TBP Balochi

ایران ءِ زرباری شھر بندرعباس ءِ بندر شھید رجائی ءَ بوتگیں مزنیں تراک ءُ آس ءَ چہ کم چہ کم 516 مردم ٹپیگ بوتگ انت۔

اے تراک مرچی نیم بندرگاہ ءِ سینا کنٹینر یارڈ ءَ بوتگ کہ اود ءَ بازیں کنٹینراں بوت کنت کہ ھترناکیں چیز یا کیمیکل ھوار بوتگ انت۔ تراک ءَ چہ پد مزنیں آسے چست بوتگ ءُ بازیں کلومیٹر تاں سیاھیں دودت جمبر گندگ بوتگ انت۔

تراک ءِ زور ءَ نزیکیں ماڑیانی شیشگ ٹُکّر ٹُکّر کتگ اَنت ءُ یک ماڑی یے کپتگ۔

بنداتی ھالانی رد ءَ 281 مردم ٹپیگ بوتگ اَنت بلے رند ءَ اے کچ 406 ءُ پد ءَ 516 ءَ سر بوتگ۔

ھارموزگان ءِ ھلال رڈ سوسائٹی ءَ ھوار ایمرجنسی سروسز ءَ زوت جاہ ءَ سر بوتگ ءُ ٹپیگ نزیکیں نادراھجاہاں سر کتگ ءُ آس ءِ توسگ ءِ جھد کتگ-

وھدے کہ بنداتی پٹ ءُ پول ءِ تہ ءَ لاپروائی ءُ آتش گیریں چیزانی نادراھی ءِ سبب ءِ رد ءَ چارگ بوھگ ءَ اِنت، نیشنل ایرانی پٹرولیم ریفائننگ ءُ ڈسٹری بیوشن کمپنی ءَ اے گپ پدر کتگ کہ اے تراک ءَ چہ آئی ءِ ھچ وڑیں بنیاتی ڈھانچہ ءَ را تاوان نہ رس اتگ، ایشی ءِ تہ ءَ ریفائنری، سوکت ءِ ٹینک، ڈسٹری بیوشن سینٹر یا تیل ءِ پائپ لائن ھوار اَنت۔

بندر شھید رجائی ایران ءِ مزنیں تجارتی بندر اِنت کہ سالے ءَ 80 میلیون ٹن ءِ کساس ءَ بار ءِ دیم ءَ برگ ءَ اِنت۔ اے وئیل ءَ نہ ایوک ءَ بنجاہی تک ءَ بلکیں میاں اوستمانی تک ءَ ھم جیڑہ ودی کتگ اَنت۔

بلوچ یکجھتی کمیٹی ءِ بنجاھی رھشون بیبرگ بلوچ ءِ جاور ھرتال ءِ سیمی روچ ءَ ناگیگ بیتگ انت – آ گوستگیں یک ماھے ءَ گیش بندیگ انت – دزگیری ءَ پیش آ پالج ءِ آماچ انت، نی آ یکشلیں ھرتال ءِ سبب ءَ آئی ءِ جاور ناگیگ بوتگ انت-

مروچی بیبرگ ءِ گندُک کنوکیں کھول ءِ رد ءَ آ سک ھائپو ٹنشن بلڈ پریشر ءِ سک ءَ جھل انت ءُ یکوئی بے ھوش بوگ ءَ انت آئی ءِ جسم ءُ جان ءِ جاور ترندی ءَ ناگیگ بوتگ انت زوت کمک ءُ ھسپتالے درکار انت ئِے – ایشی ءَ ابید پولیس آئی ءَ ھسپتال ءِ برگ ءَ انکاری کنگ ءَ انت ءُ چریشی ءِ سبب ءَ آئی ءِ زندمان ءِ واستا سک ءَ ترس انت-

آئی ءَ ما ریاست ءَ تچک کنگ ایں ءُ گوش ایں کہ اگاں بیبرگ بلوچ ءَ کجام رنگیں تاوانے بوت گڑا آئی ءِ زمہ وار ریاست ءِ سر ءَ بیت اِنت-

بلوچستان ءِ دمگ مچھ ءُ مستونگ ءَ پاکستان پوج لشکر کشی کنگ ءَ اِنت، دمگاں تیرگوار ءُ دگہ ھیلی کاپٹرانی روگ آیگ برجاہ ءَ اِنت وھدے کہ ڈرون بالگرد ھم بُرز بالی ءَ گندگ بیتگ اَنت-

بولان ءِ دمگ مچھ ءَ گیشتری ءُ کش گوراں مروچی سیمی روچ ءَ پوجی لشکر کشی برجاہ ءَ اِنت – پاکستانی پوج ءِ مزنیں کچے ءَ دمگ ءَ سُر ءُ پُر ءَ دلگوش اِنت وھدے کہ جتاجتائیں ھندانی سر ءَ ناکہ بندی کتگ ءُ روگ آیگ واستا بند کتگ-

ھمے وڑ مستونگ ءِ دمگ اسلپنجی ، ءِ جتاجتائیں دمگاں گونڈین، سردار کمب، کنڈ روشی ءَ ھوار کش گور ءِ دمگاں ھم پوجی لشکر کشی برجاہ ءَ اِنت- لشکر کشی ءَ تیرگواری ھیلی کاپٹر ءُ ڈرون بالگرد بھر زیرگ ءَ اَنت-

لشکر کشی ءَ تنی وھدے ھچ وڑیں دزگیری یا جانی تاوان ھال نیست وھدے کہ واکدار ھم اے درگت ءَ ھچ وڑیں ھال نیست-

بلوچستان ءِ دمگ کیچ ءَ پاکستانی پوج سلاہ بندیں مردماں نشانگ کتگ-

مروچی سھب ءَ ھوشاپ ءِ دمگ دمب ءَ پاکستانی پوج ءِ بنجل ءِ کارندہ ناشناسیں مردماں یک اُرشے ءِ نشانگ کتگ-

دمگی مردمانی رد ءَ اُرش ءَ پوج ءَ جانی تاوانانی دیمپانی کنگ کپتگ- بلے واکداراں اے درگت ءَ دگہ اھوال دیم ءَ نیاؤرتگ انت-

سرجمیں بلوچستان ءَ پاکستانی پوج ءِ سر ءَ یکشلیں اُرش بوگ ءَ انت گوستگیں بیست ءُ چار ساھتانی میان ءَ سیمی مزنیں اُرش انت-

گوستگیں روچ ءَ شال ءَ ھواریں دمگ مارگٹ ءِ ھند ءَ بلوچ لبریشن آرمی ءَ یک آئی ای ڈی اُرشے ءَ پاکستانی پوج ءِ گاڑی نشانگ کتگ ات چریشی ءَ سواریں دَہ کارندہ مرتگ ات اَنت-

کیچ ءِ بنجاھی شھر تربت ءَ ھم گوستگیں شپ ءَ یک آئی ای ڈی اُرشے ءَ پوج ءِ کارندہ نشانگ بیتگ ات کہ ایشی ءِ زمہ واری انگت ءَ کس ءَ پہ وت نہ زرتگ-

سرجمیں بلوچستان ءَ بی وائی سی ءِ جار ءِ پد ءَ ریاستی زوراکی ءُ دزگیریانی بگیری ءَ زھرشانی کنگ بوتگ

بیبو بلوچ، ڈاکٹر ماہ رنگ، گلزادی ءُ دگہ رھشونانی سرا لٹ شاپی ءُ دزگیریانی بگیری ءَ لس مھلوک ءِ نیمگ ءَ زھرشانی کنگ بوتگ –

بلوچ یکجھتی کمیٹی ءِ جار ءِ پد ءَ مروچی بلوچستان ءِ جتا جتائیں دمگاں زھرشانی کنگ بوتگ انت، کہ اودا مھلوک ءِ نیمگ ءَ مزنیں کچے ءَ مردماں بھر زرتگ، درنگاز کنوکاں بی وائی سی ءِ رھشونانی سرا لٹ شاپی، دزگیری ءُ زورانسری آوار جنیانی بگیری ءَ ترندیں نارہ جتگ –

درنگاز کنوکاں دزگیر کنگ بوتگیں بی وائی سی ءِ رھشونانی سرا ریاستی زوراکی ءِ ھلاسی ءُ یل کنگ ءِ لوٹ کتگ –

بنجاھی شھر شال ءَ ہدہ ءُ کلی کمبرانی ءُ دگہ جاھاں زھرشانی ءُ روانک کشگ بوتگ کہ اودا ڈاکٹر ماھرنگ بلوچ، بیبو بلوچ ءُ گلزادی بلوچ ءِ سرا سی ٹی ڈی ءُ پولیس کارمندانی لٹ شاپی ترندی ءَ گوں ایرجتگ –

درنگاز کنوکاں الزام جتگ کہ بیبو بلوچ چہ ہدہ جیل ءَ زورانسری آوار جنگ بوتگ ءُ آ سک باز لٹ شاپ کنگ بوتگ –

بلوچ یکجھتی کمیٹی ءِ جار ءِ پدا مروچی کراچی، ھزدار، مستونگ، پنجگور، تربت، کیچ، ماشکیل، ھاران، چاہسر، دالبندین، چاگی ءُ نوشکی ءَ بی وائی سی ءِ جار ءِ پدا زھرشانی ءُ روانک کشگ بوتگ، درنگاز کنوکانی دست ءَ پلے کارڈ ءُ بینر بوتگ انت کہ آیانی سرا بی وائی سی ءِ رھشونانی ھک ءَ ءُ ریاستی زوراکیانی بگیری ءَ نارہ نبشتہ بوتگ انت –

نوشکی ءَ درنگاز کنوکاں بیبو بلوچ ءِ ازیت دیگ ءُ آئی ءَ دومی جاہ ءَ برگ ترندی ءَ گوں ایرجتگ ءُ اے درانسانی رویشت ءِ گوشتگ –

چہ کراچی ءَ سربوتگیں ھالانی رِد ءَ پکیرکالونی ءَ بی وائی سی ءِ زھرشانی ءَ پد وھدیکہ ملیر ءِ درنگاز کنوک واتر وتی گساں روگ ءَ بوتگ انت گڈا پولیس ءَ بس داشتگ ءُ آ چہ بس ءِ تہ ءَ دزگیر کتگ انت –

بلوچ یکجھتی کمیٹی ءَ وتی جار ءِ تہ ءَ گوشتگ کہ مئے زھرشانی تاں ھما وھد ءَ بند نہ بنت وھدیکہ مئے رھشون یل کنگ نہ بنت ءُ آیانی سرا زوراکی بند کنگ نہ بیت –

گل ءِ گوشگ انت کہ ریاستی زوراکی ےُ لٹ شاپیاں ابید ھم لس مھلوک ءَ دگانی سرا در آیگ ءُ زھرشانی کنگ اے گپ ءِ گواھی ءَ دنت کہ راج باسما بوتگ ءُ آئی ءَ گیشیں تاکت ءُ لٹ داشت نہ کنت –

گل ءِ گوشگ انت کہ بلوچ یکجھتی کمیٹی درسیں زوراکیانی سگگ ءَ ابید ھم وتی زھرشانی زرمبش ءَ برجاہ دار ایت –

بلوچ لبریشن آرمی ءَ وتی میڈیا چینل ھکل ءَ شال ءِ دمگ مارگٹ ءَ پاکستانی پوج ءِ کاروان ءِ سرا بوتگیں ریموٹ کنٹرول بمب تراک ءِ اُرش ءِ تامُر شنگ کتگ –

یک ملٹ ءُ چِل ءُ نھ سیکنڈ ءِ تامر ءِ تہ ءَ پوجیانی سَے گاڑی گندگ بنت، کہ آیانی تہ ءَ یک گاڑی ءِ تراک ءِ زد ءَ کئیت ءُ سرجمی ءَ تباہ بیت –

بی ایل اے ءِ جارکش ءَ وتی درشان ءِ تہ ءَ گوشتگ کہ اے اُرش ءَ پاکستانی پوج ءِ دھ کارمند مُرتگ انت کہ آیانی تہ ءَ سوبیدار شھزاد امین، نائب سوبیدار عباس، سپاھیگ خلیل، سپاھیگ زاہد، سپاھیگ خرم سلیم ءُ دگہ ھوار انت –

مارگٹ بلوچستان ءِ بنجاھی شھر چہ شال ءِ گوریچان ءُ روبرکت ءَ شست کلومیٹر دور انت –

چدوپیسر ھم اے دمگ ءَ پاکستانی پوج ءِ سرا بلوچ سرمچاراں ترندیں اُرش کتگ بوتگ کہ آیانی تہ ءَ سنگر بندگ ءُ اُرشاں ھوار آئی ای ڈی اُرش ءُ پاکستانی پوج ءِ بنجل ءُ پانگسانی دزگیری ھوار انت –

زانگ بہ بیت بلوچستان ءَ بیست ءُ چار ادارانی میان ءَ پاکستانی پوج ءِ سرا دو آئی اِی ڈی تراک کنگ بوتگ انت –

چدوپیسر گوستگیں روچ ءَ کیچ ءِ دمگ زامران ءَ پاکستانی پوج ءِ کاروان نشانگ کنگ بوتگ کہ ھردوکانی اُرش ءِ زمہ واری بی ایل اے ءَ منّ اِتگ انت –

تربت ءِ دمگ سیٹلائٹ ٹاؤن ءَ مروچی پاکستانی پوج ءِ گاڑی بمب تراک ءَ نشانگ کنگ بیتگ-

اِھوالکار رِد ءَ تراک ھما وھد ءَ بیتگ وھدے پاکستانی پوج ءِ کاروان گوزگ ءَ بیتگ- تراک سک تُرند بیتگ، آئی ءِ توار دیر دیر اش کنگ بیتگ، وھدے کہ وئیل ءَ بازیں پوج ءِ کارمندے یے مرگ ءِ ھال اِنت-

تراک ءَ پد پوج ءَ دمگ انگر ءَ کتگ لشکر سرچ آپریشن بندات کتگ- اِھوالکار رِد ءَ اے اُرش گمانی ھساب ءَ ریموٹ کنٹرول ڈیوائس سر ءَ کنگ بیتگ، بلے سرکاری واکدار نیمگ ءَ چہ وئیل پدری نہ بیتگ-

بلے انگت ھچ گل ءَ اے اُرش زمہ واری نہ منّ اِتگ، بلے بلوچستان ءَ گوستانک ءَ ھم پاکستانی پوج بلوچ آجوئی لوٹوکیں سلاہ بندیں گلانی نیمگ ءَ چہ نشانگ کنگ بیگ ءَ اَنت، مروچی بلوچ لبریشن آرمی ءَ شال ءِ دمگ مارگٹ ءَ یک بمب اُرشے ءَ پاکستانی پوج ءِ گاڑی نشانگ کتگ چریشی ءَ دہ کارندہ بیران بیتگ اِت اَنت وھدے کہ گوستگیں روچ ءَ زامران ءَ ھم پاکستانی پوج ءِ گاڑی بمب اُرش زمہ واری بی ایل اے ءَ منّ اِتگ اَت-

شال مارگٹ اُرش زمہ واری بلوچ لبریشن آرمی ءَ منّ اِتگ اَت اُرش تامُر ھم شنگ کتگ-

گوستگیں شپ ءَ کیچ ءِ دمگ گیبن ءَ پوج ءَ بیڑبرتگ سے مردم زورانسری بیگواہ کتگ اَنت-

بیگواہ کنگ بیتگیں مردمانی پجّار شاہ ملک ء بھرام، علی جان ء شاہ ملک ءُ بلال ء یونس نام ءَ چہ بیتگ اَنت-

دمگی اھوالکار رِد ءَ اے مردم گوستگیں شپ ءِ ساھت سے ءَ بیڑبرتگ چریشی ءَ پد آ بیگواہ ءَ اِنت-

زانگ بہ بیت بلوچستان ءَ زورانسری آوار جنی یک سنگین ءِ جیڑھے، راجدوست پارٹیانی رِد ءَ دو دھکاں چہ زورانسری آوار جنیانی ھمکروچ نکش بیگ ءَ اَنت- وھدے کہ اے وھد ءَ بلوچستان ءَ ھزارانی مردم بیگواہ اَنت وھدے کہ بے کساس مردم دروگیں میڑاں کشتگ اَنت-

ھدہ بندیگجاہ ءَ شال ءَ بلوچ یکجھتی کمیٹی ءِ سروک ڈاکٹر ماہ رنگ بلوچ ءَ ھوار بُنجاھی رھشون شاہ جی صبغت اللہ، بیبگر بلوچ، گلزادی بلوچ ءُ پشین بندیگجاہ ءَ بیبو بلوچ شُدکشیں ھڑتال ءَ بیست چار کلاک سرجم بیتگ-

بلوچ یکجھتی کمیٹی ءِ رھشون بیبو بلوچ ھدہ بندیگجاہ ءَ شال ءَ چہ پشین ءَ برگ ءُ بندیگجاہ تہ ءَ گیر کانونی ءَ پُترگ ءُ ڈاکٹر ماہ رنگ بلوچ، بیبو بلوچ ءُ گلزادی بلوچ سر ءَ بے رھمی ءَ لَٹ ءُ کُٹ ھلاپ ءَ بندیگجاہ ءِ تہ ءَ شُدکشیں ھڑتال برجاہ اِنت – شُدکشیں ھڑتال ءِ سبب ءَ مئے رھشونانی تبیت ھراب بیگ ءَ اَنت- اگاں اے میان ءَ مئے کجام ھما سنگت ءَ چیزے بیت اشی ءِ تچکی ءَ زمہ وار ریاست پاکستان، وتگڑیں صوبائی ھکومت، کور کمانڈر شال، ڈی سی شال، کمشنر شال ءُ آئی جی پولیس شال سر ءَ بیت-

بی وائی سی ءِ رِد ءَ مروچی پشین بندیگجاہ ءَ مئے سنگتاں بیبو بلوچ ءَ گوں گند ءُ نند کتگ – بیبو بلوچ سر ءَ بدتریں لَٹ ءُ کُٹ ءَ پد آئی ءِ تبیت سک نگیگ اِنت ءُ اشی ءَ چہ مارا آئی ءِ سِھت ءِ سر ءَ سک تُرس اِنت-

آیاں گْوشتگ جہ ما بلوچ راج ءِ سرجمیں سیاسی ءُ چاگردی گلاں چہ دزبندی کتگ کہ اے بلوچ چُکچینی ءُ بلوچ دُژمنیں ءِ ھلاپ ءَ بلوچ یکجھتی کمیٹی ءِ ھمکوپگ بہ بنت ءُ زھرشانی بکن اَنت ءُ دگاں در بیا اَنت- وھدے کہ ما ریاست سر ءَ تچک کنگ لوٹ ایں کہ ما ھچ وڑ اے زوراکی ءِ ھلاپ ءَ بے توار نہ بہ ایں ءُ مئے آؤکیں سیاسی پیسلہ تُرندتر بیت-

جارج آرویل ءِ کتاب “1984” ءِ سرجمیں چمشانک

نبشتہ کار: احمیداللہ

دی بلوچستان پوسٹ

“1984” یک ھیال ءُ لیکھے کشّوکین ءُ زھرناکیں آزمانکے کہ آئی ءِ تہ ءَ ڈسٹوپیائی آیوکیں وھد ءِ اکس کشی کنگ بیت کہ اود ءَ سرکار وتی شھریانی سر ءَ سرجمیں کنٹرول ءَ دار اِیت۔ اے کسہ اوشیانا ءِ تہ ءَ جوڑ کنگ بوتگ کہ یک مطلق العنانیں چاگردے کہ اود ءَ پارٹی ءِ سروکی ءَ یک مردمے ءِ نام ءَ زانگ بیت کہ آ مردمانی زند ءِ ھر تک ءُ پھنات ءِ سر ءَ سرجمیں کنٹرول ءَ کنت۔

اے آزمانک ونسٹن اسمتھ ءِ کسہ ءِ سر ءَ اِنت کہ آ پارٹی ءِ کم رُتبہ ءِ باسک اِنت ءُ آ وزارت راستی ءَ کار کنت ءُ پارٹی ءِ نظریہ ءِ رد ءَ راجدپتری ریکارڈاں رد کنت۔ ونسٹن پارٹی ءِ وانینگانی سر ءَ جُست ءُ پُرس کنگ ءَ بندات کنت ءُ گُڈسر ءَ سرکار ءِ ھلاپ ءَ بغاوت کنت ءُ گوں وتی ھمکار جولیا ءَ ناجاھزیں مھرے بندات کنت۔

ونسٹن ءُ جولیا ءِ بغاوت ءِ گیش بوگ ءَ گوں آ پارٹی ءِ ھاتر ءَ گیشتر ءُ گیشتر ھترناک بنت ءُ گُڈسر ءَ آ گپتگ ءُ مھر ءِ وزارت ءَ برگ بنت ءُ اود ءَ آیاں جسمانی ءُ نپسیاتی ٹارچر کنگ بیت۔ ناول ءِ سر ءَ پارٹی ءِ ھما زور ءِ سردیں ندارگ اِنت کہ آ چہ درستاں گیشتر پرازمیں مردم ءَ ھم ٹُکّر ٹُکّر کنت۔

“1984” ءِ یک زبردستیں تبکے ایش انت کہ آئی ءَ مطلق العنان ءِ خاطراتانی پٹ ءُ پول کتگ۔ آرویل ءَ اے گپ پدر کتگ کہ یک ھکومتے کہ وتی شھریانی سر ءَ سرجمیں کنٹرول ءِ واھند اِنت آ انفرادی آجوئی، آزاتیں بگر ءُ انگت ءَ مھر ءَ ھم ھلاس کنت۔ پارٹی ءِ نعرہ “جنگ امن اِنت، آجوئی گلامی اِنت، جھالت زور اِنت” یک زبردستیں مسالے کہ زبان ءَ را مردمانی ھیالانی کنٹرول کنگ ءِ ھاتر ءَ دستکاری کنگ ءِ راہ ءُ درانی یک زبردستیں مسالے ۔

اے آزمانک ءِ تہ ءَ پروپیگنڈا، سنسر شپ ءُ راجدپتر ءِ ھرابکاری ءِ ھترھانی سر ءَ ھم تبصرہ ھوار اِنت۔ پارٹی اے وسیلھاں پہ راج ءِ راہ ءِ جوڑ کنگ ءُ اختلاف ءِ سرکوب کنگ ءَ کارمرز کنت ءُ یک انچیں چاگردے جوڑ کنت کہ اود ءَ مردم پہ وت جیڑگ ءَ ترس اَنت۔

سرجمیں آزمانک ءِ تہ ءَ آرویل ءِ نبشتانک زندگ، زوراک ءُ ھُشک کنوک اِنت۔ آئی ءِ یک انچیں چاگردے ءِ پیشدارگ کہ آ چہ درستاں گیشتر ھمگرنچی ءَ ارزشت دنت، چہ درستاں گیشتر چہ ءُ ھیال ءِ کشّگ ءِ سبب اِنت۔ ناول ءِ سرکاری کنٹرول، انفرادیت ءِ گار ءُ بیگواھی ءُ بے رھبندیں اقتدار ءِ ھترھانی بنگپ مرچی ھم ھما وڑ ءَ ھست اَنت کہ آ وھد ءَ کہ کتاب اولی رند ءَ چاپ بوتگ اَت۔

سرجمی ءَ “1984” ڈسٹوپین افسانہ ءِ یک شاھکارے کہ آ یک گرانیں وانگ ءُ مطلق العنان ءِ خطراتانی بابت ءَ یک طاقتوریں ھُشدارے ءِ دوئیں دروشم اَنت۔ اے یک انچیں کتابے کہ ترا انفرادی آجوئی ءِ اهمیت، آزاتیں پکر ءُ سرکاری کنٹرول ءِ ھترھانی بابت ءَ جیڑگ ءَ لاچار کنت۔ اگاں شما فلسفہ، سیاست یا ڈسٹوپین فکشن ءِ تہ ءَ دلچسپی دار اِت گڑا “1984” یک المی وانگ ءِ کتابے کہ کتاب ءِ آسر کنگ ءَ چہ بازیں وھدے ءَ پد شمارا جیڑگ ءَ یلہ دنت۔

کتاب ءِ اثر سک باز انت ءُ ایشی ءِ بنگپ ءُ ھشدار مرچی ھم ھست اِنت۔ اے مئے آجویانی رکینگ ءِ ، تنقیدی سوچ ءِ دیمروئی ءِ ءُ سرکاری اقتدار ءِ بابت ءَ ھوشیار بوگ ءِ ھاتر ءَ یک یاد دیانی یے ۔ “1984” یک کلاسکیں آزمانکے کہ آیوکیں نسلانی وانگ ءُ زانگ ءَ دیم ءَ روان کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-