گوستگیں لهتے روچ اِنت کہ ھندوستان ءِ مستریں سیاسی گل بهارتی جنتا پارٹی( BJP) ءُ مودی سرکار چاگردی رسانکدر ءَ ھندوستانی ورناھانی تنز ءُ کُنّتانی دیمپان انت۔
اے وئیل شمبے ءِ روچ ءَ بیت وهدے هندوستانی مزن آمید گِس ءِ چیف جسٹس سوریہ کانت، اوپن ائیرنگ کیسے ءَ میڈیکل نودربرانی زهرشانی ءِ سر ءَ اے ریمارکساں دنت ءُ هندوستان ءِ ورناهاں تنز کنت ءُ گُشیت کہ ” اے بے روزگاریں ورناہ کاکروچ( لیلُّک) اَنت، اشاں وت ءَ روزگار نیست، همے واست ءَ چاگردی رسانکدراں هرکسی سر ءَ وتسریں نگد کن انت “۔
اے ریمارکساں پد چاگردی رسانکدر ءَ سوریہ کانت ءِ بگیری ءَ ورناھانی نگداں بہ گر دانکہ میمز، ریل ءُ سیاسی تنزانی درِچے بندات بیت ۔ اے وئیل چاگردی رسانکدر ءَ هما وهد ءَ سر ءَ زور ایت وهدے ابھیجیت دیپکے نامیں ورناهے، مودی ءِ بھارتی جنتا پارٹی ءِ پیروڑی ” کاکروچ جنتا پارٹی” ءِ نام ءَ انسٹاگرام، ایکس، پیسبُک پیج ءُ تندجاهے جوڑ کنت۔
کساس پنچ روچانی تہ ءَ اشی ءِ انسٹاگرام پیج ءِ 15 میلین پالورز بنت کہ اے کچ چہ بھارتی جنتا پارٹی ءِ درئیں ڈیجیٹل پالورزانی کساس ءَ چہ گیشتر اِنت۔
ابھجیت دیپکے کئے انت؟
ابھیجیت دیپکے هندوستان ءِ ” لس مردمُی گل ” بزانکہ ” عام آدمی پارٹی ” ءِ پیشی جهدکارے کہ 2012 ءَ چہ ھندوستان ءَ بوهوکیں کرپشن ءُ کرپٹ سیاست ءِ بگیر ءَ کیمپین جنزینگ ءَ اِنت۔ ھنو ءَ اے سیاسی گل پنجاب اسٹیٹ ءَ رولِنگ پارٹی اِنت ۔ انوگیں وهد ءَ دیپکے امریکہ ءَ بوسٹن شهدربرجاه ءَ نودربرے ءُ پالیٹکل کمیونیکیشن ءِ اسٹریٹیجِسٹ یے ۔
ابھیجیت دیپکے دی گارڈیئن ءَ گلگدارے ءَ گُش ایت کہ ” آئی ءَ اے سما نہ بوتگ کہ، ھندوستانی ورناہ گوں اے رسانکدری زرُمبشت ءَ اے کساس ءَ همراهداری کن اَنت، آئی ءِ رِد ءَ آئی ءَ اینچُک ءِ گمان هم نہ بوتگ، بلکیں آئی ءِ نیّت، بس چیف جسٹس ءِ ریمارکسانی سر ءَ مزاک ءُ تنز کنگ بوتگ”۔
اے رسانکدری زرمبشت ءَ هندوستانی ورناهاں هوار دگنیا ءِ ورناه همراهداری کنگ ءَ اَنت ۔
بهارتی جنتا پارٹی هندوستان ءِ مستریں سیاسی گل اِنت کہ 2014 ءَ چہ نریندر مودی ءِ چیردستی ءَ ھندوستان ءِ رولِنگ پارٹی اِنت، اشی ءَ ابید انڈیئن نیشنل کانگریس کہ دومی مستریں سیاسی گل اِنت، کاکروچ جنتا پارٹی ءَ چندے روچانی تہ ءَ اے درستانی ڈیجیٹکل پالوَرز گوازینتگ اَنت ءُ وت ءَ اے سیاسی گل آنی دیم ءَ تونگریں اڑاند یے جهت ءَ منّارینتگ۔ ءُ سوریہ کانت همینچو مجبور کُتگ کہ آئی ءَ وتی ریمارکس دوبر گیشّینتگ اَنت کہ ” من بس ھما ورناه آنی گپ کُتگ کہ آیانی ڈگری نکلی اَنت “ـ
دیپکے دی گارڈیئن ءَ گوں گُلگدار ءَ دیمتر ءَ گُشیت کہ ” CJP ءَ گوں هِچ وڑیں سیاسی گل آں سیادی نیست، بلے چوشکہ ساؤتھ ایشیاہ ءَ گوَستگیں سالانی تہ ءَ جتائیں مُلکانی ورناه آں سرکارانی بگیر ءَ سوبمندیں سیاسی کیمپین جُنزینتگ، نو وھد اتکگ کہ ھندوستان ءِ ورناه BJP ءُ مودی ءِ بگیر ءَ اوشتاتگ اَنت ءُ وتی گپّاں منّارینگ ءَ اَنت”۔
آ اے رد ءَ سری لنکہ، نیپال ءُ بنگلا دیش ءِ Gen-Z آشوب ءِ دروراں دنت۔
کاکروچ جنتا پارٹی چوشکہ سیاسی تنز ءِ پُشدر ءَ جوڑ بوتگ، گُڑا آئی ءِ منشور هم گوں سیاسی کُنّت ءُ تنزاں گوں بندوک اِنت کہ آ بھارتی جنتا پارٹی ءُ آئی ءِ منّوکیں کورپریٹ میڈیا هاؤس، جج، وکیل، (هرچ کاروباری مردم امبانی ءُ اندانی) کہ مودی سرکار ءِ پلّہ مرز اَنت، CJP ءِ سیاسی تنز ءُ کُنّتانی دیمپان اَنت ۔
مودی سرکار ءِ کُمکار ءُ همراه اشی ءَ اپوزیشن ءِ آنلائن کیمپین یے گُشگ ءَ اِنت بلے دیپکے ءِ بیسہ اِنت کہ اے رسانکدری زرُمبشت ھندوستان ءِ سیاسی ڈسکورس ءَ مٹ کنت، آئی ءِ گیشتر گُشگ اِنت کہ اے زرُمبشت انچُش برجم بیت ءُ اگاں زلورت کپت آ اشی ءَ گراؤنڈ ءَ هم جُنزین اَنت ۔
سی، جے، پی ءِ تندجاه ءَ گوَستگیں چار روچانی تہا 3.5 لک مردماں آنلائن ممبرشپ زُرتگ۔
جُتائیں ریس ءُ پریس کار اے رسانکدری زرُمبشت ءَ چاگردی رسانکدر ءِ تاگت ءُ سهتانی تہ ءَ رولنگ پارٹیزانی ووٹرز ءُ کمکارانی کساس ءَ کم کنگ ءِ سوَب گُشگ ءَ اَنت، آیانی منّگ اِنت کہ اگاں چاگردی رسانکدر پہ وڑ ءُ پیم کارمرز کنگ بہ بیت گُڑا دنیا ءِ دیم ءَ نہ تھنا وتی گپ سر کنگ بیت بلکیں وتی گپ ءُ لوٹ منّارینگ هم بنت۔
ما سی، جے پی ءَ موڑرن انٹرنیٹ ءِ زمانگ ءَ مستریں رسانکدری کیمپین گُشت کنیں، ءُ اے زرُمبشت ءَ چہ چاگردی رسانکدر ءِ کارمردی ءُ آئی ءَ زور ءَ سما کُت کنیں کہ چتو تھنا چندے روچانی تہ ءَ سی، جے، پی ءَ هندوستان ءِ مُدّت ءِ هساب ءَ دراجتریں سیاسی رولِنگ پارٹی چیلِنج کُتگ ءُ پہ آیاں نگیگی پیداگ کنگ ءَ سوبین بوتگ ۔