گوادر : دو براتاں ھوار سے مردم زورانسری بیگواہ

بلوچستان ءِ تیاب دپی شھر چہ گوادر ءَ پاکستانی پوج ءَ دو براتانی آوار جنگ ءَ پد ناشناسیں جاھے ءَ برتگ اَنت، کہ آیانی درگت ءَ کھول ءِ گوشگ اِنت کہ آ انگت بیگواہ ءَ اَنت-

دمگی اِھوالکار رِد ءَ، بیگواہ کنگ بیتگیں مردمانی پجّار اسامہ ءُ صداقت ء حاجی ایوب نام ءَ چہ بیتگ اَنت- دوئیں سُھب ھشت ءِ نزیک ءَ ھما وھد ءَ آوار جتگ اَنت وھدے آ یک دکانے ءَ ساڑی بیتگ اَنت-

چمّگدانی رِد ءَ ، دوئیں برات گاڑی ءَ مان کتگ ءُ پوج ءَ وتی ھمراھی ءَ برتگ اَنت- اے وئیل ءَ پد پوج ءَ ناں آیانی دزگیری پدر کتگ ناں آیانی درگت ءَ سرپدی داتگ-

دومی نیمگ ءَ گوادر ءِ دمگ چہ جیونی ءَ زورانسری آوار جنی ءِ یک ھالے دیم ءَ اتکگ- دمگی اِھوالکار رِد ءَ سید محمد شاھو نامیں مردمے لھتے روچ ءَ ساری پوج ءَ آوار جتگ اَت، پد ءَ یل داتگ بلے چار روچ ءَ ساری دوبر آوار جنگ ءَ پد بیگواہ کتگ کہ انگت بیگواہ ءَ اِنت-

زانگ بہ بیت کہ بلوچستان ءَ زورانسری آوار جنی ءِ دْرچ یکشل ءَ دو دھکاں چہ برجاہ ءَ اِنت- دمگی ءُ میان استمانی انسانی ھکانی گل اے جیڑہ سر ءَ یکو توار چست کنگ ءَ اَنت-