TBP Balochi

ریاستی بے سوبی

ٹی بی پی شونگال

بلوچستان ءِ سیاسی مُشتگیں لکیر ءِ سر ءَ ھستیں واکداری سرکار ءَ اے دیدانک داتگ کہ اد ءَ دراھیں جیڑھانی گیش ءُ گیوار رھوتی کارسازانی بندش ءُ دفعہ 144 ءِ بند آرگ ءَ اِنت- چہ 6 نومبر ءَ بلوچستان سرکار ءَ سرجمیں بلوچستان ءَ 30 روچ ءِ واستا دفعہ 144 بند آورتگ،چرے وھد ءَ مُچی، روانک، نندانک ءُ پنچ ءَ گیش مردمانی یکجاہ بوگ ءَ بندش جتگ- ریل ءِ سروس پیش ءَ بند انت ءُ نی ٹرانسپورٹ اتھارٹی ءَ 12 تاں 14 نومبر ءَ داں ٹرانسپورٹ سروس مھتل کنگ بیتگ اَنت- سرکار ءَ پھزداری ءِ بھانگ نامو کتگ ءُ بلوچستان ءِ سِی ءَ گیش دمگاں انٹرنیٹ سروسز ھم بند کتگ-

بلوچستان ءِ مانگش اتگیں سروزیر سرفراز بگٹی ھمک دو روچ ءِ سر ءَ ٹاپار جَنت کہ بلوچستان ءَ ریاستی رٹ اتکگ ءُ گچینی شھدگ ساپ ءُ ایمن انت – بلے اے گامگیجاں کرفیو ءِ وڑیں جاورھال ودینتگ اَنت سرکار وتی ریاستی بے سوبی ءِ چیردیگ ءِ جھد ءَ اِنت- مھلوک ءِ بنکی اژدری زند ءِ سر ءَ بندش جتگ ءُ بلوچستان ءِ مھلوک ءِ ھمک روچی زند، واپار ءُ وانگ بازیں کچے ءَ سانمند بیتگ – سرکار ءِ اے دابیں گامگیج آجوئی ءِ واستا پرکاریں ادارھانی سر ءَ سان دور دیگ ءَ ابید مھلوک ءِ جیڑھانی گیشیں سبب بوگ ءَ اِنت-

آجوئی ءِ واستا پرکاریں سلاہ بندیں گلانی کاروائی سرجمیں بلوچستان ءَ گیش بیتگ اَنت- بلوچستان ءَ سندھ، پنجاپ ءُ ایران ءَ ھوار کنوکیں شھدگانی سر ءَ اے گلانی ناکہ بندی یکشل ءَ برجاہ اَنت- پاکستانی پوج ءِ سر ءَ ھترناکیں اُرشانی توک ءَ گیشی اتکگ ءُ بلوچستان ءَ میان اُستمانی پریامانی بے سوبی ءِ سان اِنت – اے سنگینیں جاورھالاں سرکارِ بلوچستان ءُ سرکاری مھلوک ءِ ٹاپار زمینی راستیاں گوں ھمدپ بیت نہ کن اَنت-

آجوئی دوستانی گچینی روچاں سرجمیں بلوچستان ءَ پوجی پرکاری گیشی ءَ گندگ ءَ کاینت – بلے سرکار ءِ اے دابیں پیسلہ، چریشی ءَ لس مھلوک ءِ زندگی اڑانکانی دیمپان اِنت- جاورھالانی گھتری ءَ کمکار منگ نہ بیت- اگست ءِ ماہ ءَ ھم انٹرنیٹ سروسز بند کنگ بیتگ ءُ دفعہ 144 بند آرگ بیتگ ءُ ھمے ڈول کنگ بیتگ، چریشی ءَ آجوئی دوستانی کاروائیانی توک ءَ ھچ وڑیں سان نہ کپتگ – بلوچ راجی گھگیری ءِ توک ءَ ترندی آیگ ءَ اِنت ءُ اے ڈولیں گنوکی گامگیج جنگ ءِ آس ءَ توسینگ ءَ ھچ بر آسری نہ بہ اَنت-

سیزدہ نومبر ءِ درگت ءَ بلوچ نامی ئیں آشوبی گشندہ استاد میر احمد بلوچ، ساول کندیل، میرل بلوچ ءُ سرفراز بلوچ ءِ نیمگ ءَ ماں شھیدانی ستک شانی درشان کنگ ءِ ھاتر ءَ مراگشے برجم دارگ بیتگ-

مراگش ءَ گشندھاں جتا جتائیں شائرانی شَیر گشتگ انت ءُ اود ءَ بلوچ شھید نازینگ بیتگ انت-

مراگش ماں چاگردی ترامجاہ پیس بک ءَ لائیو ءَ پیشدارگ بیتگ کہ اود ءَ بنداتی ءَ استاد میر احمد بلوچ ءَ وتی ازم پیش داشتگ ءُ پد ءَ میرل، ساول کندیل ءُ سرفراز بلوچ ءَ وتی وتی ازم ءِ درشانی کتگ انت-

زانگ بہ بیت بلوچ شھیدانی روچ بزاں کہ سیزدہ نومبر ھمک سالاں بلوچستان ءَ ھوار جتا جتائیں ڈیھاں بلوچ مھلوک اے روچ ءَ پہ بلوچستان ءَ نمیران بیتگیں مردمانی یاتگیری ءَ یات کنت انت-

ھمے وڑ ءَ چاگردی ترام جاھاں #13NovBalochMartyrsDay ءِ ھواری ءَ ھیش ٹیگ کامرد کنگ ءُ نمیران بیتگیں مردمانی اکس ءُ تامر بنداں شنگ ءُ تالان کنگ ءَ انت-

اے روچ ءِ دارگ ءِ جار اولی رند ءَ بلوچ نودبر گل آزاد ءَ ماں سال دوھزار ءُ دَہ ءَ یک جارے ءِ توک ءَ کتگ کہ آئی ءَ گشتگ اے روچ ماں بلوچ شھید مھراب خان ءِ شھیدی ءِ روچ انت ءُ ھمے روچ ءَ سرجمیں شھیدانی یاتگیری کنگ ءَ بزاں سیزدہ نومبر ءِ روچ گچین کنگ بیتگ-

ھمے وڑ بلوچ نیشنل مومنٹ ءَ ماں دری ڈیھاں ھم بلوچ شھیدانی روچ برجم داشتگ انت کہ اود ءَ آیاں جتا جتائیں دیوان اڑ داتگ انت-

سیزدہ نومبر

نبشتہ کار : گراناز

دی بلوچستان پوسٹ

سیزدہ نومبر ءِ روچ وھدیکہ بلوچستان ءِ کوھانی سَرٹُلاں برانز دنت گڑا گوات وتی پیچ ءُ تابانی توک ءَ نرم نرم ءَ پھری ءِ درشان ءَ پریچان بیت اِنت-

اے ھما روچ اِنت کہ گپ نہ کنت بلے آئی ءِ ھمک دمان ءُ ساھت ترا وشبوئیں گواڑگانی یاتاں پرین اِیت، ترا سما دنت کہ اے روچ تئی منی شھیدانی یاتگیری ءِ روچ اِنت-

اے روچ ھما دلیر ءُ بامردانی روچ اِنت کہ آیاں وتی زندگی تھنا مَرگ نہ کتگ بلکیں مَرگ ءَ را اِزتے داتگ ءُ وش آھت کتگ کہ دانکہ آیوکیں نسل آجوئی ءِ دامن ءَ وپت بہ کن اَنت- آ نمیران بیتگ اَنت بلے آیاں وتی ھوناں بلوچستان ءِ پجار ءِ پھریزگ ءِ جھد کتگ-

مروچی اگاں ما آیانی یاتگیری ءَ پُل ءُ گلاب ایر کن ایں گڑا ایشی ءَ چہ گپ تچک بیت اِنت ما آیانی پھر ءُ شان ءَ چمانی توک ءَ دارگ ءَ ایں-

شھید تھنا مئے واستا نام نہ اَنت بلکیں مھراب خان ءَ بہ گر دانکہ مروچی شھید بیتگیں بلوچ مئے واستا پھر ءُ شان اَنت- مروچی ھرچ داب ءَ شھید یک ناں یک وڑے ءَ زندگ اَنت، زھگے ءِ دل، رُستگینے ءِ دل ءَ، ورنایے ءِ چمانی توک ءَ یا پیر ءُ آجزیں کماشے ءِ کوپگانی گرنچاں ھرچ داب ءَ آ زندگ اَنت-

تو وھدیکہ بلوچستان ءِ کوچگ ءُ کوھاں گِند ئے گڑا ترا ھم بلوچ شھیدانی یاتاں گیج اَنت آ ھمے بیان ءُ درشان ءَ کن اَنت اے جاھاں ھما شھیدانی رتکگیں ھونانی وشبو اَنت – رُستگیں ورنا اَنت ءُ ودی بیتگیں تپل اَنت درست اے زمین ءِ بچانی آشک اَنت-

من ھمے سما کن آں مروچی اگاں ما مھراب خان ءَ یات کن ایں گڑا اے مئے وشبھتی اِنت کہ ما وتی شھیداں پراموش نہ ایں – آ شھید ھژدہ سد ءُ سِی ءُ نُھ ءَ شھید بیتگ یا دوھزار ءُ بیست ءُ پنچ ءَ ھمک روچ ءُ ساھت آ شھید ءِ ٹپ تاجگ اَنت-

مروچی ھمک داب ءُ دروشم ءَ ھرکس شھیداں یات کنگ ءَ گندگ ءَ کیت اِنت یکے نبشتانکی دروشم ءَ یکے دیوانے ءِ دروشم ءَ یک گپ ءُ درشانے ءِ دروشم ءَ یک اکسے ءِ دروشم ءَ یات کنگ ءَ ترا گندگ ءَ کیت اِنت-

بلوچستان ءِ ھمک سنگ ءِ شم ءَ شھیدانی ھونانی پینژار اِنت، ھمک گوات ءِ کَشگ ءَ شھیدانی وشبو اِنت، اے سرڈگار ھمایانی ھوناں گوں شادابی ءِ نیمگ ءَ جنزگ ءَ اِنت ءُ ھمایانی ھمت ءُ بامردی ءَ مروچی دنیا ءِ دیم ءَ یک پجارے نوکی تْرکگ ءَ اِنت-

یات بہ کن یک ھنچیں ھاکے ءِ بچاں کہ آیاں ترا مھر ءُ دوستی ءِ درس ھیل داتگ، تو اگاں بے ھیال بوت ئے گڑا ھمے سرپد بو تو وتی پجار ءِ گار کنگ ءِ دمب ءَ ئے اگاں یاتگیری برجاہ داشت گڑا بزاں ماں راجدپتر ءَ آیانی ھواری ءَ تاکانی سر ءَ نبشتگ بہ ایں-

تو منی باندات ءِ ھاتر ءَ وت ءَ ندر کتگ گڑا من ھم تئی یاتگیری ءَ پرتو سمبھیناں، پرتو پھر کن آں، پرتو نازینک ءُ ڈیوا بالیناں پرتو زمین ءِ دراھیں رنگاں ساز کن آں – پرتو کاڑاں سمبھیناں پرتو پھر ءُ شان کن آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ ھاران ءِ ھند داشتکین ءَ ناشناسیں سلاہ بندیں موٹر سائیکل سواراں نادر ء الاھی بخش محمد حسنی آوار جتگ ءُ برتگ-

دمگی مردمانی رد ءَ آوار جنگ بوتگیں مردم ءِ سیادی گوں ریاستی کمک ءِ سلاہ بندیں گل آ لس نام ءَ ”ڈیتھ اسکواڈ“ ءِ نام ءَ زانگ بیت۔

انگت ءَ اے ویل ءِ زمہ واری کس ءَ نہ زرتگ۔

بلوچستان ءَ ”ڈیتھ اسکواڈ“ ءِ نام ءَ زانگ بیتگیں گلانی تہ ءَ ھما مردم ھوار اَنت گْوشگ بیت کہ آ راجی دژمنیں کارانی تہ ءَ ھوار بوتگ اَنت۔ جتا جتائیں بلوچ راجدوستیں گلانی بھتام انت اے ٹولی ریاستی ادارھانی پلامرزی ءَ بلوچ راجدوستانی ھلاپ ءَ آپریشن کنگ ءَ انت-

گْوستگیں سالاں بلوچ آجوئی لوٹوکیں گلاں باز رند ءَ اے گل نشانگ جوڑ کتگ اَنت کہ ایشی ءِ تہ ءَ بازیں مردم بیران یا ٹپیگ بوتگ اَنت۔

سوات ءِ دمگ مٹہ شکردرہ ءَ سڑک ءِ کش ءَ بمب تراک بوتگ ، اے این پی ءِ پیسریگیں اُستانی اسمبلی ءِ نامزدیں اُمیت وار ممتاز علی خان ءِ ناگتی بچ اتگ ، گاڑی ءَ را سک باز تاوان بوتگ ، پولیس ءِ رد ءَ ممتاز خان یک جنازھے ءَ روگ ءَ بوتگ ۔

پولیس ءِ رد ءَ تراک شکردرہ ءِ دمگ ءَ ھما وھد ءَ بوتگ کہ عوامی نیشنل پارٹی ءِ رھشون ممتاز علی خان وتی گاڑی ءِ سر ءَ جنازہ ءَ روگ ءَ بیتگ۔

چہ لوگ ءَ نزیک ءَ سئے سد فٹ دور سڑک ءِ کش ءَ ایریں بمب اناگت ءَ تراک بوتگ ءُ گاڑی ءَ را سک باز تاوان رس اتگ، البت ممتاز علی خان ءُ آئی ءِ ھمراہ رک اتگ انت۔

تراک ءَ پد دمگ ءَ ترس ءُ بیم ودی بوتگ۔ پولیس بازیں کچے ءَ ویلجاہ ءَ سر بوتگ ءُ دمگ ءِ کش ءُ گور دیستگیں مردمان یکجاہ کنگ ءَ انت۔

بمب ءِ ھلاس کنگ ءِ اسکواڈ ءَ را ھم گْوشگ بوتگ کہ آ گیشیں گمانی ترساں ساپ ءُ پلگار بہ کنت۔

پولیس ءِ گشگ انت کہ بنداتی چمدیستگیں مردمانی رد ءَ اے تراک ریموٹ کنٹرول بمب ءِ گون ءَ بوتگ۔ اے وئیل ءِ پٹ ءُ پول بندات کنگ بوتگ ۔

13 نومبر شھیدانی درگاہ

نبشتہ کار: سارُم دشتی

دی بلوچستان پوسٹ

ھجگ ءُ پل ءُ گواڑخ رنگاں، زمین ءِ مِسکیں وشبو ءُ آتاریں استالاں ، دنز ءُ مُجانی سیاہ گوات ءُ بھارگاھانی سَبز اِتگیں سولاں مروچی شمئے روچ اِنت-

من ءَ بولان ءِ درپشیں کوہ یات ءَ کاینت گڑا بزاں ھمے روچ ءَ شما من ءَ سک یات ءَ پیداگ اِت، من ءَ سیاھجی ءِ مات بند ءَ مامو سَدو، کسان سالیں قدیر یات ءَ کاینت گڑا بزاں مروچی من ءَ کاھان ءِ شربت ھان مری ءِ ھون ءِ ترمپ یات ءَ پیداگ اِنت-

من وھدیکہ مند ءِ ورنائیں فارس ءَ یاتگیری ءَ کاراں بزاں من ءَ مشکے ءِ کماشیں رھمت سَکا یات ءَ آیگ ءَ اِنت – من کجام پُل ءُ گوارخ رنگیں وشبو ءِ گپ ءَ بہ کن آں ، منی بستار ءِ کساس چی اِنت ، منی دستانی زور داں گوادر ءِ باتیل ءَ نہ رس اِیت – منی دست شال ءِ شاہ مردان ءَ نہ رس اِیت بلے آئی ءِ ھوناں گوں آپ داتگیں گواڑخانی زیبائی ءَ من دیست کن آں –

اسل ءَ اے زیبائی منی چماں جھان ءِ شوکتریں رنگاں کم نہ اَنت من چوشیں زیبائیانی وھد ءَ زندگاں آیاں ندارگ کنگ ءُ آیاں بوسگ ءَ آں پمن ءَ آرٹے ءِ رنگ ءُ دروشم درست جاڑیگ اَنت من ھمے زیبائی ءِ درچکانی میان ءَ شمئے روک کتگیں چراگ ءِ دیم ءَ نشتگ ءُ مروچی شمئے کسھاں گرنج دیگ ءَ آں –

من چوناھیگا شمئے زیبائی ءَ بس چمانی کَل ءَ دیست کن آں بلے آئی ءَ وتی اندر ءَ پریچ کُت نہ کن آں منی ھیال ھمیش انت اے زیبائی تھنا منی نہ اِنت اے زیبائی ھَمک بلوچ ئیگ اِنت کہ آ اے زیبائی ءِ دَور ءَ زندگ ءُ شمارا یاتگیری کنگ ءَ اَنت-

سیزدہ نومبر بلوچستان ءِ گوستانک ءَ یک رُژنا ءُ روہ ءَ بُست کنوکیں روچے- اے ھما گچینی ءِ مھروانانی روچ انت کہ آیاں وتی ھاک، وتی راج، وتی پَجار ءِ ھاتر ءَ وتی سَاہ ندر کتگ اَنت – ھما شھیدانی ھون بلوچستان ءِ رَگ رَگ ءَ مانریچوکیں سُھریں لکیر اَنت کہ مروچی ھم گیرت، گھگیری ءُ مھرانی چیدگ جوڑ بیتگ-

بلوچستان ءِ شھیداں مارا اے ھیل داتگ کہ راج تلوار، یا دولت ءَ اِناں بلکیں دیمھونی ءُ وتی وابانی کُشگ ءُ دگرانی وابانی تہ ءَ زندگ بوگ اِنت- آیاں زُلمانی سیاہ شپاں چراگ روک کتگ ءُ گلامی ءِ زنجیرانی سِندگ ءَ وتی کرد باھینتگ اَنت ءُ اے منیتگ کہ ھما راج وتی شھیداں یات کنت گڑا آ ھچبر وتی دیمھونی دیگ ءَ چَک ءُ پد نہ بیت اِنت-

سیزدہ نومبر تھنا یک گوستانکے نہ اِنت بلکیں یک پھر ءُ شانی روچے، یک کَولے، کنگ بیت ما وتی شھیداں بے ھیال نہ کن این ءُ ھروھد ءَ آیانی یاتگیری ءَ ما آیاں وتی دل ءُ جان ءَ ھوار یات کن اِیں-

اے روچ مارا واب ءَ بُست کنائینت کہ آجوئی ءِ وشبو، شھیدانی بدن ءَ دراتکگیں ھیدانی وشبو اِنت ءُ آ مارا ھمک روچ اے سکین ءَ دَے انت کہ جد ءُ جھد ھلاس نہ بیتگ انگت ءَ انساپ ءِ شوھاز برجاہ اِنت-

تھنا اے روچ ءَ ما شھیداں یات مہ کن ایں بلکیں آیانی سوچ ءُ پکر ءُ راہ چی بیتگ گڑا ھمے روچ ءُ پکر ءُ سوچ ءُ راہ ھم مارا یاتگیری کنگ لوٹ اِیت پرچا تھنا یاتگیری ءُ موتک ءَ کس زندگ بوت نہ کنت اگاں تو گوش ئے من یکے ءَ زندگ بوگ ءَ گندگ لوٹ آں گڑا آئی ءِ کرتگیں کارانی دیم ءَ برگ ءُ جنزگ ءِ نام آئی ءِ زندگ کنگ اِنت-

آیانی لوٹ ءُ واھگ ھمے بیتگ کہ ھنچیں بلوچستانے دیم ءَ بیاریں کہ آئی ءِ توک ءَ وتی پجار، زبان ءُ ھک ءُ انساپ ءِ برابری بہ بیت پرچا اے چیز بنت گڑا آیانی دیستگیں واب مانا بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دو جتاجتائیں دمگاں سی ٹی ڈی ءُ چیریں ادارھانی دست ءَ پت گوں چُک ءَ ھوار سے مردم آوار جنگ بیتگ اَنت-

گیشیں ھالانی رِد ءَ کاؤنٹر ٹیررزم ڈیپارنمنٹ ( سی ٹی ڈی) ءَ پنجاب ءَ ھواریں دمگ چہ ڈیرہ غازی خان چہ غازی یونیورسٹی ءِ نودربر محمد اشرف ء محمد دین دزگیر کتگ ءُ وتی ھمراھی ءَ برتگ-

زانگ بہ بیت کہ محمد اشرف نوشکی ءَ پاکستانی پوج ءِ گوم ءَ میڑ ءَ بیران بیتگیں بلوچ لبریشن آرمی ( مجید بریگیڈ ) باسک رشید بزدار ءِ ناکوزتک اِنت-

دمگی اِھوالکار ءِ گوشگ اِنت کہ رشید بزدار ءِ بیرانی ءَ پد پاکستانی پوج ءَ آئی ءِ لوگ سر ءَ باز رند ءَ بیڑبرتگ ءُ سیاد تُرسینتگ اَنت-

ھمے وڑ ھمے دمگ ءَ دگہ سے نودربر ھم زورانسری بیگواہ کنگ بیتگ اَنت کہ آیانی پجّار انگت نہ بیتگ اَنت-

ھمے وڑ ڈیرہ بگٹی ءَ آئی ایس آئی ءُ سی ٹی ڈی کارندھاں پت ءُ گوں چُک ءَ ھوار آوار جتگ اَنت-

اِھولکار ءِ رِد ءَ ڈیرہ بگٹی ءِ تھسیل سوئی ءَ بگٹی کالونی بازار ءَ سی ٹی ڈی ءُ آئی ایس آئی ءِ کارندھاان تاجا ء نوجک بگٹی ءُ آئی ءِ چُک میر احمد زورانسری بیگواہ کتگ-

بلوچستان لبریشن فرنٹ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ بی ایل ایف ءِ سرمچاراں دہ نومبر 2025 بیگاہ ءَ کساس شش ءَ کیچ ءِ دمگ کیساک ءَ برجاہ پولیس ءِ دو کارگسانی سر ءَ اُرش کتگ ءُ کارندہ دزگیر کتگ اَنت- بنداتی پٹ ءُ پول ءَ پد پولیس کارندہ ھچ وڑیں تاوان دیگ ءَ بید یل داتگ اَنت، وھدے کہ دوئیں کارگسانی سرکاری ماڑی مانداشتگ اَنت ءُ اود ءَ سرکاری سلاہ وتی دستیگ کتگ اَنت-

جارکش ءَ دیمتر ءَ گوشتگ کہ سرمچاراں کساس ساھت ءَ تاں سی پیک شھدگ پہ روگ آیگ ءِ واستا بند کتگ ءُ آؤکیں ءُ رؤکیں گاڑیانی پٹ ءُ پول کتگ، بلے اے میان ءَ زورگریں پوج یا کہ چیریں ادارھانی کارندہ یا کہ دمگی چاریگ نہ بیتگ- پٹ ءُ پول ءِ سرجم کنگ ءَ پد شھدگ پچ کتگ ءُ مساپر روگ ءِ موکل داتگ اَنت-

جارکش ءَ گوشتگ کہ بلوچستان لبریشن فرنٹ کیساک ءَ پولیس تھانہ ءُ سرکاری ماڑیانی ماندارگ ءُ سی پیک شھدگ نیم ساھت ءَ تاں بند کنگ گاڑیانی پٹ ءُ پول کنگ ءِ زمہ واری ءَ منّ اِیت-

بلوچستان ءَ چہ گوستگیں روچ پبلک ٹرانسپورٹ بند کنگ ءَ پد بازیں شھراں تھریٹ الرٹ بندش جنگ بیتگ ، وھدیکہ موبائل انٹرنیٹ ءِ بند کنگ ءِ نوٹیفکیشن ھم شنگ کنگ بیتگ ۔

بلوچستان ءِ 36 دمگاں 10 نومبر ءَ بگر داں 16 نومبر 2025 ءَ تھری جی ءُ فور جی موبائل انٹرنیٹ سروسز ءِ بند کنگ ءِ نوٹیفکیشن شنگ کنگ بوتگ۔

دمگانی تہ ءَ شال، گوادر، چمن، خضدار، تربت، کلات، لسبیلہ، مستونگ، نصیر آباد، سبی، ژوب، ہرنائی، پنجگور، کیچ، کچھی، سوراب، کوہلو، دکی، قلعہ سیف اللہ، پشین، قلعہ عبداللہ، بارکھان، آواران ، جعفر آباد، موسیٰ خیل، ھاران، زیارت،دالبندین، نوشکی، اوستہ محمد، واشک، بولان، جھل مگسی، حب ءُ ڈیرہ بگٹی ھوار انت۔

انٹرنیٹ سروس ءِ بند کنگ ءَ چہ لس مھلوک، نودربر، تاجر ءُ رسانکدر ءِ ادارگ سک باز تاوان دیگ بوگ ءَ اَنت ءُ شھری دمگاں اے کار ءَ را زانتکاری ءِ رسگ ءِ سر ءَ بندش لیک اِتگ۔

ھمے وڑ خضدار ءِ تحصیل نال ءَ سیکورٹی ءِ جیڑھانی سبب ءَ بینک بند کنگ بوتگ انت۔

ڈیرہ بگٹی ءِ دمگی انتزامیہ ءَ تھریٹ الرٹ شنگ کتگ کہ بلوچ ریپبلکن آرمی ءُ بلوچستان لبریشن فرنٹ ءِ نیمگ ءَ یکجائی ءَ اُرش کنگ ءِ ترس ھست انت۔

ایشانی رد ءَ بی آر اے ءِ مزنیں کمانڈراں ھاسیں دیوان ءِ تہ پیسلہ کتگ کہ بی ایل ایف ءِ ھمکوپگی ءَ ڈیرہ بگٹی ضلع ءَ سئے یکجائی کیمپ جوڑ کنگ بنت۔

ایشی ءَ ابید بی ایل ایف ءِ نیمگ ءَ بی آر اے ءَ سلاہ ءُ گولہ بارود دیگ ءِ ٹاہ ھم بوتگ۔

دھمکی ءِ الرٹ ءَ پد سرجمیں دمگ ءَ چیکنگ ءُ سیکورٹی ءَ را گیش ءُ گیوار کنگ بوتگ ءُ پترگی ءُ درآیگی راھانی سر ءَ سکیں نگرانی بندات کنگ بوتگ۔

اسلام آباد ءَ جی الیون کچھری ءِ نزیک ءَ وت کُش تراک ءَ 5 مردم بیران ءُ 21 ٹپیگ بوتگ انت ۔

بنشون ءِ رد ءَ تراک ءِ جاگہ ​​ءَ وتکش اُرشکار ءِ سر ھم دست کپتگ ۔

بنشون ءِ رد ءَ کچھری ءِ نزیک ءَ گاڑی یے ءِ تہ ءَ تراک ءَ کہ ایشی ءِ توار دور ءُ دراج ءَ گوشدارگ بوتگ۔ تراک ءَ چہ پارکنگ ءِ جاہ ءَ آس بوتگ ءُ نزیکیں گاڑی ھم آس ءَ گپتگ اَنت۔

بنشون ءِ رد ءَ تراک ءِ آسر ءَ 12 مردم ٹپیگ بوتگ اَنت کہ آیانی تہ ءَ وکیل ءُ سائلین ھم ھوار اَنت۔

پولیس ءِ واکدار ءِ گشگ ءَ انت کہ تراک ءِ درگت ءَ تپاسی بوگ ءَ انت۔ تراک ءَ پد پولیس ءُ ریسکیو کارندہ کچھری ءَ سر بوتگ انت ۔