TBP Balochi

ساجد ءِ ارواہ ءَ

اکیل مراد

دی بلوچستان پوسٹ

نزاناں چی بہ گْوش آں بلاھیں مردمے ءِ سر ءَ گپ کنگ ءُ آئی ءِ سر ءَ یک نیزوریں ندکارے ءَ چُنت کساس گران اِنت ایشی ءَ ھما ندکار زانت کہ آئی ءِ ند ھماھی یے واستا چِست بیتگ-

دو اپریل ءِ گرانیں روچ اَت کہ ساجد ھسین ءِ بیگواھیں ھال ھمک تک ءُ پھناتاں شنگ بیان اَت پہ بلوچ ءُ بلوچستان ءَ اے نوکیں بدیں ھالے نہ اِت کہ مردم وت ءَ پراموش بہ بنت کہ یک نوکیں چیزے ءَ بلوچ چاگرد ءَ سر کَش اِتگ –
بلوچستان!!

چریشی ءَ چَہ پیسر بلوچستان ءَ ھزارانی مردم بیگواہ، گار، ھاک ریزگیں لاشانی چِنگ ءُ پجانیاھورتگیں گورانی دزکپگ، ماتانی دیم ءَ تاسوکیں بچانی بیگواہ کنگ، بچانی دیم ءَ مات ءُ گھارانی بیگواہ کنگ اے درچ یک دراجیں وھدے ءَ چَہ بندات ءُ ہیداک اِنت –

بلوچ گِس گِس ءَ پولان کن کم ءُ کساس مردمے ءِ کُنٹ ءُ بیگواھی ءِ ھال رس اِت بلے گپ اے وڑ ءَ ھم بیتگ اَنت کہ کَسے ءَ بلوچ ءِ واستا توار چِست کرتگ اَت آ ھم کُشگ ءُ گار کنگ بیتگ اَت، سبین مھمد، ھامد میر، سلمان ھیدر، دگہ بازیں مردمے ءَ بلوچانی واستا بندات کرتگ گڑا آئی ءَ الم وتی بھر پاکستانی چیریں ادارھانی نیمگ ءَ دیستگ،

اے در راج بیتگ اَنت بس اشاں بلوچانی درد ماریتگ ءُ وتی انسانیت ءِ جیڑو ءَ اے بدیں گپ وتی اندر ءَ جاہ دات کُت نہ کتگ اَنت –

بلوچ جرنلسٹ تاکار
زراک گُل، لالا ھمید، الیاز نزر، سِدیک ایدو، ارشاد مستوئی، دگہ بازیں بلوچ جرنلسٹے ءَ بلوچ بوھگ ءِ سَزا وارتگ دردانی امبار وتی سر ءَ بار کرتگ اَنت

ساجد ھمے دردانی رندگیری ءَ یک جرنلسٹے جوڑ کرتگ اَت کہ آئی ءِ جرنلسٹے ءَ بلوچستان ءِ بزگریں توار وتی تہ ءَ پَشیتگیں نیبگ ءَ تراکینان کُت ءُ جھان ءَ سرکنگے ھواری ءَ وتی مردم ھم سرپد کرت اَنت

گپ مردمانی دیم ءَ باز کیت کہ بلوچ دری ڈیھاں مَھپوز نہ اِنت پرچا دگی جاھاں رو اَنت بلے جھان ءُ روگ ءُ وتی ھالانی سر کنگ یک جرنلسٹے ءِ واستا اینچُک ارزان نہ اِنت کہ مردم وتی دپ ءِ پُر ءَ اے گپ ءَ بہ کنت تو پرچا شتگے!

بلے اے گپ ءَ چَہ پیسر آئی ءَ وتی سر ءَ جیڑگ لوٹ اِیت شتگ چی ءَ گار بیتگ چی ءَ برگ بیتگ چی ءَ، اے درستیں پسواں وتی اندر ءَ بہ کنت وتی مارشتانی تہ ءَ بہ کنت!

بلوچستان ءِ جنگی درچ بہ بیت یا دگہ تک تئی ندکشی ءَ وتی راہ گچین کرتگ اَت کہ تو وتی تب ءَ نبشتگ کرتگ ھمے سما بیتگ تو کسے ءَ گوں دلگوش نہ اِت بلکیں دومی ءِ توار ءَ بس دومی ءَ سرکنگ لوٹگ ءَ ئِے،

ساجد!!
من ءَ تئی گون ءَ بے کساس ایراد بیتگ دل ءَ باز گُشتگ پرتو نِمدی ءِ نبشتگ بہ کن آں ءُ دیم بہ دے آں بلے پد ءَ ھمے سما کرتگ کہ چوشیں مزنیں مردمے ءَ چوشیں مزنیں جرنلسٹے ءِ واستا من چون نِمدی نبشتگ کرت کن آں

بلے پد ءَ من وتی دل ءَ اے گپ داشتگ اَنت کہ ھروھدے ءَ تو بلوچستان ءَ واتر بوت ئے گڑا الم وتی ایرادانی ھیالاں گون سرپد بوھگے واستا درشان کن آں بلے وھد ءَ نا تر ءَ بلوچستان ءِ واتر بوگ ءَ ایشت ناکہ منی زھرے ایراد ایشت اَنت بس ھمے گوش آں تئی روگ ءَ پد دست گیشتر تمرد اَنت ءُ تئی بالاد ءِ سر ءَ نیزورکیں نَدے ءَ باھند کتگ-

بھشت تی ھنکین بات

سمّی جان گُشت منی ءُ گوْھر ءِ ابّا ءِ سور اِنت

 نبشتہ : آجو کینگی بلوچ

دی بلوچستان پوسٹ

دوشی دراھیں شپ واب نکپتگاں اے دیم ءَ لیٹ ات ءُ آ دیم ءَ بلے ماں چماں واب نئیت۔۔۔۔۔۔۔۔۔۔
واب دیر اِنت چمن شُتگ بلے مرچی سئے روچ اِنت کہ واب نیست منی ٹیلگاں۔۔۔۔۔۔۔۔۔۔۔۔۔
منی واب پیرو تو گوں گُلو ءَ ھور برت گوں من گُمان نکتگ کہ پیرو تو گلو من ءَ ملور کن اِت زھیریگ کن ات کوھنیں کسھاں نوک کن ات۔۔۔۔۔۔۔۔۔
بس دراھیں روچ ءُ شپ پیر ءُ تئی ءُ گلو ءِ بچکند ءُ تراناں کپگاھاں کوھنیں کسہ تازگ بوان اَنت برے گریوان ءُ برے وت ءَ را تسلہ دیاں.
پیرو پِکرے اَت۔۔۔۔۔۔۔۔ چِراگے اَت۔۔۔۔۔۔۔ رژنے اَت ۔۔۔۔۔۔۔۔۔سِنچے اَت۔۔۔۔۔۔۔ پیرو یک کاروانے ءِ نام اَت۔۔۔۔۔۔۔۔ پیرو وشکوشیں پروم ءِ نام اَت۔۔۔۔۔۔ ۔۔۔ پیرو شپانی رژنائی اَت۔۔۔۔۔۔۔ پیرو چمانی روک اَت۔۔۔۔۔۔۔۔۔ پیرو گوشانی توار اَت ۔۔۔۔۔۔۔۔۔۔پیرو دلانی پھارے اَت۔۔۔۔۔۔۔۔۔ پیرو مھرانی مھرے اَت۔۔۔۔۔۔۔۔۔ پیرو سنگتانی بادشاہ اَت۔۔۔۔۔۔۔ پیرو گیرتی ٹُکرے اَت ۔۔۔۔۔۔۔۔پیرو دژمن ءِ ملکموت اَت۔۔۔۔۔۔۔بس پیرو پیروے اَت۔۔۔۔۔۔۔۔۔۔۔
پیرو بس ھمے نزانت کہ منی زندگ بُوگ پہ دژمن ءَ بلاھیں بیھارے بس پیرو پہ شھیدی ءَ شیدا اَت اے راستے کومانی منزل پہ کربانی ءُ شھادت ءَ نزیک بنت بلے چُشیں بھادر ءُ لائکیں مردمانی زندگ بُوگ منزلانی سیڈی ءِ ماناَ دار اَنت .

بس پیرو تئی ھُشکیں لُنٹانی بچکند ءُ گلو ءِ گالوار منی چم ءُ گوشانی زینت اَنت۔۔۔۔۔۔۔۔۔۔۔۔
پیرو اول تو چو اشتاپ ءَ مشُتین ئے اگاں ترا زمین ءِ سر ءَ وش نبوت
سنگتانی دیوان ءَ ترا ابیتک کتگ اَت ترا اگاں پہ سنگتاں مھر نیست اَت بلے پیرو سنگتاں پہ تو باز مھر کتگ تئی جُدائی ءَ سنگت نالان اَنت.
نزاناں ترا پہ آ سنگتاں کجام ھدوک ءُ واھگ بوتگ اے سنگتاں زاناں ترا مھر کم داتگ ۔۔۔۔۔۔۔۔۔۔۔۔

اگاں الم ترا مئے دیوان وش نبوت شُتگ ئے تنھا بُشتین ئے۔۔۔۔۔۔۔
تو گُلو گوں وت ءَ مبُرتِیں تو کمو پُشت ءَ بچاراِتیں تو مُدام من ءَ گُشت کہ تاھیر جان سکیں بھادرے برے برے گنوکی کنت تو پرچس ھمے ھبراں بے ھیال بوت ئے۔۔۔۔۔۔۔۔۔۔۔ترا تاھیر جان دل بوت تو چو ابیتک کت من ءَ باور نبیت کہ تاھیر جان ءِ دل نزوری بکن تاھیر کوھے بلے تئی یاداں کپیت ءُ انارکانی سر ءَ ارس ئِے رچ اَنت بس ھمے گُشیت پیرو ءَ من ءَ ھال ندات ءُ شُت من ءَ گوں پیرو ءِ ھمراھی ءَ باز کار کنگی اَت چمن ءَ آ سنگت ءُ ھمبلانی مھر زاناں گیشتر اِیتاں ۔۔۔۔۔۔۔۔۔
پیرو ترا یاد بیت تو گُشت ھپیز پُل بے مھرے کینگی یے من گُشت ھپیز جان بے مھرے نہ اِنت دل ءَ نریچیت وتی مھراں ۔اے راستے کینگی یے بلے پہ سنگتاں نہ بلکیں پہ دژمن ءَ ھُشتری کینگے داریت بھادرے آئی بھادری ءِ کسہ سرکار ءَ کتگ۔۔۔۔۔۔۔۔۔۔

پیرو ترا یاد اِنت تئی سر منی زان ءِ سر ءِ ایر اَت کَونر ءِ ساھگ ءَ نشتگ اِت ایں گُلو پُرانی ءِ اڈ کنگ اَت بُرز ءَ ھیلیانیلی توار اَت شیلنگ کنگ اِت انت وھدے ترا تیر ءَ لگت بھادر جان گریوگ ءَ لگ اِت تئی درداں سگت نکُت گُشت ئِے من وت ءُ را کُشاں تو گُلو ءَ گُشت برو اے گنوک ءَ بدار نا سرپدی ءِ مکن اشی ھال ءَ سرپدئے۔۔۔۔۔۔۔۔۔۔۔۔من بھادر جان ءَ ھال کُت ھچ نگشت ئِے بس گریت ئِے ءُ ھمے گُشت ئِے پیر ءُ گلو من ءَ چورا کُت ساری ءَ من ھبر کتگ ءُ کندیتگ گلو من ءَ گُشتگ اینکس مکند وھدے تو چمن دور بئے گڑا من ءَ زھیر کنت پہ تئی کندگاں
مرچی گُلو کندگ اِنت من گریوگ آں
پیرو منی چم کور کتاں پیرو پد ءَ یک رندے بیا من ءُ تو کند ایں ۔۔۔۔۔۔۔۔۔۔۔
ریھان جان وت ءَ را چو سگار کنڈی کوہ ءَ مھکم داشتگ بلے پیرو تو گوں وت ءَ بُرتگ گوں۔ ھبر کت نکنت بس وتی مھرئے گوں سنگتاں داشتگ گُشیت بِلّےمن اگاں تہ ءَ پروشاں بلے چُش مبیت سنگتے پیرو ءِ گماں ابدی گنوک مہ بیت۔۔۔۔۔۔۔۔۔۔
زامر جان گُلو تئی ھمراھی زریت ھما زامرجان کہ یک ساھتے تو ندستگ کہ بے توار بہ بیت پیرو زامر جان ءِ توار تو گوں وت ءَ بُرتگ۔ ھبر ءُ ھال نکنت ھچ نگُشیت ھبر کُت نکنت بس سنگ ءُ سیاھیں دیوال ءَ تِکّا ئِے داتگ ءُ جیڑگ اِنت۔۔۔۔۔۔۔۔
جوھر جان وتی چم دیوال ءَ سک داتگ اَنت پادے پاد ءِ سرا اِنت ءُ تسبیھ ءِ دستاھاں ارس گوارگ اِنت بس دپہ ھمے یکیں ھبر (اُف ھُدا چُش مبوتیں) پیرو بدل ءَ من ءَ بُرتیں کہ آئی ءَ باز کار کتگ اَت ۔۔۔۔۔۔۔۔۔۔۔۔۔۔۔
چاکر جان بس ھمے گُشیت کہ پیرو من نزانت کہ تو جلدی رو ئے گریت شانیت بس لُنٹ ئِے ھشک اَنت بس پیرو پیرو کنت۔۔۔۔۔۔۔۔۔۔
کامریڈ شاھین ساری ءَ پہ زمین ءَ مھراں گنوک اَت تو ھما اِنت شُتگ ئے یُک ءُ تنھا نشتگ ءُ گریت برے برے دور روت گزّے ءِ بُن ءَ گریت ءُ کندیت بس گوں دپئے پُرا گُشیت (پیرو من ءَ ھال بداتیں) من ءُ تو ھور شُت ایں من سیکل ءِ دیم ءَ ءُ تو پشت ءَ من ءَ کیکلی کناں بوتین ءِ برے من تو کند اِت ءُ برے گریت پیرو۔۔۔۔۔۔۔۔۔۔۔۔
بشام جان ھبر نکنت ھچ نگشیت ھشک ءُ ھدا اِنت بس تئی ترانگ ءَ اِنت۔۔۔۔۔۔۔۔۔۔
ولید جان سنگتانی دیوان ءَ نشتگ بلے تو گُش ئے دیوان ءَ نہ اِنت بس ھمے جیڑگ اِنت پرچا چُش بوت دریگتیں پد ءَ ھما ٹھک ءُ بچکند دوبر بیایاں بس ملور اِنت۔۔۔۔۔۔۔۔۔۔۔۔۔۔
مرید جان بس ترّیت ءُ دُوا دنت بس آئی دپ ءِ ھبر ھمش اِنت الم روچے کیت ھر روچ سیاہ ءُ تھار نہ بیت۔۔۔۔۔۔۔۔۔۔۔
دلوش جان ءَ ھچ وش نبیت نزانت کہ من وتی دل ءِ زنگاں گوں کیا بریچاں پیرو تئی اکس ءَ چاریت ءُ بلاھیں گینسارتے کشیت آھر ءَ ھمے گشیت گُلو ترا کے ءَ گُشت مالو ءَ بر گوں مالو منی ھمسر اَت نیشت ئے کہ من ءُ مالو ھم دیوان بہ بہ ایں ۔۔۔۔۔۔۔۔۔۔
مبارک جان ءَ وتی شکاریِیں پت ءِ گماں ساری ءَ ٹپیگ ءُ دلرنج کتگ اَت پیرو تو گلو دو بر پد ءَ مبارک جان بے مھر ءُ گمیگ ءُ دردیگ کُت۔۔۔۔۔۔۔۔۔۔۔۔
زھیر جان شُمے گماں نشتگ ءُ زھیرُوک جنت۔۔۔۔۔۔۔۔۔
ارباب نشتگ مدام دیم ءِ گوں روچ درتک ءَ کتگ ءُ دُوریں ھیالے ءِ تہ ءَ یُک ءَ گریت بلے جزباتی اِنت۔۔۔۔۔۔۔۔۔۔۔۔
۔ارباب ءِ برات لوگ ءِ مردماں گوں دست گٹ اِنت برے برے روت ءُ لوگ ءِ ساھگ ءَ ھیران بیت پد ءَ چُکّے کیت ءُ توار ءِ پِر جنت کہ بیا ترا ابّی لوٹگ اِنت وتی چمانی ارساں پھک کنت ءُ روت۔۔۔۔۔۔۔۔۔۔۔۔۔
روھیل جان بس نشتگ ءُ تئی اکساں چاریت بس ھمے جیڑگ اِنت پیرو کدی تئی توار کیت گوں وشکندیں توار ءَ کہ من ءَ سنگتانی وشیں ھالاں دے ئے۔۔۔۔۔۔۔۔ پروم ءُ زامران ءُ بلیدہ ھالاں نوں من چہ کیا بگراں پیرو بس یکرندے من ءَ بُگشتیں من روگایاں کہ دل ءَ اوپارے بُشتیں پیرو یک مھرے اَت اوستے اَت رژنے اَت۔۔۔۔۔۔۔۔۔۔
چئیرمین سپرو ھاموش اِنت کہ پرچا چُش بوت من وتی ٹھک ءُ بچکنداں گوں کیا بکناں یکیں مھرانی دروازگ تو ات ئے پیرو۔۔۔۔۔۔۔۔۔۔۔۔۔۔
چئیرمین جان ءِ پُلیں توار پُرشتگ کندگ ءُ مزاک ئِے گاراں چہ تئی جُدائی ءَ سیاہ تریتگ بس دست ئِے پُشت ءَ بستگ انت برے یک جاھے ءَ اُوشت ایت برے برے دل ءِ تہ ءَ گریت اگاں سیکلے توار کنت بس چست بیت کہ بلکیں پیرو ءُ گل ءُ اَنت پیداک اَنت منی رند ءَ ۔۔۔۔۔۔۔۔۔۔۔۔۔۔۔۔۔۔۔۔
کیّا جان بس نشتگ ءُ نالیت پہ شما شیر پِربند ایت کہ دریگتیں پیرو من ءَ بُگشتیں گوں گلو من روگایاں پہ وتن سالونک بوگ ءَ کہ من شُمے سالونکی ءِ سر گُوْپ بوتیناں۔۔۔۔۔۔۔۔۔۔۔

کریم داد پیرو تئی ءُ گلو ءِ ترانگاں کپیت پاد کیت دور روت ءُ نیند ایت سگریٹ کشیت دل ءِ ڈڈ اِنت بلے لنٹاں چے زانگ بیت گریوگ ءَ اِنت وھدے چمانی ارس گوارگ بندات کناں گڑا پاد کیت ءُ روت وتی مشین ءِ سر ءَ گوں ملوریں چماں پیرو بس اُپ اڑے جنت ءُ ھچ نگشُیت۔۔۔۔۔۔۔۔۔۔

ماسٹر منزور جان سک ڈڈ اِنت سنگتاں تسلہ دنت گشیت پیرو چمن نہ شُتگ بلکیں چہ کوم ءَ شُتگ پیرو تنھا منی برات نبوتگ بلکیں دراھیں کوم ءِ برات بوتگ پیرو زمین ءَ دوست بوتگ چمن ءَ زمین ءِ مھر ءِ دوستر بوتگ اَنت من آئی برات ءُ سنگت بوتگاں زمین آئی ءَ وتی مات لیکیتگ مات ءِ مھر الم گیشتر بنت۔گُلو چمن ءَ گیشتر پیرو ءَ دوست داشتگ کہ باندا من تنھا باں گوں پیرو ءَ ھمراہ باں رواں گوں پد ءَ من ءَ وش نبیت بگیر پیرو ءَ۔۔۔۔۔۔۔۔۔
مالو گومن ھبر نکتگ کہ منزور جان من ءَ ھبر دنت بلے من ءَ پہ مالو مھر بوتگ مالو ءِ وتی مھر بوتگ اَنت منی دیم ءَ ھبر نکتگ ئِے من ءَ سک دوست بوتگ۔۔۔۔۔۔۔۔۔۔۔۔۔۔۔۔۔
مومن جان ملنگے اَت من ءَ گوں مومن جان مھر بوتگ من ءَ مدام گُشتگ مومن جان ءَ اگاں پیرو ءَ بے منی ءَ بیت بلے من ءَ بے پیرو ءَ نبیت مومن جان راست گُشتگ اَت بید ء پیرو ءَ نبوت ئے۔۔۔۔۔۔۔۔۔

پیرو منزور جان مدام ھمے جیڑگ اِنت پُشت ءِ سنگتانی چے ھال بیت اگاں پیرو ءِ سنگت زھر بکناں کے وشان اِش کنت آیانی ھبراں کے گوشدار ایت منزورجان گُشیت بس من ءَ سنگتانی درد اِنت۔
من مرچی گل ءَ بالاں پیرو پہ وتن سالونک بوتگ۔۔۔۔۔۔۔۔۔۔۔۔
منزور جان گُشیت من مدام پیرو ءَ گُشتگ پیرو تو ساری ءَ سالونک بئے یا من بیباں گڑا من ءَ گُشتگ ئِے من سالونک باں پرچاکہ من کستراں

تئی سالونکی ءَ بلکیں منزور جان من برداشت مکناں من مات ءُ پتاں سھڑ ینت مکناں تو الم مات ءُ پتاں سھڑین ئے۔۔۔۔۔۔۔۔۔
راست گُشت پیرو چمن ساری سالونک بوت گوں گُلو ءَ۔۔۔۔۔۔۔۔۔۔۔

من سنگتانی کرّ ءَ چہ پادتکاں دیم پہ وتی مات بی بی مھناز ءِ لوگ ءِ نیمگ ءَ کہ رواں مات ءَ چاراں دیر اِنت ندستگ رواں ھالے گراں من شُتاں لوگانی نزیک ءَ سمی جان ءُ گوھر جان گوازی ءَ اِت اَنت من ءَ کہ دیست اِش، چم اِش چست کت اَنت چار اِت اِش پد ءَ گوں وتی لیب ءُ گوازی ءَ۔۔۔۔۔۔۔۔۔۔۔۔۔۔۔۔۔۔۔۔۔

من گُشت سمی جان تو گوھر جان گوازی ءَ اِت؟
سمی جان گُشت ھاں اما اد ءَ گوازی کناں تو برو امّی ءَ بچار۔۔۔۔۔۔۔۔۔۔

من گُشت سمی جان تئی اَمّی کُج اِنت؟گشت ئِے لوگ ءَ مردمانی ءَ نشتگ. من گشت تو گوھر جان برو ات گوازی بکن ات ۔۔۔۔۔۔۔۔۔۔۔۔
گوھر جان تئی ابّی لوگ ءَ اِنت؟ گُشت ئِے انا ابّا ءِ کر ءَ پروم شُتگ۔۔۔۔۔۔۔۔۔۔

من جست کت”سمی جان اے مردم شُمے لوگ ءَ چی ءَ اتکگ اَنت؟ سمی جان گُشت” منی ءُ گوھر ءِ ابا ءِ سور انت۔

دی بلوچستان پوسٹ: اس تحریر میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔

پوریاگرانی میان اُستمانی روچ ءُ بلوچ پوریاگرانی زند!

 نبشتہ: گنی ھیات

دی بلوچستان پوسٹ

شھدا ءِ شکاگو ءَ سُھرچکیں دروت!

یک مئی ءِ روچ ءَ پوریاگرانی میان اُستمانی روچ ءَ سرجمیں دگنیا ءَ سرکاری روچ ءِ وڑ ءُ پیم ءَ دارگ بیت
اے روچ ءَ پوریاگراں وتی وھد شانزدہ ءُ دوزادہ کلاک ءَ چہ ھشت کلاک ءِ کم کنگ ءَ پُر ایمنی روانک کش اِتگ ۔

چریشی ءَ پوریاگرانی دست ءَ امن ءِ اسپیتیں بیرک بوتگ بلے ریاستی کارندھاں پُر ایمنی روانک ءِ سر ءَ اُرش کتگ ءُ پوریاگرانی سر ءَ تیرگواری کتگ ءُ پوریاگرانی ھوناں چہ شکاگو ءِ دگ ھونین کتگ ءُ پوریاگرانی دست ءَ امن ءِ اسپیتیں بیرک سُھریں ھوناں گوں مینتگ ءُ ھمے روچ ءَ پوریاگراں سُھریں بیرک وتی بیرک جوڑ کتگ-

ھمے روچ ءَ یک مئی سرجمیں دگنیا ءَ پوریاگر روچ ءِ درگت ءَ دارگ بیت کہ ایشی ءِ سپارش “فریڈرک اینگلز ءَ انٹرنیشل ءَ داتگ-

مروچی سرمایاداری تاریک ءِ اے ھَد ءَ اَتکگ ءُ سر بوتگ انت کہ اود ءَ آ پوریاگرانی ھوناں گیش چوسگ ءَ اَنت کہ سرمایاداری ءِ تاریکی کردار اِنت – مروچیگیں ورناھانی پدریچ ءِ آؤکیں پوریاگر ءُ جھد کنوک اَنت – مروچی ھمے وڑ تُرندی ءَ چہ ورناھانی پدریچ جھد ءِ منڈی ءَ پُترگ ءَ اَنت کہ اشی ءَ چہ بے روزگارانی لشکر گوں ترندی ءَ گیش بوان اِنت ءُ اے نزام ءَ آؤکیں پدریچ ءِ دیَگ ءَ چیزے ھست-

نامداریں انکلابی روزا لیگزمبرگ راست گْوشتگ کہ مئی روچ داں ھما وھد ءَ دارگ بیت کہ داں پوریاگرانی وتی ھک ءِ ھاتر ءَ باپاریانی ھلاپ ءَ جد ءُ جُھد برجاہ بیت ءُ اگاں پوریاگر میان اُستمان ءَ وتی ھک ءِ رسگ ءَ چہ سوبمند بہ بنت اشی ءَ چہ پد اے جھد کنوکیں شھیدانی یات ءَ مئی ءِ روچ دارگ بیت-

بے شک یک پوریاگرے ءِ سِلّیں دست ائیرکنڈیشنڈ ءِ کمرہ ءِ توک ءَ نندوکیں لب زیروکیں آپیسر ءَ چہ گیش ساپ بنت –

مروچیگیں روچ تھنا اے بے وانند ءَ بلے ھُنر مندیں پوریاگرانی گوما یکجاھی ناں بلکیں ھما وانند ءَ ، جوانیں پوریاگرانی ھیال دارگی اِنت ھم کہ مزن مزن ڈولداریں ورگ جاہ ءُ دگہ مزن مزنیں مارکیٹ ءُ دگہ دکاناں دکانداری بوَگ دوازدہ ءُ چاردہ کلاک ءَ مدامی کار کن اَنت-

اگاں ما لَس مھلوک ءَ گیش ھم مہ کن ایں ، بلے تھنا مھر ءُ دوستی ءِ گوما آئی ءَ توار بہ کنت ءُ اِزت دیَگ بندات بہ کنت گُڑا واجکار اے ھم بلاھیں گپے بیت –

مروچگیں گران بھائی ءَ پوریاگر بدھال ءُ تکانسر کتگ اَنت روچ ءُ شپ ءَ بے چُٹی کار بہ کنت ھم پوریاگر ءِ کول ءَ دو وھد ءِ نان ھم نسیب نہ بیت-

ھمے روچ ءَ انچیں چوٹی بنت – مزن مزنیں دیوان ءُ مچّی اَڑ دیَگ بنت کہ اود ءَ زندگی لاچاری ءُ پوریاگری ءَ چہ بے سمائیں مردم گوں جوش ءُ جزبگ ءَ تران کنگ ءَ گندگ کاینت
بلے اے کس ءَ گندگ نیت کہ پوریاگر پوریاگری کنگ ءَ اِنت – چو زندگی ءَ ھرچ پڑّ ءَ سیادی داروکیں مردم وت ءَ پوریاگر سرپد بنت بلے منی نز ءَ پوریاگر ھما اِنت کہ وتی ھک ءَ چہ کم کارکنوک ءُ بے وس ءُ لاچاریں مردمے – سرکاری ءُ ابید سرکاری کارداریں مردم ءَ اے روچ ءَ چٹی رس اِیت بلے چریشی ءِ آسر ءَ چٹی رس اِیت کہ آئی ءِ آرام ءُ سکون ءِ ھچ وڑیں روچ پکس نہ اِنت-

ھمے وڑ ما بلوچ پوریاگراں بہ چار ایں آ چونیں زند گوازینگ ءَ اَنت آ کار گیش ءُ پکار کم دیَگ بنت وھدیکہ ھمے روچ سرجمیں دگنیا ءَ مھلوک ءِ چٹی اِنت بلے مئے بلوچ پوریاگر ھم ھمے روچ ءَ وتی لِچ کاری ءَ کن اَنت ءُ وتی لاپ ءَ شوھاز کن اَنت پرچاکہ اود ءَ نانکہ جُست کنوک ھست نانکہ انساپ ۔ کار چو ھر ءِ وڑ ءَ بند بلے پکار نیست اگاں ھست گُڑا نیم پہ ھم بزگ ءُ واری دست کپ اِیت اے مئے بلوچیں پوریاگرانی زند اِنت کجام جاور ھالانی تہ ءَ گْوزگ اَنت سیر کار اَنت بلے سیر لاپ نہ اَنت۔

دی بلوچستان پوسٹ: اس تحریر میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔

سمّو ءُ جنگانی کسہ

گزین بلوچ

دی بلوچستان پوسٹ

سمّو !
راجدپتر نویس گُش انت کہ دنیا ءِ اولی دودمان (تہذیب) ءَ بگر داں مرچیگیں اھد ءَ ، ھرچ وھداں دنیا جنگانی آماچ بیتگ ، مئے واستا آ جنگانی کسہ تھنا راجدپتر ءَ پَشت کپتگ انت ، مئے زمین ھم جنگانی آماچ انت ءُ ما مرچی اے جنگی کسّھانی بھر ایں ۔

سمّو ترا یات بیت کہ وھدے تو ھما ڈکّ ءَ سر کپت ئے من گشت ”سمو کپ ئے، ایر بیا جھلءَ“ تو گوشت کہ من نہ کپ آں، من کمانڈرے ءِ چک آں۔ سمو ءِ کماندار نورا ،

سمّو پلستین ءِ کواسیں زانتکار مھمود درویش گش ایت کہ جنگ مردم ءَ چہ کسانیءَ پُھتہ کنت، چوناھا مھمود درویش ھم چو مئے ڈول ءَ کسانی ءَ چہ وتی زمین ءَ در پہ در کنگ بوتگ، ھمے ھاتر ءَ آئی ءِ زمین ءُ جنگ ءِ کسہ گوش ئے کہ مئے کسھانی چھرگ ءَ جن اَنت۔

سمّو !
لھتے روچ پیسر ءَ منی سنگتے ءَ گوں ھال بوتگ اَت ءُ من آئی ءَ گُشتگ اَت کہ نورا ءَ منی سلاماں بدے، سرجمیں سالے بیت کہ منی گوں آئی ءَ ھال ءُ اھوال نہ بوتگ، نورا وتی کاراں کوہ ءُ کوچگاں گوں دژمن ءَ سر ءُ چیر اِنت ءُ من گیش وتی کتاباں گوں دلگوش۔

26 اپریل ءِ سھب ءَ ھال اَتک کہ بلوچستان ءِ دمَگ پروم ءَ سنگتانی گوں دژمن ءَ جنگے بوتگ، نہ زاناں پرچی ءَ بلئلے منی گُمان وت سر ءَ پہ نورا ءَ شت، وھدے کہ نورا ذھن ءَ اتک گڑا من تئی ترانگ ءَ کپت آں۔ سمّو من وتی موبائل مٹ کتگ ءُ تئی دُراھیں اکس من گار کتگ اَنت ءُ یک پیم ءَ ودار ءَ بوتگ آں کہ کدی نورا ءِ گوما ھال بیت گُڑا من آئی ءِ گور ءَ تئی نوکیں اکسے لوٹ آں، اے روچ ءَ من ھمے ھیالانی تہ ءَ سر ءُ چیر اتاں سنگتے ءَ ھال کت کہ نورا گوں سنگتاں شھید کنگ بوتگ، من ءَ باور نہ بوت، گَل ءِ جار ونت کہ میجر نورا گوں سَے سنگتاں شھید بوتگ، بلے انگت باور کنگ ءَ نہ اِت آں، سمو اے ساھتءَ کہ من اے گالاں نبشتہ کنگ ءَ آں، من ءَ انگت باور بوگ ءَ نہ انت کہ نورا شھید کنگ بوتگ۔

سمّو !
من نورا ءِ اکسے دیست، آئی ءِ اے اکس ءِ گندگ ءَ گوں من ءَ یکبرے گمان بوت کہ پیڈل کاسترو اِنت، پد ءَ کہ اکسءَ را شرّی ءَ چار اِت تاں نورا اِنت، چوناھا پیدل کاسترو منی دوستیگیں ھستی یے (شخصیتے) ءُ نورا ھم ھمے اکس ءِ تہ ءَ منءَ نورا گیشتر دوست بوت چی ءَ کہ پیڈل کاسترو ءِ چھرگ ءَ جنگ ءَ ات، سمّو نورا پیڈل کاسترو ءِ ڈولیں بامردے بوتگ(ادا”بوتگ“ نبشتہ کنگ منءَ دوست بوگ ءَ نہ انت، بلے جنگ باز انچیں گالانی نبشتہ کنگ پرمائیت کہ آ ترا دوست نہ بنت) من ھیال کت کہ اگاں اے اکس تو من ءَ دیم بہ داتیں گُڑا من ءُ تو اے اکس ءِ سر ءَ باز گپ کتگ اَت، پد ءَ تو من ءَ گوشتگ ات کہ منی ابا کوہ ءَ اِنت۔

سمّو… ! من ءُ نورا مدام گپ ءُ گالانی میانءَ اڑ اِتگیں، اے پالیسی رد اَنت، اد ءَ چوش بوتگ، اود ءَ اے ڈول بوتگ، شپ روچ بوتگ ءُ روچ شپ بلے مئے گپ ءُ گال برجاہ بوتگ اَنت، برے برے انچو گمان بوتگ کہ ما سوگند وارتگ کہ یکے دومیءِ ھبر مَنّگی نہ اَنت، مئے گپ ءُ گالانی درستاں چہ وشتریں بھر ھما بوتگ کہ ما تئی سر ءَ گپ کتگ، تئی کسہ آؤرتگ اَنت، سمّو ما ایش گپ ھم کتگ سمّو مزن بیت بی ایس او ءِ چیئرپرسن بیت ،سمّو کہ مزن بیت مئے رھشونی ءَ کنت۔

سمّو ، اے ساھتاں منءَ تئی ءُ وتی کلیں ھبر گیر آیگءَ اَنت، نوراءِ گوما گوستگیں کُلیں ساھت ذھنءِ تہءَ تامرےءِ رنگءَ گوزگءَ اَنت، یاتاں نویس آں پد ءَ گالاں گار کن آں، چوناھا گران انت دوستیگیں سنگتےءِ چوشیں سِدگ، سک گران اِنت، پہ چیزےءِ نبشتہ کنگءِ ھاتر ءَ گال اوں ھمبراہ داری نہ کن اَنت۔

سمّو…!
1955ءَ امریکہ ویتنامءِ سر ءَ اُرش کنت، اے جنگ تاں 1975ءَ برجاہ دار ایت، اے جنگءَ امریکہ باز تاوان وارت، ھمے جنگءِ یک اکسے باز نامدار بیت، ھورٹس پاسءِ کش اِتگیں ایش اکسءِ تہءَ یک امریکی سپاھی یے اِلمیٹءِ سر ءَ نبشتہ اِنت کہ ”War is Hell“ ،من ھمے کہ اے اکسءَ گند آں گڑا جیڑ آں کہ راستیءَ ”War is Hell“۔ جنگ مردمءَ چہ وتی درستیں دوستیگیں مردماں سند اِیت، جنگ در پہ در کنت، جنگ مردمءِ کسانیءَ پچ گِپت۔

سمّو جنگ راستے کہ تاراجی یے ، بلے چے کن ئے؟ بلوچءِ گور ءَ جنگ کنگءَ ابید دگہ ھچ پشت نہ کپتگ، ھپتاد سال اِنت کہ بلوچءِ زمینءِ سر ءَ دری زور آور اَنت، بلوچءِ مال ءُ مڈّی پُلگ بوگءَ اِنت، بلوچءِ زِر بلوچءِ دستءَ نہ اِنت، زبان گاریءِ سیمسراں سر بوتگ، شال پیسر سگار ءِ ھرجان اَت ءُ نوں گوادرءِ سر ءَ چینءَ وتی چم ایر کتگ اَنت، جنگ تاراجی یے بلے بلوچءِ جنگ اِنت کہ بلوچستان، بلوچءِ دستءَ اِنت، اگاں اے جنگ مہ بوتیں گڑا بلوچءِ زمین پہ بلوچءَ گیش تنک تر اَت، جنگ کہ بیت گڑا سر ھم رو اَنت، بیست سال اِنت کہ بلوچ وتی سراں ببا دیگءَ اِنت، ھزاراں پیر، کماش ءُ ورنایاں وتی سر ببا داتگ اَنت، بلے جنگ برجاہ اِنت ءُ اے جنگ ھمے ھاتر ءَ برجاہ اِنت کہ نورا ءِ ڈولیں بامرد گوش اَنت کہ سر ءَ دئیں بلے زمینءَ نہ دئیں۔

سمّو نورا ءَ مدام بامردانی کسہ کتگ، نورا ءِ سنگت شیھو وَ کسہ کارے بوتگ، آئیءِ پُتینک پر بوتگ اَنت چہ بامرد ءُ جنگانی کسہ ءَ، چوناھا منءَ کسانیءَ چہ کسہ ءِ گوشدارگ وش بیت، زمینءِ کسہ، جنگانی کسہ، بامردانی کسہ، بگندئے ھمے ھاتر ءَ منءَ نورا ءِ ھمراہ داری وش بوتگ، بلے پد ءَ کہ منی تئی گوما ھال بوت، گڑا مئے کسہ مٹ بوت اَنت، بامردی کسھانی جاہءَ پٹ بال، ھور ءُ تَر ءُ گردانی کسہ بوت اَنت (نورا ءِ کسھاں ابید)۔

سمّو….! ھنوں دنیا ءُ جھانءَ کرونا ءِ کسہ اِنت۔ سرجمیں جھان اوشتءِ آماچ اِنت۔ پٹبالءِ کلیں گوازی Cancelبوتگ اَنت(بلے اے سیزن وش نہ اِنت، ال کلاسیکو ءَ بارسلونا دو گولءَ برگ بوت گڑا من گوازیءِ چارگ یلہ کت) اے وھدءَ گوں تو ھال نیست اَت کہ ترا ھال بدے آں، ایش ھم جنگءِ سوب اِنت کہ منی ءُ تئی ھال بوگءَ نہ اِنت۔

سمّو ، ھژدہ ماہ اِنت کہ منی ءُ تئی اولی ءُ گڈی دیوان بوتگ، سالےءَ گیش اِنت کہ منی ءُ تئی ھال نہ بوتگ، بلے سمّو اے ھژدھیں ماھاں من چہ تو بے ترانگ نہ بوتگ آں۔ سمو ءِ سر ءَ نبشتگیں شَیر ھم وتی گور ءَ ایر کتگ اَنت کہ اے منءَ تئی ترانگءَ گیج اَنت، من ھمے دوریانی ساھتاں چنچو کسہ جیڑ اتگ، چنچو کتاب ونتگ، چنچو سپر کتگ، تئی گوما اے کلیں کسہ کنگی اَنت، بازیں جاھانی اکس تئی سر ءَ دیم دیگی اَنت ءُ ترا جُست کنگی اِنت کہ اِنیچو وھد اِنت کہ مئے ھال نہ بوتگ تو چے چے کتگ؟ بلے جنگءَ انچیں جاور پیداک کتگ کہ من تئی گوما ایش کسھانی کنگءِ واستا ھال کنگءِ جاگہءَ ایش تاکاں سیاہ کنگءَ آں۔

سمّو کسہ باز اَنت بلے وھدے کہ زمینءَ جنگ بیت گڑا کلیں کسّہ گار بنت ءُ جنگ وت کسہ کار اِیت، بامردانی کسہ، زمینءِ پھازوکانی کسہ، زِرپھازانی کسہ، درویشءِ کسہ، نبی دادءِ کسہ، شیھو ءِ کسہ، نوراءِ کسہ۔

سمو….! ترا یات بیت من ترا گشتگ ات کہ CPECءِ دَگءِ سوبءَ شُمئے میتگءِ مردم در پہ در کنگ بوتگ اَنت، نوں اد ءَ چینءِ مردم کاینت ءُ نند اَنت تو گوشت کہ ابا اشاں نیل ایت، مرچاں کلیں سنگت تئی ابا(نورا) ءِ بامردیءِ کسہ ءَ کنگءَ اَنت، بی ایس او ءِ سیاستءَ بگر تانکہ آئیءِ شھادتءَ، تئی ابا (نورا) ءِ ایمان اَت کہ ما وتی منزلءَ روچے نہ روچے الم سر بیں، بامرداں ایش جنگ داں گُڈی منزلءَ دارگی اِنت ءُ تئی ابا (نورا) ءَ ایش جنگ داشتگ اَت یک بامردےءِ پیمءَ تاں وتی گڈی ساھتاں۔

سمّو…! نورا ءِ بامردیءِ کسہ باز اَنت، دانکہ ایش جنگ ھست اِنت نورا ءِ وڑیں بامردانی کسہ برجاہ بنت، من اے وھد ءَ اے گالاں کہ پتو نویسگءَ آں، من ءُ منی سنگتے نشتگاں ءُ جنگانی کسہءَ کنگءَ آں، بلوچءِ جنگءِ کسہ، سوریاءِ جنگ، اوگانستانءِ جنگ، کُردانی جنگ، بلے کلیں جنگانی کسہ اَنت۔

سمّو من جیڑگءَ آں کہ چو مہ بیت جنگءِ کسہ منی ءُ تئی پیسر ءِ کسھانی جاہءَ بگر انت، اے جنگ آماچیں زمینءَ دگہ کسہ چوناھا نیست اِنت، پشت کپتگیں کسھانی جاہءَ جنگی کسہ بگر اَنت گڑا پہ منی تئی درشان ءُ بیان کنگءَ کسہ نہ بیت،

سمّو من چوناھا جنگی کسھاں ابید دگہ کسہ ایوکءَ تئی ءُ تئی ھمرنگءِ گوما کن آں، تئی گوما ھال نیست اِنت ءُ تئی ھمرنگءِ گوما زھر آں، نوں منی کر ءَ پشت کپتگیں کسہ ایوکءَ جنگی کسہ اَنت،

سمّو … تئی ھال کنگ ءِ وداریگ آں ۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چو چی ءَ اشتاپ کت گلابو؟

نبشتہ کار : شے ھک جلیس

دی بلوچستان پوسٹ

گوش اَنت کہ ماں سیہ شپاں گوں ترند ءُ تیزیں توپاناں دچار کپوک گوں وتی ھونانی سھری ءَ مرمرانکیں چراگاناں بلین اَنت ءُ گوستانک ءِ تہ ءَ نمیران بنت۔ زیکیں روچ ءَ منی ھمبلیں گلابو تو گوں وتی برات ءُ سنگتانی ھوری ءَ وتی مسکیں ھوناں چہ بلوچ راج ءِ زرمبشت ءِ چراگ ءَ را روکتر کت ءُ ابدمان بوت ئے۔

منی ھمبل ءُ بیلی نواز جان اے گیدی ءِ تہ ءَ یک بلوچ پسّگے ھست تئی جھد ساڑاھگ ءُ نازینگ بنت ءُ اچ ترا گوستانک کدی شمشکار نہ بیت۔

منی نواز گلابو جان تئی نند ءُ نیاد ءُ مجلس ءُ دیوانانی گپ من ءَ مروچی یک پہ یک گیر آیگ ءَ اَنت۔ اچ ھمے یات ءُ گیراں چہ تئی اے ھما نگرھیں گپ من ءَ سک گیر آیگ ءَ انت کہ یک روچے کپتگ آپ ءُ لگوریں سنگتانی روَگ ءِ ماھولے اَت تو گشت کہ پرومی سنگت بے اوست ءُ بے بروسا ئیں سنگت انت کجام نیمگ ءَ کہ پُلّ ءُ بھار بیت ھما نیمگ ءَ لیٹ اَنت۔ بزاں بلوچ راج آجوئی گل مھکم ءُ توانا بنت گڑا گوں ھمے گلاں ھوار انت وھدے کہ گل نزور تر اَنت گڑا پاکستان ءِ ناپاکیں بیرک ءِ چیر ءَ وت ءَ را من پوش اَنت۔
بلے من تئی سر ءَ مسکرا کت ءُ گوشت تو ھم پرومی یے ئے تو ھم چو ایدگرانی پیم ءَ کن ئے۔
بلے تو من ءَ گشت من ھنّی ھرچی بہ گوش آں پائدگ نیست۔ تو اگاں سلامت بوت ئے انشاءاللہ منی سرانڈری ءِ ھال ترا سر نہ بیت۔ دیمتر ءَ بے ریائیں وھد ءَ اگاں موکل دات من پہ وتن سالونک بہ آں ءُ وتی مادریں گلزمین ءِ مسکیں کُٹ ءَ وش واب بہ آں۔

گلابو جان تو وتی کتگیں کول ءُ وتی مکھیں گلزمین ءِ ھک سرجم کت۔ گلابو جان مروچی من پھریگ آں کہ تو منی ھمبل بیتگ ئے۔ تھنا من نہ پروم ءِ ھمک کس ءُ سنگت پہ تئی کربانی ءَ پھریگ اَنت۔

گلابو من جزم آں زیکیں روچ پہ تئی وش نیتکاں نہ وشیں روچے اَت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔