پشتون تھپز موومنٹ ءِ سروک منظور پشتین ءَ پختونخوا ءِ جتا جتائیں دمگاں گوستگیں روچاں پوجی کاروائیانی آسر ءَ بازیں پشتون شھریانی کوش ءُ ٹپی بوھگ ءِ سر ءَ سکیں دلپدردی ءُ زھر ءِ درشانی کتگ۔
منظور پشتین ءَ گشتگ کہ خیبر ءِ تیرہ ءُ کرم ءَ ھوار جتا جتائیں دمگاں لس مردم پوجی کارروائیاں نشانگ جوڑ کنگ بوتگ انت۔ کرم ءِ مردم اے وھد ءَ پشاور ءَ پوجی آپریشن ءِ ھلاپ ءَ زھرشانی کنگ ءَ اَنت بلے آھانی توار سرکار ءُ ریاستی ادارھاں سر نہ بوھگ ءَ اِنت۔ زھرشانی کنوکیں مردمانی گْوشگ اِنت کہ اے کارروائی دراسل پشتون آبادی ءِ سرین پروش کنگ ءُ آیانی مڈیاں زور پچگرگ ءِ یک مزنین پالیسی یے ءِ بھر اِنت۔
بیان ءِ تہ ءَ گْوشگ بیتگ کہ ریاست ءِ تہ ءَ انچیں مزنیں اگدھانی سر ءَ نشتگیں پشتون افسر کہ راج ءِ نمائندگی کنگ ءِ ٹاپار جَن اَنت آ اسل ءَ واکدارانی چیر دستی ءَ اَنت ءُ پشتون راج ءِ یکیں جیڑھے ءَ وتی وس ءَ گیش ءُ گیوار کنگ ءِ توان ءَ نہ دار اَنت۔
دیمترا گْوشگ بیتگ کہ یک نیمگے بُرزیں پشتون دمگانی نندوک پہ زور چہ وتی لوگاں درکنگ بیگ ءَ اَنت ءُ دومی نیمگ ءَ تورھم ءِ سیمسر ءِ بند کنگ ءَ آھانی سر ءَ دو رند ءَ زلم ءُ زوراکی کنگ بیگ ءَ اِنت۔ ھزاراں مردم شپ ءُ روچ سرپچیں آزمان ءِ چیر ءَ مشکلاتانی آماچ انت ءُ ریاستی ادارہ اے انسانی دردناکی ءَ بے تواریں تماشائی انت۔
آئی ءَ گوشت کہ انسانی ھزمت ءِ جزبگ ءَ چہ جتاجتائیں ادارگانی کارندھاں آماچیں دمگانی تہ ءَ میڈیکل کیمپ ءُ کمکی مراگش جوڑ کتگ بیتگ انت بلے ریاستی زور ءِ سبب ءَ آ ھم بند کنگ بوتگ انت۔ اے گپ ءَ باوجود کارگراں گوں راج ءِ کمک ءَ وتی کار برجاہ داشتگ اَنت۔
آئی ءَ گوشت کہ رپورٹس ءِ رد ءَ زرباری وزیرستان (سر ویکی، لدھا، اعظم ورسک) ءُ گوریچانی وزیرستان (میران شاہ، میر علی، خدری، ممند خیل، بنو، جانی پشا خیل، دگہ، حسن خیل) ءَ شھری بیرانیانی تہ ءَ گیشی بوتگ۔
بیان ءِ تہ ءَ گوشگ بوت کہ اے درستیں کار یک زانت ءُ سرپدیں رنگے ءَ کنگ بوھگ ءَ انت تانکہ دمگ ءَ جاور ناگیگ بہ بنت-
پریس ریلیز ءِ تہ ءَ گوشگ بیتگ کہ سرکاری ادارہ وت ”پھریزی“ ءُ ”ناشرکاری ءِ ھلاپ ءَ کارروائی“ ءِ نام ءَ زوراکی ءَ را دیم ءَ برگ ءَ اَنت ءُ پد ءَ اے کارروائیانی سبب ءَ پشتون راج ءِ ابرمی مڈیانی سر ءَ زونڈاں جنگ ءُ لُٹماری کنگ ءَ انت-
بیان ءِ تہ ءَ گیش گْوشگ بیتگ کہ سرکاری رسانکدر ءُ لھتے پشتون دھشت ھم پنجاب دوستیں پندلانی گیش کنگ ءِ واستا کارمرد کنگ بیتگ اَنت دانکہ پشتونانہ تہ ءَ ایرادگری پیداک کنگ ءُ یکجھتی ءَ را تاوان بہ دنت۔
گُڈسر ءَ چہ درستیں باسک ءُ راج ءَ دزبندی کنگ بوتگ کہ آ اے زلم ءُ زوراکیانی ھلاپ ءَ وتی توار ءَ چست بہ کن اَنت ءُ برجاھیں زھرشانیانی تہ ءَ سرجمی ءَ بھر بہ زور اَنت ءُ وتی برات ءُ گوھاراں کہ زوراکیانی رکینگ ءَ جھد بہ کن انت- ھرچ وڑیں کمک ءَ بہ کن اَنت۔ ھمے وھد ءَ گلی ءُ راجمانی تک ءَ یکجھتی ، رھبند ءُ ھزمت ءِ جذبگ ءَ را گیش مھکم کنگ ءِ سر ءَ زور دیگ بوتگ ۔
