ھُون شھیدانی بام ءِ مِستاگ اِنت
زِرگْوات بلوچ
دی بلوچستان پوسٹ
بیستُمی کرن ءِ جنازہ چِست بیت گوں ھالواں
ما کہ دیم ءَ اتکگیں تہ مَہتلیں کار ھَیر بنت
( شائِر : منزور بسملؔ)
زیکّیں بیگاہے ھنوش ءُ مِسک چنڈیں کَوش پہ دابےکشگ ءَ اَت کہ ناگھاں اھوالے گُوشاں کپت مجید برگیڈ ءِ مَلّ ءُ کُنگریں پُسّگاں گیدی ءِ دمکّاں نامداریں تیاب دپی شھر ءُ بلوچستان ءِ جیگبند گْوادر ءَ زِر ءُ باگیں آمِل ءِ پاسپانی ءَ ، پہ دُگنیا ءِ زردار اِیں اِستاناں اے کُلوہ شِنگینتگ کہ بلوچ ڈیھ بے واھُند نہ اِنت کہ ھرکس بئیت ءُ وتی لاکُوٹ ءَ پہ چنک پُر کنت ءُ نازاں بِہ بیت۔
پی سی او ہوٹل ءَ اُرش کُتگ ءُ جنگ بِندات اِنت ۔ درندگیں لشکر ءِ ھوش چہ سر ءِ ھُش ءُ مازگاں در کپتگ ءُ بے تاھیر اِنت ۔ھمے اھوالانی مْیانجی ءَ چاراں چاگِردی رسانک در ءُ پیس بُک ءَ بلوچ لبریشن آرمی ءِ جارینک چہ ھکّل ءِ نیمگ ءَ مجید برگیڈ ءِ پِدائین سنگتانی اکس شِنگ اَنت ءُ ھمے بیان داتگ کہ بازیں چینی ءُ لگوریں لشکر ءِ کارِندہ کورُم ءَ روان داتگ اَنت ۔
بلے! اے راستی یے کہ ودگڑ اِیں اِستان نہ منّ اِیت کہ منی دُزّیں لشکر ءُ چینی بلوچ راج پھاز اِیں پُسّگانی شِل سریں تیراں مرگ ءِ آماچ کُتگ اَنت۔ چیاکہ یک کْوزہ گیر ءُ وسّاچیں اِستانے ءِ کِرّا اے سِکت نیست کہ من اے راستی ءَ بِہ منّ آں کہ اے اُرش بلوچ راجی آجوئی ءِ لوٹوکیں گلاں کُتگ ۔
اے درگت ءَ من ءَ چہ مجید برگیڈ ءِ پِدائین سنگتانی اُرش ءَ دُگنیا ءِ مزن نام ءُ نامداریں آشوبی رھشُون واجہ امیلکار کیبرال ءِ نُگرھیں دانک گیر آتک اَنت کہ آ نوزدہ سد ءُ شست ءُ شش ءَ کیوبا ءِ شھر ہوانا ءَ برجم داشتگیں کانفرنس ءَ ھوار بیت کہ اُود ءَ سیمی جھان ءِ آشوبی ءُ سامراج ھِلاپیں رھبر شریکّ بنت
اے موکہ ءَ واجہ امیلکار کیبرال وتی گُشتانک ءِ تہ ءَ گْوش اِیت ۔۔۔
ہم یہ پلیٹ فارم محض سامراج کے خلاف آہ و زاری کرنے کےلیے نہیں اسعمال کریں گے کیونکہ ایک افریقی کہاوت کے بمبو جب سامراج کو برا بھلا کہنے اور اسکے خلاف نفرت آمیز الفاظ اسعمال کرنے سے وہ ختم نہیں ہو جاتا بلکہ اس کےلیے خواہ آپ کچھ بھی سمجھیں ہتھیار بدست لڑنا ہوگا۔ ہم یہی کچھ رہے ہیں اور جب تک افریقی وطن کی ساری زمین سامراجی قنضے سے آزاد نہ جائے ہم یہی کرتے رہیں گے۔۔۔۔۔۔
” ما اے پلیٹ فارم ءَ پہ اے ھاتر ءَ کارمرز نہ کن اِیں کہ تھنا سامراج ءِ ھِلاپ ءَ آہ ءُ زاری کنگ ، بلکیں یک افریقی کہاوت ئِے کہ بمبو سامراج ءَ را شر ءُ ھراب گْوشگ ءُ آئی ھِلاپ ءَ نپرت شِنگیں لبزانی کارمرد ءَ ھلاس بیت ۔ بلکیں ایشگی ھاتر ءَ اگاں شُما چے بِہ پہم اِت بلے گوں سِلاھاں جنگ کنگی اِنت ۔اگاں ما چے کنگ ءَ اِیں دانکہ افریقی وتن ءِ تانسریں زمین چہ سامراج ءِ کْوزہ ءَ آزات نہ بیت مئے ھمے کار برجاہ اِنت ”
چہ املیکار کیبرال ءِ مُہکمیں لیکہ ءُ پگر ، راجی تاکت ءَ پُرتگیزی لشکر چہ گنی بساؤ ءَ گوں بے سوبی ءَ واتر بیت ، چیاکہ گنی بساؤ ءِ پُسّگ پہ وتی ڈیھ ءِ پاسپانی ءَ ھر کدم ، گام گام ءَ دُژمِن ءِ بدّیں نیّت ءَ آچ اَنت ۔
مرچی بلوچ راج ءِ یلّیں پُسّگ ھم پہ وتی سرڈگار ءِ پانپاہی ءَ دُژمِن ءِ ھر بدّیں واھش ءُ ارمانی دیم ءَ چو کوہ ءَ اُوشتاتگ اَنت ءُ ھمے پیام داتگ داں مئے ڈگار ءَ در نہ کپ ئے ما ترا ھچ وڑ ءَ پہ گیگ ءُ گُوم نیلیں کہ تو مئے گُلزمین ءِ وتواجہ ءُ ما تئی گُلام بِہ بَہ اِیں ۔
بلکیں تئی ھمراھی ءَ چین ءُ گیدی ءِ ھر زردار ءُ سوداگر اے ھیال ءَ گْور بِہ کنت کہ بلوچ وتی ڈیھ ءِ وت ھُدابُند اِنت ۔ اِد ءَ بید ء بلوچ ءِ منّگ نامہ ءَ ھچ کسے وتی واھگاں سیراپ کُت نہ کنت ، نیکہ بلوچ راج کسے ءَ اے موکل ءَ دنت ۔
پمیشکا اے ھبر پہ گیدی ءِ تاکت ءُ اِستاناں ھژدری اِنت کہ آ بلوچ راج ءِ آجوئی ءِ کُمک ءَ بکن اَنت ءُ دھشگردیں پاکستان ءَ یک کْوزہ گیرے بِہ منّ اَنت۔
اگاں نہ پاکستان پہ اے دمگ ءَ بہ کَول ء بلوچ نیشنل موومنٹ ءِ سر کماش واجہ ھلیل بلوچ کہ تھنا پہ بلوچ راج ءَ نہ بلکیں پہ سرجمیں دُگنیا ءَ کینسر بزاں شومکّ ءِ ریش اِنت دارو ءُ درمان کنگ لوٹ اِیت ۔
دُگنیا بلوچ راجی آجوئی ءِ کُمک ءَ بِہ کنت گُڑا پہ جزم اے دمگ ءَ امن ءُ ایمنی ءِ واب مانا بیت ۔
اگاں دُگنیا چہ اے راستی ءَ وتی نگاھاں چادرے مان پوش اِیت بلے بلوچ راج پہ وتی راجی زِندمان ءَ کدی کُربانی ءِ دَیَگ ءَ چک ءُ پد نہ بیت کہ چے دُژمِن بُہ لوٹ اِیت ءُ من بے تْرانگ بِہ باں ۔
بلکیں اے جنگ داں بلوچ ءِ گُڈّی پُسّگ ءُ گُڈّی تیر ءَ برجاہ مان اِیت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
