بیگواھیں عبدالغنی بلوچ ءِ کھول ءَ وتی بیان ءَ گْوشتگ کہ عبدالغنی بلوچ ءِ پہ زورانسیر بیگواھی ءَ یک ماھے ءَ گیش گوستگ بلے انگت آ آمیدگس ءَ پیش کنگ نہ بیتگ ءُ آئی ءِ بابت ءَ ھچ وڑیں سرپدی دیگ نہ بیتگ۔ دزگیری ءِ نہ منّگ ءُ ریاستی ادارجانی نیمگ ءَ برجاھیں بے تواری پاکستان ءِ آئین ءُ انسانی ھکانی پدّریں لگتمالی اِنت۔ عبدالغنی بلوچ یک سادگیں مردمے نہ اِنت، بلکیں یک زانتکارے، نبشتہ کارے، شنگکارے، ءُ سیاسی جھدکارے، کہ آئی ءَ مدام وتی ھیال ءِ گپ چہ دلیل، زبان ءُ شَئور ءَ درشان کتگ اَنت۔
آیاں گوشتگ کہ ما کھول عبدالغنی بلوچ ءِ اے سرجمیں وھد ءَ ملک ءِ کانود ءِ رد ءَ امن ءُ ایمنی ءَ زند گوازینگ ءَ مُدام وتی ھکانی لوٹ ءَ کنگ ءَ اِیں ۔ ما غنی بلوچ ءِ زورانسری ءَ بیگواہ کنگ ءِ ھلاپ ءَ سرجمیں فورم کارمرز کتگ اَنت، ایشانی تہ ءَ تھانہ ءَ ایف آئی آر درج کنگ، آمیدگس ءَ درھواست دیم دیگ، ءُ دمگدار ءِ لوٹ کنگ ءُ ھمے رنگ ءَ امن ءُ ایمنی ءِ راہ ءَ پریس کانفرنس، سوشل میڈیا کمپین، زھرشانی ءُ مچی برجم دارگ ھوار اَنت۔
آیاں گوشتگ کہ 16 جون ءَ اولی زھرشانی ءِ ھمراھی ءَ دامگدار یِ کارگس ءَ یک درھواستے دیم دیگ بوتگ، ایشی ءِ تہ ءَ ڈپٹی کمشنر ءَ دل یکیمی داتگ کہ غنی بلوچ ءِ بابت ءَ ھزدار انتزامیہ گوں رھوت کنگ ءِ کوشست کنگ بیت ءُ سرپدی دیگ بیت۔ بلے ایشی ءَ پد گوں ھاندان ءَ ھچ وڑیں رھوت نہ بوت ءُ گُڈ سر ءَ ما ھاندان ءَ سرمل ءَ نوشکی ءِ مزن شھدگ بند کت ءُ ریاست ءِ بے پروائی ءِ ھلاپ ءَ دھرنا زھرشانی کت۔ اے دھرنا ءَ زالبول، پیر، ورنا، نودربر، انسانی ھکانی جھدکار، ءُ لس مردماں بھر زرتگ ءُ اے گپ ءِ پدر کنگ ءَ کہ غنی بلوچ ءِ بیگواھی ایوک ءَ یک ھاندانگ ءِ ھم نہ اِنت، بلکیں سرجمیں چاگرد ءِ مچانکی رنج ءُ گم اِنت۔
نندانک ءِ وھد ءَ اسسٹنٹ کمشنر نوشکی ءَ یک رندے پد ءَ کھول ءَ گوں گند ءُ نند کتگ ءُ دزبندی کتگ کہ روڈ بندی ھلاس کنگ بہ بیت۔ ما یک مسامے ءِ رد ءَ دھرنا ھلاس کت۔ دومی روچ ءَ دمگدار ءِ گوما دگہ سرجمی ءَ دیوان کنگ بوت کہ ایشی ءِ تہ ءَ واکداراں دلجمی دات کہ اے جیڑہ ءَ جوانیں گامگیج زیرگ بوھگ ءَ انت۔ اے کیس ءِ گوشدارگ دو روچ ءَ پد جے آئی ٹی ءَ بیت ۔ دومی نیمگ ءَ ھزدار ءِانتزامیہ ، ھمگرنچیں واکدار ءُ مھکمہ داکلہ ءَ گوں ھال ءُ اھوال کنگ ءَ زوت غنی بلوچ ءِ ھست ءُ جاور ءِ بابت ءَ ھاندان سرپد کنگ بیت۔ بلے نوشکی ءِ دمگدار ءَ ھوار ھچ وڑیں ادارہ ءِ نیمگ ءَ رھوت نہ بوتگ۔
ما گمان کنیں کہ اے جیڑہ ءِ تہ ءَ دیر کنگ، دیر کنگ ءُ بے تواری گیشتر گران کنگ ءَ انت۔ ما گوں ھچ ناجائزیں لوٹ ءَ دیم ءَ نہ اتکگ ایں، مئے لوٹ ایوک ءَ ایش اِنت کہ اگاں عبدالغنی بلوچ ءِ سر ءَ ھرچ وڑیں بھتامے ھست گُڑا آمیدگس ءَ پیش کنگ بہ بیت، اگاں ناں زوت یلہ کنگ بہ بیت۔ ما چہ ریاستی ادارہ، ھکومت، آمیدگس ءُ انسانی ھکانی درستیں ادارجاں دزبندی کنیں کہ آ انسانی، شرپ ءُ آئینی بنیادانی سر ءَ اے جیڑہ ءِ تہ ءَ زوتیں کردے پیلو بہ کن انت۔