TBP Balochi

بلوچستان ءِ دمگ ھزدار ءَ سلمان بلوچ ءِ زورانسری آوار جنی ءَ سے سال سرجم بوگ ءِ بگیریءَ کھول ءُ بازار ءِ مردمانی نیمگ ءَ زھرشانی کنگ بوتگ ۔

درنگاز کنوکاں سلمان بلوچ ءَ ھوار درسیں بیگواھیں مردمانی یل کنگ ءِ لوٹ کتگ ۔

زھرشانی ءَ ھر تکاں سیادی داروکیں مردم ءُ بیگواھیں مردمانی کھولاں مزنیں کچے ءَ بھر زرتگ ۔

درنگاز کنوکانی دست ءَ بینرز ءُ اکس بوتگ انت کہ بیگواھیں مردمانی یل کنگ ءُ انساپ ءِ لوٹ نبشتہ بوتگ انت ۔

کھول ءِ رد ءَ سے سال پرگوزگ ءَ ابید ھم سلمان بلوچ ءِء دزگیری ءُ جاورانی درگت ءَ ھچ سرپدی دیگ نہ بوتگ سلمان بلوچ ءِ گھار ءَ گوشتگ منی برات سلمان بلوچ ءِ زورانسری آوار جنی ءَ سے سال سرجم بوتگ انت ۔ ما ھمے ھاتر ءَ روانک ءِ کش اتگ تاکہ ھک ءُ راستی ءُ وتی دوستگیں مردمانی واتری ءِ لوٹ کرت بہ کن ایں ۔ سے سال ایں کہ ما بس ودار کنگ ءَ ایں ۔

دومی نیمگ ءَ چاگردی ترامجاھاں ھم سلمان بلوچ ءِ یل کنائینگ ءِ ھاتر ءَ آن لائن کمپئین برجاہ انت ، کہ انسانی ھکانی باسک ءُ لس مھلوک بھر زورگ ءَ انت ۔

بلوچستان ءِ دمگ چہ کیچ ءَ شنگ بوتگیں ھالانی رد ءَ ھوشاپ ءَ سیادی داروکیں ورنا نسیم ء قادر بخش کہ گوستگیں شپ ءِ ساھت دو ءَ پاکستانی پوج ءُ آئی ءِ پلامرزی ءَ ھستیں ٹولی ڈیتھ اسکواڈ ءِ کارندھاں دزگیر کنگ ءَ پد کُشتگ-

کھول ءِ گْوشگ اِنت کہ نسیم گوستگیں شپ ءَ پاکستانی لشکر ءُ آھانی سلاہ بندیں گل ءَ چہ وتی لوگ ءَ دزگیر کتگ ءُ دومی روچ ءِ سھب ءَ آئی ءِ لاش چہ یک ویرانیں دمگے ءَ دزکپتگ۔

کھول ءَ بھتام جتگ کہ “نسیم بندیگ کنگ ءِ وھد ءَ ٹارچر کنگ ءَ پد کُشگ بیتگ ءُ پد ءَ آئی ءِ لاش چگل داتگ۔”

بلوچستان ءَ چہ بازیں سالاں زورانسری بیگواھی ءُ درکانودی کوش ءِ بھتام برجاہ اَنت۔ انسانی ھکانی گلانی گْوشگ ءِ رد ءَ بلوچستان ءَ ماں پاکستانی لشکر ءِ دزگیر کنگ ءَ پد مردم بیگواہ کنگ ءُ رند ءَ آیانی لاش دزکپگ ءِ بازیں ھال ءُ اھوال دیم ءَ آیگ ءَ انت۔

انسانی ھکانی گلاں اے جیڑہ ءِ سر ءَ باز رند ءَ زھر ءِ درشان کتگ۔

اے گلانی گشگ ءِ رد ءَ “بلوچستان ءِ تہ ءَ زورانسری ءَ بیگواہ کنگ ءُ بے کانودی ءَ کُشگ یک مزنیں انسانی ھکانی جیڑھے ۔”

بلوچستان ءِ جتاجتائیں دمگ کلات ، کیچ ءُ ھُزدار ءَ چار مردم کُشگ بیتگ ءُ سے لاش دزکپتگ-

منگچر ءِ دمگ خالق آباد ءِ ھند ءَ سربند ءَ ناشناسیں مردمانی تیرگواری ءَ چہ چار مردم بیران بیتگ اَنت-

لیویز رِد ءَ وئیل زرد غلام جان نزیک ءَ بیتگ اود ءَ ناشناسیں سلاہ بندیں مردماں تیرگواری کتگ، چریشی ءِ آسر ءَ شاکر سعداللہ لانگو، شاکر خیراللہ لانگو ( پسران مولابخش ) محمد کریم ء محمد ( جھمنند شال) ءُ محمد ظاھر ء خالقدار ٹک لانگو جاہ پہ جاھی مرتگ اَنت-

اشانی درگت ءَ ھمے گوشگ بیگ ءَ اِنت کُشگ بیتگیں مردم سرکاری پلامرزی ڈیتھ اسکواڈ ٹولی ءِ مردم اَنت، وئیل سوب انگت زانگ نہ بیتگ-

ھمے وڑ کلات ءِ ھند چہ محمد تاوہ ءَ سمیع اللہ نیچاری نامیں مردمے ءِ لاش یک ویرانگے ءَ کپتگ، دمگی اِھوالکار ءِ رِد ءَ لاش پہ ھژدری چار ءُ ٹپاس ھاتر ءَ نادُراھجاہ ءَ برتگ-

بنداتی ھالانی رِد ءَ سمیع اللہ نیچاری تیر جنگ ءُ کُشگ بیتگ-

ھمے وڑ کیچ ءِ ھند ھوشاپ ءَ یک مردمے ءِ لاش دزکپتگ کہ آئی ءِ پجّار نسیم ء کادر بکش جھمنند ھوشاپ ءَ نام ءَ چہ بیتگ-

لاش پہ چار ءُ ٹپاس ءِ ھاتر ءَ نادُراھجاہ ءَ برگ بیتگ-

ھمے وڑ ھُزدار ءِ دمگ فیروز آباد ءَ ھم یک مردمے ءِ لاش دزکپتگ – ریسکیو واکدار رد ءَ لاش جسم ءَ تیرانی نشان بیتگ اَنت-

وئیل سوب انگت زانگ نہ بیتگ-

ھزدار ءِ دمگ چہ فیروز آباد ءَ یک مردمے ءِ لاش دزکپتگ کہ ریسکیو ءِ واکداراں نادراھجاہ ءَ سر کتگ۔ واکدارانی ءِ رد ءَ لاش ءِ سر ءَ تیر ءِ نشان ھست ءُ پجار ءُ تپاسی برجاہ انت-

پنجگور ءِ دمگ شپاتان ءَ ناشناسیں موٹر سائیکل سواریں مردمانی تیرگواری ءَ چہ دو مردم بیران بوتگ اَنت۔

پولیس ءِ رد ءَ بیران بوتگیں مردمانی پجار ظفر استاد محمد علی ءُ نعیم ء حاجی اعظم ءِ ناماں بوتگ انت۔ اے وئیل ءَ پد سلاہ بندیں مردم شُتگ اَنت ءُ انگت ءَ اے کوش ءِ سبب زانگ نہ بوتگ۔ اے بابت ءَ پٹ ءُ پول برجاہ انت ۔

دومی نیمگ ءَ شال ءِ دمگ کچلاک ءُ بوستان ءِ نیام ءَ کلی قاسم ءَ ترند روکیں مزدا گاڑی ءَ دو موٹر سائیکل ءُ رکشہ لگت داتگ ءُ دو مردم بیران ءُ سئے ٹپیگ بوتگ انت۔ چمدیستگینانی رد ءَ گاڑی سک تیز آھگ ءَ بوتگ ءُ ڈرائیور ءِ کنٹرول ءَ لگوشتگ ءُ سڑک ءِ کش ءَ گاڑیاں ٹکر جنان ءَ ءُ موٹر سائیکل ءُ رکشہ ءَ را مزنیں تاوانے رس اتگ۔

ویل ءِ ھال ءِ رسگ ءَ گوں ریسکیو ٹیم ءُ پولیس جاہ ءَ سر بوتگ انت ءُ ٹپیگ سول ہسپتال شال ءَ سر کنگ بوتگ انت کہ اود ءَ آھانی ٹپانی درمانی کنگ بوھگ ءَ انت۔ پولیس ءِ رد ءَ بیران بوتگیں مردم اولی رند ءَ دمگی نندوکیں مردمانی پجار کنگ بوتگ اَنت۔

ویل ءَ پد شھدگ ءِ سر ءَ ٹریفک ءِ سر ءَ سان کپتگ بلے پولیس ءَ ترندیں گامگیج زرتگ ءُ سڑک پچ کتگ ۔

بلوچ یکجھتی کمیٹی بُنجاھی رھشون ڈاکٹر صبیحہ بلوچ ءَ یک تامُربندے ءِ تہ ءَ گوشتگ کہ زھری ءَ ریاست نیمگ ءَ جنگ بیتگیں کرفیو ءَ بیست پنچ روچ ءَ چہ گیش گوستگ، دمگ ءَ مردم شُد ءُ نادُراھی ءِ سوب ءَ بیران بیگ ءَ اَنت، وھدے کہ ریاستی بُرزی اُرشانی آسر ءَ بازیں زالبول ءُ چُک شھید بیتگ اَنت-

ڈاکٹر صبیحہ بلوچ ءَ گوشتگ کہ ریاست ءَ زورانسری آوار جنی ءُ ٹارگٹ کلنگ ءِ پالیسی ءِ تُرندی اَتکگ- آواران ءَ ھمکروچی ھساب ءَ مردمانی پوجی بُنجل ءَ لوٹائین اَنت ءُ پد ءَ آیانی لاش ءَ چگل دیگ ءَ اَنت، مکران ءَ ریاستی پلامرزی ٹولی ڈیتھ اسکواڈ ءِ دست ءَ ھمے گوستگیں ماہ ءَ پنچ مردم کشگ بیتگ اَنت، اے درستیں گامگیج ءِ مول ءُ مراد بلوچ راج ءِ ایرموش ءُ بے توار کنگ اِنت-

آئی ءَ دیمتر ءَ گوشتگ کہ بلوچ یکجھتی کمیٹی ءِ رھشون ءَ بندیگ کنگ ءَ اَنت، وھدے کہ گل ءِ باسک نام فورتھ شیڈول ءَ ھوار کنگ ءَ اَنت دانکہ آیانی توار ایرموش کنگ بہ بیت-

ڈاکٹر صبیحہ بلوچ ءَ راج ءَ چہ دزبندی کتگ کہ آ بہ اوشت اَنت ءُ بلوچستان ءَ برجاہ چُکچینی ءِ ھلاپ ءَ توار چست بہ کن اَنت-

آئی ءَ گوشتگ کہ اگاں ما بہ توار بہ بہ ایں چُکچینی گیش بیت-

آئی ءَ گوشتگ کہ اے وھد ءَ بے تواری نہ اِنت بلکیں گھگیری اِنت، پرچاکہ زُلم ھلاپ ءَ گوشگ راستی راجی زمہ واری اِنت-

بلوچستان ءِ بُنجاھی شھر شال ءَ سیاسی ناگیگ جاور بُرزی ءَ سر بیتگ اَنت-

پی ٹی آئی ءِ مُچی ءِ دارگ ھاتر ءَ صوبائی ھکومت ءَ سرجمیں شھر ءَ بازیں شھدگ کنٹینر جتگ ءُ بند کتگ اَنت، اے جاورھالاں سوب ءَ شھر ءَ کرفیو اِنت وھدے کہ شھریانی زندمان اسرمند بیتگ-

اِھوالکار ءِ رِد ءَ ھکومت ءَ ایمنی ءِ جاور ھالانی چارگ ءَ موباھل انٹرنیٹ سروس ھم بند کتگ – سوشل میڈیا ءُ دگہ آن لائن تک ءُ پھنات ھم بند کتگ اَنت، چریشی ءَ چہ راج سک دلسیاھی ءِ دیمپان اِنت-

شھر ءِ مزنیں شھدگ سریاب دگ، جناح دگ، علمدار دگ، اسپنی دگ ءُ ایم اے جناح دگ سر ءَ جاگہ جاگہ کنٹینرز اوشتارینتگ، چریشی ءِ سوب ءَ گاڑیانی روگ آیگ بند بیتگ، کارگس ءُ زانشتی ادارھانی روگ ءَ شھریاں دراجیں راھاں کٹ بیگ ءَ گندگ بیتگ اَنت وھدے کہ باز جاھاں دکان ءُ باپاری بُنجاہ ھم بند کنگ بیتگ اَنت-

چمّگدانی رِد ءَ، پولیس ءُ ایف سی کارمندانی مزنیں کچے ءَ جتاجتائیں تھی ءُ ڈنی دگانی سر ءَ اوشتارینتگ اَنت، وھدے کہ ھکومت ءِ ٹاہ اِنت اے گامگیج ایمنی آرگ ءُ کجام ھما ناوشیں ویل ءِ رکگ ءِ ھاتر ءَ کنگ بیتگ-

زانگ بہ بیت کہ سرجمیں بلوچستان ءَ پھازوکی تُرس ءَ چہ بازیں دمگاں 144 جنگ بیتگ ءُ انٹرنیٹ سروس بند کنگ بیتگ- انٹرنیٹ ءِ بندی ءِ سوب ءَ چہ ھمکروچی زند ءِ تہ ءَ اڑان ودی بیتگ، وھدے کہ رسانکدر ءُ دگہ ھال اھوالی ھم بند کنگ بیتگ اَنت-

بلوچستان ءِ باپاری شھر ھب چوکی ءَ گوستگیں شپ ءَ زورانسری بیگواھیں ورنا ءِ یل نہ کنگ ءِ ھلاپ ءَ زھرشانی کنگ بیتگ، چریشی ءِ سوب ءَ کراچی، شال شھدگ پہ گاڑی واستا بند کنگ بیتگ-

گیشیں ھالانی بیگواھیں ورنا مارو کوہ بلوچ کھول نیمگ ءَ چہ شال، کراچی بُنجاھی شھدگ سر ءَ ھب بھوانی ءِ ھند سر ءَ زھرشانی نندانک برجاہ ءَ اِنت-

زھرشانی کنوکاں لوٹ کتگ کہ زورانسری بیگواہ مارو کوہ بلوچ دیم ءَ آرگ بہ بیت-

دومی نیمگ ءَ نندانک سوب ءَ کراچی، شال شھدگ سر ءَ گاڑیانی دراجیں لین لگ اِتگ-

پولیس ءِ مزنیں کچے ءَ، ڈی ایس پی ھب سرکل امام یعقوب بلوچ، ایس ایچ او بیروٹ عطااللہ جاموٹ، ءُ ایس ایچ او ھائیٹ امین ساسولی ءِ سروکی ءَ اے وھد ءَ ساڑی اَنت- زھرشانی کنوکاں گوں گپ دیوان کنگ جُھد ءَ اَنت – بلے زھرشانی کنوکانی گوشگ اِنت کہ ورنا ءِ یل کنائینگ ءَ تاں زھرشانی برجاہ بیت-

بلوچستان ءِ دمگ آواران ءَ سھب ڈرون بالیگ برز ءَ بال بیتگ انت ءُ کوھانی نیمگ ءَ تراکاں ھم توار کتگ –

دمگی مردمانی رد ءَ آواران ءِ دمگ جھاؤ ملا میتگ ءَ سھبی مھلہ ڈرون برز ءَ بال بیتگ انت ءُ پد ءَ کوھانی نیمگ ءَ تراکانی توار ھم اشکنگ بیتگ انت-

دمگی مردمانی رد ءَ سھب ءِ ساھت نُھ ءَ جھاؤ ءَ پاکستانی پوج ءِ مزنیں بنجل ءِ نیمگ ءَ تیرگواری ءِ توار ھم اِشکنگ بیتگ انت-

زانگ بہ بیت آواران بلوچستان ءِ ھما جاھاں ھوار انت کہ اود ءَ گیشتر پوجی آپریشنانی زد ءَ انت ءُ انسانی ھکانی ھکانی گَلاں باز براں آواران ءَ ھواریں دمگانی جاورانی ناگیگیانی بارو ءَ ھم گپ جتگ –

گوستگیں روچاں چہ شال ءَ بیگواھیں بیتگیں سلمان بلوچ ءُ آئی ءِ ھمراہ یل بیتگ انت ءُ ساھر انگت ءَ بیگواہ انت-

نیشنل ڈیموکریٹک پارٹی ءَ آئی ءِ یل بیگ ءِ ھال راست کنان ءَ گشتگ کہ ما چہ اے گپ ءِ جار جنگ ءَ وش ایں کہ مئے مرکزی ڈپٹی آرگنائزر سلمان بلوچ گوں وتی یک ھمراھے دلیپ داس ءَ لھتیں وھد پیسر وش ءُ سلامتی وتی لوگ ءَ واتر بوتگ انت۔

آئی ءَ گْوشتگ ما ھما درستیں مردم ءُ سیاسی گلانی منت ءَ گِریں کہ اے گرانیں وھد ءَ مئے ھمراھی ءَ اوشتاتگ اَنت ءُ مارا ھرچ وڑیں کمکے داتگ۔

پارٹی ءَ گْوشتگ وھدے کہ ما وتی دوئیں ھمراھانی یل بیگ ءَ وش ایں بلے زورانسری بیگواہ کنگ ءِ کار ءَ گوں ترندی ایر جن ایں ءُ مئے دگہ بیگواھیں ھمراھاں ھوار غنی بلوچ ءُ ثنا کھیتران بلوچ ءَ ھوار دراھیں درکانودی دزگیریں بلوچانی یلہ کنگ ءِ لوٹ کن ایں ۔

زانگ بہ بیت کہ ساحر بلوچ کہ ایشانی ھمراھی ءَ پہ زور بیگواہ کنگ بیتگ، انگت ءَ پاکستانی لشکر ءَ آوار جتگ کہ انگت ءَ بیگواہ انت۔

بلوچستان ءِ جتاجتائیں دمگاں ھپت مردم آوار جنگ بیتگ ءُ دو یل کنگ بیتگ، نال بیگواھیں مردمانی یل کنائینگ ءِ ھاتر ءَ زھرشانی-

ھُزدار ءَ چہ تھسل نال ءَ ھالانی رِد ءَ گوستگیں دہ روچ ءِ میان ءَ پاکستانی لشکر ءِ جتاجتائیں بیڑاں سے ورنا آوار جتگ ءُ ناشناسیں جاھے ءَ برتگ اَنت-

اِھوالکار ءِ رِد ءَ زورانسری آوار جنی ءِ نشانگ کنگ بیتگیں سے ورنایانی پجّار بابل ء خمیسا، فاروق ء عبد محمد ءُ ھزیفہ ء مولوی عبدالغفار ھوار اَنت-

وئیل ءِ ھلاپ ءَ نال ءِ شھریاں نندانک داتگ بیگواھیں ورنایانی یل کنائینگ لوٹ کتگ ءُ دمگ ءَ زورانسری آوار جنی، لوگانی سر ءَ بیڑ ءُ بلوچ دودمانی لگتمالی ءِ ھلاس کنگ لوٹ کتگ-

ھمے وڑ چہ شال ھال سر بیتگ پاکستانی پوج ءَ پولیس اے ایس آئی رحمت اللہ ءِ ورنائیں پجّ اویس بلوچ ءَ ھم زورانسری بیگواہ کنگ بیتگ-

ھمے وڑ ڈیرہ بگٹی ءِ تھسیل سوئی ءَ آئی ایس آئی ءُ سی ٹی ڈی ءَ عبداللہ ء تاژو بگٹی آوار جتگ ءُ بیگواہ کنگ بیتگیں مردم پاکستان پیٹرولیم لمیٹڈ ( PPL) ءِ کاردارے-

انچش کیچ ءِ دمگ پیدارک ءَ پاکستانی پوج ءَ بیڑبرتگ چاکر ء اکبر علی نامیں ورنایے آوار جتگ-

کھول ءِ رِد ءَ چاکر اکبر ھما وھد ءَ شال ءَ میڈیکل ٹیکنیشن ءِ کورس ءَ کنگ ءَ بیتگ لھتے روچ ءَ ساری لوگ ءَ اتکگ بیتگ-

کھول ءَ گوشتگ کہ چاکر اکبر ھچ وڑیں درکانودی پُرکاریاں سیادی نہ بیتگ، آئی ءِ دزگیری درکانودی ءُ درآئینی کارے-

آیاں لوٹ کتگ کہ ھکومت بلوچستان ءُ انسانی ھکانی گلاں چہ دزبندی کتگ کہ چاکر اکبر ءِ زوت یل بہ کن اِت دانکہ تُرس ءُ بے تاھیری ءَ ھلاس بکن اِت-

ھمے وڑ بلوچستان ءِ باپاری شھر چہ ھب ءَ دارو ھوٹل ءَ یک ورنایے مارو پنڈوک کورولا گاڑی ءَ سوار سلاہ بندیں مردماں لَٹ ءُ کُٹ کنگ ءَ پد آوار جتگ ءُ ھمراھی ءَ برتگ، کھول ءَ آئی ءِ پہ سلامتی یل کنائینگ لوٹ کتگ-

دومی نیمگ ءَ ھپدہ اکتوبر 2025 ءَ شال ءِ دمگ چہ عیسیٰ نگری ءَ سی ٹی ڈی ءُ چیریں ادارھانی دست ءَ زورانسری بیگواہ کنگ بیتگیں ورنا نزیر بلوچ ءُ وھاب بلوچ پشمبے ءِ سُھب ءَ یل کنگ بیتگ ءُ واتر لوگ ءَ سر بیتگ اَنت-