TBP Balochi

اکسے ءِ کسہ

نبشتہ کار: مھروان کمبر

دی بلوچستان پوسٹ

برے برے لَھتیں اَنچیں ساھت، اَنچیں موسم ءُ اَنچیں اَکس تئی چمّانی نِوان ءَ کاینت گُمان بیت وھد اُوشتاتگ ءُ گیدی ءَ ساہ ءِ کشّگ شموشتگ۔ اے اَکس ھم اَنچیں اَکسے یک کسانکیں گوھارے، یک بے تواریں ادیرھے ءُ گُلاب ءِ تاکانی چیر ءَ اندیم بیتگیں لَھتیں اَنچیں درد اَنت کہ آیانی درشان کنگ ءَ لبز ھم نہ گواہ ایت۔ اے اکس تھنا موتکانی موسم ءَ شلینتگیں ارسے ءِ کسہ نہ اِنت، بلکیں گوستانک ءِ پیشانی ءَ مُشگ بیتگیں یک چیھالے، جُستے ءُ یک آزگیں ٹپے۔

اے اَکس تھنا یک ساھتے ءِ آدینک ءَ پیش دارگ ءَ نہ اِنت بلکیں یک اَھدے ءُ زمانگے ءِ موتکاں آرگ ءَ اِنت۔ یک کسانکیں گھارے وتی نمیران بوتگیں براتے ءِ ادیرہ ءِ سرون ءَ نشتگ آئی ءِ چمّانی شھکوراں ھار کُتگ ءُ دل ءَ اَنچیں ٹپ پیوست بیتگ کہ وھد آئی ءِ درمان کنگ ءَ شموشتگ۔ ھما برات ءَ کہ وتی گھارانی ھمرائی ءَ شھر، میتگ، چار راھ دمک ءُ پریس کلبانی دیم ءَ پہ وتی گار ءُ بیگواھیں پت ءِ شوھاز ءَ در پہ در بیتگ، مروچی ھاکانی چیر ءَ وش واب اِنت ءُ آئی ءِ ادیرہ ءِ شک ءَ نبشتہ اِنت “گُلام ءَ زندگی نسیب ءَ نیست۔”

اگاں زمین زادگے زمین ءِ پھازگ ءِ جنگ ءَ جنگ بیت گُڑا ھاک آئی ءَ وتی امبازاں زُور ایت ءُ وتی سینگ ءَ واپین ایت ءُ بے توار بیت۔ بلے ھما زمین زادگ ءِ گوھار آئی ءِ ادیرہ ءِ سرون ءَ نند ایت ءُ گلھانی گرنچ ءَ بوج ایت، آئی ءِ ارس زمین ءَ نہ کپ انت بلکیں ھاک آئی ءَ وتی تہ ءَ پیوست کنت ءُ گِھگیری ءِ نوکیں موسمے بندات کنت۔

اے ادیرہ گندلانی سر ءَ مُرتگیں مردے ءِ ادیرہ نہ اِنت۔ اے ھما بلوچ ورناھے ادیرہ اِنت کہ آئی ءِ چمّانی تہ ءَ گِھگیری ءِ واب چول جنگ ءَ اَت۔ گُلامی ءِ سیاہ ءُ تھاریں شپاں وتی نسیب نہ لیکگ ءَ اَت بلکیں ھمے تھاریں شپاں نوکیں رُژنے ءِ دیگ ءَ تچ ءُ تاک کنگ ءَ اَت۔ آ ورنا کوھانی تہ ءَ چیر بوتگیں وابے نہ اَت بلکیں آجوئی ءِ اوگاماں گوں زندگ بوتگیں گواچنے اَت۔ آئی ءِ توکل، گِھگیری ءُ آئی ءِ مھروانی ءَ آ ابدمانی ءِ سپر ءَ رھادگ کُتگ اَت۔ آ پروش وارتگیں دُژمن ءِ شل سریں تیرانی آماچ بوت، بلے وتی زمیر ءِ سودا ئِے نہ جت۔

اے کسانکیں جنکو، تھنا یک جنکوے ءِ اکس نہ اِنت، بلکیں ھزاراں بلوچ شیرزالیں مات، گوھار ءُ جنکانی اکس اِنت کہ ھر روچ وتی دوستگیں مردمانی جوناں چِست کن انت ءُ آیاں ھما زمین ءِ میار کن انت کہ آیانی ھُون ھما زمین ءِ سر ءَ شنگ ءُ تالان بوتگ۔

ادیرہ ءِ سر ءَ رِتکگیں گُلابانی تاک اے گپ ءِ گواھی ءَ دینت کہ اے راہ ءَ رَپتگیں نرمزار نہ مر اَنت بلکیں آ گُلزمین ءَ ازت ءِ تاج ءَ سر ءَ دینت ءُ وت ابدمان بنت۔ ھما جنکو کہ دُنیا ءِ مُچی ءَ چہ گستا وتی برات ءِ کبر ءِ سرون ءَ نشتگ ءُ گریوگ ءَ اِنت، اسل ءَ آ گریوگ ءَ نہ اِنت آ ھما زُلم ءُ زوراکی ءِ گواھی ءَ دیگ ءَ اِنت کہ کبزہ گیریں ریاست پاکستان ءَ آیانی سر ءَ مُشتگ۔ ھما گواچنیں راستی ءِ گواھی ءَ دیگ ءَ اِنت کہ آئی ءَ ھِچ زندان ءِ سانکل ءُ زمزیل داشت نہ کن انت۔

اے اَکس چیھال جنان ءُ گُشان اِنت کہ ” ما وتی براتانی لاشاں کبرانی میار اَلّم کن ایں بلے آیانی دیستگیں واباں کَل ءُ کسارت کُت نہ کن ایں۔

اے اَکس گوستانک ءِ چمّانی تہ ءَ چم پیشدار ایت ءُ ھمے جُست ءَ اَلم کنت کہ ” داں کد ما وتی براتاں بے موسم ءَ کبرانی میار کن ایں؟ داں کد اے زمین وتی بچّانی ھُوناں گوں سُھر بیت؟ کدی آ مھلبیں بام ودی بیت کہ مئے چم گمانی جاہ ءَ وشیانی ارساں بہ شلین انت؟

داں ھما وھد ءَ اے وڑیں ساھت مئے سر ءَ ساھیل ءُ ساچان بنت کہ گُلامی ءِ سیاہ ءُ تھاریں شپ ھست اِنت۔ اے شپ ھما وھد ءَ مھلبیں بامے ءَ بدل بیت کنت کہ مئے گِھگیری برجاہ بہ بیت۔ دانکہ ما آجو نہ بہ ایں لاڑکیں گھار برات ءِ کبرانی سر ءَ تُرونگلیں ارساں گوار اَنت۔ اے ارس مارا ھمے یاتاں پرین انت کہ آجوئی ءِ نیاد تھنا دیمھونی نہ اِنت بلکیں ھما ھمت ءُ توکل اِنت کہ مئے چمّانی راہ ءَ ارسانی دروشم ءَ شلان بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ سلاہ بندیں آجوئی لوٹوکیں گل بلوچ لبریشن آرمی ( بی ایل اے) ءِ اُرشانی توک ءَ گیشی اتکگ، گوستگیں شش ماھانی توک ءَ 284 اُرش کنگ بیتگ انت – گل ءِ نیمگ ءَ اُرشانی توک ءَ ترندی گندگ ءَ اتکگ چریشانی توک ءَ ٹرین ھائی جیکنگ، آئی ای ڈی اُرشانی توک ءَ گیشی ءُ شھر ءُ شھدگانی کنٹرول کنگ ءِ ویل پیش کنگ بیتگ انت-

بی ایل اے ءَ ھمے نیم سال ءِ اُرشانی کساس گوستگیں سال ءِ اُرشانی کَچ ءَ سر بیتگ انت- اے اُرشاں بیڑ، سرکاری ءُ لشکری ماڑیانی کنٹرول کنگ ءُ پورسز ءِ سلاھانی پچگرگ ھوار انت-

کاروائیانی توک ءَ جعفر ایکسپریس ءِ ھائی جیک کنگ ءُ ایشی ءَ سواریں سدانی کچ ءَ پوجی کارندھاں الگار کنگ دمگ ءَ اولی ویل انت ءُ ھمے وڑ نوشکی ءُ تربت ءَ بسانی کاروانانی دروشم ءَ سر ءُ پر کنوکیں پوجی کارندھانی نشانگ کنگ بازیں کچے ءَ آماچ کنگ ھوار انت-

بلوچ لبریشن آرمی ءِ آفیشل چینل ھکّل میڈیا ءِ نیمگ ءَ انفوگرافکس رپورٹ ءِ شنگ کتگین ءِ رد ءَ “بلوچ لبریشن آرمی ءِ سرمچاراں 2025 ءِ بنداتی شش ماھانی میان ءَ زورگریں پاکستانی پوج ءِ ھترناکیں اُرشانی آسر ءَ تاوانانی دیمپانی کتگ – سرمچاراں زورگریں پوج، آئی ءِ کمکار ءُ پوجی کارساز یکشل ءَ اُرشانی نشانگ کتگ انت“-

“ ھمے سال ءِ شش ماھانی توک ءَ بلوچ لبریشن آرمی ءَ کساسی رنگ ءَ 284 اُرش کتگ انت ءُ زورگریں پاکستانی پوج ءِ 668 ءَ گیش کارندہ مرتگ انت، ھمے وڑ 58 چاریگ ءُ ایجنٹس کشتگ انت- اے کاروائیاں 290 دزگیری بیتگ انت، 121 بمب تراک کتگ انت، 131 گاڑی تباہ کتگ انت ءُ یہ ٹرینے ھائی جیک کتگ ”-

“ بلوچ لبریشن آرمی ءِ سرمچاراں اے شش ماھانی وھد ءَ 9 گچینی آپریشنز سرجم کتگ انت، چریشاں سَے فدائی اُرش ھوار انت- بی ایل اے ءِ 36 سرمچار ڈیھ ءِ پھازگ ءَ شھید بیتگ انت چریشانی توک ءَ 7 فدائی ھوار انت – سرمچاراں 45 ءَ گیش جاہ دستیگ کتگ انت ءُ ھمے وڑ 17 پوجی بَنجاھانی تباہ کتگ انت- اے کاروائیانی وھد ءَ 115 ءَ گیش رنگ سلاہ ءُ گولہ بارود برتگ انت-”

رپورٹ ءَ گوشگ بیتگ “ اے دراھیں کچ ءُ کساساں زانگ بیت کہ جنگولی کاروائیانی تہ ءَ پدر بیت انت کہ بلوچ لبریشن آرمی ءَ 2025 ءِ بنداتی شش ماھانی توک ءَ زورگریں ریاستی تاکتانی مھکم، ھترناک ءُ آسرال اُرشانی سبب ءَ ترندیں تاوانانی دیمپانانی آماچ کتگ انت – بی ایل اے ءِ گامگیجاں نا ایوک ءَ زمینی تک ءَ گرگ ءَ سوبمندی بیتگ بلکیں آئی ءَ دشمن پوجی ستک ءُ کاروائیانی تک ءَ ترندیں پروشی داتگ انت- بی ایل اے آیوکیں وھد ءَ ھم ریاستی زوراکی ءُ زورگری ءِ ھلاپ ءَ وتی جد ءُ جھد ءَ گیش ءُ شوربندی ءِ ھواری ءَ برجاہ دار ایت – زورگریں تاکت ءِ واستا بلوچستان نی ھچ تک ءَ مھکم نہ بیت انت”–

بی ایس سی ءِ کِرد

نبشتہ کار: مھراج بلوچ

دی بلوچستان پوسٹ

اگاں بچار ئے پہ بلوچ راج ءَ ھمک روچ سیاھیں ءُ تھاریں روچے بستار ءَ زانگ بیت چے ءَ کہ گُلامیں راج ءِ زِند وت وتی تہ ءَ تھاری ءِ نام اِنت گلام ءِ زندمان زندے نہ اِنت ھمے وڑ ءَ ھمک روچ ڈیھ ءِ لوگاں آس روک اِنت کماش، ورنا، نودربر زھگ ءُ زالبول زورانسری آوارجنگ بنت لٹ ءُ کٹ کنگ بنت گار ءُ بیگواہ کنگ بنت، شھید کنگ بنت آیانی ژانگولیں لاش دور دیگ بنت بلوچستان ءِ ھمک دمگ ءُ چوشیں لوگے پشت نہ کپتگ کہ پاکستان ءِ زوراکیانی آماچ نہ اِنت ءُ اے لڑ یکشل ھمے داب ءَ برجاہ اِنت۔

اِے ھبر پدر بیت کہ اُستان ءِ دائم ءَ ھمے جھد بیتگ کہ آ بلوچ نودربراں چہ وانگ، زانگ، سنجی ءُ پگری پڑ ءَ دور بدار اِیت بلے مئے وتی راجی نودربراں زانگ ءُ سرپد بوگی اِنت ھما نودربر کہ آ مروچی جتا جتائیں دانشگاہ ءُ ادارگاں وانگ ءَ اَنت ھمایاں سما بوگی اِنت کہ گُلامی ءِ زند ءِ سانکلاں ایوک ھمے یکیں شے پروش دات کنت آ وانگ ءُ زانگ اَنت وھدے مئے وانوکیں تبکہ نودربر چہ راجی گلامی ءَ بے سُد ءُ بے سما بہ بیت ءُ وانگ ءِ گِستائی ءَ ھچ بستار ءُ ارزشت مہ دے اَنت گڑا سرپد بہ بنت کہ اے گُلامیں پند پہ مدامی زوراکیانی دپتراں نبیسگ بیتگ۔

بلوچ راجی جنز ءَ ھزاراں اَنچیں ورنا ودی کتگ کہ آیاں وتی پکر ءُ لیکہ ءِ باوست ءَ وتی چاگرد ءَ راجکاری سکین داتگ ءُ دژمن ءِ سازتگیں پندل بے سوب کتگ اَنت۔ اگاں ما بچاریں داں ما گند ایں کہ بلوچ نودربر گل (بی ایس سی اسلام آباد) بلوچ راجی زرمبشت ءِ تہ ءَ مزنیں کردے ھست۔ اے گوستاگیں ءِ سنگتانی داتگیں کُربانی اَنت کہ مروچی ( بی ایس سی اسلام آباد) ءِ گَل ءَ یک بلاھیں مُدتے بیت کہ شَرّیں رنگے ءَ دیم پہ وتی منزل ءَ جُنزان اَنت، بی ایس سی اسلام آباد ءِ جوڑشتی ءَ بگر داں ھستیں وھد ءَ بلوچ راجی جُنز ءِ تہ ءَ نودربر جوانیں کردے پیلو کنگ ءَ اَنت۔

من انچو سرپد باں کہ اسلام آباد ءِ ڈولیں جاگہ ءَ بی ایس سی ءِ دروشم ءِ ادارگے جوڑ بوگ پہ بلوچ راج ءَ یک زیبائیں سوگاتے ءَ کم نہ اِنت، چے ءَکہ بی ایس سی یک انچیں گلے کہ آاسلام آباد ءِ جتائیں وانگجاھانی تہ ءَ بلوچ ءِ توار جوڑ اِنت بلکیں تھنا اسلام آباد ناں بلوچستان ءِ اے دگہ جاگھاں ھم نودربرانی توار اِنت، بی ایس سی یک گلے نہ اِنت آیک راجی جُنزے اگاں بچاریں وھدے چہ بلوچستان ءَ نودربرے پہ وانگ ءُ زانگ اد ءَ کیت ءُ اسلام آباد ءَ سر بیت گڑا بی ایس سی ناں تھنا اے نودربر ءَ ادارگ ءِ جیڑھانی سر ءَ سرپدی دنت بلکیں آئی ءَ وتی پجار، دود ءُ ربیدگ ءِ رکینگ ءَ ھوار بلوچستان ءِ راجدپتر ءُ زمین ءِ بارو ءَ سرپدی ودی کنگ ءِ جھد ءَ کنت اِنت، اے جھد ءَ گَل جوانیں رنگے ءَ سوبمند ھم بیتگ اگاں بچار ئے زوراکیں اُستان بھ نہ لوٹ اِیت کہ بلوچ راج ءِ تہ ءَ سرپدی ودی بہ بیت پمیشکا آئی ءَ گیش ءَ چہ گیش جھد کتگ کہ بلوچ راج ءَ وتی بنداتی رژنائی ءَ زبھر بہ کنت بلے بی ایس سی ءَ مئے ورنا ءُ نودربر اے باور ءَ کناھینتگ اَنت کہ کتاب دوست ءِ ورنا ءُ وانوکیں نودربر وتی راجی ذمہ واریاں سرپد بِیت ءُ وتی راجی ذمہ واریاں پیلو کنگ ءِ جھد ءَ بہ کنت۔

بی ایس سی اسلام آباد ءَ بلوچ نودربرانی تہ ءَ سرداری، نوابی، مکرانی، رکشانی ءُ سلیمانی پرک ءُ درک ھلاس کنگ ءُ اے دگہ چاگردی سلکاریاں چہ رکینگ ءِ ھاتر ءَ بلوچ ورنا کتاب ءُ ند دست ءَ داتگ، وانگ ءُ وانینگ ءِ درس دیگ ءِ جھد ءَ اِنت ھمے جیڑہ زوراک ءِ دیم ءَ یک مزنیں ڈانک ھمے ھاتر ءَ زوراکیں اُستان ءَ وتی بے بُنیں پندلانی سازگ ءَ مھتل نہ بیت آ مدام جھد کنت کہ آ بلوچ نودربراں چہ وانگ ءَ دور بے دار اِیت زوراک سرپد اِنت کہ وانندھیں نودربر وتی ھک ءِ پچ گرگ ءَ زانت مروچی ھم بلوچستان ءَ کتاب بندیگ اَنت کلم بندیگ اَنت وانگ ءُ زانگ ءِ سر ءَ بندش ھست، نودربر زورانسری آوارجنگ ءُ شھید کنگ بوگ ءَ اَنت انگت ءَ زوراکیانی درچ یکشل ءَ برجاہ اِنت انچوش کہ زاکر جان، زاھد، شبیر جان ءُ اے دگہ ھزارانی کساس ءَ بلوچ راجی ورنا زوراک ءِ زندان ءَ بندیگ اِنت ھمے رنگ ءَ رضا جھانگیر، اللہ داد ءُ کمبر چاکر ءِ ڈولیں سدانی کساس ءَ شھید کنگ بیتگ ءُ ژانگولیں لاش ویرانے ءَ دور دیگ بیتگ۔ آئی ءِ لوٹ ھمیش اِنت کہ بلوچ نودربر ءُ لس مھلوک ترس ءُ بیم ءِ آماچ ءَ بہ کنت دانکہ آ وتی ھک ءُ وتی راجی آجوئی ءِ ھاتر ءَ بے توار ءُ ھاموش بہ بیت بلے انگت بلوچ نودربر دیم ءَ جنزان اِنت پہ وتی آیوکیں باندات ءِ ھاتر ءَ راجی مکسد ءِ ھاتر ءَ جھد کنوکیں مردم اے ھبر ءَ شر سرپد اِنت کہ زلم ءِ دیم ءَ توار چست کنگ ءُ گھگیری کنگ ءِ آسر زندان ءُ مرگ اِنت بلے راجی آجوئی لوٹوکیں جھدکارے اے ھبر ءَ ھچ کمار نہ کنت بلکیں زند ءُ مرگ ءَ پہ وشیں دلے امبازاں زیر اِیت۔

انچوش کہ سلمان ھمل گُش اِیت “چوں مہ بیت کہ نودربر ھاموش بہ بنت وت ءَ وھد ءِ مُجاں گار ءُ بیگواہ بہ کن اَنت ءُ چماں بند بکن اَنت کہ من گندگ ءَ نیاں یا کہ منی باریگ نئیت” مروچی ھم وھد اِنت بلوچ نودربر بہ جیڑ اَنت اے جاوراں بہ مار اَنت کہ مارا اے درگت ءَ چی کنگی اِنت، راج ءِ نودربر کہ وھدے چہ راجکاری ءَ دور بہ بیت گڑا آ ھچ کت نہ کن اَنت مروچی بلوچ نودربراں راجکاری تلو سر ءَ وتی گام ایر کنگ لوٹ اِیت ءُ دیم ءَ جُنزگ لوٹ اِیت دانکہ آ وتی راج ءِ ھاتر ءَ ھکمیں کلات ءُ زوراک ءِ پندلانی پسو ءَ جوانیں رنگے ءَ دات بہ کنت۔

بازیں نودربرانی اُمیت گوں بی ایس سی ءَ بندوک اَنت بلے برے برے درد بیت کہ باز بر ءَ مئے لھتیں نودربر دژمن ءِ هلاپ ءَ اینچو پندل نہ ساز اَنت اینچو کہ یک ءُ دومی ءِ بگیری ءَ سازگ ءَ دز گٹ اَنت یک ءُ دومی ءِ ھلاس کنگ ءَ پہ میلانک اَنت، کسان کسانیں جیڑاھانی سر ءَ وت ما وت اڈانک اَنت اے ھبر ءَ سرپد نہ اَنت کہ مئے بنوکی جیڑہ چے اِنت پرچا کہ ما دژمن ءَ چہ گیش وت ماں وت گُٹ گیر ایں اگاں بچار اِت ھمے وت ماں وتی اڑ ءُ کُڈْانی سوَب ءَ باز بر ءَ گَل پروشت ءُ پروش ءِ آماچ بوتگ اَنت ءُ کار ھما جاہ ءَ اوشت ءِ آماچ بیتگ اَنت۔

بلے اے مئے وشبھتی اِنت کہ بی ایس سی ڈولیں گَلے ءَ جھد کتگ اے جیڑہ گیش ءُ گیوار کتگ وتی مُھکم کنگ ءِ جُھد کتگ بی ایس سی ءَ بلوچستان ءِ جتا جتائیں شھر ءُ دَمگ ءِ نودربر ھوار اِنت ءُ ھرچ نودربر کہ آ بی ایس سی گل ءِ باسک اِنت بائد اِنت وتی زاتی جیڑہ ءَ یک کش ءَ بکن اَنت ءُ بیا اَنت دست ماں دست بہ بنت، اے کاروان ءَ دیم ءَ بہ بر اَنت ءُ بی ایس سی گیش ءَ چہ گیش مُھکم بکن اَنت ءُ آیوکیں وهد ءَ دُرستیں جیڑھاں گیش ءُ گیوار بکن اَنت یک شریں آیوکیں گامگیجے جوڑ بکن اَنت داں کہ آ گامگیج بلوچ راجی جنز ءِ گِھتری ءِ ھاتر ءَ اڈ دیگ بہ بیت داں کہ دُژمن ءِ ھمک پندل بے سوب بہ بیت ءُ بلوچ راجی مول ءُ مراد سوبمند بہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ یک جولائی ءِ بیگاہ ءِ ساھت پنچ نزیک ءَ مئے سرمچاراں کولواہ ءِ دمگ کنیچی ءَ زورگریں پاکستانی پوج ءِ چیک پوسٹ ءِ پھازوکی ءَ اوشتوکیں یک کارندھے اسنائپر اُرش ءَ نشانگ کتگ کُشتگ، وھدے کہ سرمچارانی دگہ یک ٹولی یے ءَ بُنجل سر ءَ مزنیں سلاھاں چہ تُرندیں اُرشے کتگ دُژمن دگہ گیش جانی ءُ مالی تاوان داتگ-

جارکش ءَ گوشتگ سے جولائی ءِ بیگاہ ءِ پنچ نیم ءَ مئے سرمچاراں گورکوپ ءَ پاکستانی پوج ءِ بُنجل اُرش ءِ نشانگ کتگ ھمے میان ءَ مارٹر ءِ بازیں گولھے آس داتگ کہ نشانگ ءَ کپتگ اَنت، اے اُرش ءَ دُژمن ءِ سے کارندہ مرتگ ءُ بازین ئِے ٹپی بیتگ اَنت-

جارکش ءَ گْوشتگ کہ بی ایل ایف کولواہ ءُ گورکوپ اُرشاں پاکستانی پوج ءِ نشانگ کنگ زمہ واری ءَ منّ اِیت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ سرمچاراں بلوچستان ءَ دشمن ءِ جنگی انفراسٹرکچر دو جتا جتائیں جاھاں اُرشانی نشانگ کتگ، چریشانی توک ءَ یک مھکمیں آپریشنے مستونگ ءِ شھر ءَ قلب ءَ کتگ ءُ دومی دومی ترندیں اُرش آماچ ءِ کوھی دمگ ءَ کتگ – دوئیں اُرشاں زورگریت، ریاستی بربرانکی، ءُ بلوچ نسل کشی ءِ ھلاپ ءَ بی ایل اے ءِ گامگیج انت اے کاروائیانی زمہ واری گل من ایت-

جارکش ءَ گوشتگ سَے شمبے ءِ سھب ءَ بلوچ لبریشن آرمی ءِ سرمچاراں مستونگ ءِ شھر ءَ دو جتا جتائیں جاھاں مھکمیں رنگے ءَ کاروائی کتگ – سرمچاراں جوانیں رنگے ءَ تھسیل آفس، سَے بینک ءُ دگہ ریاستی ادارانی کنٹرول دستیگ کتگ انت- سرکاری کارگسانی گچینی ریکارڈ دستیگ کتگ انت – ءُ دشمنیں لشکر ءِ کارندھانی سلاہ پچگپتگ انت – ھمے وھد ءَ سرمچاراں شھر ءِ توک ءَ گشت کتگ ءُ پیشگامی ءَ بس ایوک ءَ دشمن ءِ چیریں نیٹ ورک الگار کتگ بلکیں بزدلیں دشمنیں پوج ءِ لگوری پاشک کتگ-

آئی ءَ گوشتگ زورگریں پاکستانی پوج ءُ پولیس ءِ ناشریں ادارہ سی ٹی ڈی ( کاونٹر ٹیررزم ڈیپارٹمنٹ) ءَ اے کاروائی ءِ دارگ ءِ جھد ءَ بکتر بند گاڑیاں گوں پیشگامی کتگ چریشی ءَ سرمچاراں مزنیں سلاہ، راکٹ لانچر ءُ وتکاریں رائفلاں گوں اُرش کتگ ءُ دشمن پشتکنزی کنگ ءَ لاچار کتگ – زورگریں ریاست ءِ پورسز ءِ نیمگ ءَ بیوکیں پسھی کاروائی ءَ سرمچاراں جنگولی ریپک ءَ بے سوب کتگ- چریشی ءِ آسر ءَ مستونگ ءِ شھر بی ایل اے ءِ سرمچارانی کنٹرول ءَ داں دو اداراں برجاہ بیتگ-

آئی ءَ گوشتگ ھمے وھد ءَ زورگریں ریاست ءِ چیردستی ءَ کار کنوکیں پولیس ءِ ناشریں ادارہ سی ٹی ڈی ،بلوچ لبریشن آرمی ءِ سرمچارانی سر ءَ اُرش ءِ کوشش ءَ ھوار بیتگ- سرمچاراں اے اُرش بے سوب کتگ ءُ دشمن ءَ را سکا تاوان داتگ- بی ایل اے ءَ پیش ءَ پولیس ءُ لیویز پورسز ءِ بارو ءَ وتی تچکیں پالیسی تچک کتگ انت انت آیاں پہ ادارہ نشانگ نہ کنت انت اگاں اے اداراں ھواریں کجام ھم مردم تچک ءَ دشمن ءِ جنگی مشینری ءِ بھر بوت گڑا آئی ءِ نشانگ کنگ بی ایل اے ءِ گامگیجانی بھر انت-

آئی ءَ گوشتگ بلے گوستگیں ویل ءُ پیش ءَ باز براں گوستانکاری ءَ اے گپ ءَ تچک کن ایں کہ سی ٹی ڈی بلوچ نسل کشی، بیگواھی، ءُ ریاستی ناشرکاری ءَ نا ایوک ءَ بھر مند بیتگ بلکیں یک پرکاریں باسکے جوڑ بیتگ- ھمے درچ ءَ بلوچ لبریشن آرمی مروچی تچک ءَ سی ٹی ڈی ءَ “ بلوچ راجی دشمن ادارہ” نامین ایت، ءُ جار ءَ جنت کہ آیوکیں وھداں اے ادارہ تچک ءُ زورگریں دشمنیں پوج ءِ پیم ءَ بی ایل اے ءِ اُرشانی نشانگ ءَ بیت انت- اے درگت ءَ بی ایل اے ءَ دراھیں سرمچاراں کلانیں کمانڈ کونسل ءَ جارانک داتگ کہ آ تچک ءَ سی ٹی ڈی ءَ اُرشانی بندات ءَ بہ کن اَنت- ھمے واستا دراھیں بلوچاں اے ھال ءَ دے ایں کہ آ زورگریں ریاست ءِ جھلی ناشریں پورس ءُ آئی ءِ کارندھاں وت ءَ دور بہ دار اَنت ءُ آیاں چاگردی دزکشی بہ کن انت ءُ ھچ رنگیں لین دین مہ کن اَنت-

جارکش ءَ گوشتگ بی ایل اے اے جارانک ءِ درچ ءَ سی ٹی ڈی ءِ دراھیں بلوچ کارندھاں سرپد کنت انت اگاں آ ھم نی سی ٹی ڈی ءِ وڑیں ادارھانی بھر بنت گڑا آیاں گدسری، بلوچ نسل کشی ءَ ھواری ءُ دشمن ءِ سرپاں ھوار بوگ ءَ نشانگ کنت اِنت- اگاں ھما بلوچ اے جار ءَ پد سی ٹی ڈی ءَ دزکشی کنت اِنت گڑا بی ایل اے آئی ءَ نشانگ نہ کنت اِنت-

سی ٹی ڈی ءَ ابید دگہ پولیس پورسز ءُ لیویز ءِ درگت ءَ بی ایل اے ءِ پالیسی پیش ئیگ انت پہ ادارھی آیاں نشانگ نہ کنت اِنت بلے اگاں زاتی رنگ ءَ کارندہ دشمن ءِ کار دار بوت انت گڑا نشانگ کنگ بنت اِنت-

آئی ءَ گوشتگ مستونگ ءِ شھر ءَ کنٹرول کنگ ءِ وھد ءَ سرمچاراں ریاستی ماڑی سرجم ءَ کنٹرول کنگ ءَ پد آ سوتکگ انت دانکہ دشمن ءِ نوآبادیاتی ادارہ نا ایوک ءَ تباہ بہ بنت بلکیں بلوچ مھلوک ءِ زھاں آیانی اجارہ داری ءِ ترس در بہ بئیت انت – کاروائی ءَ پد سرمچار جوانیں ریپکاں سوبمندی ءَ درایگ ءَ سوبمند بیتگ انت ءُ دشمن ھرچ وڑیں رنگاں بے سوب بیتگ-

جارکش ءَ گوشتگ دومی نیمگ ءَ آماچ ءِ کوھی ھنداں بلوچ لبریشن آرمی ءِ یک دگہ ٹولی ءَ ریاستی پوج ءِ سر ءَ ریموٹ کنٹرول بمبے ءَ گوں نشانگ کتگ – چریشی ءَ پد سرمچاراں وتکاریں سلاھاں گوں دشمنیں پوج ءِ سرین پروشیں اُرشے کتگ، چریشی ءِ آسر ءَ کم چہ کم ھپت دشمنیں کارندہ مرتگ ءُ بازینے زدگ بیتگ انت – ھمے جنگ ءُ بی ایل اے ءِ دو سرمچار سنگت طاھر پنام ءِ سربلند ءُ سنگت نعیم ساتکزئی پنام ءِ شاھد شھید بیتگ انت-

آئی ءَ گوشتگ شھیدانی ھوناں زمین سیراپ ءُ گھگیری ءِ راجدپتر ءَ سھریں لبزاں گوں نویسگ بنت انت- شھید طاھر شاھوانی، مستونگ ءِ دمگ کھڈکوچہ ءَ سیادی دار ایت ءُ گوستگیں یک سالے ءَ بی ایل اے ءَ گوں بندوک بیتگ- آ مستونگ ءِ پِڑ ءَ لشکری کاراں پیلو کنگ ءَ بیتگ- شھید نعیم پنام ءِ شاھد ساتکزئی شال ءِ دمگ ڈگاری ءَ سیادی دار ایت ءُ 2024 ءَ بلوچ لبریشن آرمی ءَ گوں بندوک بیتگ ءُ ماتیں سرڈگار ءِ ھاتر ءَ پرکار بیتگ- شھید طاھر پنام ءِ سربلند یک بے تواریں مردمے بیتگ بلے پھتوئی ءَ وتی مٹ وت بیتگ ءُ نہ ترسے بیتگ- آئی ءَ کسانیں وھدے ءَ گل ءِ رھبندانی پاسداری کتگ- شھید نعیم ساتکزئی پنام ءِ شاھد وتی زانشت ءَ بندوکی ،یکشلیں پٹ ءُ چاری ءُ کربانی ءِ جزبگ ءِ سبب ءَ نوکیں نسل ءِ واستا یک آشوبی دروشمے بیتگ، ھردوکیں شھید نا ایوک ءَ دشمن ءِ ھلاپ ءَ گھگیری اش کتگ بلکیں وتی زندگی اش راجی آجوئی ءَ را مُچانکی پکرے بکشاتگ-

گڈسر ءَ آئی ءَ گوشتگ بلوچ لبریشن آرمی اے شھیداں سھر چکیں دروت ندر کنت ءُ آیانی ھون ءِ ترمپ آجوئی ءِ راہ ءِ گشینگ سرپد بیت ءُ آیوکیں نسل ءِ رھشونی ءَ چراگے ءِ کرد بنت اِنت-

بلوچستان ءِ دمگ کیچ ءِ بُنجاھی شھر تربت ءَ ذیشان زھیر ءِ کوش ءِ ھلاپ ءَ یک زھرشانی روانکے کشگ بیتگ، کہ اود ءَ شھریاں مزنیں کچے ءَ بھر زرتگ- زھرشانی کنوکاں ریاستی نارشرکاری ءُ ڈیتھ اسکواڈ ءِ ھلاپ ءَ تُرندیں ناراہ جتگ-

روانک ءِ بندات بلوچ یکجھتی کمیٹی ( بی وائی سی) ءِ چیردستی ءَ کنگ بیتگ، کہ زالبول ءُ چُکاں ھوار بیگواھیں مردمانی کھول ءَ شھید فدا چوک سر ءَ مُچ بیتگ ءُ بھر زرتگ اِت-

اے درگت ءَ زھرشانی ءَ ھواریں مردماں گوشتگ اَت کہ ھمکروچ ذیشان زھیر وڑیں بلوچ ورنایاں درکانودی کوش، کانود ءُ آئین ءِ ھلاپ زورانسری بیگواہ کنگ ءَ پد کُشگ بنت ءُ اے وڑیں وئیل یکشل ءَ گوں تُرندی ءَ برجاہ ءَ اِنت-.

زھرشانی کنوکاں گوشتگ کہ انّگیں روچاں مکران ءَ بگر ھُزدار، مستونگ، ھاران ءُ آواران ءَ ھوار بلوچستان ءِ بازیں دمگاں چہ مردماں سیکیورٹی فورسز لوگاں چست کنت ءُ دومی روچ ءَ آیانی لاشاں دور دنت – مشکے ءَ وَ ھمکروچ جوڑ بیتگ کہ شھریاں یا بُنجل ءَ لوٹائین اِیت یا لوگاں چہ آوار جنت کُش اِیت ءُ پد آیانی لاشاں چگل دنت-

بی وائی سی ءِ گوشگ اِنت صوبائی حکومت ءَ ریاستی چیردستی ءَ بی وائی سی ءِ ھلاپ ءَ کاروائی ھمے ھاتر ءَ کنت دانکہ بلوچستان ءَ ریاستی زوراکی ءَ تُرندتر بہ کنت ءُ آیانی ھلاپ ءَ توار چست کس مہ بیت- بلے بلوچ راج ءُ بی وائی سی ءَ وتی گھگیری ءَ چہ پُشت کنز نہ بیت-

بی وائی سی نیمگ ءَ چہ ذیشان زھیر ءِ ناھکیں کوش ءِ ھلاپ ءَ سرجمیں بلوچستان ءَ زھرشانی ءِ دْرچ برجاہ بنت- اشی ءَ ساری گل ءَ پنجگور ءُ کراچی ءَ ھم زھرشانی روانک کش اِتگ اِنت-

مروچی کراچی ءَ بی وائی سی ءِ زھرشانی روانک پولیس ءِ کریک ڈاؤن ءِ دیمپانی کنگ کپگ ءَ اِنت، اود ءَ پولیس ءَ گل ءِ زالبولیں رھشوناں ھوار بازیں زھرشانی کنوک دزگیر کتگ اَنت-

بلوچ یکجھتی کمیٹی ءِ بنجاھی گوانک ءِ پد ءَ پنجگور ءَ سرکاری پلامرزی ءَ ھستیں گل ءِ دست ءَ کُشگ بوتگیں ورنا زیشان زھیر ءِ ھاترا پرایمنیں زھرشانی ءِ سر ءَ پولیس ءَ اَرش کتگ ءُ زھرشانی کنوکاں لٹ شاپ کتگ ءُ دزگیر کتگ انت۔

پولیس ءَ لیاری 8 چوک ءَ بلوچ یکجھتی کمیٹی ءِ روانک ءِ سر ءَ بیڑ برت ءُ ھواریں مردم لٹ شاپ کتگ انت-

پولیس ءَ آمنہ بلوچ، سھیل، عرفان ءُ دگہ دو زھرشانی کنوک ھوار چار مردم دزگیر کتگ ءُ رسالہ پولیس اسٹیشن ءَ برتگ انت۔

بلوچ یکجھتی کمیٹی ءِ رِد ءَ زیشان زھیر ءِ درکانودی کوش ءِ ھلاپ ءَ کراچی زون ءَ لیاری ءَ پرایمنیں روانکے برجم کتگ ۔ بلے سندھ پولیس ءَ اے راہ ءِ بندات کنگ ءَ پیسر زور داشتگا انت۔

آمنہ بلوچ گوں دگہ سئے مردیں زھرشانی کنوک زھرشانی ءِ جاہ ءَ دزگیر کنگ بیتگ انت۔

آئی ءَ گوشت کہ اے اولی رند نہ انت کہ بی وائی سی ءِ پرامن زھرشانی ءَ را کراچی ءَ ریاستی زوراکیانی دیمپانی کنگ ءَ انت۔ سندھ پولیس ءَ مئے جمھوری ءِ زھرشانی ءِ ھک باز رند ءَ نشانگ جوڑ کتگ۔

آئی ءَ گْوشتگ: ما اے برجاھیں آزار ءُ ازیت ءَ ایر جن ایں ءُ دراھیں دزگیریں زھرشانی کنوکاں زوت یل کنگ ءِ لوٹ ءَ کن ایں. ریاست ءَ وتی جرمانی ھساب دیگ لوٹ ایت۔ ایرادگری ءَ راستی بندگ نہ بیت انت-

بیگواھیں عبدالغنی بلوچ ءِ کھول ءَ وتی بیان ءَ گْوشتگ کہ عبدالغنی بلوچ ءِ پہ زورانسیر بیگواھی ءَ یک ماھے ءَ گیش گوستگ بلے انگت آ آمیدگس ءَ پیش کنگ نہ بیتگ ءُ آئی ءِ بابت ءَ ھچ وڑیں سرپدی دیگ نہ بیتگ۔ دزگیری ءِ نہ منّگ ءُ ریاستی ادارجانی نیمگ ءَ برجاھیں بے تواری پاکستان ءِ آئین ءُ انسانی ھکانی پدّریں لگتمالی اِنت۔ عبدالغنی بلوچ یک سادگیں مردمے نہ اِنت، بلکیں یک زانتکارے، نبشتہ کارے، شنگکارے، ءُ سیاسی جھدکارے، کہ آئی ءَ مدام وتی ھیال ءِ گپ چہ دلیل، زبان ءُ شَئور ءَ درشان کتگ اَنت۔

آیاں گوشتگ کہ ما کھول عبدالغنی بلوچ ءِ اے سرجمیں وھد ءَ ملک ءِ کانود ءِ رد ءَ امن ءُ ایمنی ءَ زند گوازینگ ءَ مُدام وتی ھکانی لوٹ ءَ کنگ ءَ اِیں ۔ ما غنی بلوچ ءِ زورانسری ءَ بیگواہ کنگ ءِ ھلاپ ءَ سرجمیں فورم کارمرز کتگ اَنت، ایشانی تہ ءَ تھانہ ءَ ایف آئی آر درج کنگ، آمیدگس ءَ درھواست دیم دیگ، ءُ دمگدار ءِ لوٹ کنگ ءُ ھمے رنگ ءَ امن ءُ ایمنی ءِ راہ ءَ پریس کانفرنس، سوشل میڈیا کمپین، زھرشانی ءُ مچی برجم دارگ ھوار اَنت۔

آیاں گوشتگ کہ 16 جون ءَ اولی زھرشانی ءِ ھمراھی ءَ دامگدار یِ کارگس ءَ یک درھواستے دیم دیگ بوتگ، ایشی ءِ تہ ءَ ڈپٹی کمشنر ءَ دل یکیمی داتگ کہ غنی بلوچ ءِ بابت ءَ ھزدار انتزامیہ گوں رھوت کنگ ءِ کوشست کنگ بیت ءُ سرپدی دیگ بیت۔ بلے ایشی ءَ پد گوں ھاندان ءَ ھچ وڑیں رھوت نہ بوت ءُ گُڈ سر ءَ ما ھاندان ءَ سرمل ءَ نوشکی ءِ مزن شھدگ بند کت ءُ ریاست ءِ بے پروائی ءِ ھلاپ ءَ دھرنا زھرشانی کت۔ اے دھرنا ءَ زالبول، پیر، ورنا، نودربر، انسانی ھکانی جھدکار، ءُ لس مردماں بھر زرتگ ءُ اے گپ ءِ پدر کنگ ءَ کہ غنی بلوچ ءِ بیگواھی ایوک ءَ یک ھاندانگ ءِ ھم نہ اِنت، بلکیں سرجمیں چاگرد ءِ مچانکی رنج ءُ گم اِنت۔

نندانک ءِ وھد ءَ اسسٹنٹ کمشنر نوشکی ءَ یک رندے پد ءَ کھول ءَ گوں گند ءُ نند کتگ ءُ دزبندی کتگ کہ روڈ بندی ھلاس کنگ بہ بیت۔ ما یک مسامے ءِ رد ءَ دھرنا ھلاس کت۔ دومی روچ ءَ دمگدار ءِ گوما دگہ سرجمی ءَ دیوان کنگ بوت کہ ایشی ءِ تہ ءَ واکداراں دلجمی دات کہ اے جیڑہ ءَ جوانیں گامگیج زیرگ بوھگ ءَ انت۔ اے کیس ءِ گوشدارگ دو روچ ءَ پد جے آئی ٹی ءَ بیت ۔ دومی نیمگ ءَ ھزدار ءِانتزامیہ ، ھمگرنچیں واکدار ءُ مھکمہ داکلہ ءَ گوں ھال ءُ اھوال کنگ ءَ زوت غنی بلوچ ءِ ھست ءُ جاور ءِ بابت ءَ ھاندان سرپد کنگ بیت۔ بلے نوشکی ءِ دمگدار ءَ ھوار ھچ وڑیں ادارہ ءِ نیمگ ءَ رھوت نہ بوتگ۔

ما گمان کنیں کہ اے جیڑہ ءِ تہ ءَ دیر کنگ، دیر کنگ ءُ بے تواری گیشتر گران کنگ ءَ انت۔ ما گوں ھچ ناجائزیں لوٹ ءَ دیم ءَ نہ اتکگ ایں، مئے لوٹ ایوک ءَ ایش اِنت کہ اگاں عبدالغنی بلوچ ءِ سر ءَ ھرچ وڑیں بھتامے ھست گُڑا آمیدگس ءَ پیش کنگ بہ بیت، اگاں ناں زوت یلہ کنگ بہ بیت۔ ما چہ ریاستی ادارہ، ھکومت، آمیدگس ءُ انسانی ھکانی درستیں ادارجاں دزبندی کنیں کہ آ انسانی، شرپ ءُ آئینی بنیادانی سر ءَ اے جیڑہ ءِ تہ ءَ زوتیں کردے پیلو بہ کن انت۔

بلوچستان ءِ دمگ کیچ ملک آباد کساس یازدہ ءُ نیم ءَ پاکستانی پوج ءَ مسلم ء طارق چہ وتی لوگ ءَ زورانسری درکتگ ءُ ناشناسیں جاھے برتگ۔ اے ویل ءَ پد اے ورنا بیگواہ اِنت ءُ آئی ءِ کھول ءَ آئی ءِ ھچ ھال ءُ اھوال نیست۔

سانمندیں کھول ءِ گشگ ءِ رد ءَ مسلم وتی لوگ ءَ بوتگ کہ لس پوشاک ءُ وردی ءِ پوشاکی کارندھاں لوگ ءِ سر ءَ اُرش کتگ ءُ آ دزگیر کتگ ءُ زورانسری برتگ۔

زانگ بہ بیت کہ بلوچستان ءَ چہ بازیں سالاں زورانسری بیگواہ کنگ ءِ سلسلگ برجاہ اِنت۔ انسانی ھکانی گلانی رد ءَ گوستگیں دو دہ سالانی تہ ءَ ھزاراں مردم کانودی رنگے ءَ دزگیر کنگ بوتگ اَنت کہ چہ آھاں بازیں مردمے انگت ءَ بیگواہ اَنت۔

بلوچستان ءِ جتاجتائیں دمگ گوادر ءُ کیچ ءَ پاکستانی پوج ءَ شش مردم آوار جنگ ءَ پد بیگواہ کتگ اَنت-

گیشیں ھالانی رِد ءَ کیچ ءِ دمگ مند ءَ پاکستانی پوج ءَ چار ورنا آوار جتگ ءُ بیگواہ کتگ اَنت کہ آیانی پجّار جاسم ء یعقوب ، ملک ء پیز محمد، فیصل ء بجار، ءُ رازق ء بجار ناماں چہ بیتگ اَنت – اے سرجمیں ورنا خدا بکش چھات ءِ جھمنند اَنت-

اِھوالکار ءِ رِد ءَ گوستگیں روچ ءَ پوج ءَ دمگ ءَ لوگانی سر ءَ بیڑبرتگ ءُ پنچ ورنا آوار جتگ، آیانی تہ ءَ یکے یل داتگ ءُ آ دگہ چاریں مردم بیگواہ ءَ اَنت-

ایشی ءَ ابید گوستگیں روچ ءَ پسنی ءِ دمگ لانٹی دان ءَ پاکستانی پوج ءَ بشیر ء سبزل آوار جتگ ءُ ناشناسیں جاھے ءَ برتگ چریشی ءَ آئی ءِ درگت ءَ ھچ وڑیں ھال نیست – کھول ءَ بشیر بلوچ ءِ پہ سلامتی ءَ یل کنائینگ ءِ لوٹ کتگ-

ھمے وڑ بلوچستان ءِ دمگ کیچ ءِ بنجاھی شھر تربت ءَ پاکستانی پوج ءَ یک مردمے آوار جتگ ءُ بیگواہ کتگ-

بیگواہ کنگ بیتگیں مردم ءِ پجّار سفیان ء غلام رسول صوفی نام ءَ چہ بیتگ کہ تربت ءِ دمگ سنگانی سر ءِ جھمنند اِنت-

اِھوالکار ءِ رِد ءَ گوستگیں روچ ءِ نیمروچ ءَ پاکستانی پوج ءَ سنگانی سر ءَ سفیان آوار جتگ ءُ ناشناسیں جاھے ءَ برتگ، چریشی ءَ پد آئی ءِ درگت ءَ ھچ وڑیں ھال دز نہ کپتگ-

زانگ بہ بیت بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت ھمکروچ زورانسری آوار جنی ءِ کیس دیم ءَ آیگ ءَ اَنت ءُ اے درگت ءَ انسانی ھکانی ادارہ اشی ءِ سر ءَ یکشل ءَ دلپردی درشان کنگ ءَ اَنت-