بلوچ راج ءِ ھر تکاں بندوکیں ورنایاں زانشتی تک ءَ باسماکنان ءَ یکمُشت کنگ ءُ تپاکی ءَ گوں جُنزگ ءِ سکین ءَ دئیں ۔ ازیر بلوچ
بلوچ نودربر گل بساک ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچ اسٹوڈنٹس ایکشن کمیٹی ءِ چارمی بنجاھی لس مجلس گوستگیں روچ ءَ ماں کیچ ءَ سوبمندی ءَ گوں برجم دارگ بوتگ۔ اُزیر بلوچ بنجاھی سرکماش ءُ پیرجان بلوچ بنجاھی مزن کارگُشاد گچین کنگ بوتگ اَنت۔
جارکش ءَ گوشتگ کہ بلوچ اسٹوڈنٹس ایکشن کمیٹی ءِ چارمی بنجاھی لس مجلس “ عطاشاد ءُ آزات جمالدینی یات ءَ، ءُ دلیریں بلوچ زالبولانی ” نام ءَ گوستگیں کماش شبیر بلوچ ءِ سروکی ءَ ماں کیچ ءَ برجم دارگ بوتگ۔ مجلس ءِ دو روچی بند کمرہ دیوان ءَ جتاجتائیں بُنگپ ھوار بیتگ اَنت ءُ گُڈی بن گپ آوکیں گامگیج ءُ گچین کاری ءَ اُزیر بلوچ بنجاھی سرکماش ءُ پیرجان بلوچ بنجاھی مزن کارگُشاد گچین کنگ بوتگ انت۔ مجلس ءِ سوگندی دیوان سرکٹ ھاؤس ھال، کیچ ءَ برجم دارگ بوتگ ۔
بنجاھی جارکش ءَ گوشتگ کہ بلوچ اسٹوڈنٹس ایکشن کمیٹی ءِ چارمی بنجائی لس مجلس ءِ سوگندی دیوان ءِ تہ ءَ جتاجتائیں بن گپ ھوار بوتگ اَنت کہ آوانی تہ ءَ گُشتانک، کتاب دیمدرائی، ڈاکومینٹری، کتاب میڑہ ءُ ساز ءُ زیملی دیوان ھوار بوتگ اَنت۔ دیوان ءَ گل ءِ ھستیں کماش ءَ ھوار گوستگیں بنجاھی کماش، گوستگیں مزن کارگشاد ءُ ایدگہ مھمان واجہ غنی پرواز، عصا ظفر،گلزار دوست، ڈاکٹر شلی بلوچ ءُ سنگت علی جان مقصود ءَ ھوار بلوچ نودربر ءُ مھلوک ءِ مزنیں کچے ءَ بھر زُرتگ ءُ ساڑی بوتگ انت ۔
جارکش ءَ گوشتگ کہ دیوان ءِ بندات گوں بلوچ راجی سوت ءَ کنگ بوتگ۔ آئی ءَ چہ پد گوستگیں کماش شبیر بلوچ ءَ نوک گچین بوتگیں بنجاھی کماش اُزیر بلوچ، کمک کماش علی بلوچ، بنجاھی مزن کارگشاد پیرجان بلوچ، کمک کارگشاد تنویر بلوچ ءُ بنجاھی ھالرسانی کارگشاد فھد بلوچ ءَ ھوار کلیں بنجاھی کمیٹی ءِ سنگت سوگند داتگ اَنت۔ دیمتری بن گپ گُشتانک اِت انت کہ اولی تران گوستگیں بنجاھی کماش شبیر بلوچ ءَ کتگ ۔
شبیر بلوچ ءَ تران کنان ءَ گوشتگ کہ بنجاھی لس مجلس ایوک ءَ لیڈرشپ ءِ مٹ بوگ ءِ نام نہ انت بلکیں بلوچ سیاست ءِ تہ ءَ نوکیت ءُ نوکیں پروگرامانی دیم ءَ آرگ ءَ آوار یک مھکمیں سیاسی کیڈرسازی ءِ بستار ءَ آؤکیں یک توانگر ءُ لائکیں نسلے ءِ پیداگ کنگ ءِ واستا پیسلہ سازی ءِ نام اِنت۔
جارکش ءَ گوشتگ کہ دومی تران واجہ غنی پرواز کتگ آئی ءَ واجہ عطاشاد ءُ آزات جمالدینی ءِ سر ءَ تران کرتگ ءُ وتی دانک ایر کرتگ اَنت، دیمتر ءَ واجہ عصا ظفر ءَ بلوچ سیاست ءُ بلوچ نودربر سیاست ءِ نزوری ءُ مھکمی ءِ سر ءَ وتی ھیال درشان کرتگ اَنت ءُ آوکیں لیڈرشپ ءَ مھکمیں ءُ دورچاریں سیاست ءِ کنگ ءِ سکین داتگ۔ آئی ءَ پد بلوچ وویمن فورم ءِ آرگنائیزر ڈاکٹر شلی ءَ کرتگ ءُ دلیریں بلوچ زالبولانی سر ءَ وتی گپ ءُ ھیال درشان کرتگ اَنت ءُ گوشتگ کہ اے دور ءَ بساک ءِ بلوچ زالبولیں جھدکارانی نام ءَ وتی بنجاھی لس مجلس ءِ ایر کنگ بلوچ زالبولانی یکشلیں جھد ءِ ستا کنگ ءَ ھوار آیانی کِرد ءَ سیاسی تک ءَ ھوار کنگ ءُ ھواری ءَ جُنزگ ءِ چیدگ اِنت۔
جارکش ءَ گوشتگ کہ گڈی تران نوکیں بنجاھی کماش اُزیر بلوچ کتگ آئی ءَ وتی ھیال ایر کرت انت ءُ گوشتگ کہ مروچیگیں اے دیوان ءِ سوبمندی مئے سنگتانی یکشلیں جھد ءِ برورد اِنت کہ ما مروچی وتی سوگندی دیوان ءَ بلوچستان ءِ جتائیں ھنداں اتکگیں سنگتانی ماں کیچ ءِ دلبند ءَ ساڑی بوگ ءَ گوں کنگ ءَ ایں۔ کیچ ءِ دمگ فِدا ءِ کِشتگیں توم اِنت کہ مرچی آ رُستگ ءُ شاہ جتگے ءُ برئِے اے دیوان ءِ نشتگیں لائکیں سیاسی جھدکار اَنت۔ بگندئے بازیں مردمے ھمے گش ایت کہ بلوچ تپاک نہ انت بلئے من سرپد باں کہ اے ردیں ھیالے چیاکہ بلوچستان ءِ انتظامی ھوالہ ءَ جتاجتائیں ھند ءُ دمگاں چہ سنگتانی آیگ ءُ کیچ ءِ دلبند ءَ ساڑی بوگ مستریں تپاکی ءِ چیدگ اِنت۔ ما کہ سوگند وارتگ ءُ ادارہ ءُ راج ءَ گوں ایماندار ءُ بلوچ ورنایانی زانشتی ھوالہ ءَ پِگری رھشونی کنگ ءِ پیمان کُتگ گڑا اے داں گُڈی مکسد ءَ سر بیگ ءَ روان بیت۔
جارکش ءَ گوشتگ کہ دیمتری بن گپ دو ڈاکومینٹری بوتگ اَنت کہ یکے بلوچ لبزانک ءِ نامداریں شاعر واجہ عطاء شاد ءِ زند ءُ ازم ءِ سر ءَ بوتگ ءُ دومی ڈاکمینٹری بلوچی شاعر واجہ عبدالواحد آزات جمالدینی ءِ سرءَ بوتگ۔ ھمے پیم سئے کتاب کہ آئی تہ ءَ گل ءِ نیمگ ءَ چہ چاپ بوتگیں تاک “گام” گل ءِ تاک “نوشت” ءُ گل ءِ سنگت جعفر قمبرانی ءِ براہوئی بولی ءِ تہ ءَ کتاب “بلوچستان نا مڈیک” ءِ دیمدرائی بوتگ ءُ گڈ سر ءَ کتابی سوگات ءِ یک بھرے ھم آوار بوتگ۔
بنجاھی جارکش ءَ گوشتگ کہ چہ کُلیں بن گپاں پد گڈی بن گپ ساز ءُ زیملی بھر بوتگ کہ جتائیں گشندھاں گوں وتی توار ءَ دیوان زیبدار کرتگ ءُ دیوان آسر کنگ بوتگ۔
بساک ءِ بنجاھی سرکماش ازیر بلوچ ءَ اگدہ ءِ زورگ ءَ پد چاگردی ترامجاھاں گوشتگ کہ بلوچ اسٹوڈنٹس ایکشن کمیٹی بلوچ نودربر سیاست ءِ مستریں سرفیس پتر بلوچ اسٹوڈنٹس ایکشن کمیٹی ءِ بنجاھی کماش گچین بیگ پہ من پھر ءُ شانے، بلے دو ھمنچو منی سر ءَ مزنیں راجی زمہ واری یے۔ اے ھما تمرد ءُ دلیریں جھدکارانی ھاٹیگ اِنت کہ مارا اے مزنیں زمہ واری ءِ زیرگ ءَ سکین دئینت۔ ھما ورنائیں جہدکار ءُ سنگت کہ وتی شپ ءُ روچاں یک کنان ءَ پرے شھر ءُ پراں شھر اَنت، برے کتابانی دروشم ءَ زانشت ءَ تالان کنان ءَ جھد کنگ ءَ اَنت ءُ برے ورنا ءُ زھگاں سیاسی سِنچ دیگ ءَ پہ میتگ پہ میتگ اَنت۔
آئی ءَ گوشتگ کہ ادارہ ءِ جھدکار ءُ سنگتاں کہ مئے وڈیں ورنایانی سر ءَ اِنچو سِتک کتگ ءُ وتی رھشون گچین کتگ، اے شرپ وتی جاہ ءَ بلے ما اشی ءَ مزنیں راجی زمہ واری یے سرپد بیں ءُ بلوچ ورنایاں سیاسی، زانشتی ءُ سائنسی پِڑاں پِگری ھوالہ ءَ رھشونی کنان ءَ آیانی سیاسی ھکانی پھازگ ءُ راجی جوڈشت ءِ سپر ءَ پِگری ھوالہ ءَ ھوار گیجگ ءِ جھد ءَ کنیں۔ بلوچ ورنایاں چاگردی ھمک سِلکاریاں چہ کشگ ءُ آیانی دست ءَ نَد ءُ کتاب دیگ ءِ جھد کنیں دانکہ زانشت ءِ کندیل بہ بلیت ءُ آتراپ ءَ رُژنائیں چاگردے ودی بہ بیت۔
ازیر بلوچ ءَ گوشتگ کہ ھمک سنگت ءِ کہ مئے سر ءَ اوست ءُ امیت بندوک اَنت ءُ پہ مِہر مراد باتی دیگ ءَ اَنت، منتواری وتی جاہ ءَ گوں کُلیں ھمبلاں لوٹ اِنت کہ اے سپر ءَ مُدام مئے ھمراہ بہ بہ اِت ءُ ہمے داب ءَ راجی جھد ءَ وتی بھرشت ءَ بہ دیے اِت۔ ما یک راجے ایں ءُ راج ءِ جتائیں تبک ءُ پِڑاں گوں بندوکیں مردم بنت، وھدیکہ اے کُل یکجاہ یک ءُ دومی ءِ دست ماں دست بنت ءُ یک ءُ دومی ءِ دوزواہ بنت گڑا یک کاملیں راجے جوڈ بیت۔ من گوں نوک گچین بیتگیں سنگتاں جھد کناں کہ بلوچ راج ءِ جتائیں ورنا کہ جتائیں پِڑاں گوں بندوک اَنت آیاں زانشتی تک ءَ باسماکنان ءَ یکمُشت کنگ ءُ تپاکی ءَ گوں جُنزگ ءِ سکین ءَ بہ دیاں۔
