TBP Balochi

روکپتی بلوچستان ءِ زرباری شھراں کورونا وائرس ءِ تھءَ ترندی ءُ تالان بیگ گیش بیان اِنت –

نیکشھر ءِ جانسلامتی ءِ گر ءُ دار کنوک ڈائریکٹر، ڈاکٹر ھمایون داد گر ءَ گْوشت کہ بدبھتی ءَ جانسلامتی ءِ نیمگ ءَ گوشتگیں گپ منّگ نہ بیتگ اَنت، اُستان ءِ بازیں زرباری شھراں انگت ءَ ھم کورونا گیش بیان اِنت ءُ چریشی ءِ آسر ءَ نادراھی ءِ تہ ءَ نُہ کس گیش بیتگ اَنت –

آئی ءَ گْوشت اگاں جاورھال اے وڑ بیت اَنت گڑا آیوکیں وھداں ما بلاھیں جنجالانی دیمپان بیت کن ایں ءُ گرانیں روچ پما اتک کن اَنت –

نیکشھر ءِ ھیلتھ اینڈ ٹریمنٹ ءِ ڈائریکٹر ءَ گْوشت کہ اے نادراھی ءَ چَہ رکگ ءَ یکیں راہ اِنت کہ وت ءَ چہ دومی مردم ءَ گِستہ کنگ ءُ جانسلامتی ءِ گوشتگیں گپانی منانک ھمیش اَنت ءُ اے نادراھی ءِ شنگ ءُ شانگی ءِ دارگ ءِ واستا بس یکیں راہ اِنت –

ڈاکٹر داد گر ءَ گوشت کہ شھریانی جانسلامتی مئے اولی گامگیج اِنت چہ ایشاں بازیں مردم مئے گپاں نہ گر اَنت ءُ چاگرد ءُ آئی میتگانی تہ ءَ بازیں نہ وشی ءَ ایرگیج اَنت –

داد گر ءَ گْوشت کہ چاگرد ءَ آلم دین ءُ یونیورسٹیانی پروپیسر ءُ ڈاکٹر اے نادراھی ءِ پروش دیگ ءَ پیش گام اَنت۔

آئی ءَ آلم دیناں گوں ھمے دزبندی کرت ءُ گْوشت کہ چاگرد ءِ تہ ءَ گیش ءَ چَہ گیش مردمانی تہ ءَ سرپدی ءِ کرد ءَ پیلو بہ کن اَنت –

ڈاکٹر داد گر ءَ گْوشت کہ اے گپ شمارا مارگی اِنت کہ مسلمانانی ائید ءِ نماز ءَ بازیں مُچے ءِ بیت ءُ چریشی ءَ مردماں گِستہ بیگ ءَ دوری دارگ المی اِنت۔

آئی ءَ گوشت کہ ھمک ائید ءَ دست ءُ دروتی بیتگ اے ائید چویشیں چیزاں چَہ مردم وت ءَ پھریز بہ کن اَنت ءُ کَسے ءَ دست ءُ دروت مہ بنت ءُ دبکا دپ ءَ بہ کن اَنت ءُ دستاں دستیگ بہ کن اَنت –

سرجمیں ایران ءَ کسانیں ائید ءِ درگت ءَ نیکراھی ءُ دودمانی جاہ دوبر پچ کنگ بیگ ءَ اَنت –

دومی نیمگ ءَ ایران ءِ جانسلامتی ءِ وزیر ءِ گْوشگ اِنت کہ گوستگیں بیست ءُ چار ساھتاں سرجمیں ڈیھ ءَ کووڈ 19 ءِ آماچ بیتگیں 59 مردم بیتگ اَنت –

تاکارانی نویسکارانی رد ءَ مھتر ھسن روھانی ءَ سرکاری ٹیلیویژن ءَ گپ کنان ءَ گْوشتگ کہ یکشمبے ءِ روچ ءَ پاکیں رمزان ءِ گڈی روچ ءَ راجدپتری ءُ دودمانی جاہ دوبر پچ کنگ بیگ ءَ اَنت –

ایشی ءَ ابید ایران ءَ کورونا وائرس ءِ بنجاھی شنگ بیگ جاہ ءَ نیکراھی جاہ پچ کنگ بیتگ اَنت –

ایران ءِ جانسلامتی ءِ جارکش کیا نوش جھان پور ءِ رد ءَ ایران ءَ کورونا وائرس ءَ بیران بیتگیں مردمانی کَچ7359 سر بیتگ ءُ جھان پور ءِ رد ءَ سرجمیں ڈیھ ءَ 104072 مردم وش بیتگ اَنت۔

پچیں نمدی یے پہ باجوئیں امیر بکش ھاجی ءِ نام ءَ

نبشتہ کار: سنگین شاپکولی

دی بلوچستان پوسٹ

باید اِنت کہ نمدی ءِ بندات ءَ دروت ءُ درھبات ءِ نبشتہ بہ کتیں۔۔۔!
پہ تئی سلامتی ءُ جوڑی ءَ نیک دوائی یے دیم بہ داتِیں۔۔۔!
بلے نوں دست ءُ دِل پہ اے ھردویں چیزاں نہ گرگ ءَ اَنت۔ ترا گپے بہ گُش آں من ءَ پہ تئی نام ءَ نوں اے نمدی ءِ نبشتہ کنگ اوں تورگ ءَ اِنت۔ تئی سکی ءُ واری،لنگڑی ءُ بزگی،وشی ءُ پریشانی ءُ کار ءُ کردانی دیم ءَ من ھچے نہ اِتاں،تو نہ تھنا منی بیسہ بوتگ اِت ئے ءُ نیکہ تھنا منی آئیڈیل بہ گند ئے ھر ھما جھد کارے کہ آیاں ترا دوست داشتگ،ترا گوش داشتگ،مدام تئی نام گپتگ کہ ھاجی ساب یک بے تواریں کماندارے ءَ ابید یک مزن اوپاریں واجھے۔۔۔بلے مرچی۔۔۔؟ھاجی پہ راست مرچی رمزان ءِ بیست ءُ چارمی روچ اِنت من اے ھچبر نہ جیڑ اِتگ اَت کہ یک روچے تئی اکس ھم ماں پیسبک ءَ کیت ءُ آئی ءِ دیم ءَ لگوری ءِ سُھریں نشان لگ اِیت ءُ تئی گھگیری ءِ نامانی دیم ءَ لگور ءُ باجویں سرمچار نبشتہ بیت،ھُدا زانت من ءَ سک درد بوت۔

ھاجی!
تو اے ھم زان ئے ءُ سرپد بَہ ئے کہ تئی دیستگیں آ کجام کَس بوتگ کہ تئی روگ ءَ رند نہ گریتگ ئِے، بازینے ءَ وَ اے باور نہ بوتگ کہ ھاجی اے وڑ کت نہ کنت،ھر کس اے گپ ءَ کنگ ءَ اِنت دروگ بند اِیت ھاجی اے وڑیں مردمے نہ اِنت،بلے راست ھمے ڈول بوت، ھاجی تو ھر ھما ماس ءُ گوھار،کماش ءُ سنگتانی باندات ءِ اوست گوں وتی ردیں پیسلھاں ببا دات اَنت۔۔۔ھاجی ترا اگاں دگہ چیزے دیم ءَ نیتکگ اَت بلے وتی برات ءِ ھما پنچیں سالانی کابزیں ریاست ءِ بندی جاھاں بندی، ازیت، لٹ ءُ کُٹ ءُ آئی ءِ ھما کربانی کہ آئی پہ تئی مکسد ءِ ھاتر ءَ سگ اِتگ اَنت، تو ھما آجزیں مات بیھال مہ کتیں کہ آئی پہ تئی مکسد ءِ ھاتر ءَ، تئی آیوکیں باندات ءِ ودار ءَ پہ پالجیں نادراھی ءَ گوں وت ءَ پہ پیری ءَ سر کت، بلے دم ئِے نہ برت، اوپار ئِے کُت کُرت، بلے ھاجی تئی توکل ءَ شکست وارت، نوں نہ زاناں تو اود ءَ آ آجزیں مات ءَ چے جواب دے ئے، کجام شکل ءَ وتی برات ءِ دیم ءَ کپ ئے۔شھید بابا ھیربکش کہ آئی ءَ پتو یک مزنیں اُمیتے داشتگ اَت، ترا جنگ کنگ ءِ سوج ئِے داتگ اَت، دژمن ء ُ آئی ءِ رپک ءُ پندل ترا آئی ءَ سوج داتگ اِت اَنت، ترا ھما کشک ءِ راہ گیتگ اَت کہ آئی ءِ پشت ءَ یک مھلوکے ءِ واب ءُ راجے ءِ امیت بندوک اَنت، بلے تو اے درستان ءَ پہ چار کلدار ءِ ھاتر ءَ پد جت ءُ پد کنز اِت ئے۔
شھید جنگیان، شھید تلار، کساں سالیں شھید ساوڑ ءُ ھزاراں بلوچ پرزند مرچی گوں ھمے اُمیتاں گوں سھر چکیں ھوناں واب اَنت کہ مئے مردم، مئے سنگت، مئے ھمسپر مئے کشک ءَ تاں منزلے ءَ سر کن اَنت۔بلے تو گوں اے واباں دَگاں کت ھاجی، تو آیانی اے اُمیت پروشت اَنت۔

ھاجی!
اے جنگ وتی ھساب ءَ روان کنت،نزور بیت یا زورمند بلے روت۔۔۔۔۔۔بلے تو۔۔۔ءُ مرچی تئی کردار۔۔۔؟
ھاجی، ترا یکین وتی زُرتگیں پیسلہ شپ ءَ چہ وپسگ ءَ پیسر ھزار جست کنت۔ترا تئی نگرہ من زان آں کہ اے جست کنت کہ ”ابا کدی سنگتانی گور ءَ رو ئے من ءَ پہ بالی ءُ سالونک ءَ زھیر کنت۔۔۔ھاجی ترا یات بنت ھما ساھت کہ شھید رزا ءِ شھادت ءَ ترا چنچو پروشتگ اَت،ترا یات بیت کہ تو شھید ءِ کبر ءِ سر ءِ زرتگیں سوگند ءِ ھیال چنچو داشتگ اَت۔۔۔ھاجی ھر وھد ءَ کہ مئے سنگتے کہ شھید بوتگ،اے پیمیں ساھتاں اگاں من ساڑی بوتگ آں گڑا منی ھمت ءُ ھوسلہ تو بوتگ ئے۔۔۔بلے مرچی تو کجا،تئی زرتگیں سوگند کج اَنت۔؟
ھاجی من اے ھم نہ گش آں کہ یک سنگتے ءَ گوں دومی سنگتاں اکتلاپ نہ بیت، زاھر اِنت سیاسی ءُ مذاھمتی جنگانی تہ ءَ اکتلاپ،جیڑہ ءُ جنجال ھزاراں بنت، بلے چہ جیڑھاں تچگی نہ اِنت، بہ گند ئے وت ماں وتی جیڑہ ءُ جنجال یکے دومی ءَ گوں نندگ ءُ گیشینگ لوٹ اَنت، باید نہ اَت کہ تو وتی مھلوک ءِ اوست ءُ امیت چوش گوں ھاکاں ھوار بہ کرتین اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کراچی ءَ بالی پٹ ءَ مساپر بریں بالیگے کپتگ

سر بیتگیں ھالانی رد ءَ پاکستان ءِ مزن شھر کراچی ءَ بالی پٹ ءِ نزیک ءَ یک مساپر بریں کپتگیں بالیگے ءَ بازیں کَچے ءَ بیرانیانی گمان کنگ بیتگ –

سول ایوی ایشن ءِ رد ءَ ایئربس اے سَے سد ءُ بیست ڈیھی راجی ایئرلائن پی آئی اے ءِ بیتگ ءُ چَہ لاھور ءَ کراچی ءَ روگ ءَ بیتگ نندگ ءِ وھد ءَ پیسر ویل ءِ آماچ بیتگ ءُ کپتگ –

پاکستانی ھالرسانی رد ءَ بالیگ ماڈل کالونی ءِ نزیک ءَ ھنچیں جاھے ءَ کپتگ کہ اود ءَ مردمانی آبادی اِنت –

بالیگ ءِ کپگ ءَ پد آئی ءَ چَہ زد ءَ اتکگیں گاڑیاں آس لَگ اِتگ ءُ ٹی وی ءَ ھم درا بیتگ اَنت –

جارکش ءِ رد ءَ بالیگ ءَ یک سد ءُ ھپت مردم سوار بیتگ ءُ چریشانی تہ ءَ نَود ءُ نُہ مساپر بیتگ ءُ ھشت بالیگ ءِ باسک بیتگ اَنت

نوکتریں ھالانی رد ءَ تہ ءَ گوشگ بیگ ءَ اِنت کہ کراچی ءَ بالی پٹ ءِ نزیک ءَ کپتگیں بالیگ ءَ داں انیگ ءَ شست مردمانی بیرانی ءِ ھال راست کنگ بیتگ ءُ دو مساپر سلامتی ءَ رکیتگ –

دومی نیمگ ءَ جانسلامتی ءِ وزیر ءِ رد ءَ جناہ ھسپتال ءَ چِل ءُ یک لاش ءُ ھمے وڑ ءَ سول ھسپتال ءَ بیست ءُ پنچ لاش آرگ بیتگ اَنت –

پی آئی اے ءِ چیئرمین ارشد ملک ءِ گوشگ اِنت کہ جھمنندیں مردمانی بیرانی ھال نیست

آئی ءِ گوشگ اِنت کہ کمکی کار برجاہ اَنت ءُ ایشی ءِ سرجم بیگ ءَ سَے یا چار روچ لگ اِت

شال ءَ بیگواھیں مردمانی درگیجگ ءِ زھرشانی ءَ 3ھزار ءُ 9 سد ءُ شست ءُ شش روچ سرجم بیتگ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی گدان ءَ 3ھزار ءُ 9 سد ءُ شست ءُ شش روچ سرجم بیتگ – نیشنل پاٹی ءِ باسک امجد بلوچ، رفیق بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشانیتگ –

وی بی ایم پی ءِ رھشون ماما قدیر بلوچ ءَ ھمے وھد ءَ گْوشت کہ بیگواھیں بلوچانی مات، گوھار ءُ بلوچ راج رنج ءُ گمانی جاورھالاں گِندیت بیت کنت ھما سنگ دلیں مردم وتی ارساں داشت بہ کنت بلے بلوچ راج ءَ ھما درد ءُ گمانی سگگ ءِ اوپاری وتی سر ءَ زرتگ ءُ اوپار کنگ اِنت ءُ اوپاری ءِ درچ ءَ لھتے مردم سوداگری ءَ لَگ اِتگ اَنت –

آئی ءَ گْوشت کہ گلامیں مات ءُ گوھاراں وتی دوستیگیں مردمانی یلہ کنائینگ ءَ پُرایمنیں جد ءُ جھد ءَ چَہ دنیا ءَ ھمے کلوہ داتگ کہ ما پُرایمنیں جد ءُ جھد کنگ ءَ ایں –

آئی ءَ گْوشت کہ مارا ھمے سما بیت کہ اے رند ءَ بلوچستان ءَ اَئید ءِ شاتمانی ءَ باز کم مردم کنت پد ءَ ھم ھما کھول مروچی وتی چُکانی ھمراھی ءَ اَئید کنگ ءَ اِنت آ ھم یک رندے ءَ گیمرتگیں رنگے ءَ جیڑ اِت کہ کوھن ءُ چاکیں گُدانی ھمراھی ءَ لوگ ءِ در ءَ وتی پِت ءِ ودار ءَ کنگ ءَ اَنت –

ماما قدیر ءَ گْوشت کک مروچی ھما زال ائید ءِ دود ءَ کنگ ءَ اَنت آیاں اے زالانی ھیال کنگی اِنت کہ مروچی ائید ءِ روچ ءَ پریس کلبانی دیم ءَ زھرشانی ءِ بنجل اِش سمبھیتگءُ نیشتگ ءُ وتی دوستیگیں مردمانی راہ ءَ چاریگ اَنت -ورنایاں نوکیں چمپل ءُ پُچانی پِر کنگ ءَ پیسر اے ھزاراں بیگواھیں مردمانی ھیال دارگی اِنت کہ مروچی ائید ءِ روچ ءَ ھم تھاریں زنداناں بندیگ ءُ لٹ ءُ کُٹاں سگگ ءَ اَنت –

آئی ءَ گْوشت کہ ائید ءِ وشیانی دارگ ءَ پیسر ھما ژانگولیں جونانی سر ءَ یک رندے ءَ وتی نگاھاں ایر بہ کن اَنت کہ مروچی جنگل ءُ گیاباناں دزکپگ ءَ اَنت -مروچی مارا وتی وشی ایشانی واستا دیمھون کنگی اَنت کہ مئے باندات ءِ واستا تھار ءُ لٹ ءُ کٹی زنداناں سگگ ءَ اَنت –

بیگواھیں مردم ءِ دزکپتگیں جون ھُزدار ءِ ھنکین ءَ چہ دزکپتگ۔

دی بلوچستان پوسٹ ءِ ھال پتر ءَ سر بیتگیں ھالانی رد ءَ بلوچستان ءِ دمگ ھُزدار ءَ چہ یک جونے دمگی واکداران دست کپتگ۔

واکداران جون چہ ھُزدار ءِ ھنکین پیر عمر ءِ ھند ءَ دست کپتگ۔

جون سول نادراہ جاہ ھُزدار ءَ روان دیگ بیتگ ءُ آود ءَ آئی ءِ پجار عبدالوحید نوشیروانی ءِ نام ءَ بیتگ۔

واکدارانی رد ءَ عبدالوحید شش روچ پیسر ءَ ناشناسیں مردماں بیگواہ کُتگ ءُ گوں وت بُرتگ ا ۔ ویل ءِ درگت ءَ واکدار گیشتر پَٹ ءُ پول کنگ ءَ اِنت۔

ھمے وڑ ءَ پنجگور ءَ جرمکار امام بکش ء مھمد بکش ءَ وت ءَ پاھو داتگ –

پولیس ءِ رد ءَ امام بکش ءَ گوستگیں روچ ءَ وتی براتزتک کُشتگ ءُ چریشی ءَ پد پولیس ءَ آ دزگیر کرتگ –

پولیس ءِ رد ءَ امام بکش ءَ جیل ءِ تہ ءَ سانکلاں چارد مانلگوشتگ ءُ وتکُشی کرتگ –

گوشگ بیگ ءَ اِنت کہ امام بکش نیمساریں مردمے ھم بیتگ –

سر بیتگیں ھالانی رد ءَ آواران ءِ دمگ مشکہ النگی ءَ اَزھر الی ء اسگر الی جھمنند گجر ٹیوشن ءِ وانگ ءِ ھلاسی ءَ پد واتر ءَ لوگ ءَ روگ ءَ بیتگ ھمے میان ءَ ناشناسیں پَرپٹ سواریں مردمے ءَ آئی ءِ سر ءَ اُرش کرتگ ءُ پرپٹ ءَ سوار کرتگ –

زورانسری برگ ءَ پد آئی اَزھر ءِ گون ءَ سلکاری ءِ بدین ھادت کنگ بیتگ ءُ آ پد ءَ یلہ کنگ بیتگ –

آوار جنوکیں مردم ءِ پجار اَئید مھمد پنام ءِ پیرو ء کریم داد اِنت –

چریشی ءَ پد ازھر ءِ مردماں پولیس ءِ گور ءَ آئی ءِ ائید مھمد ءِ ارزی نامہ نبشتگ کنائینتگ ءُ آئی ءِ دزگیری ءِ لوٹ کرتگ –

مردمانی رد ءَ ائید مھمد ءِ سیادی دمگی ڈیتھ اسکواڈ ءَ اِنت آئی ءِ زورانسریانی کرد ھمک جاہ ءَ سھر ءَ اَنت پرے ھاتر ءَ آئی ءَ مھار گُٹ ءَ اَنت ءُ ھمک نیزوردستیں مردمانی سر ءَ اُرش کنان اِنت –

ھمے وڑ ءَ چاگردی رسانکجاہ ٹوئیٹر ءَ ہیومین رائٹس کونسل آف بلوچستان ءِ جنرل سیکرٹری ابد اَباس ءَ ٹویٹ کنان ءَ گْوشتگ کہ دوزادہ سالی ئیں ازھر الی آوار جنگ بیتگ ءُ آئی ءِ گون ءَ بدھادتی کنگ بیتگ –

ابد الا اباس ءَ گپ کنان ءَ گوشتگ کہ آوار جنوکے نام اَئید مھمد اِنت ءُ آئی ءِ سیادی دمگی ڈیتھ اسکواڈ ءَ اِنت ءُ اشانی گیشتر کار ھمیش اَنت مردمانی آوار جنگ ءُ آیانی کُشگ ءُ لٹ شاپ کنگ ءُ جتائیں سلکاریاں ھوار اَنت-

سر بیتگیں ھالانی رد ءَ لشکریاں کوشکوردَپ میتگ ءِ سر ءَ اُرش کُتگ، پہ شیر مھمد بلوچ نامی ئیں مردمے ءِ دزگیر کنگ ءَ۔

گیشتریں ھالانی رد ءَ تیرگواری ءِ سوب ءَ دو ورناہ ارمان اربابی ءُ مسعود شھرکی جنگ بیتگ اَنت ءُ مرتضی اصغریان، اُرش ءِ تھ ءَ ٹپی بیتگ۔

دمگی ھالانی رد ءَ شیر مھمد، کہ آئی ءِ دزگیر کنگ ءَ پہ لشکر ءَ بیڑ بُرتگ بیتگ آ چہ لشکر ءِ دست ءَ لگوشگ ءُ تچگ ءَ سوبمند بیتگ۔

دگہ یک ھالے ءِ رد ءَ روکپتی بلوچستان ءِ دمگ دشتیاری ءِ ھند ءَ چہ دست ءُ پاد بستگیں جون ءِ دز کپتگ۔

اھوالانی رد ءَ دشتیاری ءِ دمگ ھورکی ءَ دز کپتگیں جون یک بلوچ ورنایے حمید بلوچ ء بیگول ءِ بیتگ، گیشتریں ھالانی رد ءَ جون ءِ دست ءُ پاد بستگ بیتگ اَنت ءُ جان ءَ لَٹ ءُ کُٹانی نشان بیتگ اَنت۔

ھالانی رد ءَ ورناہ ءِ جون پکیر زھی ءُ کوھدیم ءَ میتگانی نیام ءَ یک راھگوز ئی ءَ دیستگ ءُ کُوش ءِ سوب داں انگت ءَ زانگ نہ بیتگ –

اُستاد میر اھمد ئے نوکتریں نوار پہ بلوچ راجءَ کسانیں ائید ءِ مستاگ ءِ دروشم ءَ مروچی اُستاد میر اھمد ءُ اُستاد مھناج مختار ءِ آفیشل ساونڈ کلاوڈ چینل ءَ چہ شنگ کنگ بیتگ۔

اُستاد میر اھمد ءِ نوکتریں نوار ئے تھءَ مدامی ایں وڑ بلوچی ءُ براھوئی دوھیں زبانی سوت گون اَنت ءُ سوتانی لڑ چو اے وڑ ءَ اِنت ۔

اولی سوت سنج جڑکیں اِنت کہ نامداریں بلوچ شائر مجید عاجز ءِ نبشتگیں شئر اِنت۔

دومی سوت ہلک سوتکگے اِنت کہ ایشی شائر ادنان مکبول اِنت ۔

سئمی سوت اوار ئسون براھوئی زبان ءَ گشتگیں شئر اِنت کہ بلوچ سلاہ بندیں گل بی ایل اے ءِ سروک بشیر زیب ءَ نبشتگ۔

ھمے وڑ دگہ یک براھوئی سوت ءِ کہ عمران فریق ءَ نبشتگ آئی سرھال اِنت او اسلم۔ اے شئر پہ مزن نامیں بلوچ راھشون بی ایل اے ءِ گوستگیں سروک نمیرانیں اسلم بلوچ کہ بی ایل اے ءَ “جرنیل” ءِ پنام داتگ اَت ھمائی ءِ نام ءَ ندر کنگ بیتگ۔

سوتانی لڑ ءَ مزن نامیں براھوئی زبان ءِ شائر مرید بلوچ ءِ نبشتگیں شئر ننا ھر قُدم ھم ھوار اِنت۔

زانگ بہ بیت کہ اُستاد میر اھمد بلوچ گشندہانی تھءَ ھما ناماں چہ یک اِنت کہ وتی ازم ءِ گوما سرزمین ءِ درد ءُ رنجان بیان کنگ ءَ اِنت ءُ آئی سوتانی گیشتریں بھر آشوب ءُ بلوچستان پہ نازینک اَنت۔