واجہ ھُدا بلوچ زھگانی پریاتاں پرچا گْوش نہ دار ئے؟
مزار کریم
دی بلوچستان پوسٹ
واجہ ھُدا من زاناں کہ تو جھانی مستر ئے تو کُلیںم ھکلوک ئے توار ءَ گُش دار ئے ءُ اِیش کن ئے کُلیں مھکلوک ءِ ندارگ تئی دیم ءَ انت، تھار ماھیں شپ ءَ تو ھمے بے برمش ءُ بے تواریں مور ءِ پادانی برمش ءَ اِیش کن ئے اے ترُسناک ءُ بیمناکیں شپ ءِ تھارئی ءَ چمّ پہ چمّ ءَ میم نئیت بلے تو ھمے مور ءَ گِندئے ، دنیا ءِ نزام تئی دست ءَ انت گڑا الّم تو اے بلوچ زھگانی بلوچ ماتانی بلوچ گُھارانی پریاتاں تو ھم اِیش کنگ ءَ ئے گڑا پرچا ھچ نہ گوش ئے اے بلوچ انسان نہ انت یا مسلمان نہ اَنت ؟
اے کسانیں زھگ کہ پریات کنگ ءَ اَنت چمّ ایش اَرس ءَ پُرّ انت ترا اے کسانیں زھگانی پریاتانی سَر ءَ بَزگ نئیت اے شال ءِ سردی ءَ مردماں لوگانی تہ ءَ ھیٹر چالو کُتگ اَنت بلے انگت تاھیر گُپت نہ کن اَنت ، اے زھگ شپ ءُ روچ ھمے سردی ءِ سَر ءَ نِشتگ انت ،آ راجانی زھگ شریں جاگہ ءُ یونیورسٹی ءَ وانگ ءَ انت، بلوچانی زھگاں وتئی وانگ یل داتگ پہ کئی ھاتر ءَ پہ کے ءَ تلوس انت پہ کئی ھاتر ءَ سردی ءِ سَر ءَ دپ اش پچ انت کُکار ءُ گریوگ ءُ زاری انت اَرس چو ھور ءِ پیم ءَ گوارگ انت اَرس نو ھلاس انت اَرسانی بدل ھون انت ریچ انت بلے اے مُلک ءِ انسان دُرست گُنّگ اَنت کَرّ انت گْوش داروک نیست اِش کنوک نیست چم پچ نیست ، یکّیں تو وت ئے کہ اِش کنگ ءَ ئے گِندگ ءَ ئے جھان ءِ چاریں کُنڈاں تئی نزر کار انت، بلے من نہ زان آں کہ تو پرچا بلوچانی توار ءَ گوش نہ دار ئے بلوچانی پریات ءُ زاریاں گوش نہ دار ئے بلوچ تئی چم ءِ نزر ءَ نیا اَنت تو بلوچاں آ انسانی پیما نہ چار ئے، اے کہ شپ ءُ روچ وائس فار بلوچ مِسنگ فرسنز ءِ کیمپ ءَ کماش ماما کدیر ءِ کِرّ ءَ پہ شوک نہ نِشتگ انت اے ماس ءُ گُھار ءُ زھگانی پِس ءُ
زھگ ءُ براس گار ءُ بیگواہ انت اے پہ شوک اَرس نہ ریچ انت پہ شوک سردی ءِ سَر ءَ نہ نِشتگ انت ھَر یکّے پِس ءَ زھگ ءَ براس ءَ (دہ دہ) (دوازدہ دوازدہ ) سال انت گار بیگوہ انت ھمے پاکستانی لشکر ءُ پاکستانی لشکر ءِ جوڑ کُتگیں ڈیتھ اسکواڑ ءَ کارندہ ءُ چیریں ادارہ آئی ایس آئی ءَ ھمے آوار جِتگ انت ٹارچر سِلانی تہ ءَ بندیگ کُتگ انت ازیت برداش کنگ ءَ اَنت ، آ کہ ٹارچر سِلانی تہ ءَ بندیگ انت ٹارچر کنگ بوھگ اَنت ، اے کسانیں زھگ ھمایانی ودار ءَ سردی ءِ سَر ءَ ٹاچر بوھگ اَنت زھنی مریز جوڑ بوتگ انت،
الی ھیدر یک گونڈوے شال تاں کراچی، کراچی تاں اسلام آباد ءَ دگانی سر ءَ وتی پِس ءِ شوھاز کنان اَت مروچی چنت سال گوستگ نو الی ھیدر مزن بوتگ ورنا انت ،بلے پِس ءِ شوھازگ ءِ ھاتر ءَ انگت دگانی سر ءَ نشتگ پِس انگت گار ءُ بیگوہ انت، کسانوکیں گُھار انسا کہ ھم روچ پریات ءُ زاری کنت گریت اَرس ءُ ھُلومب انت کہ منی براساں آجو کن اِت اگاں منی براساں رَدی ءِ کُتگ گڑا آمید گِس ءَ (عدالت) ھست آمید گِس ءَ پیش اِش کن اِت آمید گِس ھما سزایا دنت اِش من ءَ اتراز نیست بلے گار ءُ بیگوہ اش مہ کن ات آ ھم ٹارچر بوھگ ءَ اِنت ما ھم زھنی ٹارچر بوتگ انت ، اے پاکستان انت نہ گپ گوش داریت ناں زھگانی پریات ءُ زارئی ءَ ،بلے اے اقوام متحدہ انسانی ھَکانی گَل پرچا بے توار اَنت پہ کے ءَ جوڑ کنگ بوتگ اَنت اگاں انسانانی ھکانی واستا جوڑ کنگ بوتگ انت گڑا بلوچ ھم انسان ءَ بلوچاں ھم زندگ بوھگ ءِ ھَکّے ھست زندگی کنگ ءِ ھَک دار انت وت ءَ مُلک ءِ ھستِ زمین ءُ جاگہ اش ھست امیریں مُلکی ءِ واھند انت، بلے اے مُلک ءَ انسانیت نیست اگاں انسانیت بوتیں گڑا مئے کسانوکیں زھگ چوں بَزگ ءُ وار نہ اِت انت وائس فار بلوچ مِسنگ فرسنز کیمپ ءَ نہ نِشتگ اِت انت اے شال ءِ سردی ءِ سَر ءِ نندگ وش نہ انت، بلے نہ زاناں واجہ ھُدا پرچا مئے زھگانی پریاتاں گوش نہ دار ئے اے کسانوک زھگ مھرنگ ھم روچ وائس فار بلوچ مِسنگ فرسنز ء کیمپ ءَ کیت ءُ پریات کنت کہ منی پِس ءَ نسیر بلوچ آجو کن اِت منی پِس ء میار گُناہ چے انت شما گار بیگواہ کُتگ، بلے اد ءَ کَس گْوش نہ دار ایت مھرنگ ءِ پریات ءَ نہ کہ انسان گْوش دار انت نانکہ واجہ ھُدا ،اے زھگانی میار چے انت واجہ ھُدا ،پاکستان مئے دژمن انت آ مئے گار ءُ بیگواہ کنگ ءِ رند ءَ اِنت آ نہ لوٹ ایت کہ بلوچ ھست بہ بنت وتی زمین ءِ واجہ وت بہ بنت آ روچ پہ روچ مئے گار ءُ بیگوہ کنگ ءِ ھاتر ءَ یک نوکیں پندلے ساز ایت کہ بلوچ راج ءِ غلامی ءَ چون مُھر و مھکم بہ کن ایں ءُ جبرن پہ توپک زور ءَ بلوچ و بلوچ ءِ مادریں گلزمین قبضہ کُتگ، اد ءَ ھَکّ ءِ گپ کنگ جرم انت اگاں ھرکس گپ بہ کنت آ گار ءُ بیگوہ کنگ بیت چو بلوچ اسٹوڈنٹس آرگنازیشن ءِ چیئرمین زریپ رند، جوائنٹ سیکریٹری جیئند بلوچ ،بنجاھی سیکریٹری چنگیز بلوچ، بنجاھی سیکرٹری ھالرسان اورنگزیب بلوچ پیم ءَ بیگواہ کنگ بنت آ تنے وھدی بیگواہ انت، اے مردم سلاہ بند نہ بوتگ انت ایشاں ھَک ءُ انسانیت گپ کُت مرچی ھمے ھم گار بیگوہ کنگ بوتاں، اَے واجہ ھُدا تو گِندگ ءَ ئے کہ بلوچ بَزگ انت، تو یک مورےِ پاد برمش ءَ اِش کن ئے گڑا بلوچانی توار ءَ اِش کنگ ءَ نہ ئے اَے واجہ ھدا بلوچانی زھگانی توار ءَ گوش دار کہ اے زھگانی پریات زمین ترکگ ءَ اِنت!
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
