TBP Balochi

یونائٹیڈ بلوچ آرمی ءِ جارکش مرید بلوچ ءَ کولواہ آواران ءَ گوستگیں روچ ءَ شھید بیتگیں سرمچاراناں سھر چکیں دروت ندر کرتگ ءُ گْوشتگ کہ شمبے ءِ روچ ءَ پاکستانی لشکر ءَ آواران ءِ دمگ کولواہ جت بازار ءَ بلوچ سرمچارانی دیم پہ دیمی بیتگ اَنت، ءُ زورگریں لشکر ءُ بلوچ سرمچارانی میان ءَ جنگ بندات بیتگ کہ کم چَہ کم دو ادار ءَ جنگ برجاہ بیتگ -بلوچ سرمچاراں بامردی ءَ گوں جنگ کنان ءَ زورگریں لشکر ءَ را ھم تاوان داتگ –

جارکش ءَ گْوشت کہ شھیدیں سرمچار کامریڈ اسد ھسن پنام ءِ کامریڈ بالاچ ریجن ءِ سیکنڈ کمان بیتگ ءُ راشد رمزان پنام ءِ سوبین بلوچ گل ءِ بنجل ءِ کمان بیتگ –

مرید بلوچ ءَ کامریڈ اسد ھسن ءُ سوبین بلوچ گوستگیں سَے سالاں چَہ یو بی اے ءِ پتر ءَ ھوار بیتگ اَنت ءُ راجی آجوئی ءَ اوپاری جد ءُ جھد ءَ بھر مند بیتگ اَنت ءُ بے کساسیں رنگے ءَ وتی اندومیں دروشم ءَ راجی زمہ واریاں پیلو کنگ ءَ بیتگ اَنت، ءُ سلاہ بندیں راھے راہ ءُ رھبنداں ترندی ءَ اوشتوک بیتگ اَنت شمبے ءِ روچ ءَ دشمن ءِ اُرشی ءَ درکپتگ اَنت بلے شست جاھی ءَ پیسر دشمن بازیں کَچے ءَ دمگ انگیر ءَ کرتگ ءُ سنگت شھید کرتگ اَنت –

جارکش ءَ گْوشت کہ مئے گل شھید اسد جسن پنام ءِ کامریڈ بالاچ ءُ سوبین بلوچ ءِ ھردوکانی بامردی ءُ جنگی کارانی سر ءَ گل جوانیں نام زھم جن ءَ شکسائیت ءُ شھیدانی کھول ءُ بلوچ راج ءَ گوں اھد کنت شھیدانی ھوناں ھاکانی تہ ءَ ھُشکی ءَ نیل اِنت ھررنگ ءَ ایشانی ھساب گرگ بیت درستیں بلوچ شھیدانی ھون ھاکانی تہ ءَ ھُشک نہ بنت یک روچے ءَ الم دنیا ءِ دیم ءَ آزاد بلوچستان یک ڈیھے ءِ بستار ءَ زانگ بیت ءُ وتی شھیدانی دیتگیں واب سرجم بنت –

یو بی اے ءِ جارکش مرید بلوچ ءَ گْوشت کہ شھید کامریڈ اسد ھسن پنام ءِ کامریڈ بالاچ بلوچ ءَ وتی راجی جھد سیاسی پارٹی بی این ایم ءَ چَہ بندات کرتگ ءُ شھید کامریڈ بی این ایم آواران ھنکین بازیں اُگدواں بندوک بیتگ ءُ آ یک زمہ وار ءُ ھزمتگاریں مردمے بیتگ شھید کامریڈ دوھزار ءُ نُھ ءَ بلوچ راجی سلاہ بندیں جنز ءَ گوں بھر مند بیتگ شھید اسد بلوچ گل ھں ریجن سیکنڈ کمان بیتگ شھید کامریڈ بلوچ یک بامرد ءُ ایمانداریں سنگتے بیتگ، کامریڈ اسد بلوچ ءَ بلوچستان ءِ بازیں دمگ دشت، زامران ءُ آواران ءَ بازیں زمہ واری پیلو کرتگ اَنت اے دمگاں بازیں جنگانی میان ءَ دشمنیں لشکر دیم پروش کرتگ ءُ بازیں جنگ کرتگ اَنت –

شھید راشد رمزان پنام ءِ سوبین بلوچ ءَ وتی جھد بی ایس او آزاد ءَ چَہ بندات کرتگ شھید سوبین بلوچ بی ایس او آزاد ءِ یک سوبمند ءُ جوانکاریں باسکے بیتگ، بی ایس او ءَ چَہ پارگ بیگ ءَ پد وتی راجی ترامگامیانی برجاہ کنگ ءَ شھید سوبین ءَ بلوچ راجی پاٹی بی این ایم ءَ ھوار بیتگ – شھید سوبین بلوچ بے کساس ھزمتکار ءَ جھد کنوکیں مردمے بیتگ -شھید سوبین بلوچ دو ھزار ءُ نُھ ءَ بلوچ سلاہ بندیں جنز ءِ بھر بیتگ، شھید سوبین گل ءِ بنجل کمان ءِ اگدو ءَ بیتگ شھید ءَ بلوچستان ءِ تیابدپی دمگ ءُ آواران ءِ جتائیں زمہ واریاں داروک بیتگ، شھید یک ایماندار ءُ بامردیں مردمے بیتھ اے دمگاں شھید سوبین ءَ بازیں جنگ کرتگ اَنت –

شال ءَ ائید ءِ روچ ءَ بیگواھیں مردمانی واستا زھرشانی

دی بلوچستان پوسٹ

بلوچستان ءَ زورانسری بیگواھیانی کَچ دو دھک ءَ چَہ برجاہ اِنت -نواب اکبر ھان بگٹی ءِ شھیدی ءَ پد زورانسری مردمانی بیگواہ کنگ ءُ چریشی ءَ پد آیانی لَٹ شاپ کرتگیں جونانی دزکپگ بندات بیتگ –

وائس فار بلوچ مسنگ پرسنز یک دھکے ءَ چَہ گیش زورانسری بیگواہ کرتگیں مردمانی واستا زھرشانی کنگ اِنت -گل ءِ نیمگ ءَ شال ءُ کراچی ءِ پریس کلبانی دیم ءَ ھمک وھد ءَ زھرشانی بیگ اِنت وھدیکہ شال داں کراچی داں اسلام آباد ءَ گل ءِ مردماں پندی روان بُریتگ –

بنجاھی شھر شال ءَ مروچی کسانوکیں ائید ءِ روچ ءَ ھم وی بی ایم پی ءَ پریس کلب ءِ دیم ءَ زھرشانی کرتگ – ایشی ءِ ھمراھی ءَ بیگواھیں مردمانی زھرشانی بنجل ءَ 3ھزار9سد ءُ شست ءُ ھشت روچ سرجم بیتگ –

زھرشانی ءَ بلوچستان ءَ چَہ جتائیں دمگاں سیادی کنوکیں بیگواھیں مردمانی کھولاں بھر زرتگ – زھرشانی ءِ سروکی وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ کرتگ وھدیکہ ہیومین رائٹس کونسل آف بلوچستان ءِ بی بی گل بلوچ ءُ بلوچستان نیشنل پاٹی ءِ شمائلہ اسمائیل ءُ دگہ مردماں بھر زرتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گْوشت کہ ھمک سالانی وڑ ءَ اے سال ءَ ھم بیگواھیں مردمانی کھول وتی دوستیگیں مردمانی یلہ کنائینگ ءَ زھرشانی کنگ ءَ اَنت پرچاکہ دوستیگیں مردمانی دوری ءَ ھچ کسے ءِ ائید ءِ وشی سرجم بیت نہ کن آں –

آئی ءَ گْوشت کہ اے ائید ءِ وھد ءَ بیگواھیں مردمانی یل کنگ ءَ ابید گیشی گندگ پیداک اِنت -ھزارانی بیگواھیں مردمانی واستا جوانیں گام گندگ بیگ ءَ نہ اِنت -میان اُستمانی ادارہ اے درگت ءَ وھد پہ وھد ءَ گپ کنگ ءَ اَنت بلے آیاں جوان ءُ مھکمیں رنگے ءَ گامگیج زورگی اِنت –

ماما قدیر ءَ گْوشت کہ میان اُستمانی ادارہ پاکستان ءَ زری کمک ءَ ابید ایشی ءِ سر ءَ کڈن کنگی اِنت انسانی ھکانی لگتمالی ءِ سر ءَ بندش جنگی اِنت –

شال ءِ پریس کلب ءِ دیم ءَ کھولانی دست ءَ وتی دوستیگیں بیگواھیں مردمانی اکس بیتگ ءُ بیگواھیں مردمانی یلہ کنائینگ ءِ اوگام جتگ –

بی این پی ءِ شمائلہ اسمائیل ءَ ھمے وھد ءَ گْوشت کہ مارا گوشگ بہ بیت کہ اے مردمانی چی کسور بیتگ کہ بیگواہ کنگ بیتگ اَنت ءُ اے مردماں چی ءَ آمدگساں پیش کنگ ءَ نہ اِنت –

شمائلہ اسمائیل ءَ گْوشت کہ مارا وتی دوستیگیں مردمانی مانشجاھانی باور ءَ سرپدی نیست بلے ما اے زھرشانی ءِ بارو ءَ سرپدی داریں ھمے سوب اِنت کہ ما زالبول کائیں اِد ءَ وتی رنج ءُ گماں تالان کن ایں تانکہ ما وتی توار ءَ میان اُستمان ءَ سر بہ کن ایں –

چریشی ءَ پد نوکیں کاھان ءَ ماما قدیر بلوچ ءِ سروکی ءَ مانشجاھانی سر ءَ روگ ءُ اود ءَ شھیدانی ابدمانی ءِ وش دروھتی ءَ دوا کنگ بیتگ –

ھمے وھد ءَ ماما قدیر بلوچ ءَ گْوشت کہ اے ھما شھید اَنت کہ چیریں ادارھانی مردماں برتگ اَنت ءُ لَٹ شاپ کرتگیِ جون دور داتگ ءُ لھتے ھنچیں شھید اے مانشانی تہ ءَ واب اِنت کہ آیانی جون بے کساس ءَ لٹ دیگ ءُ دور دیگ بیتگ اَنت ءُ چریشی ءِ سوب ءَ پجار ھم نہ بیتگ اَنت –

آئی ءَ گْوشت کہ من انسانی ھکانی ادارھاں دلگوش کنگ لوٹ آں کہ بلوچ شھیدانی مانشانی شَت ھم دور دیگ بیگ ءَ اَنت ءُ ریاستی ادارھانء نیمگ ءَ مانشانی کمشرپی بیگ ءَ اِنت –

کورونا وائرس ءَ انڈیا ءَ یک روچے ءِ تہ ءَ بازیں نادراہ

سر بیتگیں ھلانی رد ءَ سرجمیں دنیا ءَ کورونا وائرس ءِ آماچ بیتگیں مردمانی کَچ پنجاہ ءُ سَے لَک ءَ چَہ گوستگ ءُ سَے لَک ءَ چَہ گیش مردم بیران بیتگ اَنت –

پاکستان ءَ وائرس ءِ گورجتگینانی کَچ پنجاہ ءُ پنچ ھزار ءَ چَہ گیش ءُ بیران بیتگیں مردمانی کچ یازدہ سد ءَ سر بیتگ اَنت –

اے وھد ءَ کووڈ 19 ءَ درستاں چہ گیش اسرمند امریکہ اِنت کہ اود ءَ پانزدہ لَک مردم کورونا وائرس ءِ آماچ اِنت –

سر برزانی تہ ءَ دومی نمبر ءَ برازیل اِنت کہ اود ءَ گورجتگیں مردم روچ پہ روچ گیش بیان اَنت وھدیکہ برتانیہ ءَ وائرس ءَ بیرانیانی تہ ءَ دومی نمبر ءَ اِنت –

چین ءِ سر وزیر ءَ آیوکیں وھدانی سر ءَ زرکاری ءُ پیداوری ءِ تہ ءَ کمی ءِ بازیں پدری درشان کرتگ اَنت –

ھندوستان ءَ کورونا وائرس ءِ ھمراھی ءَ ابرمی توپان ءَ ھم جیڑہ ودینتگ اَنت –

گوستگیں یک روچے ءِ تہ ءَ پاکستان ءَ کورونا وائرس ءَ دوھزار ءُ یک سد مردمانی نوکیں کیس دیم ءَ اتکگ –

پاکستان ءَ کورنا وائر ءَ درستاں چَہ گیش ھیبر پکتونواہ ءَ اسرمند بیتگ اَنت کہ اود ءَ داں انیگ ءَ سَے سد ءُ ھشتاد ءُ نُہ مردم بیران بیتگ اَنت –

پاکستان ءِ مسترین اُستان پنجاپ ءَ سھب ءِ ساھت نُہ ءَ داں شپ ءِ ساھت دَہ ءَ نھاد جاہ کنگ بنت کہ اود ءَ تنی وھدی نوزدہ ھزار مردم وائرس ءَ گورجتگ اَنت –

ھمے وڑ ءَ اسرمندینانی تہ ءَ سندھ ھم ھوار اِنت کہ اود ءَ وائرس ءَ گورجتگیں مردمانی کَچ بیست ءُ دوھزار ءَ سر بیتگ اَنت

پاکستان ءِ اُستان پنجاپ ءَ نوزدہ ھزار ءُ پنچ سد ءُ پنجاہ ءُ ھپت، سندھ ءَ بیست ءُ دوھزار ءُ چار سد ءُ نود ءُ یک، ھیبر پکتونواہ ءَ ھپت ھزار ءُ شش سد ءُ ھشتاد ءُ پنچ، بلوچستان ءَ سَے ھزار ءُ سَے سد ءُ سَے، اسلام آباد ءَ پانزدہ سد ءُ نود ءُ دو، بلتسان ءَ شش سد ءُ نوزدہ، پاکستان ءِ زیردستیں کشمیر ءَ یک سد ءُ نود ءُ ھپت، بیرانی کچ یازدہ سد ءُ چِل ءُ ھپت ءَ سر بیتگ ءُ ھبدہ ھزار ءُسَے سد ءُ چِل ءُ دو مردم وش بیتگ اَنت –

مانگیشتگیں این ایف سی

ٹی بی پی شونگال

دی بلوچستان پوسٹ

دوازدہ مئی ءَ پاکستان ءِ سروک (صدر) ءَ آئین ءِ لوٹ دیرگوست ءَ چہ سرجم کُت اَنت، دھمی راجی مڈی کمیشن (این ایف سی) اڈ دات، کہ بنجاھی پتر (وفاق) ءُ بھرانی (اُستانانی) نیام ءَ زرانی آسراتی ءِ بھر کنگ ءِ ھستیں وڑ ءُ پئیم ءِ سر ءَ جیڑگ ءَ پد وتی نوکیں دزبندی ءَ دیم ءَ کاریت۔

بنجاھی پتر ءِ لائکیں بھر بیوکیں پول ( ڈویزیبل پول) ءِ تہ ءَ وتی ھاتر ءَ گچین کُتگیں بھر ءَ گوستگیں این ایف سی ءِ منگ بیتگیں بھر ءَ چہ گیشتر ودینت نہ کنت، ایشی زمانداری ءِ ھشدمی بدلی ھم دنت کہ
بنجاھی پتر ءَ 42.5 ءُ اُستاناں 57.5 درسد بھر رس اِیت ۔ اے بھر ءِ تہ ءَ گیشی آرگ ءِ ھاتر ءَ بنجاھی پتر ءَ رھبند (آئین) ءِ تہ ءَ بدلی آرگ لوٹ اِیت کہ یک گرانین کارے ءِ کنگ اَنت ءُ اے گپ ءِ باز گمان ھست کہ اے کار ءِ پُشدر ءَ یک نوکیں راجداری جیڑہ ءِ پیداک بیت کَنت۔

زانت کارانی رد ءَ کجام ھم گمانی راجداری جیڑہ ءَ چہ وت ءَ رکینان اَنت ، بنجاھی پتر ءِ برز ءُ جھلی ءِ بھر ءُ بانگ ءَ ابید کش ءُ کِر ءِ بھر ءُ بانگ ءَ نشانگ کن اَنت دانکہ اُستان ءَ چہ بھراں رکینگی بہ بیت، راجی گھبودی ءِ شَوربندی، جھانی لس ءُ گلگت ءُ کشمیر ءِ دیمروئی ءَ بھر بہ دی اَنت آ کہ مدامی ءَ سرجم ءَ بنجاھی پتر ءِ بھر ءَ چہ دیگ بیتگ اَنت ءُ اُستان اے درگت ءَ کمک کنگ ءِ زمہ وار نہ اَنت۔

بلوچستان ءِ این ایف سی ءِ پیسرگیں نمائندگ نامی ئیں پیداوری ءِ زانتکار ڈاکٹر قیصر بنگالی ءَ پاکستانی روتاک ‘دی نیوز’ ءَ گوں کچ ءُ کساس پیش داران ءَ گوشت کہ اگاں سرجمیں 99 درسد ءَ پانزدہ درسد کُشگ بہ بیت گُڑا اُستانانی بھر وت 57.5 چہ کپان ءَ 39.6 پشت کپ اِیت۔

بھر ھال، کجام ھم اُستان اے گپ ءَ وشی ءَ جاڑیگ نہ اِنت نا کہ اُستانانی بھر ءِ 57.5 درسد ءَ چہ 15 درسد کشگ بہ بیت ءُ اُستانانی نیام ءَ پہ بھر کنگ ءَ تھنا 39.6 درسد پشت بہ کپ اِیت۔ سر بری ءَ انچو گمان بیگ ءَ اِنت کہ اُستانانی منارینگ ءِ ھاتر ءَ ھمراھے درگیجگ بیتگ ۔

پہ درور، بلوچستان ءِ نمائندگی کنوک ءُ آئی ءِ (کیس) ءَ “مڑگ” ءِ ھاتر ءَ اُستانی وزیر ءِ ھزانگ ظھور بلیدی ءِ پجیگ ءَ جاوید جبار نامیں نبشتہ کارے یک تکنیکی زانتکاری ءِ ھساب ءَ گچین کنگ بیتگ۔

جاوید جبار ءِ گچین کنگ ءَ نا تھنا لس مردم ءُ اپوزیشن ءِ تہ ءَ ناوشی ءَ گوں چارگ بیگ ءَ اِنت، بلکہ سرکار ءِ کرسیانی سر ءَ نیشتگیں راجی اسمبلی ءِ باسکاں ھم ایشی ءِ سر ءَ وتی زھرشانی درشان کُتگ اَنت۔

گوادر- لسبیلہ ءِ دمگ ءَ گچین بیتگیں بنجاھی پتر ءِ باسک اسلم بھوتانی ءَ آمد گِس ءَ جاوید جبار ءِ گچین کنگ ءِ ھلاپ ءَ پٹیشن ھم داتگ ۔ آئی ءِ رد ءَ جاوید جبار یک شریں ادب زانت ءُ نبشتہ کاریں مردمے بیت کنت، بلے آئی گوں پیداوری ءَ ھچ وڑیں سیادی ءِ گندگ نہ بیت، ءُ بلوچستان ءِ مپاداں گوں ھچ وڑیں جزباتی ےِ نزیک ءَ نیست۔

پرچاکہ چُشیں یک مردم ءِ نامینگ بیتگ، کہ آئی ءِ سیادی نہ بلوچستان ءِ گون ءَ اِنت ءُ نہ آ بلوچستان زرکاری جاورءُ نگیگی آں چہ آشنا اِنت؟ زانت کارانی رد ءَ چُشیں مردمانی گچین کنگ “ تاگت ورانی” نیمگ ءَ چہ تھنا پہ “ ھئو واجہ” کنگ ءِ ھاتر ءَ بیتگ، دانکہ اُستانانی بھر ءَ چہ اگاں شئے ءِ رؤت ھم پد ءَ ھم اے ھچ مہ گُش اَنت۔

اے سرجمیں جیڑھانی تہ ءَ چم جھلی ءُ پشیمانی دیمپانی بلوچستان ءِ سرکار ءَ کنگ کپ اِیت، چہ ایشی ءَ پیسر ءَ بلوچستان چہ سک کسانوکیں بھر ءَ چہ ھم گیشتر زبھر کنگ بیت بزان 5.17 درسد کستر کنگ ءُ 4.39 درسد پشت کپ اِیت بلکیں مستریں جیڑگی گپ ایش بیت کہ ھما زر پہ وانگ ءُ جان سلامتی ءِ پِڑ ءَ ھرچ کنگ بہ بنت، رند ءَ آ زر ھم پھریزوکیں ترامگیجاں دیگ بنت، ھما ترامگیج کہ آیانی سر ءَبلوچستان ءَ جنگی جرمانی ءِ تہ ءَ ھوار بیگ ءِ بھتام جنگ بیت ۔

تیر گواری ءِ ویل سیمسری دمگ ءَ بیتگ کہ اود ءَ مردم پہ لاپ ءُ روزگار ءِ شوھاز ءَ مزنیں کساسے ءَ مردم چہ جتا جتائیں ھنکین ءَ رو اَنت ۔

سربیتگیں ھالانی رد ءَ پاکستانی لشکریاں تیر گواری کنان ءَ بلوچستان ءِ سیمسری دمگ بگان ءَ یک مردمے کُشتگ۔

تیر گواری ءِ ویل روکپتی بلوچستان ءِ گوں ھم سنتیں دمگ زامران جالگی ءِ نزیک ءَ بیتگ، ھمے وھد ءَ پاکستانی لشکریاں ڈیزل بروکیں اولاکانی سر ءَ تیر پچ کُتگ ۔

ھندی مردمانی رد ءَ پاکستانی لشکر ءِ تیر گواری ءَ چہ اولاک ءَ سواریں مرد ھما وھد ءَ بیران بیتگ کہ آئی ءَ پد کارمنداں جون ایرانی واکداراں داتگ۔

بلے داں اے وھد ءَ کُشگ بیتگیں گاڑی ءَ سواریں مردم ءِ پجار زانگ نہ بیتگ ۔

یات بہ بیت لھتے ھپتگ پیش ھم پاکستانی لشکریاں سیمسری دمگاں تیر گواری کُتگ ءُ پنچ بلوچ کُشتگ کہ آیانی سیادی گوں روکپتی بلوچستان ءَ بیتگ۔

بلوچستان ءَ ھوار سرجمیں دنیا ءَ مروچی کسانیں ائید کنگ بیگ ءَ اِنت

دی بلوچستان پوسٹ

لاک ڈاؤن ءِ سبب ءَ جتائیں ڈیھاں ائید سادگیں رنگے ءَ کنگ بیگ ءَ اِنت –

ٹی بی پی پتر ھال ءِ رد ءَ نیکراھی ائید مروچی بلوچستان ءَ ھوار دنیا ءِ بازیں ڈیھاں اے رندی سادگیں رنگے ءَ روچ دارگ بیگ ءَ اِنت، ائید ءِ سادگیں روچے ءِ دارگ ءِ مستریں سوباں یکے ایش اِنت کہ جھانی نادراہ کورونا وائرس ءِ اِنت کہ چریشی ءَ دنیگتا سَے لَک ءُ چِل ھزار مردم تنی وھدی بیران بیتگ اَنت –

دومی نیمگ ءَ مسلمانانی پاکیں جاہ ھانہ کئبہ ءُ مدینہ منورہ سئودی ءِ بادشاہ ءَ ائید ءِ نماز ءِ وانگ ءِ اجازت داتگ اَنت –

وھدیکہ بلوچستان ھم مھلوک ائید ءَ سادگیں رنگے ءَ کنگ ءَ اَنت، بیگواھیں مردم، لشکر ءِ لشکر کشی ءُ بیڑیانی سوب ءَ جتائیں جاہ ءُ کھولانی ائید پُلیتگ –

بلوچستان ءِ راجداریں پاٹی ءُ گلانی نیمگ ءَ ھم بیگواہ ءُ کورونا وائرس ءِ سوب ءَ ائید سادگیں رنگے ءَ کنگ ءِ جار جتگ اَت –

گوستگیں روچ ءَ بلوچستان نیشنل پاٹی ءِ رھشون آگا ھسن بلوچ ءُ بی ایس او پجار ءِ بنجاھی پتر ءِ جارکش ءِ شنگ کرتگیں بیاناں ھم ائید سادگیں رنگے ءَ کنگ ءِ دزبندی کتگ اَت –

ھمے وڑ ءَ وائس فار بلوچ مسنگ پرسنز ءِ جار ءِ رد ءَ ائید ءِ روچ ءَ ھم شال ءِ پریس کلب ءِ دیم ءَ زھرشانی برجاہ کنگ ءِ جار جتگ اَت –

لشکر ءِ لشکر کشی، بازیں مردمے بیگواہ

دی بلوچستان پوسٹ

سر بیتگیں ھالانی رد ءَ مروچی سھب ءَ ھزدار ءِ دمگ گریشہ کوچہ ءَ پاکستانی لشکر ءَ یک لوگے ءِ سر ءَ بیڑ برتگ ءُ مردم آوار جتگ ءُ برتگ –

دمگی مردمانی رد ءَ مروچی سھب ءَ پاکستانی لشکر ءَ بیڑ برتگ ءُ پَٹ ءُ ھنڈ کنان ءَ دو مردم آوار جتگ ءُ برتگ ءُ اشانی پجیگ ءَ لوگ ءُ گدان لشکر ءَ پَٹ اِتگ اَنت-

لشکر ءِ دست ءَ آوار جنگ بیتگین مردمانی پجار ھالد ء مھمد بکش ءُ منور ء گوھرام ءِ نام ءَ زانگ بیتگ اَنت-

ھمے وڑ ءَ جائو ءِ جتائیں جاھاں پاکستانی لشکر لشکر کشی ءَ دزبند اِنت –

ھالانی تہ ءَ گْوشگ بیگ ءَ اِنت کہ جائو ءِ دمگ سوڈ، سھروکو، قران بھینٹ، گابارو جلائی کانی لشکر ءَ بیڑ برتگ ءُ انگیر ءَ اَنت ءُ لوگ لوگ ءَ پَٹ ءُ ھنڈ کنگ ءَ اِنت –

گوشگ بیگ ءَ اِنت کہ بازیں مردمے دزگیر کنگ ءَ پد ناشناسیں جاھاں برگ بیتگ اَنت ءُ بلے دامگانی نہ بیگ ءِ سبب ءَ مردمانی پجار کنگ مشکل ءُ جنجالانی دیمپانی اِنت –

بلوچستان لبریشن فرنٹ ءِ جارکش میجر گوھرام بلوچ ءَ پروم ءَ پاکستانی لشکر ءِ شش کارمندانی کوش ءِ زمہ واری منّ اِتگ –

میجر گْوھرام بلوچ ءَ وتی شنگ کرتگیں درشان ءِ تہ ءَ گْوشت کہ پنجگور ءِ دمگ پروم کلگ کور ءَ سرمچاراں پاکستانی لشکر ءِ بنجل ءِ سر ءَ وتکاریں سلاھانی گون ءَ اُرش کرتگ –

چریشی ءِ پشتی ءَ بنجل ءِ سنگر ھم نشانف کرتگ ءُ اے اُرش ءَ پاکستانی لشکر ءِ شش کارمند مرتگ ءُ سَے زدگ بیتگ اَنت –

آئی ءَ گْوشت کہ اے اُرش بلوچستان ءِ آجوئی ءَ داں برجاہ مان اَنت –

سر بیتگیں ھالانی رد ءَ پنجگور ءِ دمگ پروم ءَ سلاہ بندیں مردماں پاکستانی لشکر ءِ چوکی ءِ سر ءَ اُرش کرتگ –

اُرش پنجگور ءِ دمگ پروم کلگ ءَ پاکستانی لشکر ءِ چوکی سلاہ بندیں مردماں نشانگ کرتگ –

دمگی مردمانی رد ءَ پاکستانی لشکر ءِ چوکی ناشناسیں سلاہ بندیں مردماں وتکار ءُ نوکیں سلاھانی گون ءَ نشانگ کرتگ –

ھمے وڑ ءَ کیچ ءِ دمگ کولواہ ءَ پاکستانی لشکر ءُ سلاہ بندیں مردمانی میان ءَ جنگ ءُ چوپ بیتگ، ھردوکیں نیمگاں جانی تاوانانی گمان اِنت –

ٹی بی پی ءَ سر بیتگیں ھالانی رد ءَ جنگ کولواہ ءِ دمگ جت ءَ بیتگ ءُ جنگجاہ ءَ گیشیں لشکری رُمبان ءَ شتگ اَنت –

شال ءَ بیگواہ بیتگیں جنین آدم ءِ تیر سبگتیں جون دز کپتگ، ءُ دگہ یک ویل ئے ءَ دو مردم تیر جنگ ءُ ٹپی کنگ بیتگ۔

پولیس ءِ ردءَ گوالمنڈی تھانہ ءِ ھند ءَ شالدرہ ءِ قبرستان ءَ چہ بیگواھیں جنین آدم ءِ تیر سبتگیں جون دز کپتگ۔

گوالمنڈی تھانہ ءِ پولیس ءِ ردءَ جنین آدم ناشناسیں مردماں 21 مارچ 2020 ءَ بیگواہ کُتگ اَت، کہ آئی نامگ چہ کھول ءِ نیمگ ءَ شہریار ءُ فیاض نامی ءِ دو مردمانی ھلاپ ءَ داتگ۔

پولیس ءَ جنین آدم ءِ جون دز گرگ ءَ پد سول نادراہ جاہ ءَ سرکُتگ، ایشی المی کاراں پد جون کھول ءَ دیگ بیتگ۔

ھمے وڑ دگہ یک ویل ئے ءَ شال ءِ سریاب روڈ دمگ ءَ عوامی پمپ ءَ کِر ءَ ناشناسیں مردمانی تیر گواری ئے سوبءَ جنگی خان شیخ حسینی ءُ حاجی عبدالعزیز لہڑی ٹپی بیتگ اَنت۔

ھالانی ردءَ پولیس ءَ ٹپی زوت نادراہ جاہ ءَ بُرتگ اَنت پہ درمان ءَ۔

بنداتی ھالانی تھءَ اے ویل ءِ سوب زانگ نہ بیتگ۔