بلوچستان ءِ بُنجاھی شھر شال ءَ نُھ مھرم الھرام ءِ درگت ءَ موباھل پون نیٹ ورک ءُ انٹرنیٹ سروس اداروکی بند کتگ اَنت-
دمگی اِھوالکار رِد ءَ شھر ءَ سُھب نُھ ءَ پد چہ جتاجتائیں موباھل نیٹ ورک دیوکیں شرکتانی بند بیگ بندات بیتگ، چریشی ءَ پد موباھل ڈیٹا ءُ انٹرنیٹ ءِ آسراتی ھم نیست اِنت-
دمگی انتزامیہ ءِ گوشگ اِنت کہ اے گامگیج مھرم الھرام ءِ مُچی ءُ مراگشانی میان ءَ ایمنی ءِ جاورھالاں گر ءُ دار ھاتر ءَ کنگ بیتگ، واکدار رِد ءَ سروسز بیگاہ ءَ تاں پچ کنگ بنت-
ھدا رھم پھل کن
نبشتہ کار: جیھند سادک
دی بلوچستان پوسٹ
ھدا رھم من ءَ بکش ءُ پھل کن کہ ترا بدیں ھالے دیگ ءَ آں تئی میتگ ءِ نامی ئیں پُٹبالر ءُ بلوچ یکجھتی کمیٹی ءِ تمرد ءُ نہ ترسیں ورنا ماتی مھرنگ ءِ کوپگ شھید زیشان زھیر چیریں ادارھانی دست ءَ بیگواہ بیگ ءَ پد شھید کنگ بیت کہ آئی ءِ ”شھید ابنِ گمشدہ“ ءِ نام دیگ بیت۔
ھدا رھم ءِ ھمکار بنگالی یے اَت۔گڑا من جست کتگ اَت چون اِنت گوں تو ،گش اِیت شر اِنت ، آئی ءِ ھمے نزوریں شر ءَ گوں من زانتگ اَت مئے ھدا رھم چینچو تکلیپ ءُ رنج ءُ مونجائی تہ ءَ وتی وھد ءَ تیلینگ ءَ اِنت۔ روزر ءَ تشے پیش ھدا رھم ءِ کرپانیں کوٹی ءَ لین رو اَنت داں شپ ءِ ساھت یک ءُ نیم ءَ،اے شپ ھدا رھم ءَ چینچو گوں دلسْیائی گوازینتگ اَت من تھنا تشے سما کت کناں، پرچاکہ آئی ءِ ھمکار وتی ھم کومی ئیں برات ءُ سنگتانی گْور ءَ روت بلے ھدا رھم ءِ نزیک ءَ ھچ بلوچ نیست اَت نیکہ ھدا رھم ءَ گوں ایندگہ دری زبان ءُ دری کومے ءَ گوں وتی سنگتی داشتگ اَت۔وت اَت تھنا اَت، تھار ءُ ناھاریں شپ اَت کوھنیں پرشتگیں کوٹی یے اَت بلے تشے آسودگ اَت۔اے شپی بازیں سنٹیگے ءَ ھدا رھم ءِ سر ءَ اُرش کتگ اَت گوشتگ اِت ئِے من سک بے واب آں۔ما داں وت ءَ سر کت ءُ آئی ءِ کوٹی ءِ لینانی کار بندات کت، تشے کار پہ ھمایاں پشت گیتکگ اَت آ ایش اَت کہ وتی کیبل ءَ وت کنڈ بکن اَنت بار بہ دے اَنت۔چوناھا من ھدا رھم ءَ گشتگ اَت انچو اشتاپ نہ اِنت برو وپس باندا وھد کش اے کار ءَ بکن گش اِیت ناں سھب ءَ مئے واجکار مارا ایندگہ کاراں چیر کنت۔ آ دمان ءَ کہ ھدا رھم ءَ شش ءُ ھپت ٹیکُم ءِ جنگ ءَ پد زیت زیت ءَ ساہ زرت سک دم ئِے برتگ اَت گڑا من مارگ ءَ اتاں کہ ھدا رھم ءِ دل ءَ پہ وتی گونڈیں زھگاں چینچو دلسْیاھی مان چینچو مھر ءُ پہ وشیں بانداتے ءِ شوھازگ ءَ چینچو تکانسر اَت۔
من وھدیکہ وتی زبان ءَ گون ھدا رھم ءَ دروت درھبات کت گڑا من دیست گش ئے اے ساھت ءُ دمان ءَ آئی ءَ بھشت رس اِت سک گل بیت ھمینچو کہ ما ھردوکاں یکے ءُ دومی ءَ امبازاں نہ زرت ءُ گریت۔
ھدا رھم تو وھدیکہ ٹیکُم ءِ جنگ ءَ پد سک دمبرت ایمانداری منی زبان ءَ تھنا ھمے آتک کہ پہ اے راج ءَ وتواجھی جنگ المی اِنت ۔اگاں آ روچا جنگ ءِ لوٹ بہ بیت کہ من ءَ وت ءَ تراکینگی اِنت گڑا چہ اے نیکیں کار ءَ ھچ چک ءُ پد نہ باں۔
ھدا رھم نزاناں یار چون ءُ چے پیمیں نادراھی ءِ من ھردیں وتی مردماں وتی ھم زبان ءُ ھم کوماں دگے جاھے ءَ کہ گنداں چو بزگ ءُ بدھالی ءَ من ایوک ءَ گریواں نزاناں ترا باور کنت یا ناں، ءُ ھردیں کہ من ایشانی گْور ءَ در کپاں سک ابیتک ءُ ملور باں انچش باں گش ئے نی مراں۔من دراھیں سپر ءَ ھمے جیڑگ ءَ باں باریں اے مرد چون اِنت گوں وتی زندمان ءَ، باریں شات اِنت کہ گم اِنت۔باریں آئی ءَ وتی کار وتی جاگہ دوست بنت؟باریں آئی ءَ کار واجہ یا آئی ءِ ھمکار گون آئی ءَ شر اَنت؟پد ءَ گیشتر من اے چیز ءَ جیڑگ ءَ باں بہ گند ئے اے گونڈیں ساھت ءُ دمان ءَ کہ من گون آئی ءَ دپ کپتاں آ چینچو وشی مارگ ءَ اَت، نی ھمے من وتی راہ گپت آ داں باریں چینچو روچ یا چنت دمان ءُ ساھت پد ءَ ملور ابیتک ، تھنا ءُ پد ءَ تھنا۔پد ءَ تشے وت ءَ وت گونڈیں دمانے ءَ میار بار ھم کن اَنت کہ پرچا گوں ایشاں دپ کپتاں پرچا گوں ایشاں ڈیک وارت ،بہ گند ئے منی سوب ءَ ایشاں ملوری مانشان اِیت یا بہ گند ئے آ ھم تشے گمیگ بنت۔
ھدا رھم تو زان ئے مئے مردم چے ءَ اینچو کربانی دیگ ءَ اَنت؟پہ ھما ھاتر ءَ کہ دژمن ءُ دنیا ھردو بزان اَنت ھدا رھم ءُ آئی ءِ میتگ ءُ ملک ءِ مھلوک انچو یلہ نہ اِنت ایشاں ھم پُشت ھست۔ھدا رھم ھمے ھمت ءُ مزن مردی اِنت کہ مردمانی سبر ءُ توکل چو کوہ ءَ اِنت۔ ھدا رھم گڈسر ءَ یکبرے پدا پھل کن ترا بدیں ھالے دیگ ءَ آں تئی میتگ ءِ نامی ئیں پُٹبالر چہ مارا سِست ءُ جتا بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
کیچ ءِ دمگ ھوشاپ ءَ سلاہ بندیں مردماں مروچی شپ ءَ نوکتریں اھوالانی رد ءَ سی پیک روٹ بستگ ءُ کنٹرول وتی دست ءَ کتگ-
اھوالانی رد ءَ سی پیک روٹ ءَ سلاہ بنداں چیک پوائنٹس جتگ ءُ کنٹرول وتی دست ءَ کتگ-
اھوالانی رد ءَ گونڈسرین ءَ لیویز چیک پوسٹ ءِ دستیگ کنگ ءِ ھم اھوال انت –
اھوالانی رد ءَ دمگ ءَ پیشگامی کنوکیں پاکستانی پوج ءِ کاروان ھم نشانگ کتگ-
زانگ بہ بیت لھتے وھدانی میان ءَ سرجمیں بلوچستان ءَ بلوچ سلاہ بندانی نیمگ ءَ دگانی بندگ ءُ سرکاری ماڑیانی دستیگ کنگ ءُ لیویز پورسز ءُ پولیس ءِ سلاھانی پچگرگ ءِ ھواری ءَ بینکانی سوچگ برجاہ انت-
گوستگیں روچاں مستونگ ءَ سلاہ بنداں ھم شھر وتی کنٹرول ءَ کتگ ات ءُ شھر ءَ تھسیل ءِ دفتر ءُ سَے بینکانی ماندارگ ءِ ھواری ءَ گاڑی ھم سوتکگ ات انت ءُ اے اُرش ءِ زمہ واری بلوچ لبریشن آرمی ءَ زرتگ ات ءُ گوشتگ ات کہ مستونگ ءِ شھر ءَ دو اداراں وتی کنٹرول ءَ کتگ ءُ اود ءَ سرکاری ماڑی ءُ تھسیل سوتکگ ءُ سرکاری مال ءُ مڈی تاوان داتگ انت-
مروچی ھوشاپ ءَ کنٹرول کنگ ءِ زمہ واری انگت ءَ کس ءَ پہ وت نہ زرتگ-
بلوچ یکجھتی کمیٹی ءِ نیمگ ءَ چہ پنجگور ءَ زیشان زھیر ءِ درکانودی کوش، بلوچ چُکچینی تُرسناکی ءَ گیشی ءُ ریاستی زوراکی ءِ ھلاپ ءَ جمعہ ءِ روچ ءَ دالبندین ءَ سرجمی ءَ تھتگ بندیں ھڑتال کنگ بیتگ- اے درگت ءَ ارب مسیت ءَ چہ دالبندین پریس کلب ءَ تاں یک زھرشانی روانکے ھم کشگ بیتگ، چریشی ءَ شھریاں مزنیں کچے ءَ بھر زرتگ-
روانک ءَ چہ ساری پولیس ءِ مزنیں کچے ءَ شھر ءَ اوشتارینتگ اَنت دانکہ راجی مُچی ءَ ھلاس کُت بہ کن اَنت – زھرشانی کنوکاں پولیس ءِ اے کاروائی راج ءِ تُرسینگ ءِ جھد گوشگ بیتگ-
زھرشانی کنوکاں دالبندین پولیس تنکید کنان ءَ گْوشتگ کہ دمگی پولیس دروگیں ایف آئی آر ءِ سر ءَ دالبندین راج ءَ را تُرسینگ ءَ اِنت کابل منّگ نہ بیت-
آیاں گْوشتگ کہ بلوچ راج اے وھد ءَ راجدپترے بدریں چُکچینی ءِ دیمپانی کنگ ءَ اِنت، ءُ ریاست پاکستان بلوچ راجی زرمشبت ءُ پُرایمنیں زھرشانی ءِ لپاشگ ءِ واستا وڑ وڑیں پندل سازی کنگ ءَ اِنت- ریاست ءَ بلوچاں چہ شرپیں زند ءِ ھک پچ گپتگ ءُ نی آیانی پجّار سر ءَ جُست ءِ نشان ایر کنگ ءَ اِنت-
آیاں دیمتر ءَ گْوشتگ کہ کانود جوڑ کنوکیں ادارہ ھاسکار دالبندین پولیس، بلوچ راج سر ءَ بیوکیں زُلم ءُ زوراکی ریاست ءِ گوم ءَ برابری ءَ شریکدار اِنت-
زھرشانی گوں پُرایمنی ءَ آسر بیتگ، بلے زھرشانی کنوکاں جار جتگ کہ اگاں ریاستی زوراکی ءِ دْرچ بند کنگ نہ بیت گُڑا زھرشانی دراجکش کنگ بیت-
سی ٹی ڈی یک دھشتگردیں ادارھے ءُ بلوچ راج ءِ دژمنے منّگ بیت
نبشتہ کار : شکّل بلوچ
دی بلوچستان پوسٹ
سی ٹی ڈی ھشتگردیں ادارھے، ایشی ءِ جوڑ کنگ ءِ مستریں مول ءُ مراد بلوچستان ءَ بلوچ لس مھلوک ءِ آوار جنگ، بیگواہ کنگ ءِ کار ءَ کنگ ءَ اِنت ءُ بلوچ لس مھلوک ءَ چیروکائی آوار جنت ءُ پد ءَ دھشتگردی ءِ نام ءَ بلوچ لس مھلوکاں ٹارگٹ کنگ ءَ انت۔ اے دھشتگردیں ادارہ بلوچ راج ءِ دژمن اِنت چی ءَ کہ ایشی ءَ دیر اِنت بلوچستان ءِ جتائیں ھند ءُ دمگاں بلوچانی چست کنگ ءُ پد ءَ آیانی لاش ماں جنگل ءُ گیابان ءَ دز کپ اَنت۔
زانگ بہ بیت کیچ ءَ بالاچ مولابکش ءِ کوش ءَ چہ زانگ بوتگ کہ اے دھشتگردیں سی ٹی ڈی ءَ وتی راستیں اَمل پیشداشتگ اَت کہ کاؤنٹر ٹیریزم ءِ نام ءَ بلوچ راج ءِ چُکچینی ءَ گیش ءَ چہ گیش کنگ ءَ انت ءُ اے امل بلوچ راج شری ءِ سر ءَ سرپد ءُ پوہ بوتگ کہ سی ٹی ڈی یک دھشتگردیں اداراھے ءِ نام ءَ بلوچ ءِ چُکچینی ءَ لانگ ئِے بستگ بلے بلوچ لیبریشن آرمی ءَ وتی یک بیانے تہ ءَ تچک ءَ اے پدر کُتگ کہ اے ادارہ پہ بلوچ نسل کُشی ءَ جوڑ کُتگ ءُ آئی ءَ گیش گُشتگ کہ بلوچ لس مھلوک وت ءَ چہ سی ٹی ڈی ءِ وتگڑیں ادارہ ءَ وت ءَ دور بدار اِیت ءُ ھمنچو چہ اے دھشتگردیں ادارہ ءَ چہ وت ءَ دور بدار اِیت گھتر اِنت۔
سی ٹی ڈی یک وتگڑیں ءُ دھشتگردیں ادارھے ایشی ءِ مستریں مول بلوچ لس مھلوک ءِ نسل کُشی کنگ اِنت، چہ مھلوک ءَ ارز ایش اِنت کہ اے سی ٹی ڈی بدنام زمانگ ءِ دھشتگردیں ٹولی ھر کجا کہ گوں مُچی ءَ گندگ بوت انت گڑا وتی راجی لشکر ءَ ھال بدنت چی ءَ کہ بلوچ لیبریشن آرمی بلوچ راج ءِ راجی پوج اِنت آ کدی ھم نہ لوٹ اِیت کہ بلوچ راج ءِ نسل کُشی بہ بیت ءُ آئی ءِ رکینگ ءَ مدام جُھد بوتگ کہ بلوچ راج ءُ آئی ءِ زمین ءِ مال ءُ مڈی دری کبزہ گیر ءِ ھلاپ ءَ جُھد برجا انت۔
سی ٹی ڈی بلوچ راج ءِ نسل کُشی ءَ دیر اِنت کنگ ءَ اِنت ءُ ھر کجا کہ بلوچ نودربرے گھگیری کنگ ءَ بوتگ آئی ءَ نشانگ کُتگ بلوچ ءِ جُنز ءِ ھلاپ ءَ تچک ءَ بلوچیں دلار ھم ھوار اَنت ءُ شری ءِ سر ءَ زانگ ھم بنت کہ کَے کَے اے بدنام زمانگیں سی ٹی ڈی ءَ ھوار بلوچ ءِ نسل کُشی کنگ ءَ انت۔
ما گوں بلوچ راج ءَ دزبندی کنیں کہ اے دھشتگردیں ادارھے ءَ چہ وت ءَ زوت ءَ چہ زوت دور بدار انت اگاں چُش نہ بوت گڑا ما سرپد بَہ اِیں کہ آ ھم بلوچ نسل کُشی ءَ برابر شریدار اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
ذیشان ظھیر ءِ درکانودی کوش ءِ ھلاپ ءَ ھاران، نوشکی، چاگی، ڈالبندین، نوکنڈی ءَ ھرتال ءُ زھرشانی کنگ بوتگ۔
پنجگور ءَ بی وائی سی ءِ ھنکینی باسک ذیشان ظھیر ءِ درکانودی کوش ءِ بگیری ءَ بلوچ یکجھتی کمیٹی ءِ چیر دستی ءَ ماں سرجمیں بلوچستان ءَ زھرشانی ءُ سلوات ءُ دکانانی بند کنگ برجا۔
زھرشان کنوک بس ذیشان ظھیر ءِ کوش، زورانسری بیگواھی ءُ بی وائی سی رھشونانی یل نہ کنائینگ ءِ بگیری ءَ زھرشانی ریکارڈ کنگ بوگ ءَ انت، چمیشی ءَ چِہ بازیں کچے ءَ مھلوکاں بھر زُرتگ۔
گوستگیں روچ ءَ سے جولائی ءَ بلوچستان ءِ دمگ ھاران ءَ بلوچ یکجھتی کمیٹی ءِ گوانک ءَ ذیشان ظھیر ءِ درکانودی کوش ءِ بگیری ءَ زھرشانی ریلی یے کشّگ بوتگ کہ اود ءَ زھرشان کنوکاں ریاستی پالیسیانی ھلاپ ءَ اوگام جتگ ءُ گْوشگ بوتگ کہ ذیشان ءِ پت چہ 2015 ءَ زورانسری بیگواہ کُتگ، ءُ آئی ءِ یل کنائینگ ءَ دروگ تسلہ دیگ ءَ اَبید آئی ءِ چُک ءِ لاش واپس کُتگ۔
زھرشان کنوکاں گُشتگ ذیشان ظھیر ءَ را درکانودی کوشگ بوتگ کہ یک نہ منّ اتگیں ماپی زُلم ءُ زوراکی یے۔
ھمے داب ءِ یک دگہ مزنیں زھرشانی ریلی یے مرچی نوشکی ءَ کَشّگ بوتگ، کہ اود ءَ بی وائی سی ءِ باسکاں، شھریاں ءُ دگہ بازیں کچ ءَ نودربراں بھر زُرتگ۔
زھرشان کنوکاں ذیشان ءِ کوش ریاستی دھشتگردی گُشتگ کہ زورانسری بیگواھی ءِ آماچ مردمانی کھولاں انساپ دیگ ءَ اَبید گیش پریشان کنگ بوگ ءَ اَنت۔
چہ ایشی ءَ پد بی وائی سی ءِ گوانک ءَ مرچی چاگی، نوکنڈی اور ڈالبندین ءِ جتا جتائیں دمگاں سرجم ءَ شٹر ڈاؤن ھڑتال کتگ ھمیشی ءِ سبب ءَ مارکیٹ، دکان ءُ کاروباری بُنجاہ بند کنگ بوتگ اَنت۔
ذیشان ظھیر ءِ کوش ءِ ھلاپ ءَ چہ بی وائی سی ءِ نیمگ ءَ زھرشانی ءُ ھرتال یکشل ءَ برجا انت چہ اود ءَ آئی ءَ پیسر چہ گَل ءِ نیمگ ءَ بلوچستان ءِ شھر پنجگور، تربت ءُ کراچی ءَ ھم زھرشانی کنگ بوتگ انت۔
گوستگیں روچ ءَ زھرشانی ءِ میان ءَ کراچی ءَ پولیس ءَ زھرشان کنوکانی سر ءَ لَٹ شاپی کنگ ءَ پد بی وائی سی ءِ باسک ءُ رھشون دزگیر کُتگ انت بلے رَند ءَ آ یل کنگ بوتگ اَنت۔
چہ ھمے ھوالہ بی وائی سی گُشگ اَت زورانسری ذیشان ظھیر ءِ وڑیں ورناھانی درکانودی، چہ آئین ءُ کانون ءِ ھلاپ ءَ زورانسری داب ءَ بیگواہ کنگ ءُ کُشگ ءِ جاور گیشی بوگ ءَ انت۔
آیاں گُشتگ کہ انوگیں روچاں مکُران، ھزدار، مستونگ، ھاران ءُ آواران چہ بلوچستان ءِ گیشتریں دمگاں پاکستانی لشکراں چہ لوگاں چِست کُتگ اَنت ءُ دومی روچ ءَ آیانی لاش دور دیگ بوتگ اَنت ءُ مشکے ءِ وڑیں دمگاں چُشیں جیڑہ ھست ءُ ھست انت۔
بلوچ یکجھتی کمیٹی ءِ گُشگ انت کہ ریاست ءِ پُشدر ءَ بی وائی سی ءِ ھلاپ ءَ کارروائی بس ھمے ھاتر ءَ کنگ ءَ انت تاکہ بلوچستان ءَ ریاستی زُلم ءُ زوراکی گیش ءَ چہ گیش کنگ بہ بنت ءُ گھگیری تواراں دزمھار کُت بکن اَنت، چمیشکا بی وائی سی ءُ بلوچ راج وتی ھک ءِ ھاتر ءَ چہ جُھد ءُ کوشست ءَ پُشت کِنز بہ بنت ءُ وتی گھگیریں اَمل ءَ برجا بدار اَنت۔
بلوچستان ءِ دمگ کلات ءَ سلاہ بندیں مردماں دگ ءِ بند ساچی شرکت اُرش ءِ نشانگ کتگ –
کلات ءِ دمگ منگچر ءَ زرد عبداللہ ءِ ھند سر ءَ دگ بند ساچی شرکت سلاہ بندیں مردماں اُرش ءِ نشانگ کتگ مشنری مانداشتگ اَنت- اُرش ءَ ھچ وڑیں جانی تاوان ھال نیست اِنت-
اُرش ءِ زمہ واری ھچ گل ءَ نہ زرتگ بلے بلوچستان ءَ بلوچ آجوئی لوٹوکیں سلاہ بندیں گل بند شرکتاں اُرش نشانگ کنگ ءُ آیگ ءَ اَنت- اے گل اے شرکتاں پُلپانچیں پروجیکٹس ءِ بھر گوش اَنت-
باریں منی باریگ کدی کیت ؟
نبشتہ کار: کوھی خان
دی بلوچستان پوسٹ
مئے جنگ گوں یک باز سِلّیں ، گندکاریں ، زالِمیں ءُ جلّادیں دُژمِنے ءِ گون ءَ اِنت ۔ کہ نِشتگ ءُ مارا چار ایت ءُ کسے کہ تبے نکپتے ، بس وارت شراب ءُ بے ھوش بیت انسانی سُد ءُ سماء ءَ نہ بیت ، لوٹائینیت وتی کُچکاں کہ نام بلوچ اِش پِر اِنت ءُ کِرد چہ پنچابی ءَ گندہ تِر اِنت-
بس نشہ ءِ ھواس ءِ توک ءَ رو اَنت کُجامی کہ دل کشّ ایت بڈّ جن انت ءُ چِست کناں تھاریں کوٹی ءَ بند کن انت ءُ لھتے سالانی سال ، لھتے ءَ را ازیّت دئے اَنت ءُ زیشان ڈولیں ورنا انت کہ لاپ چاک چاک انت ۔
ھنچو کہ زیشان ءَ لاپ تل داتگ ات ءُ ڈریل کُرتگ ات ءُ جون کڈک کڈک ات چہ تیراں ءُ شپ ءِ نیم ءِ ویرانگاں کُنٹاں چگل دے انت ءُ وت نرمیں بوپ ءُ بالشتانی سر ءَ وپس انت ۔ بنی آدم ءَ را پہ مِرگ ءِ یک تیرے بس اِنت بلے ایش کہ بلوچانی لاپانی روت ڈوک ءُ ڈنانی سر ءَ کپتگ انت ءُ سینگ کڈک کڈک انت ،اے زالم ءِ زِد ءُ ھسد ءَ پیش دار انت ۔ پاکستان ءِ جلّادانی زھراں پیش دار انت ، کہ پہ یک بلوچ ئیگ انت آ چنچو زھر ءَ پُر اِنت ۔
بلے زیشان یک بلوچے بوتگ آئی ءَ شر زانتگ کہ من مُلک ءَ نِنداں ءُ پہ بیگواھیں بلوچاں ءُ پہ وتی پِت زھیر بلوچ کہ 10 سال اِنت بیگواہ اِنت ءُ پاکستانی ٹارچر سیلانی توک ءَ اِنت ، بریں زِندگ اِنت یا کہ نازاکیں بدن کِرمانی وراک بوتگ ءُ شُتگ ، پہ آیاں توار چِست کُتگ برے شال ، برے تربت ءُ پنجگور ، بلوچستان ءِ کُجا کہ زھرشانی ءِ بوتگ زیشان گوں وتی پِت ءِ اکس ء ھمود ءَ بوتگ ءُ کُکار ءُ جاک ءَ بوتگ ، بلے زانتگے کہ روچے نا روچے من ھم ھمے دُژمن ءِ تھاریں کوٹی ءَ بندیگ کنگ بنت یا کہ ویرانگے ءَ منی تیر سُمبینتگیں لاش کپوک بیت ۔
بلے زیشان پُشت ءَ نکِنزِت توار چِست کُت ، زھرشانی کُت ، راستیں ھبر کُت بلے ھاموش نہ بوت ۔ ءُ مُدام وتی پجّار پہ یک بیگواھیں بلوچ ءِ کہ دہ سال اِنت بیگواہ اِنت ھماھی ءِ چُک ءِ نام ء کُت ، مُدام نویسِتے کہ من یک گُلامے آں ، وداریگ ات کہ باریں کد منی باریگ کیت ۔
ما دُرست زیشان بوت نہ کن ایں چیاکہ زیشان ءِ درد ما ندیستگ ،زیشان ءِ مات ءُ گوھارانی زِند گوں کُجام ازابی ءَ گوستگ ما پھمِت نہ کن ایں۔ یک لوگے ءِ بے سروک ءَ 10 سال چِتو زِند گوازینین ایت، اے درد ءَ ما زانت نہ کن ایں ۔ یک تِپلے کہ دُگنیا ءِ پیداک بیت تاں مزن بیت بس وتی پِس ءِ تھنا اکسانی توک ءَ گِند ایت ، ھمینچو زانت من ءَ پِتے بوتگ کہ منی دُگنیا ء آیگ ءَ پیسر پاکستان ءَ بیگواہ کُتگ ءُ گار اِنت ۔ یک ماتے کہ پیران سری ءَ داں سالانی سال وداریگ اِنت کد منی بچ آجو بیت من پہ بچکند مِراں رواں ءُ گوں ھمے ودار ءُ درداں دُنیا ءِ چے بیران بیت ءُ روت ۔
یکے زیشان ات کہ 10 سالانی ودار کنت باریں منی پِت کد آجو بیت ءُ من ءَ گِند ایت کہ منی چُک جوان بوتگ ، یکے زِند ءِ گوں ودار ءَ گوازینگ سکیں مزنیں دردے بلے زیشان ءَ وتی پِت ءِ شوھاز ءَ اینچو پند بُرِّ ات وتی پِت ءِ در گِپت نہ کُت بلے ملکموت ءَ زیشان در گِپت ، پاکستانی جلّاداں در گِپت رستراں درگِپت ھون واراں درگِپت کہ آ نِشتگ ءُ چارگ ءَ ات ما کے ءَ را بیگواہ بہ کن ایں ءُ وتی ھون واری ءِ ھوس ءَ بہ کُٹّیناں ۔
زیشان ھم پد ءَ چِست اِش کُت ءُ جت اِش ، زیشان پت ءِ ودار ءَ زِندگ ات ءُ پِت ءِ ودار ءَ ھم مرگ ءَ دیست ءُ شُت ۔ بلے ما زیشان پیمیں ورنایانی پِگر ءُ مکسد ءَ دیم ءَ بُرت کن ایں، ما اے زالمانی ھلاپ ءَ اوشتات کن ایں ، ما جنگ کُت کناں داں باندا دِگہ زھیرے 10 سال بیگواہ مہ بیت داں باندا دِگہ زیشانے ءِ جون ویرانگاں کپوک مہ بیت ۔
ھو زیشان تو راست گوشت تو گُلامے ئے ، گُلام زانت نہ کنت کدین بہ مِر ایت ءُ کدین بیگواہ بیت ، بس وداریگ اِنت وتی مرگ ءُ بیگواھی ءِ ، بلے بس اِنت یار اینچو ودار مردم ءَ زندگی ءَ نیل ایت ۔ مارا زانگ لوٹ ایت کہ دُشمن وتی زوراں جنت نوں وتی کُلیں تاکت ءُ زوراں مئے سر ءَ چکّاس ایت ، مُھکم بُوگ ءُ پادانی ما کنگ ءُ جُنزگ ءِ وھد ھمیش اِنت ، مارا نوں ودار کنگی نہ اِنت مارا نوں سینگ دیم ءَ دارگی اِنت مارا ھم زالِمیں دُژمن ءِ دیم دارگی اِنت ، مارا ھونواریں ءُ رستریں پاکستان ءِ دیم ءَ ھون وار ءُ رستر بُوگی اِنت ، وتی رکّینگ ءِ واستا مارا ھم بے رِھم بُوگی اِنت ۔
وھد ھمیش اِنت مرچی ما دُژمن ءِ بیم دل ءَ ایر کُت مارا زیشان ءِ ڈولیں ورنایانی ھون پھل نہ بیت ، مارا مرچی زیشان ءِ ڈول ءَ توار چِست کنگی اِنت ، دُژمن ءِ دیم ءَ اُشتگی اِنت ۔اگاں دیم ءَ دُشمن گوں تاکت ءَ اُشتاتگ مارا ھم گوں تاکت ءَ دیم ءَ کِنزگی اِنت ، داں باندا کسے مارا شِگان مہ جنت داں بُرزا نِشتگیں شھید وتی راج ءُ وتی داتگیں ھونانی سر ءَ پھر بہ بند ات کہ مئے راج پاد آھتگ، مئے راج ءِ دُژمنے پادانی چیر ءَ لگت کُتگ-
ھو چوناھیگا اے ھبر راستے کہ جنگ تباھی ءِ کار ایت پہ ھرکس ءَ پہ ھمُک مزن کسانیں بلے جنگ کہ اژدری بیت گڑا تباھی ءَ گوں سنگتی کنگی اِنت ، زیشان ھم ھمے ھبر کُت کہ من بس اِنساپ لوٹاں من وتی گاریں پِت ءَ لوٹاں ، زیشان ء تُپنگ کوپگ ءَ نہ ات ، بلے زیشان جنگ بوت ، زیشان پیمیں بازیں ورنا ھست انت کہ کسے ءَ را کلمے دستا بوتگ کسے ءَ پُٹبال ءِ گون بوتگ لیب ءَ بوتگ ، کسے بارڈرانی سر ءَ روزگار ءَ بوتگ ، بلے زالِماں کُشتگ چیا کہ زالِم بلوچ کنت ءُ کُش ایت گڑا مارا ھم بلوچ بیگی اِنت ءُ پاد آیگی اِنت ، داں دیمتِر ءَ زیشان ءِ پیمیں ورنا وتی جوانی ءَ دگ ءُ زھرشانی ءِ بدل ءَ وتی پِت ءُ ماتانی ساھگ آں بگوازین انت ۔ شھیدانی ھون مئے کوپگانی سر ءَ ایر انت مئے زِمّہ انت ، مئے کوپگانی سر ءَ بار انت داں ھما روچ ء کہ دُژمن داں مئے ڈیھ ء در نہ کپتگ ۔ نوں جُنزگی اِنت ، راج ءَ را نوں جِیڑگی اِنت ، نوں راہ گچین کنگی اِنت ، مروچی مُھکم بُوگ ءُ گھگیری کنگ ءِ مُز مارا باندا یک آجوئیں ڈیھے ءِ رنگ ءَ دست کپ ایت ۔باند مئیگ اِنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
اکسے ءِ کسہ
نبشتہ کار: مھروان کمبر
دی بلوچستان پوسٹ
برے برے لَھتیں اَنچیں ساھت، اَنچیں موسم ءُ اَنچیں اَکس تئی چمّانی نِوان ءَ کاینت گُمان بیت وھد اُوشتاتگ ءُ گیدی ءَ ساہ ءِ کشّگ شموشتگ۔ اے اَکس ھم اَنچیں اَکسے یک کسانکیں گوھارے، یک بے تواریں ادیرھے ءُ گُلاب ءِ تاکانی چیر ءَ اندیم بیتگیں لَھتیں اَنچیں درد اَنت کہ آیانی درشان کنگ ءَ لبز ھم نہ گواہ ایت۔ اے اکس تھنا موتکانی موسم ءَ شلینتگیں ارسے ءِ کسہ نہ اِنت، بلکیں گوستانک ءِ پیشانی ءَ مُشگ بیتگیں یک چیھالے، جُستے ءُ یک آزگیں ٹپے۔
اے اَکس تھنا یک ساھتے ءِ آدینک ءَ پیش دارگ ءَ نہ اِنت بلکیں یک اَھدے ءُ زمانگے ءِ موتکاں آرگ ءَ اِنت۔ یک کسانکیں گھارے وتی نمیران بوتگیں براتے ءِ ادیرہ ءِ سرون ءَ نشتگ آئی ءِ چمّانی شھکوراں ھار کُتگ ءُ دل ءَ اَنچیں ٹپ پیوست بیتگ کہ وھد آئی ءِ درمان کنگ ءَ شموشتگ۔ ھما برات ءَ کہ وتی گھارانی ھمرائی ءَ شھر، میتگ، چار راھ دمک ءُ پریس کلبانی دیم ءَ پہ وتی گار ءُ بیگواھیں پت ءِ شوھاز ءَ در پہ در بیتگ، مروچی ھاکانی چیر ءَ وش واب اِنت ءُ آئی ءِ ادیرہ ءِ شک ءَ نبشتہ اِنت “گُلام ءَ زندگی نسیب ءَ نیست۔”
اگاں زمین زادگے زمین ءِ پھازگ ءِ جنگ ءَ جنگ بیت گُڑا ھاک آئی ءَ وتی امبازاں زُور ایت ءُ وتی سینگ ءَ واپین ایت ءُ بے توار بیت۔ بلے ھما زمین زادگ ءِ گوھار آئی ءِ ادیرہ ءِ سرون ءَ نند ایت ءُ گلھانی گرنچ ءَ بوج ایت، آئی ءِ ارس زمین ءَ نہ کپ انت بلکیں ھاک آئی ءَ وتی تہ ءَ پیوست کنت ءُ گِھگیری ءِ نوکیں موسمے بندات کنت۔
اے ادیرہ گندلانی سر ءَ مُرتگیں مردے ءِ ادیرہ نہ اِنت۔ اے ھما بلوچ ورناھے ادیرہ اِنت کہ آئی ءِ چمّانی تہ ءَ گِھگیری ءِ واب چول جنگ ءَ اَت۔ گُلامی ءِ سیاہ ءُ تھاریں شپاں وتی نسیب نہ لیکگ ءَ اَت بلکیں ھمے تھاریں شپاں نوکیں رُژنے ءِ دیگ ءَ تچ ءُ تاک کنگ ءَ اَت۔ آ ورنا کوھانی تہ ءَ چیر بوتگیں وابے نہ اَت بلکیں آجوئی ءِ اوگاماں گوں زندگ بوتگیں گواچنے اَت۔ آئی ءِ توکل، گِھگیری ءُ آئی ءِ مھروانی ءَ آ ابدمانی ءِ سپر ءَ رھادگ کُتگ اَت۔ آ پروش وارتگیں دُژمن ءِ شل سریں تیرانی آماچ بوت، بلے وتی زمیر ءِ سودا ئِے نہ جت۔
اے کسانکیں جنکو، تھنا یک جنکوے ءِ اکس نہ اِنت، بلکیں ھزاراں بلوچ شیرزالیں مات، گوھار ءُ جنکانی اکس اِنت کہ ھر روچ وتی دوستگیں مردمانی جوناں چِست کن انت ءُ آیاں ھما زمین ءِ میار کن انت کہ آیانی ھُون ھما زمین ءِ سر ءَ شنگ ءُ تالان بوتگ۔
ادیرہ ءِ سر ءَ رِتکگیں گُلابانی تاک اے گپ ءِ گواھی ءَ دینت کہ اے راہ ءَ رَپتگیں نرمزار نہ مر اَنت بلکیں آ گُلزمین ءَ ازت ءِ تاج ءَ سر ءَ دینت ءُ وت ابدمان بنت۔ ھما جنکو کہ دُنیا ءِ مُچی ءَ چہ گستا وتی برات ءِ کبر ءِ سرون ءَ نشتگ ءُ گریوگ ءَ اِنت، اسل ءَ آ گریوگ ءَ نہ اِنت آ ھما زُلم ءُ زوراکی ءِ گواھی ءَ دیگ ءَ اِنت کہ کبزہ گیریں ریاست پاکستان ءَ آیانی سر ءَ مُشتگ۔ ھما گواچنیں راستی ءِ گواھی ءَ دیگ ءَ اِنت کہ آئی ءَ ھِچ زندان ءِ سانکل ءُ زمزیل داشت نہ کن انت۔
اے اَکس چیھال جنان ءُ گُشان اِنت کہ ” ما وتی براتانی لاشاں کبرانی میار اَلّم کن ایں بلے آیانی دیستگیں واباں کَل ءُ کسارت کُت نہ کن ایں۔
اے اَکس گوستانک ءِ چمّانی تہ ءَ چم پیشدار ایت ءُ ھمے جُست ءَ اَلم کنت کہ ” داں کد ما وتی براتاں بے موسم ءَ کبرانی میار کن ایں؟ داں کد اے زمین وتی بچّانی ھُوناں گوں سُھر بیت؟ کدی آ مھلبیں بام ودی بیت کہ مئے چم گمانی جاہ ءَ وشیانی ارساں بہ شلین انت؟
داں ھما وھد ءَ اے وڑیں ساھت مئے سر ءَ ساھیل ءُ ساچان بنت کہ گُلامی ءِ سیاہ ءُ تھاریں شپ ھست اِنت۔ اے شپ ھما وھد ءَ مھلبیں بامے ءَ بدل بیت کنت کہ مئے گِھگیری برجاہ بہ بیت۔ دانکہ ما آجو نہ بہ ایں لاڑکیں گھار برات ءِ کبرانی سر ءَ تُرونگلیں ارساں گوار اَنت۔ اے ارس مارا ھمے یاتاں پرین انت کہ آجوئی ءِ نیاد تھنا دیمھونی نہ اِنت بلکیں ھما ھمت ءُ توکل اِنت کہ مئے چمّانی راہ ءَ ارسانی دروشم ءَ شلان بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
بلوچ سلاہ بندیں آجوئی لوٹوکیں گل بلوچ لبریشن آرمی ( بی ایل اے) ءِ اُرشانی توک ءَ گیشی اتکگ، گوستگیں شش ماھانی توک ءَ 284 اُرش کنگ بیتگ انت – گل ءِ نیمگ ءَ اُرشانی توک ءَ ترندی گندگ ءَ اتکگ چریشانی توک ءَ ٹرین ھائی جیکنگ، آئی ای ڈی اُرشانی توک ءَ گیشی ءُ شھر ءُ شھدگانی کنٹرول کنگ ءِ ویل پیش کنگ بیتگ انت-
بی ایل اے ءَ ھمے نیم سال ءِ اُرشانی کساس گوستگیں سال ءِ اُرشانی کَچ ءَ سر بیتگ انت- اے اُرشاں بیڑ، سرکاری ءُ لشکری ماڑیانی کنٹرول کنگ ءُ پورسز ءِ سلاھانی پچگرگ ھوار انت-
کاروائیانی توک ءَ جعفر ایکسپریس ءِ ھائی جیک کنگ ءُ ایشی ءَ سواریں سدانی کچ ءَ پوجی کارندھاں الگار کنگ دمگ ءَ اولی ویل انت ءُ ھمے وڑ نوشکی ءُ تربت ءَ بسانی کاروانانی دروشم ءَ سر ءُ پر کنوکیں پوجی کارندھانی نشانگ کنگ بازیں کچے ءَ آماچ کنگ ھوار انت-
بلوچ لبریشن آرمی ءِ آفیشل چینل ھکّل میڈیا ءِ نیمگ ءَ انفوگرافکس رپورٹ ءِ شنگ کتگین ءِ رد ءَ “بلوچ لبریشن آرمی ءِ سرمچاراں 2025 ءِ بنداتی شش ماھانی میان ءَ زورگریں پاکستانی پوج ءِ ھترناکیں اُرشانی آسر ءَ تاوانانی دیمپانی کتگ – سرمچاراں زورگریں پوج، آئی ءِ کمکار ءُ پوجی کارساز یکشل ءَ اُرشانی نشانگ کتگ انت“-
“ ھمے سال ءِ شش ماھانی توک ءَ بلوچ لبریشن آرمی ءَ کساسی رنگ ءَ 284 اُرش کتگ انت ءُ زورگریں پاکستانی پوج ءِ 668 ءَ گیش کارندہ مرتگ انت، ھمے وڑ 58 چاریگ ءُ ایجنٹس کشتگ انت- اے کاروائیاں 290 دزگیری بیتگ انت، 121 بمب تراک کتگ انت، 131 گاڑی تباہ کتگ انت ءُ یہ ٹرینے ھائی جیک کتگ ”-
“ بلوچ لبریشن آرمی ءِ سرمچاراں اے شش ماھانی وھد ءَ 9 گچینی آپریشنز سرجم کتگ انت، چریشاں سَے فدائی اُرش ھوار انت- بی ایل اے ءِ 36 سرمچار ڈیھ ءِ پھازگ ءَ شھید بیتگ انت چریشانی توک ءَ 7 فدائی ھوار انت – سرمچاراں 45 ءَ گیش جاہ دستیگ کتگ انت ءُ ھمے وڑ 17 پوجی بَنجاھانی تباہ کتگ انت- اے کاروائیانی وھد ءَ 115 ءَ گیش رنگ سلاہ ءُ گولہ بارود برتگ انت-”
رپورٹ ءَ گوشگ بیتگ “ اے دراھیں کچ ءُ کساساں زانگ بیت کہ جنگولی کاروائیانی تہ ءَ پدر بیت انت کہ بلوچ لبریشن آرمی ءَ 2025 ءِ بنداتی شش ماھانی توک ءَ زورگریں ریاستی تاکتانی مھکم، ھترناک ءُ آسرال اُرشانی سبب ءَ ترندیں تاوانانی دیمپانانی آماچ کتگ انت – بی ایل اے ءِ گامگیجاں نا ایوک ءَ زمینی تک ءَ گرگ ءَ سوبمندی بیتگ بلکیں آئی ءَ دشمن پوجی ستک ءُ کاروائیانی تک ءَ ترندیں پروشی داتگ انت- بی ایل اے آیوکیں وھد ءَ ھم ریاستی زوراکی ءُ زورگری ءِ ھلاپ ءَ وتی جد ءُ جھد ءَ گیش ءُ شوربندی ءِ ھواری ءَ برجاہ دار ایت – زورگریں تاکت ءِ واستا بلوچستان نی ھچ تک ءَ مھکم نہ بیت انت”
–
