بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ سرمچاراں شال مستونگ ءُ نسیرآباد ءَ زورگریں پوج ءِ سر ءَ سَے اُرش کتگ انت کہ زورگریں پوج ءِ مزنیں اپسرے ءَ ھوار ھپت کارمند مرتگ انت ۔
جارکش ءَ گوشتگ کہ سرمچاراں مروچی شال ءَ جبل نور ھند ءَ میجر رینک ءِ اپسر انور کاکڑ ءِ سر ءَ ریموٹ کنٹرول بمب اُرشے کتگ ۔ اے کار بی ایل اے ءِ گچینی ٹولی ایس ٹی او ایس ءَ انٹلی جنس ونگ زراب ءِ ھال دیگ ءَ پد سوبمندی ءَ گوں آسر کتگ ۔
آئی ءَ گوشتگ کہ پاکستانی پوج ءِ میجر انور کاکڑ بلوچستان ءَ زوراکیاں ھوار بوتگ ءُ آ آئی ایس پی آر ءِ سروکی ءَ ڈس انفولیبز ءِ سروکی ءَ کنگ ءَ بوتگ ۔ کہ آئی ءِ مول چاگردی ترامجاھاں ھزاراں دورگیں اکاؤنٹ ءُ ویب سائٹانی سر ءَ بلوچستان ءِ راستیگیں جاورھالاں چیر بہ دنت ءُ زورگریں ریاست ءِ ھک ءَ پروپیگنڈہ بہ کنت ۔
بی ایل اے ءِ انٹلی جنس ونگ زراب ءَ دیر انت کہ انور کاکڑ ءِ سر ءَ بوتگ کہ کجا روت ءُ کیت کجا نند ایت تانکہ آ وتی گڈی جاہ ءَ سر کتگ ۔
جارکش ءَ گوشتگ کہ آدینگ ءِ روچ ءَ بی ایل اے ءِ سرمچاراں مستونگ ءِ دمگ آب گلی نزیک ءَ ژلی ءَ زورگریں پوج ءِ راہ بستگ ءُ آیانی سر ءَ اُرش کتگ ۔ اُرش ءَ دشمن ءِ شش کارمند ھما دمان ءَ مرتگ ءُ وھدیکہ آیاں بازین جانی ءُ مالی تاوان ءِ رس اِتگ ۔
جارکش ءَ مروچی سھب ءَ نصیر آباد ءِ دمگ منجھو شوری ءَ سرمچاراں زورگریں پوج ھما وھد ءَ تراکناکیں شوروانی نشانگ جوڑ کتگ وھدیکہ آ پانگس ءِ تہ ءَ پوجی کاروان ءِ پھازداری ءَ اتکگ بوتگ انت ۔
سرمچاراں ادارکی پانگس ءِ تہ ءَ پیسرا تراکناکیں شورو کل کتگ تراکینتگ انت چریشی ءَ دو کارمند سک زدگ بوتگ انت ۔
جارکش ءَ گڈسر ءَ وتی درشان ءَ گوشتگ کہ بی ایل اے ھر سئیں اُرشانی زمہ واری ءَ من ایت ۔
