چاگی ءَ ناکہ بندی، ریاستی مشینریانی سر ءَ اُرش سلاھانی دستیگ، ءُ مشکے ءَ ڈیتھ اسکواڈ سر ءَ اُرش ءَ یک کارندھے کشتگ ءُ یکے ٹپی کتگ- بی ایل ایف

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست نُھ جون دوھزار بیست پنچ ءِ بیگاہ ءَ ساھت چار ءِ نزیک ءَ بی ایل ایف ءِ سرمچاراں چاگی ءِ ھساس اسٹریٹیجک زون پدگ، گوک آپ ءَ شال – تفتان ھائی وے N-40 سر ءَ یک ٹیکٹیکل دگ بلاکیڈ برجم داشتگ – اے کنٹرولڈ ھند ءَ ناکہ بندی ءِ میان ءَ گاڑیانی سرجمی ءَ پٹ ءُ پول کتگ اَنت، پٹ ءُ پول میان ءَ مھکمہ کسٹم ءِ گاڑی داشتگ ءُ آ دزگیر کتگ آئی ءِ گور ءَ کلاشنکوپ ءُ یک نائن ایم ایم وتاس دزکپتگ-

جارکش ءَ گْوشتگ کہ بندانی انٹیلیجنس جُست ءُ پُرس ءَ پد سرجمیں کارندہ، یک دری مردمے ءَ ھوار پہ مردمگری ھاتر ءَ یل داتگ اَنت-

جارکش ءَ گْوشتگ بی ایل ایف ءِ سرمچارانی دومی ٹولی ءَ نزکیں کوہ چکی لیویز بُنجاھی اسٹیشن سر ءَ اُرش کتگ – اے کاروائی ءَ لیویز کارندہ دزگیر کنگ ءَ پد اود ءَ چہ سرکاری سلاہ دستیگ کتگ اَنت ءُ اسٹیشن مانداشتگ ءُ ناکارہ کتگ- وھدے ڈیوٹی ءَ ساڑی کارندہ ھمے شرت ءَ یل داتگ اَنت کہ آ دیمتر ءَ بلوچ راج ءُ ڈرائیوراں بے زرورت ءَ دلسیاہ کنگ ءَ پھریز بہ کن اَنت-

جارکش ءَ گوشتگ بیست ھشت جون ءِ بیگاہ وھد ءَ بی ایل ایف ءِ سرمچارانی چیریں ونگ ءِ داتگیں ھال انٹیلیجنس بُنیاد ءَ مشکے ءِ دمگ گورکائی ءَ ریاستی پلامرزی ءُ چیردستی ءَ کارکنوکیں کارندھانی کاروان ءَ ھوار چار پرپٹاں چہ یک پرپٹے آئی ای ڈی اُرش ءَ نشانگ کتگ – چریشی ءِ آسر ءَ یک کارندھے جاہ پہ جاھی مرتگ ءُ یکے سک ٹپیگ بیتگ-

جارکش ءَ گْوشتگ کہ مرتگیں کارندہ ءِ پجّار خیربخش ء اشرف محمد حسنی نام ءَ چہ بیتگ، وھدے کہ ٹپی کارندہ ءِ پجّار گل محمد ء فقیر احمد نام ءَ چہ بیتگ- خیر بخش کہ ریاستی جوڑ کتگیں کُشندہ ٹولی ءِ یک مزنیں کارندھے بیتگ- زانگ بہ بیت اشی ءِ پت اشرف دوھزار ھپدہ ءَ بی ایل ایف ءِ اسنائپر ٹولی ءَ یک کاروائی ءِ میان ءَ نشانگ کتگ ءُ کُشتگ اَت – اے نیٹ ورک آواران ءِ دمگ ھاسکار مشکے ءَ راجی جُھد ءُ زورانسری آوار جنی ءُ مردماں نشانگ کنگ ءَ تچکی ءَ ھمگرنچ بیتگ-

جارکش ءَ گوشتگ بی ایل ایف چاگی ءُ مشکے ءِ کاروائیانی زمہ واری ءَ منّ اِیت ءُ رسانکدر ءَ چہ بلوچ راج ءَ باور کنائین اِیت کہ آ اے سرجمیں بلوچ دُژمنیں مردماں ءُ توانمنداں یک یک ءَ جنت ءُ ھلاس کنت-