TBP Balochi

گچینی جاہ ءِ نشانگ

ٹی بی پی شونگال

بلوچستان ءِ دمگ چاگی ءِ ھند نوکنڈی ءَ فرنٹیئرکور ءِ بریگیڈ ھیڈ کوارٹرز ءِ سر ءَ 30 نومبر ءِ شپ ءَ یک پدائی اُرشے بیتگ، چوشکہ کساس سِی ءُ شش اداراں داں برجاہ بیتگ- اے کاروائی ءِ زمہ واری بلوچستان لبریشن فرنٹ ءَ زرتگ، آئی ءِ رد ءَ اے اُرش “ پدائین بٹالین ” سدو آپریشنل بٹالین ءَ کتگ، آئی ءِ نشانگ سیندک ءُ ریکوڈک پریاماں ھواریں انجینئر ءُ درملکی کارندھانی کمپاؤنڈ بیتگ انت-

چاگی گچینی جاہ ءُ رھگوزی دروشم ءَ گچینی دمگے زانگ بیت پرچاکہ ایشی ءِ توک ءَ ریکوڈک ءُ سیندک ءِ وڑیں مزنیں مڈیانی منسوبھانی جاہ انت، چریشی ءَ چین ءُ کینیڈا ءِ کمپنی زرکاری کنگ ءَ انت- امریکہ ءُ سعودی عرب ءَ ھم اے منسوبہ ءَ گوں ھبداری گوشتگ بلے اے دابیں اُرشاں پد اے گمان گیش بیت انت کہ میان اُستمانی زرکار اے دمگ ءَ ناگیگیں جاوراں وتی زرکاری ءِ واستا ترس گمان کن انت-

چاگی ءَ زرکاری پرکاریانی سبب ءَ ترندیں سیکیورٹی ءِ جاڑیگ انت – ءُ کساس مھکم زانگ بیتگیں نوکنڈی ءَ اے اولی مزنیں پدائی اُرش انت – بلوچ لبریشن آرمی ءِ مجید بریگیڈ پیش ءَ ھم پاکستان ءِ واستا سیکورٹی ءُ زرکاری ءِ درچ ءَ چیلنجے بیتگ- ءُ بلوچستان لبریشن فرنٹ ءِ سدو آپریشنل بٹالین ءِ دیم ءَ آیگ ءَ اُرشانی توک ءَ گیشی ءِ آیگ ءِ گمان رد بیت نہ کنت-

بلوچستان لبریشن فرنٹ ءِ اے اُرش ءَ پدر بیت گل وتی گامگیجانی توک ءَ مٹی آرگ ءَ انت ءُ جنگ ءِ میدان ءَ دزبندیں جاورھال وت پدر کن انت – اے گامگیج پاکستان، چین ءُ بیرک گولڈ ءِ وڑیں زرکارانی واستا مشکل ودی کت کن انت- پرچاکہ اُرشانی پتر گچینی جاھانی تالان بوگ ءَ گندگ آیگ ءَ انت-

سدو آپریشنل بٹالین ءِ رد ءَ نوکنڈی ءَ بریگیڈ ھیڈ کوارٹرز نشانگ کتگ ءُ اے کلوہ ءَ دیگ لوٹ ایں کہ بلوچ ادارھانی رزا مندی ءَ ابید درملکی زرکار مھپوز نہ انت ءُ بلوچ سلاہ بندیں ٹولی ترندیں سیکورٹی جاھاں ھنر ءُ رھگوزی جاھاں نشانگ کنگ ءِ زور ءَ دار انت-

بلوچستان ءِ دودمانی سازگار ءِ نامداریں ازمکار ءُ نامی ئیں سروز کار استاد سچو بگٹی بیران بیتگ-

استاد سچو بگٹی بلوچ دودمان، لوک دھن ءُ سروز ءِ درگت ءَ یک نامداریں مردمے زانگ بیتگ – آئی ءَ بازیں دھکاں وتی ازمکاری ءِ سپر نا ایوک ءَ بلوچ ساز ءُ زیمل ءَ بکشات بلکیں وتی کش ءُ گوری ھمساھگ ھم چہ ساز ءُ زیمل ءَ سانمند کتگ ءُ میان اُستمانی تکاں یک رژنائیں چراگے ءِ دروشم ءَ تالان کتگ-

بلوچ تَکاں سچو بگٹی ءِ بیرانی ءِ سر ءَ رنج ءُ گمانی تامری ودی کتگ کہ چریشی ءَ اود ءَ مھلوک سچو بگٹی ءِ بیرانی ءِ سر ءَ پرسیگ انت –

بلوچ دودمان مروچی یک ھنچیں گچینی ازمکارے ءَ زبھر بیتگ کہ آئی ءَ وتی زند ساز ءُ زیمل، دودمانی ءُ ازمکاری ءَ گوازینتگ –

بلوچستان ءَ گیشتریں ازمکار اَچ وتی نادرسیانی دیمپان انت کہ اود ءَ آ وتی زند ءَ پہ ازم گوازین انت بلے آیانی کسانوکیں نادراھی ءَ وتی ساہ بکش انت کہ آیانی گور ءَ چوشیں آسراتی نیست کہ آیاں چرے جانکُشیں نادراھی ءَ رکینت کُت بہ کنت-

اسلامک انٹرنیشنل یونیورسٹی اسلام آباد ءَ گریجویٹ پارگ بوتگیں ساجد احمد پنجگور ءَ پاکستانی لشکر ءِ دست ءَ دزگیر کنگ ءَ پد پہ زورانسری بیگواہ کنگ بوتگ۔

آئی ءِ لوگ ءِ مردمانی گشگ ءِ رد ءَ آ لوگ ءَ واتر بوھگ ءَ ات کہ راہ ءَ زورانسری ءَ چست کنگ بوتگ۔

ساجد احمد ءَ گوں بلوچی لبزانک ءَ مزنیں ھب ءُ واھگے ھست ءُ چَہ اسلامی انٹرنیشنل یونیورسٹی اسلام آباد ءَ گریجویٹ اسکالر اِنت ۔ آئی ءِ زورانسری بیگواہ کنگ ءِ سر ءَ آئی ءِ لوگ ءِ مردماں جیڑہ درشان کتگ۔

زانگ بہ بیت کہ پاکستانی لشکر ءَ اے ٹاہ داتگ کہ ساجد احمد پنجگور ءِ تھسیل گواڑگو ءَ دزگیر کتگ۔ آئی ءِ سر ءَ تراکناک ءُ سلاہ ءِ ھمراھی ءَ دزگیر کنگ ءِ بھتام جنگ بیتگ۔

آئی ءِ لوگ مردمانی گشگ ءِ رد ءَ آئی ءِ دزگیر کنگ ءَ پد آئی ءَ را ناشناسیں جاھے ءَ برگ بیتھ ءُ سئے روچ ءِ گوزگ ءَ ابید ھم آئی ءَ را نہ ھچ آمید گس ءِ دیم ءَ پیش کنگ نہ بوتگ ءُ نہ ھچ مجسٹریٹ ءِ دیم ءَ پیش کنگ بوتگ کہ ایشی ءِ سبب ءَ اے جیڑھ آئینی ءُ کانونی جُست ءُ پُرس ءِ سنگینیں جُستاں چست کنت-

بلوچستان ءَ زورانسری بیگواھی ءِ درچ برجاہ اِنت۔ چہ ھزدار شھر ءَ فرزانہ بنت محمد بخش زہری نامیں جنینے گْوستگیں شپ ءَ پاکستانی لشکر ( سی ٹی ڈی) ءَ آوار جنگ ءَ پد زورانسری بیگواہ کتگ۔ کھول ءَ آئی ءِ سلامتی ءَ یل دیگ ءِ لوٹ کتگ۔

ایشی ءَ ابید پسنی ءَ یک ماھیگ گرے کہ قاسم ء نبی بخش، چمدیستگیں مردمانی گوشگ انت پاکستانی لشکر ءَ چہ بازار ءِ توک ءَ دزگیر کنگ ءَ پد زورانسری بیگواہ کتگ-

دمگی مھلوک ءُ ھاندان ءِ مردمانی گشگ ءِ رد ءَ وارڈ نمبر 3 پسنی ءِ نندوکیں قاسم 8 روچ ءَ دریا ءِ تہ ءَ شکار کنگ ءَ پد سئے شمبے ءِ سھب ءَ واتر بوتگ۔ سھب ءِ 9 بج ءَ آ گوں سنگتے ءَ موٹر سائیکل ءِ سر ءَ مین مارکیٹ ءَ سر بوت کہ ناشتہ بہ زوریت ءُ وتی سنگت ءِ چم ءِ پیشدارگ ءَ ہسپتال ءَ بہ روت۔

چماں گندوکیں مردمانی گشگ اِنت کہ پاکستانی لشکر ءِ کارندھاں قاسم ھما وھد ءَ دزگیر کتگ کہ آ پسنی ءِ مستریں بازار ءَ بس اسٹینڈ ءِ نزیک ءَ میڈیکل اسٹور ءِ دیم ءَ دوائی زیرگ ءَ بیتگ-

چہ آئی ءِ دزگیر کنگ ءَ پد آئی ءِ لوگ ءِ مردماں قاسم ءِ جان سلامتی، جاور ءُ جاہ ءُ جاہ ءِ بابت ءَ ھچ وڑیں ھال ءُ اھوال دیگ نہ بیتگ۔

کھول ءِ گشگ ءِ رد ءَ قاسم ءِ کار ءُ کسب ماھی گیری انت ءُ باز براں دریائی شکار ءَ بازیں وھد ءُ پاسے گوازین اِیت۔ آھاں ترس ءِ پدردی درشانی کتگ کہ قاسم ءِ موبائل فون یکشل ءَ آن لائن آیگ ءَ انت کہ ایشی ءَ چہ اے شک گیشتر مھکم بیت کہ آ سرکاری ادارھانی دست ءَ انت۔

کھول ءَ لوٹ کتگ اگاں قاسم ءِ سر ءَ پاکستانی لشکر یا کجام ھم سرکاری ادارگ ءِ نیمگ ءَ ھرچ وڑیں بھتام یا کیس ھست گڑا آئی ءِ دزگیر کنگ کانونی رنگ ءَ کنگ بہ بیت ءُ آ قانونی کارروائی ءِ رد ءَ آمیدگس ءَ پیش کنگ بہ بیت ۔ کھول ءِ گْوشگ اِنت کہ ما اے ناجائزیں دزگیری ءُ زورانسری ءَ بیگواہ کنگ ءِ سر ءَ بے توار نہ بہ ایں ءُ داں قاسم ءِ پُجارینگ ءَ ھرچ کانودی ءُ پرامنیں جھد ءَ برجاہ دار ایں ۔

دمگی انسانی ھکانی جھدکاراں اے وئیل ءِ سر ءَ ترندی ءَ چار ءُ تپاس ءِ درشانی کتگ ءُ اے وئیل ءَ بلوچستان ءَ زورانسری ءَ بیگواہ کنگ ءِ گیش بوھوکیں سلسلہ ءِ بھر لیک اِتگ۔

چہ کراچی ءَ رس اتگیں ھالانی رد ءَ سرگوات کلری لیاری ءِ نندوک نبیل بلوچ ء عبدالغنی 29 نومبر 2025 ءَ سھب ءِ 8 بج ءَ ماری پور روڈ ءِ دعا ہوٹل ءِ دیم ءَ پاکستانی لشکر ءَ زورانسری بیگواہ کتگ۔

کھول ءِ گشگ ءِ رد ءَ نبیل بلوچ ءِ کار ءُ کسب سیکورٹی گارڈے ءُ ھچ وڑیں ناجائزیں کارے ءَ گوں بندوک نہ اِنت ۔

کھول ءَ نبیل بلوچ ءِ زوت یل کنگ ءِ لوٹ کرتگ ءُ گْوشتگ کہ بائد اِنت اے ازیت ءُ آزاریں جاوراں چہ درکنگ بہ بیت۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں مستونگ، تربت، کوھلو ءُ چمالنگ ءَ چار جتاجتائیں کاروائیاں زورگریں پاکستانی پوج ءِ تاوانانی دیمپانی کتگ ءُ پُلپانچیں شرکتانی سیکورٹی کارندہ دزگیر کتگ ءُ سلاہ برتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں گوستگیں روچ ءَ مستونگ ءِ دمگ دشت جلو گندان ھند سر ءَ زورگریں پوج ءِ پیادگ کارندہ ھما وھد ءَ سنگر گپتگ ءُ اُرش ءِ نشانگ کتگ اَنت وھدے آ ریل ٹریک ءِ کلئرینس ءَ دلگوش بیتگ اَنت، اُرش ءَ زورگریں پوج ءِ دو کارندہ جاہ پہ جاھی مرتگ ءُ دگہ یکے ٹپی ئیں جاور ءَ تتکگ-

جارکش ءَ گوشتگ بلوچ لبریشن آرمی ءِ سرمچاراں گوستگیں روچ ءَ تربت شھر ءَ پارک ھوٹل ءِ نزیک ءَ زورگریں پاکستانی پوج ءِ چیک پوسٹ دستی بمب ءَ چہ نشانگ کتگ ءُ جانی ءُ مالی تاوان ءِ دیمپانی کتگ-

جارکش ءَ گوشتگ بلوچ لبریشن آرمی ءِ سرمچاراں گوستگیں روچ ءَ۔بیگاہ ءِ وھد ءَ کوھلو ءِ دمگ سنھڑی ءَ پُلپانچیں گیس شرکت ءِ سیکورٹی ءِ واستا برجاھیں بُنجل سر ءَ اُرش کتگ اود ءَ ساڑی پرائیوٹ کارندہ دزگیر کتگ ءُ سلاہ وتی دستیگ کتگ اَنت- پرائیوٹ شرکت ءِ دمگی کارندہ کڈن کتگ ءُ یل داتگ اَنت-

جارکش ءَ دیمتر ءَ گوشتگ کہ دگہ یک کاروائی ءَ بلوچ لبریشن آرمی ءِ سرمچاراں چمالنگ ءَ ٹرپل موڑ ءِ ھند سر ءَ پُلپانچیں اشکر شرکت ءِ سیکورٹی بُنجل سر ءَ اُرش کتگ اود ءَ ساڑی کارندہ دزگیر کتگ ءُ سلاہ برتگ اَنت- دمگی مردم ءِ بیگ سوب ءَ پرائیوٹ شرکت ءِ کارندہ بیھار داتگ ءُ یل داتگ اَنت-

جارکش ءَ درشان ءِ گُڈی ءَ گوشتگ کہ بلوچ لبریشن آرمی پُلپانچیں شرکتاں چہ ھمگرنچیں سرجمیں مردماں تچک کنگ لوٹ اِیت کہ اے شرکتاں سیکورٹی دیگ یا دگہ کمکاری ءَ چہ پھریز بہ کن اَنت- اے وڑیں کاراں ھواریں مردم وتی جانی ءُ مالی تاوان ءِ زمہ واری وت بنت-

بلوچستان ءِ جتاجتائیں دمگ شال، کیچ، پنجگور ءُ مستونگ ءَ فدائی زرینہ رفیق ءِ پت ، ناکو، دشتار ءَ ھوار نُھ مردم آوار جنگ ءُبیگواہ کنگ بیتگ اَنت وھدے کہ پنچ یل کنگ بیتگ اَنت-

گیشیں ھالانی رِد ءَ کیچ ءَ پاکستانی پوج ءَ سے مردم آوار جتگ اَنت کہ آیانی تہ ءَ فدائی اُرشکار رزینہ بلوچ ءِ پت ماسٹر رفیق ، آئی ءِ ناکو خدا داد ءُ دشتار بیر ھوار اَنت-

کھول ءِ رِد ءَ ماسٹر رفیق کیچ ءِ دمگ چہ تجابان ءَ وھدے کہ خدا داد ءُ زبیر تربت شھر ءَ آوار جتگ اَنت – کھول ءِ گوشگ اِنت کہ آوار جنگ ءَ پد اے مردمانی درگت ءَ ھچ وڑیں ھال نیست-

زانگ بہ بیت کہ زرینہ بلوچ گوستگیں روچ بلوچستان لبریشن فرنٹ ءِ فدائی بٹالین ” سوب ” ءِ کاروائی ءَ ھوار بیتگ- ھالانی رِد ءَ زرینہ ءَ شورواں پُریں گاڑی کمپاؤنڈ ءَ چہ ڈِک داتگ ءُ چریشی ءَ پد آ دگہ اُرشکار بُنجل ءِ تہ ءَ پُترگ سوبمند بیتگ اَنت-

ھمے وڑ کیچ ءِ بُنجاھی شھر تربت ءَ چہ شھید فدا چوک ءَ ھمے سال بیست ھپت نومبر ءَ پاکستانی پوج ءَ دانش ء نیک بخت آوڑ جتگ ءُ بیگواہ کتگ-

ھمے وڑ ھمے سال ءِ 21 نومبر ءَ چہ مستونگ ءَ پاکستانی پوج ءَ دمگی پولیس کارندہ عبیداللہ ء عبدالنبی ءُ محمد شفا ء سفر خان آوار جتگ ءُ بیگواہ بیگواہ کتگ-

دومی نیمگ ءَ پنجگور ءَ بیست نومبر ءَ پروم کراس ءَ چہ سیدان ءَ دو ورنا نوید جان ء عبدالغنی ءُ ثناء اللہ ء میا آوار جتگ ءُ بیگواہ کتگ اَنت کہ چریشی ءَ پد اشانی درگت ءَ ھچ وڑیں ھال نیست-

ھمے وڑ بلوچستان ءِ بُنجاھی شھر شال ءَ دوشی پاکستانی پوج ءَ بیڑ برتگ ورنائیں شائر حلال داد زورانسری آوار جتگ بیگواہ کتگ

اھوالکار ءِ رد ءَ حلال داد ء اللّٰہ داد کیچ تمپ ءِ دمگ نزر آباد ءِ جھمنند اِنت ءُ نودربرے ، دوشی شپ ءِ ساھت دوازدہ ءَ پاکستانی پوج ءَ شھدربرجاہ ءِ ھاسٹل ءَ بیڑ برتگ ءُ آ آوار جتگ بیگواہ کتگ۔

دومی نیمگ ءَ پاکستانی پوج ءِ دست ءَ چہ کوھلو ءَ بیست ءُ پنچ اگست ءَ زورانسری بیگواہ کنگ بیتگیں خالق ء مولابخش ءُ چہ پنجگور ءَ ھپت نومبر ءَ بیگواہ کنگ بیتگیں حاجی شعیب ء واحد بخش، چہ ھاران ءَ ھاجی محمد حسین وھدے کہ ناصر آباد کیچ ءَ جبران احمد یل کنگ بیتگ ءُ وتی لوگاں سر بیتگ اَنت-

بلوچستان لبریشن فرنٹ جارکش میجرگوھرام بلوچ ءَ گوشتگ بی ایل ایف ءِ گچینی ٹولی سدو آپریشن بٹالین “ سوب” سرمچار گوستگیں سِی ءُ چار کلاکاں نوکنڈی ءَ برگیڈ ھیڈکوارٹر ءَ سیندک ءُ ریکوڈک پراجیکٹس ءَ درملکی کارگس ءُ جھمنندیاں جاڑیگ انت-

آئی ءَ گوشتگ ھمے وھد ءَ پاکستانی پوج ءِ زمینی ءُ برزی لشکر کہ آیانی توک ءَ ایس ایس جی کمانڈوزاں کنٹرول کنگ ءِ بازیں جھد کتگ بلے اود ءَ جاڑیگیں سرمچاراں پسھی اُرش ءَ پشتکنزی کتگ انت – گوستگیں دو روچاں جنگ ءُ چوپاں اود ءَ کشگ بیتگیں پوجی کارندھانی لاش انگت ءَ کپتگ انت-

بی ایل ایف رسانکدر ءِ درچ ءَ اے جار ءَ جنت کہ اگاں در ملکی مھلوکاں تاوان بیت گڑا ایشی ءِ زمہ واری پاکستان ءِ سر ءَ بیت۔

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ سرمچاراں سرجمیں بلوچستان ءَ یکجاھیں ارشاں زورگریں پوج پولیس ءُ وتگڑیں کشندہ ٹولی ءِ کارمند نشانگ کتگ انت ۔ سرمچاراں بنجاھی شھدگ بستگ انت ءُ دمگاں تر ءُ تاب کتگ ۔ سرجمی ءَ بیست ءُ نھ ارش سرمچاراں کتگ کہ زورگریں پوج ءِ بیست ءُ ھپت کارمند کشتگ انت ءُ ھبدہ ءَ گیش زدگ کتگ انت ۔ اے ارش 29 نومبر ءَ بگر تاں سی نومبر ءِ میان ءَ کنگ بوتگ انت ۔

جارکش ءَ سرجمیں ارشانی اھوال داتگ ءُ گوشتگ کہ بلوچ لبریشن آرمی سرمچاراں گوادر ءِ دمگ پسنی ءَ پاکستانی پوج ءِ کوسٹ گارڈ بنجل ءِ سرا بازیں گرنیڈ لانچر ءِ گولہ آس داتگ ۔

جارکش ءَ گوشتگ کہ سرمچاراں گوادر ءِ دمگ جیونی ءَ زورگریں پاکستانی پوج ءِ ملٹری انٹلی جنس ءِ کارمند ءُ چاریگ ھما وھد ءَ تراکناکیں شوروانی نشانگ جوڈ کتگ انت وھدیکہ آیاں چہ گاڑیاں ملام گپتگ ءُ واتر رؤگ ءَ بوتگ انت تراک ءَ ملٹری انٹلی جنس ءِ سے کارمند مرتگ ءُ دو سک باز زدگ بوتگ ۔

آئی ءَ گوشتگ کہ بی ایل اے ءِ سرمچاراں جیونی ءَ پاکستانی کوسٹ گارڈ ءِ بنجاھی بنجل ءِ پھازگی سنگر ءِ تہ ءَ دزبمب ارش ءِ ھم کتگ کہ اودا دو کارمند سک زدگ بوتگ انت ۔

جارکش ءَ گوشتگ کہ دومی نیمگ ءَ بی ایل اے ءِ سرمچاراں مستونگ ءَ زورگریں پاکستانی پوج ءِ میجر ءِ بیٹک ءَ ارش کتگ ۔ سرمچاراں بازیں گرنیڈ لانچرے آس داتگ ءُ زورگریں پاکستانی پوج ءِ کارمندانی سرا تیرگواری ھم کتگ ۔ ارش ءَ یک کارمند ءِ مرتگ ءُ کم چہ کم دو دگہ زدگ بوتگ انت ۔

آئی ءَ گوشتگ کہ ارشانی درچ برجاہ بوتگ کہ ھمے میان ءَسرمچاراں شال ءَ زورگریں پاکستانی پوج ءُ آئی پھازگی اڈھانی سرا شش ارش کتگ ۔

درشان ءِ تہ ءَ گوشگ بوتگ کہ بی ایل اے سرمچاراں شال ولی جیٹ زورگریں پوج ءِ چوکی ءِ کارمندانی سرا دزبمب ارش ءِ کتگ ۔

آئی ءَ گوشتگ کہ سرمچاراں شال ءَ کمبرانی دگ ءِ نزیک ءَ اللہ والا چار راہ زورگریں پاکستانی پوج پولیس ءُ ایگل اسکواڈ ءِ کارمند ھما وھد ءَ تراکناکیں شورانی نشانگ جوڈ کتگ انت وھدیکہ دھ کاند دگ بندی ھاتر ءَ یکجاہ بوتگ انت ، تراک ءَ پنچ کارمند زدگ بوتگ ۔ ھمے وڈا ھمے جاہ ءَ آوکیں ریاست پوج سی ٹی ڈی ءُ بم ڈسپوزل اسکواڈ ءِ کارمند دگہ آئی ای ڈی ارش ءِ نشانگ کتگ کہ چریشی ءَ زورگریں پوج ءَ گیشتر جانی ءُ مالی تاوان ءِ دیمپانی کنگ کپتگ ۔ آئی ءَ دیمتر ءَ گوشتگ کہ سرمچاراںشال منیر اھمد دگ ءَ ریل ءِ پٹی دو آئی ای ڈی تراکاں نشانگ کتگ ءُ تباہ کتگ ۔

بلوچ لبریشن آرمی ءَ شال ءَ کیچی بیگ ءِ پولیس تانہ ءِ گاڑی ھما وھد ءَ دزبمب ءِ جتگ وھدیکہ شھر ءَ ترگ ءَ بوتگ ، ارش ءَ کارمنداؓ جانی ءُ مالی تاوان ءِ دیمپانی کنگ کپتگ ۔

آئی ءَ گوشتگ کہ سرمچاراں کیچ ءِ دمگ گنہ ءَ دگ بندی کتگ ءُ اودے ٹاور ءِ بن ءَ ھم تراکناکیں شورو کل کتگ ءُ تباہ کتگ۔ اے ٹاور ءِ سرا زورگریں پوج ءِ کیمرہ جتگ بوتگ انت پمے ھاتر ءَ دور دیگ بوتگ ۔ ھمے وڈ گنہ ءَ زورگریں پوج ءِ پانگسے ءِ سرا ھم بازیں گرنیڈ لانچرےآس داتگ

جارکش ءَ گوشتگ کہ سرمچاراں تربت ءَ ملٹری انٹلی جنس ءِ کارگس ءِ سرا دزبمب ارش ءِ کتگ ۔

جارکش ءَ گوشتگ کہ بی ایل اے ءِ سرمچاراں مند ءِ دمگ بلو ءَ بنجاھی شھدگ ءِ سرا دگبندی کتگ ءُ دو ادار ءَ تاں پٹ پول کتگوھدیکہ ھمے میاں سرمچاراں بازار ءَ تر ءُ تاب کتگ ءُ بلوچ راج ءَ ءَ گوں تران کتگ ۔

بلوچ لبریشن آرمی ءِ جارکش ءَ گوشتگ کہ سرمچارا ھوشاپ ءِ دمگ تجابان ءَ بنجاھی شھدگ بستگ سے اداراں تاں پٹ ءُ پول کتگ ۔ آوکیں زورگریں پوج ءِ کاروان ءَ ھواریں یک گاڑی ءِ سرا ریموٹ کنٹرول آئی ای ڈی ارش ءِ کتگ ءُ تباہ کتگ وھدیکہ یک دگہ گاڑی ءِ سرا سنگر بستگیں سرمچارں ارش کتگ ارشاں زورگریں پوج ءِ شش کارمند مرتگ ءُ بازینے زدگ بوتگ انت ۔

آئی ءَ گوشتگ کہ بی ایل اے ءِ سرمچاراں بلیدہ گلی ءَ زورگریں پوج ءِ بنجل ءِ سرا ارش کتگ ، ارش ءَ سرمچاراں بازیں گرنیڈ لانچرے آس داتگ ءُ وتکاریں سلاھاں گوں زورگریں پوج تاوان بار کتگ ۔

سرمچاراں زامران ءِ دمگ سابونی ءَ زورگریں پاکستانی پوج پیادگ رؤکیں کارمند ھما وھد ءَ سنگر بستگ ءُ ارش کتگ کہ وتی بنجل ءَ در اتکگ بوتگ ارش ءَ پوج ءِ دو کارمند مرتگ ءُ بازینے زدگ بوتگ انت۔

بی ایل اے ءِ سرمچاراں کیچ ءِ دمگ تمپ گومازی نمیرانیں جھانگیر ءِ گس ءِ سرا برجاھیں زورگریں پاکستانی پوج ءِ پانگس سرا ارش کتگ ، ارش ءَ سے کارمند زدگ بوتگ انت ۔

جارکش ءَ گوشتگ کہ بی ایل اے ءِ سرمچاراں اورناچ کراس ءَ بنجاھی شھدگ ءِ سرا ناکہ بندی کتگ ءُ چار ادار ءَ گیش پٹ ءُ پول کتگ ۔

یک دگہ کار ءِ سرمچاراں اورناچ ءِ دمگ باران لک کے ءَ زورگریں پوج ءِ پیادگ رؤکییں کارمندانی سرا پیسرا سنگر بستگ ءُ آیانی سرا ارش کتگ کہ چریشی ءَ دو کارمند مرتگ ءُ کم چہ کم سے زدگ بوتگ انت ۔

آئی ءَ گوشتگ کہ بی ایل اے ءِ سرمچاراں پنجگور ءِ دمگ کاٹگری ءَ سی پیک دگ ءِ سر دگبندی کتگ ءُ ھمے میان ءَ پاکستانی پوج ءِ جوڈ کتگ کشندہ ٹولی ءِ شش کارمند دزگیر کتگ انت آیانی سلاہ دستیگ کتگ انت کہ سے ایم پور ، سے سی تیری ، ءُ ترمل اسکوپ ھوار بوتگ انت ۔

سرمچاراں پنجگور سبز آپ ءَ لیویز تانہ گپتگ ءُ درسیں سلاہ ءُ سامان دستیگ کتگ انت کہ آیانیبتہ ءَ یک سی تیری ، دو پسٹول ، سے پرپٹ ھوار بوتگ انت سرمچاراں چار ادار ءَ گیش دگبندی کتگ ۔

جئیند بلوچ ءَ گوشتگ کہ بی ایل اے ءِ سرمچاراں وشبود ءَ پولیس تانہ ءِ سرا کنٹرول کتگ یک سی تیری ءَ ھوار دگہ جنگی مڈی ءُ دو پرپٹ دستیگ کتگ انت ءُ سرمچاراں دو ادار ءَ تاں دگبندی کتگ

ھمے میان ءَ زورگیریں پوج ءَ کاروان ءِ دروشم ءَ دیم ءَ آیگ ءِ جھد کتگ کہ سرمچارانی دگہ ٹولی ءَ آ ریموٹ کنٹرول آئی ای ڈی ارش ءِ نشانگ کتگ ءُ سنگر بستگ ءُ آیانی سرا ارش کتگ چریشی ءَ زورگریں پوج ءِ سے گاڑی تباہ بوتگ ءُ سرجمی ءَ ھپت کارمند مرتگ ءُ بازینے زدگ بوتگ انت ۔

آئی ءَ گوشتگ کہ بی ایل اے ءِ سرمچاراں کلات ءِ دمگ شیخڑی موگند ءَ زورگریں پوج ءِ بنجل ءِ سرا ارش کتگ سرمچاراں راکٹ ءُ وتکاریں سلاہ کارمرز کتگ اے ارش ءَ زورگریں پوج ءِ چار کارمند مرتگ ءُ بازینے زدگ بوتگ انت وھدیکہ ارش ءِ سوب ءَ بنجل ءَ آس لگ اتگ ۔

آئی ءَ گوشتگ کہ سرمچاراں شیخڑی ءَ زورگریں پوج ءِ ڈنی پانگس ءِ سرا اوشتوکیں یک کارمندے دور جنگیں توپک ءِ سرا نشانگ کتگ ءُ کشتگ ۔

جارکش ءَ گوشتگ کہ بی ایل اے ءِ سرمچاراں کلات ءِ دمگ مردان ءَ ھم زورگریں پوج ءِ بنجاھی بنجل ءِ سرا گاٹ دیوکیں کارمندے دوجنگیں توپکے سرا نشانگ کتگ ءُ کشتگ ۔

گڈسر ءَ بی ایل اے ءِ جارکش جیئند بلوچ ءَ وتی درشان ءِ تہ ءَ گوشتگ کہ بلوچ لبریشن آرمی اے درسییں ارشانی زمہ واری ءَ من ایت ءُ ترندتریں ارش ءِ جار ءَ جنت ۔ ءُ چہ بلوچ راج لوٹ کنت کہ چہ زورگریں پوج، آئی ءِ کمکار ءُ چاریگ ءَ چہ گستہ بہ بیت ۔

سدو آپریشنل بٹالین (SOB) بلوچستان لبریشن فرنٹ ءِ اسٹریٹیجک ءُ آپریشنل بودناکی ءُ تنظیمی راہ ءُ رھبند ءِ عملی درشان اِنت کہ آئی بنیاد گچینیں راہ ءُ رھبند، بے دروریں دیمونی ءِ جزبہ، گوں مھکمیں توکل ءُ ارادہ ءَ جوڑ کتگ۔ سدو آپریشنل بٹالین بلوچ جنگ ءِ آجوئی ءَ بلوچ راجی گھگیری ءِ ھما تنظیمی جوڑشت ءِ چیدگ اِنت کہ زورگر ءِ پوجی تاکت ءِ دیم ءَ پہ مھکمی اوشتیت ءُ زورگر ءِ توانمندیں تاکت ءَ تاوانبار کنت کہ دژمن ءَ کدی نہ جیڑ اتگ۔

جارکش ءَ گوشتگ کہ سدو آپریشنل بٹالین ءِ جوڑشت دمگ ءُ بلوچستان ءِ بدل بوتگیں جاورانی پشدر ءَ بلوچستان لبریشن فرنٹ ءِ تنظیمی ءُ آپریشنل بودشتانی ودینگ ءِ نیمگ ءَ اولی کدم انت۔

جارکش ءَ گوشتگ بلوچستان ءِ آجوئی تھریک ءِ تھا جند ندری ءِ پلسپہ یک بگیری یے نہ انت بلکیں یک سمائی گامگیجے۔ اے پلسپہ ءِ گوانک آجوئی جنز ءِ سْرپاں ھواریں ھما باسمائیں ورنایاں چست کتگ کہ راجی ھستمان ءِ بنی آدمی مرگ ءَ چہ دیماتر پہ شرپداریں آجوئی ءِ واب ءِ مانا کنگ ءَ میدان ءَ ایر کپگ ءَ اَنت۔ بلوچستان لبریشن فرنٹ ءِ قیادت اے سما ءُ زانشت ءِ واھند انت کہ زورگر ءِ پوجی تاکت، کہ آرا دنیا ءِ تاکتوریں بدواھگ ءُ ناشر پسندیں ملکانی کمک ھاسل انت، پمشکا آیانی ھلاپ ءَ جنگی میدان ءَ سوبمندی ھاسل کنگ ءِ واستا المی انت کہ بودناکیں ورنایاں رھبند ءِ رد ءَ آرگ ءُ یک انچیں تنظیمی تاکتے ءِ ٹھینگ کہ آ زیردستیں بلوچستان ءَ زورگر ءِ پوجی تاکت ءِ پروش دیگ ءَ سوبینی بہ رسیت۔

جارکش ءَ گوشتگ بلوچستان لبریشن فرنٹ ءِ “ جند ندر “ سدو آپریشنل بٹالین شھید کمانڈر واجہ سدو (سعادت مری) ءِ نام ءَ گوں ھمگرنچ انت۔ شھید کمانڈر سدو مری ءَ اے کرن ءِ بندات ءَ انوگیں جنگ ءِ آجوئی ءِ بنگیج کنگ ءَ ارزشتداریں کردارے ادا کتگ۔ بولان ءِ کوھاں آجوئی جنگ ءِ سرمچارانی پکری ءُ پوجی ھیلکاری ءَ بگر داں مکران ءِ کوھاں آجوئی جنگ ءِ سرمچارانی لڑ بندی، جوڑ کنگ ءُ داں ھیلکاری ءَ، آجوئی ءِ جنگ ءَ را راجی ءُ ادارجاتی بنیاد ءَ ٹھینگ ءُ رھشونیں کردارے ادا کتگ۔ آئی ءَ وتی زندگی آجوئی جھد ءِ بھر جوڑ کرتگ بلوچ راج ءَ را اے سبک داتگ کہ آجوئی پہ واھگ ءُ واھشت نہ بلکیں دیمونی ءُ گوں یکشلیں جھد ءَ ھاسل کنگ بیت۔

جارکش ءَ گوشتگ کہ واجہ سدو مری ءِ نام تھنا یک مردمے ءِ درگت ءَ نہ انت بلکیں یک سرجمیں ادارھے۔ آئی گوں وتی ھم پکریں سنگتانی ھمراھی ءَ آجوئی ءِ جنگ ءِ مھکم کنگ ءَ جوان ءُ رھدربریں رھبند داتگ کہ مرچیگیں جنگ ء آجوئی ءَ ادارجاتی جوڑشت ءِ بنیاد بوتگ۔ واجہ سدو ءِ کردار آجوئی ءِ جنگ ءَ کردے جھد ءِ چیدگ انت۔ سوب ءِ ھر “ جند ندر “ واجہ سدو ءِ ھمے پکر ءُ لیکھی میراس ءِ پاسبان انت، آ زانت کہ آئی تپنگ تھنا دپمپانی ءِ سلاھے نہ انت بلکیں جھد ء آجوئی ءِ چیدگ انت۔

سدو آپریشنل بٹالین بلوچستان لبریشن فرنٹ ءِ اولی سرپ ءِ دستہ انت۔ ایشی ءَ را آجوئی جنگ ءِ سلاھبندیں میدان ءَ تزویراتی رد ءَ ارزشت، ھما جنگی ٹارگٹانی زمہ واری داتگ اَنت کہ آ نوکیں شوربندیانی لوٹ ءَ کنت۔ سدو آپریشنل بٹالین ءِ مشن ھما ٹارگٹاں گوں پیوست انت کہ آ دژمن ءِ پوجی ءُ لُٹ ءُ پُلی، مالی بُنپد ءِ نشاناں جکسینگ ءِ توان ءُ تاکت داریت۔

بلوچستان ءِ آجوئی تھریک ءَ سدو آپریشنل بٹالین، کومی جنگ ءِ ھما بھرگ ءِ نمائندگی ءَ کنت کہ آ کردے گھگیری ءَ مھکم ءُ آپریشنل بودشتاں گوں جوڑینیت کہ آ توانائیں پوجی تاکت ءَ شکست دیگ ءِ ھاٹیگ ءُ توان داریت۔ اے بٹالین بلوچ آجوئی تھریک ءِ سلاھبندیں میدان ءَ گیشتر مھکم ءُ تاکتور جوڑ کنگ ءِ ھاتر ءَ بے دروریں کردارے ادا کنت۔

سدو آپریشنل بٹالین دژمن ءِ توانائیں پوجی بُنھشت ءِ پادگانی جکسینگ ءِ ھاتر ءَ گچینیں ٹارگٹاں اُرش کنت ءُ بلوچستان ءَ زورگریں دژمن پوج ءَ پشت ءَ پدکنزینیت ءُ بلوچ سرزمین ءِ سر ءَ دژمن ءِ واستا ترس ءُ بیم ءِ چیدگ جوڑ بیت۔ “ جند ندر “ بٹالین بی ایل ایف ءِ دومی یونٹاں گوں ھمدست بیت ءُ جد ءُ جھد ءَ برجاہ داریت ءُ ارزشتداریں نشانگاں ھاسل کنت تنظیم ءِ جنگی بودشت ءَ مھکم ءُ کردے دروشمے دنت۔

سدو آپریشنل بٹالین ءِ سرمچار کومی شرپ ءِ پاسبان انت۔ زورگر ءِ پوجی ءُ مالی بنپد ءِ تباہ کنگ ءِ واستا آئی پیش کدمی ءُ ترند رپتاریں کارروائی آجوئی جنگ ءِ سلاھبندیں میدان ءَ مھکمیں تاکتے ءِ سبب جوڑ بنت۔ بلوچستان لبریشن فرنٹ ءِ اے بٹالین کومی گھگیری ءَ مھکمیں رھبند ءِ رد ءَ توانمند کنت ءُ تھریکی وابستگی ءَ گشتر توانا کنت ءُ بلوچ جنگ ءِ آپریشنل بودشتاں گوں تھریک ءَ نوکیں دروشمے دنت۔

جارکش ءَ گوشتگ کہ سدو آپریشنل بٹالین شھید واجہ سدو ءِ واب ءِ املی مانا انت۔ واجہ سدو ءُ سنگتاں آجوئی ءِ جنگ ءَ را ادارجاتی بنیاد ءَ مھکم کنگ ءِ بندات کتگ، آئی پکری سنگت ھمے بنیاد ءَ مھکم کن انت ءُ آجوئی ءِ جنگ ءَ تاکتے دے اَنت۔ یک آزات ءُ وتواجھیں، شرپمندیں ڈیھے ءِ ھاسل کنگ ءِ واستا اے “ جند ندر “ بٹالین یک گچینیں گامگیجے۔

جارکش ءَ گوشتگ کہ سدو آپریشنل بٹالین بلوچستان ءِ آجوئی ءِ جنگ ءِ مچانکی میدان ءَ دژمن ءِ واستا کھرے جوڑ بیت ءُ بلوچ کومی جنگ ءِ کردے گھگیری ءِ چیدگ بیت۔ مچانکی گھگیری ءِ اے کاروان پاسبان ء وتن ءِ دیمونیاں گوں یکشلیں جھد ء آجوئی ءِ سپر ءَ برجاہ داریت۔ آجوئی ءِ بام ءِ درپشگ ءَ دانکہ سوب ءِ گھگیری برجاہ مانیت۔

وئیل ءَ ٹپی ءُ بیران بوتگیں جنکوانی کھول ءَ گوستگیں دو روچ ءَ زھرشانی کنگ ءَ اِنت ءُ اے وئیل ءَ ھواریں پورسز ءِ کارندھانی ھلاپ ءَ کارروائی کنگ ءِ لوٹ کنگ ءَ اَنت۔

بلوچستان ءِ دمگ ھوشاب ءِ گوستگیں روچ ءَ بوتگیں وئیل ءِ ھلاپ ءَ ایم 8 شھدگ ءِ سر ءَ دمگی مردمانی زھرشانی دومی روچ ءَ برجاہ اِنت۔ زھرشانی کنوکاں شھدگ بند کتگ ءُ اے کار ءَ ھواریں کارندھانی ھلاپ ءَ زوت کارروائی کنگ ءِ لوٹ ءَ کنگ ءَ اَنت۔

گوستگیں شپ ءَ ھوشاپ ءَ بوتگیں وئیل ءَ نزیکیں ایف سی کیمپ ءَ چہ مارٹر ءِ گولہ آس دیگ بیتگ کہ یک لوگے ءَ لگ اتگ۔ گولہ باری ءِ سبب ءَ لوگ ءِ پنچ جنک ٹپی بوتگ انت کہ ایشانی تہ ءَ یکے یاسمین بنت ناصر وتی ٹپیانی سبب ءَ بیران بوتگ۔

اے وئیل ءَ پد دمگ ءَ زھر درشان بیتگ ءُ ایم 8 ءِ شھدگ ءِ سر ءَ مزنیں کساسے ءَ دمگی مردم یکجاہ بوتگ اَنت۔ داں شپ ءَ دوئیں نیمگ ءَ بند کنگ بوتگ ءُ زھرشانی بندات کنگ بوتگ۔ زھرشانی ءَ مروچی دومی انت۔

ھالانی رد ءَ مرچی سھب ءَ دھرنا ءِ نزیک ءَ ناشناسیں سلاہ بندیں مردمانی تیرگواری چہ یک مردمے ءِ پاد ءَ تیر لگ اتگ۔

دھرنا ءِ بھر زوروکیں مردمانی گْوشگ اِنت کہ اے زھرشانی داں ھما وھد ءَ برجاہ بیت داں اے وئیل ءَ ھمگرنچیں کارندہ دزگیر کنگ مہ بنت ءُ زدگیں مردم ءِ کھول ءَ انساپ دیگ مہ بیت –

زھرشانی کنوکیں مردمانی گْوشگ اِنت کہ گوستگیں شپ ءَ بوتگیں پدردیں ویل ءُ مرچی تیرگواری دمگ ءَ ناامنی گیش بوھگ ءِ نشانی اِنت۔