TBP Balochi

گوستگیں شپ ءَ سلاہ بندیں مردماں بلوچستان ءِ دمگ سوراب ءَ دگ مزن شھدگ بستگ ءُ گاڑی پٹ ءُ پول کتگ انت-

اھوالانی رد ءَ گوستگیں شپ ءَ بازیں کچے ءَ سلاہ بندیں مردماں مزن شھدگ بستگ ءُ اود ءَ گاڑی پٹ ءُ پول کتگ انت-

گاڑیانی پٹ ءُ پول ء وھد ءَ دگہ تاوانانی اھوال دیم ءَ نیتکگ انت-

زانگ بہ بیت بلوچستان ءَ بازیں جاھاں سلاہ بندیں مردم دگانی سر ءَ بندگ ءُ اود ءَ چہ بلوچستان ءَ دیم پہ پنجاپ ءَ مڈی بروکیں گاڑیانی نشانگ کنگ ءِ ھواری ءَ دگہ سرکاری کار سازاں تاوان دیگ ءَ انت-

بلوچستان ءَ آجوئی لوٹوکیں سلاہ بندیں گلانی لیکہ انت کہ بلوچستان ءِ مڈیانی برگ ءَ ملکی ءُ درملکی کمپنیاں اجازت دیگ نہ بیت انت –

سلاہ بندیں بلوچ آجوئی لوٹوکیں گلاں گوست ءَ ھم کمپنی ءُ ٹرانسپورٹ واھند بیھار ءُ سرپد کتگ انت کہ آ بلوچستان ءِ مڈیانی برگ ءَ وتی گاڑیاں کارمرز مہ کن انت اگاں کسے ءَ چوشیں کارے ءَ دست ھوارینت گڑا آ وتی جان ءُ مالانی زمہ وت بیت انت-

گوستگیں لھتے ماھانی توک ءَ بلوچستان ءِ شھدگانی سر ءَ بازیں کچے ءَ مڈی بروکیں گاڑی ماندارگ ءُ تاوان دیگ بیتگ انت –

بلوچستان ءِ بُنجاھی شھر چہ شال ءَ ھالانی رِد ءَ انگیر ءَ کتگ ءُ لوگانی پٹ ءُ پول کنگ ءَ اِنت-

بلوچستان ءِ بُنجاھی شھر چہ شال ءَ ھالانی رِد ءَ ھنی شپ ءَ پاکستانی پوج ءِ مزنیں کچے ءَ سریاب ءِ دمگ انگیر ءَ کتگ سرچ آپریشن بندات کتگ، اود ءَ ولی جیٹ، ایریگیشن، برما ھوٹل ءُ کش گوراں پوج ءِ مزنیں کچے ءَ ساڑی اَنت-

ھالانی رِد ءَ اے میان ءَ پوج ءَ لوگاں پٹ ءُ پول کنگ ءَ اِنت وھدے کہ دمگ ءَ چہ ڈن رؤکیں تہ ءَ آؤکیں راہ بند کتگ اَنت-

تنی وھدے سرکاری واکدار نیمگ ءَ ھچ وڑیں درشان دیم ءَ نیتکگ-

سلاہ بندیں مردماں پوج ءِ کارندہ اُرش ءِ نشانگ کتگ کُشتگ-

بلوچستان ءِ دمگ چاگی ءِ شھر تفتان ءَ سلاہ بندیں مردماں تیرگواری کتگ پاکستانی پوج ءِ کارندہ اختر کُشتگ-

وئیل ءَ پد اُرشکار جاہ پہ جاھی چہ وئیلجاہ ءَ تچگ ءَ سوبمند بیتگ اَنت، وھدے کہ لاش پوج ءَ دستیگ کتگ نادُراھجاہ ءَ برتگ-

تفتان وئیل ءَ پد دمگ ءَ پوج سیکورٹی تُرند کتگ وھدے کہ پولیس رِد ءَ اُرشکارانی پٹ ءُ پول برجاہ ءَ اِنت-

اسلام آباد ءَ زورانسری آوار جنی ءِ نشانگ بیتگیں مردمانی کھول ءُ بلوچ یکجھتی کمیٹی ءِ دزگیریں رھشونانی کھول ءِ نندانک مروچی پنچمی روچ ءَ ھم برجاہ بیتگ-

زھرشانی کنوکاں مروچی یکرندے پد ءَ نیشنل پریس کلب ءِ روگ ءِ جُھد کتگ بلے پولیس ءَ یکرندے پد ءَ راہ بند کتگ، کھول ءَ پولیس ءِ اڑنانی نزیک ءَ نندانک برجاہ داشتگ-

بلوچ یکجھتی کمیٹی ءِ رھشون ماہ رنگ بلوچ ءِ کھول ءِ رِد ءَ اسلام آباد پولیس ءَ یکرندے پد ءَ زھرشانی کنوک تُرسینتگ ءُ چہ پُرایمنیں زھرشانی ءَ داشتگ اَنت-

آیانی گوشگ اِنت کہ اسلام آباد مئے گوم ءَ مجرمیں ءُ دُژمنیں وڑیں رویشگ کنگ ءَ اِنت-

زھرشانی کنوکاں جُست چست کتگ کہ چہ بلوچستان ءَ اسلام آباد ءَ اتکگ ءُ پُرایمنیں زھرشانی کنگ گناھے؟ پاکستان ءِ ادارہ مارا بہ گوش اِیت کہ مئے شھری ءُ انسانی ھکانی سر ءَ پاپندی پرچا جنگ ءَ اِنت، مارا دیوال ءَ پرچا جنگ ءَ اَنت؟ اگاں مارا کجام وڑیں تاوانے بیت گُڑا آئی ءِ زمہ واری تچکی ءَ اسلام آباد پولیس ءُ ریاستی ادارھانی سر ءَ بنت-

زھرشانی کنوکاں بھتام جتگ کہ پولیس ءَ آیانی سنگتانی ءُ ھمدردیں وکیلانی گوم ءَ بے ادبی ءُ دست ءُ گوریجیگی کتگ، آیاں گْوشتگ کہ آیانی زھرشانی سرجمی ءَ پُرایمن اِنت-

پریس کلب ءَ روگ ءَ چہ پد زھرشانی کنوک یکشل ءَ دومی روچ ءَ دگ ءِ سر ءَ نندانک ءَ نشتگ اَنت-

آیاں چہ اِھوالکاراں دزبندی کتگ کہ آ آیانی توار ءَ چست بہ کن اَنت، آیانی گوشگ اِنت ما اسلام آباد پریس کلب ءِ روگ ءُ وتی زھرشانی ءُ نکش کنگ ءَ چہ دارگ ءَ اَنت، وھدے کہ پریس کلب ءُ اِھوالکارانی بے تواری شرمندگی اِنت آ اسلام آباد پولیس ءُ انتزامیہ ءِ ناانساپی ءِ سر ءَ بے تواری ءِ ندارگی جوڑ بیتگ اَنت-

بلوچ زھرشانی کنوکانی نیمگ ءَ چہ ھکومت دیم ءَ دو لوٹ پیش کنگ بیتگ اَنت آیانی تہ ءَ بلوچ یکجھتی کمیٹی ءِ سروکانی سر ءَ دروگیں ایف آئی آرانی ھلاس کنگ ءُ آیانی یل کنگ ءُ بلوچستان ءَ زورانسری آوار جنی ءِ ھلاس کنگ ءُ بیگواھیں مردمانی یل کنائینگ ھوار اَنت-

بلوچ یکجھتی کمیٹی ءَ میان اُستمانی انسانی ھکانی گلانی اِھوالکاراں چہ لوٹ کتگ کہ آ اے جاور ھالانی سر ءَ گامگیج بزور اَنت ءُ زھرشانی ءِ بُنکی ھکانی دیگ ءَ وتی کرد ءَ پیلو بہ کن اَنت-

بلوچستان ءَ ننگ ءِ نام ءِ سر ءَ جنکے ءُ یک بچکے ءَ را مھلوک ءِ دیم ءَ کشگ بیتگ انت۔ اے جاور چہ شال ءَ مستونگ ءِ دمگ چہ ڈگاری ءِ ھَند ءَ اَئید ءِ لھتے روچانی میان ءَ بوتگ، ایشی ءِ تامر رَند ءَ ماں چاگردی رسانکدر ءَ شِنگ ءُ تالان بوتگ ءُ تْرندیں رَنج ءُ بْرانز ءِ سبب جوڑ اِنت۔

ماں چاگردی رسانکدر ءَ تالان بوتگیں تامر ءَ گندگ بوتگ کہ یک ورنائیں بچک ءُ جنکے ءَ را مھلوکانی مُچّی ءِ نیام ءَ تیر اش جُتگ ءُ کُشتگ اَنت ئے۔ اے تامر چہ یک گوانکو ءِ اکس ءَ چہ جوڑ کنگ بوتگ۔ چمیشی ءَ چِہ موہ ءَ موجود بوتگیں مردم ءِ بے وسی ءُ کوشوکانی وڑ ءُ پیم اَمل ءَ چاگردی دمگ مُچّی ءَ را ھیران ءُ ابّکہ کُتگ۔

دی بلوچستان پوسٹ ءِ پٹ ءُ پول ءِ رِد ءَ کُشّگ بوتگیں ورنا ءِ پَجّار اھسان سمالانی ءِ نام ءَ زانگ بوتگ۔
اھوالکار ءِ گُشگ اِنت کہ اھسان بوتگیں جاور ءَ چہ پیش لھتیں روچ پیش موٹر سائیکل ءَ سوار بوتگ وھدے کُشوکاں آئی ءِ شوھاز بندات کُتگ بوتگ۔ آ نزیکیں یک لوگے ءَ پَھریز بوگ ءَ سوب مند بوتگ، گڑا رند ءَ اود ءِ جھمنندیں مردماں آئی ءَ را کشوکانی دست ءَ داتگ۔

اھوال ءِ رِد ءَ اے جاور ءِ بُنجاھی کِرد جنک ءِ برات جلال ء بار جان ساتکزئی، نسیر ساتکزئی ءُ جاڑو ساتکزئی نامیں مردم اَنت۔

دمگی اھوالانی گْوشگ اِنت ملزم جلال ھان ءِ ھال ءِ اھوال چہ پورسز ءِ واکداراں گوں ھست اِنت۔ آئی ءِ ٹاہ اِنت کہ ایپ سی کرنل ءَ جلال ھان ءَ را سلاہ داتگ انت-

شاھد ءُ گواھانی گْوشگ انت کہ مِروک ءَ اندازہ بوتگ کہ آئی ءَ را کُش اَنت، کُران پاک چست کُتگ ءُ کشوکانی دیم پیش بوتگ، آئی ءَ تچک ءَ گُشتگ کہ ”بس تیر جنگ ءِ ھک ھست بس ھپت کدم ھمراہ بو، پد ءَ بجن“ پد ءَ کشوکاں آ جَتگ۔

رَند ءَ اھسان سمالانی کہ پیسر ءَ آیانی بندیگ بوتگ اَت آئی ءَ را ھم تیر گواری کن انت کش انت۔ وھدے اولی تیر ءَ بیران نہ بیت گڑا کشوک ءَ دومی تیر آئی ءِ چم ءَ جَتگ۔

ھکومتی دراَمل ءُ نگد

بلوچستان ھکومت ءَ جاور ءِ نوٹس زُرت ءُ پٹ ءُ پول ءِ جار جَتگ۔ گڑا چاگردی دمگ ءُ انسانی ھکّانی ءِ باسکاں ھکومتی چِست ءُ ایرانی سر ءَ شک ءِ درشان کنگ ءَ انت۔ آیانی گْوشگ اِنت کہ گْوست ءَ چُشیں جاورانی پٹ ءُ پول وَ سرجم نہ بوتگ اَنت، یا رَند ءَ قبائلی زبرستی ءِ سبب ءَ مجرم چہ کانون ءِ دست رس رکّ اِتگ ءُ شُتگ اَنت۔

گیرت ءِ نام ءِ سر ءَ کُشگ یک گرانیں جیڑھے پھمگ بیت انت۔ اگرچہ کانون آئی ءِ ھلاپ ءَ ترندیں سزا موجود انت، بلے زمینی گواچن گیشتر آئی ءِ چپ ءَ گندگ بنت۔

پاکستانی کانون ءَ گیرت ءِ نام ءِ سر ءَ کوش ءِ ترندیں جرم منّ اِتگ۔ 2016 ءَ پاکستان ءِ پارلیمان ءَ یک ترمیمی بلے پیش کتگ اَت آئی ءِ درگت ءَ گیرت ءِ نام ءِ سر ءَ کوش ءِ ناکابل رازی نامہ جرم منّ اِتگ۔ ھمے کانون رد ءَ نوں کشوک ءِ سیاد کشوک ءَ ماپ کنگ ءِ آئی ءَ چہ سزا ءِ مرگ رکینت کُت نہ کنت۔ انچُش کہ کانونی کواسانی گْوشگ انت کہ بازیں ھلکاں ھمے کانون ءِ سّ ءَ اَمل کنگ ھم بلاھیں چیلنجے۔

نِمدی: منی نہ دیستگیں ھَمراہ

نبشتہ کار: واھد سَنجر

دی بلوچستان پوسٹ

دْروت ءُ دْراھبات ئے

منی نہ دیستگیں ھمراہ اُمیت کناں تو مُھکمی ءَ وتی دْراجیں پندانی توک ءَ مُھکم ئے بگند ئے وھدے منی لبزاں گوں دُوچار بہ کپ ئے ءُ ترا دست بہ کپ اَنت ءُ تئی دیم ءَ چو جیڑگانی لڑاں اِیر بہ بنت ھمے لبز ءُ مارشتانی جیڑھاں کِشک ءَ گیچین بہ کن ئے وتی جنزگانی جنزاں ، جنزان بہ بہ ئے چہ میتگ ءَ وت ءَ گِسر بہ کن ئے من ءَ اِے کوھانی بُرزیں ٹُلّاں پہ چیدگے ءَ مَگند ئے گڑا ھیران ءُ پریشان بوگی نہ اِنت من ھم ساھدارے آں ساھے ءِ واھنداں باندا گون نہ باں منی ھم میھادے ھست انچوش کہ اِے زمین ءِ سر ءَ ھرچ شے یے ھست بوتگ ءُ ھست بیت ھلاس ھم بیت اِے مھروانیں ھاک ءَ من ءَ داتگ ھاک ءِ داتگیں میھاد ھم ھلاس بیت زمین مھرانی باتن ءَ گُڈی ءَ اَمبازاں زور اِیت ءُ چو مات ءِ کُٹ ءَ لیلو دنت نازینکاں وتی واب گیج اِیت

منی نہ دیستگیں ھمراہ:

بژنیگ بوگی نہ اِنت بلکیں تو تھنا کوٹی یے کُنڈ ءَ نشتگ ئے چاہ ورگ ءِ نیمون ءَ کنگ ءَ ئے سگریٹ لَنککانی شما سپر بہ کنت تو سَھی مہ بِہ ئے لبز پشت بہ کپ اَنت ءُ گیمران بہ بنت تاکان ءَ زردی مان بہ پتا اِیت ءُ مِران بہ کن اَنت ھمے کہ وھدے اِے نبشتہ کتگیں لبزانی تاکاں دیم ءَ کن ئے جیڑگانی مارشتاں وانگ ءَ بِنا کن ئے اِے ساھت ءَ من گون نہ آں بگند ئے منی کندگانی توار تئی گُوشاں مہ کپ اَنت من گِندگ مہ باں بلے ترا مُکھم بوگی اِنت پرچا کہ مُھکمی دْراجیں پندانی منزل اِنت
مُھکمی آجوئی اِنت-

منی نہ دیستگیں ھمراہ:

من وَ نابودے آں من بے کِردے آں من پہ زمین ءُ ریتکگیں ھونانی واستا ھِچ کُرت نہ کتگ ءُ ھِچ نہ کت بلے مُھکمی انسان ءِ وتی مجگانی توک ءَ اِنت من گون باں یا نہ باں ترا مُھکمی ءَ اِے سپر ءَ جنزگی اِنت جھد ءِ کاروان ءَ مُھکمی ءَ ھمسپر بوگی اِنت، اِے مہ جیڑ کہ من ءَ کے جیڑگ ءَ اِنت ھمے بہ جیڑ  ”جنگ دْراج کشیں جنگے“ منزل دْراج کشیں اوستانی باندات اِنت کسَے کنگ ءَ اِنت یا کنگ ءَ نہ اِنت من ءَ کنگی اِنت منی زمہ واری اِنت من وتی زمہ واریاں بہ زاناں کہ منی زمہ واری چے اِنت، منی زمہ واری پہ راج ءَ چے اِنت، منی زمہ واری پہ جنگ ءَ چے اِنت، منی زمہ واری پہ گُلامی ءِ ھاتر ءَ جھد کنگ ءَ چے اِنت، منی زمہ واری گَل ءِ مُھکم کنگ ءِ ھاتر ءَ چے اِنت، منی زمہ واری سنگتانی یکجاہ کنگ ءِ ھاتر ءَ چے اِنت، منی زمہ واری گَل ءِ رھبند ءِ پاسداری کنگ ءِ ھاتر ءَ چے اِنت، منی زمہ واری پہ اوتاگی رھبند ءِ ھاتر ءَ چے اِنت،منی زمہ واری پہ چاگرد ءَ چے اِنت، آ یا منی زمہ واری ھمیش اِنت کہ من گَل ءَ مُھکم بہ کناں، منی زمہ واری ھمیش اِنت کہ من جنگ ءَ اَرزان تِر بہ کناں، منی زمہ واری ھمیش اِنت کہ پنداں اَرزان تِر بہ کناں، منی زمہ واری ھمیش اِنت باندا پہ سنگتاں یل داتگیں جاگہ ءَ اَرزان بہ کناں، منی زمہ واری ھمیش اِنت من ءَ چہ پد کار مہ اُوشت اَنت، منی زمہ واری ھمیش اِنت من ءَ چہ پد گیراوئنڈ ھالیگ مہ بیت۔

منی زمہ واری ھمیش اِنت کہ من وت زمہ وار بہ باں، منی زمہ واری ھمیش اِنت کہ منی زمہ واری چے اِنت، منی زمہ واری ھمیش اِنت کہ وتی زمہ واریاں وت بہ زاناں، من ءَ زانگی اِنت جُھد ءِ پندانی توک ءَ منی زمہ واری چے اِنت، من ءَ جیڑگی اِنت ، من ءَ مارگی اِنت گُلامی ءِ ھاتر ءَ جنگ کنگ منی پَرز اِنت منی زمہ واری اِنت زوراک ءِ دیم ءَ چو کوہ ءِ اَلبرز ءَ مِک بگ منی زمہ واری اِنت، منی زمہ واری اِنت کہ من وتی زاتی تَب ءَ مٹ کت بہ کناں، منی زمہ واری اِنت کہ وتی چاگردی تَب ءَ مٹ کُت بہ کناں، منی زمہ واری اِنت کہ وتی تَب ءَ سنگتی تَب ءَ بہ کناں، منی زمہ واری اِنت وتی تَب ءَ جَنگی تَب ءَ بہ کناں، منی زمہ واری اِنت وتی تَب ءَ زاتی لوٹاں بندوک مہ کناں منی زمہ واری اِنت وتی تَب ءَ کومی تَب ءَ بہ کناں منی زمہ واری اِنت وتی تَب ءَ کومی تَب ءِ لوٹاں سرجم کنگ ءِ جُھد ءَ بہ کناں، منی زمہ واری اِنت چہ وتی زاتی تَب ءَ دَر بہ کپاں، منی زمہ واری اِنت گَل ءِ رھبند ءِ تَب ءَ وتی تَب ءَ بہ کناں منی زمہ واری اِنت گوں ھرچ سنگت ءِ تَب ءَ روگ ءِ جُھد ءَ بہ کناں، منی زمہ واری اِنت وتی میتگ ءُ چاگردی تَب ءَ وت مَٹ ءُ ھلاس کنگ ءِ جُھد ءَ بہ کناں منی زمہ واری اِنت کہ سنگتی مھروانی اِنت ءُ مھروانی ءِ رشتہ ءَ مُھکمی ءَ پیلو بہ کناں، منی زمہ واری اِنت کہ مھروانی ءِ تَب ءَ سرجم بہ کناں، منی زمہ واری اِنت کہ سنگتی ءِ تَب ءُ لوٹاں سرجم بہ کناں
بہ بکش۔

منی نہ دیستگیں ھمراہ :

من ترا چہ پھلی لوٹاں بلکیں تو بیا ئے من ءَ اِد ءَ مہ گند ئے اُوتاگ ءَ تھنا کِسھانی ترانگ پشت بہ کپ اَنت یا کہ کِسّہ ھم پشت مہ کپ اَنت منی نہ دیستگیں ھمراہ پھلی لوٹاں کہ من پہ تئی دْراجیں پندانی کشکاں دراجیں جنگ ءَ پہ ترا ھچ کُرت نہ کت ناں کہ تئی ھمسپر بُوت کُت بلکیں تئی آیگ ءَ چہ پیسر ترا چہ پیسر زندگی ءَ دْروہ اِتگ من پہ ھاک ءَ مُرتگاں ھاک ءَ گوں ھوار بوتگ آں من پہ تو ھِچ کُرت نہ کُرت نِی کہ پر تو من باندات ءِ دراجیں پند اَرزان کُرت کُت اَنت نی کہ پہ تو من باندات ءِ ھاتِر ءَ کَمکے جنگ اَرزان کُرت کت-

من ءَ پھل کن من بژنیگ آں من پہ زمین ءَ ھچ نہ کُرتگ من وَ نا بودے آں، من بے کِردے آں

منی نہ دیستگیں ھَمراہ:

دل ءَ مَیار دل ءَ کنگی ھم نہ اِنت بلکیں ما کنگ باز لوٹ ایں بلے ما انچیں کشکے ءَ انچیں راھے ءَ اَنچیں جاورانی مُساپر ایں کہ باز وھد ءَ ھما جنگی لوٹ کہ بنت بلکیں ھما لوٹ سرجم بوت مہ کن اَنت یا کہ ھما لوٹ پورو بوت کُت مہ کن اَنت بلے اِے ھم نہ اِنت کہ من وتی جُھد ءَ ھلاس بہ کناں یا کہ جُھد کنگ ءِ کوشست ءَ مہ کن اِیں نا اُمیت ھم بوگی نہ اِنت کہ مئے دست ءَ ھچ نہ بیت یا کہ پلاں کَس ءَ ، پلاں مردم ءَ وڑ نسیت ءُ وڑ نہ بیت پرچا کہ مئے لوٹ راستی ءِ لوٹ اِنت ءُ رَد آشوبی روایہ ، رَد آشوبی گَپ ، ھیال ءُ ذِھنیت کُشگی اَنت یکے ءِ لوٹ ءِ منّوک بہ بہ ایں یک بوگ ءِ جُھد ءَ بہ کن اِیں کِشک یک اِنت یکیں کِشک ءِ راھی ایں سنگر یک اِنت جنگجاہ یک اِنت منزل ھم یک اِنت گُڑا گِستا پرچا ءُ کجام بُنیاد ءَ بہ بہ ایں تئی آجوئی ءِ لوٹ یک جاھی ءُ یک مُشتی اِنت بید ء یک جاھی ءُ یک مُشتی ءَ آجوئی تھنا وابے بیت کہ سرجم نہ بیت منزل پشت کپ اِیت تھنا سپر بزّگی ءُ کوْاری برجم بنت.

بوت کنت کہ تو جیڑ ئے کہ من کامِل آں بَلے اِنّا ، ھِچ کس کامِل نہ اِنت سِکگ ءُ پَھمگ ءِ جُھد ءَ مُھکمی ءَ گام پہ گام جنزان بہ کن اِیں باز بر ءَ بازیں کارے ءُ بازیں جاھے ءَ بازیں ھمراھے ءُ بازیں ذِھنیت ءَ گوں ڈِیکّ ور ئے ءُ ھم راہ بہ ئے ءُ ھم گوپگ بہ ئے ، بوگی اِنت ، روگی اِنت ، روگ لوٹ اِیت ، بَرگی اَنت گوں بَرّگ لوٹ اَنت جنگ انگت دیم ءَ اِنت ، پند اَنگت دیم ءَ اِنت ھمسپر ، ھم گام ءَ جنزان بوگ مئے یکے دومی ءِ اوپارانی نام اِنت ما ھمے سُوچ ءُ پگر ءِ اُمیتاں بہ بہ ایں کہ ما یکے دومی ءِ اوپار اِیں ءُ اوپار بہ ایں جنزان کن اِیں زمین ءِ وت واجھی ءِ لوٹاں پیلو ءُ سرجم کن اِیں  اِے ھم مارا زانگی اِنت کہ ما چُشیں کار ءُ نزوری یے مکن اِیں کہ چراھی ءَ مئے جنگ تاوان بوْارت مئے گَل تاوان بہ ور اَنت چوشیں رَدی مکن اِیں کہ چہ وتی کوم ءَ دور ءُ گِستا بہ بہ ایں چوشیں رَدی ءُ نزوری ءِ مکن اِیں کہ سنگتی ءِ ھما پِگر تاوان بوْارت وتی پشدر ءُ پشپد ءِ رَدی ءُ نزوریاں بچاریں ءُ بزان ایں پد ءَ مکن اِیں اِیشاں کہ زیکیں تاوان ءِ سَوب بوتگ اَنت منی نہ دیستگیں ھمراہ! من ھم نزور آں، ءُ بوتگ آں من ھم رَداں، ءُ بوتگ آں ءُ رَدی باز بوتگ اَنت بلے تو اِے رَدی ءُ نزوریاں مکن کہ من کتگ اَنت من وَ ھچ نہ کُرتگ پہ کوم ءَ ، پہ جنگ ءَ ، پہ زمین ءَ ، پہ شھیدانی ریتکگیں ھوناں من بے کِردے آں من ءَ پھل کن۔

منی نہ دیستگیں ھَمراہ:

اُمیت اِنت تو مُھکم بہ ئے ءُ مُھکمی ءَ وتی جھد ءَ برجم ءُ ساڑی کن ئے پہ باندات ءِ آجوئی ءَ ھَرچ سکی ءُ سُوریاں ، گرم ءُ سرد ، شُد ءُ تُنّ ءَ سَگ ءُ اُپار کن ئے ءُ جنزان کن ئے پرچا کہ جنگ ءِ دومی نام برداشت ءُ اُوپار اِنت سلامت بات ئے ، مُھکم بات ئے ،  جنزان بات ئے ، شالا جُھد کنگ ءَ بات ئے آجوئی تئی مُراداں بات۔

تئی بے کِردیں ھَمراہ: واھد سَنجر

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

نوشکی ءَ پاکستانی پوج ءِ لشکر کشی برجاہ، میڑانی ھال

گوستگیں روچ ءَ سُھب ءِ بانگواہ نوشکی ءِ کوھی دْرچاں دوسئے، منجرو ءُ کش گوری دمگاں لشکر کشی بندات کتگ چریشی ءَ پاکستان پوج ءِ جھلی ءُ بُرزی کمک گون بیتگ-

دمگ مردمانی رِد ءَ چہ گوستگیں روچ ءَ بازیں ھیلی کاپٹر اے دمگ ءَ گندگ بیتگ اَنت کہ آیانی تیرگواریں ھیلی کاپٹر ھوار بیتگ اَنت، دمگ ءَ تُرندیں تراکانی توار ھم اش کنگ بیتگ-

بلے تنی وھدے سرکاری نیمگ ءَ اے لشکر کشی ءِ پدری کنگ نہ بیتگ-

دمگی اِھوالکار رِد ءَ گوستگیں سُھب ءَ بندات بیتگیں لشکر کشی ءَ مروچی یکرندے پد ءَ ھیلی کاپٹرانی روگ آیگ گندگ بیتگ اَنت وھدے کہ میڑانی ھم ھال اِنت-

بلوچانی آوار جنگ ءُ بیگواہ کنگ ءِ درچ برجاہ انت۔ گْوستگیں ھالانی رد ءَ بلوچستان ءِ دمگ چہ نصیر آباد ءَ سیادی داروکیں یک دھکان ءُ کراچی ءِ دمگ چہ لیاری ءَ یک رکشہ ڈرائیورے پاکستانی لشکر ءِ دزگیر کنگ ءَ پد بیگواہ بوتگ اَنت ۔

نصیر آباد ءِ نندوکیں محمد حسین ء جمال خان 5 جولائی 2025 ءِ بیگاہ ءِ 7بج ءَ چہ وتی لوگ ءَ انسداد ناشرکاری (سی ٹی ڈی) ءَ دزگیر کتگ ءُ ناشناسیں جاھے ءَ برتگ-

چمدیستگیں مردمانی رد ءَ سی ٹی ڈی ءِ کارندھاں لوگ ءِ سر ءَ چھاپہ جتگ ءُ زورانسری محمد حسین گوں وت برتگ ۔

ھمے رنگ ءَ 17 جولائی 2025 ءَ کراچی ءِ دمگ لیاری ءَ زاھد علی ء عبدالحمید اانٹیلی جنس ایجنسی ءِ کارندھاں چہ لیاری رکشہ اسٹاپ ءَ آوات جتگ ءُ برتگ۔ زاھد وتی سواری ءِ ودار ءَ بیتگ کہ لس پوشاکی کارندھاں آ گوں وتی رکشہ ءَ ھوار آوار جتگ۔

زورانسری بیگواہ کنگ ءَ پد ھردوک بیگواہ اَنت ءُ آیانی جاہ ءُ جاورھالانی بارو ءَ ھچ کس ءَ سرپدی نہ بیتگ-

بلوچستان ءِ بنجاھی شھر شال ءِ بالی پٹ ءَ دیم پہ دبئی ءَ روکیں بلوچستان نیشنل پاٹی ءِ سروک سردار اختر مینگل امیگریشن واکداراں داشتگ ٹ

اھوالانی رد ءَ سردار اختر مینگل شال ءِ بالی پٹ ءَ دبئی ءَ روکیں بالیگ ءَ آف لوڈ بیتگ ءُ امیگریشن ءِ واکداراں ھال داتگ کہ تئی نام پروژئل نیشنل آئیڈنٹیفکیشن لسٹ (PNIL) ھوار کنگ بیتگ-

زانگ بہ بیت ایشی ءَ پیش سردار اختر مینگل ءَ بلوچستان ءَ چِست توار بزانکہ بلوچ یکجھتی کمیٹی ءِ رھشونانی بندیگ کنگ ءِ ھلاپ ءَ یک روانکے چہ وڈھ ءَ دیم پہ شال ءَ روگ ءِ واستا کش اتگ ات بلے سردار اختر مینگل مستونگ ءِ ھند ءَ لکپاس ءَ دارگ بوتگ ات کہ اود ءَ آئی ءَ نندانک داتگ ات-

بلوچستان ءَ بیگواھیں مردم یا بیگواھیں مردمانی ھاتر ءَ چِست بیتگیں توارانی بارو ءَ گپ کنوکیں مردماں گیشتر سرکار ءِ نیمگ ءَ بندشانی دیمپانی انت-

ھمے وڑ ایشی ءَ پیش بلوچ یکجھتی کمیٹی ءِ بندوکیں سروک ڈاکٹر ماہ رنگ بلوچ ءُ بیگواھیں ڈاکٹر دین مھمد ءِ جنک سمی دین ءَ ھم کراچی ءِ بالی پٹ ءُ درملک ءَ روگ ءِ سر ءَ بندشانی رپورٹ بیتگ انت کہ آ امیگریشن ءَ داشتگ بیتگ انت-

بام : بی ایل ایپ ءِ نام ءَ

شائر: شیر دل

دی بلوچستان پوسٹ

بام وشیں سھبے ءِ مستاگ بیت
دژمناں پہ منَهانی داگ بیت

گیمر اِیت زرد ءَ کہ اُوستانی بهار
هور ءِ ترمپاں دل زر ایت باگ باگ بیت

ایمنی ءِ کوش نہ کش اَیت دلجمی
امبَری تیرماہ سک گَرماگ بیت

ایردستی ءَ بهار ڈکّال بنت
مارا ھامین نیکہ بس جوپاگ بیت

کسے لوٹ ایت مُجتی ءَ زندگی
توکلے جنگانی رپک ءُ راگ بیت

بس گلامی ءِ روچ نوں کُٹ اِتگ
آجوئی ءِ بام بل اِیت مستاگ بیت

شیردل پہ دودمان راج زندگ اَنت
هر بلوچ ءِ کہ سراں بس پاگ بیت