TBP Balochi

زھرشانی ءَ زھر ءِ درانگاز بلوچستان ءَ ھوار چاگردی رسانکجاھاں برجاہ اَنت –

دی بلوچستان پوسٹ

سر بیتگیں ھالانی رد ءَ بلوچستان ءِ بنجاھی شھر شال ءَ بلوچ اسٹوڈنس آرگنائزیشن آزاد ءِ گوستگیں سروک ءُ بلوچ نیشنل مومنٹ ءِ باسک کریمہ بلوچ ءِ کوش ءِ ھلاپ ءَ زھرشانی بیتگ –

زھرشانی ءِ جار گوستگیں روچ ءَ بلوچ ھمپتی پتّر (یکجہتی کمیٹی) شال ءُ ھب ءِ نیمگ ءَ کنگ بیتگ اَنت –

زھرشانی ءَ لس مھلوک ءَ ھوار سیاسی باسک، وکیل، چاگردی ءُ بلوچ ھمپتی پتر ءَ ھواریں مردماں بھر زرتگ –

زھرشانی شال ءِ جتا جتائیں دگاں روانکی دروشم ءَ تران بیتگ ءُ اوگام جنان بیتگ ءُ یک مُچے ءِ دروشم ءَ مُچ بیتگ اَنت زھرشانی کنوکاں لوٹ کرتگ ءُ گوشتگ کہ کریمہ بلوچ ءِ کُشندہ دزگیر کنگ ءُ دیم ءَ آرگ بہ بنت –

روانک ءَ ھواریں مردماں تران کنان ءَ بانک کریمہ بلوچ ءَ را سھرچکیں دروت ندر کرتگ ءُ گْوشتگ کہ بانک کریمہ بلوچ یک رژناپگریں ءُ سرجمیں رھشونے بیتگ ءُ آئی ءَ بلوچ راجداری ءِ سر ءَ یک ھنچیں وھدے ءَ رھشونی کرتگ کہ بلوچ راجداری ٹوھیں جیڑہ ءُ زُلمانی آماچ بیتگ ءُ بلوچ نودربر نااُمیتی ءُ ترس ءَ نندوک بیتگ اَنت –

آیاں گوشت کہ ریاست ءِ نیمگ ءَ جنگ ءُ گار کنگ ءِ شوربندی سر ءَ سر بار بیتگ اَنت ءُ سدانی کچ ءَ باسکانی جونانی دور دیگ بندات بیتگ ءُ ھمک روچ گلانی باسک بیگواہ بیان بیتگ اَنت ءُ ھمے وھد ءَ سرجمیں بلوچستان ءَ ترس ءُ بیمی جاور نودربرانی سر ءَ ساھیل بیتگ اَنت ءُ ھمے وھد ءَ کریمہ بلوچ ءَ درستیں ترس ءُ بیم یکر کرتگ ءُ نودربرانی گل ءِ رھشونی کرتگ –

آیاں گوشت کہ بانک کریمہ بلوچ ءِ جد ءُ جھدانی برکت ءَ بلوچ نودربر گل ءَ یک جُنز کے ءِ راھے بندات کرتگ ءُ بانک کریمہ بلوچ جھد ءِ چیدگ اِنت ءُ آئی ءِ دیمونیانی ستاشانی اِنت –

تران کنوکاں تران کنان ءَ گْوشت کہ بانک کریمہ ءِ کوش اناگتی نہ اِنت بلکیں ریاست ءِ نیمگ ءَ جنگ ءُ کُشگ ءُ دور دیگ ءِ درچ اِنت –

آیاں گْوشت کہ بانک کریمہ بلوچ ڈنی ڈیھاں اے اولی رھشون نہ اِنت بلکیں اشی ءَ پیسر ساجد بلوچ سویڈن ءَ بیگواہ ءُ شھید کنگ بیتگ ءُ ڈنی ڈیھاں سیاسی باسکانی بے توار کنگ ءَ بیھاراں بہ گر داں کُشت ءُ کوش ءُ آیانی جونانی جنگل ءُ گیاباناں دزکپگ میان اُستمانی ادارہ ءُ دودمانیں ڈیھانی بے سوبی ءِ دیم ءَ شھماتی ءِ منانک اِنت –

آیاں گْوشت کہ بلوچ سرڈگار بلوچانی واستا نز آرگ بیتگ ءُ چریشی ءَ بلوچ سیاسی باسک در پہ در اَنت ءُ درپہ دری ءَ ھم سیاسی باسک کُشگ ءُ چگل دیگ بیگ ءَ اَنت –

ھمے وڑ ءَ بلوچستان ءِ باپاری شھر ھب ءَ بلوچ اسٹوڈنٹس آرگنائزیشن آزاد ءِ گوستگیں سروک کریمہ بلوچ ءِ ٹورنٹو ءَ کوش ءِ ھلاپ ءَ بلوچ ھمپتیں پتر ءِ دزبندی ءَ روانک کشگ بیتگ ءُ زھرشانی کنگ بیتگ –

لسبیلہ پریس کلب ءَ نودربراں بازیں کچے جاڑیگ بیتگ ءُ آیاں دستاں نبشتگیں تاک چِست کرتگ ءُ بنجاھی شھدگ بند ءَ روانک کش اِتگ ءُ میان اُستمانی برادری ءَ انساپ ءِ لوٹ کرتگ –

روانک ءَ بھر زیروکیں مردماں تران کنان ءَ گوشت کہ کریمہ بلوچ جنگ ءِ چیدگ اِنت، زانت ءِ چراگ کُشگ نہ بیت بلکیں آ مئے رھشونی ءَ گیش کنت –

لسبیلہ پریس کلب ءِ دیم ءَ زھرشانی ءَ بیگواہ بیتگیں انسانی ھکانی باسک راشد ھسین ءِ برات زتک ماہ زیب بلوچ ءَ تران کنان ءَ گوشتگ کہ اگاں ما راشد ھسین ڈنی ڈیھاں بیگواھی ءُ ساجد ھسین ءِ جون ءِ دزکپگ ءَ بے تواری نہ کن ایں گڑا مروچی کریمہ ءِ واستا ھم بے توار بیت نہ کن ایں –

کریمہ بلوچ ءِ کوش ءِ ھلاپ ءَ بلوچستان ءَ ھوار چاگردی رسانکجاھاں بلوچ رسانکار ءُ سیاسی ءُ جتا جتائیں پکراں بندوکیں مردمانی زھرشانی برجاہ اِنت ءُ مردمانی لوٹ اِنت کہ کریمہ بلوچ ءِ کوش ءِ بارہ ءَ جوانیں پَٹ ءُ پول کینیڈا ءِ سرکار بہ کنت ءُ کشندھاں پدر بہ کنت –

ھمے وڑ ءَ بیست ءُ پنچ دسمبر ءَ بلوچستان ءِ شھر کیچ ءَ ھم بلوچ ھمپتی پتر ءَ کریمہ بلوچ ءِ کوش ءِ ھلاپ ءَ زھرشانی ءِ جار جتگ –

زانگ بہ بیت کریمہ بلوچ ءِ اناگتی کوش ءِ سوب دیم ءَ نیاتکگ اَنت کھول ءُ بلوچ راجدارانی نیمگ ءَ ٹاہ اِنت آ کُشگ بیتگ وھدیکہ ٹورنٹو پولیس ءِ رد ءَ تنی وھدی کوش ءَ ھواریں جرمکارانی منانک دیم ءَ نیاتکگ اَنت –

ھمے وڑ ءَ چاگردی رسانکجاھاں چاگردی رسانک کارمرز کنوکانی نیمگ ءَ پٹ ءُ پول ءِ دزبندی بیگ ءَ اِنت ءُ انسانی ھکانی میان اُستمانی گل ایمنسٹی انٹرنیشنل ءَ ھوار دگہ انسانی ھکانی گل ءُ ھندوستان ءِ نامی ئیں تامرکار کنگاروات ءَ ھم جرمکارانی دزگیری ءُ کانود ءِ سر ءَ اوشتارینگ ءِ دزبندی کرتگ –

نبشتانک: جنرل اسلم ءِ کاروان

نبشتہ کار: اکیل مراد 

ھشتمی بھر 

دی بلوچستان پوسٹ

شرپدار ءُ وتن پھازیں جنرل ءِ شرپ ءِ وت جتائیں مانا یے کہ آئی ءَ ھرچ نگاہ ءَ یک شرپ ءُ مانا یے دات آئی ءَ مردمانی تب ءُ ھیل پجاہ آؤرتگ اَنت ءُ ھرکس ءَ ھماھی ءِ کَچ ءَ آئی ءِ گور ءَ مزنیں شرپے بیتگ –

“جنرل ءِ ھواریں سنگتے ءَ گپ جت کہ ھَنچُش آئی ءِ جزبات پہ جنگ ءَ چِست بیتگ ھنچش آئی ءِ جزبات پہ زمین ءِ مھراں ھم چِست بیتگ اَنت گوشگ ئیگ ءَ جنرل ءَ اے جنگ وتی دراھیں زندگی جوڑ کرتگ” –

اے جنگ ءِ تہ ءَ جنرل ءَ چوناھیگا گرانیں گرانیں سکی دیستگ اَنت جنگ ءِ تہ ءَ بلے ھچبر آئی ءَ نا اُمیتی درانگاز نہ کتگ ، آئی ءَ مدام جنگ کنگ ءُ زندگ بیگ ءِ سکین داتگ –

دنیا ءِ تہ ءَ وھدے کہ نوک آبادکاراں ڈیھانی سر ءَ اُرش کرتگ ءُ ڈیھی مردم گلام ءُ زیردست کرتگ اَنت گڑا اود ءَ زلور بامردے ءَ بُست کرتگ زلور اود ءِ مردماں داں ھدے ءَ پھم اِتگ ءُ گلامی ءِ بگیری ءَ جَھ جتگ بلوچستان ءِ کسہ ھم دنیا ءِ دگہ زیردست ءُ نوک آبادکارانی پیم ءَ اِنت –

نوک آبادکار چو وروکیں مدگ ءَ کپ اِیت ءُ ڈیھانی سرجمیں مڈی، زبان، پجار ءُ دود ءُ ربیدگاں پادمال کنت اے گواچنی ءَ راجدپتر مدام کنت زیردستیں راج ھنچش کنگ بیتگ اَنت آ ماں واب ءِ ھیال ءِ تہ ءَ گار ءُ بیگواہ بیتگ اَنت نوک آبادکاراں پاتکگ ءُ سِرکُریں مرگ ءَ کرتگ اَنت –

فرانز فینن افتادگان خاک ، ءَ نبشتگ کنت نوکیں آبادکار ھروھد ءَ ڈیھانی سر ءَ کپ اَنت گڑا وتی راجدپتر ءِ بارہ ءَ مردماں سکین دے اَنت گڑا ھمے سما بیت ماتی زمین ءِ بچانی راجدپتر ءَ گار ءُ بیگواہ کنگ ءِ جھد ءَ کن اَنت –

اگاں ما گوست ءِ  راجدپتر ءَ نبشتگ کرتگیں دانکاں بہ چاریں  گڑا آ ڈیھ ءِ کپتگیں آبادکاری کہ آئی ءِ لُٹ ءُ پُلپھانچی ءَ کنت گڑا راجدپتری تاکاں چیدگ بیت ءُ ھما راجانی سر ءَ نبشتگ کنگ بیت ھما شَے ءُ مڈیانی بارہ ءَ بیت اِنت ھما راج ءَ گوں بندوک اَنت، ھنچش بربادی ءُ شُدکی ءَ آیاں کُش ایت ءُ گار کنت چوشیں تاکاں دوئیں نیمگاں زوراکی ءُ زیردست نبشتگ بیت –

اے بے وسی ءُ شُدکی ءَ بنکی منندی بزگ ءُ وار بنت گڑا اشی ءِ سر ءَ چیلنج ھم بیت کن اَنت وھدے کہ آ نوک آبادکاری ءِ راجدپتر ءَ لُٹ ءُ پُل ءِ راجدپتر بہ کنت آبادیں راجدپتر ءِ ھلاس کنگ ءِ پیسلہ ءَ بہ کنت گڑا آ راج ءِ سر ءَ سیاہ ءُ تھاریں جمبر لونجان بنت  –

یک ھنچیں جھانے کہ تبکانی تہ ءَ بھر اِنت یک بے جانیں، یک نیکراھی جھانے کہ بُتانی دنیا ءَ اِنت، ھما جنرل ءِ بُت بہ بیت کہ آئی ءَ ملک گپتگ، ھما انجینئیر ءِ بت بہ بیت آئی ءَ پُھل جوڑ کرتگ یک ھنچیں دنیا یے وت پرستی ءَ گوں ھوار اِنت آ وتی ھما سنگانی سر ءَ لاپ ءِ گزران ءَ کنگ ءَ اِنت پیسر ءَ دریگانی آماچ اَنت –

ھمیش اِنت نوک آبادکاری ءِ لکیر بنکی منندیاں جتائیں رنگے ءَ پِرنچ اَنت ءُ نزکار اَنت آیانی نپس ءِ سر ءَ وپس اَنت –

نسلی ءِ بُن ءَ نوک آبادکارانی دنیا ءِ مٹ کنگ ءُ وتی دست ءَ کنگ ءِ یک رنگے اے وڑ اِنت کہ آ وتی اولی سان ءَ ھماھی ءَ بنکی مردمانی گور ءَ ھیل گپت کہ آ یک ھنچیں ڈولے ءَ مردمانی تہ ءَ وت ءَ پُترین اِت کہ وتی بستار ءَ ھچ پیش نہ دار ایت بنکی مردمانی ھیالانی واباں پدر کنت من دیمروی کنگ ءَ آں من گام جنان آں، من ھُژناگ ءَ آں، من سَکپان آں، من کنداں ٹھک دیان آں نوک آبادکار ھمے وڑ ءَ بنکی مردمانی تہ ءَ وابانی نادراھی ءَ ودین اِیت ھچبر مردماں آجوئی ءَ نیل ایت –

جنرل ءِ ڈیھ ءَ نوک آبادکارانی رنگ ھم ھمے داب ءَ بیتگ اَنت آیاں ھم ھمے داب ءَ مردمانی ھیالانی تہ ءَ واب پِرینتگ ءُ رد داتگ اَنت ھرچ شَے شمئے منگ ءُ رز ءَ کنگ بیت اِنت –

جنرل ءَ چوشیں وابانی مانا دربرتگ اِت اَنت ھمے واستا جنرل ناں چوشیں واباں رد دات کُت نانکہ چوشیں وابانی شوھازگ ءَ جنرل گوں دریگاں درکپت بلکیں چوشیں وابانی پُروشگ ءُ آیانی تہ ءَ نوکیں دنیا ءِ آرگ ءَ جنرل ءِ جنگ ءَ دیم ءَ گام جنان کُرت –

جنرل اسلم ءِ نزیکیں سنگتے ھمے گپ ءَ جنت کہ جنرل اسلم ھنچیں شیوار ءُ تمردیں مردے بیتگ کہ آئی ءَ ھرچ جست ءِ پَسو پیسر ءَ گون بیتگ اگاں کسے ءَ آئی ءَ جُست کرتگ گڑا آئی ءَ مدام آئی ءِ جست ءِ سر ءَ جوانیں دلگوش دیگ ءَ پد آئی ءِ پسو سرجم کرتگ ءُ داتگ –

ھنچیں رنگے ءَ  جنرل ءَ پسو داتگ دیم ءِ مردم ھم سرجم ءَ دلجم بیتگ چوشیں زانوگر ءُ راجی بامرد پد ءَ دوبر کدی ودی بنت بلے دنیا ءِ ھونواریں آشوب ابید ءِ ھوناں سبز اِت نہ کنت –

سپر روان اِنت جنرل اسلم ءِ کاروان ءَ دسمبر

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: بلوچ راج ءِ چیدگ

نبشتہ کار: گنی ھیات

دی بلوچستان پوسٹ

بانک کریمہ ھما بلوچ زالبول ءِ نام اِنت آ کَسے ستا ءُ ساڑایگ ءِ مھتاج نہ اِنت بانک ءَ پہ بلوچ ءُ بلوچستان ءَ بے کساس جُھد کُتگ مروچی اگاں بلوچ زالبول اے جھد ءَ ءُ گوں آشوب ءَ ھمگرنچ اَنت گڑا اے بانک ءِ جھدانی برورد اِنت۔

شیرزالیں بلوچ ءِ مات بانک کریمہ بلوچ ھما بلوچ مات اِنت کہ آئی ءَ وت واجھی ءِ نارہ تھنا وتی چار دیوالی ءِ تہ ءَ نہ جتگ بلکیں سرجمیں دگنیا ءِدیم ءَ وت واجھی ءِ جار ئِے پرّینتگ ءُ سرجمیں دگنیا ھمے باور کنائینتگ کہ بلوچ راج وت واجھی لوٹ اِیت ءُ بلوچ ءِ راجی لوٹ بس آجوئی اِنت۔

بلوچ راج ھرچ وڑیں زُلم ءُ زیادتی سَگّگ ءُ اوپار کنگ اِنت، ناں مَرگ ءَ تُرس اِیت ءُ ناں کہ دژمن ءِ پاتراپ ءُ بیھارانی دیم ءَ وتی سر ءَ جھل کنت،
بانک ءِ مھر پہ بلوچستان ءُ بلوچ راج ءَ بے کساس اَت آ پہ بلوچستان ءَ مھروان اَت بانک ھرچ بلوچ ءِ گیرت مندیں مات اِنت بلوچ ءِ پھر ءُ شانیں گوھار اِنت بلوچستان ءِ ھاک اِنت بلوچستان ءِ چیدگ اِنت ۔

سوگند اِنت ھُداوند ءِ کہ اِنچو درد ءُ ازیت ، اندوه ءُ رنج دلتپرکی اگاں کوہ چلتن ءِ سر ءَ ایر بہ بیت آ تُش تش ءُ گزل ءُ گپڈ بیتگ اَت، اگاں زمین سر ءَ بوتیں تْرکّگ ءُ تَل تَل بوتگ اَت بلے بانک تو شیرزالیں بلوچے اِت ئے ھرچ بلوچ ءِ مجگ ءَ تئی پگر ءُ سسّا زندگ اِنت تئی ھمت ءُ سَگّ ءُ دیمونیاں سُھریں دروت ، بلوچ راج وتی سر ءَ جھل کنگ ءَ اِنت ءُ ترا سھریں دْروت کنگ ءَ اِنت تو ھر وھد بلوچانی زندگ بوھگ ءِ جنگ کَٹ اِتگ۔

تو بلوچ زالبولانی چہ گِساں کَشگ ءُ دگانی سَر ءَ پہ زھرشانی ءِ ھاتر ءَ دَرکنگ ءَ سوبین بوتگ اِت ءُ تئی سروکی ءُ رھشونی ءَ بلوچ ءِ چاگرد ءَ ءُ ھاسکار بلوچ زالبولانی تہ ءَ مزنیں کساسی ءَ بدلی یے آورتگ ءُ ترا چِہ سان اِش زرتگ ءُ متاسر بوتگ اَنت ءُ مزنیں کساسی ءَ زالبولاں گوں بلوچستان ءَ بندوکیں جتا جتائیں آشوبی گلّاں بھر زُرتگ مروچی اے تئی جھدانی برورد اِنت کہ اَندازگ ءُ زیادگ بلوچ آشوبی گلانی( لیڈرشپ) سروک زالبول اَنت ۔

من ءَ یات اِنت ترا ھر وھد بلوچ وانندہ گل آزاد ءِ بِیرک دست ءَ بوتگ ءُ رھشونی کُتگ سرگردان بوتگ ئے روچ ءُ شپ سارتی ءُ گرمی نہ چار اِتگ پہ بلوچ ءِ آؤکیں باندات ءَ ھرچ ھند ءُ دمگ گول اِتگ اَنت۔

بلے دوشی من اتک آں وتی کوٹی ءَ سر بوت آن ءُ مبائل پچ کُت چار آں کلوھے اتکگ نبشتہ اِنت کہ بلوچ وانندہ گل آزاد ءِ گوستگیں چیرپرسن ءُ بلوچ نیشنل مومنٹ ءِ باسک گوستگیں یکشمبے ءَ بیگواھی ءَ پد دوشیگیں شپ ءَ آئی ءِ جون کینیڈا ءِ شھر ٹورنٹو ءَ دزکپتگ۔

اے کلوہ ءِ وانگ ءَ منی اَرس چہ انارکاں شیپ گران بوت اَنت منی سر چَکرّگ ءَ لگ اِت من ءَ باور نہ بوت کہ تو شھید کنگ بوتگ ئے بلے مَرگ ءِ ھال گیشتر راست بنت ، راجدپتر ءِ تہ ءَ بیست ءُ یک دسمبر یک سیاہ ءُ تھاریں روچے نبشتہ بیت۔

بلے بانک من ترا ھال دیگ لوٹ آں کہ ما چورَو بوت اِیں بلوچ راج ءَ مزنیں تاوانے بوت ءُ تئی شھید بوھگ ءَ ما یک شرین ءُ زانتکاریں رھشون ءُ راجی چیدگے ءَ زبھر بوت اِیں ۔ اے جوانیں سر ءِ کمی ءَ کرناں پرکُت نہ کن ایں۔

دل گوش اِیت دپ ءَ پچلگوش کوکار کن ءُ بگریو سرجمیں ھمساھگاں چہ واب ءَ پاد کن ءُ ھال اِش بدے بگوش کہ ھاک ءَ چہ دور بانک شھید کنگ بوتگ مھرستان ءِ ڈولدار ءُ سُرومگیں مِسک بوئیں ھاک بانک توار ءَ اِنت ، شانتل ءُ کپوتاں موتک ءِ الھان دپ ءَ اِنت ٹیٹلیں آسکانی اَرسگیں چم تئی وداریگ اَنت کلبر ءِ داز گیمُرتگ اَنت،کلبر ءَ اے رندے ھور نہ بیت کور ءُ آپ ءُ شھجو نہ تچت اَنت ءُ کُلان(شِنِلُک) گوں وت نہ بارت کلبر ءِ کور ھشک ءُ ھیران اِنت۔

تمپ ءِ مچکدگ ءُ پازُل ءِ مند بے تو پرسیگ اَنت دشت ءِ مھلبیں پُلک چنچو بےچاڑ اَنت ءُ تئی زھیرانی واھگدار اَنت، گوادر ءِ زِر ایرموش اِنت بلکیں بوجیگے بئیت ءُ در ءَ بہ بیت ءُ اَرسیگیں تیاب مدام چول جنت پہ ترا، شال ءِ برپ بستگیں آسمان مُجاں گپتگ، دنز ءُ تامور اِنت مئیت نیت اِنت ماما ءِ گاریں مردمانی بنجل۔

روچ ءِ برانژ ۔۔۔ دنز ءُ مُج ۔۔۔ ڈگارانی سَر ءِ کپوتانی زھیر نالیں کوکو سھب ءِ سَر ءِ رودراتک ءِ سارتیں ءُ وشبوئیں کَوش دُرست تو گوں وت برت اَنت سک ابیتک اِنت مھرستان
ھما گڈی روچ ءَ کہ میتگ تو وَیل کُتگ اَت آ روچ ءَ من مار اِت کہ مھرستان داں بیران بیتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سندھو دیش روولیوشنری آرمی ءِ جارکش سوڈھو سندھی ءَ رسانکدراں وتی شنگ کرتگیں درشان ءِ تہ ءَ کراچی ءَ چائینیزانی سر ءَ بوتگیں اُرش ءِ زمّہ واری منّ اِتگ گوشتگ کہ چائنہ ءُ سی پیک ءُ دگہ منسوبھانی پشدر ءَ سندھ ءِ جزائر ، زِر ءُ مال مڈیانی سر ءَ اُرش کُتگ ءُ زورگر کتگ اَنت –

آئی ءَ گوشتگ کہ سندھ ڈیھ پاکستان ءُ چین ءِ یکجاھیں اُرش ءُ زورگری ءِ آماچ انت، ھمے زورگری ءِ بگیری ءَ سندھی راج جنگ ءُ راجی پھازگے جد ءُ جھد کنگ ءِ ھک ءَ داریت –

آئی ءَ گوشتگ کہ سندھو دیش روولیوشنری آرمی مروچی کراچی ءَ جمالی پھل ءِ سر ءَ چائینیز انجینئیرانی سر ءَ بوتگیں اُرش ءِ زمہ واری منّ ایت – اُرش ءَ چینی انجئیراں ھوار یک سیکورٹی افسرے مُرتگ ءُ یک سیکورٹی گارڈے سک زدگ بوتگ –

جارکش ءَ گوشتگ کہ ایس آر اے چائینہ ءُ پنجاپی زورگیراں سرپد کنت کہ آ سندھ ءِ زِر ءُ زمین ءَ یل بہ دے اَنت ءُ بہ رو انت اگاں ناں آھانی سر ءَ اُرش برجاہ مان انت

آئی ءَ گوشتگ کہ ایس آر اے سندھو دیش ءِ آجوئی تاں جنگ ءُ جد ءُ جھد ءَ برجاہ داریت-

موتک : نمیرانیں بانک کریمہ ءِ نام ءَ

شائر : امجد بیکس

دی بلوچستان پوسٹ

ھر ارپ ارپ مُجرم اَنت
ھر لبز لبز مُجرم اَنت

کلمانی ارس ھونیگیں
کتابانی راز مجرم اَنت

چمّانی دید سُرومگیں
گوشانی گرانز مجرم اَنت

نویسکارانی رِد پدمنتگیں
مُلایانی واز مجرم اَنت

توارانی برمش شیشالیں
گوشداروکانی ناز مجرم اَنت

ارواہ ءِ نپس توستگیں
دلانی برانز مجرم اَنت

دپانی تران تپتگیں
پونزے گرانز مجرم اَنت

کشکانی چیدگ سارتگیں
راھانی مواز مجرم اَنت

دگانی کبرستان کراریں
کبرانی فراز مجرم اَنت

جھان ءِ گوش سرآمدیں
زر ءِ پھاز مجرم اَنت

جیڑگانی مجگ پھمتگیں
ترانگانی ترانز مجرم اَنت

وابانی منزل پادمالیں
مُساپرانی ساز مجرم اَنت

ھال ءِ شنگ انت ھر گور ءَ
شگزانی گواز مجرم اَنت

بی کے بلوچستان ءِ نکشیں
کورانی داز مجرم اَنت

شیرین ءِ کبر پُرسیگیں
کُران ءِ جُز مجرم اَنت

کریمہ ءِ پکر نمیرانیں
سامراج ءِ نراز مجرم اَنت

کریمہ ءِ کرد شھمیریں
گالانی مگز مجرم اَنت

ماتانی سروگ کریمہ ئیں
گواتانی گز مجرم اَنت

جھاں ءِ زبان گونگیں
بلوچانی گرّز مجرم اَنت

بیکس ءِ دل سوزمانیں
شھیدانی کاز مجرم اَنت

ندر پہ شھید بانک کریمہ بلوچ ءِ نام ءَ

لچہ: اُمیتانی مُھکمیں باسک

شائر: شیردل بلوچ

دی بلوچستان پوسٹ

گم ءِ کوھے باتن ءَ رُستگ
دردانی پاھارے دل ءَ چست بوت
بانُک تئی جتائی ءِ گمے گرانیں
دل ءَ را سھڑگ ءَ نیل ایت
پگر ءُ ھیالانی تہ ءَ گون ئے
پراموش کنگ نہ بہ ئے ھچبر
تئی نام ءَ گراں وھدے
تُساں بؤد کناں سد بر ….
کجا شُت ئے راج ءِ لاڈوکیں دُتُّک
پگر ءُ لیکہ ءِ سرجمیں چیدگ
اُمیتانی اِت ئے مُکھمیں باسک
تئی راج ھزار رنج ءِ باھوٹ بوت
جگر بریں گم نہ باں ایرموش
مارا شومی چہ بُنزہ ءَ گون اِنت
ما رھشونے ءُ سر ءَ چٹ ایں
نواب ھیربکش مری اَت آجوئی ءِ راھدبر
گلام مھمد ءِ وڑیں بے درور
کُجا…رپتگ مَل مڑیں بالاچ
کجا… رپتگ جنرلیں اسلم
زاھد ءُ زاکر جان ءِ کسہ نہ بیت آرگ
اُمیتانی تو ئے مُھکمیں باسک
ھَمک چَمّ ارسیگ ءُ دل زدگ
راج سرجم ءَ پرسیگ بوتگ ـ

کریمہ بلوچ ھم شُت

ٹی بی پی شونگال

کریمہ بلوچ ءِ نام ءِ گچین جنزوکیں بلوچ زرمبش ءِ تہءَ ھما مزن بالادیں کردانی تہ ءَ بیت، کہ آیاں اے زرمبش ءَ یک دروشمیں بخشاتگ۔ بلوچستان ءَ جنزوکیں “ آجوئی ءِ زرمبش” ءِ تہءَ آئی ءِ مزنیں کارستی ءِ ھستی ناں تھنا بلوچ راجی جھدکاراں بلکیں سرجمیں دمگ ءَ مار اِتگ۔

کریمہ بلوچ ءَ وتی سیاسی سپر ءِ بندات کسان سالی ءَ چہ بلوچ وانندہ گل بی ایس او ءَ کُتگ۔ آئی ءَ وتی بودیشتانی، مھکمیں ھاٹیگ ءُ سسّائیں کارستے ءِ سوب ءَ گل ءِ پدانکانی سر ءَ ترندی ءَ گوں برز ءَ روان اَت ءُ جتائیں اگدھانی سر ءَ پرارزشتیں زمہ واری پیلو کنگ ءَ بیتگ۔ آ اولی رند ءَ 2006 ءَ بلوچ اسٹوڈنٹس آرگنائزیشن ءِ بنجاھی پتر ءِ باسک ھما وھد ءَ جوڑ بیت وھدے بی ایس او ءِ سئیں بھراں مزنیں وھدے ءَ پد ھواری ءِ جار جتگ اَت۔ سال 2008 ءَ آ بی ایس او آزاد ءِ بنجاھی کسان کمک کارمستر (چئیرپرسن) گچین بیتگ اَت۔ کریمہ بلوچ ءَ گل ءِ مھکم کنگ ءُ ھاسیں پئیماں زالبولاں سیاست ءِ تہ ءَ آرگ ءَ مزنیں کرد ءِ پیلو کُتگ۔ سال 2012 بانک بی ایس او آزاد مزن کمک کارمستر (چئیرپرسن) گچین کنگ بیت۔

14 مارچ 2014 ءَ بی ایس او آزاد ءِ چئیرمین زاھد بلوچ ءِ زورانسری بیگواھی ءَ پد بانک ءَ گل ءِ چئیرپرسن ءِ دروشم ءَ زمہ واری وتی کوپگ ءَ زُرت اَنت ءُ ترندیں ءُ نگیگیں جاورانی تہ ءَ زاھد بلوچ ءِ یل کنگ ءِ ھاتر ءَ زرمبش ءِ بندات کُت ۔ آئی ءَ پد سال 2015 ءَ گل ءِ بیستمی کونسل سیشن ءَ کریمہ بلوچ دلجمیں وڑے ءَ چئیرپرسن گچین کنگ بوت۔ بانک بی ایس او ءِ ھپتاد سالی راجدپتر ءِ تہ ءَ گچین بیوکیں اولی زالبولیں چئیرپرسن اَت۔

کریمہ بلوچ نہ تھنا بلوچ وانندہ گل ءِ ھپت دھکی دپتر ءِ تہ ءَ اولی چئیرپرسن بیتگ بلکیں بانک جنزوکیں زرمبش ءَ بلوچ زالبولانی تہ ءَ سیاسی سنچ ودی کنوکیں کارستی دروشما ھم زانگ بیت۔ آئی ءَ کوھنیں دود پروشتگ اَنت یک ٹکی چاگردے تہ ءَ جنین آدم چہ لوگاں کَش اتگ ءُ دگانی سر ءَ زھرشانی کنگ ءِ ھاتر ءَ کشگ ءَ سوبمند بیتگ۔ آئی ءِ رھشونی بودیشتاں بلوچ چاگرد ھاسیں پئیم ءَ بلوچ جنینانی تہ ءَ بدلی آرتگ، چہ آئی ءِ سان گپتگ بازیں بلوچ زالبول سیاست ءِ بھر جوڑ بیتگ اَنت، ھمے سوب اِنت مروچی کساس درستیں بلوچ سیاسی گلانی رھشونانی تہ ءَ زالبول ھوار اَنت۔

سال 2016 ءَ نامی ئیں برتانیہ ءِ رسانکدری گل بی بی سی ءَ کریمہ بلوچ ءِ نام “جھان ءِ سد گچین کرتگیں زالبولانی” لڑ ءَ ھوار کُتگ اَت۔

وتی سیاسی کارانی سوب ءَ کریمہ بلوچ مدام “استانی گلانی” نیمگ ءَ بیھار ءُ بھتامانی آماچ اَت – آئی ءِ سر ءَ بازیں دروگیں (کیس) ھم جوڑ کنگ بیتگ۔ آئی ءِ ناکو ماسٹر نور مھمد بیگواہ کنگ بیتگ ءُ پد ءَ آئی ءِ جون دور دیگ بیتگ اَت، ھمے پئیم آئی ءِ ناکو زتک کریم جان ھم زورانسری بیگوائی ءِ آماچ کنگ ءَ پد ژانگولیں جون دور دیگ بیتگ اَت۔ آئی ءِ سر ءَ سیاست ءَ چہ یک کِر بیگ ءِ ھاتر ءَ زور پر دیگ بیتگ، آئی ءِ لوگ ءِ سر ءَ بازیں اُرش کنگ بیتگ اَنت۔ ھمے سوب ءَ آ کینیڈا ءَ شتگ ءُ وتی سیاسی جھد ھمود ءَ برجاہ داشتگ اَنت اِش ءُ ھوار ھوار ٹورنٹو مزن شھدربرجاہ ءَ اکنامکس وانگ ءَ بیتگ۔ بانک داں 2018 ءَ بی ایس او آزاد ءِ چئیرپرسن اَت ءُ پد ءَ جتائیں جھانی پترانی سر ءَ بلوچ جیڑہ ءَ چِست کنگ ءَ بیتگ، داں ھما وھد ءَ کہ 21 دسمبر 2020 آئی جون ٹورنٹو شھر ءَ دزکپتگ۔

37 سالی کریمہ بلوچ چہ 20 دسمبر ءَ بیگواہ اَت، ءُ پولیس ءَ آئی ءِ درگیجگ ءِ ھاتر ءَ جھد کنگ ءَ اَت، ھمے درگت ءَ ٹورنٹو پولیس ءَ آئی ءِ پوشیتگیں گُدانی سرپدی ءُ عکس شنگ کتگ اَت ءُ چہ لس مھلوک ءَ کمک ءِ ھم دزبندی کُتگ اَت، بلے ایندگہ روچ ءَ آئی کھول ءَ اے ھال راست کُتگ کہ کریمہ بلوچ ءِ جون چہ ٹورنٹو ءَ دزکپتگ، دومی نیمگ ءَ ٹورنٹو پولیس اے درگت ءَ پَٹ ءُ پول کنگ ءَ اِنت ءُ گیشتریں اھوال انگت پدر نہ بیتگ اَنت۔

گمانی جاورانی تہ ءَ آئی ءِ اناگتی مرگ ءَ بلوچستان ءَ ڈن زندگوازینوکیں باھوٹی بلوچانی پھازگ ءِ درگت ءَ مزنیں جُست چِست کتگ اَنت۔ بلوچ باھوٹی مدام درملکاں نشانگ جوڑ بیتگ اَنت، افغانستان ءُ ایران ءَ بلوچ پناہ گیر نشانگ کنگ ءِ بازیں وئیل دیم ءَ اتکگ اَنت ۔ نی باھوٹی زرتگیں بلوچ یورپ ءُ کینیڈا ءَ ھم نشانگ کنگ بیگ ءَ اَنت۔ کریمہ بلوچ ءِ بیگواھی ءِ روچ ءَ افغانستان ءِ شھر کندھار ءَ بلوچانی بگٹی ٹَک ءَ گوں سیادی داروکیں دو باھوٹی تیر گواری سوب ءَ کُشگ بیتگ اَنت۔

ھمے سال ءَ مارچ ءِ ماہ ءَ سویڈن ءَ یک باھوٹی بلوچ اھوالکارے ساجد حسین بیگواھی بیتگ اَت۔ رند ءَ آئی ءِ جون ھم اپسالہ شھر ءِ یک کورے ءِ کش ءَ دزکپتگ اَت۔ آئی ءِ کھول ءُ سنگتان اے گوشتگ اَت کہ آ کُشگ بیتگ ءُ اھوالکارانی جھانی گل “رپورٹرز ود آوٹ بارڈرز” ءَ آئی بیگواھی ءُ کوش ءِ بھتام پاکستانی چیریں گلانی سر ءَ جتگ اَت۔

بلوچ سیاسی گلانی ٹاہ اِنت کہ باھوٹیانی اگبالانی ھاتر ءَ کارکنوکیں میان اُستمانی گل بلوچ باھوٹیانی رکینگ ءَ بے سوب بیتگ اَنت۔ آیاں جھانی گلاں چہ دزبندی کُتگ کہ آ اے نگیگیں جاورانی درگت ءَ گامگیج بہ زیر اَنت ءُ بلوچ باھوٹیانی پھازگ ءَ دلیکم بہ کن اَنت۔

میان اُستمان ھاسیں پئیم ءَ روکپتی ڈیھاں کہ اود ءَ بلوچ سیاسی جھدکار باھوٹی اَنت، آیانی ھمے زمہ واری جوڑ بیت کہ آ باھوٹیانی پھازگ ءَ دلجمی بہ کن اَنت۔ سیاسی باھوٹی دیگ ءِ بزانت تھنا ملک ءَ جاہ دیگ ءَ گیشتر بہ بیت۔ اگاں اے پرکاریں کوشانی تہ ءَ دست ھوار بیگ ءِ منانک دز کپیت گُڑا اے ملکاں میان اُستمانی تک ءَ سک ترندیں گام زیرگ لوٹ ایت۔

کریمہ بلوچ گار ءُ بیگواھیں مردمانی توار ءِ بوتگ، پمے ھاتر ءَ آ بے توار کنگ بوتگ – ماما قدیر بلوچ

دی بلوچستان پوسٹ

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ زھرشانی بنجل برجاہ، مروچی زھرشانی بنجل ءَ چار ھزار ءُ یک سد ءُ شست ءُ ھشت روچ سرجم، چاگردی مردماں بنجل ءِ ترءُ تاب کرتگ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ زھرشانی بنجل ءَ وتی ھیال درشان کُتگ گوشتگ کہ کریمہ بلوچ ھمے ھاتر ءَ کُشگ بوتگ کہ آئی ءَ زورانسری آوار جنی ءُ بلوچستان ءَ انسانی ھکانی لگتمالی ءِ بگیری ءَ میان اُستمانی درچ ءَ توار چست کتگ –

ماما قدیر بلوچ ءِ گوشگ ات کہ کریمہ بلوچ بیگواھیں مردمانی ھاتر ءَ توارے بوتگ کہ کُشگ ءُ بے توار کنگ بوتگ بلے ھما راج کہ زوراکی ءِ بگیری ءَ لوگاں چہ در کپ انت آ زان انت کہ اے راہ ءَ ھر گام ءِ سر ءَ مرگ آھاں وش اتک کنت –

آئی ءِ گوشگ ات کہ مروچی دنیا پاکستان ءِ کمک کنگ ءَ بلوچ چکچینی ءِ بھرے جوڑ بوگ انت بلے ما وتی پرایمنیں جد ءُ جھد ءُ دیمونیاں چہ یک روچ ءِ دنیا ءَ باور کنائینیں ءُ بیگواھیں مردماں چہ زنداناں کش ایں –

دی بلوچستان پوسٹ

جون پانزدہ روچ پیسریگینے ، راھگوزیانی گوشگ ءِ پد ءَ دمگی لیویز ءَ جون دست گپتگ –

سربیتگیں ھالانی رِد ءَ بلوچستان ءِ دمگ نوشکی احمد وال ءَ یک لوگے ءَ مردمے ءِ زانگولیں جونے دست کپتگ – جون ءِ پجار امان اللہ محمد حسنی ءِ نام ءَ چہ بوتگ –

لیویز بنشون ءِ رِد ءَ رھگوزی ءِ لوگ ءِ نزیک ءَ گوزگ ءَ بوتگ آئی ءَ جون ءِ بو بوتگ آئی ءَ دمگی لیویز ءَ ھال کُتگ، لیویز ءِ کارمستر محمد خان مینگل ءَ گوں دگہ کارمندانی ھمراھی ءَ شُتگ جون دست گپتگ –

بنشون ءِ گوشگ انت کہ جون ءَ کساس پانزدہ روچ بیت پمے ھاتر ءَ آ سڑتگ، وئیل درگت ءَ گیشیں پٹ ءُ پول برجاہ انت ـ جون کھول ءِ مردمانی ھوالہ کنگ بوتگ –

کریمہ بلوچ ءِ بیرانی ءَ سرجمیں بلوچستان پرسیگ ءُ چاگردی رسانکجاھاں بلوچ مھلوک ءَ ھوار جتا جتائیں ڈیھاں بندوکیں مردم پدردی درشان کنگ ءَ اَنت –

دی بلوچستان پوسٹ

کریمہ بلوچ وانندہ گل آزاد ءِ گوستگیں چیرپرسن ءُ بلوچ نیشنل مومنٹ ءِ باسک بیتگ ءُ گوستگیں یکشمبے ءَ بیگواھی ءَ پد دوشیگیں شپ ءَ آئی ءِ جون کینیڈا ءِ شھر ٹورنٹو ءَ دزکپتگ –

کریمہ بلوچ ءِ بیرانی ءَ بلوچستان ءَ بندوکیں جتا جتائیں پاٹیاں آئی ءِ بیرانی ءَ پدردی درشان اِتگ ءُ چِل روچ ءَ پرس دارگ ءِ جار جتگ –

بلوچستان ءِ آجوئی ءِ واستا راجداری جد ءُ جھد کنوکیں گل بلوچ نیشنل مومنٹ ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ کینیڈا ءَ درانڈیھی زند گوازینوکیں بی این ایم ءِ رھشون ءُ بی ایس او آزاد ءِ گوستگیں چیئرپرسن بانک کریمہ بلوچ ءِ شھیدی بلوچ راج ءُ راجی جنز ءِ واستا ءَ مزنیں تاوانے ءُ بانک کریمہ ءِ مرگ ءَ ما یک شریں ءُ زانتکاریں رھشون ءُ راجی چیدگے ءَ زبھر بیتگیں ءُ اے جوانیں سر ءِ کمی ءَ کرناں پرکُرت نہ کن ایں –

جارکش ءَ گوشت کہ بانک کریمہ بلوچ یک روچے ءَ بیگواہ بیگ ءَ پد مروچی آئی ءِ جون کینیڈا ٹورنٹو ءِ پولیس ءَ دزکپتگ ءُ بلوچ نیشنل مومنٹ وتی رھشون ءُ بی ایس او آزاد ءِ گوستگیں چیئرپرسن ءُ راجی رھشون بانک کریمہ بلوچ ءِ اناگتی مرگ ءَ چِل روچ ءَ پرس ءِ پتر داریت ءُ دراھیں ھنکیناں اے کڈنی ءَ کنت داں چِل روچ ءَ دراھیں پرکاریاں یلہ بہ کن اَنت پرس بہ دار اَنت –

جارکش ءَ گْوشت کہ کریمہ بلوچ نا ایوک ءَ پاٹی ءِ رھشون ءُ بی ایس او ءِ گوستگیں چیئرپرسن بیتگ بلکیں بلوچ وانندہ گل ءِ راجدپتر ءَ اولی زالبول چیئرپرسن بیتگ ءُ آئی ءَ ھما وھد ءَ بی ایس او ءِ کمان داشتگ وھدیکہ پاکستانی زوراکی گیش بیان بیتگ اَنت – گل ءِ وائس چیئرمین، چیئرمین، انفارمیشن سیکریٹری ءُ بنجاھی پتر ءِ دگہ باسک مھتریانی دست ءَ بیگواہ کنگ بیتگ اَنت – بلے بلوچ ءِ شیرزالیں رھشون ءَ جوانیں گامگیجانی زورگ ءَ گل دیم ءَ بران کرتگ ءُ بلوچ راجی جنز ءَ زالبولانی ھوار گیجگ ءَ مزنیں کرد آئی ءَ پیلو کرتگ –

ھمے وڑ ءَ بی ایس او آزاد ءَ وتی درشان ءِ تہ ءَ ھم چِل روچ ءَ پرس دارگ ءِ جار جتگ ءُ گْوشتگ گوستگیں چیئرپرسن کریمہ ٹورنٹو کینیڈا ءَ کُشگ میان اُستمانی ادارھانی دیم ءَ شھماتے-

آئی ءَ گْوشت کہ بلوچستان ءَ ریاست ءِ زوراکیاں درانڈیھی ءِ زند ءِ گوازینگ ءَ لاچاریں بلوچ سیاسی باسک یورپ ءَ ھوار کجا ھم ڈیھہ ءَمھکم نہ اَنت ءُ انسانیت ءُ انسانی ھکانی ٹاہ دیوکیں ادارہ بلوچ باسکانی کُشت ءُ کوش ءِ بگیری ءَ بے تواری ءُ چمبستگی ءِ مزنیں ادارھانی کار ءُ کسب ءِ سر ءَ ابکھی یے –

جارکش ءَ گوشت شھید بانک کریمہ بلوچ دوھزار ءُ پانزدہ ءَ گل ءِ سروک نامینگ بیتگ ءُ گل ءِ شور ءُ سِلاہ ءَ پد بلوچستان ءَ ریاستی زُلم ءُ زوراکیاں میان اُستمانی ادارھاں سرکنگ ءَ کینیڈا ءَ درانڈیھی ءَ شتگ، شھید چیئرپرسن کریمہ بلوچ ءَ بلوچستان ءَ برجاھیں ریاستی زُلم ءُ زوراکی میان اُستمان ءُ دگہ ادارھانی گور ءَ جوانیں کرد پیلو کنگ ءَ بیتگ –

جارکش ءَ گوشت کہ بانک کریمہ بے بھائیں جد ءُ جھد ءِ برکت ءَ گل مروچی مھکم ءُ مھکمیں جاھے ءَ اوشتیت ءُ بلوچ راجی جد ءُ جھد ءِ رھشونی ءَ کنگ ءَ اِنت –

ھمے وڑ ءَ بلوچ اسٹوڈنس ایکشن کمیٹی ءِ بنجاھی جارکش ءَ وتی شنگ کرتگیں درشان ءِ تہ ءَ بانک کریمہ بلوچ ءِ بلوچ نودربر راجداری ءَ آئی ءِ دیمونی ءُ بلوچ زالبولانی واستا جد ءُ جھد ءَ چیدگ بیگ ءَ ستاشانی پیش کرتگ ءُ گوشتگ کہ مروچی سرجمیں روچ پرسیگ اِنت ءُ بلوچ راج یک زانتکار ءُ نہ ترسیں سیاسی رھشونے ءَ زبھر بیتگ –

آئی ءَ گْوشت کہ بانک کریمہ بلوچ ءِ شیرزالی ءُ نہ ترسیں کردانی تیز کنان ءَ بلوچ نودربر گل ھما وھد ءَ آئی ءَ رکینتگ کہ بلوچستان ءِ ھمک نیمگ ءَ بلوچ نودربر رھشون ءُ باسکانی زُلم ءُ زوراکی سر ءَ مِک بیتگ اَنت –

ھمے وڑ ءَ نیشنل ڈیموکریٹک پاٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ سیاسی باسک بانک کریمہ ءِ شھیدی پہ بلوچ راج ءَ مزنیں تاوان ءُ نااوپاری یے –

بانک کریمہ بلوچ ساہ ءِ رکینگ ءَ بلوچستان ءَ درکپتگ ءُ کینیڈا ءَ شتگ بلے اود ءَ ھم آئی ءِ ساہ رکینگ نہ بیتگ –

درشان ءِ تہ ءَ گوشگ بیتگ کہ این ڈی پی سدکی ءَ ایشی ءَ گْوش ایت کہ بانک کریمہ ءِ شھیدی یک پندلے ءِ رنگ ءَ کنگ بیتگ شھیدی ءِ یک روچے ءَ پیسر بیگواہ بیگ اے گپ ءِ منانک ءَ دنت کہ آ کینیڈا ءَ ھماھانی مردماں آوار جتگ کہ ھمایانی سوب ءَ آئی ءَ بلوچستان یلہ کرتگ ءُ کینیڈا ءَ شتگ –

زانگ بہ بیت کریمہ بلوچ یکشمبے ءَ کینیڈا ءِ شھر ٹورنٹو ءَ بیگواہ بیتگ ءُ گوستگیں شپ ءَ آئی ءِ جون پولیس ءَ دزکپتگ ءُ کھول ءِ گور ءَ پجار کنگ ءَ پد آئی ءِ بیرانی ءِ ھال چاگردی رسانکجاھاں شنگ کنگ بیتگ ءُ نیم ادارے تہ ءَ چاگردی رسانکجاہ ٹوئیٹر ءَ اے گپ جھان ءَ برزتر بیتگ ءُ مروچی ھم انگت ءَ ھما ھساب ءَ آئی ءِ بیرانی ءِ سر ءَ زھردرشان بیگ ءُ کشندھانی پٹ ءُ پول کنگ ءِ لوٹ بیگ ءَ اِنت –