TBP Balochi

بے دَروریں پیرو

جورک بلوچ

دی بلوچستان پوسٹ

منی کَد ءُ کِساس اینکَس نہ اِنت کہ من یک میجریں زِندے ءِ سر ءَ چیزے نبشتگ کُت بہ کناں بلے پَد ءَ ھم دل ءِ پاھار دل ءَ دارگی نہ اَنت، اوپار نہ روت اَسل ءَ دل دارگ نہ بیت پمیشکا من وتی پُروشتگیں کَلم ءِ سَر ءِ تِراشَگ ءِ یک نا کامیں جُھدے کنگ ءَ آں ھرچ نا اِنساپی منی کَلم کنت منا پَھل کن پیرو۔۔۔۔۔۔۔۔۔

من نزاناں مئے زِند ءِ سَپر کُجا بِندات بوت بلے بوت، من پیرو ءِ نام ءُ توار مُدام اِشکُتگ سنگتاں کِسہ آرتگ پیرو سکیں مھروانیں سنگتے اے ھم گُشگ بوتگ سکیں نہ تُرسیں مردے، اے گپ ءُ کِسھانی اِشکنگ ءَ پَد منی زِند ءِ یک بلائیں واھگے بوتگ کہ من گوں پیرو ءَ دُچار بہ کپاں بلے منی دل ءِ واھگ نہ سرجم بُوت اَسل ءَ گپے زان ئے پیرو!
زِند ءِ جِند یک ناسرجمیں کِسھے من ءُ تو ھم اے کِسہ ءِ بھرے ایں اَگاں اے ھبر ءَ تو سرپَد بوتین ئے من ءَ را الَم ءَ ھال داتگ اَت کہ بیا منی سَپر سَک مَزن اِنت پد ءَ من ءَ سَک دور ءُ دراجیں پَندے بُرگی اِنت گُڑا تو اَلم من ءَ را گوانک جتگ اَت ءُ وتی دیم ءَ نادینتَگ اَت تو کِسہ ءِ چَک ءَ کِسہ کُتگ اَت من ھاموشی ءَ ترا گُوش داشتگ اَت.
بلے بژن اے نوبت نیتک تو من ءَ را ھال ھم ندات کہ تو چینکَس مھتَل ئے پہ وتی ماتیں گُلزمین ءِ سینگ ءَ پہ وش واب بوگ ءَ ءُ یکّے من چنکس تُنگ اَتاں پہ تئی دید ءَ۔۔۔۔۔۔۔
پیرو جان۔۔۔۔۔ھبر بازاں گِلھانی مزنیں بُکچھے من بستگ من وتی دل ءِ دُراھیں پاھار گوں ترا داشتگیں گِلہ ءُ دگہ بازیں ھبرے ھمے بُکچہ ءَ بندوک اِنت بلے یار پیرو منی سر پِر بوگ ءَ نہ اِنت نزان آں اے گِلھاں گوں کے ءَ بہ کناں تو وَ اَنچو شُت ئے ھرام بات پُشت ءَ چَکے ھم نہ جَت،

پیرو۔۔اَسل ءَ من گنوکاں کہ تئی گِلہ ءَ کناں گِند ئے ترا زمین ءِ اِشک ءَ انچش وتی کُرتگ ات تو زمین ءِ امباز کنگ ءَ انچو بے چاڑ اِت ئے کہ تو پہ سمُل ءَ ھم مھتل نہ بوت ئے ءُ پہ من ءَ چوں کہ من ھَپت زِر ءَ آ دیم آں,
پیرو ؟
بیا ترا دِگہ ھبرے گُشاں ھما اِنت کہ من دل ءَ داشتگ ترا یاد بیت تو سرجمیں 9 ماہ ءَ بیگواہ کنگ بوت ئے ءُ پد ءَ وھدے کہ تو آجو بوت ئے ھما شَپ ءِ شَپ تو من ءَ ھال کُت سنگتانی سلامتی ءِ جُست کُت من وَ چٹ ھیران ءُ اجکہ بوتاں کہ باید اِنت من گوں تئی سلامتی ءِ ھال پُرسی ءَ بہ کناں بلے تو کَس اے موہ ھم نداتَگ اَت تو مُدام پیش سلام اَت ئے، پد ءَ من چد ءُ گیش جیڑ ات کہ منی چُشیں بستارے نہ اِنت تو وتی کیمتی ئیں وھد پہ من ء کَشِ ات ءُ منی ھیال ءَ کپت ئے،اے دُرا تئی داتگیں مھر انت پیرو جان کہ اِچ وڑ ءَ شموشگ نہ بنت۔۔

پَد ءَ گُڈسر ءَ من اَنگت گُشاں من چہ ترا گِلہ آں ترا دیر بوتگ تو دامگ(نیٹورک) ءَ نبوتَگ ئے ءُ من ءَ پہ ترا سَک زھیر بوتگ مُدام تئی جُست من بابُل ءَ کُتگ تئی سلامی ءِ ھالے من ءَ داتگ اَنت،
بَلے بیا کہ یک روچے من ءَ تئی نوکیں اکسے بابُل پہ من روان داتگ اَت من زانتَگ تو دامگ(نیٹورک) ءَ اَتکگ ئے بَلے من ھال نہ کُتگ اے ساھت من سک گوں تو دلگران بوتاں باریں چی گُشت ءُ چی مانا کُت، بَلے آ ساھت من بابُل ءِ دیم ءَ اِچ زاھری نہ دات کہ من گِلھاں بس یکے گالے کہ من شَنک ءُ کُربان.
من ھمے ودار ءَ اَتاں تو من ءَ ھال کن ئے اے نیام ءَ منی موبائل ءَ دو ءُ سے نوکیں نمبر ءِ کال اَتک من ءَ بَس تئی گُمان بوت بلے تو نہ اَت ئے، تو پہ من مھَتل نہ بوت ئے بَلے من اے گلِہ ءَ گوں سمُل ءَ الم کناں کہ تئی اَبا ءَ گون من چُش کُتگ،ھیر من زاناں سمُل چد ءُ گیش گلِہ کنت.
(کسہ نا سرجم اِنت)

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پیرو من وتی کپّی ئِیں کسہ گوں کے ءَ بہ کناں

نبشتہ : آجو کینگی بلوچ

دی بلوچستان پوسٹ

من دوشی دراھیں شپ ءَ نشتگ ءُ سھور ءِ ودار ءَ کہ چش مہ بیت واب بہ کپاں۔۔۔۔۔۔۔۔ من سھور کت ءُ نماز وانت ءُ کران مجید ونت ءُ وپتاں۔۔۔۔۔۔۔۔۔۔۔۔ من وھدے بُست کت ءُ چم پچ کت اَنت منی پون رنگ ورگ اِنت من ھیران بوتاں کہ اے سنگت من ءَ اے وھد ءَ کال کنگ اِنت ھیر اِنت من چم لتارت اَنت پادتکاں۔۔۔۔۔۔۔۔۔۔۔ سنگت ھال کت کہ جی ھال کن گشت ئِے پروم ءِ الاکہ بدیں ھالے تو ھالے بِگر من پون کٹ کت ءُ الاکہ رنگ پہ رنگ ھچ کس منی نمبر ءَ چست نہ کنت ءُ بازیں نمبرے بند اِنت۔۔۔۔۔۔۔۔۔۔۔۔۔ من زانت بدیں ھالے ھست گوں ھمے جیڑگ ءَ ۔۔۔۔۔۔۔۔۔۔۔۔۔۔۔۔۔۔۔۔۔۔۔ سنگتے ءَ ساھتے پد وت رنگ کت سلام ءُ دروت بوت ایں من گُشت ھال کن ھیر اِنت تئی توار جھل اِنت گُشت ئِے ھو ھیر ءُ ناھیر اِنت ءُ گشت ئِے دل ءَ ڈڈ کن ءُ زمین ءِ سر ءَ نند ترا نہ وشیں ھالے دیاں من گشت مزاک مکن تو من ءَ مدام مزاک کن ئے۔۔۔۔۔۔۔۔۔بُگش چے ھالے

گشت ئِے پیر ءُ گل شھید بوتگ اَنت گوں دگہ دو سنگت ءَ من گشت نہ کن ئے گشت ئِے ھو راستے دوشی شپ ءِ سے بج ءَ جنگ بندات بوتگ مرچی روچ ءِ دو بج ءَ تاں ۔۔۔۔۔۔۔۔۔۔۔۔۔۔۔

منی پاداں لرزگ بندات کت منی دراھیں بدن چہ ھید ءَ میچل بوت منی چماں سیاھی ءَ مان پوشت بس منی دومی ھبر آ دگہ دوئیں سنگت کے اَنت ؟ گُشت ئِے گُل ءُ برات ابدالمالک ءُ مومن نامیں سنگتے اَنت۔۔۔۔۔۔۔۔من ھشک ءُ ھیران بوتاں سنگت ءَ گُشت ھاں تو تُکّ ءُ نُک بوت ئے اے بلاھیں پندے اشی تھ ءَ جنَگ ءُ گار ءُ بیگواہ کنگ بیت اے بلاھیں پندے ھمے وڑیں سرانی کربانی ءَ زمین آجو بنت بس منی چمانی ارس یلہ بوت اَنت من یک ءُ تنھا نشت ءُ گریت منی کر ءَ ھچ کسے نیست اَت کہ من ءَ تسلا بہ دَنت بس من گریت ءُ وت ءَ را وت تسلا دیاں بوتاں ۔۔۔۔۔۔۔۔۔۔۔

پیرو من نزانت چو جلدی رو ئے تئی ٹھک ءُ کندگانی توار ھنگت منی گوشاں پیداک اَنت من ءَ باور نہ بوگ ءَ اِنت کہ تو اشتاپ ءَ برو ئے من بزانتیں تو چو اشتاپ کن ئے من وتی دراھیں کسہ گوں تو کت اَنت منی ھما کسہ آ شپ ءَ کپی بوت تو گشت منی پون ءِ چارج ھلاس بوت اَنت باندا من تو ھال کن اِیں، من وتی ھما کسہ ءَ گوں کے ءَ بہ کناں من نزانت تو چو اشتاپ کن ئے ۔۔۔۔۔۔۔۔۔تو من ءَ گُشت پُریں سالے بیت کہ من نہ کند اِتگ شپی من کندگ ءَ آں تو من ءَ زاھے دات کہ تو پرچا مارا یلدات ءُ شُت ئے۔۔۔۔۔۔۔۔۔۔۔ تو کدی کائے؟ من گُشت دیر نہ کناں کاھاں تو گشت منی سر ءِ کسم ءَ بُور من گشت پیرو تئی سر زمین نہ اِنت ۔۔۔۔۔۔۔۔۔۔۔۔تو من ءَ گُشت زمین اگاں نہ اِنت زمین ءِ راج پھازیں بچے ءِ سر اِنت۔۔۔۔۔۔۔۔ پیرو من گشت بس وھدہ اِنت کایاں تئی سنگتانی گندُک ءَ من ءَ اد ءَ ھچ وش نہ بیت بس من وتی دل داشتگ ۔۔۔۔۔۔۔۔۔۔تو گُشت من ءَ باور نہ بیت کہ منی زند ءَ تو بیا ئےے من گُشت چش مہ گش من جلدی کایاں ترا گنداں بلے تو گشت من ءَ گُمان بوگ ءَ اِنت کہ من جلدی جنگ باں۔۔۔۔۔۔۔۔۔۔۔ کہ من ءَ پہ سنگتاں زھیر کنت من رواں سنگتانی نیمگ ءَ بھتر اِنت من گُشت کجام سنگتاں پہ شھیداں ۔۔۔۔۔۔۔۔۔۔۔من گُشت پیرو پہ سنگتاں کلاں زھیر کنت بلے پہ شھیدیں سنگتانی زھیرانی واستا تئی وڑیں سرانی زندگ بوگ پہ دژمن ءَ بیھارے ۔۔۔۔۔۔۔۔۔۔۔۔۔۔

تو من ءَ گشت اگاں من شھید بہ باں تو گریو ئے منی مرگ ءَ من گشت من ءَ گریوگ نئیت من سک دیریں نہ گریتگ بس یک رندے گوں کماش ءَ من گریتگ پد ھما اِنت من گُشتگ نہ گریواں۔۔۔۔۔۔۔۔۔ بلے پیرو من ءَ گُشت گڑا ترا مھر نیست پمن ۔۔۔۔۔۔۔۔۔۔۔پیرو من ءَ تئی ھال ءَ گپت من ھما اِنت گریوگ آں من کرسی ءِ سر ءَ نشتگ ءُ کلمے ءُ تاکے منی دست ءَ تئی اکس منی پون ءِ اسکرین ءِ سر ءَ اِیر اِنت ءُ من تئی اکس ءَ چارگ ءُ لکگ ءَ آں ءُ منی ارس تاک ءِ سر ءَ کپگ ءَ اَنت ، سے سال ءَ پد مرچی گریوگ ءَ آں پیرو من نزانت تو من ءَ چو جلدی گریوائین ئے۔۔۔۔۔۔۔۔۔پیرو من وتی کپی ئیں کسہ گوں کے ءَ بہ کناں تو گُلو گوں وت بُرت گوں ترا زاناں بگیر گُلو ءَ وش نہ بوت من ءَ باور نہ بیت پیرو بلے مرگ پہ زندگیں سراں ھک اِنت ۔۔۔۔۔۔۔۔۔ پیرو تو راست گُشت کہ تو من ءَ زند ءَ نگند ئے

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پراز بلوچ ءِ نمدی ءِ پسہ

ھکیم واڈیلہ

دی بلوچستان پوسٹ

دردانگیں پراز بلوچ

امیت کناں تو اے گرانیں ءُ نگیگیں جاوارانی تہ ءَ ھم گوں وشی ءَ زند ءَ گوازینگ ءَ ئے ءُ مدام راجی درد تئی دل ءَ زندگ اِنت۔

من گوستگیں روچاں تئی نمدی ونتگ اَت، پد ءَ شور کُتگ اَت کہ ترا الم پسو دیاں۔ پسہ دیگ ءَ پیش من تئی منتواراں کہ تو من ءَ بلوچ نبشتہ کارانی لڑ ءَ ھوار کُتگ ءُ شرپ بکشاتگ۔

چوناھا من جوانیں نبشتہ کارے نہ آں ءُ پد ءَ بلوچی ءَ سک نزوراں، بلوچی ءَ نزوری ءِ لھتیں سوب ھست ءُ لھتیں نیمون۔ ھیر منی نزوری وَ ھمے نبشتانک ءِ تہ ءَ ھم گندگ بنت،بلے مستریں گپ تئی جُستانی پسہ اِنت۔

جھان ءَ ھمینچو کہ رسانکدر ھست اَنت آیانی راھبند الم بنت ءُ ھاسیں وڑے ءَ ،وھدے گپ نبشتانک ءِ سر ءَ کیت گُڑا سک باز چارگ ٹپاسگ بیت۔ من گوستگیں روچاں گارڈین انگلش ءِ تندجاہ ءَ چارگ ءَ اِت آں گُڑا آ اود ءَ نبشتانکانی چاپ کنگ ءِ وڑ ءُ پیم(پالیسی) ھمینچو ترند ات اَنت کہ ھمک مردم رس ات مہ کنت، بزاں یکیں جیڑہ ءِ سرا سک باز نبشتانک چوناھا شنگ نہ کن اَنت ءُ اگاں تو گند ئے کہ یکیں جیڑھے ءِ سر ءَ دومی بر ءَ نبشتانک اتکگ گُڑا اے اولی نبشانک ءِ پسو بیت یا چہ آ نبشتانک ءَ گھتر نبشتہ کنگ بیتگ۔

گارڈین ءِ رد ءَ “وتی نبشتانک ءَ مئے سر ءَ روان دیگ ءَ پیش وتی نبشتانک ءِ ھیال ءُ گونڈیں سرپدی یے نبشتانک ءِ بارو ءَ دیم بہ دے ات۔ نبشتانک اگاں مئے گل ءِ پالیسی ءَ در مہ بیت ءُ ما چار ایں کہ نبشتانک شنگ کنگ ءِ وڑ ءَ اِنت گُڑا ما پد ءَ ترا اھوال کنیں کہ نبشتانک ءَ سرجم ءَ دیم بہ دے”۔ ھیر ما تنیگا آ جاہ ءَ سر نہ ایں ءُ نا کہ بلوچ رسانکدر ھما کچ ءَ دیمروی کُتگ کہ چُشیں راھبند گچین کنگ بہ بیت،بلے پد ءَ ھم المی اِنت کہ مردم یک راھبندے جوڑ بہ کنت۔ منی ھیال ءَ مروچی اگاں دی بلوچستان پوسٹ، بلوچستان ٹائمز، بلوچستان افیرز، ءُ دگہ رسانکدر کہ ایشانی چاروک ءُ وانوکانی یک جوانیں کساسے ءَ ھست اگاں ھمک چیز انچش پہ دیم شنگ بہ کن اَنت الم گل ءِ کارانی سر ءَ تاوان کپ ایت۔ منی ھیال ءَ اے وھد ءَ دی بلوچستان پوسٹ ءَ ھمک روچ ھپت اگاں ھشت نبشتانک ءَ گیشتر شنگ بیت بلوچی، براھوئی، اردو ءُ انگریزی زبانانی تہ ءَ ءُ اے نبشتہ کار گیشتر انچیں مردم اَنت کہ جتا جتائیں جیڑھانی سر ءَ نبشتہ کن اَنت اے چُشیں مردم ھم نہ اَنت کہ ایشانی گوں رسانکدرانی گوما مزنیں سنگتی یے یا ھال ءُ اھوالے ھست بلے پد ءَ ھم اشانی نبشتانک، اشانی ھیال شنگ کنگ بنت۔ مئے کرا مزنین جیڑھے ھست آ ایش اِنت کہ باز مردم گُش ایت منی نبشتگیں ھمک شری ھرابی ابید چہ ادارہ ءِ پالیسیانی چارگ شنگ کنگ بہ بیت۔اگاں ادارہ وت ءَ سنگتی ءُ دوستی بنیاد ءَ مجبور بہ کنت گُڑا مروچی رسانکدرانی تہ ءَ ھمک ھما چیز شنگ بنت کہ پیسبوکی سامان اَنت۔

دیدگیں پراز!

من یک جیڑھے مدام دیستگ ءُ مار اتگ منی ھیال ءَ آ جیڑہ ایش اِنت کہ ما لس مھلوک ءَ وھدے گپ کن ایں گُڑا ما لھتیں بُنکی شیھاں بے ھیال بئیں چُش کہ لس مھلوک ءَ گپ کنگ ءِ ھاتر ءَ کجام زبان کارمرز کنگی اِنت، بزاں یک نبشتہ کارے ءُ آزمانکارے اگاں وتی نبشتانک ءُ آزمانکاں پہ لس مھلوک نبشتہ کنگ اِنت گُڑا آ بائد اِنت کہ بزانت کجام نبشتہ کُتگیں گپ ءَ مھلوک زوت سرپد بیت کنت۔ منی ھیال ءَ گرانیں ءُ ترندیں لبزانی گچین جوانیں نبشتانکاں پہ وانوکانی ھاتر ءَ گیشتر جیڑہ ودی کن انت ءُ پمیشکا باز مردم ھما نبشتانک ءُ آزمانکاں چہ دیر تچ اَنت کہ آ تھنا یک کسانیں کساسے ءَ مردمانی ھاتر ءَ نبشتہ بیتگ اَنت۔ پہ درور من لھتیں ماہ ساری یک نبشتانکے اردو ءَ نبشتگ اَت (ایک دن بلوچوں کی طرح گزاریے) اے نبشتانک ءِ زبان ءُ نبشتہ کنگ ءِ وڑ انچو ارزان اَت کہ ھمک مردم ءَ ونت ءُ وت ءَ گوں اے نبشتانک ءَ ھمگرنچ کُت کنگ ءَ اَت۔ بلے چد ءُ پیش من لھتیں نبشتانک نبشتہ کُتگ اَت کہ جوانتریں زبان ءَ نبشتہ کُتگ اِت اَنت بلے آ لس مردمانی زبان نہ اَت پمیشکا من مار اِت کہ وانوک اے نبشتانکانی کارست بیت کنگ ءَ نہ اِت اَنت۔

منی جند ءِ ھیال ءَ مئے چاگرد کہ اد ءَ بازیں زبان گپ ءَ بیت ھاس پد ءَ مئے وتی زبان بلوچی، براھوئی، جدگالی، کھیترانی ءُ دگہ پد ءَ ھمے دراھیں زبانانی مردم وھدے اردو اگاں انگلش وانگ ءَ ھب بنت گُڑا آیانی کِر ءَ تئی گپ بائد اِنت پہ ارزانی سر بہ بنت من باز جاہ ءَ دیستگ کہ مئے نبشتہ کارانی جھد لس مھلوکانی سرپدی دیگ ءَ گیش رسانکدرانی تہ ءَ لھتیں مردمانی وش کنگ اِنت ھما مردم کہ یکیں پگر ءُ سوچ داروکیں مردم اَنت بزاں وت ءُ وتی سنگت۔ پہ درور منی نبشانکاں اگاں منی چاریں مدامی ئیں سنگت بہ گُش اَنت جوان نبشتگ واہ جوان اِنت من ءَ دومی مردمانی گپانی پد ءَ ھچ زلورت پشت نہ کپ ایت ءُ ھمے پگر ءِ سوب ءَ مئے گور ءَ نبشتہ کارانی کساس چہ وانوکاں گیشتر اِنت۔ مئے یک دگہ مستریں جیڑھے کہ من نبشتانکانی تہ ءَ دیستگ آ ایش اِنت کہ ما وھدے نبشتہ کنگ ءَ بئیں گُڑا ما جھد کنیں وتی دوستیں نبشتہ کارانی وڑ ءَ نبشتہ بہ کنیں ءُ برے برے ما ھمے کد ءَ دومی نبشتہ کارانی گیگاناں کنیں کہ ھمایانی نبشتگیں گپاں یک پہ یک نبشتہ کنیں ءُ وتی نام ءَ دے ایں۔
چوناھا وَ ھیر جھان ءَ ھمک ھبر نی گیگان اِنت پرچا کہ ھمک گپ نبشتہ کنگ بیتگ، وانگ بیتگ ءُ گُشگ ھم بیتگ بلے وھدے کہ تو مردم ءِ وڑ ءَ نبشتہ کنگ ءِ جھد کن ئے گُڑا کم چہ کم وتی جند ءِ راستی ءَ بے ھیال مہ بہ ئے کہ ترا چوں نبشتہ کنگ وش بیت تئی وانوکانی لوٹ چی اَنت؟

منی گیشتریں وھد ءَ جھد ھمیش بیت کہ سیاسی جیڑھانی سر ءَ نبشتہ بہ کنان کہ بوت کنت دگہ جیڑھاں چہ شرتر من سیاسی جیڑھانی سر ءَ وتی ھیالانی درشانی ءَ کُت بہ کناں بلے پد ءَ ھم گوں سیاست ءَ ھوار من برے برے چاگردی جیڑبانی سر ءَ ھم وتی ند ءَ کار بند آں۔

دردانگیں ھمبل

من گُڈسر ءَ ترا ھمینچو گُشاں کہ ھمک جیڑہ ءِ سر ءَ ھمک مردم نبشتہ کُت نہ کنت پرچا کہ آئی ءِ پِڑ نہ اِنت بلے منی ھیال ءَ بلوچ رسانکدرانی تہ ءُ ھمک جیڑھانی سر ءَ نبشتہ بیت ءُ باوست ھم بیت منی جیڑگ ایش اِنت کہ اگاں ھمک مردم وتی ھیالاں ھمے وڑ ءَ جوانیں رنگ ءُ دروشمے ءَ دیم ءَ بیار ایت الم آ رسانکدراں شنگ ھم بنت ءُ آیانی پسو ھم دیگ بیت۔ بوت کنت من تئی پسو ھما وڑ ءَ دات کُت نہ کُتگ کہ تئی لوٹ بیتگ بلے من وتی زانشت ءِ ھساب ءَ ترا تئی پسوانی دیگ ءِ ایمانداریں جھد کُتگ ۔

مدام تئی وشیانی لوٹوک

ھکیم واڈیلہ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

آزمانک | لالُوازم

نبشتہ: چیرآپی

دی بلوچستان پوسٹ

پراز بلوچ ءِ نِمدی ءِ پسو 

نبشتہ : اکیل مراد

دی بلوچستان پوسٹ

پہ وش ءُ وشمانی ءَ مردمانی تب جوڑ بنت ءُ یازدہ سال اِنت چاگردی رسانک جاھاں چارگ ءُ وانگ ءُ در برگ ءَ آں پمیشکا کہ چاگردی رسانک پہ تب ءَ وش اَنت ءُ ھمُک چیر ءُ اَندریں چیز زوت زوت ءَ مردماں سر بنت ھرکس اِش گند اِیت ، من اوں ھمے مردمانی لڑ ءَ ھوار یک چاروک ءُ وانوکے آں ،
وھدے کہ ھُدامرزی ئیں اسمائیل ءَ ٹی وی چینل چالو کُت من ھم آئی دیم ءَ نشت ءُ چار اِت اچانک ءَ نیوز اُشتات ” نوکاز ” ءِ بندات ءَ دل لزر اِت باریں چی یِے ؟

ٹی وی چینل ءِ شاھوکاریں جنک ءَ گُشت “لاہور سے پِنڈی جانے والا بس الٹ گیا سات افراد جانبحق دس زخمی ” من دلترک بیتاں شادامیں بلوچستان کہ ھونی جاورانی آماچ اِنت بلے ایشی ءَ دل ءَ دلجم اِت آں کہ بلوچستان ءِ گپ شنگ نہ بنت ۔

ٹی وی چینل ءِ وتی کردار ، آئی ءِ زمہ واری کجام کساس ءَ اَنت پہ وتی ڈیھ ءَ ، کجام رنگ ءَ وتی ڈیھے جتائیں جاھانی ھالاں وتی مھلوک ءُ جھان ءَ سر کنت ،

“میڈیا ” رسانکدر زیردستیں راجاں مدام لگت دینت آیانی ھال ءُ جاوراں دومی ءَ سر نہ کن اَنت زیردستیں راجانی واستا اگاں چیزکے ھست گڑا تھنا وتی کوپگ ءُ وتی زور ۔

“ٹیلنٹ ” کسے ازم ءُ ساچشت کاری ءَ گوں بندوک اِنت گڑا الم آئی ءَ رسانکدر کُشت نہ کنت نانکہ آئی ءِ سر ءَ جتائیں ترینزول شان اِیت ھرچ ازم ءُ ھرچ ساچشت وتی تام ءِ پھتوی ءَ بے مٹ اِنت،

فراز بلوچ!

دراہ بات ئے الم تو جاندراہ ءُ جوڑ ءُ ڈَڈّئے تئی ڈَڈی پہ ترا جاندراھی بات ھچ گم مہ گندات ئے تئی دیم داتگیں نِمدی منی چماں ساھت دوازدہ ءُ چِل ءُ پنچ دمان ءَ کپتگ اَت ھچ چوشیں بودشتے نہ داراں کہ تئی گران بھائیں گپانی پسواں بہ پریچاں بلے وتی وس ءُ واک ءُ تچ ءَ پد جند ءِ ھورکی ءَ گوں تئی نِمدی الکاپ ءَ ونت ءُ من دلجم ءُ سرجم ءَ پھم اِت ۔

بنداتی گپ ایش اِنت کہ من ءَ تئی نِمدی ءَ گیش پہ پَٹ ءُ پول ءَ پرمان کت ءُ کوھنیں یات تاجگ بیت اَنت دل ءَ ھُل کُت منی ند سرجمیں رداں نیزوری ءَ گرنچو بیت ۔

کمے وتی جند ءِ بارو ءَ ھم گْوش آں کہ من انگت ءَ چوشیں “اھوالکار ” ندکار “راجکار “چاگرد کار ” ھچ چوشیں چیزانی بودشت ءَ نہ دار آں پرے ھاتر ءَ تئی نِمدی ءَ گرانیں بارے منی سر ءَ ھوشام کت ۔

سریں فراز بلوچ !

نسک ءُ تاکجاھانی چیزے دربرتگیں اھوالکارانی کاردانکانی سر ءَ ھیرت چاری درشان کنگ ءَ آں ” واجہ مکتار لوبس کہ انڈونیشیا ءِ نامی ئیں “اھوالکارے “بیتگ اھوالکاری “چی یے؟ گڑا کجام ھم رنگ ءَ آئی ءَ یک شوکیں نامے دیگ بیت

گوش اَنت کہ واجہ مکتار نوزدہ سد ءُ بیست ءَ سماٹر ءِ میانی دمگ “پنان کباؤ ءَ ودی بیتگ “

ھپت سال ءِ اُمر ءَ داں سیزدہ سال ءِ اُمر ءَ آئی ءَ دربرجاھے ءَ وانگ سرجم کرتگ سَے سال ءَ یک بزنس شھدربرے ءَ آئی ءَ ونتگ چریشی ءَ پد ھرچی کہ وانگ ءُ زانگی بیتگ اَنت درست وتی نیمگ ءَ چَہ بیتگ اَنت ۔

بیت ءُ گمان نوزدہ سد ءُ چِل ءُ پنچ ءَ آئی ءَ انڈونیشیا ءِ اھوالکاری ءَ وتی گام ایر کرتگ اَنت آئی ءِ جسم ءُ جان زندمان آجوئی ءِ سر ءَ دیم ھونی بیتگ اَنت کہ ھرکسی تب وتی میل ءَ بیتگ ۔

دگہ جاھے ءَ گْوش اِیت ، کہ ھما سال ءَ ولندیزی لشکر ءِ انڈونیشیا ءِ آیگ ءَ پد آئی ءِ منوکے ءَ چَہ دلرنج بیتگ گڑا آئی ءِ کارگس ءَ شتگ پہ کُشگ ءِ بیھار دیگ ءَ ، داں اود ءِ سر بوگ ءَ رند سما بوتگ ئے کہ شَش پُٹی دراجیں مرد لوبس ءِ دیم ءِ دارگ ءُ آئی ءَ چہ دروازگ ءَ کَشگ ءُ چگل دیگ سبکیں کارے نہ اِنت ۔

لوبس ءَ بے کساس سپر کرتگ، وتی دزگیری ءَ پیسر دَہ سال ءَ ملایا، برما، ھندوستان، تھائی لینڈ، ھانگ کانگ، پلپائن، امریکہ، جاپان، کوریا ءُ آسٹریلیا ءِ تر ءُ تاب کرتگ،

اے سپراں آئی ءَ را میان اُستمانی سپر کنوکیں مردمے کرتگ ایشانی ھمراھی ءَ آئی ءَ بازیں زبان ھم زانتگ چُشکہ، انگریزی، پرانسیسی، ھسپانوی، جرمن ءُ جاپانی زبان ھم بروبری ءَ زانتگ ، یک اھوالکارے ءَ ھم بازیں زبان درکار بنت یکیں وھد ءَ یک روچی روتاکے ءِ جوڑ کنوک، یک ماھی مھتاکے ءِ کشوک، یک ھپتگے ءِ شنگکاری ءُ راجداری ءِ نام ءَ دودمان ءِ تالان کنگ

وھد ءُ گمان ءَ نوزدہ سد ءُ پنجاہ ءُ شش ءَ آ وتی لوگ ءَ بنداتی بند آرگ ءَ بندگ بیتگ اَت گڑا آ وھد ءُ زوراں انڈونیشیا رایا، روتاکے ءِ سر ءَ سرشون اَت اے تاکاری ءُ روتکاری چاگردی جیڑھانی سر ءَ نامان اَت ھمے زمانگ ءَ درستاں چَہ شوکتریں تاک ایش اَت کہ نوزدہ سد ءُ پنجاہ ءَ ھارٹینی ءَ چَہ سوئیکارنو ءِ دومی آروس ءِ پدراھی ءَ آئی ءِ تاک نسک ءِ سبب ءَ سوئیکارنو زھرشانی اوگام اِیت چریشاں چَہ زالبولانی گل دیم دیم ءَ بنت ۔

دگہ جاھے ءَ واجہ ءِ تاک دیمے ءَ نبشتگ اِنت کہ ، انڈونیشیا ءِ نندگ ءِ واستا ھر ھما نندوکیں مردم انڈونیشیا ءِ بُنکی جھمندانی کندگاں گوں گم ءُ رنجے ءَ تالین اَنت ۔ بلے راستگیں گپ ایش اِنت کہ نوزدہ سد ءُ پنجاہ ءَ لوبس ءَ اے وڑیں جاورھالانی پیشوی کرتگ ءُ نوزدہ سد ءُ پنجاہ ءُ نُھ ءَ شجاھت موکو ءَ سکارنو ءِ راجمانی ءِ سسّائیں زانت ءَ وتی جند ءِ مردمانی سر ءَ کاربندگی ءُ زورامندی ءُ رِپکی درشانداب اِتگ ، وھدیکہ لوبس زندانی کنگ بیتگ گڑا آئی ءِ سبب بنی آدم ءِ یکجاھی ءُ مھر دوستی ءِ سسا بیتگ ۔

روکپتی ادب کارانی یک نسک ءِ یات ءَ کیت گڑا آ نسک ءِ سر تاک ءَ نبشتگ اِنت “دی مون از ڈاؤن ” اے گپ گوشانی تھ ءَ پریچین اِیت کہ بنگپ ءُ راہ ءُ رھبند نزیک نزیک اَنت ۔

یک آبادی ءِ تچک ءُ پھک دلیں مھلوک وھدیکہ دشمن ءِ زیردستی ءِ سبب ءَ ھروھد ءَ ترسان بنت آ سبک سبک ءَ وتی آجوئی ءَ دلپروشگی سما کنان بنت

دیدگیں فراز بلوچ!

گپ دراج کَش بیت بلے پد ءَ تئی سرگپ ءِ نیمگ ءَ کایاں تو وتی نِمدی باز جوان ءُ ڈولڈاریں رنگے ءَ پما دیم داتگ تو اے نامانی تھ ءَ منی نام ھوار کرتگ من ءَ چَہ آ ھر سئیں زانشت گیشتر زان اَنت کہ آیانی زانت ءُ زانگ چہ من ءَ گیشتر اِنت من ھماھانی ھواری ءَ شمئے درستانی دربروکے ءَ آں من ءَ درستیں زانتکاری دربری پکار اِنت من اے گرانیں دپار ءَ ھچبر چِست کرت نہ کن آں کہ کسے ءَ منی ردمانی تھ ءَ پلگارگی ءِ جھد چِست کرتگ کہ من آئی ءَ دل کھر بہ باں تو وتی نِمدی ءَ زیردستیں بلوچستان ءِ شنگ بیوکیں لھتے چاگردی رسانکجاھانی نام نبشتگ کرتگ

تو اے گپ ءَ دلپھک ءُ دلرنجی ءَ جنگ ءَ ئے کہ اے رسانکجاہ مردماں پہ وت ءَ جوڑینتگ اَنت اگاں رسانکجاھاں کسے ءَ گوں نزیکی نیست گڑا آئی ءَ کِمار نہ کن اَنت بلے درستاں چَہ پیسری گپ ایش اِنت کہ ھرکس ءَ اگاں چوشیں کارے یا زیردستیں بلوچستان ءِ ھونی ئیں جاورانی شنگ ءُ ھالانی تالان کنگ ءَ وتی لانک بستگ منی دل ءَ آئی ءَ اے ستک پہ مھکمی ءَ چِست کرتگ، مستریں ستک ءُ زانگی ایش اِنت کہ اے کاراں مردم اگاں کنگ ءَ آں گڑا اشانی تہ ءَ درستیں مردم وتی جند ءِ تک ءُ تاکاں ھم گیش نہ اِنت بلے آیانی اے منت کرزی اِنت کہ آیاں اے گران ءُ ھوشامیں راہ پہ وت ءَ گچین کرتگ چِد ءُ مستریں منت کرزی پرے رسانکاراں نیست،

واجھیں فراز بلوچ!

من تئی گپ ءَ سرجم ءُ برجم ءَ سرپد بیتگ آں ءُ منی واھگ ھم ھمیش اِنت کہ چوشیں لانک بندیں مردمے دربئیت ءُ پہ بلوچی زبان ءُ ادب ءَ کار ءَ بندات بہ کنت گڑا اے پہ بلوچاں مستریں مڈی کہ زبان ءَ سوگات بیگ ءَ اِنت کہ ھما ندکاراں بلوچی زبان ءِ دیمروی ءَ وتی شپ ءُ روچ یک کرتگ اَنت ھماھانی تاک ءُ گوشتگیں لچھاں بہ چنت ءُ یکجاہ بہ کنت ءُ چاپکاری ءَ بندات بہ کنت، اے وھد ءَ بلوچی زبان ءِ مستریں شھسسا واجہ سید زھورشاہ ھاشمی درستانی دیم ءَ اِنت کہ مروچی آئی ءِ دَہ وانگی انگت ءَ پہ چاپکاری ءَ پشکپتگ منی دل ءَ چِد ءُ مستریں گمجتیں کار پہ لبزانک ءَ نیست، سید پہ لبزانک ءُ زبان ءَ گچینی لبزانکارانی تہ ءَ ھوار اِنت تری سید زھور شاہ ھاشمی بیت یا اتا شاد، یا شھلچہ کار نمیرانیں پازل بیت یا کہ بلوچستان ءِ کوہ ڈلاں ھزاراں پیداگ بیتگیں لبزانت بنت شر درست مرچی ھمے تَھ آپی ءِ آماچ کنگ بیتگ اَنت،

واجہ سید زھورشاہ ھاشمی جاھے ءَ نبشتہ کنت کہ ھما زمانگ ءَ شال ءَ اُلس نامیں مھتاکے ءَ بلوچی زبان ءُ ادب ءِ سر ءَ ھپتگی تاک دیم ، شنگ کرتگ گڑا ھمے تاک دیم ءَ ھم بلوچی ءِ گالبند پھک آدْروہ کرتگ اَنت ۔
زانتیں فراز بلوچ!

تئی گپانی تھ ءَ دی بلوچستان پوسٹ ءُ بلوچستان ٹائمز ءُ دگہ رسانکجاھانی نام نبشتگ اِنت کہ ایشی ءِ تہ ءَ تو گوشگ ءَ ئے اے رسانک جاہ بلوچستان ءِ نام ءَ جوڑ کنگ بیتگ اَنت بلے پہ بلوچ ءُ بلوچ دودمان ءَ ھچ وڑ ءَ کار کنگ ءَ نیاں تو ھم اے نمدی ءِ تھ ءَ گوشگ ءَ ئے کہ اے گپ من ءَ دگرے ءَ کرتگ ءُ داتگ اَنت من وتی جند ءِ نیمگ ءَ تئی پسو ءَ چُش دے آں

دی بلوچستان پوسٹ بیت یا دگہ رسانک جاھے ھرکسی وتی یک رھبندی مسامے آ وتی مسام ءِ سر ءَ اُوشتوک اِنت کہ کجام ھم رنگ ءَ وتی مسام ءَ پروشت نہ کنت اے گپ ءَ اے رسانک جاہ ءَ جوڑ بیتگیں آئی ءِ رھبند گوشگ ءَ اِنت کہ ھما نبشتہ کہ تاوان ءُ بیرانی کار اِیت آئی ءِ شنگ ءُ تالان کنگ آئی ءِ مسام ءُ راجی لوٹانی بگیری اِنت گڑا آئی ءِ شنگ ءُ تالانی ءَ وتی دستاں دار اِیت آ تُری آئی ءِ پجاروک بیت یا آئی ءِ جند ءِ کار کنوک،

منی دل ءَ اینچُک نبشتانک کہ انیگیں وھد ءَ دی بلوچستان ویب سائیٹ نام ءِ تندجاھے ءَ شنگ ءُ تالان بیگ ءَ اِنت گڑا دگہ جاہ ءَ نہ بیگ ءَ اِنت، زیردستیں راجانی تہ ءَ اے کساس کار کنگ مزنیں گرانی ءُ ترندی ءِ ساہ کشی اِنت کہ اے نیزور ءُ بے پولادیں جاوراں کہ سرجمیں “پوکس” نگاہ ءَ وتی راج ءِ سر ءَ بہ کنت ۔

منی دل ءَ دی بلوچستان پوسٹ ءَ تنی وھدی باز سال ھم نہ اِنت بلے ھمے کمیں سالانی تہ ءَ اگاں تو آئی ءِ تندجاہ ءَ سیل بہ کن ئے گڑا ترا دَہ وانگیانی کم ءُ گیش نبشتانک دز کپ اِیت کہ اے پولاد کرتگیں نبشتانکاں کہ آئی ءِ گران بھائیں کار کنوکاں وتی وھد کَش اِتگ ءُ اے کار کرتگ اَنت

اے کارانی تھ ءَ ھچ وڑیں سوگات ءُ سمائی نیست کہ پراھاں درشان کنگ بہ بیت بلے دپ ءِ بے ریائیں وھد ءَ مپت ءِ بے سر زوال کنگ ءُ وتی وھد ءَ دیمھون کنگ ارزان ھم نہ اِنت

دیدگیں فراز!

اے گپ من ءَ کنگی نہ اِنت بلے گپ ءَ تچک ءُ دل ءِ سبک کنگ ءَ تو اگاں وتی وانگی ءَ کجام ھم چاپکار ءِ گور ءَ بہ برے گڑا الم تر ءَ درستاں چَہ پیسر تئی وانگی ءِ زراں بند اِیت کہ اے کساس ءَ من ءَ زر ءُ مال بہ دئے نِی من تئی وانگی ءَ چاپ کن آں بلوچ لبزانک ءَ چوشیں ادارہ نیست کہ بلوچ ءِ گران بھائیں دانکاں بہ چاپین اِیت اے گپ من برز ءَ واجہ سید زھور شاہ ھاشمی ءِ وانگیاں چَہ پدراھی کرت پرچاکہ یک زیردستیں راجے ءَ ءُ لگتمالیں زبانے ءَ چِد ءُ مستریں تاوان نیست کہ آئی ءِ راجی زبان ءِ گار ءُ بیگواہ بیگ وتی جند ءِ مردماں سما نہ بیگ اے گپ دل ءَ وَ الم باھین اِیت کہ وتی جند ءِ زبان ءَ سما نہ کنگ اَنت ۔

ھرچ ھما رسانکجاھے ءِ جوڑ بیگ ءَ پیسر آئی ءِ راہ ءُ رھبند گیش اَنت کہ آ وتی رھبندانی اول سر ءَ ایشی ءَ مان کنت کہ من کسے ءِ سر ءَ گپ ءَ زرت نہ کن آں ھرچی کہ رسانکجاھے ءِ لوٹ اَنت ائی ءِ سرجم کنگ منی زمہ واری اِنت ۔

راجکار ءُ ایندگہ مردم چے کن اَنت آ وتی زمہ وار وت اَنت تری کجام لیول ءَ وتی ھیال ءَ درشان کن اَنت آیانی وتی جند ءِ پالیسی اِنت کجام رنگ ءَ راج ءَ وتی نزیک ءَ آھورت کن اَنت ھما راجکار ءِ تھی مارشت اَنت کہ راجے ءَ بہ جمبین اَنت ءُ یکجاہ بہ کن اَنت، ھاں البت رسانکدر ءِ کار اے بیت کنت کہ ھمک زیردستیں توار ءَ برز بہ کنت ءُ آئی ءِ توار ءَ دومی راجاں ءُ راجماناں سر بہ کنت اے وھد ءَ دی بلوچستان پوسٹ اگاں بے ریائیں ند ءَ کار بہ بنداں گڑا دی بلوچستان پوسٹ اے وھد ءَ سَے زبان ءَ وتی کار کنگ ءَ اِنت کہ بلوچی، بلوچی براھوی، اردو، انگریزی،، ءَ روان اِنت کہ آئی ءِ ھمک کار کنوک پہ تھ کُشیں زندمان ءَ پہ راج ءُ راج ءِ توار ءَ اُوشتوک اِنت اگاں کَسّے وتی دپ ءَ بھتام ءُ بھتامی کنت اے آئی ءِ وتی کردمان اِنت، اے گپ ءَ ترا تچک ءُ راست گْوش آں کہ منی جند ءِ سر ءَ مردماں نبشتانک روان داتگ اَنت بے کساس ءَ اشتاپ اِنت اِش کہ ھمے کساس ءَ وار نہ دیاِں گُٹ ءَ آپ جھل ءَ بروت ءُ نُک تر بہ بیت، الم تو وتی نبشتانک ءَ یک تند جاھے ءَ دیم دائے گڑا اے وَ آئی ءِ اژدری رھبند اِنت کہ آ نبشتانک ءِ چارگ ءُ جھل ءُ برزی کَچو چنی کنگ باریں اے نبشتانک ءَ من وتی تند جاہ ءَ ایر کن آں اے منی تند جاہ ءُ راجی لوٹ آں تاوانی کنت یا ناں سیت مند کنت یا کجام نپ ءَ پہ زبان ءُ راجکار ءَ سوگات کنت، اے وَ ھچ وڑ ءَ شک ءُ شاھی ءِ نیست کہ تو دیم بہ دئے کسے ءَ بہ ڈوبار تی وت کینگ تئی سر ءَ سریچ اِنت ھنچُش اِنت کہ سر ءِ مازگ ترگی اَنت بلے من دگرے ءَ کینگ ءُ گپ گوشگ ءَ آں گڑا وتی نام ءَ نشانگ ءَ ھم تند جاہ ءِ مردماں دات کُت نہ کن آں کہ من کَے ءَ ءُ چوشیں تند جاھی ءُ شنگ جاھی ءِ نپ ءَ من ھچ وڑ ءَ سرپد بیت نہ کن آں اگاں تو ایشی ءَ سرپد بہ ئے گڑا الم منی رھشونی ءَ ھوار سرجمیں مردمانی رھشونی ءَ دیم ءَ کنز ما ھم تئی رندگیری ءَ دیر نہ دار اِیں وت ءَ ھاں تو بیا وتی جند ءِ نام ءَ تچک ءَ وتی ارز ءَ تندجاہ کار ءِ گور ءَ سر کن اگاں تئی توار ءِ سر کنگ ءَ تند جاہ کار ءَ وتی دست لرزینت اَنت گڑا آ گپ ھم ھرکسی دیم ءَ ایر بیت یک رندے یک واجھے ءَ من ءَ چاگردی ترامجاہ ءَ میسج کرتگ اَت بد ءُ بُل ءَ کپتگ اَت منی جند ھم ایشی ءَ زانگ ءَ نہ اِنت کہ اے مردکار کَے اِنت ءُ پرچا کم شرپیں گپ ءُ ٹال کَشگ ءَ اِنت من سما کُت کہ مرد وتی سر ءَ گیش کپتگ چوشیں مردم ھست کہ اشانی گلگ ءُ گلواں ما وتی کِسگاں جاگہ بہ دے اِیں گڑا ما ارد ءَ اُرد بہ کن ایں، گپ سک دراج اَنت گوشگ ءَ زان آں من یک وانگی یے پرتو سوگات کنگ ءَ آں بلے پھل کن تئی ءُ وانوکانی گران بھائیں وھد زوال کُت اُمیت کن آں بے سریں گپ ءُ ٹالاں تو دل ءَ نہ کن ئے سلامت بات ئے

ندکار: اکیل مراد

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔