اکسے ءِ کسہ – مھروان کمبر

الم بوانیت

اکسے ءِ کسہ

نبشتہ کار: مھروان کمبر

دی بلوچستان پوسٹ

برے برے لَھتیں اَنچیں ساھت، اَنچیں موسم ءُ اَنچیں اَکس تئی چمّانی نِوان ءَ کاینت گُمان بیت وھد اُوشتاتگ ءُ گیدی ءَ ساہ ءِ کشّگ شموشتگ۔ اے اَکس ھم اَنچیں اَکسے یک کسانکیں گوھارے، یک بے تواریں ادیرھے ءُ گُلاب ءِ تاکانی چیر ءَ اندیم بیتگیں لَھتیں اَنچیں درد اَنت کہ آیانی درشان کنگ ءَ لبز ھم نہ گواہ ایت۔ اے اکس تھنا موتکانی موسم ءَ شلینتگیں ارسے ءِ کسہ نہ اِنت، بلکیں گوستانک ءِ پیشانی ءَ مُشگ بیتگیں یک چیھالے، جُستے ءُ یک آزگیں ٹپے۔

اے اَکس تھنا یک ساھتے ءِ آدینک ءَ پیش دارگ ءَ نہ اِنت بلکیں یک اَھدے ءُ زمانگے ءِ موتکاں آرگ ءَ اِنت۔ یک کسانکیں گھارے وتی نمیران بوتگیں براتے ءِ ادیرہ ءِ سرون ءَ نشتگ آئی ءِ چمّانی شھکوراں ھار کُتگ ءُ دل ءَ اَنچیں ٹپ پیوست بیتگ کہ وھد آئی ءِ درمان کنگ ءَ شموشتگ۔ ھما برات ءَ کہ وتی گھارانی ھمرائی ءَ شھر، میتگ، چار راھ دمک ءُ پریس کلبانی دیم ءَ پہ وتی گار ءُ بیگواھیں پت ءِ شوھاز ءَ در پہ در بیتگ، مروچی ھاکانی چیر ءَ وش واب اِنت ءُ آئی ءِ ادیرہ ءِ شک ءَ نبشتہ اِنت “گُلام ءَ زندگی نسیب ءَ نیست۔”

اگاں زمین زادگے زمین ءِ پھازگ ءِ جنگ ءَ جنگ بیت گُڑا ھاک آئی ءَ وتی امبازاں زُور ایت ءُ وتی سینگ ءَ واپین ایت ءُ بے توار بیت۔ بلے ھما زمین زادگ ءِ گوھار آئی ءِ ادیرہ ءِ سرون ءَ نند ایت ءُ گلھانی گرنچ ءَ بوج ایت، آئی ءِ ارس زمین ءَ نہ کپ انت بلکیں ھاک آئی ءَ وتی تہ ءَ پیوست کنت ءُ گِھگیری ءِ نوکیں موسمے بندات کنت۔

اے ادیرہ گندلانی سر ءَ مُرتگیں مردے ءِ ادیرہ نہ اِنت۔ اے ھما بلوچ ورناھے ادیرہ اِنت کہ آئی ءِ چمّانی تہ ءَ گِھگیری ءِ واب چول جنگ ءَ اَت۔ گُلامی ءِ سیاہ ءُ تھاریں شپاں وتی نسیب نہ لیکگ ءَ اَت بلکیں ھمے تھاریں شپاں نوکیں رُژنے ءِ دیگ ءَ تچ ءُ تاک کنگ ءَ اَت۔ آ ورنا کوھانی تہ ءَ چیر بوتگیں وابے نہ اَت بلکیں آجوئی ءِ اوگاماں گوں زندگ بوتگیں گواچنے اَت۔ آئی ءِ توکل، گِھگیری ءُ آئی ءِ مھروانی ءَ آ ابدمانی ءِ سپر ءَ رھادگ کُتگ اَت۔ آ پروش وارتگیں دُژمن ءِ شل سریں تیرانی آماچ بوت، بلے وتی زمیر ءِ سودا ئِے نہ جت۔

اے کسانکیں جنکو، تھنا یک جنکوے ءِ اکس نہ اِنت، بلکیں ھزاراں بلوچ شیرزالیں مات، گوھار ءُ جنکانی اکس اِنت کہ ھر روچ وتی دوستگیں مردمانی جوناں چِست کن انت ءُ آیاں ھما زمین ءِ میار کن انت کہ آیانی ھُون ھما زمین ءِ سر ءَ شنگ ءُ تالان بوتگ۔

ادیرہ ءِ سر ءَ رِتکگیں گُلابانی تاک اے گپ ءِ گواھی ءَ دینت کہ اے راہ ءَ رَپتگیں نرمزار نہ مر اَنت بلکیں آ گُلزمین ءَ ازت ءِ تاج ءَ سر ءَ دینت ءُ وت ابدمان بنت۔ ھما جنکو کہ دُنیا ءِ مُچی ءَ چہ گستا وتی برات ءِ کبر ءِ سرون ءَ نشتگ ءُ گریوگ ءَ اِنت، اسل ءَ آ گریوگ ءَ نہ اِنت آ ھما زُلم ءُ زوراکی ءِ گواھی ءَ دیگ ءَ اِنت کہ کبزہ گیریں ریاست پاکستان ءَ آیانی سر ءَ مُشتگ۔ ھما گواچنیں راستی ءِ گواھی ءَ دیگ ءَ اِنت کہ آئی ءَ ھِچ زندان ءِ سانکل ءُ زمزیل داشت نہ کن انت۔

اے اَکس چیھال جنان ءُ گُشان اِنت کہ ” ما وتی براتانی لاشاں کبرانی میار اَلّم کن ایں بلے آیانی دیستگیں واباں کَل ءُ کسارت کُت نہ کن ایں۔

اے اَکس گوستانک ءِ چمّانی تہ ءَ چم پیشدار ایت ءُ ھمے جُست ءَ اَلم کنت کہ ” داں کد ما وتی براتاں بے موسم ءَ کبرانی میار کن ایں؟ داں کد اے زمین وتی بچّانی ھُوناں گوں سُھر بیت؟ کدی آ مھلبیں بام ودی بیت کہ مئے چم گمانی جاہ ءَ وشیانی ارساں بہ شلین انت؟

داں ھما وھد ءَ اے وڑیں ساھت مئے سر ءَ ساھیل ءُ ساچان بنت کہ گُلامی ءِ سیاہ ءُ تھاریں شپ ھست اِنت۔ اے شپ ھما وھد ءَ مھلبیں بامے ءَ بدل بیت کنت کہ مئے گِھگیری برجاہ بہ بیت۔ دانکہ ما آجو نہ بہ ایں لاڑکیں گھار برات ءِ کبرانی سر ءَ تُرونگلیں ارساں گوار اَنت۔ اے ارس مارا ھمے یاتاں پرین انت کہ آجوئی ءِ نیاد تھنا دیمھونی نہ اِنت بلکیں ھما ھمت ءُ توکل اِنت کہ مئے چمّانی راہ ءَ ارسانی دروشم ءَ شلان بیت۔


دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

نوکتریں