TBP Balochi

شال ءَ کرنٹ لگگ ءُ گیس ءِ لیک بوگے سوب ءَ دو براتاں ھوار سَے مردم بیران-

دی بلوچستان پوسٹ

سربوتگیں ھالانی رِد ءَ بلوچستان ءِ بنجاھی شھر شال ءَ اغبرگ ءَ بجلی کرنٹ گرگے سوب ءَ یک مردمے بیران بوتگ، بیران بوتگیں مردم ءِ پجار چہ محمد دین ءِ نام ءَ بوتگ –

دمگی پولیس ءَ جون دست گپتگ ءُ دمگی نادراہ جاہ ءَ بُرتگ – ھژدری چار ءُ ٹپاس ءَ پد جون کھول ءِ ھوالہ کنگ بوتگ –

ھمے وڑ شال ءَ کوچہ شیر محمد ءَ لوگے ءِ تہ ء گیس ءِ لیک بوگے سوب ءَ دو برات دمتوس بوتگ ءُ بیران بوتگ انت – دؤئیں براتانی پجار اشفاق احمد ءُ مشتاق احمد ءِ نام ءَ زانگ بوتگ انت –

ریسکو بنشون ءِ رِد ءَ دؤئیں برات پنجاپ ءِ دمگ احمد پور شرقیہ ءِ جھمنند انت – کہ پہ روزگار ءِ ھاتر ءَ شال ءَ اتکگ بوتگ انت –

پولیس ءَ دوئیں مردمانی لاش دست گپتگ ءُ دمگی نادراہ جاہ ءَ بُرتگ انت ھژدری چار ءُ ٹپاس ءَ پد آھانی جون وتی بنکی ھنکین ءَ دیم دیگ بیتگ انت –

نبشتانک: جنگانی کسہ نوک بیتگ اَنت

نبشتہ کار: شیردل بلوچ

دی بلوچستان پوسٹ

آدم ھکانی ءِ شَیرے

“ڈنگ نوں پانگ اَنت راھانی
گُرک نوں شوانگ اَنت میشانی”

“زالم لیڈر اَنت راجانی
زوراک نوں کن اَنت دیمپانی”

اے ھبر راستے کہ بلوچ راج گوں گرانیں جارواں دُچار کپتگ انت ءُ دری راجاں چوں مور ءِ وڑ ءَ مانرِِتکگ اَنت، بلوچ ءِ سرڈگار ءَ بزان کہ پِت ءُ پیروکی ھنکیں ءَ را پہ بلوچاں ھچ لیکیگ ءَ نہ اَنت ءُ بلوچ سر زمین ءِ مڈیاں گوں بے دردی ءَ کَشگ ءُ برَگ ءَ اَنت، نہ کوہ ءُ کَھچراں اِلگ ءَ انت ءُ نیکہ نیلیں زِر ءَ پہ بلوچاں پشگیجگ ءَ اَنت، ھر روچ ماں چار راھانی سر ءَ بلوچ ، مات ءُ گُھار، ورنا ءُ کماشانی بے ازتی ماں جند ءِ ڈیھ ءَ بزاں دَری راجانی دست ءَ بوگ ءَ اِنت۔

مبارک کازی گوش ایت ـ

“اتکگاں گرانیں نوبت ءُ جنگانی بھار
دیم پہ مات کوھاں رپتگ اَنت ملیں سرمچار “

مرچی مارا پد ءَ یکرندے اھدی جنگانی نوبتاں گیپتگ ءُ مئے راج ءِ ھمک مات، گُھار، ورنا ءُ کماش اِستانی لشکر ءَ مئے جند ءِ سرڈگارے سر ءَ اتکگ ءُ مارا در پہ در ءُ بزّگ اِش کرتگ ، نیکہ پہ ما مال ءُ دلوت اشتگ اش نیکہ لوگ ءُ جاہ ءُ نہ پہ ما گران بھائیں مڈی۔! مدام لشکری کاینت ءُ مئے لوگاں پتر انت ءُ گران نیادیں مڈیاں گوں وت بر اَنت ءُ دومی نیمگ ءَ مئے ھزاراں جَنین آدم ءُ رونا ءُ کماش اش چست کرتگ ءُ وتی کھریں زنداناں بندیگ ءُ بیگواہ اِش کرتگ اَنت، وھدیکہ دوھزار نھ ءِ کرّہ ءِ ماہ ءِ سے تاریک ءَ راجی رھشون چیرمین” گلام مھمد، لالا منیر ءُ شیرمھمد بلوچ چہ تربت ءِ شھر ءِ تہ ءَ چہ کچلکول الی ایڈوکیٹ کارگس ءِ تہ ءَ اِستان ءِ لشکر ءُ دُزیں کارمنداں چست کرت انت ءُ نو کرّہ ءَ رھشونانی کنٹ اِش مرگاپ ءَ وھدے دَور دات انت ءُ گڑا چد ءُ پد بلوچ راجی پسگانی بیگواہ کنگ ءُ کُنٹانی دَور دیگ اِش ھر نیمگ ءَ بندات کُت ءُ ھر روچ کنٹ ماں کوہ ءُ گیاباناں دَور دیگ ءِ در اش پچ کرت۔

ھمے جنگ ءَ بلوچ مات ءُ گھارانی اھدی داستاں نوک کرت اَنت ءُ بلوچ ءِ ھمَک گُھار بانڑی ءِ وڑ ءَ گوں براتاں ھم رد ءَ اُوشتات اَنت، ءُ ھر روچ میر کمبر ءِ مکھیں مات بی بی سُلتان ھاتوں ءِ کسہ نوک بوگ ءَ اِنت ءُ راجی کنگر ءُ بچّانی شھید بوگ ءَ ھچ مات ءُ گُھار بژینگ ءَ نہ اَنت، بلکیں گُڈی کلوہ پہ راج ءِ نام ءَ دیم دیگ ءَ اَنت، ماسانی کلوہ پہ راجی آجوئی ءِ واستا ءُ راجی جُنز ءِ ھاتر ءَ سیت مند ءُ ایندگہ سرمچنڈاں پہ یک کشکے نشان دیگ ءُ پہ زندگیں راجے گویاگ ءُ ھاٹیگ دیگ ءَ ـساپ ءُ پلگاریں تران انت۔

شیرزالیں مات ءُ گُھارانی راجی جزبگ سرمچار ءُ شھیدانی ماتانی بھادری ءِ کرد انچو گیش دیم ءَ اتکگ اَنت، اگاں شیرزالانی نام گرگ ءَ بندات بہ کناں سک ٹوھیں کارے بیت ءُ گاگد پُر بنت ءُ ندانی سیائی ھلاس بنت ءُ نبیسوک دمبر اَنت شیرزالانی نام ھلاس نہ بنت ـ
جنگانی گرانیں نوبت اتکگاں گڑا ماتاں وتی بچّاں دست بڈَّ ءَ جتگ ءُ لج ءُ ننگ ءِ پھازگ پہ راہ داتگ اَنت ءُ شیرزالیں ماتانی اھدی کسہ بہ بنت یا انیگیں کسہ چوں ریھان جان ءِ مات ئیگ ءَ کہ بیرک ءَ ماں سر ئِے بند اِت ءُ پہ بلوچ ءَ ندر کنگ ءَ دیم ئِے دنت۔بلوچ مات گیدی ءَ پہ وت ءَ نوکیں کسہ نبیس انت ءُ راجی ابدمانی ءِ جار ءَ گوں جوانی ءَ جن اَنت۔

من وتی نابزانتی ءَ گوں میرکمبر ءِ مکھیں مات بی بی سُلتان ھاتوں ءِ گپتاراں دیم ءَ آرگ لوٹاں-

میراس ءَ پکیرشاد ” ھیال ءِ گالرد زُرتگ انت ـ

تاکدیم.147
میر کمبر ـ
سردار مھراب لنگ، گوں بھرام، مزار ءُ اللہ یار ءِ ھمرائی ءَ لشکر چہ وتی دَمگ ءَ سراوان در کیت ءُ پہ مالیات ءِ گرگ ءَ مالداریں بلوچانی ھلکاں دیم پہ دزگ ءِ دمگ ءَ روت ءُ مردماں مالیات گیپت، چہ اد ءَ در کیت دیم پہ بنت ءُ دھان ءَ.ماں پکیرداد ءِ ھلک ءَ روت کہ اود ءَ مردم آئی ءَ را مالیات نہ دئینت کہ چہ اشی ءَآ اود ءَ مردماں جنت ءُ کُشیت ءُ بازینے گیپت ءُ بندیگ کنت، چہ ھمے بندیگاں یک جنین آدمے بیت کہ دراھیں مردم کشگ بنت-

بَلے! آ چہ مھراب ءِ بندیگ جاہ ءَ لک ایت ءُ وتی ساہ بارت بنت ءِ بازار ءَ اود ءَ میر کمبر ءِ گور ءَ دزبندی کنت ءُ کمک لوٹ ایت “میرکمبر “بنت ءِ سردار بیت، آئی دزبندی ءَ گوشداریت ءُ گوش ایت کہ من ھرپیم کناں تئی اے بندیگ ءَ پد ءَ واتر کناں ءُ آجو ئِے کناں۔

سدآپرین بات کمبر ءِ مات بی بی سُلتان ھاتوں تئی دل ءَ کہ دست ء وت وتی ساہ ء کپ ءَ ءُ ارواہ ءِ بندوک ءَ گوں وتی دستاں زھم ءُ اسپر ءَ ماں کمبر ءِ کوپگ ءَ دنت ءُ پہ جنگ ءُ میڑ ءَ راہ ئِے دنت ،کہ تو برو جنگ بہ کن کہ چہ ایشی ءَ تئی مات، پت ءُ پیروک دوستین) ءِ نام وژنام بیت ،من اے نہ ترساں ءُ تو کھت ءُ بژنیگ بہ ئے ءُ تو جنگ ءَ مرئے ، من ھمے گپ ءَ کھتیگ ءُ ارمانیگ باں وھدے تو واتر کن ئے ءُ گوں بندیگاں میا ئے پرچا کہ من پہ تو لُنجیں شپاں پاس جَتگ ءُ شاگیں گوانزگ جنڈینتگ ءُ لولی پہ ھمے روچانی واستا جتگ ءُ وداریگ پہ ھمے روچانی واستا بیتگ آں کہ تو مزن بہ ئے ءُ زھم جن ءُ بھادرے بہ ئے نام دَرکار ئے۔

گڑا آ روچ مرچی اَنت، برو زھم ءَ بجن ءُ نام ءَ دَر آر ءُ بندیگاں پد ءَ واتر کن ءُگوں وت ھمراہ اش بیار ، تو اگاں جنگ ءَ مرئے من اد ءَ نہ ننداں ءُ موتک نیاراں ءُ پرس ءِ پتر ءَ پچ نہ کناں، بلکیں من تئی موتک ءِ بدل سروز ءُ ساز کناں، ھالو ھالو ءُ نازینک جناں، ءُ پہ چاپ ءُ ناچ ترا ماں کبر ءَ بَراں، من ءَ کول اِنت کہ تئی مٹ ءَ پد ءَ پیداک کناں، اگاں تئی بندیگ بیا اَنت ءُ تو چہ شروک بیردپیں زھمانی الماسیں زھاں ماں جنگ ءِ ساھت ءَ بہ تچ ئے ءُ بیا ئے ، گڑا من گندالانی توک ءَ وتی موت ءَ بہ مر آں ءُ گڑا ترا منی شیر ھپتاد ءُ ھپت بر ءَ ھرام بات ،بزان کہ تو ھچے نہ بوت ئے ـءُ چو کُل ءِ پیم ءَ پیداک بیتگ ئے۔

میرکمبر پسو دنت ءُگوش ایت۔

“ماتی منی مات مکھیں
ھکاں پھل کن من روان
من پہ مراد سر گپیتگاں
ھاجی کہ ھج ءَ رو اَنت
من انچو پہ مھراب ءَ زر اَنت “

مات ءَ جواب گردینتگ اَت!

بچی منی چَمّ ءِ چراگ
کمبر منی زرد ءِ مراد
من آستگ سُھیل دیمپاں
بند پہ ھمے روچاں چت ءَ
منی بچ ءُ سُھیلیگی مہ گپیت
زھم ءَ جن ءُ نام ءَ درآر
نام مسترانی نوک بہ بنت
کبر پیروک ِ ہمبوہ بیت
اگاں تو گندل ءِ توک ءَ مرئے
منی زرد ءَ جپا ھچ نہ بیت
بزان زھریں کَرگ آپ داتگ اَنت
بے موسم ءَ پاد اتکگ انت
نیست ئِے بزان ئِے لزّتے ـ

مات ءَ پسو دراج کش دات ءُ انچش ماں باز گوشگ ءَ کہ کمبر پہ بندیگاں جان بہ دے بلے واتر مہ بو ءُ بندیگاں گوں ھمراہ کن ءُ بیار گوں۔
اے کمبر ءِ مات انت پہ راج دپتر ءَ کسہ نکش ئِے کتگ بلے راجی آجوئی ءِ جنگ ءَ ہر ماتانی دل ءَ یک تشکے اوپارگ ھم در نئیت ءُ وتی بچاں پہ ڈیھ ندر کنگ ءَ ساڑی انت ءُ مرچی ھمَک مات ءُ گُھارانی راجی ِآجوئی ءِ پڑ ءَ انچیں کرد دیم ءَ آیگ ءَ اَنت پہ راجی جھد ءَ گیشتر سیت مند ھست اَنت ءُ انچش چہ شھید ڈاکٹر ھالد جان مات ءِ تران ءُ ھبر ھما روچ ءَ کہ ڈاکٹر شھید بیت مات اتی چک ءِ شھادت ءِ سر ءَ پھر بند ایت ءُ پاکستانی لشکر ءَ دیم پہ دیم ءَ گوش ایت”تو چنچو ھالد شھید کن ئے یک ھالدے ایش انت منی بڈ ءَ انت باند ءَ رُد ایت ءُ تئی دیم ءَ گوں بمب ءُ ٹوپاں میلانک بیت ما ھالد ءِ پیداک کنگ ءَ ھچ چک ءُ پد نہ بہ ایں تو چینچو خالد شھید کن ئے”
گوں ھمے تراناں پاکستانی ھون واریں لشکر پشت ءَ پر کنت ءُ واتر وتی بنجل ءَ روت اے راج دپتر ءِ نوک کنگ پہ بلوچاں ھچ مزن نہ انت بلکیں ما ھر روچ پہ سرزمین ءَ بچ ندر کن ایں ءُ شھید اسھاک جان اُرپ رھمین بلوچ ءِ مات ءُ لوگ بانک کلوھانی گوشدارگ ءَ جان ء پُٹ پنژر انت ءُ ھمے سما بیت کہ مات پہ بچانی سالونک کنگ ءَ چوں کمبر ءِ مات ءَ انگت ساڑی انت۔

اما یاسمین ءَ شھید ریھان جان وڑیں زھگ ودی کتگ ءُ اے پیمیں مزن جگریں مات کہ دستانی وت وتی زھگ ءَ گوں بیرک ءَ پتایت ءُ پہ وتن کربان بوگ ءَ دیم دنت۔

سد آپرین انت بلوچ ماتاں کہ پہ آیوکیں وھد ءِ واستا وتی بچانی ندر کنگ ءَ چوں شیریں ماتاں ساڑی انت ءُ ما پھر بند ایں وتی ماتانی سر ءَ کہ چشیں بچ پیداک کن انت ءُ پہ راجی آجوئی ءِ واستا کربان اش کن انت ھمے پیمیں شیرزالانی ھمت ءَ سھریں دروت-

آجوئی ءِ جُنز زندگ بات ءُ بلوچ راج آجو بات
بلوچ راج مدام ھست بات ـ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

گوادر ءَ بلوچ یکجھتی کمیٹی ءِ نیمگ ءَ بلوچ اسٹوڈنٹس آرگنائزیشن آزاد ءِ گوستگیں چیئرپرسن کریمہ بلوچ ءِ ناھکیں کوش ءِ ھلاپ ءَ زھرشانی کنگ بیتگ –

زھرشانی ءِ روانک موسیٰ موڈ ءَ بندات بیتگ ءُ شھر ءِ دگاں تران ءُ شھدائے جیوانی چار راہ ءَ مُچے ءِ دروشم ءَ مُچ بیتگ –

زھرشانی ءَ سیاسی ءُ نودربر ءُ زالبول ءُ چکاں بازیں کچے ءَ بھر زرتگ ءُ آیانی دستاں کریمہ بلوچ ءِ اکس ءُ نبشتگیں تاکاں کریمہ بلوچ ءِ ناھکیں کوش ءِ ھلاپ ءَ نبشتگ بیتگ اَنت –

شھر ءِ دگانی سر ءَ زھرشانی ءَ ھواریں مردماں اوگام جنان ءَ شھدائے جیوانی چار راہ ءَ مُچ بیتگ ءُ کریمہ بلوچ ءِ یاد ءَ ڈیوا روک کنگ بیتگ اَنت –

زھرشانی ءَ ھواریں مردماں تران کنان ءَ گْوشت کہ کریمہ بلوچ ءِ کوش ءَ سرجمیں بلوچستان پرسیگ اِنت ءُ کریمہ بلوچ زالبولانی سیاست ءِ چیدگ بیتگ ءُ آئی ءِ دیمونی ستاشانی اَنت –

آیاں گوشت کہ دشمن ھمے سرپد بیر کریمہ بلوچ ءِ کُشگ ءَ بلوچانی دل ءَ کریمہ گار ءُ بیگواہ بیت بلے چریشی ءَ کریمہ بلوچ ءَ کس بلوچانی دلاں کش اِت نہ کنت ءُ مروچی کریمہ ءِ ناھکیں کوش ءِ ھلاپ ءَ ھمک بلوچ چست بیان ءُ توار پد جنگ ءَ اِنت –

آیاں گْوشت کہ اشی ءَ دلجم ءَ زان ایں کہ کریمہ بلوچ ءِ کشندہ کَے اَنت بلے اشی ءِ ھواری ءَ مارا دنیا ءِ سر ءَ باور کنائینگے اِنت کہ بلوچستان ءَ زُلم بیگ ءَ اِنت دنیا مئے زلمانی سر ءَ بے توار اِنت –

زھرشانی کنوکاں: گوشت کہ کریمہ بلوچ ءِ سر ءَ مارا پھر اِنت کہ آ بلوچ سیاست ءَ زالبولانی دیم ءَ آرگ ءُ زیردستانی توار بیتگ ءُ آئی ءَ ھمک تک ءَ وتی توار چِست کرتگ ءُ ھمے ھاتر ءَ مروچی کریمہ بلوچ سرجمیں بلوچستان ءِ توار اِنت –

ھمے وڑ ءَ بلوچستان ءِ دمگ سوراب ءَ ھم کریمہ بلوچ ءِ کوش ءِ بگیری ءَ زھرشانی کنگ بیتگ –

زھرشانی سوراب ءِ پریس کلب ءِ دیم ءَ کنگ بیتگ زھرشانی ءَ وانگجاھانی نودربر گلانی باسک، راجدوستیں پاٹیانی مردماں ھوار سول سوسائٹی ءِ رھشوناں بھر زرتگ –

زھرشانی ءَ یک بلوچ نودربر گلے ءِ باسکے ءَ تران کنان ءَ گْوشتگ کہ سوراب ءِ مھلوک ءُ سرجمیں بلوچ راج داں کدیگ ءَ لوگانی نندوک بیت ءُ زلمانی سر ءَ بے تواری کن ایں ءُ اشی ءَ سما کن ایں ما رکیتگ اِنت –

آئی ءَ گْوشت کہ ریاست نام نہ چارگ ءُ نشانگ کنگ ءَ نہ اِنت بلکیں آ بلوچ کنگ ءُ نشانگ کنگ ءَ اِنت ھیات، ملکناز کریمہ بلوچ نام ءِ سر ءَ نشانگ کرتگ اَنت –

آئی ءَ گوشت بلوچ اگاں بلوچستان ءِ زمین ءَ جاڑیگ بنت یا اوگستان، ایران، کینیڈا یا مزن ھور ءِ دگہ ڈیھاں بنت ھرکجا بلوچ زلم ءِ آماچ اِنت ھرکجا بلوچ کُشگ بیگ ءَ اَنت ءُ چریشی ءِ سر ءَ مارا سرجمیں بلوچاں یکجاہ بیگ ءُ اے زُلم ءِ دست پروشگی اَنت –

ھمے وڑ ءَ پسنی ءَ ھم کریمہ بلوچ ءِ کوش ءِ ھلاپ ءَ بلوچ یکجھتی کمیٹی ءِ نیمگ ءَ زھرشانی کنگ بیتگ –

زھرشانی کنوکاں کریمہ بلوچ ءِ کوش ءِ بگیری ءَ اوگام جتگ ءُ چہ کینیڈا ءِ سرکار ءَ کریمہ بلوچ ءِ کوش ءِ درگت ءَ تچک ءُ راستیں پَٹ ءُ پول ءِ لوٹ کرتگ –

ھمے وڑ ءَ اسلام آباد ءَ کریمہ بلوچ ءِ کوش ءِ ھلاپ ءَ بلوچ یکجھتی کمیٹی ءِ نیمگ ءَ زھرشانی کنگ بیتگ –

زھرشانی ءَ بلوچ ءُ پشتون نودربر ءُ پی ٹی ایم ءِ باسکاں بھر زرتگ اَت –

زھرشانی اسلام آباد ءِ پریس کلب ءِ دیم ءَ کنگ بیتگ ءُ اود ءَ نودربراں کریمہ بلوچ ءِ اکس ءُ کوش ءِ ھلاپ ءَ تاکانی نبشتگیں تاک چِست کرتگ ءُ کریمہ بلوچ ءِ کوش ءِ ھلاپ ءَ اوگام جتگ –

زھرشانی ءَ مومنٹ ڈیموکریٹک پاٹی ءِ زالبولیں باسکے ءَ تران کنان ءَ گْوشت کہ اے پم ءَ شرمے گپے کہ بلوچستان ءَ چی بیگ ءَ اِنت ءُ بلوچانی سر ءَ چی گوزگ ءَ اِنت ءُ چریشی ءَ ما بے توار اِنت –

آئی ءَ کریمہ بلوچ ءِ پر ارزشتیں کرد ءَ را سھر چکیں دروت ندر کرتگ ءُ گوشتگ کہ کریمہ بلوچ ءِ سر ءَ بھتام جنگ ءَ اَنت کہ آئی ءَ وتکشی کرتگ بلے تچکیں گپ ایش انت کریمہ بلوچ ءَ ھما وھد ءَ زرمبشت رکینتگ ءُ دیم ءَ برتگ آ چون وتکُشی کرت کنت –

آئی ءَ گْوشت کہ کریمہ بلوچ ءَ ھما وھد ءَ بی ایس او ءِ سرپیست رکینتگ کہ بی ایس او ءِ رھشون گرگ ءُ بند کنگ بیتگ اَنت ھما وھد ءَ کریمہ بلوچ ءَ بلوچ نودربرانی رھشونی کرتگ –

آئی ءَ گْوشت کہ کریمہ بلوچ ءَ بلوچستان ءَ جد ءُ جھد کنان ءَ وتی ساہ ءِ رکینگ ءَ کینیڈا ءَ شتگ اود ءَ ھم کریمہ بلوچ ءِ ساہ گرگ بیتگ اَنت –

ھمے وڑ ءَ زھرشانی ءَ پی ٹی ایم بلوچستان ءِ رھشون زبیر شاہ ءَ تران کنان ءَ گْوشت کہ اے وڑیں زلم بلوچستان ءَ ھمک لوگ لوگ ءَ بیگ ءَ اَنت –

آئی ءَ گْوشت کہ کریمہ بلوچ ءِ ناھکیں کوش ھمے پدراھی ءَ کنت اے اے داستان زاکر مجید ءِ لوگ ءِ داستان اِنت، سنگت سناء ءِ لوگ ءِ داستان اِنت اے شفیع بلوچ ءِ لوگ ءِ داستان اِنت –

آئی ءَ گْوشت کہ کریمہ بلوچ ھمے واستا کشگ بیتگ کہ آئی ءَ وتی راج ءِ نوکیں باندات ءِ واستا جیڑ اِتگ ءُ بلوچستان ءِ پُرایمنیں زمین ءِ وابانی واستا جیڑ اِتگ –

آئی ءَ گْوشت کہ بلوچستان ءَ ما پہ وت ءَ یک وشیں سھبے ھم دیست نہ کن ایں ءُ چرے زُلمانی سر ءَ مارا ھمپنت بیگ ءُ زُلمانی ھساب گرگی اِنت –

زانگ بہ بیت بلوچستان ءَ ھوار بازیں جاھاں کریمہ بلوچ ءِ ناھکیں کوش ءِ ھلاپ ءَ زھرشانی بیگ ءَ اَنت ءُ بازیں جاھاں زھرشانیانی جار جنگ بیتگ اَنت –

دی بلوچستان پوسٹ

اُستاد ثناء بھار بلوچ سلاہ بندیں جد ءُ جھد ءَ یک پگر کنوک ءُ پلگاریں کردے ئِے واھند بیتگ – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ وتی درشان ءِ تہ ءَ گوشتگ کہ گوستگیں روچ ءَ پنجگور ءِ دمگ کیلکور سیاہ لک ءَ سرمچاراں ھما وھد ءَ زورگپتیں پاکستانی پوج ءِ سر ءَ اُرش کُتگ کہ آ لس مھلوک ءِ بگیری ءَ لشکر کشی کنگ ءَ بوتگ اَنت – اے جنگ ءِ کمان ءَ ورنائیں جنگی کماندار استاد ثناء بلوچ کنگ ءَ بوتگ، آئی ءَ بیست ءُ چار اداراں تاں زورگپتیں دژمن ءَ جنگ داتگ – اے میان ءَ بلوچ سرمچارانی جنگ ءَ زورگپتیں پوج پد کنزینتگ آھاں وتی کمکے ھاتر ءَ جنگی بالگرد لوٹارینتگ، اے میان ءَ سرمچاراں ریاستی بالی گرابانی سر ءَ راکٹ ھم آس داتگ چریشی ءَ آئی ءَ تاوان بوتگ –

جارکش ءَ گوشتگ کہ گل ءِ دمگ ءِ کماندار اُستاد ثناء پنام اُستاد امیر بالی گرابانی تیرگواری ءَ شھید بوتگ ، آئی ءَ پد دومی سنگتاں جنگ ءِ کمان داشتگ ءُ دژمن ءِ گوم ءَ جنگ برجاہ داشتگ – اے جنگ ءَ دژمن ءِ پانزدہ ءَ گیش پوجی کارمند مرتگ ءُ ریاستی ڈیتھ اسکواڈ ءِ کارندہ ھم کُشتگ اَنت –

بیبگر بلوچ ءَ دیمتر ءَ وتی درشان ءِ تہ ءَ گوشتگ کہ گل ثناء بھار ءِ تمردی ءُ جوانیں جنگی سوھوے ءَ چہ آئی ءَ اُستاد ءِ لکب ءَ دیگے جار ءَ جنت – راستی ءَ آ گل ءِ سنگتانی ھاتر ءَ یک اُستادے کرد ءَ پیلو کنگ ءَ بوتگ – آ دو ھزار ءُ دوازدہ ءَ چہ بلوچ سلاہ بندیں جھد ءَ ھوار بوتگ ، وھدیکہ آئی ءَ بی آر اے مھکم کنگ ءَ یک جوانیں کرد ءِ پیلو کرتگ – آئی ءَ پد گل ءِ نیمگ ءَ چہ آئی ءَ دمگ ءِ کمانداری ءِ زمہ واری داتگ انت – استاد ثناء بلوچ ءَ وتی شریں زانتے واھند بیگ ےَ چہ دژمن ءِ بگیری ءَ بازیں جوانیں راہ ءُ سوھیں کار سرجم داتگ اَنت، آ ورنائیں سرمچارانی تہ ءَ یک سوھو ورنائیں کماندارے بوتگ – گل ءُ بلوچ راج آئی ءَ راجی گرانبھائیں کرد ءَ مدامی یات کنت، آ بلوچ راجی جنگ ءِ راجدپتر ءَ مدامی نمیران انت –

آئی ءَ گوشتگ کہ زورگریں پوج ءَ گوستگیں یک ھپتگے ءَ چہ کولواہ، بالگتر، گچک ءُ چپ چاگرداں ھون ریچیں لشکر کشی برجاہ داشتگ – لشکر کشی ءَ جنگی بالی گرابانی کمک ھم گون انت – دنیگت ءَ تاں یازدہ ءَ گیش بے گنائیں بلوچ شھید کنگ بوتگ اَنت – ریاستی لشکر کشی سی پیک روٹ پھازگے ھاتر ءَ نزیکیں جاھمننداں بنریشگ ءَ چہ گار ءُ گم سار کنگ ءَ انت – ما اے گپ ءَ پدر کن ایں کہ بلوچ ءِ جنگ ریاست ءِ ناپاکیں منسوبھانی بگیری ءَ تیزی آرگ بیت –

نبشتانک: بلوچ ءُ پاکستانی پالیسی

نبشتہ کار: میار دشتی

دی بلوچستان پوسٹ

ھَو مروچی بلوچ ءِ زرمبشتیں توار ءَ ما گندیں ھمے سما کنگ بیت کہ نی بلوچ ءِ توار ایرموش کنگ نہ بیت بلے بیا کہ چُش نہ اِنت چیا کہ ھمے ھستیں سال ءِ تہ ءَ بلکیں اِے اولی جلسہ جلوس ءُ واہ ءُ زاری نہ اَنت ، بلکیں چار بنچ اِے با اثریں توار گندگ بیتگ بلے ماھی ءَ چہ پد اَنچوش ایرموش کنگ بیتگاں کہ کسّ ءَ نہ زانتگ بلوچے ھست یا نیست۔

مرچگیں بلوچ ءَ ھمینچو گْوشگ ءِ ھک دیگ بیتگ بس ھمنچو بہ گْوش ایت دگہ گْوشت نہ کنت ءُ دگہ ھچ کار ءِ کنگ ءِ ھک نیست۔

ما بچاریں دوھزار ءُ بیست ءِ تہ ءَ اِے وڑیں جاور ءُ جیڑہ چنچو مئے دیم ءَ گْوستگ ، بیا برمش ءَ بزیر ءُ ،کلثوم، ھیات ءَ شاھینہ ، ءُ یا مرچگیں بیا مئے گھار کریمہ ءِ درور ءَ بزیر ، ما درستاں دیستہ کہ اِے سرجمیں نامانی واستا بلوچستان ناں بلکیں دگہ ملک ءُ جاھاں ھمے توار گندگ بیتگ بلے ماھی ءَ پد ھمے سما بیتگ کہ گشئے بلوچ مُرتگاں۔

پاکستان وتی پالیسیاں پہ بلوچ ءَ ھمُک دروشُم ءَ کارمرز کنگ اِنت آ روچی برمش ءِ توار کہ لس مھلوک ءَ آزمان ءَ سرکُتگ اَت گڑا پاکستانی ریاست ءَ چار ات کہ من اِے توار ءَ چوں گار بکناں گڑا آئی ءَ کلثوم ءِ وَیل ءُ دگہ لھتے اَنچیں وَیل مَیان ءَ چگل دات کہ برمش ءِ توار نِزور کنگ بہ بیت، ماھے کپّی ءَ رند برمش گار بیت ،گڑا کمّے وھد ءَ پد ما دیست کہ ھانی گُل ءَ بیگوھیں نسیم ءِ کیس ماں آمدگس ءُ رسانکدراں بُرز ءَ ٹنگ اِت گڑا پاکستانی ریاست را ھانی ءِ کیس گار کنگ ءَ آئی ءَ بزّگیں ھیات شھید کُت ءُ گڑا لس مھلوک ءَ ھیات بینراں کُت سرجمیں بلوچستان ءَ ھمے وڑ ءَ زھرشانی ءُ کُکّار بلے پد ءَ ما دیست کہ اِے توار ماھے ءَ پد ایرموش کنگ بیت۔

نی مئے راج ءِ ناسرپدی ءَ بچار ھیات کہ شھید بیت گڑا لس مھلوک ءَ بس ھیات ءِ انساپ دَیگ ءِ لوٹ کُت ! گڑا ھیات ءَ انساپ رس اِت؟ اِنّاں برمش ءَ انساپ رس اِت ؟ اِنّاں اِنّاں۔

راج او منی گُلیں راج دانکہ شما سرجمیں ھیات ءُ سرجمیں کریمہ آنی واستا توار چِست نہ کن اِت ھمے وڑ سلسلہ وار مئے شمئے ھیات ءُ کریمہ کُشگ ءُ بیگواہ کنگ بنت۔

متحد ہو بدل ڈالو زمانے کا نظام
منتشر ھو، تو مرو، شور مچاتے کیوں ھو!
اصغر خان-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ ھرکجا زلم ءِ آماچ اِنت

ٹی بی پی اھوال

چہ لیاری ءَ سیادی داروکیں بلوچ اسٹوڈنٹس آرگنائزیشن ءِ باسک ءُ زانتکاریں نودربر عارف بارکزئی 10 جنوری سال 2008 ءَ ناروے ءِ شھر اوسلو ءَ یازدمی تبک ءَ بستگیں وتی کوٹی ءَ چہ دور کنت ءُ وتکُشی کنت، عارف ءِ پجا آورتگیں ءُ دیستگیں مردم داں مروچی عارف ءِ مرگ ءَ وتکُشی نہ گُش اَنت۔

آیانی گُشگ اِنت کہ عارف زانتکاریں وانندگیں ورنایے بیتگ آ یک لیکھے ءَ گوں بندوک بیتگ آئی ءِ وتکُشی کنگ ھچ پیم راستی ءِ درانگازی ءَ نہ کن اَنت۔ 2008 ءَ بگر داں دوھزار ھژدہ ءَ بلوچ ابید ءِ بلوچستان، ایران، پاکستان ءَ ھوار اوگانستان ءَ تاوان بار بیتگ اَنت، بلے جھانے دگہ ملکاں آیانی سر ءَ ھچ پیمیں سر زاھریں جیڑہ نہ بنت۔

دانکہ 26 دسمبر 2018 ءَ چہ متھدہ عرب امارات ءَ ھالے سر بیتگ اَت کہ مردمی اگبالانی ھاتر ءَ جھد کنوکیں یک بلوچ ورنایے چہ شارجہ ءَ اماراتی چیریں گلانی دست ءَ دزگیر کنگ بیتگ۔ بیگواھیں ورنائے پجار راشد ھسین ءِ نام ءَ بیتگ اَت، کھول ءِ نیمگ ءَ شنگ بیتگیں درشانانی رد ءَ راشد ھسین یک ورنائیں مردمی اگبالانی جھدکارے ءُ آئی ءِ کھول ءَ پیسر ءَ ھم لھتے مردم آئی ءِ ناکوزتک ءُ ناکو ءَ ھوار بیگواھی ءَ پد کُشگ بیتگ اَنت۔

راشد ھسین ءِ بیگواھی ءِ ھال پہ بلوچ راج ءُ انسانی اگبالانی ھاتر ءَ کار کنوکیں جھد کار ءُ سیاسی گلانی نیمگ ءَ مزنیں زھرشانی کنگ بیتگ انت ءُ چہ متھدہ عرب امارات ءِ واکداراں لوٹ کنگ بندات اِت کتگ اَنت کہ راشد ھسین ءِ دزگیری ءِ سوب گُشگ بہ بنت ءُ آ چیریں زندانی ءَ کشگ بہ بیت ءُ آمید گس ءَ پیش کنگ بہ بیت ءُ آئی ءِ میار گُشگ بہ بنت۔ راشد ھسین ءِ بیگواھی ءِ درگت ءَ جھانی انسانی اگبالانی گل ایمنسٹی انٹرنیشنل ءُ یونائینڈ نیشن ءُ ایندگہ گلاں توار چِست کُتگ اَت ءُ چہ اماراتی واکداران ھم لوٹ کُتگ اَت کہ راشد ءِ بیگواھی ءِ سوب گُشگ بہ بنت۔

سیاسی گل بی این ایم، ریلیز راشد ھسین کمیٹی ءُ درملک ءَ نیشتگیں بلوچاں راشد ھسین ءِ بیگواھی ءِ ھلاپ ءَ ءُ یل کنائینگ ءِ ھاتر ءَ زھرشانی بندات کُت اَنت ءُ جھانے جتا جتائیں ملکاں متھدہ عرب امارات ءِ ایمبیسی آں نِمدی نبشتہ کنگ بندات کُت اَنت۔

متھدہ عرب امارات ءِ واکداراناں بلوچ جھدکارانی نمدیانی جوانیں رنگے ءَ پسو دیگ ءَ ابید بلوچ اگبالانی جھدکار راشد ھسین چیریں پیمے ءَ 22 جون 2019 ءَ پاکستان ءِ دست ءَ داتگ اَت ۔ راشد ھسین ءِ کھول گوستگیں دو سال ءَ چہ متھدہ عرب امارات ءُ پاکستانی چیریں گل ءُ واکدارانی دیم ءَ زھرشانی کنان ءُ راشد ھسین ءِ ھلاپ ءَ جوڑکتگیں کیسانی منانکانی لوٹ ءَ کنگ ءَ اَنت ءُ راشد ءَ پہ انساپ ءِ لوٹ کنگ ءَ اَنت۔

راشد ءِ بیگواھی ءُ پاکستان ءِ دست ءَ دیگ ءَ پد بلوچ راجی جھدکارانی تہ ءَ یک گمانے ودی بیگ بندات بیتگ اَت کہ بلوچ نوں کجا ھم رکیتگ نہ اَنت۔ بلوچانی درملک ءَ بیگواھی راشد ءِ بیگواھی ءَ پد ھم نہ اوشتاتگ اَنت۔ ھمے سال ءَ مارچ ءِ ماہ ءَ 2 تاریخ ءَ سویڈن ءِ شھر اپسالہ ءَ چہ بلوچ اھوالکار ءُ بلوچستان ٹائمز ءِ سرشونکار ساجد ھسین بیگواہ بیت ءُ آئی ءِ جون اپسالہ ءِ شھر ءِ کِر ءَ فائرس نامیں یک کَورے ءَ 23 اپریل 2020 ءَ دست کپتگ اَت۔ پہ ساجد ھسین ءَ بلوچ راجے نیمگ ءَ زھرشانی ءُ گپ کنگ ءَ ابید ھم ساجد ھسین ءِ کُنٹ دزکپگ ءُ پد ءَ پولیس پَٹ ءُ پول ءَ پد گُش اِت کہ ساجد یک وئیلے ءِ آماچ نہ بیتگ نہ کہ کُشگ بیتگ۔

ساجد ھسین کہ آئی ءِ نوک باھوٹی منگ بیتگ اَت، آئی ءَ پہ وانگ اپسالہ شھدربرجاہ ءَ پہ وانگءَ داخلہ گپتگ اَت، ءُ وداریگ اَت کہ زیت آئی لوگ بانک ءُ زھگ آئی گورا سر بہ بنت، ءُ ھمے وھد ءَ کہ آئی ءَ وتی کھنیں شھر یل کُتگ اَت ءُ پہ نوکیں بنداتے ءَ نوکیں شھر ءَ سر بیتگ اَت، چُشیں جاورانی تہءَ کجام ھم مردمے اگں وت کشی بہ کنت گُڑا بازیں جُست ودی بنت۔

ساجد ھسین ءِ بیگواہ بیگ ءُ پد ءَ جون ءِ دزکپگ ءَ پد درملکاں نیشتگیں بلوچاں ھوار پاکستانی پوج ءُ چیریں گلانی سر ءَ ایراد گروگیں مردمانی تہ ءَ یک بے باوری ءِ ودی بیتگ ءُ آیانی گُشگ اَت کہ اے جیڑہ ءِ تہ ءَ وڑے ناں وڑے پاکستانی پوج ءُ چیریں گل ھوار بیتگ اَنت۔

پہ بلوچ راجی جھدکاراں میان اُستمانی تکانی تہ ءَ کار کنگے پِڑ ھم روچی ھساب ءَ گیش ءَ چہ گیش گرانتر بوان اِنت ءُ 20 دسمبر 2020 ءَ دگہ یک بلوچ رھشون ءُ بی ایس او آزاد ءِ گوستگیں چئیرپرسن کریمہ بلوچ چہ کینیڈا ءِ شھر ٹورٹنو ءَ بیگواہ کنگ بیت ءُ آئی ءِ جون چہ سنٹر آئی لینڈ ٹورونٹو ءَ چہ دزکپ ایت۔

اے ھال سرجمیں بلوچ راج ءَ بلوچستان ءُ بلوچستان ءَ ھوار سرجمیں جھانءَ یک زھرشانی ءُ مزنیں موتکے کاریت بلوچ رسانکدر کارمرز کنوک ھزارانی کچ ءَ وتی رھشون ءَ سھریں دروت ندر کن اَنت ءُ گُش انت کہ بانک کریمہ بلوچ ءِ کوش ءَ پاکستان ءُ آئی ءِ پجیگ ءَ چین ھوار اِنت۔

دومی نیمگ ءَ کینیڈا ءِ پولیس ءِ واکداراں بانک کریمہ ءِ مرگ ءِ درگت ءَ گپ جنان ءَ گوشتگ کہ کریمہ بلوچ ءِ گوما بیتگیں وئیل ءِ تہ ءَ ھچ پیمیں جرمکاری گندگ نہ بیت ءُ اے مرگ کوش ءِ نہ لیک اِتگ۔

اے وئیل ءَ پد چاگردی رسانکدراں پاکستان ءِ گوستگیں صدر جنرل پرویز مشرف ءِ یک کوھنیں تامر بندے جُنزگ ءَ اِنت کہ آئی ءِ تہ ءَ آ گُش ایت کہ بائد پاکستان ھما مردماں نشانگ بہ کنت کہ آ پاکستان ءَ ڈن نشتگ اَنت، پوج ءُ پاکستان ءِ ھلاپ ءَ گپ کن اَنت ءُ ایراد گر اَنت۔ ھمے رد ءَ پاکستان ءِ گوستگیں تہ ئِے کارانی وزیر چودھری نثار اھمد یک گلگدار ے ءِ تہ ءَ گُش ایت کہ آ ءُ پنجاب ءِ گوستگیں سروزیر شھباز شریف جنرل پرویز مشرف ءَ لوٹارینتگ اَنت ءُ گوشتگ کہ ایم کیو ایم ءِ رھشون التاپ ھسین لندن ءَ نشتگ باز مشکل کنگ ءَ اِنت ءُ پہ مئے ڈیھ ءُ گلانی ھلاپ ءَ باز کار کنگ ءَ اِنت انڈیا ءِ کمک ءَ چہ بائد اِنت کوشگ بہ بیت۔

کریمہ بلوچ ءِ کھول آئی ءِ لوگ واجہ ھمل ھیدر ءُ برات سمیر مھراب ءَ کریمہ بلوچ ءِ گوم ءَ بیتگیں وئیل ءِ سر ءَ دلجمیں ءُ شاھگانیں پَٹ ءُ پول ءِ لوٹ کُتگ ءُ چہ پولیس ءَ دزبندی کُتگ کہ آ اے گپ ءَ ھم پَٹ ءُ پول ءِ تہ ءَ ھوار بہ کن اَنت کہ کریمہ بلوچ بلوچ راجی جھد ءِ یک مزن نامیں رھشونی ءَ ھوار، آئی ءَ چہ پاکستان ءِ نیمگ ءَ مدام بیھار ھم دیگ بیتگ اَنت۔

دومی نیمگ ءَ ساجد ھسین ءِ لوگ بانک شھناز ساجد ھسین ءَ ٹوئیٹ کُتگ ءُ گُشتگ کہ آ وتی لوگ واجہ ءِ مرگ ءِ سر ءَ بیتگیں پولیس ءِ پَٹ ءُ پولءَ چہ دلجم ءُ دلیکیم نہ اِنت ءُ لوٹ کُتگے کہ بائد اِنت اے جیڑہ الم چارگ بہ بنت ءُ جرمکاری اے گمانی ھم ھوار کنگ بہ بیت۔

اے وئیلانی پشدر چارگ ءُ جوانیں ءُ دلجمیں پَٹ ءُ پول ءِ لوٹ ءَ راشد ھسین، ساجد ھسین ءُ بانک کریمہ ءِ کھول ءُ بلوچ راج ءِ ھک اِنت۔ بائد اِنت میان اُستمانی مردمی اگبالانی گل کینیڈا ءُ سویڈن ءِ پیمیں ڈیھانی تہ ءَ کہ اود ءَ مردماں ھوار ایندگہ درستیں ساھدارانی ھکانی پھازگے گپ بیت اود ءَ بیتگیں گمانی وئیلانی سر ءَ ھم توار چِست کنگ بہ بیت –

دی بلوچستان پوسٹ

بلوچستان ءِ دمگ کیچ ءِ بنجاھی شھر تربت ءَ بلوچ یکجھتی کمیٹی ءِ دزبندی ءَ نامی ئیں بلوچ زالبول رھشون ءُ بلوچ اسٹوڈنٹس آرگنائزیشن آزاد ءِ گوستگیں چیئرپرسن کریمہ بلوچ ءِ ناھکیں کوش ءِ بگیری ءَ مھلوک ءَ بازیں کچے ءَ زھرشانی روانک ءُ زھرشانی کرتگ –

روانک ءُ زھرشانی ءَ کیچ ءِ جتا جتائیں وانگجاھانی نودربراں ھوار زالبول ءُ چکانی بازیں کچے ھوار بیتگ ءُ آیانی دستاں کریمہ ءِ کوش ءِ ھلاپ ءَ اکس ءُ نبشتگیں تاک ءُ انساپ ءِ لوٹ ءَ کنگ ءَ بیتگ اَنت –

روانک ءَ بھر زیروکیں مردم تربت ءِ دگانی سر ءَ تران بیتگ ءُ شھر ءِ بنجاھی شھید فدا چاراہ ءِ سر ءَ مُچے ءِ دروشم ءَ مُچ بیتگ اَنت –

ھمے وھد ءَ جتا جتائیں راجدوستیں پاٹی، نودربر گلاں ھوار سول سوسائٹی ءِ رھشوناں کریمہ بلوچ ءِ جد ءُ جھد ءَ را سھریں دروت ندر کرتگ ءُ گْوشتگ کہ کریمہ بلوچ ءِ مزنیں ھِمت ءُ اوپار ءُ نہ اوشتوکیں جھد ءَ مروچی تربت بے تاھیر کرتگ -آیاں گْوشت کہ مروچی اے کچ ءَ بلوچ زالبول دگانی سر ءَ درکپتگ ءُ زھرشانی کنگ ءَ اَنت ءُ اشی ءِ منّینگ ءَ اَنت کہ کریمہ بلوچ مروچی ھم مئے دلانی تہ ءَ زندگ اِنت –

تران کنوکاں گْوشت کہ بلوچ راجی جھد ءِ پژدر ءَ بلوچ سیاسی باسک ءُ رھشونانی کوش مئے جزبگ ءَ گستا کرت نہ کن اَنت –

ھمے وھد ءَ زھرشانی کنوکاں کینیڈا ءِ سرکار ءِ سر ءَ کڈنی کرتگ ءُ گْوشتگ کہ کریمہ بلوچ ءِ کوش بلوچستان ءَ سیاسی باسکانی کوش ءُ آوارجنیانی درچ اِنت، البت تچکیں رنگے ءَ اشی ءِ پَٹ ءُ پول کنگ بہ بیت –

آیاں گْوشت کہ مروچی سرجمیں دنیا ءَ بلوچ زھرشانی کنگ ءَ اَنت ءُ ما کینیڈا ءِ پولیس ءِ بنداتی رپورٹ ءَ رد کن ایں – زھرشانی کنوکاں گْوشت کہ کریمہ بلوچ ءِ کشندھاں بلوچ راج شری ءِ سر ءَ زانت بلے آ کُشندہ ریپکار ءُ چالاک اِنت بلے ما لوٹ ایں کہ دنیا سرپد بہ بیت مئے دشمن بلوچستان ءَ ھوار یورپ ءُ کینیڈا ءَ سر بیتگ اَنت –

زانگ بہ بیت بلوچ اسٹوڈنٹس آرگنائزیشن آزاد(بی ایس او آزاد) ءِ گوستگیں چیئرپرسن کریمہ بلوچ ءِ جون بیست ءُ یک دسمبر ءَ کینیڈا ءِ شھر ٹورنٹو ءَ لیک شور نامیں دمگے ءِ نزیک ءَ یک کوھے ءِ گور ءَ کورے ءِ تہ ءَ دزکپتگ –

اے ناھکیں کوش ءِ ھلاپ ءَ مروچی چارومی روچ ءَ ھم بلوچستان ءِ جتا جتائیں جاھاں زھرشانی بیگ ءَ اَنت ءُ زھرشانی ءَ ھواریں مردم کریمہ بلوچ ءِ ناھکیں کوش ءَ ریاستی کوش گوشگ ءَ اَنت –

شئر: کجائے تو کجایاں ماں

شائر: مزار بلوچ

دی بلوچستان پوسٹ

کجائے تو کجایاں ماں
کج انت قول ء رندانی
کج انت گال ء نصیرانی
کج انت نازینک مکہین ماتانی
کج انت لج مے گہارانی
کج انت بیم پھلین براسانی
بیا انت ہکل پدا سرمگیں بولانی
بیا انت پدا حمل گوادر ء گنجانی
بیا انت گلین کندگ ریحان ھنبلانی
بیا انت مہر صدین میرل بارگی
بیا انت پدا کہ تیر گواری دلجانی
بیا ات کہ سنگت درین مجیدانی
بیا ات ماں ھمراں آ سگارانی
بیا ات ماں راہ بند آں مزارانی

نبشتانک: بانک کریمہ بلوچ ءِ پلیں ارواہ ءَ

نبشتہ کار: سازین بلوچ

دی بلوچستان پوسٹ

“کہساروں کی عطا رسم نہیں خاموشی
رات سو جائے تو بہتا ہوا چشمہ بولے “

کسہ ھما کسہ اِنت بلے ساچشتکار ءَ کسہ ءِ دروشم بدل کتگ، یکے کسہ اِنت دیم ءَ روان اِنت بس کسہ ءِ لھتیں کارست گار ءُ بیگواہ ءُ باز نمیران ۔

دگینا اوشت، بلوچستان ءِ ھمک ھند ءُ دمگ ءَ ابیتکی ءُ بے تواری ءَ وتی جار شنگ کُتگ ، دْرچک ءُ دار، کوہ ءُ کوچگ شانتل ءُ کپوت درست گنگ بوت اَنت۔ من کہ چہ واب ءَ بست کت انچو گمان بوت کہ شال پرسیگ اِنت ،کوٹی ءِ چراگ ءِ پاداں دمبرتگ۔ منی ھمبلے ءَ گون پْرشتگیں گالوارے درائینت سنگت بانک کریمہ ءِ ارواہ چہ ما جتا کنگ بوت ۔

من بے انانیں چم پچ کت اَنت کہ سرجمیں بلوچستان پرس ءِ پتر ءَ نشتگ ءُ من ءَ تربت ءِ 2012 گیر اتک کہ من اولی رند ءَ بانک کریمہ ءَ عطاشاد ڈگری کالج ءِ گراونڈ ءَ تلو ءِ سر ءَ گوں کوہ پْروشیں توار ءَ دیست ۔

2012 ءِ ساچانیں روچ ءَ (بی این ایف) ءِ ریلی یے برجم دارگ بوتگ ۔پد ءَ 2012 ءَ یک رندے واتر کتیں ،پد ءَ تربت ،شال ءُ بلوچستان بانور بوتیں ،پد ءَ بانک ریلی ءِ سروک بوتیںءُ21/12/2020 ھچ بر مہ بوتیں اے روچ نوں زندمان ءِ گڈی روچ بات بانک کریمہ اوگام جت ءُ ایدگہ سنگت ءُ لس مردماں جواب دات۔

بلوچستان ؟
زندہ باد
یہ جو دہشتگردی ہے ؟
اس کے پیچھے وردی ہے۔
یہ جو مارا ماری ہے ؟
اس کے پیچھے وردی ہے۔
بلوچستان ؟
زندہ باد-
“بی این ایف ،بی این ایف
بی این ایف ،بی این ایف “

ھم لیکر رئینگے ؟
آزادی
ھم چین کر لینگے ؟
آزادی
تیرا باپ بھی دیگا ؟
آزادی
انقلاب؟
زندہ باد
انقلاب زندہ باد-

دْرستیں نودربر ءُ ھوار ء من بانک ءِ گپ ءُ ترانانی وداری ءُ بے کرار تربت ءِ سرجمیں ھند ءُ دمگ مند، تمپ، ناسرآباد، نظرآباد، گرکوپ ، جمنک، ھوشاب، باگتر، شاپک، شھرک، ھیرونک درست تربت ءَ جمب اِتگ اَت ۔2012 ءُ مرچی یکیں کسہ اِنت بلے کسہ ءِ لھتیں کارست بدل بوتگ ءُ آ کارست بار بند ئیگ ءُ باز ناگتہ دگ ءِ مساپر۔

کارستاں کسہ کالج ءِ گراونڈ ءَ سر کت ءُ لس مردم سُک سُک کنگ ءَ اِت اَنت کہ بانک کدی کیت تلو ءِ سر ءَ-

“ریتکگیں ھون منی ماپ ترا سد رند ءَ
پْرشتگیں ڈوک بولان ءِ ماپ نہ بنت”

بلوچستان ءِ ءُ ھر ھما گلامیں راج ءِ شھیداں سھریں سلام کہ باندات ءِ ھاتر ءَ وتی سر ندر کتگ اِش ۔ مرچی من ءَ پِکر اِنت اے ریلی ءَ ھوار بوتگیں سنگت ،بْرات ءُ گھارانی سر ءَ کہ گلامی ءِ ھلاپ ءَ توار چست کتگ اِش ءُ بلوچستان ءِ توار جوڑ بوتگ اَنت ءُ وتی زند ءِ واھشت کشتگ اَنت اِش ءُ زالم ءِ ھلاپ ءَ توار چست کتگ اِش ءُ زالم ءِ دیم ءَ چو بولان ءِ کوہ ءَ اوشتاتگ اَنت ۔

“کبھی وہ دن بھی آئے گا کہ جب آزاد ہونگے ھم”
“یہ اپنی ہی زمین ہوگی،یہ اپنا آسمان ہوگا “
“شھدوں کے مزاروں پر لگیں گے ہربرس محلے
وتن یہ مرنے والوں کا ،یہی نام و نشان ہوگا”

بانک کریمہ تمپ اِنت، تربت اِنت ،گوادر اِنت ،مند اِنت ،پسنی اِنت کولواہ اِنت ،بالگتر اِنت آواران اِنت ،کلات انت ،مستونگ انت ، منگچر اِنت شال اِنت ءُ بلوچستان اِنت ءُ زاکر مجید ،شے مرید ،سنگت ثناء ءُ بلوچ ھان ءِ توار اِنت ،بلوچستان ءِ آجوئی ءِ چیدگ ءُ جھد ءِ نشان اِنت ۔

بانک من دومی رند ءَ عطاشاد ڈگری کالج ءَ دیست بلے پد ءَ نہ دیست ءُ بس بانک ءِ اکس چک چک ءِ دست ءَ اَت بانک پگرے یک سوچے ،یک پلسپھے، یک انسان دوستیں انسانے اَت ۔

بانک بلوچستان اِنت ،بانک گلامیں راجانی توار ءُ برمش اِنت ،بانک بلوچ ءِ ھر ھما چْک ءِ باتن ءَ زندگ اِنت ۔شھید بانک کریمہ ءِ دلیری مشئل ء راہ اِنت۔

“من کولیگ پہ ھما ساہ ءَ بہ بات آں
کہ ھون اِش ریتکگ جون تلاماں “

شہید مکھیں مات بانک کریمہ بلوچ 2012 ءَ (بی این ایف ) ریلی ءَ pamphlets شنگ کنگ ءَ اِنت ءُ بلے مرچی 2020 ءَ لس مردماں شھید ء وتن بانک کریمہ بلوچ ءِ اکس گون ءُ چار راھانی سر ءُ اوشتاتگ اَنت ءُ اوگام جنگ ءَ اَنت ۔
“شھید بانک کریمہ بلوچ تیری جرات کو سرخ سلام سرخ سلام”
تم کتنے کریمہ مارو گے ؟
گھر ،گھر سے کریمہ نکلے گی
شہید بانک کریمہ بلوچ تیری خون سے ،انقلاب آئے گی”
یہ نامعلوم ہے؟
ھم سب کو معلوم ہے
یہ جو دھشتگردی ہے؟
اس کے پیچھے وردی ہے
یہ جو مارا ماری ہے ؟
اس کے پیچھے وردی ہے۔
بلوچستان ؟
زندہ باد
انقلاب ؟
زندہ باد ۔

“گرتی ہوئی دیوار کو؟
ایک دھکہ اور دو”-

مرچی اگاں شھید بانک کریمہ بلوچ مئے ھمراہ ءُ ھمکوپگ نہ اِنت بلے آئی ءِ سوچ ءُ پگر ھر بلوچ چک ءِ باتن ءَ زندگ اِنت
بانک تی ھون آشوب ءِ چیدگ ءُ الم تئی ھون آشوب ءِ دروشم ءَ بدل کنت تئی چو زوت روگ ءَ سرجمیں بلوچستان ءِ ھمک ھندءُ دمگ ،درچک ءُ دار،کوہ ءُکوچگاں ابیتکی ءُ بے تواری یے شنگ کتگ۔

“شھید بانک کریمہ بلوچ ءِ گڈی واھشت”
من نون پیر بوگ ءَ آں پیری ھچ جیڑھے نہ اِنت بلے من وتی وتن ءَ مرگ لوٹ آں بلے درملک ءَ نااود ءَ تمپ ءَ منی بْرات ءُ گھار گونگیں دوست ءُ ھمبلانی کبرستان اَنت-

من ءَ اود ءَ وتی گدانانی گیر کا اَنت منی اسکول ءِ ترانگ ءُ یات
مردمانی یات ءُ گیرمن مدام گوں وتی دزگھاراں بچکند ءُ مزاک کتگ کہ اگاں ما بہ مر ایں بلے مئے کبر سک نزیک نزیک کنگ بہ بنت اود ءِ ما یکے ،دومی ءَ دور نہ بہ اِیں ،شپ ءَ چہ کبر ءَ در کا اِیں ءُ دیوان کن ایں-

مھر ھمیش اِنت کہ پد ءَ پُلّ رُد اَنت درد ھمیش اِنت کہ تو نیائے پد ءَنا ملک ملکے، نا در ملک وتی ڈگار ءَ بات ئے پرچا کہ تئی ڈگار تئی بھشت اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: جنرل اسلم ءِ کاروان

گُڈی بھر

نبشتہ کار: اکیل مراد

دی بلوچستان پوسٹ

وھدے انسان چہ وتی زات ءَ کہ سرگوز اِیت گڑا آشوب ءِ آرگ ءَ چَک ءُ پد نہ بیت ، آئی ءِ آشوب ھما وھد ءَ سرجم بیت مھلوک ءِ آشوب ءِ جنزگ ھما وھد ءَ مُچ بنت آ ھرچ وھد ءَ زُلمانی تہ ءَ گوزگ ءُ زُلم ءَ گندگ ءَ بیت آئی ءِ آشوب ءِ زھرگ ھمے ساھت ءَ جاہ جنت ءُ آشوب ءِ زھرگ ءَ چِست کنت –

چوشیں آشوب ءِ چِست کنگ ءُ برانزینگ ءَ پگرمندیں مردم راجانی تہ ءَ بنت ھما پگر مند ءُ سوھو اے آشوب ءِ رھشونی ءَ کن اَنت –

جنرل ھمے گپ ءِ سر ءَ سنگتے ءِ گور ءَ گپ کنت مئے آشوب سُستیں رواجاں روگ ءَ اِنت الم بلے روگ ءَ اِنت گپ اے نہ اِنت کہ بلوچستان ءَ آشوبی مردم نیست یا آشوب ءِ رھشون کنوک نیست دنیا ءِ راجدپترانی تہ ءَ چم بہ کپ اَنت آشوب ءَ را وت وتی رھشون گون اَنت پیداک اَنت آ جاہ ءَ آشوب مَچ اِتگ اَنت آ جاہ ءَ راجاں وت وتی گچین کرتگیں رھشون رھبر کرتگ ءُ دیم ءَ کتگ اَنت –

جنرل گپ کنت اے بلوچ ءِ واستا وشبھتی ءُ آئی ءِ شرھیالی اِنت کہ آ زانت مئے سر ءَ زوراکے ءِ بار ھست اِنت ءُ اے زوراک ءِ ھلاپ ءَ توارے چِست بیتگ ءُ جنزان اِنت اے ھما آشوبی بنزہ اَنت کہ آشوباں وتی راستیں رنگاں پرین اَنت اے جنرل ءِ وڑیں بامرد ءُ سوھوئیں آکلیں مردمانی کار اَنت کہ آیاں جنگ سارتی ءَ بنا کرتگ ءُ گرمی ءَ روان اَنت –

جنرل ءِ سر ءَ اگاں تچک ءُ راستیں گپ بہ جن ئے آ گپ مئے گونا درشان کنگ نہ بنت پرچاکہ آئی پگر چہ مئے بالاد ءَ باز برز اِنت –

اگاں ما بہ گوش آں جنرل بولان اِنت یا جنرل ساجی ءُ کلبر اِنت یا جنرل کوہ ءِ سلیمان اِنت یا جنرل کجام ھم ھما ھند ءُ دمگ اِنت ایشی ءِ تہ ءَ ھچ شک ءُ شُبینگے مارا دز نہ کپ ایت کہ جنرل ءِ ڈک ءَ گپت بہ کنت –

“جنرل ءِ شھیدی ءَ پد لھتے ھنچیں مردمانی دپ ءَ ایش کرت آیاں ھچبر چوشیں گپ نہ جتگ اَت آیاں مدام جنرل ءِ رنگیں بامرد ایرجتگ ءُ نِزور کرتگ اَنت ھمے روچ ءَ کہ جنرل ءِ شھیدی ءِ ھال شنگ بوت گڑا ھمے مردماں یک گپے ءُ دومی آھے کش اِت ءُ جنرل ءِ روگ ءَ بے کساس درد اِت اَنت ھنچُش آیاں اے گپ ءِ سر ءَ پدردی درشان کرت ءُ گوشت بلوچ راج یک سرجمیں رھبرے ءَ زبھر بوت ءُ باریں کدی اے وڑیں رھبرانی کنڈ پُر کنگ بیت باریں کدی بلوچ مات چوشیں رھبرے پیداگ کرت کن اَنت چندے ھیالانی گَڑ ءُ منجی ءَ پد منی دپ ءَ دراتک کہ جنرل ءَ وتی پیمیں ھزاراں جنرل کوھانی تہ ءَ یلہ کرتگ ھزاراں جنرل ءِ کرد ءُ سوجانی پدگیری ءَ بندوکیں مردم ھست اَنت چُش وَ بیت ھما پرد ءِ کنڈ پُر کنگ نہ بیت پرد ءِ کار بیت کن اَنت چوشیں کار جنرل ءِ ھستی ءَ نہ بیتگ اَنت ءُ آئی ھوناں رند بنت ءُ آئی زانت ءُ سوج جوانیں بیتگ اَنت الم آئی زانت ءُ سوجانی پد ءَ جنرل ءِ کاراں دیم ءَ بر اَنت –

دنیا ءِ راجدپتر ءَ چوشیں پت باز کم دزکپ ایت کہ آئی ءَ وتی بچ پہ یک مکسدے ءِ واستا سمبینتگ ءُ سالونک کرتگ ءُ پہ راج ءِ باندات ءَ ندر بوگ ءِ سکین داتگ اے وڑیں راجدپتر باز کم اِنت ھزرت ابراھیم ءَ وتی زھگ اسمائیل ھدا ءِ نام ءَ کربان کنگ ءَ سمبھینت جنرل ءَ وتی بچ پہ زمین ءَ سمبھینت ءُ سالونک کرت ءُ کربانی ءَ داں آئی ءِ سر ءَ جنرل ءِ دست ساھیل اَت چریشی ءَ زانگ بیت جنرل ءَ چہ بچ ءَ گیش وتی زمین، وتی پجار ءُ دود ءُ ربیدگاں چہ ھچ شَے دوستر نہ بیتگ آئی تہ ءَ جنرل ءَ کجام دیمونی کنگ کپتگ جنرل ءَ ھچ رنگیں پُشت کنزگ نہ زانتگ آ دیمونی تُری مات یاسمین ءِ آوار جنگ بہ بیت یا ریھان ءِ دیمونی بہ بیت جنرل ءِ ھساب ءَ اشی ءِ تہ ءَ ھچ شک نیست ءُ زمین ءُ راج پھازانی دیمونی ھما کس ئیگ اِنت کہ آ دیگ ءَ اِنت ئِے جنرل ھم ھما راج ءُ زمین زادگیں پگر کنوک ءُ سسا زانتے ءِ واھند بیگ ءَ ابید یک سوھوکار ءُ رھبرے ءِ بستار ءَ وتی سنگتانی تہ ءَ پدر بوتگ ھمے زانت ءُ زانگ آئی سنگتانی تہ ءَ ودینتگ –

مروچی اگاں بلوچ جنز ءَ دیمروی کرتگ گڑا جنرل ءِ وڑیں بامرد ءُ بلوچستان ءِ کُلیں شھیدانی ھون اَنت کہ تچگ ءَ اَنت ھار اَنت ءُ بلوچ زمین ءَ ملگ ءَ اَنت –

ڈاکٹر عمیر مھمود سدیکی A short history of suicide bombing ءِ تہ ءَ نبشتگ کنت دنیا ءِ تہ ءَ مڈیانی زورگری ءِ ھاتر ءَ نائین الیون ءَ پد دنیا ءِ تہ ءَ بازیں زوراوریں دشمن ءِ سر ءَ یک کوھن ءُ زمانگی رِپکے بیتگ کہ ارشکار وتی جان ءِ پرواہ ءَ نہ کنت ءُ دشمن ءِ سر ءَ ارشکار بیت اے گال ءَ لھتے وتکُش تراک یا فدائی ءِ نام ءَ ھم گوش اَنت انگریزی زبان ءَ اشی ءَ سوسائید بمببینگ یا سوسائیڈ اٹیک ھم گوش اَنت اشی ءِ چِن ءُ لانچ(Homicide bombing) یا (Genocide bombing) ءِ نام ءَ ھم کنگ بیت اِنت –

جھان ءِ تہ ءَ انسان ءِ گرانبھائیں شَے آئی ءِ جسم ءُ جان اِنت بلے ارشکار وتی مول ءُ مراد ءِ سرجم کنگ ءَ وتی جان ءَ بمب بند اِیت ءُ دشمن ءِ سر ءَ اُرش کنت –

راجدپتر پد ءَ گوش ایت دنیا ءِ اولی وتکش اُرش بائبل اِنت کہ آ دو بھرانی تہ ءَ اِنت یکے (Old testament) نوکیں دور ءِ دومی (New testament) نام ءَ شاھوکار اَنت – دنیا ءِ کوھنیں راجدپتر ءَ ھم وتی جان ءُ ساھاں زمین ءِ رکینگ ءَ یا وتی دودانی رکینگ ءَ پدائی کرتگ ءُ ساہ پہ وتی مول ءُ مراداں بکشاتگ اَنت –

جنرل ءِ تہ ءَ چوشیں بامردی ھم گندگ ءَ کیت کہ آئی ءَ یک مزنیں گامگیجے چِست کُرت ءُ سالونکیں بَچے پہ وتن بکشات جنرل ءَ اے تھنا نہ جیڑ اِتگ اَت کہ ریھان منی بچ اِنت بلکیں آئی ءَ پیسر ءَ ھمے اوست ءُ اُمیت وتی تہ ءَ ودینتگ اَت کہ ریھان گُلزمین ءِ بچ اِنت –

“عائشہ نبشتگ کنت من ھر وھد ءَ وتی ابا جان” اسلم جان ” ءَ نوک نوکیں چیزانی لوٹ کرتگ آئی ءَ اے گپ تچک ءَ ترینتگ ءُ گوشتگ بلوچستان ءَ ھزاراں تئی ھمسروک ھست اَنت کہ آیانی ھم چوشیں لوٹ ءُ واھشت سرجم نہ بنت تو ھم ھمایانی پیمیں یک یاگی ءِ زھگ ءِ ترا ھم اوپار کنگی اِنت ھچ چوشیں مزنیں واھشتاں جنگی ءُ گلامی جاوراں تلب مہ کن بلکیں وتی واھشتاں گوں زمین ءَ ھوارین ءُ وت ءَ راجی جزبگ ءِ تہ ءَ مھکم بہ کن ”-

ھو تئی بے بھائیں کرد ءُ سر کہ آئی ءِ مانا ھچ رنگ ءَ مئے گونا کنگ نہ بیت ھر رنگ ءَ وتی گالاں بہ چن ایں ءُ نز بیاریں گوشگ ئیگ ءَ انگت ءَ یک جنرلے ءِ بارہ ءَ کم ءُ نِزور اَنت –

“جنرل منی راھے بروک
جنرل ھزار پگر ءِ گنوک
جنرل سپاھیں سازگار
جنرل تمام الگرد ءُ بار
جنرل کُچگ ءُ چمن
جنرل بیل ءُ یار
جنرل ھزار پند ءِ سپاہ سالار
جنرل بولان ءِ تیرکمان
جنرل ساجی ءِ برزیں ھسار
جنرل زر ءُ مڈی بھار
جنرل کیچ ءُ مکران
جنرل چھبار ءُ جیمڑی
جنرل منی شال ءُ گنجیں گوادر اِنت
جنرل کلبر ءُ زامران ءِ تیھُریں سر اِنت
جنرل تئی پگر ءَ سلام
جنرل تئی زند ءَ سلام
جنرل پد ءَ پگرے بہ جن
پگر ءَ آ ھسمیں ءُ یاسمین
عاشہ ءُ رُستگیں
گرنچیں نھالے بنپد اِنت
جنرل نیزگار ءُ راج پھازیں سر اِنت

جنرل بیست ءُ پنچ دسمبر دوھزار ءُ ھژدہ ءَ دگہ پنچ سروکیں ھمراھانی ھمراھی ءَ دشمن ءِ یک وتکُش اُرشے ءَ شھید بیتگ اَت کہ آ پنچیں ھمراھانی تہ ءَ کماندار رھیم مری سگار، تاج مھمد مری، اکتر شاھوانی، پرید بلوچ ءُ سادک بلوچ ءِ بلوچ ءِ ھمراھی ءَ شھید بیتگ اِت اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔