TBP Balochi

بیگواھیں مردمانی کھول ءُ وکیلاں اسلام آباد ھائی کورٹ ءِ دپ ءَ زھرشانی کتگ ءُ پولیس ءِ بیڑانی دیمپانی اش بیتگ ۔

بیگواھیں مردمانی کھول ءُ آھانی وکیلاں مرچی اسلام آباد ہائی کورٹ ءِ دیم ءَ زھرشانی کتگ ءُ لوٹ کتگ کہ یک مزنیں بنچے جوڑ کنگ بہ بیت کہ زورانسری بیگواہ کنگ ءِ ھوالگ ءَ کیسانی زوت گوشدارگ بہ بیت۔

اے زھرشانی ءَ بیگواھیں مردمانی سیاد ءُ وارساں بھر زرتگ کہ آ پنجاب، خیبر پختونخوا، سندھ ءُ بلوچستان ءَ چہ زورانسری بیگواہ کنگ ءِ آماچ بیتگیں مردمانی کھول ھوار اَنت۔

وکیل ءُ زھرشانی کنوکاں گْوشتگ کہ اسلام آباد ھائی کورٹ ءِ سئے باسکی مزنیں بنچ کہ بیگواھیں مردمانی کیسانی گوشدارگی 6 مارچ 2025 ءَ ھما وھد ءَ ٹُکّر ٹُکّر بوتگ کہ جسٹس ارباب محمد تاھر کہ آئی ءِ ھند ءُ دمگ بلوچستان اِنت آئی ءَ وت ءَ چہ گیشیں کیسانی گوشدارگ ءَ نیمون کتگ۔

آیاں گوشت کہ چار ماہ ءِ گوزگ ءَ ابید ھم ھستیں چیف جسٹس سرفراز ڈوگر ءَ انگت ءَ نوکیں بنچ جوڑ نہ کتگ، ایشی ءَ کیسانک گوشدارگ مھتل کتگ ءُ اے وھد ءَ زوراکی ءَ بیگواہ کنگ ءِ ھوالگ ءَ 20 ءَ چہ گیش درھواست آمید گس ءَ مھتل اَنت۔

کیس ءِ نمائندگی کنوکیں ایڈووکیٹ ایمان مزاری ءَ گشتگ کہ اے آمیدگس اگاں مھلوک ءِ واستا نہ انت گڑا کئے ءِ واستا جوڑ کنگ بوتگ انت۔ چہ سرجمیں ملک ءَ سیاد ءُ وارس اِدا اتکگ اَنت بلے چیف جسٹس ءَ چہ شش مارچ ءَ ھچ وڑیں بینچ جوڑ نہ کتگ۔

اسلام آباد ءِ زھرشانی ءِ وھد ءَ پولیس ءَ زھرشانی ءِ بند کنگ ءِ واستا روڈ بند کتگ اَنت ءُ زھرشانی کنوک دیم ءَ روگ ءَ مکن کتگ اَنت بلے بھر زوروکاں پہ ایمنی ءَ وتی لوٹ پیش داشتگ اَنت۔

ایمان مزاری ءِ رد ءَ اے زھرشانی ءَ چہ بلوچستان ءَ بیگواھیں راشد ھسین بلوچ ءِ براتزتک مھزیب بلوچ ءُ بلوچ یکجھتی کمیٹی ءِ رھشون فوزیہ بلوچ ءَ ھم بھر زرتگ۔ آھاں بلوچستان ءَ زوراکیں بیگواہ کنگ ءُ بندی جاہ ءَ کوش ءِ برجاجیں وئیلانی سر ءَ سکیں دلپدردی ءِ درشانی کتگ ءُ ادالت ءِ ھاموشی ءِ سر ءَ ایراد گپتگ۔

زھرشانی کنوکاں گْوشتگ کہ بیست ءُ ششمی آئین ءِ ترمیم ءَ پد ادالتی نزام لھتیں مردمانی دست ءَ اِنت کہ ایشی ءِ سبب ءَ نہ ایوک ءَ بنیاتی انسانی ھک مھتل بوتگ اَنت بلکیں پاکستان ھم یک ھترناکیں موڑے ءَ سر بوتگ۔

آئی ءِ رد ءَ اگاں ریاستی نزام ءِ تہ ءَ بے رھبند ءُ انساپ ءِ رھبند ھلاس کنگ بہ بیت ایشی ءِ آسر ایوک ءَ یک ادارگ ءُ مردمے ءَ گوں بندوک نہ بنت بلکیں ملک ءِ یکجھاھی ءَ را تاوان رس ایت۔

زھرشانی کنوکاں گُڈ سر ءَ نوکیں مزنیں پینل ءِ جوڑ کنگ ءُ زوتاں چہ زوت کیسانی پد ءَ گوشدارگ ءِ لوٹ کرتگ اگاں ناں آیاں سنگینیں زھرشانی ءِ جار جتگ۔

سر بُلند ءَ من ءَ مھکم داشتگ

نبشتہ کار: کوھی خان

دی بلوچستان پوسٹ

سر بلند بزانکہ جِند ندریں اُمر جان منی واستا انچوش کہ یک براتے یک سنگتے یک دردوارے بوتگ، ھمے ڈول ءَ مرچی من اُمر جان ءَ پہ وت ءَ یک رھشونے یک سوجکارے یک ھمت ءُ ھوسلھے یک جزبگے یک ھیروے یک راستیں راھے پجّاروکے گْوشاں ۔

من مروچی کہ اے جاہ ءَ اتکگ آں یا منی زھن ھمے جاہ ءَ سر اِنت کہ من دوست ءُ دُژمِن ءِ پرک ءَ زانگ ءَ آں ، ھک ءُ نا ھک ءَ زانگ ءَ آں، سنگت ءُ یار ءِ ھکیکتیں مانا ءَ زانگ ءَ آں سنگتی ءِ الّمی ئیں لوٹ کہ چے بنت آیاں پوہ بُوگ ءَ آں گڑا آئی ءِ توک ءَ بلاھیں مزنیں کِرد جِند ندریں اُمر جان ئیگ اَنت، انچوش سرپد باں من کہ من ءَ چہ یک تھاریں کوٹی یے ءِ یا چہ یک کبرے یے توک ءَ کش اِتگ ءُ دُگنیا پیش داشتگ ، بلوچ بُوگ ءِ راہ ئِے پیش داشتگ ، آجوئی ءِ گِرگ ءُ جُھد ءَ ھوار بُوگ ءِ راہ ئِے پیش داشتگ ۔

چے ءَ کہ من ھما نابود بوتگاں کہ من ھمینچو نہ زانتگ کہ اے مردماں گوں من نِنداں پاد کایاں اے چوناھا مئے راج ءِ گُنھگا اَنت ، مئے ماتانی پریات ءُ زارانی سوَب ءُ ارسانی ریچوک اَنت ، مئے براتانی کوشارینوک اَنت گِر تاں برے یک دمگے ءِ لُٹ ءُ پول کنوک اَنت، من ھما (دلّار) اناں وتی یار ، وتی بیل ءُ سنگت زانتگ اَنت۔

پہ آیانی ھاتِریگی من وتی مات ءِ اِزّت ءُ شرپ نہ زانتگ من ءَ آ (دلّار) چہ وتی مات ءُ لوگ ءِ مردماں دوست تِر بوتگ اَنت،من کہ آیانا وتی کوپگ ءُ یار پھم اِتگ بلے من ءَ اُمر جان ءَ گوشت، انچوش گْوشت ءُ پیش ئِے داشت کہ بلوچ ءِ زِند بید ء آجوئی ءَ اے جُھد ءِ یک بادشاھے دیم ءَ سر ءَ اے جھل کنگ (سجدہ) ءَ چے گندگ تِر اِنت زِند ءِ، ءُ من چہ اُمر جان ءَ دربُرتگ کہ بلوچ کُجا بہ بیت کُجام ھالتانی توک ءَ بہ بیت بلے جُھد ءِ دروازگ بِھ پہ بلوچ ءَ بند نہ بیت ، چے ءَ کہ اے جُھد بلوچ ئیگ اِنت۔

من ءَ یات بیت ما مُدام اِسکول ءَ وانگ ءَ شُت ایں ءُ واپسی ءَ گوں گونڈواں ما ھواری ءَ پیادگ ءَ دیم پہ لوگ ءَ شُت ایں ءُ گپ ءُ تران کنان اِت ایں، دو دِگہ ھم سنگت گوں مارا ھوار اَت یکے وَ زمین ءِ باھوٹ اِنت، دومی وھد ءَ چہ من گِستا کُتگ، بلے سر بُلند منی ھیال ءَ چہ من گِستا نہ اِنت ، ھو آ وھد ءَ من جیڑ اِتگ کہ گِستا اِنت چہ من ابدی سِستگ ءُ شُتگ ، بلے جُھد ءَ سنگتانی کُربانیاں من ءَ ھمے سوج داتگ کہ شھید بھ دور نہ رو اَنت، بلکیں آ چہ پیسری وھد ءَ ھم گیشتِر نزیک ءَ کاینت، گوں ترا ھمے ڈول ءَ ھوار بنت کہ انچوش سما بیت مُدام تئی کِر ءَ نِشتگ اَنت ۔ چے ءَکہ کُجا بی دو جُھدکاریں سنگت نِند اِیت ءُ دیوان کنت گڑا مئے شھیدانی گپ ءُ تران الّم بیت ، ءُ کس پہ آیاں ارس نریچ اِیت ، گوں بچکندیں دیماں شھیدانی کِسّھاں کن اَنت ، ءُ مارا مُدام گُمان بیت شھید مئے کش ءَ نِندوک اَنت ۔

بلے اُمر جان تئی مُدام گپ ءُ تران بیت تئی کِسّھاں سنگت کن اَنت گڑا مُدام تئی کِسّھانی توک ءَ تئی دلیری تئی ھوسلہ تئی بھ پُشت ءَ نہ کنز اِتگ ئے گپ بنت، چے ءَ کہ تو جُھد کارے وَ بوتگ ئے بلے چہ جُھدکار ءَ گیش تو یک دور چاریں بلوچے بوتگ ئے۔
ترا سما بوتگ کہ منی مروچی ئیں کُربانی آیوکیں وھد ءَ پہ بلوچ ءِ جُھد ءَ پہ آزاتی اے جُھد ءَ چینچو بلاھیں سوبمندی ءِ بیت ، تئی کُربانی ءَ بازیں راستی مٹ کُتگ بازیں نابود بلوچ جوڈ کُتگ بازیںکورانی چم پچ کُتگ ۔

جنگانی توک ءَ دُرستیں سنگتانی کُربانی ستا کرز اَنت، بلے لھتیں سنگت چہ آم جُھدکاراں چہ سوچ ءَ گیشیں ھم سوچ جنت، انچو بِگُش کہ یک رھبرے ءِ رھشونے ءِ پیم ءَ پگر کن اَنت ، ءُ وھد اے زرورت ءَ پھم اِیت ، تئی کُربانی جُھد ءِ توک ءَ مروچی ھم چو روچ ءَ اے رُوژنائی ءَ تالان اِنت ، ءُ تو ھما وھد ءَ وتارا کُربان کُتگ ءُ دُژمِن ءِ سر ءَ چو ازاب ءَ دور کُتگ کہ آ وھد ءَ دُژمِن وتارا گیش مزبوت کنگ ءُ تاکت ور جوڈ کنگ ءِ جُہد ءَ بوتگ، بلے تو ھما وھد ءَ اے زرورت پہم اِتگ ءُ جنگ ءَ نوکیں رنگے داتگ ، دُژمِن تو ھما جاہ ءَ پروشتگ کہ آئی ءَ اود ءَ وتی تاکت ءِ واب دیستگ اَت ، تو ھما وھد ء دُژمن ءِ سر ءَ چو بلاہ ءَ دور کُتگ کہ راج یا کہ بازیں سنگت زھنی ھوالہ ءَ پُرشت ءُ پُروش ءِ آماچ بُوگ ءَ بوتگ، سنگتانی ھوسلہ نِزور بوتگ، بلے تو پہ راج ءُ پہ جُھدکاراں یک مزنیں ھمّت ءُ ھوسلھے جوڈ بوتگ ئے ۔

ءُ ھمے وڑ کہ تو دُژمِن ءِ پروشگ ءِ واب دیستگ ھمے ڈول ءَ تو راج ءِ سلامتی ءِ ھم واب دیستگ ، زِر ءِ مھلوک تنی وھدی تئی کِسھاں کن اَنت کہ تو مُدام ھمے جاہ ءَ اتکگ ءُ نشتگ ئے لھتیں تِپل ھمد ءَ لیب ءَ بوتگ تو لیب ھم داراھینتگ اَنت ، بلے اے روچ ءَ تئی کُربانی ءِ روچ ءَ تو اے تِپل ھکّل کُتگ ءُ تاچینتگ اَنت کہ مروچی لیب نیست بُرو اِت ، چے ءَ کہ تو پلیتیں دُژمِن ءِ ھال ءَ سرپد بوتگ ئے شر ، کہ مُدام لٹ وارت گوڈواں بزگیں کماشءُ تِپل ءُ زالبول نچار اِیت ، بس تیر چو ھور ءَ ریچ اِیت، تو نلوٹِ اِتگ کہ منی کُربانی ءَ رند اے تِپل ھم دُژمِن ءِ تیرانی آماچ بِہ بنت ۔

ما درست وڑے ناں وڑے یا جُھد ءَ ھوار ایں، کسے ءِ براتے جنگ بیت کسے ءِ پت کسے ءِ سیاد ءُ وارسے ، کسے تُپنگ ءِ شوک ءَ کیت کسے سنگتی یے ءِ پُشت ءَ در کپ اِیت کسے مات ءُگُھارانی بزّگی ءَ گند اِیت کسے تُن ءُ گُژن ءَ گند اِیت، کسے گریبی ءُ بزّگی ءَ گند اِیت بلے وھدے جُھد ءَ ھوار بنت گڑا جُھد بزانکہ پہ سنگت ءُ جھدکاراں یک وانگجاھے ءِ پیم ءَ بیت، دربرگ ءِ جاہ جوڈ بیت ، جنگ مدام سنگتانی سر گیری ءَ کنت ءُ سر ءُ سوج کنت ، ھمے واستا کجام سنگت کجام سوب ءَ کہ ھوار بوتگ بلے جُھد آئی ءَ جنگ ءِ اسلی مانا ءَ پیش دار اِیت ءُ پوہ کنت کہ جُھد ءِ جند چےیے سوب ءَ بندات بوتگ ءُ چے سوب ءَ تاں مروچی ھم برجاہ اِنت ءُ جُھد ءِ لوٹ چی اِنت ۔

بلے ھچ جُھدکار وتی پُشپد ءَ بیھال کُت نہ کن اَنت کہ من چے سوب ءَ جُھد ءَ ھوار بوت آں ءُ چون ھوار کپت آں اے یات مدامی ءَ پہ دل ءُ دماگ ء نند اِیت ءُ ھمے یات زندگ بیتبلے اُمر جان (سر بلند ) ءَ من بِھ بیھال کُت نکناں چے ءَ کہ منی جُھد ءَ مزن تِریں ھوار بُوگ ءِ سوب اُمر جان بوتگ ، ءُ تنی وھدی اُمر جان ءِ ھیال ءُ لیکہ ءُ مکسد من ءَ ھمّت ءُ ھوسلہ دینت ، من ءَ دیم ءَ جُنزگ ءِ ءُ مُھکم بُوگ ءِ سکین ءَ دینت ، اُمر جان ءِ کربانیاں من ءَ جُھد ءِ رُژنا ئیں راہ پیش داشتگمئے بلوچانی جُھد مروچی تک گوں تیزی ءُ شوکی ءَ جُنزگ ءِ مزن مزنتِریں سوب مئے شھید اَنت ، دانکہ مئے جُھد ءِ توک ءَ سنگتانی شھیدی ھست مئے جُھد دیم ءَ روان بیتسنگت کسّہ کنت کہ من شھید پیرک ءَ جُست گپتگ اگاں تو دہ 10 سالءَ رند زندگ بہ بہ ئے چے کن ئے؟ گڑا پسّو داتگ ئِے اگاں من تاں دہ سال ءَ زندگ بباں بزانکہ من کار ءُ بار کنگ ءَ آں ، چے ءَ کہ زانتگ ئِے جُھد ءِ توک ءَ سنگتانی اُمر کسان بیت بلے مکسد ءُ نام داں ابدی ھست ءُ ھیات بیت، جُھد ءِ توک ءَ شھیدی مُدام چہ ھمُک شے ءَ دیم ءَ اوں بُرز تِر اِنت، ھمینچو مُکلسی ءُ گوں ایمان ءَ جنگ کن ئے ھیمنچو مرگ ءَ نزیک بُوان بہ ئے، مئے شھیدانی ھونانی برکت ءَ مروچی دُژمن سرین پروش اِنت

دُرستیں شھید ھست ءُ ھیات اَنت پہ مُدامی مئے دلانی توک ءَ ھست اَنت، آزاتی روچ ءَ باز گیر کا ئے یار۔مارا سِتک ایں وتی سر ءَ ، سنگتانی سر ءَ، جُھد کارانی سر ءَ کہ یک روچے الّم شھیدانی ھون رنگ کار اِیت ءُ آ آجوئی یے ءِ دروشم ءَ کیت، مئے ایمّان اِنت۔

جِند ندریں اُمر جان تو مُدام منی دل ءُ دماگانی توک ءَ ھست ءُ ھیات ئے، من بھ ترا چہ وت ءَ گِستا نہ لیکاں ، تئی پِگر تئی مکسد مروچی گوں تیزی ءَ دیم ءَ جُنزگ ءَ اِنت ھما ڈول ءَ کہ تو واب دیستگ اَت، داں ساہ مان اِنت تئی پِگر تئی مکسد مئے دلانی توک ءَ اِنت ۔سنگت مُدام ھوار ایں ، مُدام تو من ءَ سکین دیگ ءَ ئے ، من ءَ مُھکم دارگ ءَ ئے ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

سلام ءُ دروت ایمل جان

نبشتہ کار: ن. س

دی بلوچستان پوسٹ

اللہ ترا مدام ھست ءُ سلامت کنات، تو انچیں جاھے ءَ ئے کہ اود ءَ کس وش بوت نہ کنت بلے چہ ربْ ءَ امیت کناں کہ تو وش بات ئے-

ایمل جان ھما شپ ءَ اے بد بھت تئی لوگ ءَ آتک اَنت پہ تئی برگ ءَ ھمے شپ ءِ سھب ءَ من وٹسپ پچ کت داں بازیں کلوھے من ءَ چہ پرسنل نمبر ءُ گروپاں اتکگ اَت من چاراں داں تئی اکس اِنت جھل ءَ نبشتگ پاتل ءِ مستریں برات ایمل ھوار جَنَگ بوتگ ھمے دمان پہ منی نز ءَ پورہ آزمان ءُ زمین ڈُکّ اِت اَنت-

ایمل جان من مدام دیستگ کہ تو بازیں وتی ھمسرانی اکس اسٹیٹس ءَ کتگ من جست کتگ کہ کے اِنت تو گشتگ منی سنگتے، ھمے وڑ ءَ تئی مات ءَ اوں بازیں کسانُکیں بچکوانی اکس داتگ کہ زوت آجُو بات اِت منی بچ من پد ءَ جست کتگ کہ جواب ئِے داتگ منی بچ ءِ منی زھگ ءِ وڑ ءَ اَنت من دل ءَ گشتگ تئی مات ءَ اے گونڈل چتور دوست اَنت، بلے مرچی اے زالماں ترا اوں بُرت-

ایمل جان تو زان ئے تئی مات تئی گماں چتور اِنت سجھیں شپ نشتگ دروازگ ءَ چار اِیت بلکیں تو کائے پاتل شپ داں روچ گریو اِیت تئی اکس ئِے گون اِنت ھچ ایر ئِے نہ کنت من زاناں ترا اوں پہ پاتل ءَ زھیر کنت۔

ترا ماھے ءَ گیش اِنت ما نہ زان ایں تو کجا ئے تئی ھچ وڑیں ھال ءَ کس نہ دنت تئی ماتءُ پت دراھیں جاھاں شتگ اَنت پہ تئی شوھازگ ءَ بلے کس تئی ھال ءَ نہ دنت کہ کجا ئے ما زان ایں تو بے گناہ ئے تو ھچ نہ کتگ ترا مدام پہ اکس ءِ کشگ ءُ سوت ءِ جَنَگ ءِ ھُب بوتگ تو دراھیں بلوچی گشندہ دوست داشتگ اَنت، تو مدام وتی وش گُٹی ءَ سوت جتگ تئی مئسومیں واھشت بس ھمیش اِنت بلوچستان ءِ شوکیں اکس شنگ ءُ بلوچستان ءَ وتی وش گٹی ءَ ساڑاہ ئے زانا بدواھاں ھمے ھبر وش نہ بوت ترا برت اِش ھما تھاریں کوٹیانی تہ ءَ بند اِش کت، ما نزان ایں تو چون ئے بلے من ھمے اِشکتگ کہ اے نہ وشیں جاھاں اود ءَ مردماں ازیت دینت زھنیءُ جسمانی ازیت، ھمے گپاں من ءُ تئی کھول ءِ ایدگہ مردم اوں سک زھنی ازیتانی توک ءَ اَنت-

ائید اتک ءُ شت بلوچستان ءِ ھمک لوگ ءِ وڑ ءَ تئی لوگ ءَ اوں کس ءَ ائید ءِ وشی نہ دیستگ. پیسر ءَ ما سمی ءُ زاکر جان ءِ مات ءُ ایدگہ مردمانی واستا بزگ بوتگ نو ما ھما درداں مارگ ءَ ایں، اے سکی ءُ سوری ءِ درد بلوچ ءِ ھمک لوگ ءَ رس اِتگ-

ایمل جان ھما میر ءُ متبراں پہ تئی آجُوئی ءِ واستا کلوہ داتگ بلے آ گش اَنت ما ھچ کت نہ کن ایں اےے ھما میر ءُ متبراں کہ اوٹانی وھد ءَ ایشانی گپ کوہ کپ کن اَنت-

ایمل جان مے چم مدام بلوجستان ءِ ھالاں سک اَنت کہ کدی ناں کدی تئی آجُوئی ءِ ھال بیت.بس ھمے امیت ءَ چہ اللہ پاک ءَ کشاں کہ تو گوں سجھیں بندیگاں زوت آجُو بات اِت ھر کجا ئے سلامت بات ئے منی پُل آمین-

تئی ترُو :ن.س

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

ھالانی رد ءَ گوستگیں روچ ءِ سھب ءَ سوراب ءِ دمگ گدر ءَ فوجی آپریشن بندات بوتگ ءُ مرچی ھم ھیلی کاپٹر بال ءَ گندگ بوتگ انت-

دمگی مردمانی رد ءَ گوستگیں روچ ءَ سلاہ بندیں مردماں آپریشن ءَ ھواریں سیکورٹی پورسز ءِ کارندہ نشانگ جوڑ کتگ اَنت۔ ارش کنوکاں گوں راکٹ ءُ دگہ سلاھاں ھیلی کاپٹرانی سر ءَ اُرش کتگ ءُ لشکر پُشتکنزگ ءَ لاچار بوتگ۔

آیاں گْوشتگ کہ مرچی سُھب ءَ گیشتریں لشکر دمگ ءَ سر بوتگ اَنت، گوں بالیگانی کمک، بلے تاوان ءِ بابت ءَ ھچ وڑیں ھال ءُ اھوال رسگ ءَ نہ اِنت۔

پنجگور ءِ دمگ سوردو گریب نواز ھوٹل ءِ نزیک ءَ یک ورنا یے ءِ لاش دست کپتگ۔ اژدری چار ٹپاس ءَ لاش ٹیچنگ ھسپتال ءَ سر کنگ بیتگ۔ پولیس ءِ بنشون ءِ رد ءَ دزکپتگیں لاش ءِ پجار زیشان زھیر ءِ نام ءَ بوتگ کہ آ خدا آبادان ءِ نندوکیں زہیر احمد ءِ چُک اِنت ءُ آئی ءِ لاش ءِ سر ءَ تیرانی نشان گندگ بوتگ اَنت۔

مردمانی گْوشگ اِنت کہ گْوستگیں شپ ءَ زیشان زجیر بلوچ چہ فٹبال چوک، پنجگور ءَ ناشناسیں سلاہ بندیں مردماں آوار جتگ۔ آئی ءِ کھول ءُ دمگی مردماں ھم آئی ءِ جان سلامتی ءِ لوٹ ءِ ھاترا زھرشانی ءِ نندانک داتگ بلے بدبھتی ءَ آ بے دردی ءَ کُشگ بوتگ ءُ چگل دیگ بوتگ۔

اے وئیل ءَ پد دمگ ءَ ترندیں زھر ءِ درشان گندگ ءَ کیت۔ کشگ بیتگیں مردم ءں کھول ءَ بھتام جتگ کہ ذزیشان ءَ وتی پت زھیر بلوچ ءِ زوراکی ءَ بیگواہ کنگ ءِ ھلاپ ءَ برجاھیں جھد ءِ سزا دیگ بوتگ۔

انسانی ھکانی گل ءُ دمگی سروکاں اے گمگینیں وئیل سکا ایرجتگ ءُ لوٹ کتگ کہ زیشان زھیر بلوچ ءِ کوش ءِ تہ ءَ ھواریں مردم زوت دزگیر کنگ ءُ آمید گس ءَ آرگ بہ بنت ءُ زوراکی ءَ بیگواہ کنگ ءِ وڑیں ناجائزیں پندلاں زوت ھلاس کنگ بہ بیت۔

پنجگور ءَ چہ فٹبال چوک ءَ مگرب وھد ءَ سلاہ بندیں مردماں زھیر بلوچ ءِ چُک ذیشان زھیر بلوچ زورانسری آوار جتگ ءُ وتی ھمراھی ءَ برتگ-

کھول ءَ وئیل راست کنان ءَ گْوشتگ کہ ذیشان زھیر بلوچ ءَ را آئی ءِ پت ءِ زورانسری آوار جنی ءِ ھلاپ ءَ یکشل ءَ جُھد ءِ سزا دیگ بیگ ءَ اِنت- ذیشان ءِ پت، زھیر بلوچ، گوستگیں بازیں سالاں چہ بیگواہ ءَ اِنت ءُ آئی ءِ یل کنائینگ ھاتر ءَ کھول ءَ بازیں رند ءَ زھرشانی کتگ-

کھول ءَ گْوشتگ کہ ذیشان زھیر بلوچ پت ءِ یل کنائینگ لوٹ ءِ جُھد ءَ مدام پیسر بیتگ کہ ھمیشی ءِ پُشدر آ نشانگ کتگ-

انسانی ھکانی ادارھاں وئیل ایر جتگ ءُ ھکومت ءُ ھمگرنچیں ادارھاں چہ لوٹ کتگ کہ ذیشان زھیر بلوچ ءَ را زوت دیم ءَ بیار اِت ءُ اے وڑیں وئیلانی گر ءُ دار ھاتر ءَ جوانیں گامگیجے بزور اِت-

دومی نیمگ ءَ کھول ءَ زھرشانی کنان ءَ سی پیک شھدگ بند کتگ-

زھرشانی کنوک ءَ سی پیک شھدگ بند کتگ ءُ زیشان زھیر بلوچ ءِ یل کنگ ءِ لوٹ ءَ کنگ ءَ انت آیانی گوشگ انت زیشان وتی پت ءِ شوھاز ءَ دگانی سر ءَ بوتگ بلے زیشان ھم برگ ءُ بندیگ کنگ بوتگ-

زھرشانی کنوکاں گوشتگ داں زیشان یل کنگ نہ بیت انت اے زھرشانی برجاہ بیت انت-

بی ایل اے ءِ جارکش جیئند بلوچ ءَ وتی جندے چینل ”ھکل “ ءَ شنگ کرتگین درشان ءِ تہ ءَ گوشتگ کہ بلوچ لبریشن آرمی ءِ بنجاھی کمانڈر ، سینئر کمانڈ کونسل ءِ سروک باسط زھری پنام ءِ کازی ءِ بیرانی ءِ دلپدردیں ھال بلوچ راج ءَ دیگ بوگ ءَ انت کہ آئی ءَ 26 جون ،2025 ءَ اے جھان یل داتگ ءُ ابدمان بوتگ ۔ اے ھال یک مردمے ءِ جتا بوگ ءِ درداں ھوار کولے ءِ ھلاسی انت ءُ یک ھنچیں لیکہ ، پوجی گل ءِ بنھشت ءِ یات یے کہ مروچی بلوچ راجی زرمبشت ءَ تاکتور ءُ مھکمے دروشمئے ءَ جھان ءِ دیم ءَ پدر کنت ۔

باسط زھری ءِ گھگیری ءِ سپر بس یک مردمے ءِ پیسلہ نہ انت بلکیں نوک آبادی ءِ زوراکی ، پہ زور سرداری ھاکمی ءُ راجی رسوائی ءِ بگیری ءَ آئی ءَ یک مردمے ءِ دروشم ءَ کت ءُ پد ءَ آ ادارھی ھساب ءَ گھگیری ءِ کالب ءَ کت ۔ آ 1981 ءَ ماں ھزدار ءِ دمگ زھری ءَ ودی بوتگ ۔ باسط زھری ءَ ورنائی ءَ ھما راہ گچین کتگ ات کہ آ درد ، دیمھونی ءُ بے دروریں جھدے راہ ات ۔ آئی ءِ راجی پگر ءُ سیاسی سسا ءَ آ 2026 بی ایل اے ءَ ھوار کنائینت ۔ آئی بنداتی کرد اربن گوریلا ءِ دروشم ءَ ھزدار ءَ دیم ءَ اتک بلے زوت ءَ آئی ءِ کرد شھری جنگی گوستانک ءِ بھرے بوت ۔

ھزار ، شال ، ھب چوکی ءُ گوادر ءِ وڑین بازارانی تہ ءَ اربن گوریلا وار فیئر ءِ گل سازی ، وڑ ءُ پیم نوکیں دروشمے ءِ تہ ءَ آورت انت کہ اے باسط زھری ءِ دور چاری ، رھشونی ءُ پوجی زانشت ءِ برورد ات انت ۔ آ بس اُرش کنوکیں کمانڈر ءِ نہ ات بلکیں سرجمیں سکول آف تھاٹ ات کہ آئی ءَ بازاری جنگ یک مھکمیں جنگی سائنسے ءِ جوڑ کت ۔ دژمن ءِ پوجی شوربندیانی بے سوبی ، سیکورٹی نیٹورک ءَ نزور ءُ دژمن ءِ تھی نزوریاں جنگی رپک ءِ تہ ءَ بدل کنگ ءِ ھنر باسط زھری ءِ گور ءَ بوتگ ھمے سوب ات کہ آ بی ایل اے دیم ءِ سپ ءِ کمانڈراں ھوار کنگ بوت ءُ آ نمیرانیں استاد جنرل اسلم بلوچ ءِ دست ءِ راست بیتگ ۔

سال 2010 ءَ پد باسط زھری کوہ ءَ شتگ کہ اود ءَ آئی ءَ وتی جنگی رھشونی ، نیٹورکنگ ءُ لیکھی ھیلکاری شریں وڈی ءَ کارمرز کتگ بلوچستان ءِ بازیں کوھی ھنداں بوتگیں ٹوھیں ارشانی شوربندی ءُ کمانڈ ءُ انٹیلی جنس ءِ سروکی ھیشی ءِ دست ءَ بوتگ انت ۔ سال 2018 ءَ وھدیکہ نمیرانیں جنرل اسلم بلوچ ءِ سروکی ءَ بی ایل اے دوبر نوکازگ بوتگ گڑا اد ءَ باسط زھری ءِ ھم بلاھیں کردے بوتگ ۔ آئی ءَ سنٹرل کمان ءِ زمہ داری دیگ بوتگ انت ءُ بی ایل اے ءِ سینئر کمانڈ کونسل گچین کنگ بوتگ کہ وتی گڈی ساہ ءَ مھکم بوتگ ۔

جارکش ءَ گوشتگ کہ ھمے وھد ءَ بزاں سال 2018 ءَ آ گردگانی نادراھی ءِ آماچ بوتگ ۔ آئی ءِ ھردو گردگ ناجوڈ بوتگ انت ءُ بازیں جھدے ءَ پد ٹرانسپلانٹ کنگ بوتگ انت بلے اے نادراھی آئی ءِ کار ءُ جھدے ءِ دیم ءَ ھچبر اڑاند نہ بوتگ ۔ آ نادراھی ءِ وھد ءَ ھم بی ایل اے ءِ درسیں کاراں ھوار بوتگ ھنچوش کہ یل جانسلامتیں سرمچار ءِ کنت اش ۔ آئی ءِ اے گھگیری ءِ رویشت ایوک ءَ پہ ورنایاں درورے نہ بوتگ بلکیں آئی ءَ رھشونی ءِ مانا ھم مٹ کتگ ۔

جارکش ءَ گوشتگ باسط زھری پنام ءِ قاضی ءِ وژن نا ایوک ءَ جنگی یا لشکری نہ بیتگ، آ بی ایل اے ءَ یک گچینی راجی ریاستی سرینے ءِ ھڈے ءِ رنگ ءَ چارگ ءَ بیتگ- آ سرپد بوتگ کہ اگاں گھگیری یک سائینسی، پکری ءُ تکنیکی بنیاداں نہ بیت گڑا آ بے نپیں امل ءِ درچ ءَ کیت انت – ھمے واستا آئی ءَ بی ایل اے ءَ یک مھکمیں ادارھے ءِ رنگ ءَ برجم کنگ ءِ کرد پیلو کتگ – آئی ءِ چیردستی ءَ ھائی ٹیک، فنانس، میڈیا، ھیلکاری، انٹیلیجنس، ریسرچ، ٹیکنالوجی، ءُ سیاسی رھوتکاری ءِ دروشماں گیر لشکری پتراں مھکمیں رنگے ءَ مھکم بیتگ- ھمے آ ادارتی سوچ بیتگ کہ آئی ءَ بی ایل اے بلوچستان ءِ درستاں مھکم ءُ برجم داریں گھگیریں تاکتے ءَ مٹ کتگ-

جارکش ءَ گوشتگ آئی ءِ جد ءُ جھد ءِ یک بھرے آئی ءِ زاتی کربانی توک ءَ انت کہ ریاست ءَ آئی ءِ کھول نشانگ کتگ ءُ آ ھرچ وڑ ءَ نیزور کنگ ءِ جھد- 2010 ءَ آئی ءِ دوزادہ سالی ئیں برات مجید زھری شھید کتگ، دوھزار ءُ یازدہ ءَ آئی ءِ کماش محمد رمضان زھری چیریں ادارھاں شھید کتگ- سال دوھزار ءُ دوازدہ ءَ آئی ءِ بیست ءُ یک سالی ئیں برات شھید عبدالحئی پنام ءِ نثار زھری یک مشنے ءِ وھد ءَ شھید بیتگ- سال دو ھزار ءُ چاردہ ءَ آئی ءِ دو ناکو زتک عبدالصمد زھری ءُ شیر مھمد زھری دشمن ءِ گون ءَ یک دراج کشیں جنگے ءَ پھلین شھید امیرالملک قلندرانی ءِ ھواری ءَ شھید بیتگ- چریشی ءَ پد آئی ءِ تُرو زتک شھید ٹک تیر ضیاالرھمان زھری پنام ءِ دلجان دشمن ءِ گون ءَ جنگ کنان ءَ گڈی تیر وت ءَ وت جتگے – ھمے سال ءَ آئی ءِ دگہ تُرو زتکے راشد ھسین چہ دبئی ءَ آوار جنگ ءُ پاکستان ءِ دست ءَ دیگ بوتگ کہ انگت ءَ بیگواہ انت- پد ءَ آئی ءِ مسترین برات عبدالحفیظ زھری ریاستی ادارھاں آوار جتگ ءُ کھول ءِ دگہ مردم ھم نشانگ کتگ انت-

جارکش ءَ گوشتگ بلے اے درستیں کربانی ءُ درداں ابید باسط زھری ءِ نزریاتی سنچ،گھگیری زانشت ءُ گل ءِ پتر ءَ آئی ءَ را ھچ بَھ ءُ بکڑی نیتکگ،آ نا ایوک ءَ وت مھکم بیتگ بلکیں بی ایل اے ءُ بلوچ راجی گھگیری ءِ یک ھنچیں نزریاتی، لشکری ءُ ادارتی ءِ درچے داتگ کہ آئی ءِ ھنڈالانی ھشک بوگ نا ممکن انت

جارکش ءَ گوشتگ بلوچ لبریشن آرمی سینٹرل کمانڈر باسط زھری پنام ءِ قاضی ءِ نمیرانی ءَ گل نا ایوک ءَ یک جنگی کمانڈرے ءَ زبھر نہ بیتگ بلکیں یک ھنچیں پکری، ادارتی، ءُ نزریاتی بنیادے ءَ جدا بیتگ- چریشی ءَ بی ایل اے ءِ گیر لشکری تک ھالہگ کتگ- آ ھما لھتے کمانڈراں بیتگ کہ آیاں گھگیری تھنا توپک ءِ تک ءَ نہ داشتگ بلکیں ریاستی سازی ءِ نیمگ ءَ جنزینتگ – آئی ءِ گوشگ بیتگ کہ یک جنگولیں گلے ءَ تھنا لشکری تاکت ءَ ناں بلکیں ڈی فیکٹو ریاستی ءں رنگ ءَ برجم کنگی انت- چریشی ءَ آئی ءِ گور ءَ سویلین ادارہ، پالیسی سازی پتر، ء سائبر پھریزی ءِ زانشت بہ بیت – ھمے وژن آئی ءِ کار ءَ چمکین ایت- ھمے وژن ءَ آئی ءَ را گل ءِ پیسلہ ساز کونسل ءِ یک آیوک، پیسلہ کنیں توار ءَ ھوار کتگ-

جارکش ءَ گوشتگ آئی ءِ املی وژن ءِ یک دگہ بھرے نوکیں نسل ءَ گل ءِ ھوارینگ ءِ واستا ادارھی گامگیج بیتگ- زاتی رنگ ءَ سدانی کچ ءَ ورنایاں گوں رھوتکاری ءَ بیتگ- آئی ءِ سیاسی زانشت، جنگی ھیلکاری ءُ گل ءِ ھوارینگ ءَ تچک ءَ مانیٹر کنگ ءَ بیتگ- بس ایوک ءَ بی ایل اے نا بلکیں بلوچ گھگیری زرمبشت ءَ نوکیں نسل ءَ پکری ءُ املی رنگ ءَ جاڑیگ کنگ ءَ ادارھی رنگ ءَ ودینگ ءَ بیتگ- آ ایوک ءَ جنگولے نہ بیتگ بلکیں پکری رھشونے بیتگ، آئی ءَ ورنایانی گوں گپ ءُ تران کتگ،آیانی جستانی پسو داتگ، آئی ءِ اے کاراں سیاسی پھتوی ءِ مٹ کتگ-

باسط زھری پنام ءِ قاضی ءُ وتی زندگی ءَ بے مٹ بیتگ آ سادگیں تبے مردم، آجزی تب، ءُ بے کساس نرم تواریں مردمے ءِ واھند بیتگ، بلے پیسلہ سازی ءَ یک جتائیں دروشمے بیتگ – آئی ءَ بی ایل اے ءِ ھمراھعانی کمانڈری نہ کتگ برات، استاد ءُ سنگتے ءِ دروشم ءَ بیتگ ئے – آئی ءِ در ھروھد ءَ پچ بیتگ – ،آئی ءِ پیسلہ ءِ شور بندی منگ ءُ آئی ءِ ھکم جزباتی نہ بیتگ آئی ءِ دھشت ءَ گھگیری ءَ را انسانی رنگ داتگ- آ یک ھنچیں گھگیری کہ چش دشمن ءِ ھلاپ ءَ ایوک ءَ توپک ناں بلکیں وتی مردمانی گون ءَ برابری ءَ اوشتوک بیتگ-

آئی ءِ گھگیری پکر ءَ سائنس ءُ پٹ ءُ پول گون بیتگ – آئی ءَ ھروھد ءَ گوشتگ آیوکیں جنگاں المی ءُ تکنیکی تکاں کن ایں – ءُ ھما راج کہ اے تکاں پشت ءَ روت گڑا آ تھنا توپک ءَ گوں باج ءَ برت نہ کنت انت-ھمے پکر ءِ تک ءَ آئی ءَ ریسرچ، اسٹریٹجی ءِ ٹیکٹیکس، سائبر سیکورٹی، دامگی ڈسپلن ءُ فزیکل ءُ الیکٹرانک انٹیلیجمس ءِ تکاں گل ءَ را دیمروئی داتگ – آئی ءَ بی ایل اے ءِ نیٹورک جتا جتائیں رنگے ءَ نوکیں کارانی دیم ءَ وتی انپارمیشن وارفیئر ءُ گل ءِ جنگی پالیسی جزو گوشتگ انت – آ ھائی ٹیک دور ءِ گھگیری ءِ ماڈل بیتگ ءُ آئی ءِ رد ءَ بی ایل اے ءِدارگ ءَ ستک داشتگ-

جارکش ءَ گوشتگ ایشانی مستریں لیکہ ایش ات کہ آئی ءَ گھگیری جزبات ءَ نہ کتگ ۔ آئی ءِ رھشونی ءَ جوڑ بوتگیں ھر پالیسی لس نہ بوتگ بلکیں دراجیں مدتے ءَ مھکمیں امل بوتگ۔ آئی ءَ ریاست ءِ نپسیات، دژمن ءِ رویس ءُ میان اُستمانی مٹ بوتگیں جاورانی چارگ ءُ زانگ ءَ سنچ بیتگ ۔

بلوچ لبریشن آرمی ءَ اے پیسلہ کتگ کہ گل ءِ یک یونٹے ءِ نام ءَ باسط زھری پنام ءِ قاضی ءِ نام ءَ آئی ءِ آشوبی شرپ ءَ ایر کنگ بیت۔ اے پیسلہ ایوک ءَ دلپدردی ءِ نشانی نہ اِنت بلکیں یک املی گامگیجے کہ ایشی ءِ وسیلگ ءَ بی ایل اے وتی گل ءِ بنھشت ، ادارھی تک ءِ رکھینگ ءُ وتی پکری میراس ءَ نوکیں نسلاں سر کنگ ءِ رھشون ءِ سر ءَ امل کنت۔ اے یونٹ ءِ زمہ واری، نام، دائرہ کار، ءُ سروکی ءِ باروا باز زوت بلوچ راج ءَ سرپد کنگ بیت۔

جارکش ءَ گوشتے باسط زھری پنام ءِ قاضی ءِ شھیدی ایوک ءَ یک زاتی رنجے نہ اِنت بلکیں بلوچ راجی گھگیری ءِ یک انچیں پھناتے ءِ آسر اِنت کہ آئی ءَ بی ایل اے ءَ چہ یک سادگیں گلے ءَ یک ادارھے، یک کوتے ءُُ یک گچینے نزامے ءَ بدل کتگ۔ آ نہ ایوک ءَ یک پوجی رھشونے نہ بوتگ بلکیں یک دانشوریں انجینئر یے، یک آرگنائزرے ءُ یک انقلابی چراگے ھم بوتگ۔ ایشانی جھد ءِ دائرہ کار جنگ ءِ میدان ءَ بگر داں سیاسی گل سازی، فکری منسوبہ بندی، ءُ سائنسی گھگیری پتر جوڑ کنگ ءَ سر بوتگ۔ ھما جزم، زانت ءُ شرپ کہ آئی ءَ وتی نادراھی، زاتی تاوان ءُ ریاستی زلم ءُ زوراکی ءِ باوجود وتی جھد ءَ برجاہ داشتگ، پہ بلوچ ورنایاں یک پائیداریں نپے جوڑ بوتگ۔

قاضی ءِ زند ءَ اے گپ سابت کت کہ گھگیری ایوک ءَ سلاہ چست کنگ نہ اِنت بلکیں اے یک راہ ءُ رھبند، یک مول ءُ مراد ءِ زند ءُ یک پکری رھبندے کہ ھر نسل ءَ المی اِنت کہ آ وان اِیت ءُ وتیگ بہ کنت۔ آئی ءِ سیاسی پھتوی، گل ءِ زانت ءُ اکلاکی پتر ءَ بی ایل اے ءَ را اندری تکان ءُ درائیں پھناتانی نیام ءَ برابر کت۔ آ گھگیری زرمبشت ءِ ھما رھشونانی تہ ءَ ھوار ات کہ آھاں جزباتی اوگام ءِ بدل ءَ پکری پتر، گامگیج املی ءُ ادارھی بنیادانی سر ءَ زور داتگ ات۔

جارکش ءَ گوشتگ باسط زھری پنام ءِ قاضی ءِ شھیدی ءَ بی ایل اے یک دورے ءِ آسر کنگ ءَ انت بلے اے دور ءِ نزریہ، آئی ءِ جوڑ کنگ، ءُ آئی ءِ رژنائی گل ءِ ھت تک ءَ زندگ اِنت۔

بلوچ لبریشن آرمی اے گپ ءَ پدر کنت کہ قاضی ءِ جھد، پکری میراس، ءُ گل ءِ لیکہ یک یونٹے یا یک بیانے ءَ گوں بندوک نہ بنت بلکیں آئی ءِ منسوبہ، پالیسی، ءُ ادارہ زانشتی ءِ دراھیں تک ءُ پھناتاں سر کنگ بنت۔ آئی ءِ شھیدی مارا نہ ایوک ءَ گمگین کنت بلکیں مارا یک زمہ واری یے ھم دنت، ھما مشن ءِ سرجم کنگ ءِ زمہ واری کہ آ دو دھکاں آئی ءِ وپادار بوتگ۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ھشت جون بیگاہ پنچ ءَ پسنی ءِ دمگ کلانچ، بازواجہ ءَ لشکر کشی ءِ نِیئت ءَ کوھی دمگاں پِتروکیں زورگریں پاکستانی پوج ءِ کارندھانی سر ءَ سنگر گپتگ ءُ اُرش کتگ- اُرش ءَ دُژمن ءِ سے کارندہ مرتگ انت وھدیکہ بازینے ٹپی بیتگ اَنت-

جارکش ءَ گْوشتگ کہ پہ پسنی ءِ جتاجتائیں دمگاں زورگریں پاکستانی پوج ءُ آئی ءِ دمگی کُشندہ ٹولی ءِ نیمگ ءَ چہ گوستگیں پنچ روچاں چہ لشکر کشی برجاہ ءَ اِنت- بازواجہ ءِ ھند ءَ سرمچاراں سنگر گپتگ ءُ زورگریں پوج ءُ ڈیتھ اسکواڈ ءِ کارندہ نشانگ کتگ اَنت، چریشی ءَ پد لشکر پدکنز بیتگ-

جارکش ءَ گْوشتگ بلوچستان لبریشن فرنٹ ءَ پسنی ءِ دمگ کلانچ، باز واجہ ءَ زورگریں پوج ءِ سر ءَ بیتگیں اُرش ءِ زمہ واری ءَ منّ اِیت-

بلوچستان ءِ دمگ نوشکی ءِ کوچکی ءَ ناشناسیں سلاہ بندیں مردماں لیویز ءِ چیک پوسٹ ءِ سر ءَ اُرش کتگ ءُ لیویز پورس ءِ گاڑی ، موٹر سائیکل ءُ کوٹی ءِ مانداشتگ انت-

ایشانی ھواری ءَ سلاہ بندیں مردماں جاڑیگیں کارندھانی سلاہ ھم پچگپتگ انت-

گوستگیں لھتے ھپتگاں بلوچستان ءِ جتاجتائیں دمگاں آجوئی لوٹوکانی سُر ءُ پرانی تہ ءَ گیشی گندگ بوتگ۔ بلوچستان ءَ بازیں اُرشانی اھوال دیم ءَ اتکگ انت کہ اُرش کنوکاں سرکاری کارگسانی سر ءَ دستیگی ءُ سلاھانی پچگرگ ءُ سرکاری ریکارڈ سُتکگ اَنت۔ ایشانی ھوار ءَ مستونگ ءُ زھری ءِ وڑیں مزنیں شھرانی دمگاں ھم وتی کنٹرول ءَ کتگ انت۔

گیشتریں جاوراں اے گندگ بوتگ کہ ارش کنوک اے کار ءِ کنگ ءَ پد شُتگ اَنت۔

زانتکاتانی گشگ انت کہ بلوچستان ءِ تہ ءَ ترند گیریں ریاستی پالیسیاں آجوئی ءِ بیانیہ ءَ را گیش ءُ گیوار کتگ ءُ پاکستانی فوج ءُ حکومت چہ راج ءِ پلامرزی ءَ زبھر بوگ ءَ انت۔

نیشنل ڈیموکریٹک پارٹی ءِ بُنجاھی راھشون ءُ اسکالر غنی بلوچ ءِ زورانسری آوار جنی ءِ ھلاپ ءَ زھرشانی کتگ ءُ آئی ءِ پہ سلامتی یل کنائینگ ءِ لوٹ اش کتگ-

کھول ءِ گوشگ اِنت کہ یک ماھے ءَ چہ گیش گوستگ کہ بلے انگت ءَ آ یل کنگ نہ بیتگ ءُ نانکہ ریاستی ادارھانی نیمگ ءَ چہ ھچ وڑیں شریں پسّہ دیگ بیتگ-

آئی ءِ یل نہ بیگ ءِ ھلاپ ءَ مروچی کھول ءُ دگہ شھریاں ” سرمل” ھند سر ءَ تپتان دگ ءَ نندانک دیان ءَ بند کتگ-

آئی ءَ گْوشتگ کہ اے ریاستی زُلم ءُ ھکومت ءِ ناکامی ءِ ھلاپ ءَ زھرشانی اِنت-

زھرشانی کنوکاں گوشتگ کہ بُنجاھی شھدگ بندی، غنی بلوچ ءِ کھول نیمگ ءَ چہ پُرایمنی زھرشانی کرد ءِ دْرچ اِنت، کہ یک ماھے ءَ چہ جتاجتائیں دروشماں برجاہ ءَ اِنت- آئی ءَ کڈن کتگ کہ اے زھرشانی ءِ تہ ءَ تُرندی آرگ بیتگ دانکہ غنی بلوچ ءِ آئینی ھک بھال کنگ نہ بیت-

زھرشانی کنوکاں دیمتر ءَ گْوشتگ کہ اگاں غنی بلوچ زوت یل کنگ نہ بیت گُڑا اشی ءِ زُلم ءِ ھلاپ ءَ گیش توار چست بہ کن اِت ءُ زھرشانی دروشم ءَ تُرندی آرگ بیت-

اشی ءَ پد دمگی انتزامیہ ءَ کھول ءَ چہ گپ دیوان ءَ پد شھدگ گاڑیانی واستا پچ کتگ- کھول ءَ زھرشانی پُرایمنی وڑے ءَ ھلاس کنان ءَ غنی بلوچ ءَ زوت یل کنائینگ لوٹ کتگ-