TBP Balochi

لاک ڈاؤن

نبشتہ کار: راشد حیدر

دی بلوچستان پوسٹ

من ءَ یاد انت کہ من وھدے اولی روچ ءَ دیم پہ دربرجاہ ءَ سرگپتاں ءُ دربرجاہ ءَ داکل بوتاں گڑا اے روچ ءَ من ءَ پت ءَ نہ برتگ ات ءُ نا کہ ناکو ءُ ناکو زتک اَنت ،نا کہ مات ءَ من ءَ دربرجاہ ءَ داکل کتگ ات ۔۔۔ اسل ءَ من یک روچے میتگ ءِ لھتیں گونڈواں گوں سر گپتگ ءُ وتی تب ءَ دیم پہ دربرجاہ ءَ رھادگ بوتاں ءُ کلاسے ءَ نشتاں ۔۔۔ من ءَ آ وھدی وھد ءُ سند یات نہ ات بلے چد ءُ رند کہ مردمانی دپ ءَ اش کتگ ات کہ پسنی جیٹی 1989 ءَ پہ کار و بار ءَ چہ بے نزیر بھٹو ءُ نواب اکبر بگٹی ءِ دستاں بندات کنگ بوتگ ۔۔۔اسل ءَ من کہ ھمے روچ ءَ گوں سنگتاں پہ دربرجاہ ءِ روگ ءَ گون کپتاں، من ءَ یات ات کہ راہ ءُ رند رش ءُ کش ات اَنت ۔۔۔مردمانی ءُ مئے کلاس ءِ ماسٹر ھم گشگ ءَ ات کہ مرچی بے نزیر اتکگ کہ آ جیٹی ءَ بندات کنت۔۔ تاں ھمے وڑ ءَ پد ءَ من زانت کہ من 1989 ءَ دربرجاہ ءَ داکل بوتگاں۔۔۔ من لوگ ء اتکاں گڑا وتی مات ءَ را گشت کہ اماں من دربرجاہ ءَ مرچی شتگ آں ۔۔۔ منی مات ءَ پسہ دات کہ شر کتگ ۔۔۔اسل ءَ منی مات ءِ کار ءُ کسب چہ بنیاد ءَ درزی گری انت بزاں آ سجیں روچ مشین دوچ ایت و پہ من ءَ لھتیں کلدار پیدا کنت ۔۔۔ تاں من وتی مات ءَ را گشت کہ من ءَ یک تکتی یے ءُ یک کاپی یے درکاد انت کہ ھر دُکان نھاد آ وھدی ھاجی رستم ءِ دکان ءَ پانزدہ کلدار ات ۔۔۔ پد ءَ منی مات ءَ درائینت کہ کمے ودار کن من ھمساھگ ءِ گدانی ھڈاں توام کناں بریں لوگ ءَ سر اش کن ءُ پنجاہ کلدار کرایہ بگریں ۔۔۔

من ھمے وڑ ءَ کُت ءُ داں ھما وھد ءَ ھمساھگیں جنین آدم ءِ سر ءَ اوشتاتگ میلانک بوتاں دانکہ من ءَ کرایہ پنجاہ کلدار ئِے دات ءُ من چہ ھما نیم ءَ دیم پہ ھاجی رستم ءِ دکان ءَ شتاں کہ پہ وت یک کاپی یے زرت ءُ یک تکتی یے ۔۔۔۔۔ پد ءَ ھمے وڑ ءَ ھم سُھب دیم پہ دربرجاہ ءَ شتاں ۔۔۔من وتی ھمے دربرجاہ ءِ وانگ ءِ وھد ءَ اولی مکتب ءَ بگر داں پنچمی مکتب ءَ من ھمے و ءَ پنچ کلدار والا کاپی ءِ سر ءَ وتی وھد دِکہ دات کہ منی مات ءِ مشین ءِ کرایانی زراں چہ منی مات ءِ گنجائش ء ات ۔۔۔بلے ھمے کہ من ششمی مکتب ء اتکاں گڑا کتاب ءُ کاپی ھم باز ات انت ءُ پد ءَ پنچ والا کاپی زورگ ءِ اجازت نیست ات کہ زنڈیں کاپی زورگی ات ، آ ھم ھپت دانگ پد ءَ ھر یکے ءِ نیاد ھم چِل پنجاہ کلدار ات ۔۔۔ من ءَ کاپی زورگ ءِ گنجائش نیست ات بلے من ماسٹرانی رد دیگ ءِ واستا ھپت ءِ جاگہ ء سے کاپی پہ وتی گنجائش ءَ زرت آ اے واستا کہ گنجائش نیست ات ءُ منی مات ءِ پندول لاک ڈاؤن ات ۔۔۔منی وَ کیسگ دائمی لاک ڈاؤن ات ۔۔۔۔ تاں وھد گوزان بوت ، ھپتیں سبجکٹانی استاداں پہ کاپی مکمل کنگ ءِ نام ءَ وتی اسائنمنٹ لوٹتگ ات اَبت گڑا اے وھد ءَ من تھنا سے استاد ءِ کار سرجم کتگ اتاں ءُ دگہ چاریں استاد کہ اتک اَنت گڑا من مدام ھمے گُشت کہ منی کاپی سرجم نہ انت ۔۔ من ایدگہ چاریں پیریڈاں لٹ وارت ۔۔۔۔ ھمے وڑ ءَ لٹ وارگ ءِ پیریڈ برجاہ ات اَنت ءُ ھمے چاریں استادانی چماں من سکیں نالائک ءُ گھٹیائیں نودربرے اتاں ۔۔۔۔ من اسل ءَ نالائک نہ اتاں ءُ اے وڑ ھم نہ ات کہ منا کاپیانی سرجم کنگ تور اتگ اَت ۔۔۔ اسل گپ اش ات کہ کاپی ءِ جند نیست اَت چہ کجا سرجم اش بہ کناں ۔۔۔۔مرچی باند ءَ لاک ڈاؤن ءَ گوں منی ریش اسپیت اَنت کہ من داشتگاں ۔۔۔داں لاک ڈاؤن بندات بوتگ مرچی باریں چنتُمی روچ انت کہ ھر دو ءَ چَہ سیمی کس من ءَ جُست کنت کہ تو وت ءَ را چو کتگ پرچا؟ ریشاں پرچا ساپ نہ کن ئے؟ اشانی گپانی اش کنگ ءَ پد من دمانے پچ کنداں ءُ بے ترک ءُ توار رادگ باں ۔۔۔۔پرچاکہ اشانی جُست ءِ پسہ منی گور ءَ نیست اَنت۔۔۔۔۔ بلے اے گپ ءِ اش کنگ ءَ پد نزاناں پرچا یکبرے پد ءَ من ءَ وتی ھما روچ یات کایاں ۔۔۔من ءَ وتی ھما چاریں ماسٹر یات کایاں ۔۔۔۔ماسٹرانی لٹ ءُ ھما ناسرجمیں کاپیانی ترانگ ءَ کپاں کہ آ ھم روچے مروچی سرپد نایاں کہ من وتی کاپی پرچا سرجم نہ کتگاں ۔۔۔؟

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ساجد توکلے اَت

نبشتکار: زیردان بلوچ

دی بلوچستان پوسٹ

اے راجدپتری راستی یے مردم پہ مِرگ گار بیگواہ نہ بَہ اَنت ، پرے ھاتر ءَ اے ھَبر ءَ من پہ جَزم گوشّ آں مَرگ ءُ زند ءِ پیسلہ ءَ راجی راجدپتر کنت ءُ راج دپتر پہ کس ءَ مَھتل ءُ ھاتربند نہ بیت……….
ساجد جان ءَ وت ءَ راجدپتر ءِ تہ ءَ زندگ کُت ءُ پہ دائمی نمیران بوت . ساجد بلوچ ءَ دُژمن ءِ دیم ءَ سر ءِ جھل کنگ ءِ بدل ءَ درانڈیھ بُوَگ پہ وت گچین کُت ءُ راج ءِ سودا نہ جَت ، اے ھبر پہ ساجد ءَ ھمے درور ءَ دنت کہ ساجد زمین زادگے اَت پہ گُلزمین تلوّس اِت ….. ……
مروچی بلوچ راج پہ ساجد ءَ پھر بَند اِیت ءُ آئی ءِ سِپت ءُ ستا ءَ کنت ، بَلے ساجد وھدے چہ وتی سرڈگار ءَ درکپ اِیت ءُ درانڈیھ بیت…………گُڑا ساجد جان ھر وھد ءَ مُلور ءُ بے چاڑ بیت ،
بلے پہ کَے…….؟
پہ ماتیں گُلزمین ءَ ، پہ مھلبیں سرڈگار ءَ ، پہ آئی ءِ کُنگُریں بچّاں ، پہ بَزّگ ءُ دِرتّگ پُچیں راج ءَ کہ آ وتی جند ءِ مرزبُوم ءَ درانڈیھ ءُ درآمد بیت.
ساجد جان ءِ کُجام اکس کہ چمانی نور بوتگ ءُ دیم ءَ گوَستگ گُڑا آئی ءِ چمانی گیمُرّگی یے دیم ءَ یک بےچاڑی ءُ بے تاھیری یے دیستگ………
تو ھمے گوشت کن ئے ساجد ءِ کُوپگاں گرانیں بارے بوتگ ءُ ترّ اِتگ………
بَلے! مروچی ساجد جان ءَ ھمے بار منتگیں ھمبلانی کُوپگ ءِ میار کُتگ ءُ دیم پہ دائمی ھنکین ءَ رپتگ ءُ مکھیں مات امبازتگ …………
چوش کہ مرچی ساجد جان ملُور ءُ بے چاڑ نہ اِنت ، چی ءَ کہ ساجد ءَ وتی ھکّ پیلو کُت ءُ رپت ، پشت کپتگیں سنگتاں پہ رُژنائیں کَندیلے روک کُتگ . ھمے کَندیل ءِ رژنائی اِنت کہ مارا چہ تچکیں راہ ءَ گِسر بُوَگ ءَ نیل اِیت ءُ مادنیں راہ ءِ شون ءَ دنت…….
زانت ءَ زانگ شکسا اِیت ءُ مھر ءِ درس ءَ دنت ، پہ دیم ءِ جُنزگ ءِ ھاتر ءَ ھر ساھت ءُ دمان ھمے سکین ءَ دنت ءُ گوش اِیت تئی منزل تئی ودار ءَ اِنت…………ترا توار ءَ اِنت………
گُڈّی ءَ من ھمے گوش آں ساجد جان توَکلے اَت ءُ مارا انگت توکل دنت ءُ پہ منزل ءَ جُنزّگ پَرما اِیت ، چی ءَ لیکھانی ھُدابُند پہ دائمی زندگ مان اَنت………
ھمے داب ءَ ساجد جان ھم پہ دائمی زندگ ءُ نمیران اِنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مئے شان شھید میجر نورا بلوچ

نبشتہ کار: آرپ لال بلوچ

دی بلوچستان پوسٹ

نورا ءُ پد ءَ ڈاکٹر نورا، ڈاکٹر ءَ چہ پد شھید میجر نورا پنام پیرک (منی دل ءُ میجر رَند ءِ کرد ءِ نام بیت ءُ پیرک جنز ء آزادی ءِ سرجمیں سرھیل ، بلے آئی وتی ادارہ ءِ توسیپ نام سرچماں)نورا جان منی ناکو زهگ انت ءُ من ءَ چہ باز کستر انت تھنا کستر نا من ءَ آئی ودی بوگ ءِ شر ھوش کنت ۔
وهدے کہ نورا جان ءِ اُمر چار سال اَت ما اتک ایں درانڈیه ءَ بزاں بھرین ءَ، وهد گوزان اَت من نورا باز کم دیست ءُ بلکیں نہ دیست هم وهدے ما چہ بھرین ءَ مُلک ءَ پہ چٹیاں شُت ایں من نورا جان دیست باز سرپدی ئیں لائکیں گوانڈلے اَت گوں کتاباں دلگوش اَت وهد گوزان بوت نورا جان دیم پہ شال ءَ پہ وانگءِ هاتر ءَ شُت، دو ھزار هَپت ءَ من سرپد بو آں نورا پنجاب ءَ ڈاکٹری وانگ ءَ انت گڑا من نورا ءِ مستریں برات جُست کرت، گُشت ئِے هَو ڈاکٹری کُورس ءَ کنگ ءَ انت سَے سال گْوستگ دو سال هست دل باز وش بوت کہ مئے کھول ءِ تہ ءَ یکے ڈاکٹری وانگ ءَ انت وهد روان اَت پد ءَ همے هال سر بوت کہ نورا چہ پنجاب ءَ بیگواه کنگ ءَ بوتگ ءُ پد ءَ آجو کنگ بیت، گڑا آ شر سرپد بیت کہ مکاریں دشمن منی اد ءِ نندگ ءُ بلوچ ءِ نام گرگ ءَ وش نہ انت ءُ نوں من ءَ چو ایدگہ بلوچ ورنایانی ءَ بارت ءُ بیگواہ کنت کہ ابید چہ تاوان ءَ ھچ مُزے نیست ،گڑا نورا جان وتی پنجاب نندگ ءُ وانگ ھیال ءَ چہ دل ءَ در کنت ءُ پہ بلوچ ءِ باندات ءِ جھد ءَ دیم پہ مُلک ءَ روت، همے وهد ءِ هالاتاں بازیں مردمے پہ ڈّنّی مُلکاں در کپگ ءَ اَت من هم وتی ناکو گُشت تو وش ءُ رزا بہ ئے من پہ نورا ویزایے وڑ کناں کہ در بئیت گڑا ناکو ءَ گُشت تو گوں نورا اے هبر ءَ بکن من ءَ ھبر نیست، وهدے گوں نورا سَلاہ کرت کہ ترا من بھرین ءَ کاراں تئی یک دو سنگت همد ءَ انت ءُ بھرین سکّ وش انت نورا ءَ کند ات ءُ گُشت اے وشی ترا گوں سنگتاں مراد بات اَنت ………….
هیر وهد گوں تُرندی ءَ گوزان اَت یک رندے من ناکو جست کرت کہ نورا چون انت ءُ کُجا انت ناکو ءَ گُشت وش اِنت بلے ما باز نہ گِنداں گوں سنگتان اِنت…………..
26 اپریل 2020 ءَ من ءَ پونے اتک گوں پون ءِ چست کنگ ءَ گش ئے منی چہ کوہ ءَ سستگیں گزلے بوت ءُ بن ءَ کپت آں پرچا کہ موبائل ءِ دومی نیمگ ءِ مردم ھبر ءَ نہ ات بلکیں زار کنگ ءُ گریوگ ءَ ات،اللہ هیر چے بوتگ من پہ گنوکی جست کرت؟
آئی ءَ گُشت نورا ،نواز، ابدالمالک ءُ مومن لشکر ءِ گوم ءَ دیم پہ دیمی جنگ ءَ شھید بوتگ اَنت، پورا پاداں زمین یل دات ءُ منی دنیا تھار بوت…..
منی کَش ءَ منی پِت نشتگ اَت گُشت ئِے چے بوتگ هیر اِنت، چونیں پونے اَت؟
من گُشت نورا گوں سنگتاں شھید بوتگ منی پِت منی مات ءُ شھید ءِ گُهار درستانی چم ارس بوت اَنت گوں گریوگ ءَ درستانی دپ ءَ نورا نورا نورا اتک…………….
شپ ءَ وهدے جارے اتک شھید میجر نورا پنام پیرک گوں سنگتاں دشمن ءِ دیم ءَ 12 ساھت ءَ چو کوه ءَ میکّ بوتگ گڑا مئے سر برز بوت ، وهدے نورا جان ءِ جنگ ءِ وھد ءِ پیگام اتک،سَر گوں شانے ءَ چست بوت ءُ کندگے جت وت ءَ را گُشت کہ شھید میجر نورا جان ءِ شھادت کُل بلوچاں مراد بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

باج مئیگ انت 

 نبشتہ : مراد بلوچ

دی بلوچستان پوسٹ 

اے زندمان ءِ لیب ءِ تہ ءَ ھر روچ رنگ مٹان اِنت۔ ھر روچ ھرچ مردم نوکیں چیزے گند ایت۔
زندگی ءِ رنگانی تہ ءَ مردم روچے یک نوکیں رنگے گند ایت۔ وڑ وڑیں مردم ، وڑ وڑیں جاگہ ، وڑ وڑیں ھمبراہ۔ شر ءُ گندگ ھر چیز نوک نوکیں داباں گوں دیم ءَ آیان انت۔بلے مردم تھنا ھما چیز ءُ ھما مردماں یات کنت کہ ھما مردم یا ھما چیز چہ آ دگہ جھان ءَ جتا ءُ جوان تِر اِنت۔ راجدپتر ءِ اندر ءَ ھما مردم مان انت کہ آیاں پہ راج ، پہ ھاک ءُ زمین ءِ ھاتر ءَ ساہ داتگ ءُ ھونانی ھار تاچینتگ۔
ھما کہ پہ بنیادم ءُ ساھدارانی رکّینگءَ زندگ بوتگ انت ءُ رپتگ انت۔ ھما ھستی کہ اے جھان ءَ نوکیں رنگ ءِ بکشاتگ اِش . وتی پُشپداں نوکیں کشک شون داتگ اِش۔ ھما مردماں کہ نام اِش تا گیدیءَ مان ایت۔چو کہ اسلم ءِ رنگ ءَ بہ بیت یا ریھان ءُ آ دگہ شھید بہ بنت کہ وتی جان اِش پہ سرڈگارءَ بکشاتگ۔
ھمے شھیدانی لڑءَ یکے شھید میجر پیرک اِنت کہ گوستگیں روچ ءَ گوں وتی سَے ھمگنگلاں ھوار پروم ءَ دشمن ءَ گوں مڑان ءَ شھید بوت۔
شھید پیرک ءِ نام ءُ توار من دو ھزار سینزدہ ءَ چہ اِش کُتگ ات بلے منی بد بھتی ات کہ منی گوں آئیءَ دیدار نہ بوت۔وھد گوازان ، دنیا ءَ وتی رنگ مٹان۔ منی اوں کشک بدل بوت۔من بازیں سنگت ءِ دپءَ شھید پیرو ءِ توسیپ ءُ ستا اِش کرتگ ات ءُ منءَ ھم سک ءَ ھب ءُ واھگ بوت کہ من ھمے سنگتءِ دیدار ءَ بکن آں بلے زندگی ءَ دل ءَ نہ اَت ۔ھیر دوھزار نوزدہ ءَ من بالگتر ءِ اوتاک اتاں۔گڑا ھمودءَ سنگتےءَ گُشت کہ منءَ گوں پیرک کار ھست لھتیں جیڑہ ھم ھست انت منءَ دیوان ءِ بہ کنائین گوں۔ سنگت ءَ گوشت کہ پیرک کمو نادراہ اِنت پمیشکا ھنوں دیوان نہ بیت ۔گڑا من گشت ھیر اللہ سلامت بہ کنت ، کجام وھد ءَ کہ جوڑ بوت گڑا من گندان ئِے۔ھیر پد ءَ سلامت بوت گڑا من ارادہ کتگ ات کہ بگندان ئِے ۔ من دگہ نیمگے سپرے ءَ در کپت آں گوں سنگتاں ھوار ، گڑا پد ءَ منی گوں شھید ءَ پون ءَ ھال بوت ءُ من وتی ھمے جیڑھانی بابت ءَ گپ کرت اَنت ۔من ءَ شر یات اِنت کہ شھید ءَ منءَ گوشت کہ ھیر بیت۔جنگ وتی راہ ءَ وت تچک کنت ءُ زمین وتی زھگاں وت پجا کار ایت ءُ زور ایت۔ھرچی کہ گند ءُ گسڑ ھست انت اشاں شھیدانی ھون وت جن انت ءُ مارا بس وتی ایمان ءُ توکل مھکم کنگی انت ءُ وتی پرز ادا کنگی اِنت ۔ءُ مئے سوبمندی ھما روچءَ اِنت کہ ما پہ زمین مر ایں ءُ پہ بلوچ ءِ ننگ ءُ ناموس ءُ گیرت ءُ پہ بلوچستان ءِ آجوئیءَ ندر بہ ایں ءُ مئے راج مئے سر ءَ پگر بہ کنت، ما الم سوبمند بہ اِیں۔ ءُ باج مئیگ انت۔

پد ءَ ھمد ءَ یک شپے شریں لینے ءَ اتکگ ات ءُ وتی اکسے منی سر ءَ دیم ئِے دات ءُ پد ءَ ھما گپ ئِے جت انت کہ مارا وتی پرز سرجم کنگی اِنت۔ گوشت ئِے من ھنوں لین ءَ در کایاں پد ءَ گڑا ھال کن آں، ھوار ایں۔

زی من ءَ سنگتےءَ ھال کُت کہ پیرک گوں وتی سَے سنگتاں شھید کنگ بوتگ ءُ پیرک ءِ تیر ئِے ھلاس بوتگ انت ءُ گڈی ءَ شھید کنگ بوتگ ۔
منءَ ھمے دمان ءَ ھمے گپ دل ءَ ات کہ مارا وتی جھد کنگی اِنت تا کہ گڈی ساہ ءُ گڈی تیر ءَ ۔مرچی من گندگءَ آں کہ پیرو ھما گپ جت انت ھما کردار ءِ واھند بوت ، پد ءَ وتی آکری گپانی تہءَ ھم ھمے گپاں جنت کہ باج الم مئیگ انت ۔ءُ باج بلوچ ئیگ اِنت ۔پیرو مرچی تو سوبمند بوت ئے، باج تئی بوت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔۔