نبشتانک: تاکشان ءِ دروشم
نبشتہ کار: اسد واھگ
دی بلوچستان پوسٹ
وھدءِ تاکشان تو واتر کنے لھتیں ھیال گٹ گیر کنے ءُ گوں وت برے، لھتیں کسہ ناسرجم کنے ءُ اے ناسرجمیں کسہ مئے سرءَ پہ زور ایر بنت اے مارءَ تھءَ چہ ور اَنت ءُ ھلاس کن انت۔ اے ھما ھیال انت کہ منی مارشتءَ گوں ھوار بنت، اے ھیالانی تھءَ بازیں وابءِ من آگاھیءَ دیستگ، اے واب ھم تو چہ منءَ پچ گپت انت ءُ وتی ھرجان جت انت بلئے آ مارشتاں چہ منءَ تو پچ گپت کت نہ کنے، آ اَنچیں مارشتاں کہ آ منی زندمانءِ گڈیءَ داں گوں من ھوار اَنت۔
تو کہ سال سرءَ پدءَ واتر بئے گوں تئی واتریءَ پد ھما ھیال موتک جن انت منی مارشتءَ گون کپ انت، اے ھما مارشت انت کہ مئے راجی رھشون شھید جنرل اسلمءِ گوں زمستانے تاکشانءَ بندوک انت۔ ھؤ اے ھما تاکشان انت کہ مئے نڈریں رھشون “استاد اسلم ءُ آئی ھمراھیں ءُ ھم پگریں سنگت” چہ ما پُل اِت اَنت بلئے آئی کردار چہ ما پُل اِت کت نہ کت انت آوانی پگر اَنگت بلوچءِ ھمک زھگ تھءَ ردوم زورگ ءَ اِنت۔
پدءَ من آگاھیءَ واب گنداں بلئے من سدکاں کہ اے واب بے معنیٰ نہ بنت الم روچے نہ روچءِ وتی ھکیئیں دروشمءَ کاینت پہ منءَ ءُ منی راجءَ یک آجوئیں باندات شکلءَ بنت اے ھما بانداتیں کہ کُلیں راج ھمے روچے ودار ءَ اِنت ءُ ایشی ھاترءَ ھمُک روچ وتی سرانی کربانیاں دیئگ ءَ اِنت۔
وھدءِ تاکشان واتر کنت من پَد گڈاں ءُ مارشتءِ منی تھءَ چست بیت، برے ھنچو گشئے آزمان منی سرءَ جمبیت بلئے من اپسوزی نباں پرچہ کہ اے منی راجءِ آگاھی اِنت آئیءَ چہ منی راجءَ نوکیں کشکءِ رَستگ ءُ رَسگ ءَ اِنت۔ تاکشان تئی دوبر واتر کنگءَ دگے لھتیں گران بھائیں سر تو گوں وت برت، تئی آھگءَ چہ چیز ءِ روچ پیش ماں زامران ءِ سنگرءَ 3 بلوچ پُسگ گوں زورگریں لشکرءَ دیم پہ دیمی اُرشءَ شھید بوت انت، گوستگیں روچاں ھم 7 بلوچ پُسگ ماں کیلکور ءِ دمگءَ شھید کنگ بوت انت ءُ ھمے شپءَ دگے ھالءِ ھم شنگ بوت کہ دگے یک راجی رھشونءِ “بانک کریمہ” ماں کینیڈاھءَ ریاستی چیریں ادارھ آئی ایس آئیءِ دستءَ شھید کنگ بوتگ ایشی دوھمی روچءَ اے ھال اَتک کہ کیلکورے سینگءَ دگے 3 بلوچ پسگ شھید کنگ بوتگ۔
اے کربانیانی کاروان ھمے پیما روان انت داں آجوئیءَ ءُ مارءَ ھم شھید جنرل اسلم ءُ ایندگہ کل شھیدانی پگرءَ گوں ھمگرنچ بوئگی انت ءُ ھمے راھے راھی بوئگی انت پرچہ کہ اے گلامیں زندءَ چے در کپگءَ کربانی اولی شرت انت۔ مارءَ وتی شھیدانی پگر دیما برگی انت اے مئے زندءِ مکسد بہ بیت۔
تاکشان دوبر واتر بیت زمین جمبگءِ زوریت ءُ دیم پہ آزمانءَ توارءِ چست بیت، زھگءِ چہ گوانزگءَ چیھڈیت ءُ پریات کنت ءُ ماتءِ دپ چہ ھونءَ پُر بیت ماں ھاکاں کپیت، چورھیں بازاری ئے جنوزامیں زارءِ چست بیت۔ تاکشان تئی انچیں رنگ ءُ دروشمءِ کہ مئے اے جھانءَ بدل کنت ءُ دگے جھانءِ نیمگءَ بارت، تو واھگانی ساھگءَ انچو گشئے مئے دلبندءَ کِشتگ ئے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
