شھید نورا پیرک ءَ گوں ھمگرنچیں یات
نبشتہ کار: ریاز نسیر بلوچ
دی بلوچستان پوسٹ
2007 ءِ بندات ات، گُمان بیت جنوری یا پروری اَت کہ شپ سارت ات، سری شپ اَت من لاھور ءَ مودودی انسٹی ٹیوٹ ءِ ھاسٹل ءَ وتی کمرہ ءَ کُرسی سر ءَ نشتگ ءُ گوں ٹیبل ءِ سر ءِ شھدربرجاہ( کالج) ءِ کورس ءِ کتاباں سر ءُ لینڈ اتاں، منی پون ءَ رنگ دات، پون چہ من کمو گستا چارج ءَ جتگ ات ءُ منی تھت سر ءَ ایر اَت، من ھمے دمان ءَ چہ کُرسی ءِ سر ءَ پاد اتکاں ءُ دیم پہ پون ءَ شُتاں، سکرین ءِ سر ءَ نبشتگ ات “Qambar Chakar calling”
شھید کمبر جان من ءَ چہ شال ءَ کال کنگ ءَ ات، پون چست کت.
گوں دروت ءُ سلام ءَ پد کمبر جان ءَ کہ ھبر بندات کت منی روہ ءَ پورا تاھیر رس ات ، انچو گُمان بوت کہ کمبر جان منی دل ءِ ھالاں سھی بوتگ اَت.
کمبر جان گُشگ ءَ اَت “من ترا سنگتے ءِ نمبر ءِ دیاں نام ئِے نورا بلوچ انت پروم ءِ سنگتے پیداگ انت لاھور ءَ تو گوں نورا ھال بہ کن ، شریں پگری سنگتے گوں تو گَل ءِ کاریاں ھوار ئِے بہ کن گوں”.
اے وھد ءَ من نوک لاھور ءَ اتکگ اتاں، چیزے ماہ بوتگ ات ،من بی ایس او آزاد ءِ واستا تنزیم کاری ٹُک ٹُک ءَ بندات کتگ ات، لھتیں سنگت دست کپتگ ات، دیمتر ءَ بُنزی ءُ ھنکین جوڑ کنگی ءُ کار دیم ءَ برَگی ات انت.
من مُدام یک شمبے ءِ سھب ءَ شتگاں کوھنیں انار کلی ءَ دَگ ءِ سر ءَ کوھنیں کتاب پٹ اتگ، در چِتگ ءُ پہ ارزانیں نھاداں بھا گپتگ ءُ ونتگ ءُ باز دگہ سنگتاں چہ من بُرتگ انت چہ ھمے کتاباں بازیں مُلک ءَ پشت کپت کہ من سالے پیش سنگتاں سوگات کت انت کہ کَس آرگ ءَ اش ساڑی نہ ات.
ھر یک شمبے ءَ گڑا سھب ءَ من نورا ءَ پون کت کہ بیا انار کلی ءَ کہ ترا چہ ھم نزیک کپ ایت، گڑا بزاں من ءُ نورا جان اولی بر ءَ لاھور ءَ 2007 ءَ دُچار کپت ایں، چد ءُ پیسر من نورا کدی یا کجا دیستگ ات من ءَ یاد نہ کنت، بلکیں دُچار کپتگ ایں بلے پد ءَ ما تاں سے سال ءَ لاھور ءَ گَل ءِ کاراں ھمکاری کت ، برے اے شھدربرجاہ ءُ برے آ مزن شھدربرجاہ( یونیورسٹی) ھر کجا کہ مارا دو بلوچ وانندہ ءِ ھال ءَ گپت ما ھمود ءَ “بن بھلائے مہمان اتیں”.
بازیں اڑ ءُ جنجال ءُ بازیں خواریاں پد لاھور ءَ بی ایس او آزاد ءِ ھنکین جوڑ کنگ ءَ ما سوبمند بوت ایں، نورا جان لاھور ھنکین ءِ اولی پنچ باسکی آرگنائزنگ باڈی ءِ باسک بوت گوں.
چیزے ماہ ءَ پد ھنکین ءِ جنرل باڈی بوت، مئے اولی جرنل باڈی میٹنگ بی ایس او آزاد ءِ بُنجاھی کمیٹی ءِ باسک شھید سنگت جمالدینی ءَ کت ، شہید سنگت جمالدینی اے وھد ءَ پنچاب لاء کالج ءَ چہ ایل ایل بی وانگ ءَ اَت، من کارمستر ءُ نورا جان جارچین بزاں سیکرٹری جنرل گچین بوت.
نورا بلوچ پہ گَل ءِ کاراں مدام ساڑی ات ، دیم ءَ اَت ، وانگجاھاں دورہ کنگ ءَ اَت نوکیں سنگت شوھاز کنگ ءَ ات. کدی دم برگ ءِ نام ئِے نگپت.
نومبر 2008 ءَ بی ایس او آزاد ءِ مرکزی قومی کونسل سیشن شال ءَ بوت، من ءُ نورا جان ھر دو چہ لاھور ءَ بس ءِ سر ءَ در اتک ءُ شت ایں، باز وشیں ءُ یاتگاری سپرے اَت، من ءَ یاد انت کہ شھیدِ شال ءَ سھراب مری ءِ ویل ءِ ھال من ءَ نورا ءَ ھمے سپر ءَ دات کہ من چد ءُ پیش سرپد نہ اتاں. لاھور ءَ بس ءِ سر ءَ دیم پہ شال ءَ منی اولی رند اَت ، من مُدام ٹرین ءِسر ءَ کراچی ءَ شتگ ءُ اتکگ آں. راہ ءَ ما سکی سرور ءِ تھانہ دیست گڑا من ءَ 2005 ءَ ڈاکٹر اللہ نزر ءُ سنگتانی بیگواھی ءَ چہ دیم ءَ آیگ ءِ ھما ھال دیم ءَ اتک کہ ھمے تھانہ ءَ آرگ بند کنگ بنت ءُ آیانی سر ءَ سرکار دزی ءِ بے بُنیں بھتام جنت.
چہ لاھور ھنکین ءِ نیمگ ءَ من، نورا ءُ دگہ دو سنگت کونسلر گچین بوتگ اتیں، آ دوئیں سنگت شال ءِ نندوک ات انت لاھور ءَ وانگ ءَ ات انت ءُ پیسر ءَ چہ شال ءَ ساڑی ات انت.
کونسل سیشن ءَ من گوں وتی ھنکین ءِ دگہ دوئیں کونسلراں چیئرمینی ءِ واستا شھید سنگت ثناء ءِ پلہ مرزی کت بلے نورا چیئرمین بشیر زیب ءِ نیمگ ءَ اَت.
ھیر سیشن ءَ پد گم ما پد ءَ لاھور ءَ گل ءِ کارانی ھما ھساب ءَ یکشل ءَ برجاہ داشت، سیش ءَ پد ھنکین ءِ جنرل باڈی میٹنگ لوٹائینت، من اے رندی کابینہ ءَ نہ اتکاں، نورا بلوچ لاہور ھنکین ءِ نوکیں کارمستر گچین کنگ بوت ،ڈاکٹر نازر نور، ڈاکٹر سئید ءُ ایدگہ سنگت کابینہ ءِ ایدگہ اُگدھانی سر ءَ گچین کنگ بوت انت.
جون 2009 ءَ زاکر جان ءِ بیگواھی ءَ پد بی ایس او آزاد لاھور ھنکین ءَ زھرشانی روانک کش ات، سنگتاں شُد ھڑتالی کیمپ جت، (بلے کیمپ ءِ جنگ ءِ وھداں من لاھور ءَ چہ در کپتگ اتاں)،نورا پیرک ھمے وھداں لاھور ھنکین ءَ سک باز تچ ءُ تاگ کنگ ءَ ات کار کنگ ءَ ات، زھرشانی روانک ، شُد ھڑتالی کیمپ ءُ دگہ بازیں چست ءُ ایراں سیاہ دل ات.
من ءُ نورا کدی کدی شت ایں ھمے پاکستانی لبرل ءُ لفٹسٹانی گور ءَ ھم دیوان کت ، من ءَ ڈاکٹر مبارک الی چہ ایدگہ درستاں دوستر بوتگ، گوستانک سر ءَ ڈاکٹر ءِ کتاب ما سک ونتگ انت، ڈاکٹر ءَ وتی کتاب گوں وتی دسترند(دست خط) ءَ مارا سوگات داتگ انت، دگہ باز کتاب بازیں نبشتہ کاراں ھم مارا سوگات کتگ ات، ما اشاں گوں نشتگ بازیں سرھالانی سر ءَ باوست کتگ اشانی ھم گپ گوش داشتگ انت.
تاں ھمے وھداں مُلک ءَ جنگ ءَ زور گپتگ ات ءُ شال ءَ پنجاپی سٹلرز آنی جنگ ءُ کُشگ گیش بوتگ ات گڑا اے پنجابی لبرل ءُ لفٹسٹ گیشتر وتی اسل رگ ءَ اَیاں ات انت،
یکروچے یک مردے ءَ ھمے سرھال چیڑینت ءُ سک برانز گپت کہ “آپ کے سرمچار ہمارے بیگناہ پنجابی بھائیوں کو مار رہے ہیں” من نورا ءَ دست گوں جت کہ نوں بریں کہ اے مرد سک ھراب ھژم گران انت، پد ءَ اے زانگ نہ بنت، مارا ھمد ءَ جاگھے ءِ گار کنائین انت، گڑا ما گوں اشاں وتی نند ءُ نیاد کم کت انت، اسل ءَ مے گور ءَ بیگناھیں کوشانی justification نیست ات کہ گیشیں باوست بہ کن ایں.
من ءُ نورا جان یکرندے شت ایں مرھومیں آسمہ جھانگیر ءِ کارگس ءَ اولی رند ءَ مارا دُچار نہ کپت، دگہ مردکے ھست ات گُشت ئِے “میڈم ادھر نہیں ہے”،
ما دومی رند ءَ پد ءَ شت ایں، اے بری رمزان ماہ ات ھمے وھد ات کہ تمپ ءَ میرجان میرل شھید بوتگ ات پد ءَ تمپ ءَ .مُچی ءِ سر ءَ پوجیانی تیر گواری ءَ چہ مکتار شھید بوتگ ات ءُ بانُک شھناز ٹپی بوتگ اَت.
ھیر آسمہ جھانگیر اے رندی مارا دست کپت گوما گند ءُ نند کت ئےِ، ما بیگواھیں مردمانی یک لسٹے ھم آئی ءَ را دات ، کمو نشت ایں ، گپ ءُ ھبر ھم کت، گوں ما شر پیش اتک، مارا چاہ ءِ سلاہ ئِے جت ،ما چاہ ھم وارت کہ ما روچگ نہ اتیں ءَ دروگ ءَ پائدگ نیست.
2009 ءِ آھری ماھاں من شھدربرجاہ ھلاس کتگ ات گیشتر وھد پارگ ءِ اتاں یک جاھے کسانیں شارٹ انٹرنشپ ءِ کنگ ءَ اتاں، اے وھداں لاھور ءَ نورا جان ، من ءُ ایدگہ بازیں سنگت یکوئی تچ ءُ تاگ کنگ ءَ اِت ایں، زاکر جان بیگواہ بوتگ ات ، لاھور ھنکین ءَ سنگتاں روانک کش ات ، لاھور پریس کلب دیم ءَ شُد ھڑتالی بنجل جت، ما انسانی ھکانی کارگساں شت ایں ، ایدگہ انسان دوستیں مھلوک ءَ گوں نزیکی نم کت، ھمے وھداں بی آر پی ءِ ھما وھد ءِ مرکزی کمیٹی ءِ باسک بیگواھیں وہاب بلوچ ھم مئے گور ءَ اتکگ ات، آئی گوما ھم نورا ءُ مئے سنگت آمنہ مسئود جنجوعہ ءِ گور ءَ شت انت مل ات انت ، آمنہ مسئود جنجوعہ ءِ لوگ واجہ ءَ مدت ءِ بوتگ ات بیگواہ ات (بلکہ انگتہ بیگواہ انت) آمنہ پہ بیگواھیں مردماں گلے ٹھینتگ ات ءُ کار کنگ ءَ ات.
نورا جان ءَ مارا چہ پد ھنکین ءَ گَل ءِ کار باز جوانیں وڑی ءَ دیم ءَ برت انت ، اے وھداں کہ من لاھور یل دات بی ایس او آزاد لاھور ھنکین ءَ کساس یانزدہ بُنزہ جوڑ بوتگ ات، نورا ءَ گَل ءِ کارانی واستا دم برگ ءِ نام نزانت، لاھور ءَ چہ ڈن پنجاب ءِ ایدگہ شھراں کہ بلوچ وانندہ وانگ ءَ ات انت گوں آیاں ھم نزیکی کت ءُ گَل ءِ بُنزہ جوڑ کت انت ،
2010 ءَ لاھور، ساھیوال، بھاولپور ءُ دگہ شھراں بازیں اِلمی ادارھانی توک ءَ جمیئت ءُ ایم ایس ایپ ءِ گنڈھاں مئے سنگت ءُ بلوچستان ءِ پشتون وانندہ لٹ کُٹ کت انت، نورا جان گوں ایدگہ وانندھاں ھوار بلوچ اسٹوڈنٹس ایکشن کمیٹی اَڈ دات ءُ اے جیڑھانی سر ءَ توار چست کت، بازیں ھال رپورٹ ءُ گُلگدار انگت ءَ رسانکدراں امھست بنت.
نورا جان ءِ گیشیں سیاسی چست ءُ ایراں چہ ریاست پریشان بوتگ ات،
گڑا 2010 ءَ سرکاری چیریں ادارھاں نورا جان چہ آئی ءِ ھاسٹل ءَ شپ ءَ چست کت ءُ بیگواہ کت، چیزے روچاں دارگ ءَ پد یلہ اش کت، بلے آ نورا ءَ ھمے شرت ءَ یلہ کن انت کہ تو ایدگہ روچ ءَ رسانکدار ءِ دیم ءَ پریس کانپرنس بہ کن بگُش کہ بی ایس او آزاد ءِ بیگواھیں وائس چیئرمین زاکر مجید پاکستان ءِ چیریں ادارھاں اَوار نہ جتگ بلکہ آ وت شتگ ءُ کوہ ءَ جنگ ءَ انت، مارا رَد دیَگ بوتگ ءُ سرکار ءِ ھلاپ ءَ تنزیم ءَ کار گپتگ،
نورا آیانی گور ءَ ھو کنت ، پہ وتی رکّینگ ءَ آیاں رازی کنت کہ “جی من انچُش کناں ھرچی کہ شما گُش ات” شپ ءِ یلہ کن انت ءِ گڑا سنگتاں ھال کنت سنگتانی مشورہ ءَ گوں شپ ءِ شپ ءَ چہ لاھور ءَ در کپ ایت کیت تربت ءَ پریس کانپرنس کنت ءُ وتی زندانی کسھاں کار ایت.
گڑا ھما روچ ءَ پد نورا جان لاھور ءَ واتر نہ شت،
2010 ءَ پد نورا جان گوں بلوچ جنگی گَل بلوچستان لبریشن پرنٹ ءَ ھوار بیت،
ما انگت ءَ ھما یک کسانیں سیاسی باسک ایں ءُ آ یک جنگی سپاھی ءَ چہ میجر ءِ رینکس ءَ سر بیت،
2011 ءَ پد ما چہ ڈیھ ءَ درانڈیھ بلے نورا انگت ءَ وتی زمین ءَ ساڑی ات، مُدام گوں دژمن ءَ جنگ ءَ ات، دژمن ءِ چمانی کُنٹگ جوڑ بوتگ ات، یک جنگی سپاھی ءَ چہ زمہ داریں جنگولیں میجر ءِ کد ءَ رس اتگ ات، بلوچ جنگی راہ ءِ میان ءَ تپاکی ءُ ھمکاری ءَ پہ جھد کنگ ءَ اَت ، جنگی جاوراں سوھو ءُ پھتہ کتگ ات،
نورا ترا انگت ءَ جلّگی ات، تئی جنگی پلٹون ءَ تئی کمان درکار اَت. باز نیم بُندگیں کار ترا سرجم کنگی ات انت،
تئی جُھدانی برورد ءُ وابانی شر براس ءِ مُھکمیں سنگر ءِ دروشم ءَ دیم ءَ اتکگ ات، ترا گوں سنگتانی ھواری ءَ دژمن گیش تاوان دیَگی ات.
نورا جان کہ جنگی مھاز ءَ کمانڈر پیرَک ءِ نام ءَ پجارگ بیت گوستگیں روچاں گوں دژمن ءَ دیم پہ دیم میڑ دنت ءُ زمین زَھگی ءِ ھک ءَ پیلو کنت و شھید بیت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
