بلوچستان ءِ جتا جتائیں دمگ بسیمہ، پنجگور ءُ تربت ءَ ھوار پاکستانی لشکر ءُ سرکار ءِ کمک ءَ ھواریں ٹولی ءِ سر ءَ اُرش کنگ بوتگ ءُ جانی تاوانانی ھال دیم ءَ اتکگ انت۔
بسیمہ ءِ دمگ ساجد ءِ نزیک ءَ گوستگیں روچ ءَ سلاہ بندیں مردماں فورسز ءِ کاروان ءِ سربستگ ءُ اُرش کتگ۔ دمگی مردمانی رد ءَ اے اُرش ءَ فورسز ءَ تاوان رس اتگ وھدے کہ دو گاڑی ھم سک باز تاوان بوتگ انت۔
دمگی مردماں گیش گْوشتگ کہ دمگ ءَ دو کلاک ءَ گیش جنگ ءُ چوپ برجاہ بوتگ ءُ پد ءَ لشکر ءِ کمک ءَ ھیلی کاپٹر سر بوتگ اَنت ۔
پنجگور ءِ دمگ گوارگو ءَ سلاہ بندیں اُرش ءَ اُرد ءِ کاروان ھم نشانگ جوڑ کنگ بوتگ۔ اے اُرش گوستگیں روچ ءَ ھما وھد ءَ بوتگ کہ اُرد ءِ سئے گاڑی چہ دمگ ءَ گوزگ ءَ بوتگ اَنت۔
واکداراں اے اُرشانی تہ ءَ جانی تاوانانی بابت ءَ ھچ وڑیں ھال شنگ نہ کتگ۔
ایشانی ھوار ءَ مرچی سھب ءَ تربت ءِ دمگ نودوز ءَ پاکستانی لشکر ءِ کمک ءَ ”ڈیتھ اسکواڈ“ ءِ باسکاں سلاہ بندیں مردماں نشانگ جوڑ کتگ۔ دمگ ءَ بازیں وھدے ءَ تیرگواری ءِ توار بوتگ۔
اے وئیل ءِ تہ ءَ جانی تاوانانی بابت ءَ انگت ءَ ھچ وڑیں ھال ءُ اھوال سر نہ بیتگ انت۔