سرجمیں بلوچستان ءَ بی وائی سی ءِ جار ءِ پد ءَ ریاستی زوراکی ءُ دزگیریانی بگیری ءَ زھرشانی کنگ بوتگ

سرجمیں بلوچستان ءَ بی وائی سی ءِ جار ءِ پد ءَ ریاستی زوراکی ءُ دزگیریانی بگیری ءَ زھرشانی کنگ بوتگ

بیبو بلوچ، ڈاکٹر ماہ رنگ، گلزادی ءُ دگہ رھشونانی سرا لٹ شاپی ءُ دزگیریانی بگیری ءَ لس مھلوک ءِ نیمگ ءَ زھرشانی کنگ بوتگ –

بلوچ یکجھتی کمیٹی ءِ جار ءِ پد ءَ مروچی بلوچستان ءِ جتا جتائیں دمگاں زھرشانی کنگ بوتگ انت، کہ اودا مھلوک ءِ نیمگ ءَ مزنیں کچے ءَ مردماں بھر زرتگ، درنگاز کنوکاں بی وائی سی ءِ رھشونانی سرا لٹ شاپی، دزگیری ءُ زورانسری آوار جنیانی بگیری ءَ ترندیں نارہ جتگ –

درنگاز کنوکاں دزگیر کنگ بوتگیں بی وائی سی ءِ رھشونانی سرا ریاستی زوراکی ءِ ھلاسی ءُ یل کنگ ءِ لوٹ کتگ –

بنجاھی شھر شال ءَ ہدہ ءُ کلی کمبرانی ءُ دگہ جاھاں زھرشانی ءُ روانک کشگ بوتگ کہ اودا ڈاکٹر ماھرنگ بلوچ، بیبو بلوچ ءُ گلزادی بلوچ ءِ سرا سی ٹی ڈی ءُ پولیس کارمندانی لٹ شاپی ترندی ءَ گوں ایرجتگ –

درنگاز کنوکاں الزام جتگ کہ بیبو بلوچ چہ ہدہ جیل ءَ زورانسری آوار جنگ بوتگ ءُ آ سک باز لٹ شاپ کنگ بوتگ –

بلوچ یکجھتی کمیٹی ءِ جار ءِ پدا مروچی کراچی، ھزدار، مستونگ، پنجگور، تربت، کیچ، ماشکیل، ھاران، چاہسر، دالبندین، چاگی ءُ نوشکی ءَ بی وائی سی ءِ جار ءِ پدا زھرشانی ءُ روانک کشگ بوتگ، درنگاز کنوکانی دست ءَ پلے کارڈ ءُ بینر بوتگ انت کہ آیانی سرا بی وائی سی ءِ رھشونانی ھک ءَ ءُ ریاستی زوراکیانی بگیری ءَ نارہ نبشتہ بوتگ انت –

نوشکی ءَ درنگاز کنوکاں بیبو بلوچ ءِ ازیت دیگ ءُ آئی ءَ دومی جاہ ءَ برگ ترندی ءَ گوں ایرجتگ ءُ اے درانسانی رویشت ءِ گوشتگ –

چہ کراچی ءَ سربوتگیں ھالانی رِد ءَ پکیرکالونی ءَ بی وائی سی ءِ زھرشانی ءَ پد وھدیکہ ملیر ءِ درنگاز کنوک واتر وتی گساں روگ ءَ بوتگ انت گڈا پولیس ءَ بس داشتگ ءُ آ چہ بس ءِ تہ ءَ دزگیر کتگ انت –

بلوچ یکجھتی کمیٹی ءَ وتی جار ءِ تہ ءَ گوشتگ کہ مئے زھرشانی تاں ھما وھد ءَ بند نہ بنت وھدیکہ مئے رھشون یل کنگ نہ بنت ءُ آیانی سرا زوراکی بند کنگ نہ بیت –

گل ءِ گوشگ انت کہ ریاستی زوراکی ےُ لٹ شاپیاں ابید ھم لس مھلوک ءَ دگانی سرا در آیگ ءُ زھرشانی کنگ اے گپ ءِ گواھی ءَ دنت کہ راج باسما بوتگ ءُ آئی ءَ گیشیں تاکت ءُ لٹ داشت نہ کنت –

گل ءِ گوشگ انت کہ بلوچ یکجھتی کمیٹی درسیں زوراکیانی سگگ ءَ ابید ھم وتی زھرشانی زرمبش ءَ برجاہ دار ایت –