برتانیہ ءِ سر وزیر بورس جانسن کورونا ءِ نادراھی ءَ وش بیگ ءَ پد کووڈ-19 ءِ دارگ ءِ ھاتر ءَ برتانیہ ءِ کارگزاریانی زمہ واریانی پیلو کنگ ءِ ھاتر ءَ ڈاؤننگ سٹریٹ ءَ واتر بیتگ۔
سر وزیر، مزنیں وزیراں ءُ دگہ اگدہ دارانی گوما ھال ءُ اھوال کنگ ءَ پیش، کووڈ-19 ءِ درگت ءَ بیوکیں بنجل ءِ دیوان ءِ پاگواجھی ءَ کنت۔
سر وزیر ءِ ساڑی نہ بوگ ءِ وھداں آئی ءِ زمہ واریانی پیلو کنوکیں دری کارانی کارگشاد ڈومینیک راب ءَ گُشتگ کہ بورس جانسن کار ءِ سر ءَ واتر بیگ ءِ ھاتر ءَ پر جزبگ اِنت۔
بورس جانسن یک شمبے ءِ شپ ءَ دہ بج ءَ ڈاؤننگ سٹریٹ ءَ واتر بیتگ۔
سر وزیر ءَ کورونا وائرس ءِ زاھری ءَ یک ماھے ءِ وھد گوستگ۔
آ چہ پنچ اپریل ءَ سینٹرل لندن ءِ سینٹ تھامسن بیمار جاہ ءَ پہ اِلاج ءَ دارگ بیتگ۔ سر وزیر داں سے شپاں آئی سی یو بنزہ ءَ دارگ بیتگ اَت۔
سر وزیر ءَ گوستگیں ھپتگ ءِ تہ ءَ برتانیہ ءِ راج بانک ءُ امریکہ ءِ پاگواجہ ڈونلڈ ٹرمپ ءِ گوما ٹرمپ ءَ گوں ٹیلیپون ءِ سر ءَ اھوال کنگ ءَ ھوار مزنیں وزیراں گوں نیاد کُتگ، بلے آ ھمے وھد ءَ ھچ وڑیں سرکاری زمہ واری پیلو کنگ ءَ نہ بیتگ۔
چہ مرچیگ ءَ آ وتی سرجمیں زمہ واریاں پد ءَ پیلو کنگ بندات کنت، بلے داں انگت اے گپ پدر نہ اِنت کہ آیا آ رسانک ترانانی سرکماشی ءَ کنت اگاں ناں ۔