TBP Balochi

نوابزادہ گوھرام بگٹی تھری ایم پی او ءِ درچ ءَ دزگیر کنگ بیتگ- آئی ءَ بلوچ یکجھتی کمیٹی ءِ رھشونانی دزگیری ءِ ھلاپ ءَ ڈیرہ بگٹی داں شال ءَ لانگ مارچ ءِ جار جتگ ات-

جمھوری وتن ءِ رد ءَ گوھرام بگٹی ءِ دزگیری ءَ پیش دمگ سرجم ءَ بند کنگ بیتگ ءُ مھلوک ترسینگ بیتگ-

زانگ بہ بیت سردار ختر مینگل ءِ لانگ مارچ ھم گوستگیں ھپت روچاں لکپاس مستونگ ءَ دارگ بیتگ ءُ شال ءِ پترگ ءَ نیلگ ءَ انت ئے-

پاکستانی پوج ءِ دست ءَ بیگواہ بیتگیں ورنایے آجو بیتگ-

چہ ھب چوکی ءَ ھالانی رِد ءَ پاکستانی پوج ءِ دست ءَ دزگیری ءَ پد زورانسری آوار جنی ءِ نشانگ بیتگیں نوشکی ءِ جھمنندیں ورنا آجو بیتگ لوگ ءَ سر بیتگ-

آجو بیتگیں نوشکی ورنا ئے پجّار نصیر جان محمد حسنی ءِ نام ءَ چہ بیتگ گوستگیں سال ءَ بیست چار نومبر ءَ زورانسری آوار جنی ءِ نشانگ کنگ بیتگ-

اے ورنا زورانسری آوار جنی ءِ ھلاپ ءَ آیانی کھول ءَ ھوار دگہ بیگواھیں مردمانی کھول ءَ ھب بھوانی نزیک ءَ بازیں روچ ءَ تاں نندانک داتگ اود ءَ پد ءَ مُھاد ءُ ورنایانی یل کنائینگ دلجمی دیگ ءَ کھول ءَ نندانک ھلاس کتگ-

نصیر محمد حسنیٰ ءِ یل بیگ گپ بلوچ یکجھتی کمیٹی ءَ کتگ ءُ آ دگہ بیگواھیں مردمانی یل کنائینگ لوٹ کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں دو اپریل ءِ بیگاہ پنچ ءِ نزیک ءَ ھاران ءِ دمگ ناگُٹ ءَ چاریگری واستا پٹ کتگیں ٹیلی کمیونیکیشن شرکت یوپون ءِ ٹاور ءِ سر ءَ اُرش کتگ ءُ اود ءَ ساڑی ئیں سرجمیں مشینری مانداشتگ ءُ تباہ کتگ اَنت-

جارکش ءَ گْوشتگ بلوچستان لبریشن فرنٹ اے اُرش ءِ زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج، دُژمنیں چاریگ ءُ پوجی شوربندیانی نشانگ کنت-

سردار اختر جان مینگل ءَ مستونگ دھرناگاہ ءَ جار جنان ءَ گوشتگ شش اپریل ءِ سھب ءِ ساھت ءِ نُھ بج ءَ شال ءَ جنزان کنت اِنت-

آئی ءَ گوشتگ سرکار اے کوچگ ءَ مئے توار ءَ گوشدارگ ءَ نہ انت، نی شال ءِ میدان ءَ گپ بیت اِنت-

زانگ بہ بیت سردار اختر مینگل ءِ سروکی ءَ بلوچ یکجھتی کمیٹی ءِ رھشون ڈاکٹر ماہ رنگ ءُ دگرانی دزگیری ءِ ھلاپ ءَ 28 مارچ ءَ چہ وڈھ ءَ شال ءَ یک لانگ مارچے برجم بیتگ-

بی این پی ءِ رد ءَ لانگ مارچ ءِ بندات بیان ءَ جتا جتائیں جاھاں آئی ءَ اڑانکانی دیمپانی کنگ کپتگ بلے آئی ءَ اڑانکاں گشینان ءَ مستونگ ءَ سر بیتگ ایشی ءَ پد سرکار ءَ شال ءِ پترگ ءِ راہ لکپاس ٹنل، کنڈ مسوری، اغبرگ ءُ دگہ پترگی راھاں شپنگ کنٹینرز ءُ اڑانک اوشتارینگ –

اڑانک دیم ءَ آورتگ ءُ راہ بند کتگ ءُ چریشی ءَ پد اختر مینگل مستونگ ءَ دھرنا داتگ بیتگ-

ھمے وھد ءَ سرکار ءُ زھرشانی کنوکانی گپ ءُ تران ءِ واستا دوئیں گپ ءُ ترانی ٹولی ابید آسری ءَ واتر بیتگ انت-

اختر مینگل ءَ گوشتگ گپ ءُ ترانی کمیٹی ءَ واک نیست آیانی گور ءَ ھچ نیست انت-

بی این پی ءِ لانگ مارچ شال ءَ پترگ ءَ دارگ ءِ واستا اُستانی انتزامیہ ءَ سیکورٹی ترند کتگ ءُ لکپاس ٹنل، کنڈ مسوری، اغبرگ ءُ دگہ پترگی راھانی سر ءَ شپنگ کنٹینرز ءُ اڑانک کتگ انت-

بلوچستان ءِ واپاری شھر ھب چوکی ءَ پاکستانی پوج ءَ بلوچستان یونیورسٹی ءِ لٹریچر ڈیپارٹمنٹ ءِ سیکنڈ سمسٹر ءِ نودربر دزگیر کنگ ءَ پد ناشناسیں جاھے ءَ برتگ –

بیگواہ بیتگیں ورنا ءِ پجار کیّا بلوچ ء مھمد اشرف جھمنند مشکے کلر ءِ نام ءَ زانگ بیتگ-

کھول ءَ آئی ءِ بیگواھی ءِ اھوال راست کتگ ءُ آئی ءِ یل دیگ ءِ لوٹ کتگ-

بلوچستان نیشنل پاٹی ءِ سروک سردار اختر جان مینگل ءَ لک پاس ءِ ھند ءَ دھرناگاہ ءَ تران کنان ءَ گوشتگ کہ شمئے ھمراھانی تکلیپ ءُ مشکل سھر چک بنت ءُ مئے رھشونی ءَ کن انت – سردار ءَ گوشتگ انشاء اللہ تعالی سوب ننا مرو – سوبمندی مئیگ بیت اِنت-

آئی ءَ گوشتگ مئے سیاسی باسکاں یل بہ کن ات اے مرزی انت ما شال ءَ نند ایں ھاکی گراؤنڈ ءَ اے پیسلہ تئی نہ انت – اے وھد ءَ تئی پت گوشدارگ ءَ تیار بیت اِنت-

سردار مینگل ءَ گوشتگ سروزیر ءَ ترس انت کہ لانگ مارچ ءِ مُچی مئے وزیری ءِ کرسی ءَ پچگرگ لوٹ انت ، ما سروزیر ءُ آئی ءِ ھمراھانی زمیر ءَ پاد کنگ ءَ انت کک مروچی بیگاہ ءَ دھرناگاہ ءَ یک گچینی جارے جنگ بیت انت- دراھیں زانشتکار ءُ زمیر داریں بلوچ وتی بھرداری ءَ ستکی بہ کن انت-

دھرناگاہ ءِ نندوکیں مردمانی رد ءَ نوشکی، شال، مستونگ ءِ پترگ ءُ ڈنی راہ بستگ انت بند کنگ بیتگ انت مھلوک ءِ راہ مُچی ءَ ترس آماچ انت – مھلوک ءَ گوں دزبندی انت یکجاہ بہ بیت ءُ بازیں کچے ءَ دھرناگاہ ءَ سر بہ بیت –

بلوچستان ءِ دمگ کیچ ءَ پاکستانی پوج کاروان ناشناسیں مردماں اُرش نشانگ کتگ-

پوج ءَ کیچ ءِ دمگ مند مھیر ءِ ھند سر ءَ نشانگ کتگ، اِھوالکار رِد ءَ یازدہ گاڑیاں ھمگرنچیں کاروان ءَ ھوار یک گاڑی یے آئی ای ڈی اُرش ءَ نشانگ کنگ بیتگ-

اُرش ءَ پد وئیلجاہ ءَ ھیلی کاپٹر سر بیتگ اَنت – اِھوالکار رِد ءَ اُرش پوج ءَ جانی تاوان چست کنگ کپتگ واکدار تنی وھدے ھچ وڑیں درشان شنگ نہ کتگ-

زانگ بہ بیت کہ اے دمگ ءَ بلوچ آجوئی لوٹوکیں سلاہ بندیں گل پُرکار اَنت بلے اے اُرش زمہ واری انگت ھچ گل ءَ نہ زرتگ-

بلوچ یکجھتی کمیٹی ءِ سروک ڈاکٹر ماہ رنگ بلوچ ءِ گوھار نادیہ بلوچ ءَ چلتن ءِ دامن ءَ گوستگیں روچ ءَ دھرنا گاہ ءَ تران کنان ءَ گوشتگ من وتی گوھار ڈاکٹر ماہ رنگ ءِ مقدمہ ءَ اے راج ءِ دیم ءَ ایر کتگ – مارا پاکستان ءِ آمیدگسی نزام ءُ میان اُستمانی ادارھاں ھچ اُمیت نیست اِنت پرچاکہ ایشی ءَ پیش مارا مئے پت ءِ لاش داتگ – پاکستان ءِ آمیدگسی نزام ءُ میان اُستمانی ادارھاں مارا انساپ دات کت نہ کتگ-

آئی ءَ گوشتگ ڈاکٹر ماہ رنگ بس یک نامے نہ انت بلکیں نزریہ، سوچ ءُ پکرے -مروچی آ نزریہ ءُ سوچ بندیگ کنگ بیتگ – بلے مارا وتی راج ءُ مردمانی سر ءَ پھر انت کہ ڈاکٹر ماہ رنگ بلوچ ءِ توار جوڑ بیتگ انت – شما بے توار نہ بوتگ ئے ڈاکٹر ماہ رنگ بلوچ ءِ واستا توار چِست بہ کن ات – پرچا کہ راج ءِ رھشونی کنوک انت- آئی ءَ زُلم ءِ ھلاپ ءَ توار چست کتگ ءُ زالمانی دیم ءَ چو کوہ ءَ مِک بیتگ – مروچی آئی ءَ شمئے توار ءِ درکاری انت – ڈاکٹر ماہ رنگ بلوچ، بیبگر بلوچ، شاہ جی ءُ بیبو ءِ واستا توار چِست بہ کن ات-

آئی ءَ گوشتگ ڈاکٹر ماہ رنگ نا ایوک ءَ مئے گوھار ءُ مئے مات ءِ چک انت بلکیں آ سرجمیں راج ءِ رھشونی کنوکیں رھشون انت- آئی ءَ اگاں ایوک ءَ وتی کھول ءِ پکر بوتیں ما گڑا داشت کتگ ات بلے آئی ءَ وتی واھشت ءُ زند وتی راج ءِ واستا ندر کتگ انت ءُ آ سرجمیں راج ءِ توار جوڑ بیتگ- مروچی ھم ریاست جیل ءَ آئی ءِ پروش دیگ ءَ جتا جتائیں پندل کنگ انت بلے آ سر ءِ جھل کنگ ءَ تیار نہ انت -آ گوش ایت ‘ منی راج منی گون ءَ اوشتاتگ شما ھم زُلم ءِ دیم ءَ سرجھل مہ بہ ئے’-

آئی ءَ گوشتگ داں مکران ءَ بہ گر سیستان ءَ دراھیں مردمانی منتواراں کہ آ دگانی سر ءَ درکپتگ انت – من سردار اختر مینگل ءِ منتواراں ھم وتی راج ءِ گون ءَ اوشتاتگ – مارا یکجاہ بوگی انت پرچاکہ مئے پجار یکجاھی ءَ گون انت-

ریاستی درشان ءُ راستی

ٹی بی پی شونگال

پاکستان ءِ واک ءَ ھستیں ٹولی ءِ رھشون ءُ مزن واکدار ءَ سرپد بیوکیں مردم اے درشان ءَ دیگ ءَ انت کہ بلوچ یکجھتی کمیٹی ءُ سردار اختر مینگل ءَ بلوچستان ءَ مھلوک ءِ پلامرزی گون نہ انت ءُ آیاں ناشری ءِ درچ ءَ ھوار کنگ ءِ جھد ءَ انت – بلے، عید ءِ روچ ءَ بلوچ یکجھتی کمیٹی ءِ گوانک ءِ پد ءَ کراچی ءُ سرجمیں بلوچستان ءَ لکانی ھساب ءَ مھلوک ءِ مُچیاں راستی ءِ پدراھی ءَ دیگ ءَ انت کہ مھلوک ریاستی زوراکی ءُ لٹ شاپیاں ابید مشکلیں وھد ءَ وتی رھشون ماہ رنگ بلوچ، سمی دین، بیبگر ءُ سبگت اللہ ءَ ھمکوپگ انت –

بلوچستان ءِ مانگش اتگیں سرکاری واکدارانی درشان ءَ پدر بیت اِنت آ بلوچستان ءِ تچکیں راستی ءَ سرپد نہ انت مھلوک ءِ گھگیری ءِ سیاست ءَ بندوکیں راجی ھکانی زمہ واریں رھشوناں ناشرکاری ءَ گوں بندوک کنگ ءَ انت، چُشکہ راستی ءِ لپاشگ انت – بلوچستان ءِ کسان ءُ مزنیں شھراں ماہ رنگ بلوچ ءُ سمی دین ءَ سانکلاں بندیگ کنگ ءِ ھلاپ ءَ یکشلیں زھرشانی اے چیز ءَ پدر کن انت بلوچ چاگرد ءِ ھمک پھنات ءِ پلامرزی یے گون انت –

پاکستان ءِ مزن واکدار بلوچستان ءِ جیڑہ ءَ گوستگیں پالیسیانی سبب ءَ زانگ ءِ مشکل نہ انت کہ آ بلوچستان ءَ ٹوھیں رنگے ءَ پوجی آپریشن کنگ ءِ ارادہ ءَ کنگ ءَ انت بلے اے ردین پیسلھانی سبب ءَ گوستانک ءِ گامگیجاں جتا نہ بیت اِنت – بلوچستان ءِ پارلیمانی ءُ گیر پارلیمانی سیاستی پاٹی یکشل ءَ اے وتی لیکھاں درشان کنگ ءَ انت کہ پوجی آپریشناں جاور شر نہ بنت بلکیں گیشتر بنت اِنت – مھلوک ءِ گھگیری زرمبشت ریاستی زوراکی ءُ نا انساپیانی ھلاپ ءَ برانز گپتگ ءُ بلوچستان ءَ پوجی آپریشناں بلوچ راج ءِ ٹپ گیشتر تاجگ بیتگ انت – پاکستان ءِ واکدار پوجی آپریشن ءِ درشان کتگ ءُ سیاسی جیڑہ گیش برانزی ءِ سبب بیت انت-

پوجی آپریشن ءُ ریاستی زوراکیاں بلوچ راجی زرمبشت نا پیش ءَ ھلاس بیتگ ءُ ناکہ نہ آئی ءِ ھلاس کنگ بیت اِنت- پرچاکہ بلوچ راجی زرمبشت ءَ راجی پلامرزی گون انت ءُ راجی ھمدردی راجی زرمبشت ءِ گون ءَ بندوک انت – بلوچ جیڑہ سیاسی انت ءُ بلوچستان ءَ پوجی آپریشن نہ انت بلکیں مول ءُ مراد راستی ءَ بندوک انت، راجی ھکانی سر ءَ دزرس ءُ ھک ءِ واتواجھی ءِ منگ ءَ گیش ءُ گیواری انت-

بلوچ یکجھتی کمیٹی چاگی ءَ وتی یک درشانے ءِ تہ ءَ گْوشتگ کہ عید روچ ءَ ماشکیل ءَ زھرشانی روانک ءَ پد راج ءَ را جتاجتائیں دروشم ءَ چہ پولیس نیمگ ءَ تُرسینگ بیگ ءَ اِنت، درزنانی مردمانی سر ءَ بے بُنیادیں ایف آئی آر ءُ لوگانی سر ءَ بیڑ جنگ بیگ ءَ اِنت ءُ ماشکیل پولیس تھانہ ءَ اے وھد ءَ درزنانی مردم بے جرم بند اَنت آیانی تہ ءَ کسانیں چُک ھم ھوار اَنت-

جارکش ءَ وتی شنگ کتگیں درشان ءِ تہ ءَ گْوشتگ کہ ماشکیل پولیس راج ءَ تُرسنیگ ءُ دروگیں ایف آئی آراں چہ بلوچانی ھلاپ ءَ برجاھیں چُکچینی ءَ ریاستی ادارھانی گوم ءَ تچکی ءَ ھوار اَنت، اے وھد ءَ سرجمیں بلوچستان ءَ بلوچ راج وتی راجدپتر بدتریں چُکچینی اوپار کنگ ءَ اِنت، ریاست پاکستان بلوچانی راجی زرمبشت ءُ آیانی پُرایمنیں زھرشانی دارگ واستا اے وھد ءَ ھرچ وڑیں کار کنگ ءَ اِنت-

آئی ءَ گْوشتگ کہ ریاست بلوچاں چہ ناں تھنا شرپیں زندمان ءَ پچگرگ ءَ اِنت بلکیں سرجمیں راج ءَ را بے توار کنگ واستا زوراکی ءِ سھارگ ءَ زیرگ ءَ اِنت، بلوچ بیگ ءَ پجّار دارگ سر ءَ اے وھد ءَ بلوچ راج وتی سرڈگار سر ءَ ریاست ءِ زوراکیاں چہ مُھر نہ اِنت، اے وھد ءَ ماشکیل کانون ایر کنوکیں ادارہ ءُ پولیس ماشکیل ءَ ورنایاں ءُ چُکاں نشانگ کنگ واستا سلاہ جوڑ کنگ بیگ ءَ اِنت چریشی ءَ چہ ماشکیل ءِ ھرچ نیمگ ءَ تُرس تالان اِنت-

جارکش ءَ دیمتر ءَ گْوشتگ کہ ما بلوچ یکجھتی کمیٹی ءِ نیمگ ءَ چہ تچکی ءَ ریاست ءَ گوشگ لوٹ ایں، بلوچ یکجھتی کمیٹی ءِ اے راجی زرمبشت تاکت ءَ چہ ھلاس کنگ ناممکن اِنت ماشکیل ءَ اے وھد ءَ ریاست تاکت کارمرز کنگ بلوچ راج ءَ را تُرسنیگ ءَ اِنت چریشی ءَ پد راجی پسّہ ءِ زمہ واری ریاست سر ءَ بیت-