TBP Balochi

بلوچ راھشون ڈاکٹر ماہ رنگ بلوچ ءِ گْھار ءَ گْوشتگ کہ بیست چار کلاکاں چہ گیش گوستگ بلے منی گْھار ماہ رنگ بلوچ آمیدگس ءَ پیش کنگ نہ بیتگ ءُ نانکہ آئی ءَ وتی وکیل ءَ چہ گپ کنگ اجازت دیگ بیگ ءَ اِنت-

آئی ءَ گْوشتگ مروچی سُھب ءَ ما جیل ءِ ڈن ءَ دو کلاکاں چہ گیش ودار کتگ بلے آئی ءَ گوں ملّگ مکن کنگ بیتگ ءُ گُد ءُ ورگ سر کنگ ھم اجازت دیگ بیگ ءَ نہ اِنت-

زانگ بہ بیت کہ بلوچ یکجھتی کمیٹی ءِ سروک ڈاکٹر ماہ رنگ بلوچ گوستگیں روچاں پاکستانی پوج ءَ ھما وھد ءَ دزگیر کتگ وھدے آ پوج ءِ تیرگواری ءَ چہ بیران بیتگیں مردمانی میتانی ھمراھی ءَ نندانک ءَ ساڑی بیتگ اَنت-

ماہ رنگ بلوچ ءُ دگہ بی وائی سی کارکنانی دزگیری ءِ ھلاپ ءَ بلوچستان ءَ زھرشانی برجاہ اِنت وھدے کہ سرجمیں جھان ءِ انسانی ھکانی ادارہ ءُ کارکن ماہ رنگ بلوچ ءُ دگہ زھرشانی کنوکانی یل کنائینگ لوٹ ءَ کنگ ءَ اَنت-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گل ءِ رھشون ءُ باسکانی ھلاپ ءَ شال ءَ زھرشانی ءِ وھد ءَ پورسز ءِ تیرگواری ءَ بیران بیتگیں سَے مردمانی کوش ءِ ارزی نبشتگ کنگ بیتگ انت-

ارزی انسداد دھشت گردی ءِ ایکٹ ءَ ھوار دگہ دگہ پھنات جنگ بیتگ انت- شال ءَ داں انگت ءَ بی وائی سی ءِ نام ءَ سَے ارزی نبشتگ کنگ بیتگ انت-

پولیس ءِ رد ءَ ڈاکٹر ماہ رنگ بلوچ ءُ گل ءِ رھشونانی انگت ءَ سول لائن، بروری ءُ سریاب پولیس تھانہ ءَ سَے ارزی نبشتگ کنگ بیتگ انت-

سریاب پولیس ءَ تھانہ ءَ بیست ءُ دو مارچ ءَ ایف آئی آر ءَ ڈاکٹر ماہ رنگ بلوچ ءُ دگرانی سر ءَ ناشرکاری ءِ درچ ءَ دفعہ 11 ڈبلیو ءَ ھوار تازیرات پاکستان ءِ 16 دفعات جنگ بیتگ انت-

اے دفعات ناشرکاری، کوش،گامگیج کوش، مردمانی لٹ شاپی ءُ گھگیری ءَ برانز دیگ، فساد ءُ نسلی بھر ءُ بانگی ءَ تالان ءُ ماڑیانی تاوان دیگ ھوار انت-

ارزی نامہ ءَ ماہ رنگ بلوچ ءُ بی وائی سی ءِ سروکانی سر ءَ بلوایوں کمک ءَ پولیس ءِ کارندہ، راہ گیر، لس شھری ءُ وتی زھرشانی کنوکانی سر ءَ تیرگواری کتگ ءُ سَے مردم کشتگ انت- 15 پولیس کارندھاں ھوار دگہ زدگانی بھتام جتگ انت-

ارزی نامہ ءَ بیبو بلوچ، گلزادی ساتکزئی، صبیحہ بلوچ، سبگت اللہ بلوچ، گلزار دوست، ریاض گشکوری، ڈاکٹر شلی بلوچ ءُ ڈاکٹر بے نظیر نامینگ بیتگ انت-

ماہرنگ بلوچ ءُ بی وائی سی ءِ رھشونانی سر ءَ سول ھسپتال ءَ اُرش ءُ جعفر ایکسپریس ٹرین ءِ اُرشکارانی لاشانی زورانسری برگ ءِ بھتام جنگ بیتگ-

شال ءَ سول ھسپتال ءَ ایف آئی آر ءَ چارشمبے ءِ بیگاہ ءَ بلوچ یکجھتی کمیٹی ءِ گوشگ ءَ سد ءَ یا سد ءُ پنجاہ مردماں ھسپتال ءِ سر ءَ بیڑ برتگ ءُ مردگ ھانہ دروازگ پروشتگ ءُ تہ ءَ پترتگ ءُ جعفر ایکسپریس ٹرین اُرش ءَ ھواریں اُرشکارانی لاش زورانسری برتگ انت-

دومی نیمگ ءَ بلوچ یکجھتی کمیٹی ءَ اے دروگیں ایف آئی آر رد کتگ ءُ گوشتگ ریاستی زوراکیانی ھلاپ ءَ زھرشانی ءِ برجاہ دارگ ءِ جار جتگ-

بلوچ یکجھتی کمیٹی ءِ پُرایمنیں نندانکانی سر ءَ کریک ڈاؤن ءُ لَٹ ءُ کٹ ءُ دزگیریانی ھلاپ ءَ بلوچستان ءِ جتاجتائیں شھراں مروچی سیمی روچ ءَ زھرشانیانی دْرچ برجاہ ءَ اِنت-

گیشیں ھالانی رِد ءَ شال ءَ پد ھب چوکی ءَ بلوچ یکجھتی کمیٹی ءِ نندانک سر ءَ پولیس ءِ لَٹ ءُ لُٹ ، زھرشانی کنوکانی سر ءَ آنسو گیس شیلنگ ، عمران بلوچ ءَ ھوار بازیں زھرشانی کنوک پولیس ءَ آوار جتگ ءُ ناشناسیں جاھے ءَ برتگ اَنت-

وھدے کہ پولیس ءِ لٹ ءُ کُٹ ءَ چہ زالبول ءَ ھوار پانزدہ ءَ نزیک زھرشانی کنوک ٹپی-

ھمے وڑ تربت ءَ مروچی دومی روچ ءَ سرجمی ءَ شٹرڈاؤن ھڑتال برجاہ ءَ اِنت وھدے کہ زھرشانی کنوکانی بُنجاھی چوک سر ءَ نندانک داتگ – ءُ ٍڈاکٹر ماہ رنگ بلوچ دگہ دزگیریں کارکنانی یل کنائینگ لوٹ کنگ ءَ اَنت-

وھدے کہ کلات ، ھاران ءُ چاگی ءَ یکشل ءَ سیمی روچ ءُ نوشکی ءَ دومی روچ ءَ زھرشانی برجاہ ءَ اِنت- ھرشانی ءِ سبب ءَ کار ءُ باری بُنجاہ بند ءُ دگانی سر ءَ گاڑیانی روگ ءُ آیگ بند ، دومی نیمگ ءَ موباھل ءِ نیٹورک ءُ نیٹ ھم بند کتگ اَنت-

بلے شال ، ھُزدار ءَ باز ھندانی سر ءَ بلوچ یکجھتی کمیٹی ءَ زھرشانی مھتل داشتگ – بی وائی سی رِد ءَ مروچی دیم کار جار جنگ بیت-

ھونریچیں شال

ٹی بی پی شونگال

شال ءَ زھرشانی کنوکانی سر ءَ تیرگواری کنگ بیتگ ءُ کسان سال ءُ ورنایانی شھید کنگ ءُ بازیں سیاسی باسکانی دزگیر کنگ بلوچستان ءَ پاکستانی پالیسیانی پدراھی ءَ کن اَنت- ریاستی ادارھاں ھمک وھدی رھبند گپتگ ءُ چوشکہ ھمک مزنیں جنگی وئیلاں پد رھبند گرگ بنت اِنت- ترندیں ریاست ءِ رویش ءِ گرگ ءَ پاکستان ءِ رویش بلوچستان ءَ ھچبر نرم نہ بیتگ انت، ءُ ھمک وھد ءَ زوراکیانی پژدر ءَ راجی توارانی ایرموش کنگ ءِ پالیسی ءِ رھبند ءَ روگ ءَ انت-

پاکستان ءِ لشکر ءِ سروک عاصم منیر ءَ ترندیں ریاست ءِ جار جتگ، بلے بلوچستان ءَ ریاست ءِ رویش ھچبر بلوچ راج ءِ گون ءَ نرم نہ بیتگ انت – آغا عبدالکریم ءَ گوں گپ ءُ تران ءِ نام ءَ سیاسی باسکانی دزگیری ءُ جیل، نیشنل عوامی پاٹی ءِ سر ءَ بندش، ءُ ھیدر آباد پندل سازیں کیس ءَ بلوچ ءُ پشتونانی سروکاں بندیگ کنگ، بلوچ نیشنل مومنٹ ءُ بلوچ اسٹوڈنٹس آرگنائزیشن ءِ سروکاں زورانسری بیگواہ کنگ ءُ بندیگجاہ ءَ کُشگ – اے درست ریاستی زوراکیانی گون ءَ سیاسی گھگیری ءِ پروش دیگ ءِ جھد ءِ بھر انت، چوشکہ پاکستان ءِ گوستانک ءِ پالیسیانی بھر بیتگ انت-

بلوچستان ءِ مزن واکداریں تاکت گچینی اڑوکی سر وزیر سرفراز بگٹی ءُ انوارالحق کاکڑ ءِ وڑیں وتگڑیں سیاسی کردار سنگینیں جاوراں گیش ناگیگ کنگ ءِ سبب بیگ ءَ انت، پرچاکہ جنگ زدگی ءُ لٹ شاپی کنگ آیاں واک ءَ سر کنگ ءَ موہ دنت اِنت-

ریاست ءِ نیمگ ءَ بلوچ ءِ جیڑہ ءَ پوج ءُ پولیس ءِ مھکمہ انسداد دھشت گردی ءِ درچ ءَ تاکت ءِ زور ءِ پالیسی ءَ شال ھونریچی کتگ – بلوچ پُسگانی شھیدی ءُ ماہ رنگ ءَ ھوار دگہ زالبولانی دزگیری بلوچستان ءِ روکیں آس ءَ گیش تیل ءِ پریچگ ءِ برابری اِنت- ماہ رنگ، بیبو، بیبگر بلوچ ءُ دگہ بازیں کچے ءَ سیاسی باسکانی دزگیری ءَ چہ گھگیری زرمبشت اوشت ءِ آماچ نہ بیتگ انت بلکین گیشتر پراہ ءُ شاھیگان بیتگ انت-

بلوچستان ءِ میتگ میتگاں گھگیری ءِ بیرک ءَ برز کنگ ءَ انت ،شھیدی ءُ دزگیریانی آسر ءَ گھگیری زرمبشت ءَ ترندی آیگ ءَ انت – ریاستی زوراکیانی سبب ءَ بلوچ زرمبشت ءِ پروش دیگ ءِ پالیسی گوستانک ءَ نا سوبمند بیتگ ءُ ناکہ انی آئی ءِ سان گندگ ءَ کاینت، بلکیں شھیدی ءُ دزگیریانی آسر بلوچ گھگیری سیاست ءَ گیش مھکم کنت ءُ چِست بیت اِنت-

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، چہ ڈیرہ بگٹی ءَ یک درزنے مردم بیگواہ، شش ءِ پجّار بیتگ-

گیشیں ھالانی رِد ءَ گوستگیں شپ ءَ طاھر ء شادمان بگٹی ایف سی ءَ لوگ ءَ بیڑبرگ زورانسری بیگواہ کتگ وھدے کہ ریاض ء محمد بخش بگٹی چہ ڈیرہ بگٹی ءِ بُنجاھی بازار ءَ پاکستانی پوج ءَ آوار جتگ ءُ بیگواہ کتگ-

ھمے وڑ ڈیرہ بگٹی ءِ شھر ءَ یک لوگے ءَ پوج ءَ بیڑبرتگ رضا محمد ء محمود بگٹی زورانسری بیگواہ کتگ وھدے کہ ڈیرہ بگٹی ءَ جانی خان بگٹی ءِ لوگ سر ءَ بیڑبرتگ آئی ءِ چُک علی خان بگٹی زورانسری بیگواہ کتگ-

ھمے وڑ چہ سوئی ءَ یک دکاندارے عارف ء مٹھو بگٹی پاکستانی پوج ءَ آئی ءِ دکان ءَ چہ آوار جنگ ءَ پد تُرندیں لَٹ ءُ کُٹانی نشانگ کتگ ءُ ناشناسیں جاھے برتگ-

ھمے وڑ سوئی ءِ تھسیل بازار ءِ جتھ ھوٹل ءَ انور ء ریحان بگٹی سی ٹی ڈی کارمنداں درکانودی آوار جتگ ءُ بیگواہ کتگ-

دمگی مردمانی رِد ءَ ڈیرہ بگٹی ءَ پاکستانی پوج ءُ چیریں ادارھانی نیمگ ءَ چہ مزنیں کچے ءَ زورانسری آوار جنی ءِ دْرچ برجاہ ءَ اِنت-

بلوچ یکجھتی کمیٹی ءَ گْوشتگ کہ ریاست پاکستان ءَ مروچی مگرب ءَ پد شال ءَ ناشرکاری ءِ سرجمیں سیمسر گوازینتگ اَنت- یکشل ءَ پنچ ءَ چہ شش کلاکاں پُرایمنیں نندانک سر ءَ ریاستی زوراکی برجاہ ءَ اِنت -سرجمیں دمگ بند کتگ اَنت – ٹپیّاں نادُراھجاہ ءَ روگ ءَ نیلگ ءَ اَنت، مزنیں کچے ءَ پُرایمنیں زھرشانی کنوک دزگیر کتگ اَنت، لَس مھلوک سر ءَ یکشل ءَ تچکی ءَ تیرگواری کنگ ءَ اَنت، ءُ چیریں ادارھانی کارندہ سادھیں پوشاک ءِ لَس مھلوک ءَ ماڑیان تاوان دیگ ءَ اَنت-

آئی ءَ گْوشتگ کہ ھمے وڑ ریاستی پولیس ءُ چیریں ادارھانی کارمند لَس مھلوک تاوان دیگ ءَ اَنت، آیانی سر ءَ تچکی ءَ تیرگواری کنگ ءَ اَنت ءُ لَس مھلوک ءِ ماڑیاں ماندارگ اَنت، اے جاور ھالانی چارگ ءَ بلوچ یکجھتی کمیٹی ءَ پیسلہ کتگ کہ مروچی شپ ءَ شال نندانک ھلاس کتگ باندا سُھب ءَ وتی آوکیں کار جار ءَ جن ایں-

بلوچ یکجھتی کمیٹی ءِ راھشون ءَ پریس کانفرنس کنان ءَ گْوشتگ کہ ما جار جن ایں کہ مئے نندانک سریاب ھمے جاہ ءَ برجاہ بیت، ءُ دانکہ مئے لوٹ مّنگ نہ بنت، مئے زھرشانی برجاہ بیت-

آئی ءَ گْوشتگ کہ وھدے کہ نی ما ھکومت ءَ چہ تچک کنگ لوٹ ایں کہ ڈاکٹر ماہ رنگ بلوچ، بیبگر بلوچ ءَ ھوار سرجمیں دزگیریں سنگتاں زوت یل بہ کن اگاں ناں سرجمیں بلوچستان ءَ بے مدت ءِ واستا بند کن ایں ءُ اشی ءِ سرجمیں زمہ واری ریاست ءُ ھکومت سر ءَ بنت-

آیاں لوٹ کتگ کہ ڈاکٹر ماہ رنگ بلوچ ، بیبگر بلوچ ءَ ھوار سرجمیں دزگیریں کارکنانی زوت بے شرت ءُ شرائت ءَ یل بہ کن-

وھدے کہ سر ءُ دیم تیرگواری ءِ آسر ءَ درزنانی مردم ٹپی ءُ سے مردم شھید کنگ ھلاپ ءَ سروزیر بلوچستان سرفراز بگٹی ءُ آئی جی پولیس ءِ ھلاپ ءَ ایف آئی آر نکش کنگ بہ بنت ءُ بر ترپ کنگ بہ بنت-

دیمتر ءَ گْوشتگ کہ کمشنر شال ءُ ڈپٹی کمشنر شال ءَ زوت برترپ بہ کن اِت ءُ بلوچ سیاسی کارکنانی ھلاپ ءَ آسری کاروائیانی درچ ءَ زوت بند بکن اِنت ءُ سرجمیں دروگیں ایف آئی آر ءَ ھلاس بہ کن اِت-

بلوچ یکجھتی کمیٹی ءِ سروک ڈاکٹر ماہ رنگ بلوچ ءُ دگہ کارکنانی دزگیری ءِ ھلاپ ءَ سرجمیں بلوچستان ءَ تھتگ ءُ پرگ بندیں ھڑتال ءُ نندانک برجاہ-

زانگ بہ بیت کہ پولیس ءَ مروچی سُھب ءَ شال ءَ لاشانی ھمراھی ءَ نندانک ءَ نشتگیں زھرشانی کنوکانی ھلاپ ءَ کریک ڈاؤن کتگ ڈاکٹر ماہ رنگ بلوچ ءَ ھوار بازیں زھرشانی کنوک دزگیر کتگ اَنت-

بی وائی سی ءِ جار پد ءَ شال، مستونگ، کلات، ھُزدار، نوشکی، واشک ، تربت، پنجگور، ھب چوکی ءَ ھوار بلوچستان ءِ بازیں شھراں تھتگ ءُ پرگ بندیں ھڑتال ءُ نندانک برجاہ ءَ اِنت-

شال ءَ دگانی سر ءَ گاڑی روگ آیگ کم ءُ وھدے کہ دکان مارکیٹ بند اَنت- سریاب دگ، کمبرانی دگ، بروری دگ ءَ ھوار بازیں دمگاں زھرشانی کنوک دگانی سر ءَ گشت کنگ ءَ اَنت-

بلوچ یکجھتی کمیٹی ءِ زھرشانی کنوک ءُ پولیس ءِ میان ءَ جنگ ءُ چوپ ءُ بیرانی ءَ پد شال ءِ جاور یکشل ءَ نگیگ اَنت – شھر موباھل پون نیٹ ورک سرجمی ءَ بند اَنت – وھدے کہ سیکورٹی گیش کنگ بیتگ-

جمعہ ءِ روچ ءَ شال ءَ بلوچ یکجھتی کمیٹی ءِ نیمگ ءَ چہ بیبرگ بلوچ ءَ ھوار گل ءِ دگہ راھشون ءُ کارکنانی دزگیری ءِ ھلاپ ءَ زھرشانی روانک کشگ بیتگ-

پولیس ءِ نیمگ ءَ چہ زھرشانی کنوکانی پاد کنگ جُھد ءَ جنگ ءُ چوپ بندات بیتگ-

بی وائی سی ءِ سروک ڈاکٹر ماہ رنگ بلوچ ءِ سروکی ءَ زھرشانی کنوکاں جمعہ ءِ شپ ءَ لاش سریاب دگ سر ءَ ایر کتگ ءُ نندانک بندات کتگ- کہ مروچی پولیس ءَ تاکت کارمرز کنان ءَ لاش دستیگ کتگ ءُ بازیں کارکنی دزگیر کتگ-

بلوچ یکجھتی کمیٹی ءِ راھشون صبیحہ بلوچ ءَ کہ ما لاشانی ھمراھی ءَ نندانک ءَ نشتگ اِنت- سُھب ساھت پنچ ءَ یکرندے پد ءَ نندانک سر ءَ کریک ڈاؤن کتگ ءُ ڈاکٹر ماہ رنگ بلوچ ءَ ھوار بازیں زھرشانی کنوک دزگیر کتگ اَنت اشی ءَ پد آیانی درگت ءَ مارا ھچ وڑیں سرپدی نیست- آیانی گوشگ اِنت کہ پولیس ءَ لاش ھم وتی ھمراھی ءَ برتگ اَنت-

صبیحہ بلوچ ءَ گْوشتگ کہ مارا پُرایمنیں زھرشانی ءِ ھک دیگ ءَ نہ اَنت، پُرایمنیں کارکنانی سر ءَ بدتریں زوراکی کنگ بیگ ءَ اِنت-

گُڈی ھالانی رِد ءَ گوشگ بیگ ءَ اِنت ڈاکٹر ماہ رنگ بلوچ ھدہ جیل ءَ برگ بیتگ-

بلوچستان ءِ بنجاھی شھر شال ءَ زھرشانیانی درچ ءَ ریڈ زون ءِ نیمگ ءَ روکیں دگانی سر ءَ کنٹینرز ایر کنگ ءُ بند کنگ بیتگ-

دمگی اھوالانی رد ءَ بلوچ یکجھتی کمیٹی ءِ سروک ڈاکٹر ماہ رنگ بلوچ ءُ دگہ زھدشانی کنوکیں مردمانی دزگیری ءِ ھلاپ ءَ بیوکیں زھرشانیانی دارگ ءِ واستا شھر سیکورٹی گیش کنگ ءُ موبائل پون ءُ انٹرنیٹ بند کنگ بیتگ انت-

دومی نیمگ ءَ شال ءَ ھوار سرجمیں بلوچستان ءَ پھیہ جام ھرٹال، شٹر ڈاؤن ھڑتال ءُ زھرشانی نندانک برجاہ انت – زھرشانی کنوکانی پُر ایمنیں زھرشانی سر ءَ ریاست ءِ نیمگ ءَ تاکت ءِ کارمردی ءِ سر ءَ زھر درشان کنگ بوگ ءَ انت-

کیچ ءِ بنجاھی شھر تربت ءَ زھرشانی کنوکیں مردمانی سر ءَ تیرگواری ءَ چہ دو کسان سالیں بچک ٹپیگ بیتگ اَنت۔

تیر گواری ءِ وئیل تربت ءِ دمگ ملک آباد ءَ بوتگ۔

اھوالانی ءِ رد ءَ تربت ءِ دمگ ملک آباد ءَ زھرشانی ءِ وھد ءَ دو کسانیں بچک ٹپیگ بوتگ اَنت۔ چم دیستگیں مردمانی رد ءَ اے وئیل زھرشانی ءِ وھد ءَ تیرگواری ءِ آسر ءَ بوتگ کہ ایشی ءَ چہ دمگ ءَ ترس ءُ بیم تالان بوتگ۔

دمگی مردمانی گشگ اِنت کہ زھرشانی کنوک زوراکی ءَ بیگواہ کنگ ءُ زوراکیانی ھلاپ ءَ زھرشانی کنگ ءَ بیتگ انت کہ اناگت ءَ تیر گواری بندات بوتگ۔

ٹپیگ نادراھجاہ ءَ سر کنگ بیتگ اَنت ۔