بلوچ یکجھتی کمیٹی ءِ رھشون ءُ نامداریں سیاسی باسک ڈاکٹر سبیہ بلوچ ءَ وتی پت میر بشیر اھمد ءِ زورانسری بیگواھی ءِ سے ماہ سرجم بوگ ءَ یک بیانے ءِ تہ ءَ گُشتگ کہ منی پت ءَ سے ماہ ءَ چہ پیش بیگواہ کُتگ ءُ تنیگتا آئی ءِ بارو ءَ ھچ چُشیں ھال ءُ اھوالے مارا دز نہ کپتگ۔
ڈاکٹر سبیہ ءِ رِد ءَ پنچ اپریل دو ھزار بیست ءُ پنچ ءَ آئی ءِ پت ءَ را ایس پی ھب سید فضل بخاری ءَ لوٹ اِتگ ءُ آئی ءِ پت اَبید چُشیں دلجنی ءَ اود ءَ شُتگ پرچاکہ آ مجرمے نہ بوتگ بلے آ اود ءَ رس اِت گڑا آئی ءَ را گُشگ بوت کہ آ واتر شُت کُت نہ کنت داں ھما وھد ءَ آئی ءِ چُک بلوچ یکجھتی کمیٹی ءَ یلہ نہ ینت یا وت ءَ مئے دست ءَ دزگیر نہ کنائین اِیت۔
آئی ءَ گُشت کہ اے بس تھنا درکانونی نہ اِنت بلکیں در اگلاکی ءُ تاکت ءِ رَد کارمرز کنگ ءِ بدتریں درور اِنت۔
بلوچ یکجھتی کمیٹی ءِ رھشون ڈاکٹر سبیہ بلوچ ءَ گُشتگ کہ ھر کس چُشیں زورانسری ءِ سر ءَ پَھر بند اَنت آ یات بکن انت کہ تاکت ادارُکی یے بلے زُلم ءِ ٹَپ دائمی بیت مرچی فضل بخاری ءَ کانون ءِ پَھازگ ءَ اَبید گار ءُ بیگواھی ءِ کردار ءَ پیلو کُتگ۔
مُھرم ءِ روچ ءَ ڈاکٹر سبیہ ءَ گُشتگ کہ من دوا لوٹاں کہ ھر کس زُلم کنت ءُ کسے اوں اے زالم ءِ ھمراھداری ءَ کنت آ بس تھنا دنیا ءَ انا بلکیں آکرت ءَ ھم پسو دے انت ءُ کسے زالمانی پھازگ ءَ کن انت اور آ زوت گند انت کہ آیانی غرور(مزن گندی) چِہ وڑ زُلم ءِ زوال ءِ جھل پرنچگ بنت ءُ دائمی ٹُکر ٹُکر بنت ءُ گار بنت۔
وتی بیانے ءِ تہ ءَ ڈاکٹر سبیہ بلوچ ءَ گُشتگ کہ من بس بیست ءُ ھشت سال ئیگ آں بلے من گوں وتی چماں دیستگ کہ زُلم گُڈی ءَ وت وتی پادانی چیراں بنت ءُ مِر اِیت۔ راجدپتر ءَ بچار ھما مردمانی آسر ءَ بچار کہ آیاں بلوچاناں تاوان داتگ بوتگ لھتے زلیل ءُ رُزوا بوت انت ءُ لھتے چہ نشہ ءَ برباد بوت انت، لھتے راجدروھی ءِ ڈیساں شُت انت ءُ لھتے پاھو دیگ بوت انت اے درست تاکت ءِ نشہ ءَ مُرت انت بلے بے شرپی ءَ گوں کَل ءُ کسارت کُت انت۔
آئی ءَ گُشت کہ زُلم ءِ ھلاپ ءَ جنگ کدی اوں نہ مِر اِیت پرچاکہ آ راستی ءُ اگلاکی رھبندانی سر ءَ اَنت زالم ھمنچو اوں تاکتور بہ بیت آئی ءِ لَب ءُ لالچ آئی ءِ نزوری بنت بے کسانی نزوریں آواز ھم وھد ءِ ھمراھی ءَ یک ھیروپے جوڑ بیت ءُ یک روچے اے زُلم زلور کنگ بنت پرچاکہ ھمے ابرم ءِ کانود انت ھمے آشوب درکّگ اِنت ءُ چہ ایشی ءَ کسے اوں نہ رَکّ اِیت۔
زانگ بہ بیت کہ چہ بلوچستان ھکومت ءِ نیمگ ءَ بی وائی سی ءِ سر ءَ کریک ڈاؤن ءِ میان ءَ پاکستانی لشکر ءَ ڈاکٹر سبیہ بلوچ ءِ پت ءِ لوٹگ ءَ پد رند ءَ آ دزگیر کُتگ ءُ منّگ نامگ ایر کُتگ کہ آئی ءِ چُک بی وائی سی ءَ یل بکنت یا وت ءَ مئے ھوالہ ءَ بکنت۔
بلوچ یکجھتی کمیٹی ءِ سر ءَ کریک ڈاؤن ءِ میان ءَ شال پولیس ءَ تھری ایم پی او ءِ رِد ءَ گل ءِ رھشون رہنما ڈاکٹر ماہ رنگ بلوچ، بیبرگ زھری بلوچ ءُ بیبو بلوچ دزگیر کُتگ انت وھدے بی وائی سی ءِ شاہ جی سبگتت اللہ ءُ گلزادی بلوچ آ چہ لوگ ءَ چِست کُتگ اَنت۔
بی وائی سی ءِ لیڈرشپ گوستگیں سے ماہ ءَ چہ ھدہ جیل ءَ بندیگ انت وھدے آیاناں تھری ایم پی او ءِ رِد ءَ سزا سرجم بوگ ءَ اَبید ھم یل دیگ نہ بوتگ اَنت۔
بلوچ یکجھتی کمیٹی ءِ گُشگ انت کہ صوبائی ھکومت فورسز ھکام ءِ لشکراں آیانی پُرایمنیں سیاسی جُنز ءَ را زور دیگ ءِ ھاتر ءَ در کانونی چِست ءُ ایر کنگ ءَ انت، وھدے دگہ رھشونانی یل نہ کنائینگ ءُ ڈاکٹر سبیہ بلوچ ءِ پت ءِ زورانسری بیگواھی چوناھا ھما رھشوناں چہ جُنز ءَ دور کنگ ءِ یک پندلے سازگ بوگ انت۔
آئی ءَ میان اُستمان ءُ انسانی ھکّانی گلاں چہ لوٹ کُتگ کہ آ پاکستانی ریاست ءِ ھمے در کانونی چِست ءُ ایرانی سر ءَ آئی ءَ پسو بہ گپت ءُ پُراِیمنیں سیاسی جُھد ءُ کوشست ءِ ھک ءِ ھمراھداری ءَ بکن انت۔
