بلوچ نیشنل مومنٹ ءِ سرکماش ھلیل بلوچ ءَ راجدوستیں راھشون جی ایم سید ءِ بیست ءُ پنچمی سالروچ ءِ درگت ءَ وتی کلوھے ءَ گْوشتگ کہ جی ایم سید ءَ نوکیں سندی راجدوستی ءِ تہ ءَ نمیرانیں کِردے پیلو کرتگ۔آئی ءَ سندو ڈیھ ءِ آجوئی ءَ بےکساس ءَ جھد کرتگ. آئی ءِ لیکہ ءُ شھزانتیں کرد پہ سند ءِ راجی آجوئی ءَ مھکمیں کلات اَنت. جی ایم سید ءِ پگر ءُ شھزانتی سندیاں ھوار سرجمیں ایردستیں راجانی راھشونی ءَ کنت. سندی راج آئی ءِ رندگیری ءَ آجوئیں سندو ڈیھے ءَ برجاہ کرت کنت. مروچی آئی ءِ بیست ءُ پنچمی سالروچ ءِ درگت ءَ من آئی ءَ داد پیش کن آں ءُ سندو ڈیھ ءِ آجوئی ءَ ھواریں سنگتاں اے دلجمی ءَ دئے آں کہ بلوچ سندو ڈیھ ءِ آجوئی ءَ ستک ءُ دلجم ءُ پُر اوست اَنت ءُ کجام وھد ءَ کہ سندھی پہ کمک ءَ توار بہ کن اَنت گڑا مارا وتی کش بہ مار اَنت.
چیئرمین ھلیل ءَ دیمتر ءَ گوشتگ کہ جی ایم سید ءِ زندگی راجداری ءُ راجدوستی ءِ لیکہ پہ سندھی راج ءَ گواچنیں کشکے،آئی ءَ درستاں پیش اے گپ گیش ءُ گیوار کرتگ کہ مزھب ءِ نام ءَ یک ڈیھے دیم ءَ اَتکگ کہ آ مزھب ءِ پُشت ءَ سرجمیں راجانی سرڈگار،پجار ءُ مڈیاں پُلپانچ کنگ اِنت- ھمے بنیاد ءَ پاکستان ءِ برجاہ بیگ ءَ پد سند سرڈگار ءِ سر ءَ آ پیسر ءَ زورگر بوت اَنت۔ آھاں مھترھندی زوراکی ءِ بندات چہ وتی لوٹوکاں کرت بلے گْوستانک ءِ آمید گِس ءَ سائیں جی ایم سید ءِ سر پہ مدامی چیست اِنت۔
آئی ءَ گْوشتگ کہ سائیں جی ایم سید ءِ سیاسی پند ءَ بازیں جنجالاں ابید ھمک دور ءَ آئی ءِ راجدوستی ءِ چھرگ پدرا اِنت۔وتی نود ءُ یکمی سال ءِ زندگی ءَ آئی ءَ سِی ءُ دو سال بندیگ جاھاں گْوازینت ءُ پہ سندھی راج ءَ باز جھد کُرتگ۔آئی ءِ بگیری جنز، انڈین نیشنل کانگریس، آل انڈیامسلم لیگ، سند ءِ چہ بمبئی ءَ جتائی ءِ زْرمبشت،سند ھاری پتر ءِ برجاھی،سند لبزانکی بورڈ ءِ برجاھی، سند وانگجاہ ءِ برجاھی ءُ بھٹ شاہ کلچرل سینٹر ءِ وڑیں بازیں زانشتی، لبزانکی ءُ سیاسی کار کرتگ ۔پاکستان ءِ برجاھی ءَ پد آئی ءَ دو راجی لیکہ ءُ بنجاھی سیاست ءِ لیکہ ءِ بگیری کرتگ۔زوراکانی بگیر ءَ ابید آ پہ راجمستری، سیکولرزم ءُ پہ سندھی راجدوستی ءَ مِڑاِتگ بلے نوزدہ سد ءُھپتاد دو ءَ پد ماں بندیگجاہ ءَ داں مرگ ءَ سندو ڈیھ ءِ آجوئی ءِ گڈی سوڑگ ءَ یاتگاریں کردے پیلو کرتگ۔
ھلیل ءَ گْوشتگ کہ موھنجودڑو ءِ واھندیں سندی راج ءَ ماں گْوستانک ءَ جوانیں جاھے ھست ۔بلوچ ءُ سندی گوں گْوستانکی، سیاسی،چاگردی ءُ ھم بندیں سیادیاں بندوک اَنت۔سند ءِ سرڈگار ءَ بلوچانی مزنیں کچے آباد اِنت،آھانی زند ءُ مرگ گوں ھما سرڈگار ءَ بستگ،آھاں گوں مارشت ءَ سندو ڈیھ ءِ آجوئی ءَ گْوستانکی کِردے پیلو کنگ لوٹ ایت۔ جی ایم سید ءِ پگر ءُ شھزانتی سندیاں ھوار سرجمیں چیردستیں راجانی راھشونی ءَ کنت۔
بی این ایم ءِ سروک ءَ گْوشتگ کہ بلوچ گوں کجام جاوراں دوچار اِنت سندی ھم ھمے سنگینیں چکچینی ءُ پلپانچی ءَ دوچار اِنت۔ بلوچ، سندی ءُ پشتو چینچو ھزار سالانی گْوستانک ءِ واھند اَنت بلےپاکستانی زور گیپت ءُ ایردستی ءَ پد مئے درستانی راجی پجار جنجالانی دیمپان اِنت۔مارا وتی وتی سرڈگار ءَ کم ترینگ ءِ پندل ساچگ بیتگ ۔پاکستان ءِ نیمگ ءَ بلوچ،سندی ءُ پشتو راج ءَ پہ آجوئی ءَ توار چیست کنگ ءَ چکچینی ءِ دیمپانی اِنت۔پاکستان ءِ دست ءَ ھزاراں مردم بلوچستان، سند ءُ پشتونواہ ءَ شھید بیتگ اَنت، ھزاراں بیگواہ اَنت۔
چیئرمین ھلیل ءَ گْوشتگ کہ جی ایم سید وڑیں مردم مدتاں ودیگ بہ اَنت۔مارا چہ آئی ءِ سسا ءُ شھزانتی ءَ سوج زیرگ ءُ وتی منزل ءِ نیمگ ءَ روگ لوٹ ایت۔ما گوں یکیں دژمن ءَ دیم پہ دیم اِیں۔ پاکستان دمگ ءَ ھوار سرجمیں مردمگری ءِ دژمن اِنت۔مارا وتی دُژمن ءِ بگیری ءَ یکجاھے ءَ جھد کنگ ءُ وتی جُھد توانمند کنگ لوٹ ایت۔
آئی ءَ گْوشتگ:مئے دژمن چہ زانت ءَ زبھریں رسترے۔اے دژمن ءِ برابری ءَ رسگ ءُ پہ وتی راجی آجوئی،راجی زندمان ءِ ھستی ءَ یکجاھی وھد ءِ ھژدری لوٹ اِنت۔مارا اے نیمگ ءَ جوانیں گامگیج زیرگ لوٹ ایت۔