TBP Balochi

بلوچستان ءِ بنجاھی شھر شال ءَ پولیس ءَ بلوچ یکجھتی کمیٹی ءِ زھرشانی نندانک ءِ سر ءَ بیڑ برتگ ءُ ءُ لاشاں ھوار بی وائی سی ءِ آرگنائزر ڈاکٹر ماہ رنگ ءَ ھوار بازیں مردمے دزگیر کتگ ءُ گون وت برتگ انت-

بی وائی سی ءِ رد ءَ مروچی سھب ءِ ساھت پنچ ءُ نیم پولیس ءُ دگہ ادارھاں شال ءَ دھرناگاہ ءَ بیڑ برتگ ءُ مردم لٹ ءُ کٹ کتگ ءُ ایر لاش چست کتگ ءُ ایشی ءِ ھواری ءَ بازیں مردم دزگیر کتگ ءُ برتگ انت-

زانگ بہ بیت گوستگیں روچ ءَ بی وائی سی ءَ وتی بنجاھی رھشون بیبگر بلوچ، آئی ءِ برات ڈاکٹر ھمل ، ڈاکٹر الیاس ءُ سعیدہ بلوچ ءَ ھوار دگہ زالبولانی دزگیری ءِ ھلاپ ءَ زھرشانی کتگ ات ءُ ھمے وھد ءَ پولیس ءُ دگہ ریاستی ادارھاں زھرشانی ءِ سر ءَ بیڑ برتگ ات ءُ تیرگواری کتگ ءُ اود ءَ سَے مردم بیران ءُ بازینے ٹپی بیتگ ات-

چرے وئیلانی ھلاپ ءَ بی وائی سی ءَ لاشانی ھمراھی ءَ دوشی دھرنا داتگ ءُ اود ءَ مروچی سھب ءَ پولیس ءَ دوبر بیڑ برتگ ءُ لاش برتگ انت-

گوستگیں شپ ءَ بی وائی سی ءَ سرجمیں بلوچستان ءَ ھرتال ءِ جار جتگ ءُ ات ءُ مروچی بلوچستان ءِ بنجاھی شھر کیچ ءَ ھوار دگہ جاھاں ھم ھرتال ءِ اھوال ھست انت-

ایمسنٹی انٹرنیشنل ءَ شال ءَ پُرایمنیں بلوچ زھرشانی کنوکانی سر ءَ لٹ ءُ کٹ ءُ تیرگواری ءِ وئیل ایرجتگ انت ءُ پٹ ءُ پول ءِ لوٹ کتگ-

چہ شال ءَ اھوالانی رد ءَ پولیس ءِ تیرگواتی ءَ کم چہ کم سَے زھرشانی کنوک بیران ءُ بازیں کچے ءَ ٹپی بیتگ انت ، ایمنسٹی انٹرنیشنل اے وئیل ءَ پاکستانی واکداراں انسانی زندگی ءِ بے کدر ءُ شھریانی ھکانی سنگینیں لگتمالی گوش ایت-

انسانی ھکانی گل ءَ گوشتگ واکداراں پُر ایمنیں زھرشانی ءِ ھک تچک ءَ لگتمالی کتگ ءُ بازیں کچے ءَ دزگیری ءُ آنسو گیس کارمرد کتگ انت ءُ پُر ایمنیں زھرشانی کنوکانی سر ءَ ھترناکیں سلاھانی کارمرد گیر کانونی کارمرد کتگ کہ یک بژنیگ ءُ گیر انسانی املے-

ایمنسٹی انٹرنیشنل ءِ رد ءَ شال ءَ موبائل نیٹ بند کنگ بیتگ کہ چریشی ءِ سبب ءَ لس اھوالانی گپ دارگ بیتگ انت-

ایمنسٹی انٹرنیشنل ءَ پاکستانی واکداراں لوٹ کتگ کہ آ پر ایمنیں زھرشانی کنوک ءَ سر ءَ گیر کانونی کریک ڈاؤن ءَ بند بہ کنت ءُ پُر ایمنیں زھرشانی ءُ لس لیکھانی درشانی ءِ ھک ءَ بہ دنت اِنت پاکستان میان اُستمانی انسانی ھکانی زمہ واریاں سرگوز مہ کنت اِنت-

درشان ءَ گوشگ بیتگ کہ دراھیں زھرشانی کنوک کہ بس زھرشانی ءِ ھک ءَ گرگ ءُ برگ بیتگ انت آیاں سرجمی ءَ یل بہ دے اَنت-

گل ءَ واکداراں لوٹ کتگ کہ گیر انسانی تاکت ءِ کارمرد ءَ بند بہ کن انت ءُ تچکیں رنگیں پٹ ءُ پول بہ کن انت ءُ وئیلاں ھواریں مردم کانون ءِ چیر ءَ آرگ بہ بنت اِنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ سرمچاراں تمپ، مستونگ، زامران ءُ نصیر آباد ءَ چار جتا جتائیں اُرشاں پاکستانی پوج نشانگ کتگ- آئی ای ڈی اُرش ءُ سلاہ بندیں کاروائیاں زورگریں پوج ءِ پنچ کارندہ کشتگ انت ءُ نُھ کارندہ زدگ کتگ انت-

جارکش ءَ گوشتگ بلوچ لبریشن آرمی ءِ سرمچاراں گوستگیں روچ ءَ کیچ ءِ دمگ تمپ نزر آباد ءَ زورگریں پوج ءِ بیست ءُ سَے گاڑیانی کاروان ءَ ھواریں یک گاڑی یے ریموٹ کنٹرول آئی ای ڈی ءِ نشانگ کتگ- تراک ءِ آسر ءَ دشمنیں پوج ءِ گاڑی سرجم ءَ تباہ بیتگ ءُ ایشی ءَ سواریں نَھ کارندھاں چار کارندہ جاہ پہ جاہ ءَ مرتگ انت ءُ پنچ سک زدگ بیتگ انت-

آئی ءَ گوشتگ مروچی بلوچ لبریشن آرمی ءِ سرمچاراں مستونگ ءِ دمگ کھڈکوچہ ءَ زورگریں پاکستانی پوج ءِ بنجل ءِ دیم ءَ دو کارندہ ھما وھد ءَ نشانگ کتگ انت کہ آ پند ءَ روگ ءَ بیتگ انت – سرمچارانی اُرش ءَ یک کارندھے ھما جاہ ءَ مرتگ ءُ یکے سک زدگ بیتگ ءُ سرمچاراں دشمن ءِ سلاہ دستیگ کتگ انت-

گیش گوشتگ بلوچ لبریشن آرمی ءِ سرمچاراں کیچ ءِ دمگ زامران آرچنان کَلکی ءِ ھند ءَ پاکستانی پوج ءِ پوسٹ وتکار ءُ مزنیں سلاھانی گون ءَ نشانگ کتگ کم چہ کم دشمن ءِ سَے کارندہ زدگ کتگ انت ءُ ھمے وھد ءَ دشمن ءَ سرویلنس ڈرون ءِ کارمردی کتگ چریشی ءَ سرمچاراں ڈرون جتگ ءُ دور داتگ- اُرش ءَ دشمنیں پوج ءِ کمیونیکشن ٹاور ءُ کیمرھاں تاوان رس اتگ-

آئی ءَ گوشتگ یک دگہ کاروائی یے سرمچاراں گوستگیں شپ ءَ نصیر آباد منجھو شوری ءَ پولیس ءِ تھانہ ءِ سر ءَ دزبمب اُرشے کتگ چریشی ءِ آسر ءَ پورسز ءَ جانی تاوانانی دیمپانی کنگ کپتگ-

گڈسر ءَ گوشگ بیتگ کہ بلوچ لبریشن آرمی اے درستیں اُرشانی زمہ واریاں من ایت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی بیست یک مارچ ءِ سُھب ءِ ساھت دوازدہ ءِ نزیک ءَ ھاران شھر ھندو مھلہ ءَ ڈیوٹی داروکیں پولیس کارندہ سلاہ ءَ ھوار دزگیر کتگ ءُ آئی ءِ سرکاری سلاہ دستیگ کتگ-

جارکش ءَ گْوشتگ کہ بلے پولیس انسانیت ءُ بلوچ بیگ ھاتر ابید تاوان ءَ پہ سلامتی یل داتگ-

جارکش ءَ گْوشتگ بی ایل ایف اے اُرش زمہ واری ءَ منّ اِیت ءُ بلوچستان ءِ آجو ءُ وتواجھی ءَ تاں جُھد ءِ برجاہ دارگ اِھد کن ایں-

بلوچ یکجھتی کمیٹی ءَ پولیس ءِ نیمگ ءَ زھرشانی کنوکانی سر ءَ لٹ ءُ کٹ ءُ تیرگواری ءُ بازینانی کُشگ ءُ زدگ کنگ ءِ ھلاپ ءَ باندا سرجمیں بلوچستان ءَ ھرتال ءُ زھرشانیانی جار جنگ بیتگ-

بلوچ یکجھتی کمیٹی ءَ وتی شنگ کتگیں درشان ءَ گوشتگ مروچی ریاست ءَ بلوچستان ءُ ناشرکاری ءُ زوراکی ءِ دراھیں رھبند لگتمال کتگ انت ءُ شال ءَ پُرایمنیں زھرشانی کنوکانی سر ءَ تچک ءَ تیرگواری کتگ ءُ چریشی ءَ مئے سَے ھمراہ شھید بیتگ انت ءُ بازیں کچے ءَ زدگ انت-

بلوچ یکجھتی کمیٹی ءَ گوشتگ ریاست پاکستان ءِ اے زوراکہ ءُ ناشرکاری ءِ ھلاپ ءَ سرجمیں بلوچستان بند کنگ بیت اِنت ءُ باندا سرجمیں بلوچستان سٹرڈاؤن ءُ پھیہ جام ھڑتال کنگ بیت اِنت-

گل ءَ گوشتگ شال ءَ آیانی لاشانی ھواری ءَ زھرشانی برجاہ انت شال ءِ مھلوک ءَ گوں دزبندی انت کہ زھرشانی نندانک جاہ ءَ سر بہ بنت اِنت-

بلوچستان ءِ بُنجاھی شھر چہ شال ءَ پاکستانی پوج ءِ دست ءَ بیگواہ کنگ بیتگیں ڈاکٹر الیاس گوں چُک ءَ ھوار یل کنگ بیتگ-

ڈاکٹر الیاس گوں چُک ءَ دو روچ ءَ ساری زورانسری بیگواہ کنگ بیتگ، پد ءَ آئی ءِ دزگیری پدر کتگ- ڈی سی شال ءَ ڈاکٹر الیاس بلوچ سے ایم پی او ءِ رِد ءَ جیل ءَ بند کنگ پرمان شنگ کتگ-

ڈاکٹر الیاس بلوچ گوں چُک ءَ ھوار ھدہ جیل ءَ چہ یل کنگ بیتگ-

ٍڈاکٹر الیاس بولان میڈیکل ءِ وائس پرنسپل ءُ ماھر نپسیاتے آ گوستگیں روچ ءَ زورانسری آوار جنی ءَ پد آئی ءِ دزگیری پدر کتگ ءُ جیل ءَ بند کتگ-

سروزیر بلوچستان ءَ پریس کانفرنس میان ءَ بھت جتگ کہ ڈاکٹر الیاس و ورنایانی زھن سازی کنت-

بلوچستان ءِ جتاجتائیں دمگ مچھ لیویز فورس سر ءَ بمب اُرش، ھاران ءَ پولیس سلاہ برگ بیتگ ءُ مستونگ ءَ سلاہ بنداں ایف سی سر ءَ اُرش کتگ ءُ سلاہ برتگ اَنت-

گیشیں ھالانی رِد ءَ بلوچستان ءِ دمگ مستونگ کھڈکوچہ ءِ ھند سر ءَ سنگر گپتگ ءُ ناشناسیں سلاہ بندیں مردماں پاکستانی پوج ءِ دو کارندہ ھما وھد ءَ اُرش ءِ نشانگ کتگ وھدے آ چہ اود ءَ پیادگ روگ ءَ بیتگ اَنت-

اِھوالکار رِد ءَ اُرش ایف سی ءِ بُنجل نزیک ءَ کنگ بیتگ – اُرش ءَ یک کارندھے جاہ پہ جاھی مرتگ ءُ یک سک ٹپیگ بیتگ وھدے کہ اُرشکاراں سلاہ وتی دستیگ کتگ ءُ گوں وت برتگ اَنت-

وئیل ءَ پد پولیس ءُ ایف سی مزنیں کچے ءَ وئیلجاہ ءَ سر بیتگ ءُ دمگ انگیر ءَ کتگ-

ھمے وڑ ھاران شھر ءِ دو جتاجتائیں ھنداں ھندو مھلہ ءُ شاپنگ بازار ءَ سلاہ بندیں مردماں پولیس ءُ لیویز کارندہ دزگیر کتگ ءُ آیانی سرکای سلاہ پچ گپتگ اَنت-

سلاہ بندیں مردماں پولیس کارندہ پد ءَ یل کتگ اَنت-

دومی نیمگ ءَ بولان ءِ دمگ مچھ لیویز کارندھانی گاڑی نزیک ءَ تراکے بیتگ بلے تراک ءِ آسر ءَ ھچ وڑیں جانی تاوان نہ ھال نیست-

زورانسری بیگواھیں مردمانی کھول ءَ نندانک دیان ءَ راجی شھدگ بند کتگ-

چہ مستونگ ءَ پاکستانی پوج ءِ بیڑ ءُ دزگیریاں پد زورانسری آوار جنی ءِ نشانگ بیتگیں مردمانی کھولاں دوستناکانی یل کنائینگ ھاتر ءَ مستونگ نزیک ءَ شال کراچی بُنجاھی شھدگ سر ءَ زھرشانی کنان ءَ نندانک داتگ-

کھول ءَ نندانک دیان ءَ شال کراچی دگ بند کتگ چریشی ءِ سبب ءَ گاڑیانی روگ ءُ آیگ بند بیتگ-

گوستگیں شپ ءَ پاکستانی پوج ءِ دست ءَ آوار جنگ ءُ بیگواہ کنگ بیتگیں چیئرمین ظاھر بنگلزئی، شیراز بنگلزئی ءُ سلمان بنگلزئی ءِ زورانسری آوار جنی ءِ ھلاپ ءَ کھول نواب ھوٹل ھند سر ءَ نندانک دیگ ءَ اَنت-

زھرشانی کنوکانی لوٹ اِنت کہ ھکومت آیانی بیگواھیں مردماں یل کنگ ءِ دلجمی بدنت-

بلوچستان ءِ تیابدپی شھر گوادر ءَ ناشناسیں پرپٹ سواریں مردماں تیرگواری کتگ ءُ دو مردم ٹپی کتگ انت-

اھوالانی رد ءَ تیرگواری ءَ ٹپی بیتگیں مردمانی پجار کمال ء حاجی داد مھمد ءُ لال بخش ء شوکت جھمنند دشت شولیگ ءِ ناماں زانگ بیتگ انت-

اھوالانی رد ءَ تیرگواری ءِ وئیل گوادر پاک چائنہ اسکول ءِ نزیک ءَ پیش اتکگ کہ اود ءَ ناشناسیں مردماں تیرگواری کتگ ءُ اے مردم زدگ کتگ انت-

اھوالانی رد ءَ کمال گوستگیں سال ءَ پاکستانی پوج ءَ آوار جتگ ءُ بیگواہ کتگ بیتگ ءَ پد ءَ چیزے ماہ ءَ پد آ سی ٹی ڈی ءِ دست ءَ داتگ –

آئی ءِ مردمانی رد ءَ کمال سی ٹی ڈی ءَ کورٹ ءَ پیش کتگ ءُ اود ءَ ھم یک رندے آئی ءِ دو بر آوار جنگ ءِ جھد کنگ بیتگ –

بلوچستان ءِ بُنجاھی شھر شال ءَ شپ وھد ءَ پاکستانی پوج ءَ نامی ئیں گُشندہ ءُ شائر پروفیسر نوشین قمبرانی لوگ ءِ سر ءَ بیڑبرتگ، لوگ ءَ ساڑی ئیں مردم تُرسینتگ اَنت، وئیل ءَ پد سیاسی پارٹیانی نیمگ ءَ ایر جنگ بیتگ-

شال ءَ اسپینی دگ ءَ کلی ترخام ءَ برجاہ فروفیسر نوشین قمبرانی ءِ لوگ ءِ سر ءَ شپ ءِ وھد ءَ پاکستانی چیریں ادارہ ءُ سی ٹی ڈی ءَ بیڑبرتگ بلے پروفیسر نوشین قمبرانی اود ءَ ساڑی نہ بیتگ-

کھول ءِ گوشگ اِنت کہ پاکستانی پوج ءَ بلوچ دودمان ءِ لگتمال کنان ءَ اود ءَ ساڑی ئیں کھول تُرسینتگ-

نوشین قمبرانی ءِ گْھار افشین قمبرانی ءَ چاگردی رسانکدر ءَ چہ گْوشتگ کہ شپ ساھت دو ءِ وھد ءَ پاکستانی پوج ءِ ادارہ ءُ پورسز کارندھاں چہ دیوال ءَ دور کتگ پروفیسر نوشین ءِ کمرہ پٹ ءُ پول کتگ ءُ لوگ مردم تُرسینتگ اَنت-

زانگ بہ بیت کہ نوشین قمبرانی وتی برات ءُ سیاداں ھوار دگہ بلوچ ورنایانی زورانسری آوار جنی ءِ ھلاپ ءَ پُرکار بیتگ ءُ وت یک سیاسی چاگردی کارکن بیگ ءِ ھمراھی ءَ براھوئی زبان ءِ گُشندھے ھم-

گوستگیں روچاں نوشین قمبرانی ءِ دو برات ناصر قمبرانی ءُ عبدالرحمان قمبرانی جتاجتائیں وھداں آیانی لوگ ءَ چہ زورانسری آوار جتگ اَنت وھدے کہ قمبرانی ءِ کھول ءَ چہ اے وھد ءَ ھشت مردم زورانسری بیگواہ کنگ بیتگ اَنت-

زورانسری آوار جنی ءِ وئیل ءِ ھلاپ ءَ کھول پریس کانفرنس کنان ءَ گْوشتگ کہ ناصر قمبرانی ءُ دگہ اگاں بیست چار کلاکانی تہ ءَ یل کنگ نہ بیت اَنت گُڑا زھرشانی ءِ راہ ءَ گچین کن ایں-

بلوچستان ءَ گوستگیں چیزے روچانی میان ءَ زورانسری آوار جنیانی وئیل ءِ تہ ءَ گیشی گندگ اَتکگ اود ءَ شال ءَ بلوچ یکجھتی کمیٹی ءِ بُنجاھی راھشون بیبرگ بلوچ ءُ برات حمل بلوچ زورانسری بیگواہ کنگ بیتگ اَنت-

ھمے وڑ شپ وھد ءَ بولان میڈیکل کالج ءِ وائس پرنسپل ءُ ماھر نفسیات ڈاکٹر الیاس بلوچ ءِ زورانسری آوار جنی ءَ پد آیانی دزگیری پدر کتگ ءُ جیل ءَ برتگ اَنت-

ھمے وڑ زورانسری آوار جنی ءَ اسرمند سعیدہ بلوچ آوار جتگ ءُ جیل ءَ برتگ-

بلوچ یکجھتی کمیٹی ءِ رِد ےَ بید دگہ کانونی کاروائی ءَ مردماں جیل ءَ چہ ریمانڈ دیگ بیگ ءَ اِنت- وئیل ھلاپ ءَ مروچی بلوچ یکجھتی کمیٹی ءَ شال ءَ زھرشانی نندانک کال داتگ-