دروت ءُ درھبات ئے
نبشتہ کار: سلطان محمود
دی بلوچستان پوسٹ
منی ھم پگر ءُ ھم لیکھیں ھمبلو امید اِنت،تو وش ءُ جوڑ بہ بئے۔چہ ھاوند ءَ درا تئی وشی ءِ لوٹوکاں مدامی وشیانی منگیراں بات ئے، زیکیں روچ ءَ تئی نمدی یے اتک ءُ من ءَ سر بوت دل ءَ گرکے جت ءُ وشی بوت کہ تو وتی وشی ءِ ھال دات ۔آ زیکیں بیگاہ ءَ وھدے تئی نمدی پہ من سر بوت من سپرے ءَ اتاں ۔ وانگ وَ بوت بلے آ وھداں تئی نمدی پسو کنگ نہ بوت ھمیش اِنت کلھے بیت پہ گیگ جاگھے سر بوتگاں تئی نمدی دو وار ونتگ۔ منی نیمگ ءَ دگہ دراھی اِنت۔دگہ اد ءِ جاور ءُ چاگرد ءَ تو وت زان ئے کہ مردم چتور اِنت۔اے ساھت ءَ کہ من تئی نِمدی ءِ پسّو ءَ نویسگ ءَ آں ۔ منی تھنائی انت کہ منی پجیگ ءَ تھنا اِنت۔ گوں دیوار ءَ تِکّہ داتگ من ءُ اوتاگ دو پہ دوئیں ۔ بس منی چمانی دیم ءَ لھتیں شھیدانی اَکس اَنت کہ دیوال ءَ وتی دلبند ءَ جاگہ اش داتگ اَنت ۔ مئے راج زرمبشت ءِ مانزمان ءُ نشون ءُ سکین اَنت۔ ھمے شھیدانی کربانی اِنت کہ بلوچ ءَ را بلوچستان سما بوھگ ءَ اِنت۔ ھرچ بلوچ زانت کہ پہ بلوچ ءَ یکیں کشک منتگ پہ وتی آکبت ءُ پدریچ ءَ کربان بوھگی اِنت ءُ دژمن بے سوب کنگی اِنت۔ آؤکیں پدریچ ءِ پہ شان ءُ مَڑاہ زند ءَ گوازینت بہ کنت۔
ھیر نوں کایاں تئی ھبرانی ءُ جستانی نیمگ ءَ کہ پروم ءِ جاورھال چون اَنت ۔لھتیں ماہ اِنت ماں رسانکدر ءَ ھال اِنت کہ دژمن روچ پہ روچ میتگ ءُ شھراں مان رچان ءُ زرواکی کنان اِنت۔ انچوش تو ھبر کتگ اَت اے آوار جنگ ءُ بیگواہ کنگ وَ مروچیگیں جاورے نہ اِنت۔ بلے ھو دژمن ءِ زور نوں گیش ودّان اِنت ھمینچو کہ جنگی کارانی توک ءَ گیشی آیان اِنت۔ دژمن اوں وتی کست ءَ لس بلوچ ءِ سر ءَ کشّان اِنت ۔ انچوش کہ تو جست کتگ اَت واجہ ارزمھمد ءِ زھگانی شھیدی؛ سیمسر بزاں باڈر،اسٹیکر، کار ءُ بار چون اَنت ۔
کامریڈ تئی انچیں دراجیں جُستے کہ مردم ءَ مان گیشین ایت چہ کجا بنا بکناں تو یکیں کاگد ءَ اینچو جست یگپارگی کنگ ءَ ئے۔جنگ ءُ دژمن وَ ھرجاہ اِنت۔بلے لھتیں ھند ءُ دمگانی جاورھال ءُ مردمانی تب ءِ جتائی ھست اِنت۔ھمے وڑ ءَ پروم اِنت۔
پروم ءِ جاور چہ ایندگہ ھند ءُ دمگانی جاوراں چہ کمے جِتا انت تو بائدیں مہ گُشتیں کہ اسٹیکر ءُ کار ءُ بار تو بُگشتیں لجبریں اسٹیکر ءِ؛ دھندہ چون اِنت گُڑا بِہ گندئے جُست ءِ تہ ءَ سنگینی اتکگ اَت۔ اگاں جُستانی پَسہ ءَ بدئے یاں۔بوت کنت بازیں مردمے وش نہ بیت چیاکہ آ زانگ ءَ نہ انت۔ اسٹیکر ءِ پُشدر چی اِنت ءُ دیم ءَ چے بیت اگاں مہ دیاں بَکول واجہ اھمد ئیگ ءَ منی چِنگ نہ منّ ایت کہ اے رنگیں سل کاریاں چمّ ءِ وت بہ گنداں وت ءَ را چیپاں مور بکناں۔ مردم ءَ مردم ءِ زرد ملامت کنت آؤکیں وھد ءِ دیم ءَ مردم میاریگ بیت گُڑا شرتر ھمیش اِنت مردم پَسہ ءَ بِہ دنت،دانکہ وتی سر ءَ گپے مئیل ایت ۔پہ بانداتے زُبان ءُ گوشاں چوں مہ گوش انت کہ زار پہ ھما گوستگیں مردماں بات کہ ھچ نہ کرت اش ءُ مِرگ ءَ ھم مرت اَنت۔
کامریڈ اے گپے کہ یگربیں اسٹیکر پہ بلوچ ءَ رِسکے نہ بوت اے بدنامیں دھندایے بوت ۔اے اسٹیکر ءِ پُشت ءَ انچیں سِلکاری بوھگ ءَ اِنت۔کہ آ گپ کنگ نہ بنت ۔کامریڈ گپ کمے دگہ وڑ اِنت لھتیں جاھاں اسٹیکر مئے دودمان ءِ بھر جوڑ بوتگ مروچاں اگاں مردم سانگ ءُ گواجارے ءَ بُہ روت گُڑا آئی ءِ زات ءُ زریات زانت ءُ زانگ نشہ اِیندگہ سِلکاری چارگ ءُ ٹپاسگ نہ بیت بلے جزماں اے جُست الم بیت کہ اسٹیکر ءُ زمبادے ھست یا ناں ، اے دوئیں چیز الم جُست کنگ بنت۔ اے لجبریں اسٹیکر ءَ ھرچی روا کرتگ کامریڈ گپے زانئے پوج ءُ دلارانی کمائی ءِ وسیلگ اسٹیکر جوڑ بوتگ جھدکارے ءِ نُکسان دیگ ءِ گپ بیت گُڑا اسٹیکر ءِ مسام کنگ بیت کہ برو پَلان مردم ءَ بِجن پِلان سرمچار ءِ براس ءَ یاکہ سرمچارے ءِ لوگی مردمے بہ جن ءُ پِلاں سنگت ءِ لوگ ءِ مردمانی سر ءَ وتی نزر ءَ ایر بکن پہ تو ٹرپ ءُ اسٹیکرے کول ءُ کرار بیت بلوچ ءِ کوش ءِ نھاد چہ سرکار ءِ نیمگ ءَ لجبریں اسٹیکرے بندگ بیت۔ اگاں ایپ سی ءِ کیمپ ءِ راشن ءِ یا دگہ کارے پوج ءَ کنگی بہ بیت ۔گُڑا آرا ٹرپ دیگ بیت انچیں جاورے ودی کنگ بوتگ ءُ بوھگ ءَ انت۔ انچیں گونڈلیں زھگ انت کہ آ ھانی وانگ ءِ وھد انت پد ءَ ھمیشان ءَ دلاری ءِ نیمگ ءَ ھمیشانی پِس ءُ مستریں براس راہ دیگ ءَ اَنت نوں تو بہ گْوش کامریڈ اے گونڈلیں زھگانی آکبت چے بیت ۔بژن ءِ گپ ایش اِنت ھما مردمانی پِس یاکہ ناکو پوج ءَ کُشتگ اَنت بزاں شھید کرتگ اَنت۔ پد ءَ ھمے کُٹمانی مردم اے کاراں پہ ھُب کنگ ءَ انت ۔ انچو لباں پہ وت برتگ اَنت۔ مرچی اگاں پوج در نئیت چہ وتی کیمپ ءَ آر ءَ ھمے نیست ءُ نپٹیں اسٹیکر ءُ ٹرپ ءِ ھَوس ءَ آسودگ کرتگ ۔لھتیں انچیں گپ انت آ کنگی نہ انت۔
تو گوشتگ ات۔ کماش آرز مھمد چونیں مردمے کہ یکیں ماہ ءَ واجہ ءِ دو زھگ شھید کنگ بیت ۔واجہ ازرمھمد ءِ مستریں میار آئی گھمردی ءُ میارجلی اِنت۔ واجہ پھکیں بلوچے تو زان ئے کہ دودانی آھنیں پل ھمے پیمیں بلوچ اَنت کہ وتی بلوچی اش داشتگ ۔ انچوش کماش ارزمھمد اِنت۔
واجہ مروچی ئیں مردمے نہ اِنت؟ کہ دژمن ءِ چمّان اِنت۔کماش ارزمھمد ءِ جند ءَ اوں یکبرے چہ آئی ھنکین ءَ آوار جنت۔ آ وھد ءَ کماش ءِ ھنکین کوہ ءَ بیت۔دژمن ءُ دژمن ءِ چاریگ آرا آوار جن انت ءُ بیھار دینت۔کماش وتی ھنکین ءَ چہ لڈ ءُ بار کنت گُڑا کوچگ ءَ کئیت ءُ ھمدا گوں وتی اوباداں شریکی کنت۔
من واجہ ارزمھمد اول براں کوہ ءَ دیستگ اَت۔ چہ مئے کوہ ءِ مالداریں کماشاں اولی مردم اَت کہ من دیستگ اَت کہ زرنگ اَت۔ دوست ءُ دژمن ءِ پرک ءُ پیرے ھست اَت۔ وژگپ ءُ دیوانداریں مردمے ۔ ما کوہ ءَ نوک اوتاگ ءُ بنجل کرتگ اَت۔کماش ءِ نیمگ ءَ ھرچ سنگت ءِ سر کپت مزن تاں کسان درست چہ کماش ءَ رازیگ ات اَنت۔ کماش پہ وتی گریبی جاہ ءَ پہ سنگتاں باز جپاکشی کتگ۔ چو اے بتل ءَ براسے گوں براس ءَ کینگ دار بیت توک ءَ دژمنیں مرد ءِ شکار بیت پہ کماش ارزمھمد ءَ ھمے نوبت بوت اَنت۔ واجہ ءِ میارداری پہ کوہ ءِ آ دگہ مالداراں چو شومکیں ریش ءَ ردان اَت۔ وھدے ھال ماں دژمن ءِ گوشاں گپت کہ ارزمھمد ءِ دروازگ پہ ھرچ بلوچ ءَ پچّ اِنت۔ بوت کنت پہ سرمچاراں کمک ءُ سپارتے ،سرمچارانی کمکّارے ۔دژمن وَ لوٹ ایت کہ آ پہ مئے سنگتاں پچیں در مئیل ایت۔
چو ماہ ءُ سال وَ من ءَ شری ءَ یات نہ بنت ۔بلے سال 2016 اَت کہ پوچ ءَ لشکرکشّی کت ءُ کماش ءِ ھنکین ءَ بیڑبرت ءُ کماش چست کت ءُ برت ۔چندے روچ ءَ پد یل ئِی کت۔ واجہ ءَ وتی مال ءُ رمگ ءَ یل دات انت ءُ اتک کوچک ءَ گوں زھگاں بزگری ءُ شریکی بنا کت۔ بلے واجہ ارزمھمد یک سوھوئیں بلوچے آئی ءَ وتی بلوچی کوہ ءَ یل نہ کت ءُ نہ یتک کوچک ءَ آباد نہ بوت آرا وتی بلوچی ھمدا ھم گون اَت۔ پمیشکا دژمن ءَ پہ کماش ءِ رندگیری ءَ وش نہ یتک ءُ دلارانی رمبے چاریگ کت دلاراں پہ وتی دوزھیں لاپ ءَ دژمن ءِ کِرّا وت ءَ چرپ ءُ چانگال کنگ ءَ پہ اے وَ بلاھیں ھیلھے لیکھ ات کہ یکے وَ واجہ ازرمھمد ءِ پیشیگیں اھوال شری ءَ پوج ءِ کِرّا ھست اَت کہ پوج ءَ وت پہ لڈ ءُ بار ءَ لاچار کتگ اَت۔ ایشان ءَ وتی لاپ چارینگی اَت ۔ پمیشا اشاں واجہ ءِ بچّانی سودا گوں دژمن ءَ جت۔ پد ءَ آیانی گورا مستریں نیمون ایش اَت کہ واجہ ازرمھمد ءِ یک بچّے گوں بلوچ سرمچاران اِنت۔سرمچارے ۔ سرکار ءَ پہ ایندگرانی دلاں وتی بیم ءُ ترس ءِ نادینگ ءَ کماش ءِ ھر دوئیں بچّ شھید کت اَنت۔کہ آ دگہ بلوچ چہ ما بہ ترس اَنت۔ بلوچ مئے چیردست بہ بیت بلوچ کہ وتی آجوئی ءَ پہ جنگ کنگ ءَ اِنت۔اے توار ءَ ما ھلاس بہ کن ایں۔بلوچستان مئے چیردست بہ بیت ءُ ما بلوچ ءَ بےوس ءُ بزّگ بہ کن ایں۔
ھیر کامریڈ واجہ ارزمھمد پہ بلوچ جھد ءَ یک مزنیں کارستے آرا من مدام مھکمی ءَ دیستگ ۔ اے نمدی ءَ چد ءُ گیش ھبر کنگ نہ بیت۔ اگاں وھد بوت گُڑا دگہ برے ترا پہ واجہ ازرمھمد ءُ وتی دمگ ءِ جاورانی بابت ءَ سرپدی دیاں.
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
