اُرش کتگ – چریشی ءَ پورسز ءِ کارندہ نشانگ کتگ انت ءُ چریشی ءِ آسر ءَ یک کارندھے زدگ بیتگ-

جارکش ءَ گوشتگ 14 مارچ آدینگ ءِ روچ ءَ بی ایل اے ءِ سرمچاراں پنجگور ءَ سی پیک دگ این -85 ءَ کسٹم ءِ چیک پوسٹ ءِ سر ءَ اُرش کتگ ءُ کارندھانی سلاہ پچگپتگ انت – پد ءَ کارندہ سرپد کتگ ءُ یل داتگ انت-

جارکش ءَ گوشتگ 12 مارچ چار شمبے ءَ بی ایل اے ءِ سرمچاراں کلات ءِ دمگ مھلبی ءَ لیویز پوسٹ ءِ سر ءَ اُرش کتگ ءُ کارندھانی سلاہ پچگپتگ انت پد ءَ لیویز کارندہ یل داتگ انت – ھمے وھد ءَ سرمچارانی سر ءَ اُرش کنگ ءِ جھد ءَ یک کارندھے زدگ بیتگ-

جارکش ءَ گوشتگ 11 مارچ ءَ ھزدار ءِ دمگ نال ءَ گروک ءَ سرمچاراں لیویز پورسز ءِ چیک پوسٹ ءِ سر ءَ اُرش کتگ ءُ آیانی سلاہ پچگپتگ انت – ھمے وھد ءَ پورسز ءِ سلاہ ءُ پرپٹ دستیگ کتگ انت ءُ کارندہ یل داتگ انت-

جارکش ءَ گوشتگ 11 مارچ ءَ مستونگ ءِ شھر ءَ بی ایل اے ءِ سرمچاراں یک پولیس چوکی ءِ سر ءَ اُرش کتگ ءُ پنچ کارندہ دزگیر کتگ انت ءُ سلاہ پچگپتگ انت کہ ایشانی توک ءَ سَے کلاشنکوف، دو پستول ءُ دگہ لشکری ساز ءُ سامان ھوار انت پد ءَ سرمچاراں پولیس کارندہ سرپد کتگ ءُ یل داتگ انت-

جارکش جیئند بلوچ ءَ گوشتگ بلوچ لبریشن آرمی اے دراھیں اُرشانی زمہ واریاں من ایت ءُ آپریشن درہ بولان ءُ نوشکی ءِ بارو ءَ زوت سرجمیں درشان شنگ کنگ بیت اِنت-

بلوچستان ءِ دمگ چہ نوشکی ءَ پاکستانی پوج ءَ دو کسان سالیں ورنا زورانسری آوار جنی ءَ پد ناشناسیں جاھاں برتگ انت-

بیگواہ بیتگینانی پجار عدنان حیات ءُ ضیا الرھمان ء میر احمد ءِ ناماں زانگ بیتگ انت-

ھردوک ھپتمی ءُ ششمی کلاس ءِ نودربر انت-

اے گوستگیں روچ ءَ پاکستانی پوج ءَ ایس بی یونیورسٹی ءِ نزیک ءَ دزگیر کتگ ءُ برتگ انت-

بلوچستان ءِ دمگ ھزدار ءَ لوگے ءِ سر ءَ بمب تراکے ءَ یک کماشے ءَ ھوار چار زھگ ٹپی بیتگ انت-

گیشیں اھوالانی رد ءَ ھزدار ءِ دمگ کوشک ءَ ناشناسیں مردماں یک لوگے ءِ سر ءَ دزبمبے چگل داتگ چریشی ءَ یک کماشے ءُ چار زھگ ٹپی بیتگ انت-

ٹپی بیتگیناں ایس ایچ او سٹی قادر شیخ ءِ کماش ءُ ٹپی بیتگیں زھگاں دو زھگ آئی ءِ چُک گوشگ بوگ ءَ انت-

ٹپی بیتگیں مردم زوت ھسپتال ءَ برگ بیتگ انت ءُ پولیس وئیل ءِ پٹ ءُ پول ءَ کنگ ءَ انت –