TBP Balochi

بلوچستان ءِ دمگ کلات ءَ پاکستانی لشکر آپریشن کنگ ءَ اِنت۔

ھالانی رد ءَ کوھک ءُ کش ءُ گوری دمگاں پاکستانی لشکر ءِ کارندہ پیادگیں ءُ گاڑیانی ھواری ءَ دیم ءَ جنزگ ءَ انت-

واکداراں اے درگت ءَ انگت ءَ ھچ وڑیں اھوال نہ داتگ انت۔

چِد ءُ پیش ھم پورسز ءَ اے دمگ ءَ دیم ءَ روگ ءِ جھد کتگ ات ءُ پورسز ءَ اُرشانی دیمپانی کنگ کپتگ-

زانگ بہ بیت کہ سئے روچ پیسر نوشکی ءِ کوھی دمگاں آپریشن بندات کنگ بوتگ کہ ایشی ءِ تہ ءَ گن شپ ءِ ھیلی کاپٹراں بھر زرتگ ءُ راکٹ ءُ تیرگواری کتگ کہ ایشی ءِ تہ ءَ دمگ ءَ بازیں کساسے ءَ گولہ باری بیتگ انت-

نوشکی ءَ ھم پاکستانی لشکر ءِ کمانڈو ءُ آجوئی لوٹوکیں مردمانی نیام ءَ ترندیں جنگ ءُ چوپانی ھال رس اِتگ اَنت۔

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گوشتگ کہ تپتان ءَ زورگریں پوج ءِ یک کارمندے کشتگ وھدیکہ شال ءُ مستونگ ءَ دزگیر کتگیں چاریگ مرگ ءِ سزا داتگ انت ۔

بی ایل اے ءِ جارکش ءَ گوشتگ کہ مئے سرمچاراں گوستگیں روچ ءَ ماں تپتان ءَ زورگریں پوج ءِ یک کارمندے سر ءَ ھما وھد ءَ اُرش کتگ ءُ کشتگ وھدیکہ آ وتی بنجل ءَ در اتکگ ءُ بازار ءِ نیمگ ءَ رؤگ ءَ بوتگ ۔ مرتگیں کارمند ءِ پجار اختر ء محمد صدیق آرائی ءِ کہ شجاع آباد پنجاپ ءِ نندوک بوتگ ۔

جارکش ءَ گوشتگ کہ بلوچ لبریشن آرمی ءِ سرمچاراں ماں شال ءَ زورگریں پوج ءِ چاریگ محمد نواز ء شیردل ھان سمالانی جھمنند ھزار گنجی دزگیر کتگ ۔

چاریگ محمد نواز ءَ جست ءُ پرس ءِ وھد ءَ دپ ءِ وت من اتگ کہ آ سال 2020 ءَ آئی ایس آئی ءِ واستا چاریگری ءِ کار ءَ کنگ ءَ انت ۔ آئی ءَ گوشتگ کہ من شال ءُ مستونگ ءَ ھبدہ مردم پوج ءِ دست ءَ گرائینتگ ۔

آئی ءَ وت من اتگ کہ من مردم لالچ داتگ انت، بلیک میل کتگ انت ءُ پہ زورگریں پوج ءِ ھاتر ءَ کار گپتگ انت ۔ ءُ آئی ءَ وتی سنگت ءُ دگہ چاریگانی نام ءُ راز ھم داتگ انت ۔

جارکش ءَ گوشتگ کہ بی ایل اے ءِ سرمچاراں یک جولائی ءَ بیڑے ءِ وھد ءَ پاکستانی پوج ءِ چیرین ادارہ آئی ایس آئی ءِ کارمند فیصل ء نزیراھمد شاھوانی جھمنند پڑنگ آباد مستونگ دزگیر کتگ ۔

آئی ءَ گوشتگ کہ فیصل ءَ دپ ءِ وت من اتگ کہ من آئی ایس آئی ءِ گوشگ ءِ پد ءَ کھڈکوچہ ءُ کش ءُ گوری ھند ءُ دمگاں ایندگہ چاریگانی ھمراھی ءَ گشت ءَ شتگاں ءُ چاریگری کتگ ۔ زورگریں پوج ءِ گوشگ ءِ پد ءَ مردمانی زورانسری اوار جنی ءَ ھم اے ٹولی ءِ دست مان انت ۔

چاریگ فیصل ءَ گوشتگ کہ احسان شاہ ء مقبول شاہ جھمنند پڑنگ آباد مستونگ ءَ چیریں ادارھانی گوم ءَ کار کنگ ءَ انکار کتگ گڑا آئی ایس آئی ءِ افیسر عمر ءَ آ کشتگ۔

آئی ءَ گوشتگ کہ آئی ایس آئی ءِ اپسر عمر ءَ احسان شاہ کیس نام ءَ بلیک میل کتگ ءُ وتی کارگس ءَ لوٹارینگ ءُ آئی ءِ سر ءَ بھتام جتگ کہ گوں سلاہ بندیں گلاں آئی ءِ سیادی ھست پہ مئے ھاتر ءَ کار بہ کن بلے آئی ءَ نہ من اتگ گڑا شوربندی ءِ رد ءَ 3 جون 2025 ءَگنجی ڈور ھند ءَ دگ بندی ءَ کوشارینتگ ۔

جارکش جیئند بلوچ ءَ گوشتگ کہ چاریگ محمد نواز ءُ چاریگ فیصل شاھوانی کتکاریانی منگ ءَ پد بلوچ راجی آمیدگس ءَ آ مرگ ءِ سزا داتگ انت کہ سرمچاراں ھردو کشتگ انت ۔

جارکش ءَ گوشتگ کہ بی ایل اے ھر سئیں کارانی زمہ واری ءَ من ایت ۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست جولائی ءِ بیگاہ ءَ سوراب شھر ءِ یک بلاھیں بھرے دستیگ کتگ ءُ شال – کراچی بُنجاھی شھدگ سر ءَ سے جتاجتائیں ھندانی سر ءَ چیک پوائنٹس برجاہ داشتگ ءُ گاڑی پٹ ءُ پول کتگ اَنت- سرمچاراں مساپرانی گوم ءَ نرمیں رویشگ داشتگ وھدے کہ پٹ ءُ پول میان ءَ ھچ وڑیں بلوچ دُژمنیں مردم دز نہ کپتگ-

جارکش ءَ گْوشتگ ھمے میان ءَ سرمچاراں ھاجی ھوٹل ءُ گدر کراس ءَ ناکہ بندی کتگ، کسٹم واکدار انگیر ءَ کتگ اَنت ءُ آ سلاھانی چگل دیگ ءَ گْوشتگ اَنت، یک کارندھے ءَ گھگیری ءِ جُھد بلے سرمچاراں وھد سر ءَ کاروائی چہ آ ٹپی بیتگ ءُ سرجمیں کارندہ ءَ دزگیر کتگ اَنت-سرمچاراں کسٹم واکدار ءَ چہ آیانی سلاہ دستیگ کتگ ءُ پوسٹ مانداشتگ-

جارکش ءَ گْوشتگ کہ زورگریں پوج ءِ دومی ٹولی ءَ ھمے میان ءَ سرمچارانی سر ءَ اُرش کتگ بلے سرمچاراں پیشکدمی کنوکیں پوج سر ءَ اُرش کتگ آ پشکنزگ ءَ لاچار کتگ اَنت-

جارکش ءَ گْوشتگ کہ زورگریں پوج ءِ سرمچارانی سُر ءُ پُرانی سر ءَ نگاہ داروکیں سرویلنس ڈرون ءُ کواڈ کاپٹر بال داتگ کہ آ سرمچاراں نشانگ کتگ ءُ دور داتگ اَنت- ناکہ بندی ءِ میان ءَ سرمچارانی نشانگ کنگ ھاتر ءُ چہ کواڈ کاپٹر سر ءَ مارٹر گولہ آس داتگ بلے سرمچاراں پہ سلامتی درتکگ ءُ وتی مُھریں اوتاکاں سر بیگ ءَ سوبمند بیتگ اَنت-

جارکش ءَ گْوشتگ کہ بی ایل ایف ءِ سرمچاراں بیست یک جولائی ءِ سُھب ھپت نیم ءِ نزیک ءَ یک سوبمند ءُ مزنیں اُرشے ءَ پاکستانی پوج ءِ دو گاڑیانی کاروان ءَ ھوار یک گاڑی یے رخشان ءِ دمگ واشک ءَ آئی ای ڈی بمب اُرش ھما وھد ءَ نشانگ کتگ وھدے دُژمنیں پوج وتی بُنجاھی بُنجل ءَ درتکگ بورڈ ھوٹل ءِ نیمگ ءَ آیگ ءَ بیتگ- اُرش ءِ آسر ءَ گاڑی ءَ سوار شش کارندہ ءُ گاڑی سرجم ءَ تباہ بیتگ-

جارکش ءَ گوشتگ بلوچستان لبریشن فرنٹ ءِ سرمچاراں دگہ یک سوبمندیں کاروائی بیست یک جولائی ءِ سُھب دہ ءِ نزیک ءَ پاکستانی فرنٹیئر کور ءِ یک گاڑی یے ءِ سر ءَ ھما وھد ءَ اُرش کتگ وھدے زورگریں پوج ءِ سامان بروکیں گاڑیاں چہ زر گرگ ءِ ھاتر ءَ گشت کنگ ءَ بیتگ – اے اُرش ءَ پوج ءِ دو کارندہ مرتگ ءُ بازین ئِے ٹپی بیتگ اَنت-

جارکش ءَ گْوشتگ کہ سوراب، رخشان ءُ دشت ءِ اُرشاں زورگریں پاکستانی پوج ءِ ھشت کارندہ کشتگ ءُ بازین ئِے ٹپی کنگ ءِ، کسٹم چیک پوسٹ سر ءَ دستیگ ءُ سلاھانی برگ ءُ سوراب ءَ بُنجاھی شھدگ سر ءَ گاڑیانی پٹ ءُ پول کنگ زمہ واری ءَ منّ ایں-

اسلام آباد ءَ زورانسری آوار جنی ءِ نشانگ بیتگیں مردمانی کھول ءُ بلوچ یکجھتی کمیٹی ءِ دزگیریں رھشون ءِ کھول ءِ نندانک سرجمیں اَڑان ءَ اَبید مروچی ششمی روچ ءَ ھم برجاہ بیتگ-

کھول ءَ مروچی یکشل ءَ سیمی روچ ءَ اسلام آباد پولیس ءِ نیمگ ءَ چہ پریس کلب ءَ روگ ءَ داشتگ اَنت، ءُ آیاں تمبو جنگ اجازت دیگ نہ بیتگ اَنت چریشی ءِ سبب ءَ بلوچ زالبول تُرندیں ھور ءِ میان ءَ پچیں آسمان ءِ چیر ءَ زھرشانی برجاہ داشتگ-

اے درگت ءَ چہ بلوچ یکجھتی کمیٹی ءَ شنگ کتگیں درشان ءِ تہ ءَ گْوشتگ کہ نہ اوشتوکیں ھور ءُ اسلام آباد پریس ءِ نیمگ رؤکیں دگانی بندی سر ءَ برجاہ اِنت ءُ آ بی وائی سی ءِ رھشونانی یل کنائینگ ءُ زورانسری آوار جنی ءِ ھلاس کنگ لوٹ کنگ ءَ اِنت-

مروچی پولیس ءِ مزنیں کچے ءَ زھرشانی جاہ ءَ سر بیتگ اَنت بی وائی سی ءِ رِد ءَ پولیس ءُ اسلام آباد انتظامیہ زھرشانی پجّار ءِ بھانگ ءَ دلسیاہ کنگ ءَ اَنت ءُ پروفائلنگ کنگ بیگ ءَ اِنت کہ آئی ءِ ما تُرندی ءَ ایر جن ایں-

گل ءَ کڈن کتگ کہ اگاں زھرشانی کنوکاں تہ ءَ کسے ءَ تاوان رست آئی ءِ زمہ واری اسلام آباد پولیس ءُ پاکستانی واکدار سر ءَ بیت ءُ ھور ءُ بیھاراں اَبید زھرشانی کنوک وتی توار ءَ چست کنگ ءَ اَنت-

زانگ بہ بیت کہ بلوچ بیگواھیں مردمانی کھول نیمگ ءَ چہ ھکومت ءِ دیم ءَ دو بُنکی لوٹ ایر کنگ بیتگ اَنت آیانی تہ ءَ بلوچ یکجھتی کمیٹی ءِ سروکانی سر ءَ جتگیں دروگیں ایف آئی آر ءُ آیانی یل کنائینگ ءَ ھوار بلوچستان ءَ زورانسری آوار جنی ءِ ھلاسی ءُ بیگواھیں مردمانی یل کنائینگ ھوار اِنت-

شپ ءِ وھد ءَ واکدار نیمگ ءَ چہ بلوچ بیگواھیں مردمانی کھول آئی نندانکجاہ پلیٹ ءَ چہ ھم کش اِتگ اَنت چریشی ءِ سبب ءَ آ جتاجتائیں ھندانی سر ءَ شپ گوازینگ ءَ لاچار بیتگ اَنت-

بلوچ یکجھتی کمیٹی ءَ میان اُستمانی انسانی ھکانی گلاں چہ لوٹ کتگ کہ آ اے سنگین ءِ جاورھالانی گامگیج ءَ بزور اَنت ءُ زھرشانی ءِ بُنکی انسانی ھکانی دیگ ءَ وتی کرد ءَ پیلو بہ کن اَنت-

کراچی ءَ پاکستانی پوج ءَ یک شانزدہ سالی ئیں ورنایے آوار جتگ ءُ برتگ-

گیشیں اھوالانی رد ءَ گوستگیں شپ ءِ ھپت ءَ کراچی ءِ بلوچ ھند لیاری ءَ پاکستانی پوج ءَ چہ لوگ ءَ یک ورنایے آوار جتگ ءُ برتگ-

آوار جنگ بیتگیں مردم ءِ پجار شاہ زیب ء جاوید ءِ نام ءَ زانگ بیتگ- کھول ءِ رد ءَ شاہ زیب دَہ جماعت ءِ نودربرے ءُ وانگ ءَ انت-

آئی ءِ کھول ءِ رد ءَ آ گوستگیں شپ ءِ ساھت ھپت ءَ چہ لوگ ءَ آوار جنگ ءُ برگ بیتگ کہ پد ءَ ھما انت بیگواہ انت-

اھوالانی رد ءَ شاہ زیب بنکی ءَ کیچ تمپ ءِ دمگ کنشکلات ءِ جھمنند انت کہ بلے انی آئی ءِ کھول ءَ لڈ اتگ ءُ دیم پہ کراچی ءَ شتگ –

بلوچستان ءِ دمگ چہ پنجگور ءِ سیادی داروکیں گار ءُ بیگواہ بوتگیں دوست مھمد ءِ مات، کہ چہ سینزدہ سال وتی چُک ءِ واتر بوگ ءِ ودار ءَ بوتگ ءُ گڈی چہ وتی چُک ءِ جتائی ءِ درداں گوں اے کوڑھیں دگنیا یلہ ئِے دات ءُ شُت۔

دوست محمد ء واجہ عطا محمد، پنجگور ءِ دمگ پروم ءِ جھمنند ءُ عمان آرمی ءَ بوتگ کہ وھدے چھٹیانی گوازینگ ءَ وتی ھنکین ءَ آیگ بوتگ کہ آئی ءَ را 2012 ءَ چہ کراچی انٹرنیشنل بالی پٹ ءَ ناشناسیں مردماں آ زورانسری بیگواہ کُتگ۔ ھما روچ ءَ چہ پد مرچی ءَ ھم آئی ءِ ھچ ھال ءُ اھوالے نیست۔

دوست محمد ءِ بیگواھی ءَ پد آئی ءِ مات ءَ پہ دوست مھمد ھر در اِش ٹُک اِتگ، آمیدگساں ھم شُتگ، زھرشانی بُنجُلاں ھم ھوار بوتگ، ھر گور ءَ وتی چُک ءِ اکس ئِے دست ءَ ئِے گندگ بوتگ بلے انساپ ئِے نہ رستگ۔

اے اولی جاور نہ اِنت، بلکیں دوست مھمد ءِ مات ھما ماتاں گوں ھوار بوتگ کہ آیانی زورانسریں بیگواھی ءِ درد ءُ گم ءِ زندگی گوازینتگ۔ وتی چُکانی اکس وتی سینگ ءِ دلبند ءَ داشتگ ءُ چہ دگنیا ءَ شُتگ اَنت۔

دوست مھمد ءِ پت، واجہ عطا مھمد، وتی ورنا سالیں انچو چُک ءِ ودار ءَ دمبرگ چہ ایشی ءَ پیش اے کوڑھیں دنیا یلہ ئِے داتگ۔ مرچی آئی ءِ مات اوں چُک ءِ جتائی ءِ درد زُرتگیں اے کوڑھیں دگنیا یلہ دات ءُ شُت۔

کراچی ءَ یک شنگکاری ادارھے ءِ ڈائریکٹر زوراسنری بیگواہ کنگ بوتگ۔

ھالانی رد ءَ مرچی روچ ءِ 12 ءِ نزیک ءَ کراچی ءَ نامی ئیں شنگکاری ادارہ علم و ادب ءِ بنجاھی کارگس کہ کتابانی بھا کنگ ءِ بنجل انت کساس درجنے ءِ کچ ءَ نکاب پوشیں سلاہ بنداں بیڑ برتگ ءُ ادارہ ءِ انیگیں ڈائریکٹر چنگیز بلوچ زورانسری آوار جتگ ءُ برتگ-

چنگیز بلوچ ءَ ناشناسیں جاھے ءَ برگ ءِ ھال انت-

گول مال سنٹر اردو بازار ءَ چہ رس اتگیں ھالانی رد ءَ سلاہ بنداں شاپنگ مال ءِ اولی ءُ دومی ماڑی ءَ ھستیں سی سی ٹی وی کیمرہ دراہیں ٹُکّر ٹُکّر کتگ اَنت ءُ آھانی ریکارڈ ھلاس کتگ اَنت۔ پد ءَ آ سیمی تبک ءَ جھمنندیں ادارہ کارگس ءَ پرتگ انت ءُ چنگیز بلوچ ءَ گوں وت برتگ ات۔

علم و ادب کراچی ءِ یک نامداریں شنگجاھے کہ اردو، بلوچی، ءُ دگہ دمگی زباناں کتاب چاپ کنت۔ اے ادارہ ءِ پیسریگیں ڈائریکٹر لالا فھیم بلوچ ہم سئے سال پیسر 26 اگست 2023 ءَ چہ ھمے کارگس ءَ زورانسری ءَ بیگواہ کنگ بوتگ۔

آئی ءِ زوراکی ءَ بیگواہ کنگ ءِ سی سی ٹی وی فوٹیج پد ءَ دیم ءَ اتکگ اَنت کہ ایشی ءِ تہ ءَ سندھ پولیس ءِ باسکاں گوں سادہ پوشیں کارندہ فھیم ءَ برگ ءَ اَنت۔ آئی ءَ پد ءَ سئے ماہ ءَ پد یل کنگ بیتگ۔

ھمے وڑ ءَ ھمے سال ءَ بیست ءُ پنچ مئی ءَ خضدار ءِ نزیک ءَ پاکستانی لشکر ءَ شال ءِ شنگجاہ زوارکتابجاہ ءِ غنی بلوچ دزگیر کتگ ءُ بیگواہ کتگ کہ آ انگت ءَ دیم ءَ آرگ نہ بیتگ-

بلوچستان ءِ دمگ واشک ءَ ناشناسیں مردماں پاکستانی پوج ءِ کاروان آئی ای ڈی بمب ءَ نشانگ کتگ، چریشی ءِ آسر ءَ جانی ءُ مالی تاوان چست کنگ ءِ ھال اِنت-

دمگی اِھوالکار رِد ءَ اے وئیل دوشمے ءِ سُھب ءَ واشک ءِ دمگ رخشان ءَ سی پیک دگ سر ءَ ھما وھد ءَ بیتگ وھدے پاکستانی پوج ءِ گاڑیاں سر ءَ ھمگرنچ کاروان بوڈ ھوٹل نزیک ءَ گوزگ ءَ بیتگ- اِھوالکار گوشگ اِنت کہ کاروان وتی بُنجل ءَ چہ بازار ءَ روگ ءَ بیتگ-.

تراک ءِ آسر ءَ پوج ءِ یک گاڑی یے ءَ تاوان رس اِتگ- بلے ھکومت ءِ نیمگ ءَ چہ ھچ وڑیں درشان شنگ کنگ نہ بیتگ ءُ ناں بیرانیانی یا ٹپیانی کچ پدر نہ بیتگ اَنت-

تنی وھدے ھچ گل ءَ اے اُرش زمہ واری نہ منّ اِتگ- بلوچستان ءَ اے وھد ءَ پاکستانی پوج سر ءَ اُرشاں گیشی گندگ اَتکگ، اود ءَ جتاجتائیں آجوئی لوٹوکانی گل پاکستانی پوج نشانگ کنگ بیگ ءَ اِنت-

بلوچستان ءِ دمگ کیچ ءِ جتا جتائیں دمگاں چہ دو مردمانی لاش دزکپتگ انت۔ دمگی واکداراں رد ءَ ھر دوئیں مرد تیرگواری کنگ ءُ کشگ بیتگ انت۔

پولیس ءِ گشگ انت کہ تمپ ءِ ھند گومازی ءَ نھنگ کور ءَ یک مردمے ءِ لاش دست کپتگ۔ بیران بوتگیں مردم ءِ پجار مھمد رحیم ء حیدر جھمنند گومازی ءِ نام ءَ زانگ بیتگ-

محمد رحیم لھتے روچ پیسر نامالومیں موٹر سائیکل سواریں مردماں آوار جتگ ءُ برتگ کہ ایشی ءَ پد آئی ءِ بابت ءَ ھچ زانگ نہ بوتگ۔ پولیس ءِ رد ءَ اے مرد تیرگواری کنگ ءُ کشگ بیتگ-

دومی نیمگ ءَ مند ءِ ھند مندیگ کور ءَ ھم یک مردمے ءِ لاش دست کپتگ کہ آئی ءِ لاش رورل ھیلتھ سینٹر مند ءَ برگ بیتگ- آئی ءِ پجار عبدالقیوم ء عبدالحئی نام ءَ بوتگ کہ آئی ءِ سیادی نزوہ بازار بلوچ آباد گوشگ بیتگ-

دوئیں ویلانی سبب زانگ نہ بیتگ انت-

بلوچستان ءِ دمگ نوشکی ءَ مرچی سیمی روچ ءَ پوجی آپریشن برجاہ انت چریشی ءَ پاکستانی پوج ءِ زمینی لشکر ءَ برزی کمک گون انت-

نوشکی ءِ جتا جتائیں دمگ دوسے، منجرو، ھژدہ خول، گوربرات، بڈو ڈور ءَ ھوار کلات ءِ شور پارود، سور جائی ءُ کش ءُ گوری دمگ پاکستانی پوج ءِ لشکر کشیانی زد ءَ انت-

دمگ ءَ گن شپ ءِ ھیلی کاپٹراں تیرگواری ءُ بمباری کنگ ءَ اِنت ءُ ھمے وھد ءَ جتا جتائیں جاھاں مارٹرانی آس دیگ ءِ ھال ھم ھست۔

دمگی مردمانی گشگ انت کہ پورسز ءَ بازیں مردم دزگیر کتگ انت وھدے کہ دمگی مردمانی لوگ ھم سوتکگ انت۔

ھالانی رد ءَ سئے جاگہ ءَ پاکستانی لشکر ءُ سلاہ بندانی نیام ءَ جنگ ءُ چوپ بیتگ انت کہ ایشی ءِ آسر ءَ لشکر ءَ تاوان رس اتگ۔

سئے روچاں سرجمیں دمگ ءَ انگیر کنگ ءِ سبب ءَ دمگ ءَ وردن ءُ وراک ءِ کمی انت ءُ نادراہ مشکلانی آماچ انت۔