TBP Balochi

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گوشتگ کہ سرمچارانی نمیرانی ءَ ھواریں دو ریاستی چاریگ مرگ ءِ سزا داتگ ءُ کشتگ انت ۔

آئی ءَ گوشتگ کہ بی ایل اے ءِ سرمچاراں بولان ، مچ ءَ زورگریں پوج ءِ دو کمک کار جمال خان ءِ طور گل جھمنند مچ ءُ عرضی ءِ سہراب چاگلہ سمالانی جھمنند سانگان دزگیر کتگ انت ۔

آئی ءَ گوشتگ جست ءُ پُرس ءِ وھد ءَ ھردو کمکاراں دپ ءِ وت منّ اتگ کہ پہ زر ءِ ھاتر ءَ زورگیریں پوج ءِ ھاتر ءَ چاریگری کتگ ۔

جارکش ءَ گوشتگ کہ کمک کاراں دپ ءِ وت منّ اِتگ کہ آیاں مالداری کتگ ءُ مچ ءِ کش ءُ گوری ھند ءُ دمگاں سرمچارانی پد چار اِتگ انت ءُ آیانی رندگیری کتگ ۔

جست ءُ پرس ءِ وھد ءَ ھردوکاں دپ ءِ وت منّ اِتگ کہ گوستگیں ماہ ءَ مچ ءِ دمگ گونی پرا ءَ بلوچ لبریشن آرمی ءِ سرمچارانی رندگیری کتگ ءُ پاکستانی پوج ھال داتگ ءُ پدا رند ءَ زورگریں پوج ھمے ھند ءَ سر کتگ کہ اودا میڑ ءَ بی ایل اے ءِ پنچ سنگت نمیران بوتگ انت ۔

جارکش ءَ گوشتگ کہ جمال خان ءُ عرضی ءِ چاریگری ءِ سرا بلوچ راجی آمیدگس ءَ مرگ ءِ سزا داتگ انت کہ ھردو بلوچ سرمچاراں تیر آماچ کتگ ءُ کشتگ انت ۔

پنجگور ءِ دمگ خدابادان مواچ بازار ءَ زیشان زھیر ءِ کوش ءِ بگیری ءَ زھرشانی روانک ءِ کشگ بوتگ ، کہ اودا بازار ءِ مردماں مزنیں کچے ءَ بھر زرتگ ۔

درنگاز کنوکاں ریاستی ناشرکار ءُ کشندہ ٹولیانی بگیری ءَ ترندیں نارہ جتگ ءُ گوشتگ کہ ریاست ءُ آئی ءِ چیردست ءِ سلاہ بندیں ٹولی دمگ ءِ ایمنی ءَ تباہ کنگ ءَ انت ۔

درنگاز کنوکاں بینر ءُ پلے کارڈ دست ءَ بوتگ انت کہ آیانی سرا ریاستی زوراکیانی بگیری ءَ نارہ نبشتہ بوتگ انت ۔

درنگاز کنوکانی گوشگ ات کہ ھمک روچ بلوچ ورنا نشانگ کنگ بوگ ءَ انت ۔

درنگازکنوکاں گشتگ کہ ریاستی شوربندیاں ایوک ءَ دمگ ءِ ایمنی ھلاس نہ کتگ بلکنہ مھلوک ءِتہ ءَ ترس ءِ ھم پیداک کتگ- آیاں چہ بلوچ راج ءَ لوٹ کتگ کہ آ یکجاہ بہ بنت ءُ ریاستی زوراکیانی بگیری ءَ توار چست بہ کن انتءُ زوراکیانی بگیری ءَ وتی گپ ءَ یک بہ کن انت ۔

بلوچ یکجھتی کمیٹی ءِ بنجاھی جار ءِ پد ءَ زیشان زھیر ءِ یات ءَ ھاموشی ءَ اوگام ھم جتگ کہ چہ مواچ چار راہ ءَ بندات بوتگ تاں کہور کبرستان بگر ءُ ھدابادان ءَ شتگ ۔ واک ءَ زھگ ءُ زالبولاں ھوار ورناہ ءُ دگہ مردماں مزنیں کچے ءَ بھر زرتگ ۔

مانشجاہ ءَ زالبولاں زیشان زھیر ءِ مانش ءِ سرا بلوچی دودمان ءِ چادر پرداتگ ءُ پھل چنڈ اِتگ ۔ مردم گمزدگ ءُ ارسیگ بوتگ انت ۔

پاکستانی لشکر ءَ سئے مردم دزگیر کتگ ءُ ناشناسیں جاھے ءَ برتگ انت-

پاکستان ءِ پنجاب ءِ بلوچ دمگ تونسہ ءَ ھالانی رد ءَ گوستگیں شپ ءَ پاکستانی لشکر ءَ یک ھوٹلے ءِ سر ءَ اُرش کتگ ءُ سئے مردم دزگیر کتگ اَنت کہ چہ ھما وھد ءَ بیگواہ اَنت۔

بیگواھیں مردمانی پجار محمد خان چکرانی بزدار، جمعہ خان میتھوانی بزدار ءُ افتخار چکرانی بزدار یازدھمی کلاس ءِ نودربر بوتگ انت۔

اے سئیں مردمانی زورانسری بیگواہ کنگ ءِ پدر کنگ ءَ آھانی کھول ءَ گْوشتگ کہ آ سکیں زھنی نادراھی ءِ آماچ اَنت۔

آ گْوشگ اِنت کہ لھتیں وھد اِنت کہ پورسز چہ اے دمگ ءَ مردماں آوار جنگ ءُ بیگواہ کنگ ءَ اِنت ءُ پد ءَ دروگیں انکاؤنٹراں کُشگ ءُ سلاہ بندیں گلانی سیادی ءِ بھتام جنگ ءَ اَنت۔

نزیکیں مردماں ترس اِنت کہ آیانی نزیکیں مردم ھم دروگیں انکاؤنٹر ءَ کش ایت۔

آیاں چہ انتزامیہ، بُرزیں واکدار ءُ انسانی ھکانی گلاں دزبندی کتگ کہ اے سئیں مردمانی جان سلامتی ءَ بہ کن اَنت۔

بلوچستان ءِ کیچ ءِ دمگ ھوشاب ءَ ناشناسیں سلاہ بندیں مردماں چار شمبے ءِ سھب ءَ تیرگواری کتگ ءُ یک مردمے کشتگ۔

بیران بوتگیں مردم ءِ پجار دولت ء چارشمبے ءِ نام ءَ بوتگ۔ دمگی مردمانی رد ءَ اُرش کنوک موٹر سائیکل ءِ سر ءَ سوار بوتگ اَنت ءُ آ بازار ءَ دکان ءِ دیم ءَ نندوک نیتگ کہ تیر گواری اش کتگ ءُ کشتگ اش ۔

دمگی مردمانی رد ءَ اے وئیل ءَ ھواریں مردمانی سیادی گوں سرکار ءِ کمک ءَ بوتگیں سلاہ بندیں گلے ءَ بوتگ کہ لس نام ” ڈیتھ اسکواڈ“ ءِ نام ءَ زانگ بیت۔

زانگ بہ بیت بلوچستان ءِ جتاجتائیں دمگاں پیسر ءَ ھمے رنگیں وئیل بوتگ اَنت کہ ایشانی تہ ءَ بازیں مردم نشانگ جوڑ کنگ بوتگ اَنت۔

انسانی ھکانی گلاں مدام اے جیڑہ ءِ درشانی کتگ کہ اے اُرش گیشتر ھما مردمانی نیمگ ءَ کنگ بنت کہ آھانی ھمایت ءَ ریاستی ادارھانی نیمگ ءَ کنگ بیت۔

اھد سازیں ماما قاضی

نبشتہ کار: کوھسار کندیل

دی بلوچستان پوسٹ

ما جنگے کنگ ءَ ایں، دژمن مارا پشت نہ گیج یت ءُ ما دژمن ءَ رھشون ءِ شرتریں سپتاں چہ یکے ھمیش اِنت کہ آ وتی زانت، سرپدی ءُ پلسپہ ءَ گوں دگہ رھشوناں ودی بہ کنت۔ یک رھشونے پہ آیوکیں وھد ءَ راجی جُنز ، گَل ءُ پارٹی ءَ پہ ھم رھشونیں ءُ سرپدی ئیں سر ودی کنت. آ رھشونی ءِ سرجمیں رپکاں بلدیں ءُ سوھوئیں مردمے بِہ بیت ءُ پہ جھد ءَ مُدام یکشل ءَ وتی جھد ءَ برجم داران ءَ وتی جُھد ءَ برجم دار اِیت ءُ دیم پہ جُنز ءِ دیمروی ءَ گام جنان کنت۔

شریں سرانی روگ پہ جنز، راج ءُ گَل ءَ تاوان اِنت بلے آشوبی گَل ءِ مستریں شری ھمیش اِنت کہ دگہ رھشون ودی کنت ءُ جھد جُنز اِیت۔ اِے راستی یے کہ لائکیں سرانی روگ ءَ پد ھما ھالی ئیں جاہ کہ ھُورک بیت آ گِرگ نہ بیت بلے پارٹیانی تہ ءَ اینچو بُود مان بیت کہ پہ گَل ءَ آیوکیں وھد ءَ کیڈر جوڑ بہ کن اَنت ءُ ھمے کیڈر آیوکیں وھد ءَ لیڈرشپ ءِ جاہ ءَ بہ گر اَنت۔ ھمے تنزیمی سوچ اجتمائی پکر ءُ زانت ءِ گارنٹی ءَ دنت کہ جھد کسے ءِ میراس نہ اِنت بلکیں راج جھدکارانی دیمونیانی برورد اِنت۔ ھمے داب ءَ وھدے بلوچ جُھد ءِ سلاھبندیں رھشون جنرل اسلم بلوچ شھید کنگ بیت گڑا آئی ءِ شھیدی ءَ چہ ھورکیں جاھے ودی بیت ءُ آ جاہ ءِ پُر کنگ ءَ پہ اسلم وڑیں لائکیں ءُ جنگی رپکانی زبریں انسان ءُ رھشونے پکار بیت کہ گَل ءِ تھی ءُ دری دوئیں جیڑھانی دیم ءَ اوشتات بہ کنت ءُ پیسلہ سازی ءِ ھک ءَ کارمرز کُت بہ کنت۔ اِے گرانیں ساھتاں کہ قاضی وڑیں ھاموشیں سپاپی؛ مدام جھدکار بُوتگ اَنت گَل ءِ سرجمیں زمہ واریاں وتی کوپگاں زُور اَنت۔ ءُ استاد ءِ شھادت ءَ رند گَل ءَ ھما ڈسپلن ءُ زانت ءَ گوں مھکم دار اِیت ءُ سنگتاں چنت ءُ نز کار اِیت۔ اِے سپت سک کم مردم ءِ تہ ءَ بیت کہ ابید ء لیڈری ءِ شوک ءُ شوشہ ءَ مردم چہ پیم ءَ گوں آجزی ءَ تھنا جُنز ءِ سپاھی بنت ءُ وتی راجی زمہ واریاں پیلو کن اَنت۔ قاضی ھمے آجزی ءِ پلسپہ ءِ راستیں اکس اِنت کہ وتی کرد ءُ کاراں گوں وت ءَ پشت گیج اِیت، ناں میڈیا ءِ مردم کسے ھم نہ زانت کہ قاضی وڑیں بودناکیں سر بلوچ ءِ رھشونی ءَ گوں تمردی، اوپار ءُ سگ ءَ کنگ ءَ اِنت۔ جُھد ءَ وھدے کسے ھوار بیت تہ آئی ءِ جند ءُ زند دوئیں مائنس بنت؛ آ مچانک ءِ جھگیر بیت ءُ گوں مچانک ءَ ساہ زور اِیت۔

ءُ قاضی ءِ سرجمیں کٹم چہ وتی لوگ ءُ جاھاں در کنگ بیت۔ برات ءُ پِت شھید کنگ بنت۔ ءُ سرجمیں کٹم یک مچانکی اندوھے ءِ آماچ کنگ بیت، یک آسودگیں زندے ءِ واھند بنت، بلے ریاست پہ آئی ءِ کٹم ءَ ھچ وڑیں راہ پشت نہ گیج اِیت. ھمد ءَ چہ زانگ بیت کہ رھشون ءِ تہ ءَ کربانی ءِ جزبگ ءُ مارشت بیت۔ ھونی رشتہ مردم ءَ لاچار کن اَنت بلے بلوچ جھد ءِ ھر تک ءِ رھشوناں وتی ھمک چیز پہ راج ءَ نَدْر کُتگ۔ اے ھونیگیں ساھتاں کہ ساہ کشگ نہ بیت قاضی سنگر ءَ دار اِیت ءُ روچ پہ روچ بلوچ جُنز ءَ سائنسی بنیات ءَ دیم ءَ برگ ءِ جھد ءَ کنت۔ ھمک تک ءِ مردماں چنت ءُ نز کار اِیت ءُ روچ پہ روچ نوکیں پالیسی ءُ پروگرام آرگ ءِ جھد ءَ کنت دانکہ بلوچ جُنز آیوکیں وھد ءِ لوٹانی رد ءَ بہ جُنز اِیت؛ ھمے مٹی ءِ سوچ نوکیں وھدے ءِ مانزمان اِنت۔ ءُ ھمے قاضی گونگیں رھشونیں سرانی جھد ءِ برورد بُوتگ کہ بلوچ جُنز چہ روایتی پکر ءَ در اَتکگ ءُ ماڈرن جنگی ترزکارانی ھساب ءَ جُنزگ ءَ اِنت۔

قاضی ھما کرداں چہ یکے اَت ءُ ھست اِنت داں بلوچ ءِ نام جھان ءَ زندگ اِنت۔ چندے سِپت سک کم مردم ءِ تہ ءَ بیت؛ چو کہ گمنامی ءَ گوں کار کنگ، رازداری ءُ انچوش چیر بوگ کہ کسے ءِ گَت ءُ گُمان ءَ مہ بیت کہ اِے وڑیں انسانے ھست۔ ھمے داب ءَ گوریلا ءِ سپت آئی ءِ گمنامی اِنت، آ چینچو پدر بیت ھمینچو گیشتر تاوان وارت ءُ وتی تاسیر ءَ باھین اِیت۔ گمنامی آئی ءَ گیش زندگ دار اِیت ءُ وت گلائی ءِ وڑیں ھوپے ءَ چہ رکین اِیت۔ اِے سپت قاضی ءِ تہ ءَ ھمینچو گوناپ اِتگ کہ آئی ءِ امل ءُ کرد وت اِے شاھدی ءَ دینت کہ کرد، سنگینی ءُ جھد نامداری ءِ وازمندگ نہ اَنت۔

دژمن پہ آئی ءِ پروش دیگ ءَ ھر وڑیں رپک ءُ چال کامرز کنت بلے آشوبی پگر ءِ واھندیں سرمچار دژمن ءِ ھمک چال ءَ چہ آژنا اَنت۔ ءُ پد کنزگ، دست بُرز کنگ ءُ نزور بوگ یک جنگولے ءَ نہ براہ اِیت۔ گَل وھدے یکیں وھد ءَ تھی ءُ دری جیڑھانی آماچ بیت، قاضی ءِ وڑیں رھشون گَل ءَ دوبر سازگ ءِ جھد ءَ کنت۔ ھسپتال ءِ بیڈ ءِ سر ءَ ھم وتی راجی ءُ تنزیمی زمہ واریاں چہ شموشکار نہ اِنت ءُ وتی بودناکی ءُ لائکی ءَ ھمود ءَ ھم کارمرزگ ءَ اِنت۔ آ جسمانی رد ءَ دیر اِنت کہ نزور، لاگر ءُ بے جان بُوتگ بلے ذھنی پھتگی یے ءِ برجاہ بُوتگ۔ ھچ چیز آئی ءِ کارانی دیم ءَ رکاوٹ نہ بُوتگ ۔ ءُ وتی زمہ واریاں پیلَو کنان بُوتگ۔

آ گل ءَ مُدام نوکیں پالیسی ءُ پروگرام دیگ ءَ پہ جُھد ءَ اَت ءُ ھمک چست ءُ ایر ءَ چہ آشنائیں مردمے اَت۔ بے انان نہ اَت ءُ نوکیں وھد ءِ لوٹانی رد ءَ گل ءَ دیمروی دیان اَت. سک مردم ءِ تہ ءَ اِے بودناکی مان بیت کہ آ دومی سنگت ءُ ھمراھاں ھم گوں وت بہ جنزین اِیت ءُ رھشونی ءِ جاہ ءَ سر بہ کنت بلے قاضی سوبمند بُوتگ ءُ ھمک سنگت ءَ ھمائی ءَ لائکانی ھساب ءَ کار گِپتگ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ یکجھتی کمیٹی جارکش ءَ شنگ کتگیں درشان ءِ تہ ءَ گْوشتگ کہ گوستگیں شپ ءَ ڈی بلوچ، کیچ ءَ ابدوئی سیمسر ءِ زور بندی ءِ ھلاپ ءَ برجاھیں پُرایمنیں نندانک سر ءَ پاکستانی پوج، ایف سی ءُ پولیس ءَ یکرندے پد ءَ وتی نوآبادیاتی پترت ءِ زاھر کنان ءَ وپتگیں زھرشانی کنوکانی سر ءَ بدتریں اُرش کتگ – شپ ءِ بے وھد ءَ ریاستی پوج ءَ نندانک ءِ بُنجل سر ءَ بیڑبرتگ بے میاریں بلوچ مزدور، ڈرائیور ءُ شھری بے کساس لَٹ ءُ کُٹانی کتگ اَنت، سر ءُ دیم تیرگواری کتگ ءُ کم چہ کم چاردہ مردم دزگیر کتگ اَنت-

آئی ءَ گوشتگ کہ اے نندانک ابدوئی سیمسر ءِ بندی ءِ ھلاپ ءَ بیتگ، اے وھد ءَ سیمسر بلوچ راج ءِ واستا روزگار ءِ یکیں راہ اِنت – نوزدہ مارچ ءَ چہ برجاھیں اے بندی ءَ ھزارانی لوگ شُد ءَ چہ لاچار کنگ ءَ اِنت، بلے ریاستی مشینری ءِ پسّہ تھنا تیر، دزگیری ءُ زوراکی اِنت-

آئی ءَ گْوشتگ بلوچ راج سر ءَ ریاستی زوراکی، مالی ناکہ بندی، ءُ یکشل ءَ پوجی اُرش اے گپ ءِ منانک اِنت کہ پاکستان بلوچ چُکچینی گیش تُرند کنگ ءِ پیسلہ کتگ – پُرایمنیں زھرشانی ءِ پسّہ لَٹ، تیر ءُ زورانسری آوار جنی اِنت- اے تھنا ریاستی ناشرکاری نہ اِنت، بلکیں تچکی ءَ بلوچ چُکچینی اِنت کہ بلوچ راج ءِ وجود ، پجّار ءُ رکینگ ءِ ھلاپ ءَ ایر کنگ بیتگ-

بلوچ یکجھتی کمیٹی تچک کنت کہ اے وھد ءَ ریاست ءَ کہ زُلم ءُ زوراکی ءِ نزام بلوچ راج ءِ سر ءَ ایر کتگ اشی ءِ ھلاپ ءَ چاگرد ءِ ھرچ پڑ ءُ ھرچ مردم سر ءَ اشی ءِ ھلاپ ءَ بید مانگیشتگیں گھگیری پرز ءُ زمہ واری اِنت- وھدے کہ ما ریاست سر ءَ تچک کنگ لوٹ ایں کہ ابدوئی سیمسر ءَ زوت پچ بہ کن اِت- سرجمیں دزگیریں ءُ بیگواھیں زھرشانی کنوکاں زوت یل بہ کن اِت ءُ بلوچ راج ءَ مالی ءُ سیاسی ھک منّگ بہ بنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ سِی جون ءِ نیمروچ ءَ دوازدہ ءِ نزیک ءَ بلوچستان لبریشن فرنٹ ءِ اسنائپر ٹولی ءَ جھاؤ ءِ دمگ ڈولیجی ءَ زورگریں پاکستانی پوج ءِ بُنجل ٹارگٹ نشانگ کتگ چریشی ءَ دُژمنیں پوج ءِ یک کارندھے جاہ پہ جاھی مرتگ، وھدے کہ بُنجل ءَ شنگ ءَ شانگ ءَ پد سرمچارانی دومی ٹولی ءَ یکیں وھد ءَ آر پی جی ءِ بازیں گولھے آس داتگ ءُ مزنیں سلاھاں چہ اُرش کتگ، اُرش ءِ آسر ءَ دگہ یک دُژمن ءِ یک کارندھے مرتگ ءُ بازین ئِے ٹپی بیتگ اَنت-

جارکش ءَ گْوشتگ بلوچستان لبریشن فرنٹ ءَ جھاؤ ءَ دُژمنیں پوج ءِ سر ءَ بیتگیں اُرش زمہ واری ءَ منّ اِیت ءَ اے کول کنت کہ بلوچستان ءِ وتواجھی ءَ تاں زورگریں پوج ءَ نشانگ کن ایں-

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں چہ بارکھان ءَ دزگیر کتگیں ایم آئی چاریگ ءِ وتی کتکاریانی دپ ءِ وت منگ ءَ پد بلوچی راجی آمیدگس ءَ مرگ ءِ سزا داتگ ۔

جارکش ءَ گوشتگ گوستگیں روچ ءَ سرمچاراں رسول بخش بلوانی کھیتران جھمنند بغاو دزگیر کتگ کہ آئی ءَ دپ ءِ وت من اتگ کہ من 2015 ءَ قاسم شاہ ء سردار عبدالرحمن ءِ گوشگ ءِ پد ءَ ایم آئی ءِ میجر ممتاز ءِ دیم ءَ سلاہ دور داتگ انت ءُ ھما ٹیم ءَ چاریگی کنگ ءَ انت ۔ 2023 ءَ من ہزار خان فتوانی گوشگ ءِ پد ءَ علی مری ء وڈیرہ موزان مری گوم ء میجر صمد ء گوں دچار کپت ایں ء آئی ء- چاریگی ءِ کار دیگ بوتگ ۔

جارکش ءَ گوشتگ کہ اے ریاستی چاریگ ءَ وت گوشتگ کہ مناں ھمک روچ قاسم شاہ ءَ ھال دیگی بوتگ ۔ رسول بخش دکاندار ءِ بوتگ ءُ آئی ءَ دومی دوکاندارگنی ءِ سرا زھر اتکگ ءُ آ زورانسری آوار جنائینتگ ۔ وھدیکہ گنی ءِ زھگ نصیب اللہ ءَ رسول بخش ءِ برات عبدالرحمٰن ءُ آوار جنائینتگ ۔

آئی ءَ دیمتر ءَ گوشتگ کہ چاریگ ءَ گوشتگ کہ من غلام محمد ءِ سونا خان بزدار ءُ آئی ءِ دگہ دو بزدار بلوچانی چاریگی کتگ کہ زورگریں پوج آ آوار جتگ انت ۔
آیانی چاریگی ھال خیر محمد ءِ محمد بخش بلوانی داتگ کہ پدا رند ءَ آیانی تہ ءَ یکے ءِ جون دست کپتگ ۔

آئی ءَ گوشتگ کہ چاریگ ءَ دیمترءَ گوشتگ کہ من ناڑی اکبر لوہارانی مری ماں بارکھان ءَ دیستگ گڈا قاسم شاہ پون کتگ ءُ ھال داتگ کہ پدا زورگریں پاکستانی پج ءُ چیریں ادارھانی کارمنداں ناڈی اکبرئےآوار جتگ ۔ آئی ءَ گوشتگ کہ من قاسم شاہ ءَ گوشتگ کہ اگاں ناڑی اکبر یل بوت گڈا آئی راز پاشک بنت گڈا لھتے روچ ءَ پد آئی ءِ جون دست کپتگ ۔

جارکش ءَ گوشتگ کہ ھمے ریاستی چاریگ ءِ چُک ءَ سرمچارانی اوتاک شوھاز کتگ ءُ پدا زورگریں پوج ھال داتگ کہ دومی روچ ءَ چہ ڈرون میزایل ھمے جاہ ءَ جنگ بوتگ بلے پدا ھم سرمچاراں اے جاگہ پیسرا یل داتگ بوتگ۔ آئی ءَ گوشتگ کہ مناں ھال رستگ کہ سرمچار ٹھینگار گندگ بوتگ انت گڈا من قاسم شاہ ھال داتگ گڈا دومی روچ ءَ ڈرون سر بوتگ بلے اُرش کنگ نہ بوتگ ۔

آئی ءَ گوشتگ کہ چہ رکنی ءَ گلدین صدرانی، تاج حمد، ءُ تور خان ءِ زورانسری آوار جنی ءَ منی دست مان بوتگ ۔

آئی ءَ گوشتگ کہ چاریگ رسول بخش ءَ گوشتگ کہ قاسم شاہ مناں ھال کتگ کہ بیا ءُ گوزو زورگریں پوج روگ ءَ انت بیڑ برگ ءَ تو بہ رو گوں گڈا من سردار عبدالرحمٰن گس ءَ سر بوتگاں، کہ اودا زورگریں پوج ءَ مناں وردی داتگ ءُ چہ ھمودا آ دیم پہ گوزو ءَ شتگ انت کہ اودا اسلم ءِ لعل محمد صدرانی ءُ صحبت خان ءِ محمد جان صدرانی دزگیر کتگ انت ۔ آئی ءَ دپ وت منّ اتگ کہ من مراد علی ءِ یار محمد شاہوانی ھم آوار جنائینتگ ءُ آ روچ ءَ ھم من پوج ءِ وردی گور ءَ کتگ ۔

درشان ءِ گڈسر ءَ جارکش ءَ گوشتگ کہ ھمے درسیں کتکاریانی دپ ءِ وت منگ ءَ پد بلوچ راجی آمیدگس ءَ ایم آئی چاریگ رسول بخش بلوانی راجی دلاری کنگ ءِ پد ءَ مرگ ءِ سزا داتگ کہ سرمچاراں آ کشتگ ۔

چہ بلوچ اسٹوڈنٹس ایکشن کمیٹی ءِ نیمگ ءَ شال ءَ سائنس فیسٹیولے برجم دارگ بیتگ۔ سائنس فیسٹیول ءِ تہ ءَ بنجاھی کماش ءَ ھوار ایدگہ بنجاھی سنگتاں بھر زُرتگ ءُ ساڑی بیتگ اَنت۔

مراگش ءَ جتا جتائیں سائنسی ءُ زانشتی بھر ہوار بیتگ اَنت چوشکہ سائنس ءُ ٹکنالوجی، فزکس، کیمسٹری، بائیوٹکنالوجی، بائیوکیمسٹری ءِ پڑانی سر ءَ پریزنٹیشن، سائنسی پڑ ءُ سائنس ءُ دومی بساک ءِ ماں سائنسی پِڑ ءَ جھد ءُ بلوچ نودربر ءِ سر ءَ ڈاکیومنٹری پیش دارگ ءُ سائنس ءِ ارزشت ءِ سر ءَ کسمانک ھوار بیتگ اَنت۔

مراگش ءَ سائنسی پِڑانی سر ءَ پنچ پریزنٹیشن پیش کنگ بیتگ کہ چوش اے وڈ بیتگ اَنت، کیمسٹری ءِ سر ءَ جلیل بلوچ، بائیوکیمسٹری ءِ سر ءَ سارہ بلوچ، فزکس ءِ اُزیر بلوچ، بائیوٹکنالوجی ءِ بانک بلوچ ءُ سائنس ءُ ٹکنالوجی ءِ سر ءَ عتیق بلوچ ءَ وتی لکچر پیش کنان ءَ سائنس ءِ پِڑانی پجار، آہانی دپتر ءُ انسانی آسراتی ءَ پہ کارمرزی ءَ ہوار بلوچ ورنایانی ماں سائنسی پِڑاں وانگ ءِ زلورت ءِ سر ءَ تران کُتگ۔

شنگ بیتگیں جار ءَ گوشگ بیتگ دیوان ءَ دو سرھالانی سر ءَ تامربند پیش کنگ بیتگ یکے سائنس، سائنس ءِ پڑ ءُ ھستیں دور ءَ کارمرزی ءُ زلورت ءِ سرھال اَت ءُ دومی بساک ءِ جھد ءُ سائنسی پِڑ ءَ بلوچ نودربر ءُ ورنایانی ھُبناکی ءِ درنگازگ ءِ بابت ءَ بیتگ اَنت۔ اے تامربندانی تہ ءَ سائنسی پِڑ ءُ آہانی ہستیں دور ءَ لوٹ ءُ زلورت ءِ دلجمی ءَ گوں پیش کنگ بیتگ اَنت دانکہ زہگ ءُ ورنا سائنس ءُ سائنسی پِڑاں نا تہنا سرپد بہ بنت بلکیں آہاں بہ وان اَنت ءُ وتی چاگرد ءُ راج ءِ پہ گھتری ءَ کارمرز بہ کن اَنت۔

بساک ءَ گوشت فیسٹیول ءِ مکسد بلوچ زھگ ءُ ورنایانی تہ ءَ سائنسی ھوالہ ءَ ھُبناکی آرگ ءُ آھاں ساچشتی، بودناکی ءُ نوکیں سائنسی سازگاری ءِ تہ ءَ سکین دیگ ءُ راہ پیش دارگ بیتگ دانکہ بلوچ زہگ ءُ ورنا ھکیگیں دروشم ءَ سائنس بہ وان اَنت ءُ وتی بودناکی ءَ چہ نوک نوکیں ساچشت بہ کن اَنت ءُ دنیا ءِ گاماں گوں گام جنگ ءِ تگ ءَ ہوار بہ بنت۔ اے دور ءَ کہ انسان ءَ ہما چیریں راز درگیتکگ ءُ سائنسی پٹ ءُ پول، پریکٹیکل کاراں ءُ آزمودگاں چہ نوک نوکیں ہیال زُرتگ ءُ انچیں ازباب ءُ چیز ساز اِتگ کہ مرچی انسان ءَ پہ وت ءَ ہستیں پُر گنجیں اے دنیا جوڑینتگ۔ انسان ءَ گاراں چہ سپر کنان ءَ مرچی آزمان ءَ وت ءَ سر کُتگ، اے ہمے سائنسی پٹ ءُ پول ءُ جہدانی برورد اِنت کہ انسان ءَ سیاسی، چاگردی، روزیگی، پوجی ءُ ایدگہ پِڑاں دیمروئی کنان ءَ مزن مزنیں کارپد ایر کُتگ۔ دنیا ءَ ہمک راجاں کہ سائنسی زانشت ءِ وسیلہ ءَ چہ وتی جیڑہانی توجیل ساز اِتگ آہاں الم پہ وت راہے گشینتگ ءُ وت ءَ دنیا ءِ تہ ءَ مھکمیں راجے جوڈ کُتگ۔
بساک ءِ جھد اِنت کہ بلوچ زہگ ءُ ورنایانی نہ تھنا سیاسی بلکیں آہانی زانشتی، سیاسی ءُ سائنسی پِڑاں ہیلکاری بہ کنت دانکہ بلوچ ورنا اے دور ءِ دانا تریں ءُ زانتکارتریں ورنا جوڈ بہ بنت ءُ وتی راجی جیڑہانی توجیل ءَ پہ املی پِڑ ءَ جہدے بہ کنت۔

شنگ بیتگیں درشان ءَ گوشگ بیتگ کہ ادارہ جھد کنت کہ سائنسی تک ءَ گیشتر ءُ شرتریں رنگے ءَ کار بہ کنت ءُ اے مراگشاں مستر کنان ءَ ایدگہ ھند ءُ دمگاں برجم بہ دار ایت۔ سائنس فیسٹیول ءَ شال ءِ وانگجاہ، لینگوئج سنٹر ءُ وانگی اکیڈمیاں ہوار ایدگہ زہگ ءُ ورنا ءُ استاداں بھر زُرتگ۔ سرجمیں بھر سوبمندی ءَ گوں برجم دارگ ءَ پد دیوان آسر کنگ بیتگ۔

زیشان زھیر ءِ کوش

ٹی بی پی شونگال

بلوچستان ءَ چوشیں روچ پِر نہ گوز ایت کہ ریاستی زُلمانی آماچیں مردم یک نوکیں دردے ئے آماچ نہ انت – پنجگور ءِ جھمنندیں زیشان زھیر ءِ کسہ ھم ھمے وڑی ءَ ھلاس نہ بوکیں دردئے ءِ نوکیں بھرے- زیشان ءِ پِت زھیر بلوچ سیزدہ اپریل 2015 ءَ زورانسری بیگواہ کنگ بیتگ، ھما وھد ءَ زیشان یازدہ سال ءِ زھگے بیتگ – کسانی بچکی ءُ جوانی ءِ اے گرانھادیں وھد آئی ءَ وتی پت ءِ شوھاز ءَ دگانی سر ءَ زھرشانی کنگ، توار چِست کنگ ءَ داں اِد ءَ 29 جون 2025 ءَ ریاستی ڈیتھ اسکواڈ ءَ آ پنجگور ھدابادان ءَ آوار جتگ ءُ دومی سھب ءَ آئی ءِ تیرسپتگیں لاش چگل دیگ بوتگ-

زیشان زھیر ءُ آئی ءِ کھول ریاستی زُلمانی ھلاپ ءَ توار چِست کنگ ءُ گھگیری ءِ نہ کنگ ءِ پژدر ءَ بازیں براں سنگینیں بیھارانی دیمپان بیتگ انت- بلوچستان ءَ زورانسری بیگواھی دراج کشیں سزا ءِ زنجیر ءُ درکانودی کوش آئین ریاستی زوراکیانی ھلاپ ءَ توار چِست کنوکاں جتا جتائیں رنگاں بے توار کنگ ءَ مھکمیں رنگے ءَ جد ءُ جھد بوگ ءَ انت، برے بیھار، برے زورانسری بیگواھی ءُ برے لاش-

گوستگیں ماھانی وھد ءَ بلوچستان ءِ جتا جتائیں جاھاں ریاستی بندیگجاھاں زورانسری بیگواھی ءِ آماچیں مردماں درکانودی کوشانی توک ءَ بازیں کچے ءَ گیشی گندگ ءَ اتکگ- 28 جون ءَ دُکی ءِ ھند ءَ سَے ورناہ دروگیں دیم پہ دیمی ءِ جنگ ءِ نام ءَ کُشگ بیتگ انت- چوشکہ آ بازیں وھدے ءَ ریاستی ادارھانی بندیگجاھاں بند بیتگ انت – آیانی پجار وزیر خان سھلانی ء ریھان ( چہ ھشت ماہ ءَ بیگواہ) سھبت ھان ء ھمیس ( چہ دو ماہ ءَ بیگواہ) ءُ علی ء وزیر اھمد ڈینگنانی بزدار( چہ یازدہ ماھاں بیگواہ) ءِ ناماں زانگ بیتگ انت – اے جون ءِ ماہ ءِ چہ دُکی ءَ دروگیں دیم پہ دیمی جنگ ءِ دومی ویل انت، چریشی ءَ زورانسری بیگواھیں مردم کشگ بیتگ ءُ آیانی سر ءَ جنگولانی بھتام جتگ انت-

زیشان زھیر ءِ کوش بلوچستان ءَ برجاھیں انسان کوشیانی بھر انت، کہ اود ءَ ایوک ءَ نا مردم ءَ بلکیں سرجمیں چاگرد ءَ دراج کشیں گھگیری ءِ نشانگ کنگ ءَ انت- زورانسری بیگواھی ءِ آماچیں کھول کھرانی چیر ءَ گوزگ ءَ انت، یک نیمگے وتی دوستیں مردمانی شوھاز ءِ گم ءَ سگگ ءَ انت دومی نیمگ ءَ ریاستی بیرانی دیمپانی ءَ کنگ ءَ انت-