بلوچستان ءَ پاکستانی پوج ءُ ڈیتھ اسکواڈ ءُ ٹاورانی سر ءَ اُرش ، پولیس سلاھانی برگ ءِ زمہ واری سے جتاجتائیں گل بی ایل اے، بی ایل ایف ءُ بی آر جی ءَ منّ اِتگ اَنت-
بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ سرمچاراں کلات ءَ یک انٹیلی جنس بیسڈ کاروائی ءَ زورگریں پاکستانی پوج ءِ چریک سلاہ بندیں ٹولی ءِ سروک شاکر سعداللہ لانگو ءُ گوں ھمراھاں کشتگ-
جارکش ءَ گوشتگ کہ کلات ءِ دمگ منگچر ءَ سربند ءِ ھند ءَ بلوچ لبریشن آرمی ءِ سرمچاراں زورگریں پاکستانی پوج ءِ چریکانی اوتاک سر ءَ بیڑبرتگ، سرمچارانی اُرش ءَ سلاہ بندیں ٹولی ءِ سروک شاکر سعداللہ لانگو، شاکر خیراللہ لانگو پسران مولا بخش، محمد کریم ء محمد جھمنند شال ءُ محمد ظاھر ء خالقداد لانگو مرتگ اَنت- سرمچاراں چریکانی اوتاک ءَ چہ سلاہ ءُ یک گاڑی یے وتی دستیگ کتگ اَنت-
جارکش ءَ گوشتگ کہ شاکر سعداللہ لانگو زورگریں پاکستانی پوج ءِ جوڑ کتگیں وتگڑیں ڈیتھ اسکواڈ ءِ سروکی ءَ کنگ ءَ بیتگ، کہ بازیں آجوئی لوٹوکیں باسکانی شھیدی ءَ تچکی ءَ ھوار بیگ ءَ اَبید لوگانی سر ءَ بیڑ، بلوچ دودماناں لگتمال ءُ زالبول ءُ کماشاں زلیل کنگ ءَ زورگریں پوج ءِ کمکاری ءَ ھمگرنچ بیتگ-
جارکش ءَ گوشتگ کہ ریاستی چریک شاکر سعد اللہ لانگو زورگریں پاکستانی پوج ءَ ھاسکار اے دمگ ءَ گاڑیاں چہ زر گرگ ءُ منشیات فروشی ءَ بے لگام کتگ – چریک زورگریں پوج ءِ چیردستی ءَ تُپنگ ءِ زور سر ءَ مردماں زلیل کنگ ءُ دگہ چاگردی سلّکاریاں ھوار بیتگ اَنت-
جارکش ءَ گوشتگ کہ بلوچ لبریشن آرمی ءَ شاکر سعداللہ لانگو باز رند ءَ کڈن کتگ کہ آ بلوچ ھلاپیں کار ءَ یل بکنت، بلے آئی ءَ زورگریں پاکستانی پوج ءُ چیریں ادارہ ملٹری انٹیلی جنس ( ایم آئی ) ءِ چیردستی ءَ بلوچ راج ءِ ھلاپ ءَ جرم تیز کنگ ءَ ھوار بلوچ جُھدکارانی ھلاپ ءَ یکشل ءَ پُرکار بیتگ اَنت-
جارکش ءَ گُڈی ءَ گوشتگ کہ اے مردم جُرم ءِ پُشدر ءَ بلوچ لبریشن آرمی ءَ شاکر سعداللہ لانگو ءُ آئی ءِ سلاہ بندیں ٹولی کاروائی ءَ نشانگ کتگ گُڈی آسر ءَ سر کتگ – بلوچ لبریشن آرمی – بلوچ راج سر ءَ بؤکیں سرجمیں زوراکیانی ھساب ءَ زورگریں پاکستانی پوج ءُ آئی ھمکاراں چہ ھرچ وڑ گر ایں، راجی میاباری ءَ ھمگرنچیں مردم چو شاکر سعداللہ وڑ ءَ کنگ بنت-
ھمے وڑ بلوچستان لبریشن فرنٹ ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایف ءِ سرمچاراں ھپت نومبر ءِ شپ ءِ ادار دہ ءَ واشک ءِ ھند دالی ءَ برجاھیں پولیس تھانہ انگیر کتگ ءُ پولیس کارندہ دزگیر کتگ ءُ جست ءُ پرس کتگ بلے چہ دزگیر کنگ بوتگیں کارندھاں چہ یک کارندھے ھم چاگردی سلکاری یا کہ مھلوک ءِ دلسیاہ کنگ ءَ ھوار نہ بیتگ اَنت۔ ھمے ھاتر ءَ سرمچاراں دزگیر کتگیں کارندہ یل داتگ اَنت ءُ تھانہ ءَ ایریں سرکاری سلاہ ءُ موٹرسائیکل دستیگ کتگ ءُ پولیس تھانہ مانداشتگ۔
جارکش ءَ گوشتگ کہ ھپت نومبر ءَ سرمچاراں یک دگہ کاروائی یے ءَ واشک ءِ ھند دالی ءَ جتگیں یوفون شرکت ءِ موبائل ٹاور نشانگ کتگ ءُ تباہ کتگ۔
جارکش ءَ گوشتگ کہ بی ایل ایپ ءِ سرمچاراں ھپت نومبر ءَ یک دگہ کاروائی یے ءَ بیگاہ ءِ ادار سے ءَ جھاؤ ءِ ھند بگاڑی زیلگ ءَ پہ چاریگی ءَ جنگ بوتگیں یوفون شرکت ءِ موبائل ٹاور گوں مشین ءُ ساماناں تباہ کتگ۔ سرمچارانی کاروائی ءَ پد پاکستانی پوج ءَ پہ سرمچارانی نشانگ کنگ ءَ مارٹر ءِ باز گولا آس داتگ بلے بی ایل ایف ءِ سرمچار پہ سلامتی درکپتگ ءُ وتی اوتاکاں شتگ اَنت۔
جارکش ءَ گوشتگ یات بہ بہ اِنت سرمچار بلوچ راج ءُ آجوئی زرمبشت ءِ ھلاپ ءَ پاکستانی پوج ءِ چاریگی نزام ءِ دارگ ءَ آئی رھوتی نزام ءَ نشاگ کنگ ءَ اَنت پرچاکہ پاکستانی ریاست جتاجتا ئیں ایجنسیانی سر ءَ بلوچ سرمچاران ءُ بلوچ مھلوک ءِ پوناں ٹریس کنگ ءِ جھد ءَ کنت دانکہ بلوچ چکچینی ءِ میارباریں کاروائیاں سوبمند کُت بہ کنت۔ چہ ھمے سوب ءَ بلوچستان ءِ کوھی دمگاں ھم رھوتی نزام جوڑ کنگ ءَ اِنت۔ بلوچ سرمچار پاکستان ءِ ھمک گامگیج ءَ شریں وڑے ءَ سرپد اَنت ءُ ھمک شوربندی ءَ بے سوب کُت کن اَنت کہ آئی ءِِ مول بلوچ چکچینی ءِ تہ ءَ ترندی آرگ ءُ بلوچ آجوئی زرمبشت ءَ تاوان دیگ اِنت۔
میجر گھرام بلوچ ءَ واشک ءُ جاھو ءَ سے جتاجتائیں کاروائیانی زمہ واری من اِتگ ءُ گوشتگ کہ ھمے کول ءَ کن ایں کہ داں بلوچستان ءِ آجوئی ءَ زورگریں دژمن ءِ بگیری ءَ مئے کاروائی گوں مھکمی ءَ برجاہ بنت۔
ھمے وڑ بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گوشتگ کہ ڈیرہ بگٹی ءِ دمگ 238 کھٹن پُھل ھند ءِ سر ءَ زورگریں پاکستانی پوج ءِ یک چیک پوسٹے ءِ سر ءَ مزنیں سلاہ ءُ نوکیں سلاھاں چہ تیرگواری کتگ ءُ نشانگ کتگ- اے اُرش ءَ سرمچاراں زورگریں پوج ءِ پوسٹ سر ءَ گرنیڈ لانچر ءَ چہ بازیں گولھے آس داتگ کہ پوسٹ ءِ تہ ءَ کپتگ اَنت چریشی ءَ دُژمنیں پوج ءَ جانی ءُ مالی تاوان چست کنگ کپتگ-
جارکش ءَ گوشتگ اے اُرش زمہ واری ءَ بلوچ ریپبلکن گارڈز منّ اِیت ءُ مئے اے وڑیں اُرش بلوچستان ءِ وتواجھی ءَ تاں برجاہ بنت-
