بی ایس سی ءِ کِرد
نبشتہ کار: مھراج بلوچ
دی بلوچستان پوسٹ
اگاں بچار ئے پہ بلوچ راج ءَ ھمک روچ سیاھیں ءُ تھاریں روچے بستار ءَ زانگ بیت چے ءَ کہ گُلامیں راج ءِ زِند وت وتی تہ ءَ تھاری ءِ نام اِنت گلام ءِ زندمان زندے نہ اِنت ھمے وڑ ءَ ھمک روچ ڈیھ ءِ لوگاں آس روک اِنت کماش، ورنا، نودربر زھگ ءُ زالبول زورانسری آوارجنگ بنت لٹ ءُ کٹ کنگ بنت گار ءُ بیگواہ کنگ بنت، شھید کنگ بنت آیانی ژانگولیں لاش دور دیگ بنت بلوچستان ءِ ھمک دمگ ءُ چوشیں لوگے پشت نہ کپتگ کہ پاکستان ءِ زوراکیانی آماچ نہ اِنت ءُ اے لڑ یکشل ھمے داب ءَ برجاہ اِنت۔
اِے ھبر پدر بیت کہ اُستان ءِ دائم ءَ ھمے جھد بیتگ کہ آ بلوچ نودربراں چہ وانگ، زانگ، سنجی ءُ پگری پڑ ءَ دور بدار اِیت بلے مئے وتی راجی نودربراں زانگ ءُ سرپد بوگی اِنت ھما نودربر کہ آ مروچی جتا جتائیں دانشگاہ ءُ ادارگاں وانگ ءَ اَنت ھمایاں سما بوگی اِنت کہ گُلامی ءِ زند ءِ سانکلاں ایوک ھمے یکیں شے پروش دات کنت آ وانگ ءُ زانگ اَنت وھدے مئے وانوکیں تبکہ نودربر چہ راجی گلامی ءَ بے سُد ءُ بے سما بہ بیت ءُ وانگ ءِ گِستائی ءَ ھچ بستار ءُ ارزشت مہ دے اَنت گڑا سرپد بہ بنت کہ اے گُلامیں پند پہ مدامی زوراکیانی دپتراں نبیسگ بیتگ۔
بلوچ راجی جنز ءَ ھزاراں اَنچیں ورنا ودی کتگ کہ آیاں وتی پکر ءُ لیکہ ءِ باوست ءَ وتی چاگرد ءَ راجکاری سکین داتگ ءُ دژمن ءِ سازتگیں پندل بے سوب کتگ اَنت۔ اگاں ما بچاریں داں ما گند ایں کہ بلوچ نودربر گل (بی ایس سی اسلام آباد) بلوچ راجی زرمبشت ءِ تہ ءَ مزنیں کردے ھست۔ اے گوستاگیں ءِ سنگتانی داتگیں کُربانی اَنت کہ مروچی ( بی ایس سی اسلام آباد) ءِ گَل ءَ یک بلاھیں مُدتے بیت کہ شَرّیں رنگے ءَ دیم پہ وتی منزل ءَ جُنزان اَنت، بی ایس سی اسلام آباد ءِ جوڑشتی ءَ بگر داں ھستیں وھد ءَ بلوچ راجی جُنز ءِ تہ ءَ نودربر جوانیں کردے پیلو کنگ ءَ اَنت۔
من انچو سرپد باں کہ اسلام آباد ءِ ڈولیں جاگہ ءَ بی ایس سی ءِ دروشم ءِ ادارگے جوڑ بوگ پہ بلوچ راج ءَ یک زیبائیں سوگاتے ءَ کم نہ اِنت، چے ءَکہ بی ایس سی یک انچیں گلے کہ آاسلام آباد ءِ جتائیں وانگجاھانی تہ ءَ بلوچ ءِ توار جوڑ اِنت بلکیں تھنا اسلام آباد ناں بلوچستان ءِ اے دگہ جاگھاں ھم نودربرانی توار اِنت، بی ایس سی یک گلے نہ اِنت آیک راجی جُنزے اگاں بچاریں وھدے چہ بلوچستان ءَ نودربرے پہ وانگ ءُ زانگ اد ءَ کیت ءُ اسلام آباد ءَ سر بیت گڑا بی ایس سی ناں تھنا اے نودربر ءَ ادارگ ءِ جیڑھانی سر ءَ سرپدی دنت بلکیں آئی ءَ وتی پجار، دود ءُ ربیدگ ءِ رکینگ ءَ ھوار بلوچستان ءِ راجدپتر ءُ زمین ءِ بارو ءَ سرپدی ودی کنگ ءِ جھد ءَ کنت اِنت، اے جھد ءَ گَل جوانیں رنگے ءَ سوبمند ھم بیتگ اگاں بچار ئے زوراکیں اُستان بھ نہ لوٹ اِیت کہ بلوچ راج ءِ تہ ءَ سرپدی ودی بہ بیت پمیشکا آئی ءَ گیش ءَ چہ گیش جھد کتگ کہ بلوچ راج ءَ وتی بنداتی رژنائی ءَ زبھر بہ کنت بلے بی ایس سی ءَ مئے ورنا ءُ نودربر اے باور ءَ کناھینتگ اَنت کہ کتاب دوست ءِ ورنا ءُ وانوکیں نودربر وتی راجی ذمہ واریاں سرپد بِیت ءُ وتی راجی ذمہ واریاں پیلو کنگ ءِ جھد ءَ بہ کنت۔
بی ایس سی اسلام آباد ءَ بلوچ نودربرانی تہ ءَ سرداری، نوابی، مکرانی، رکشانی ءُ سلیمانی پرک ءُ درک ھلاس کنگ ءُ اے دگہ چاگردی سلکاریاں چہ رکینگ ءِ ھاتر ءَ بلوچ ورنا کتاب ءُ ند دست ءَ داتگ، وانگ ءُ وانینگ ءِ درس دیگ ءِ جھد ءَ اِنت ھمے جیڑہ زوراک ءِ دیم ءَ یک مزنیں ڈانک ھمے ھاتر ءَ زوراکیں اُستان ءَ وتی بے بُنیں پندلانی سازگ ءَ مھتل نہ بیت آ مدام جھد کنت کہ آ بلوچ نودربراں چہ وانگ ءَ دور بے دار اِیت زوراک سرپد اِنت کہ وانندھیں نودربر وتی ھک ءِ پچ گرگ ءَ زانت مروچی ھم بلوچستان ءَ کتاب بندیگ اَنت کلم بندیگ اَنت وانگ ءُ زانگ ءِ سر ءَ بندش ھست، نودربر زورانسری آوارجنگ ءُ شھید کنگ بوگ ءَ اَنت انگت ءَ زوراکیانی درچ یکشل ءَ برجاہ اِنت انچوش کہ زاکر جان، زاھد، شبیر جان ءُ اے دگہ ھزارانی کساس ءَ بلوچ راجی ورنا زوراک ءِ زندان ءَ بندیگ اِنت ھمے رنگ ءَ رضا جھانگیر، اللہ داد ءُ کمبر چاکر ءِ ڈولیں سدانی کساس ءَ شھید کنگ بیتگ ءُ ژانگولیں لاش ویرانے ءَ دور دیگ بیتگ۔ آئی ءِ لوٹ ھمیش اِنت کہ بلوچ نودربر ءُ لس مھلوک ترس ءُ بیم ءِ آماچ ءَ بہ کنت دانکہ آ وتی ھک ءُ وتی راجی آجوئی ءِ ھاتر ءَ بے توار ءُ ھاموش بہ بیت بلے انگت بلوچ نودربر دیم ءَ جنزان اِنت پہ وتی آیوکیں باندات ءِ ھاتر ءَ راجی مکسد ءِ ھاتر ءَ جھد کنوکیں مردم اے ھبر ءَ شر سرپد اِنت کہ زلم ءِ دیم ءَ توار چست کنگ ءُ گھگیری کنگ ءِ آسر زندان ءُ مرگ اِنت بلے راجی آجوئی لوٹوکیں جھدکارے اے ھبر ءَ ھچ کمار نہ کنت بلکیں زند ءُ مرگ ءَ پہ وشیں دلے امبازاں زیر اِیت۔
انچوش کہ سلمان ھمل گُش اِیت “چوں مہ بیت کہ نودربر ھاموش بہ بنت وت ءَ وھد ءِ مُجاں گار ءُ بیگواہ بہ کن اَنت ءُ چماں بند بکن اَنت کہ من گندگ ءَ نیاں یا کہ منی باریگ نئیت” مروچی ھم وھد اِنت بلوچ نودربر بہ جیڑ اَنت اے جاوراں بہ مار اَنت کہ مارا اے درگت ءَ چی کنگی اِنت، راج ءِ نودربر کہ وھدے چہ راجکاری ءَ دور بہ بیت گڑا آ ھچ کت نہ کن اَنت مروچی بلوچ نودربراں راجکاری تلو سر ءَ وتی گام ایر کنگ لوٹ اِیت ءُ دیم ءَ جُنزگ لوٹ اِیت دانکہ آ وتی راج ءِ ھاتر ءَ ھکمیں کلات ءُ زوراک ءِ پندلانی پسو ءَ جوانیں رنگے ءَ دات بہ کنت۔
بازیں نودربرانی اُمیت گوں بی ایس سی ءَ بندوک اَنت بلے برے برے درد بیت کہ باز بر ءَ مئے لھتیں نودربر دژمن ءِ هلاپ ءَ اینچو پندل نہ ساز اَنت اینچو کہ یک ءُ دومی ءِ بگیری ءَ سازگ ءَ دز گٹ اَنت یک ءُ دومی ءِ ھلاس کنگ ءَ پہ میلانک اَنت، کسان کسانیں جیڑاھانی سر ءَ وت ما وت اڈانک اَنت اے ھبر ءَ سرپد نہ اَنت کہ مئے بنوکی جیڑہ چے اِنت پرچا کہ ما دژمن ءَ چہ گیش وت ماں وت گُٹ گیر ایں اگاں بچار اِت ھمے وت ماں وتی اڑ ءُ کُڈْانی سوَب ءَ باز بر ءَ گَل پروشت ءُ پروش ءِ آماچ بوتگ اَنت ءُ کار ھما جاہ ءَ اوشت ءِ آماچ بیتگ اَنت۔
بلے اے مئے وشبھتی اِنت کہ بی ایس سی ڈولیں گَلے ءَ جھد کتگ اے جیڑہ گیش ءُ گیوار کتگ وتی مُھکم کنگ ءِ جُھد کتگ بی ایس سی ءَ بلوچستان ءِ جتا جتائیں شھر ءُ دَمگ ءِ نودربر ھوار اِنت ءُ ھرچ نودربر کہ آ بی ایس سی گل ءِ باسک اِنت بائد اِنت وتی زاتی جیڑہ ءَ یک کش ءَ بکن اَنت ءُ بیا اَنت دست ماں دست بہ بنت، اے کاروان ءَ دیم ءَ بہ بر اَنت ءُ بی ایس سی گیش ءَ چہ گیش مُھکم بکن اَنت ءُ آیوکیں وهد ءَ دُرستیں جیڑھاں گیش ءُ گیوار بکن اَنت یک شریں آیوکیں گامگیجے جوڑ بکن اَنت داں کہ آ گامگیج بلوچ راجی جنز ءِ گِھتری ءِ ھاتر ءَ اڈ دیگ بہ بیت داں کہ دُژمن ءِ ھمک پندل بے سوب بہ بیت ءُ بلوچ راجی مول ءُ مراد سوبمند بہ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-