پاکستان ءَ سئے شمبے ءُ چار شمبے ءِ نیامی شپ ءَ اوگانستان ءِ اُستان کنڑ، خوست ءُ پکتیکا ءَ برزی اُرش کتگ ءُ ایشی ءِ آسر ءَ زھگ ءُ جنین آدماں ھوار بازیں لس مردم بیران ءُ ٹپیگ بوتگ اَنت۔
اوگان طالبان سرکار ءِ جارکش زبی اللہ مجاھد ءَ سوشل میڈیا پلیٹ فارمز ءِ سر ءَ شنگ بوتگیں بیان ءِ تہ ءَ گْوشتگ کہ پاکستانی بالی گراباں ڈیورنڈ لائن ءِ نزیک ءَ جتا جتائیں جاگہ نشانگ جوڑ کتگ اَنت۔
آئی ءِ رد ءَ اے اُرشانی تہ ءَ 11 زھگ، یک جنینے ءُ یک پیریں مردمے بیران بوتگ ءُ بازیں مردم ھم ٹپیگ بوتگ اَنت۔ آئی ءَ بیران بوتگیں مردمانی اکس ھم شنگ کتگ اَنت۔
طالبان ءِ واکدارانی رد ءَ خوست ءِ دمگ اسپیرا ءِ یک میتگے ءَ بوتگیں اُرش ءَ 9 مردم بیران ءُ 10 ٹپیگ بوتگ اَنت ءُ پکتیکا ءِ دمگ برمل ءَ ھم کم چہ کم 3 مردم بیران بوتگ اَنت۔
دمگی مردمانی رد ءَ اے اُرش شپ ءِ یک بج ءِ نزیک ءَ کنگ بوتگ انت۔
پاکستانی سرکار ءُ جارکش ءَ انگت ءَ اے گپانی سر ءَ سرکاری پسو شنگ نہ کتگ۔
اے وئیل ھما وھد ءَ بوتگ کہ پاکستان ءُ اوگانستان ءِ نیام ءَ ایمنی ءِ جیڑھانی سر ءَ کش ءُ چیل ھست انت۔
زانگ بہ بیت گوستگیں لھتیں ماھاں پاکستان ءُ اوگانستان یکے دومی ءِ سر ءَ سیمسر ءِ سر ءَ بیڑانی بھتام جنگ ءَ اَنت کہ ایشی ءِ سبب ءَ دوئیں ملکانی سیادی ءُ سیمسر ءِ جاور ھالاں کش ءُ چیل برجاہ اِنت۔