TBP Balochi

نبشتانک: آجوئی ءِ درچک ءَ شاهڑ جت

نبشتہ کار: محمد بن کریم بلوچ

دی بلوچستان پوسٹ

بانک کریمہ بلوچ مهراب ء عالی چک ِانت، ماں بلوچستان ءَ مکران ءِ دمگ تمپ ءِ نندوک انت آئی ءِ مکھیں مات ءِ نام بی بی جمیله انت ءُ آئی ءِ ناکو (پت ءِ برات) واحد کمبر ءُ شهیدڈاکٹر خالد بلوچ اَنت-

آجوئی ءِ لڑ ءَ بانک کریمہ بلوچ ءِ نام اولی سرپ ءِ ناماں شمار اِنت بانک کریمہ ھمے زیتاں درانڈیھ (کینیڈا ) ءَ دژمناں وتی ارجاں جت ءُ شھید کت بلے راجی راهشون ھچبر نہ مرانت بلکیں آ نمیران بنت۔

داں قوم زندگ انت آ ابدمان انت بانک کریمہ بلوچ هما راھشون ِانت کہ آئی سوب ءَ هزاراں بلوچ زالبول پہ بلوچ آجوئی ءِ جنز ءَ ھوار بیتگ، شیرزالیں بانک کریمہ بلوچءَ بانڑی ، گوهر ،یاسمین ، ملک ناز ءُ کلثوم پد ءَ زندگ کت َانت ءُ بلوچ زالبول نوکیں نامے بکشات اَنت۔

وھد ءِ دنز ءُ مجاں بیگواھیں زرینہ مری اوں جلشکے ءَ پدرئےِ کت ءُ پہ منتگیں مردماں جیڑگ ءِ درے پچی کت بامردیں بالاچ مری ، غلام محمد ، شیرمحمد لالا منیر ،ڈاکٹر منان ، دلجان ءُ خالد ءَ ھوار دگہ هزارں یلیں بلوچ شهید دوبر پہ گلزمین ءَ سالونک کت اَنت-

داں جھان ھست اِنت بانک ءِ پگر ھر بلوچ ءِ دل ءَ زندگ مان ایت بلوچ راج وتی آجوئی ءَ لازم سربیت، بانک ءِ کرد ماں راجدپتر ءَ مدام ھست مانیت ءُ بلوچ ءِ راهشونی ءَ کنت-

بانک کریمہ بلوچ ءَ گوں ھوناں وتی آجوئی ءِ درچک را آپ دات ،اے درچک مستر بوان ءُ شاهڑ جنان ءُ بور ءُ بر کنان اِنت، اے درچک ءِ ساھگ ءَ اکبر خان بگٹی ,غلام مھمد ، شیر مھمد ، لالا منیر ، منان گونگیں بلوچ ودی بنت-

بانک ءِ شھادت ءَ بلوچ ءِ دل ءَ آجوئی ءِ جوش ءُ جذبگ دوبر ودینتگ بانک ءِ شھیدی ءَ پد هزاراں ھمپکریں شیرزالیں زالبول آجوئی ءِ لیکہ پہ وت زرتگ ءُ دیم ءَ جنزان اَنت هزاراں ورنایاں بلوچستان ءِ کوہ ءُ اگاراں وتی سنگر گپتگ اَنت۔

بلوچستان ءِ پانک ءَ جنگ ءَ انت بانک تو وتی مات بی بی جمیلہءِ دل زدگءُ ٹپیک کت ، بانک کریمہ تو پد ءَ شهید ماسٹر نوراحمد یات تازگ کت اَنت ، تو ناکو واحد کمبر ءِ دل زدگ کت تو وتی پت ءِ برات ءُ گوھار ءُ سرجمییں تمپ ارسیگ کت ،تو پد ءَ ڈاکٹر خالد ءِ داتگیں ٹپ نوک کت ، بلوچ ءِ هرچ پُسگ تو گمیگ کت بلئے تو مات ءُ پت ،برات ءُ گھارانی سر پہ پھرے برزکت َانت-

من زاناں ءُ سرپداں کہ چہ تھا بی بی جمیلہ پرشتگ ءُ هلاس انت ، کہ دُتّکیں کریمہ شهید کنگ بیتگ پد ءَ بی بی جمیلہ زانت کہ منی دُتک ءِ جاه بھشت انت منی ُدتک پہ بلوچستان ءَ بانور بیتگ منی دُتک ءَ سر پہ بلوچ راج ءِ آجوئی ءَ بکشاتگ پمیشکہ گشی کہ من نہ گریواں کہ گریوگ ترا دوست نہ بیت-
پمیشکہ بی بی جمیلہءَ چو بی بی ھاتونءَ وتی چک پہ شان ءُمڑاھے شھیدیءَ نازینت،شهید ڈاکٹر خالدءِ مکھیں ماتءَ گوشت کہ ،،منی چک بلوچستانءِ چک بیتگ ءُ بلوچستان ءِ درستیں چک منی چک اَنت شما ھم چو ھالد ءَ وتی آجوئی ءَ جھد بہ کن ات-

من اے گپءَ پھر کنان ءُ دل ءَ سارتاں کہ منی چک پہ بلوچستان ءَ شهید بیتگ منی پلیں ھالد دُز ءُ ڈنگانی لڑا هوار نہ بیتگ کہ من گمیگ بہ باں-

من گوں اللهءَ دوا کنیں که بانک کریمه ءِ کنٹ ماں تمپ ءِ کبرستان ءَ کل ءُ کسارت کنگ بہ بیت ءُ شهید ڈاکٹر ھالد ءِ مانش ءِ کش ءَ آئی ادیراہ بہ بیت داں آ سرجمیں بلوچ راج ءِ هالاں ناکو خالد ءَسر بہ کنت گوں شهیداں دیوان بکنت ،بلوچ ڈ یھ ءِ هالاں یک پہ یکءَ شهیداں بہ دنت –

چشکہ ساجد حسین ماں سویڈن ءَ شهید کنگ بیت ،مانش ئےِ ماں نظرآباد ءَ بیت ھمے وڑ ءَ بانک کریمہ ءِ مانش اوں ماں تمپ ءَ بہ بات داں بانک کریمہ ءِ مات چو کمبرءِ مات ءَ بانک کریمہ ءَ پہ نازینک ماں کبرستان ءَ کل ءُ کسارت ءَ بہ بارت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بولان ءَ دژمنیں پوج ءِ پانگس سر ءَ اُرش کُتگ یازدہ کارمند کُشتگ ءُ پانگس گپتگ – بی ایل اے

دی بلوچستان پوسٹ

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں مروچی بولان ءِ دمگ شھرگ جھالاوان تنک ءَ دژمنیں پوج ءِ پانگس ءِ سر ءَ اُرش کُتگ پانگس گپتگ – اُرش ءَ دژمنیں پوج ءِ یازدہ کارمند کُشتگ – اے اُرش زمّہ واری ءَ بی ایل اے منّ اِت-

جارکش ءَ گوشتگ کہ بی ایل اے ءِ سرمچاراں مروچی مھکمیں منسوبہ بندی ءِ رِد ءَ دژمنیں پوج ءِ یک پانگسے ئِے سر ءَ اُرش کُتگ سوبمندی ءِ گون ءَ پانگس گپتگ – سرمچارانی اُرش ءُ گرگ ءَ یازدہ پوجی کارمند مُرتگ وھدیکہ بزدلیں پوج ءِ بازیں کارمنداں وتی سلاہ دور داتگ ءُ ٹپی ھمراہ یل داتگ ءُ تتکگ انت –
جارکش ءَ گوشتگ کہ بلوچ سرمچاراں دو اداراں تاں دژمنیں پوج ءِ پانگس ءِ چپ ءُ چاگرد انگیر ءَ برجاہ داشتگ ءُ مزنیں کساسے ءَ آھانی پوجی ساز ءُ سامان ءُ سلاہ وتی دستیگ کُرتگ انت گوں وت آورتگ انت –

جارکش جئیند بلوچ ءَ دیمتر ءَ گوشتگ کہ بے دودمانیں دژمن مروچی یک نیمگے سرمچارانی دست ءَ پروش ورگ انت ءُ ھر جنگ ءَ پد کنزگ ءُ بے سوب بوگ ءَ لاچار انت، دومی نیمگ ءَ بزدلیں دژمن لس مھلوک، بید سلاہ بستگیں سیاسی باسکاں ءُ ھاسکر زالبول ءُ چکانی سر ءَ وتی زلم ءُ زوراکیاں کنگ ءَ انت – مکاریں دژمن نوں تھنا بلوچستان ءِ تہ ءَ لس مھلوک بید ءِ سلاہ بستگیں سیاسی باسکانی سر ءَ زلم ءُ زوراکی آھانی کُشت کوش ءَ کنگ ءَ نہ اِنت بلکیں نوں دری ڈیھاں ھم بلوچ سیاسی باسک ءُ اھوالکارانی شھید کنگے ھم بندات کرتگ اِت –

جارکش ءَ گوشتگ کہ بلوچ لبریشن آرمی بلوچ راج ءِ ناکہ تھنا آجوئی بلکیں آئی ءِ پھازگ ءَ ھم وتی اولی پرز لیکیت – ما بلوچ لس مھلوک چُک ءُ زالبولانی شھیدی ءَ بے توار بوگ ءُ دژمن ءَ مھار یل دات نہ کن ایں – مروچیگیں اُرش زرگپتیں دژمن ءِ ھاتر ءَ یک کسانیں دروشمے – اگاں مئے لس مھلوک چُک ءُ زالبول دژمن زوراکی بلوچستان یا دری ڈیھاں مھپوز نہ انت گڑا دژمن ءِ ھم شھری زالبول پھازگ نہ بنت دژمن ھما وڑیں جنگے بلوچ ءِ سر ءَ کنگ انت ما ھما جنگ ءَ دژمن ءِ سرڈگار پنجاپ ءَ بندات کنگے پُرزوریں داریں –

نبشتانک: کریمہ استیں بلوچ اھد ءِ نام

نبشتہ کار: ھدایت بلوچ

دی بلوچستان پوسٹ

بانُک کریمہ پکرے ءِ یک لیکھے ءِ رُژنائی یے ءِ نام اِنت پہ بلوچ ءِ باندات ءَ ۔ بانک کریمہ بلوچ راج دپتر ءِ تھا یک روشنائیں اھدے ءِ بستار ءَ داں ابد مان اِیت ءُ ابدمان اِنت کسے اے گپ ءَ مہ گوش اِیت کہ بانُک مئے میان ءَ ساڑی نہ اِنت بانک راج ءِ دلانی تھا جزبگانی تھا سما ءُ سسا ءِ تھا مدام دْرپشگ ءَ اِنت آئی ءِ پگر ءُ لیکہ وت راجی جنز ءِ رھشونی ءَ کنگ ءَ اِنت بلوچ زھگ ءُ زالبول ورنا ءُ کماش کلیناں پہ آجوئی ءِ جنز ءَ جنزگ ءِ سکین ءَ دیگ ءَ اِنت من ءَ ھمے لبز شات نہ بیت کہ بانک ءِ ارواہ ءَ سپر کتگ بلکیں بانک ءِ ارواہ بلوچستان دگہ چار کنڈ کنڈ ءَ آجوئی ءِ روانکانی توار ءِ بُرزتریں توار اِنت ءُ پہ آجوئی ءَ سپر کنان اِنت۔ پرچا کہ بانُک ءِ پکر زندگ انت ۔ آئی ءِ داتگین درس زندگ انت ۔ بانُک مروچی بلوچ راج ءِ دلانی دریکگ جوڑ بوتگ ۔

بانُک ءَ پہ زبانِ زمین ءُ راج ءِ آجوئیں باندات ءَ وتی سوگاتیں سر داتگ پہ بلوچ ءِ باندات ءُ ابدمانی ءَ آئی ءِ داتگیں کُربانیانی ھساب ءُ داد گوں ما ھچبر بوت نہ کنت ۔۔ پرچا کہ بانُک ءَ وتی نازاکیں زند سرجم ءَ پہ بلوچ ءِ باندات ءَ ندر کُتگ ات ۔
بانک ءَ وتی لوگ یلہ داتگ ات وتی مات ءُ برات گھار یلہ داتگ اَنت ۔ وتی دزگھارنی ھمنیادیں دیوان یلہ داتگ اَنت وت ءَ را بزگ کُرتگ اَت ھچ وتی زند ءِ وشی ءُ مراد دیم ءَ نیاؤرتگ ات ۔ ھر وڑیں گم سکّی ءُ سوری برداشت کُرتگ بلے دائم مئے دپ ءَ ھمے گپ بوتگ کہ بانُک کریمہ کینڈا شُتگ ھیش کنت سَیل ءُ سوادی بیت وشھال ءُ ایمن بیت بلے بانُک پہ سیل ءُ سواد ءَ پہ تر ءُ تاب ءَ کینڈا ءَ نہ شُتگ ات بلکین بانُک ءَ پہ بلوچ باندات ءَ رُژنائی ءِ پیشدارگ ءَ درانڈیھی ءُ درملکی سگّ اِتگ ات ۔

بانُک ءَ درانڈیھی ھچ دوست نہ بوتگ ۔ بلے وتی بزگین راج ءِ چہ زوراک ءُ زالمانی دست ءَ رکینگ ءِ جُھد ءَ وتی بلوچ کومبءِ آواز جوڑ بوتگ ءُ ھپت دریا ءَ پُشت درامدانی تھا تھنائی ءِ ابیتکیں بازاراں ۔ ھمُک روچ بلوچ ءِ بے وس ءُ بزگیانی بلوچ ءِ سرَ بوتگیں زوراکیانی کسہ کوار ءَ کتگ ات ءُ بلوچ توار جوڑ بوتگ ات بلوچ گار ءُ بیگواھیں بچانی شھید ءُ ژانگولیں جونانی اکس گون بوتگ انت دگانی سر ءَ اوشتاتگ کہ دری کوم بزان انت کہ بلوچ چینچک لگتمال انت ۔ چینچک کیامت اِنت کجام دردانی دیمپان اِنت۔

بانک ءَ وتی راجی ھک ادا کُرتگ ءُ اچ ما سر زاھری جُدا بوت ۔ بلے مئے گمان ءَ مئے ھیال ءَ مئے پگر ءُ سسا ءَ مئے لیکہ ءَ ھر وھد ءَ زندگ اِنت سد سلام ھما مکھیں مات ءَ کہ بانک ءِ رنگیں چُکے پیداگ کُرتگ ءُ پہ راج ءِ باندات ءَ ندر ئےِ کتگ اے رنگیں شیرزال کرناں ودی نہ بنت بلے بانک جھد ءُ جپا ءُ تربیت ءَ چے مرچی بازیں سرے پیداگ بوتگ کہ آ بانک ءِ ارمانانی راھے مساپر اَنت کہ اے راہ بلوچ ءِ اجوئیں زند ءِ مانزمان اِنت ما پہ پھر اے گپ ءَ گشت کنیں کہ شھید کریمہ ءِ کاروان راھی اِنت داں منزل ءَ ھنکین بکنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچستان ءِ دمگ بولان ءَ ناشُناسیں سلاہ بندیں مردماں پاکستانی پوج ءِ پانگس ءِ سرا ٹوھیں اُرش ءِ کُتگ ءُ پانگس وتی کبزہ ءَ کُتگ-

گیشیں ھالانی رِد ءَ شاھرگ ءِ دمگ جھالاوان ءَ تھنک ءَ ناشُناسیں سلاہ بندیں مردماں پاکستانی پوج ءِ پانگس ءِ سرا اُرش کُتگ – اُرش ءَ پاکستانی پوج ءِ بازیں کارندھانی مرگ ءُ زدگ بوھگے ھال انت –

دنیگت ءَ سرکاری بنشون ءِ نیمگ ءَ اے درگت ءَ ھچ وڑیں درشان شنگ کنگ نبوتگ، زانگ بہ بیت بولان ءُ بلوچستان ءِ ایندگہ دمگاں پاکستانی پوج ءِ سرا بوتگیں اُرشاں گیشتر بلوچ سلاہ بندیں گل من انت بلے دنیگت ءَ چہ کجام ھم سلاہ بندیں گلانی نیمگ ءَ ھچ وڑیں درشان شنگ کنگ نبوتگ۔

دومی نیمگ ءَ ھندی واکدارانی نیمگ ءَ ھم زانتگ ھچ پئیمیں سرپدی ھال درشان نہ کُتگ۔

دی بلوچستان پوسٹ

پاکستان ءِ چیریں ادارھانی نیمگ ءَ چست کن بجن چگل دیگے پالیسی ءِ جوڑ کرتگ ءُ مروچی چیریں ادارہ بلوچ ءِ چُکچینی ءَ گلائیش انت – ماما قدیر

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ زھر شانی بنجل برجاہ، مروچی زھرشانی بنجل ءَ چار ھزار ءُ یک سد ءُ ھپتاد دو روچ سرجم بوتگ –
بلوچ یکجھتی کمیٹی ءِ باسک آمنہ بی بی، ماہ گنج بلوچ، بلوچ رائٹس کونسل ءِ وھاب بلوچ ءُ دگہ مردماں بنجل ءِ تر ءُ تاب کُتگ بیگواھیں مردمانی کھولانی گوم ءَ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ باوست کنان ءَ گوشتگ کہ راجدپتر ءَ دُرسانی کرد بیان کُرتگ ءُ کسے ءِ گوم ءَ وتمانی نہ کنت- پہ بلوچ راج ءُ سرڈگار ءِ ھاتر ءَ ھر کس ءَ دیمونی داتگ مروچی آ بلوچ راج دپتر ءِ سرتاک اَنت ءُ ھما مردم کہ بھا بوتگ انت راجدپتر آھانی زکر ءَ ھم کنت –

آئی ءَ دیمتر ءَ گوشتگ کہ راجدپتر اے گپ ھم مارا شری ءَ گْوش ایت کہ ھما راج کہ چہ ایردستی ءَ رکیتگ انت کہ آھاں باکردیں، نہ کُٹوکیں ءُ پرایمنیں جد ءُ جھد ءَ تیوگیں مردم ودی کرتگ اَنت –

ماما قدیر ءِ گوشگ ات کہ پاکستان ءِ چیریں ادارھاں بجن بہ کُش چگل دئے پالیسی ءِ جوڑ کرتگ ءُ مروچی چیریں ادارہ بلوچ چکچینی ءَ کنگ ءَ اَنت – بلوچستان ءِ تہ ءَ دمگی ڈیت اسکواڈز جوڑ کنگ بوتگ –

ھمے میان ءَ ماما قدیر بلوچ ءَ بیگواھیں انسانی ھکانی باسک راشد حُسین ءِ بیگواھی ءَ دو سال سرجم بوگ ءَ گوشتگ کہ بلوچستان ءَ ھوار دری ڈیھاں بلوچ باسکانی نشانگ کنگ بندات بوتگ اَنت – کریمہ بلوچ ءُ ساجد حُسین ءِ کوش ءَ پیسر بیست ءُ شش دسمبر دوھزار ءُ ھژدہ ءَ انسانی ھکانی باسک راشد حُسین چہ متحدہ عرب امارات ءَ چیریں ادارھاں اوار جتگ ءُ بیگواہ کُتگ ءُ پد ءَ شش ماہ ءَ پد پاکستان ءِ ھوالہ کنگ بوتگ بلے آ دنیگت ءَ بیگواہ انت –

آئی ءَ گوشتگ کہ باند ءَ یکشمبے ءَ کراچی پریس کلب ءِ دیم ءَ سندھ ءِ نیٹورک وائس فار بلوچ مسنگ پرسنز، وائس فار مسنگ پرسنز آف سندھ ءِ نیمگ ءَ چہ راشد حُسین ءِ زورانسری آوار جنی ءِ بگیری ءَ زھرشانی کنگ بیت – آئی ءَ چاگردی ءُ سیاسی ءُ درسیں تکاں گوں بندوکیں مردماں چہ لوٹ کتگ کہ آ اے زھرشانی ءَ بھر بہ زور انت ناھکّی ءُ زوراکی ءِ بگیری ءَ وتی توار ءَ چست بہ کنت –

دی بلوچستان پوسٹ

نامی ئیں بلوچ زالبولیں رھشون ءُ بلوچ نودربر گل ازات ءِ گوستگیں سرکماش بلوچ راجی زرمبشت ءِ رھشون کریمہ بلوچ ءِ کوش ءِ بگیری ءَ زھرشانی کنگ ءَ بلوچستان ءِ بنجاھی شھر شال ءُ تیاب دپی دمگ پسنی ءَ زالبولانی دزگیری ءِ ھاتر ءَ پاکستانی پوج ءِ نیمگ ءَ چہ زھرشانی کنوکیں زالبولانی لوگانی سر ءَ بیڑ برتگ-

اھوالکار ءِ رِد ءَ پسنی ءَ زھرشانی ءِ رھشونی کنوکیں ورنا شیراز اکبر ءِ لوگ ءِ سر ءَ بیڑ برتگ بلے آ لوگ ءَ ساڑی نہ بوتگ –
دمگی مردمانی رِد ءَ پوج ءِ کارمنداں شیراز اکبر کھول ءَ دمکی دیگ ءَ ھوار آھانی یک گھارے ءِ درگت ءَ ھم جست پُرس کُتگ کہ آ پسنی ءِ زھرشانی ءَ ھوار بوتگ – اھوالکار ءِ رِد ءَ اے گھار ءِ دزگیری ءِ ھاتر ءَ ھاتر ءَ دگے جاھاں ھم بیڑی برجاہ اَنت –
چاگردی رسانکجاھاں پسنی ءَ ایم آئی ءُ آئی ایس آئی ءِ کارمندانی چیریں وڑے ءَ کسانیں تامر ءِ گرگ ءُ شنگ کنگ بوتگ- سیول ڈریس تھا لشکری کارمند زاھر بوگ ءَ انت- مردمانی پجار کارڈ آں چارگ ءَ انت –

دومی نیمگ ءَ بلوچستان ءِ بنجاھی شھر شال ءَ اسد یوسف ءِ گھار ءِ لوگ ءَ ھم پاکستانی پوج ءَ بیڑ برتگ ءُ کھول ءِ موبائیل پون دستیگ کُرتگ انت –
اھوالکار ءِ رِد ءَ پاکستانی پوج ءِ کارمنداں اسد یوسف ءِ گھار ءَ ھوار ایندگہ مردم بیھار داتگ ءُ مکن کُرتگ انت کہ زھرشانی ھوار مہ بہ اِت –

سرکار ءِ نیمگ ءَ چہ دنیگت ءَ دؤئیں وئیلانی درگت ءَ ھچ وڑیں درشان دیم ءَ نہ اتکگ –

بلوچستان ءِ سیمسری دمگ چمن ءَ پِت ءَ وتی دو جنکیں چُک تیرانی آماچ کُتگ ءُ کُشتگ اَنت –

دی بلوچستان پوسٹ

سربوتگیں ھالانی رِد ءَ بلوچستان ءِ دمگ قلعہ عبداللہ ءِ سیمسری ھند چمن ءَ پِت ءَ وتی دو جنکیں چکانی سر ءَ تیرگواری کُتگ ءُ دوئیں چُک کُشتگ انت –
لیویز بنشون ءِ رِد ءَ وئیل چمن ءِ دمگ مردا کاریز دگ ءِ سر ءَ دیم ءَ اتکگ – کہ پت ءَ وتی دوئیں چُک تیرانی آماچ کُتگ ءُ کُشتگ انت ءُ تتکگ ءُ شُتگ –

لیویز ءِ رِد ءَ ھژدری چار ءُ ٹپاس ءِ ھاتر ءَ جون نادراہ جاہ ءَ برگ بوتگ انت – وئیل ءِ درگت ءَ گیشیں پٹ ءُ پول برجاہ انت، کُشندہ زوت دزگیر کنگ بیت –

بلوچ یکجھتی کمیٹی ءِ نیمگ ءَ ڈیرہ گازی ھان ءَ بلوچ نودربر گل آزاد ءِ گوستگیں چیئرپرسن کریمہ بلوچ ءِ کینیڈا ٹورنٹو ءَ ناھکیں کوش ءِ ھلاپ ءَ زھرشانی –

دی بلوچستان پوسٹ

زھرشانی روانک ڈیرہ گازی ھان ءَ کالج چاراہ ءَ بندات بیتگ ءُ شھر ءِ جتا جتائیں دگاں تران بیتگ ءُ پریس کلب ءَ مُچے ءِ دروشم ءَ سر بیتگ –

زھرشانی کنوکانی دستاں کریمہ بلوچ ءِ اکس ءُ انساپ ءِ ھاتر ءَ نبشتگیں تاک دستاں بیتگ اَنت ءُ روانک ءَ بھر زیروکیں مردماں اوگام جنان ءَ کریمہ بلوچ ءِ کُشندھانی پدراھی ءِ لوٹ کرتگ –

زھرشانی ءَ نودربر، سیاسی پاٹی، چاگردی جھدکار ءُ زالبول ءُ چکاں بازیں کساسے ءَ بھر زرتگ –

زھرشانی ءَ جتا جتائیں مردماں تران کنان ءَ کریمہ بلوچ ءَ را سھر چکیں دروت ندر کرتگ ءُ چہ کینڈا ءِ سرکار ءَ لوٹ کرتگ ءُ گشتگ کہ آ کریمہ بلوچ ءِ کُشندھانی پَٹ ءُ پول ءَ بہ کنت ءُ بلوچ راج ءَ ناھکیں کوش ءِ دلجمیں گپاں دست ءَ بہ دنت –

آیاں گوشت کہ بلوچستان ءَ پوجی آپریشن ھمک وھد بیگ ءَ اَنت ءُ بلوچ سیاسی مردم پوجی لشکر کشیانی پاشک کنگ ءَ درانڈیھاں شتگ اَنت اود ءَ ھم وتی ھکانی جست گیری ءَ بلوچ سیاسی مردم کُشگ بیگ ءَ اَنت-

آیاں گوشت کہ پیسر ءَ ساجد ھسین ھمے وڑ ءَ آوار جنگ ءُ شھید کنگ بیتگ ءُ چریشی ءَ پد کریمہ بلوچ ھم آوار جنگ ءُ شھید کنگ بیتگ –

آیاں گْوشت کہ دشمن ھمے سرپد بیت کریمہ بلوچ ءِ جنگ ءُ گار کنگ ءَ بلوچ زرمبشت ھلاس بیت اے آئی ءِ بے سماھی اِنت کہ مروچی ھمک بلوچ جنک کریمہ جوڑ بیتگ ءُ دگانی سر ءَ وتی ھکانی پد جنگ ءَ اَنت –

آیاں گْوشت کہ کریمہ بلوچ ءَ بلوچانی ھما رھشون بیتگ کہ آئی ءَ بلوچ جنز ءَ زالبول ءُ زیردستانی واستا یک توارے بیتگ ھمے توار ءِ ھلاس دشمن ءَ گران کپ ایت ءُ کریمہ بلوچ ءِ ھون ءَ آشوب ءِ گام ترند تِر بنت –

آیاں گْوشت کہ بلوچ مھلوک ءِ سر ءَ اے اولی زوراکی نہ اِنت بلوچانی سر ءَ زُلم ھما وھد ءَ بندات بیتگ اَنت کہ ریاست ءَ بلوچ زمین ءِ سر ءَ زورگری کرتگ ءُ ھمک وھداں بلوچ لیڈراں آوار جنگ ءُ بیگواہ کنگ ءَ اِنت –

آیاں گوشت کہ ریاست ءَ بی ایس او ءِ رھشون زاکر ءَ ھوار بازیں ورنایے آوار جتگ ءُ بیگواہ کرتگ اَنت –

آیاں گْوشت کہ کریمہ بلوچ ءِ کوش ءَ ما ھما رنگ ءَ سرپد بہ ایں کہ گوست ءَ ریاست ءِ نیمگ ءَ بلوچستان ءَ برجاھیں پوجی لشکر کشی بیگ ءَ اَنت چریشی ءَ کریمہ بلوچ ءِ کُوش ءِ زمہ وار ھم پاکستانی چیریں ادارہ اَنت –

ھمے وڑ ءَ سوئزرلینڈ ءُ برلن ءَ پاکستانی ایمبیسی ءِ دیوال ءَ کریمہ بلوچ ءِ بینر جنگ بیتگ ءُ بینر ءِ سر ءَ کریمہ بلوچ ءِ کوش ءَ پاکستانی چیریں ادارھانی نیمگ ءَ گوشگ ءَ اَنت –

ھمے وڑ ءَ بی این ایم ءَ امریکہ ءُ ندرلینڈ ءَ کریمہ بلوچ ءِ کوش ءِ ھلاپ ءَ زھرشانیانی جار جتگ –

زانگ بہ بیت کریمہ بلوچ بیست دسمبر ءَ بیگواہ بیتگ ءُ بیست یک دسمبر ءَ آئی ءِ جون کینیڈا ءِ شھر ٹورنٹو ءَ دزکپتگ بلوچ سیاسی گل، بلوچ مھلوک ءُ بلوچ یکجھتی کمیٹی ءِ نیمگ ءَ کریمہ بلوچ ءِ کوش ءِ ھلاپ ءَ بلوچستان ءَ ھوار درملکاں ھم زھرشانی درچ برجاہ اَنت ءُ زھرشانی درچ دراج کش کنگ بیتگ اَنت –

بلوچ مھلوک ءِ گوشگ ءِ اِنت کریمہ بلوچ ءِ کوش اناگتی نہ بیتگ بلکیں آ زور آوار جنگ بیتگ ءُ شھید کنگ بیتگ –

دومی نیمگ ءَ ٹورنٹو ءِ پولیس ءَ بنداتی ھالانی تہ ءَ کریمہ بلوچ ءِ بیرانی ناگتی گُشتگ ءُ گیشیں پَٹ ءُ پول ءِ ودار گوشتگ –

نبشتانک: آجوئی ءِ چیدگ کریمہ بلوچ

نبشتہ کار: زهیر بلوچ

دی بلوچستان پوسٹ

“آزمان پہ تئی ترانگاں کُد اِیت
گُلزمین تئی بچکنداں زَر اِیت “

هردیں کہ یک راج ءُ زمینے ءِ سر ءَ باروٹی ءُ دَری زوراک کاینت زورگِر بنت گُڑا آ راج وتی راجی پجار ءُ وتی گُلزمین ءِ آجوئی ءَ پہ جهُد کن اَنت بلوچ راج اوں چہ هما راجاں یکے کہ وتی ماتیں گُلزمین ءِ سر ءَ باروٹیانی زوراکیانی بگیری ءَ پاد اتکگ ءُ وتی راجی آجوئی ءَ پہ وتی وس ءُ واک ءَ جهُدے بندات کُتگ-

1948 ءَ بِگر داں روچ ء مروچی اے راجی جُهد برجاه انت اے جهُد ءِ پِڑ ءَ بلوچ ءَ باز سَر بِبا داتگ باز دیمونی داتگ ءُ انگت همُک دیان اِنت، زورگِریں اِستان داں زورگری ءِ روچ ءَ بِگر مروچی بلوچ ءِ پروش دیگ ءِ هاتر ءَ وتی سرجمیں زور ءَ کارمرز کنگ ءَ اِنت همک روچ بلوچ پُسگاں بیگواه کنگ ءُ شهید کنگ ءَ انت-

همے راجی جُنز ءِ تہ ءَ یک شیرزالیں بلوچ جهُدکارے زوراکیانی دیم ءَ پاد کیت چو باتیل ءَ مِک بیت اے شیرزال بانُک کریمہ بلوچ اِنت کہ وتی راج ءِ بزگی لگتمالی ءُ ایردستی ءَ وتی چماں گوں چار اِت نہ کنت بانُک کریمہ بلوچ وتی راج ءِ پدمنتگی ءَ مار اِیت ءُ جیڑ ایت کہ ما داں کد اے گُلامی ءِ توک ءَ وتی گُٹ لوپ کنیں. بانُک چو چراگے ءَ تھاری ءَ پروش دیان بیت بلوچ ءِ لوگ لوگ ءَ روت برے شال ءُ برے کراچی برے آواران ءُ مند ءَ وتی مات ءُ گهُاراں وتی ورنایاں راجی جُنز ءِ بابت ءَ آشنا کنت وتی راج ءَ جُهد ءِ سِکین ءَ دنت وتی راج ءَ وشهالیں بانداتے ءِ واب پیشدار اِیت-

زورگِر چہ بانُک ءَ بیمے آماچ اَت بانُک ءِ پروش دیگ ءِ هاتر ءَ وڑ وڑیں پندل ساز اِیت ئِے بلوچ نودربرانی بیگواهی بلوچ جهدکارانی شهید کنگ ءِ رِد گیش بوتگ ات. بلے باُنک گوں مُهکمیں جوزگ ءَ جُنزان ات زورگِر هرچ وڑ ءَ بے سوب بوت. برے بانُک ءِ زھرشانیانی سر ءَ اُرش کُت ئِے ءُ برے باُنک ءِ لوگانی سر ءَ وتی زوراکی یے ئِے کُت انت بلے بانُک ات کہ جُنزان ات جُهد ءَ ات روان ات چو هار ءَ ملان اَت چہ وتی راجی جُنز ءَ هچ پُشت کِنز نہ بوت وتی زند ءِ سرجمیں وشی یے ئِے بِبا دات انت-

بی ایس او ءُ آجو بلوچستان ءِ اوگام لوگ لوگ ءَ بانُک ءَ سر کُتگ کریمہ آجوئی ءِ چیدگ اَت کریمہ گلزمین ءِ هکیگیں اوبادگ ات. کریمہ هما نام اَت کہ بلوچ راجدپتر ءِ تہ ءَ مُدام اولی سْرپاں مان ایت-

بگند ءِ زورگِر مروچی شادمانی ءَ انت کہ زورگِر ءَ کریمہ چہ بلوچ راج ءُ بلوچ جهُد ءَ پُل اِتگ بلے اے زورگریں اِستان ءِ نابزانتی اِنت کریمہ ءِ سِنچ مروچی همُک بلوچ ءِ تہ ءَ زندگ اِنت کریمہ هما چراگ انت کہ هرچ زوراکیں گوات ءِ دیم ءَ بلان بیت بلوچ راج کریمہ ہ گیچین کُتگیں کِشک ءَ جُنزان بیت هما کِشک کہ کریمہ داں گُڈی ساه ءَ جُنزان بوتگ کریمہ ءِ دیستگیں واب آجو بلوچستان الم سرجم بیت بلوچ راج کریمہ ءِ دیستگیں واب ءَ مُرادانی منزل ءَ سرکنت-

نمیران انت شهید بانُک کریمہ بلوچ
بلوچستان آجو بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شیر: کینگ

شائر: عمرمراد

دی بلوچستان پوسٹ

پرچا نہ زاناں زندگاں
وابے نہ رنگے گندگاں
زند ءَ چَرے مَرگے گِہیں
اَستاں بلئے شرمِندَگاں
بے ھالاں چہ تَنّ ءُ شُداں
لاچاری ءِ سَہتاں رُداں
مِکّیں ھیال ءِ گُمبداں
گواتانی شِیکاں بُنگِراں
نودانی سرشَنزاں کُداں
ریش ءُ من ھنچو ٹپّی آں
چُنڈ چُنڈ ءُ بہر ءُ کپی آں
زند ءِ مُجانی سیاھیاں
پرچا من مہر ءِ راھی آں
پرچا کَلم دست ءَ کُتگ
پرچا من لِکھاں شئیر ءُ گال
سؤت ءُ سِپَت، اِشک ءُ وپا
پرچا من لوٹاں ایمنی
مہنو مُلُریں بے وڈی
برمشاں سمینانی گُڈی
موتکیگ ایں ھنچو بانڈی
گریت ایں گوں نوداں ساوڈی
نازینک نہ جنت ایں لئے لَڈی
نندیت ءُ جیڈیت بُڈبُڈی
ھرشپ گوں ھونیں دیدگاں
استالاں جُست ءُ پُرس کنت
گاریں کدی واتر کن اَنت
باریں کدی واتر کن اَنت؟
گاھے گوں کؤش ءَ تران کنت
راجی شہیداں دنت سلام
ساڈائیت جنگولاں وتی
مَلّ ءُ نہ تُرسیں زھم جناں
مِکّیں سر ءُ سُہر دیدگاں
لَجّانی دیمپانیں جوان
نرمیں دل ءُ سنگ سینگاں
ھر وھد بچار پُر کینگاں
پہ بدواہ ءُ ھُکّی گُلّڈاں
راج ءَ پہ شَہد ءُ بینگاں
ھاک ءِ وتی دیوانگاں
وانِندگ پُر زانگاں
ماراَنت زمین ءَ جنّت ئے
گرداَنت پہ شان ءُ ازت ئے
پرچا نہ زاناں زندگاں
وابے نہ رنگے گندگاں
ھون اَنت چو پُل ءَ سرپتگ اَنت
جون انت کہ دمکاں کپتگ اَنت
دُراھیں منی دوستیں کَس اَنت
سیاداَنت ءُ ھَکیں وارِس اَنت
براس انت ءُ باسک اَنت باھڈیں
یہیٰ ءُ دلجان ءُ کدیر
شیر ءُ گُلام جان ءُ مُنیر
کیوم ءُ الیاس ءُ ھپیز
میران ءُ سالونکیں ھمید
بالاچ ءُ کمبر یا مُرید
لکھ ءَ چہ گیش بنت ایں شہید
بدواہ ءَ گوں من چو کُتگ
رَستر نہ کنت گوں رستر ءَ
انسان ءِ ارزِشت ءَ نہ زانت
اسلام ءِ راھبنداں دراِنت
زندانیں براتانی منی
اَست ءُ سلامت زندگ ءَ
دنتان ءُ ناکُن در کُت اَنت
جان اِش گوں مِگرازاں چِت اَنت
دیدوک پہ گوندوچ سُپتگ اَنت
لنکُک پہ ھرّات بُرّاِتنت
بدواہ تمردیں اے وڈا
آوار جنت لجّاں منی
مہناز ءُ انجیر دامُنیں
بانُک زرینہ بُرتگے
ھانی ءِ شار ءَ دست جنت
پرچا نہ زاناں زندگاں
وابے نہ رنگے گندگاں
کینگ چو مَستیں لیڈہ ءَ
دِرّیپ اَنت ءُ چامپُلی جن اَنت
بندگ نہ بنت ماں سینگ ءَ
سِنداَنت مہاراں آسنیں
مہرانی آواریں دل ءَ
جنگانی تیجارے جتگ
لانک ءَ بِہ بنداں ھنجرے
شالا بباں من کمبرے
بڈّا بہ بیت ایں گُرکی ئے
بدواہ ءَ سد 100 کپّ ءَ کناں
پنجاہ ءُ شش 56 تیرے جناں
ھُوشتے کناں چو اَژدھا
نکش ءُ نشانے گار بہ بنت
ھلک ءُ زُبانے گار بہ بنت
نامے ماں داستاناں مہ بیت
گواھے ماں آزماناں مہ بیت
پوڈے ماں آپ ءَ ایر برؤت
ھپتیں زمیناں چیر برّؤت
انگت منا اوپار نہ رؤت
انگت منا تاھیر نئیت
بیھ ءَ مئے بیر ءِ ایر بَرگ
تاں کیامت ءَ سیاھیں شگان
بدواہ ءَ ھرچی کُت یا کنت
نیست ایں گِلگ مارا بلئے
لہتیں بلوچیں راھبراَنت
دُزّ ءُ لگوریں لیٍڈر اَنت
بدواہ ءِ چانیگ ءَ زَراَنت
مُلا ءُ میر ءُ مُتبراَنت
پنجاہ پت ءِ ھم دروراَنت
لہتیں دو گالی شائراَنت
لہتیں گُشِندہ زاھر اَنت
گیگان ءُ گاجیل ءُ دپیل
پاکیں زُبان کُرتگ زلیل
زیمر زوال کپی گَزل
گُل گؤھر ءُ دُریں بتل
ھرچیز ءِ سؤداِش جتگ
ھرچ راہ ءِ دیما ڈَنگراَنت
ھرچی لکتمالیں بچار
بزّگ زمین دردِیگ زبان
مَنتگ مڈاہ نئے بُرزیں شان
رسم ءُ ربیدگ ھنچو زِیان
دستانی گونکو تامُراَنت
چاراَنت ھنچو برھنگی
ماراَنت ھنچو برھنگی
کاراَنت ھنچو برھنگی
ایجُوز مِنجوز جاتُواَنت
جِنّ ءُ دَتّکی ساھگ انت
نِیاراَنت پمّا دیمروئی
ساریں سر ءِ ھوش ءَ بَراَنت
لجّ ءُ ھَیاھاں پچگِراَنت
زانت ءُ سماھاں گار کن اَنت
نیم برھنگاں دانا گُشَنت
گران لجّاں نابُود ءُ گنوک
پمّا گُلامی پُسّگاں
ائیب اِنت وش ءُ شادِھی
چؤگان ءُ چاپ ءُ سمبہگ
سُور ءُ ائیداں ناچ کنئگ
پرچا نہ زاناں زندگاں
وابے نہ رنگے گندگاں
مرچی مہ لِکھاں راستی ءَ
باندات ءِ دیم ءَ چے گُشاں
من مات ءِ دیم ءَ چے گُشاں؟