TBP Balochi

دی بلوچستان پوسٹ

بازیں ھند ءُ دمگاں چہ گوستگیں روچ ءَ بمبگواریں بالگردانی سر ءَ تیرگواریاں ھوار مارٹر آس دیگ ءَ اِنت –

بلوچستان ءِ دمگ بولان ءَ پاکستانی پوج ءِ سر ءَ دو مزنیں اُرشاں پد پاکستانی پوج ءِ نیمگ ءَ لشکر کشی برجاہ اَنت کہ چریشانی تہ ءَ بمبگواریں بالگرد بھر زورگ ءَ اَنت ءُ اُرشاں پد زمینی لشکر تر ءُ گردانی سوب ءَ جنجالانی دیمپانی اِنت –

دمگی مردمانی رد ءَ بمبگواریں بالگرد جمبرو، تلانگ ءُ کمان ءِ کوھی دمگانی سر ءَ بال اَنت ءُ تیرگواری کنگ ءَ ھم گندگ بیتگ اَنت ھمے وڑ ءَ ھرنائی ءَ پوج ءِ بنجل ءَ پوجی سپاھیاں ھوار بازیں کچے ءَ بمبگواریں بالگرد سر بیتگ اَنت –

اشی ءَ ابید ھم جھالاوان، پنکی، لونی، میژداری ءَ ھوار کش ءُ گوری دمگاں چہ گوستگیں روچاں بازیں جاھاں پوج وھد وھد ءِ سر ءَ مارٹر آس دیگ ءَ اِنت – ءُ زمینی لشکر ءِ تر ءُ گرداں دمگ ءَ جانی ءُ مالی تاوانانی ھال سر نہ بیتگ اَنت –

زانگ بہ بیت گوستگیں ھپتگ ءَ بولان ءِ دمگ جھالاوان ءَ پاکستانی پوج ءِ بنجل ءِ سر ءَ ترندیں اُرش ءَ پد بنجل دستیگ کنگ بیتگ ءُ اُرش ءَ پاکستانی پوج ءَ جانی ءُ مالی تاوانانی دیمپانی کنگ کپتگ –

ھمے رنگ ءَ گوستگیں روچ ءَ جنگ زدگیں دمگ ءَ پوج ءِ گیشیں سپاھی اتکگ اَنت کہ اود ءَ پوج ءِ گاڑی کَل کرتگیں شوروانی گون ءَ نشانگ کنگ بیتگ –

گوستگیں تھ ئِے کارانی وزیر ءُ سینیٹر سرفراز بگٹی اُرشکارانی بگیری ءَ برزی لشکر کشی ءِ پرمان کرتگ – سرفراز بگٹی ءَ دزبندی کرتگ کہ اُرشکار ءُ آیانی کُمکارانی سوھازگی ءَ لشکر کشی کنگ بہ بیت اے درچ ءَ برزی لشکر ءِ کمک زور بہ بیت –

واکدارانی رد ءَ ھردوکیں اُرشاں پاکستانی پوج ءِ سوبیدارے ءَ ھوار نُھ کارندہ بیران وھدےکہ یک کیپٹنے ءُ سوبیدارے ءَ ھوار چارد کارندہ زدگ بیتگ اَنت-

ھردوکیں اُرشانی زمہ واری بلوچستان ءِ آجوئی ءِ لوٹوکیں سلاہ بندیں گل بلوچ لبریشن آرمی ءَ منّ اِتگ اَنت – گل ءِ جار جیئند بلوچ ءَ گوشتگ اَت پوج ءِ یازدہ کارندہ کُشتگ ءُ دومی اُرش ءَ دو کارندہ کُشتگ ءُ کیپٹنے ءَ ھوار ھپت کارندہ زدگ بیتگ اَنت –

جیئند بلوچ ءِ گوشگ اَت کہ اگاں مئے لس مردم ءُ زالبول ءُ چک دشمن ءِ زوراکیاں بلوچستان ءُ درملکاں پھریز نہ اَنت گڑا دشمن ءِ شھری ءُ زالبول ھم پھریز نہ بنت دشمن ھما رنگیں جنگ بلوچانی سر ءَ ایرگیجگ ءَ اِنت ما ھما رنگیں جنگ ءَ دشمن ءِ سرڈگار پنجاب ءَ ھم بندات کنگ ءِ زور ءخ داشت کن ایں –

بلوچستان ءِ دمگاں دو روچانی تہ ءَ اے دومی مزنیں اُرش اِنت چریشی ءَ پیسر پنجگور ءَ بمب تراکے ءَ دو مردم بیران ءُ ھشت زدگ بیتگ اَنت –

پنجگور ءِ بمب اُرش ءِ زمہ واری بلوچ ریپبلکن آرمی ءِ جارکش بیبگر بلوچ ءَ منّ اِتگ اَت –

بیبگر بلوچ ءَ گوشتگ اَت کہ ڈیتھ اسکواڈ ءِ کارندھانی گاڑی بمب تراکے ءِ نشانگ کرتگ ءُ سَے کارندہ کُشتگ ءُ یکے زدگ کرتگ –

ھمے وڑ ءَ کیچ ءِ دمگ مند ءِ کوھی دمگ سھریں کوہ ءَ پاکستانی پوج گوستگیں بازیں روچاں روگ ءَ گندگ بیتگ-

دمگی مردمانی رد ءَ گوستگیں شپ ءَ پاکستانی پوج بیست گاڑی ءَ دَہ پرپٹانی ھمراھی ءَ کوھی دمگانی تہ ءَ روگ ءَ گندگ بیتگ ءُ لاش کشیں گاڑی ھم ھمے دمگ ءَ روگ ءَ گندگ بیتگ انت –

دمگی مردمانی رد ءَ پوج دمگ ءَلشکر کشی کنگ ءَ اِنت ءُ سرکاری بنشونانی نیمگ ءَ تنی وھدی اے وڑیں ھال دیم ءَ نیاتکگ اَنت –

آواران ءُ تمپ ءَ پاکستانی پوج ءُ ایف سی ءِ نیمگ ءَ کریمہ بلوچ ءِ “کوش” ءِ ھلاپ ءَ زھرشانی کنوکیں لس بلوچ مھلوک ءُ بلوچ یکجھتی کمیٹی ءِ باسکاں بیھار دیگ بیتگ ءُ چہ زھرشانی کنگ ءُ روانک کشگ ءَ دارگ بیتگ اَنت۔

دی بلوچستان پوسٹ

سربیتگیں ھالانی رد ءَ بلوچ نودربر گل آزاد ءِ گوستگیں چئیرپرسن ءُ بی این ایم ءِ رھشون بانک کریمہ بلوچ ءِ بُنکی ھنکین تمپ ءَ زھرشانی کنوکیں مھلوک پوج ءَ داشتگ اَنت۔

گیشتریں ھالانی رد ءَ مھلوک بیھار دیگ بیتگ اَنت ءُ دزگیری ءِ ھم بے سوب ءِ کوشست کنگ بیتگ کہ زھرشانی کنوکیں زالبولاں پوج بے سوب کُتگ۔

کریمہ بلوچ ءِ “کوش” ءِ ھلاپ ءَ یکشلیں زھرشانی برجاہ اَنت ءُ ھمے رد ءَ مروچی سھب ءَ بانک کریمہ بلوچ ءِ بُنکی ھنکین تمپ ءَ آئی ءِ کوش ءِ ھلاپ ءَ زھرشانی روانک ءِ درآیگی بیتگ کہ پوج ءَ پہ زور داشتگ ءُ زھرشانی کنوکاں بیھار اش ھم داتگ۔

اے درگت ءَ بلوچ اسٹوڈنٹس ایکشن کمیٹی ءِ چئیرمین ڈاکٹر نواب بلوچ ءَ وتی ٹوئیٹر ءَ درشان ءِ تہ ءَ گُشتگ کہ “ چہ تمپ ءَ نا وشیں ھال پیداک اَنت۔”

ڈاکٹر نواب ءَ دیمترا گُشت کہ “ لشکر پر ایمنیں روانک ءِ کشگ ءَ نیلگ ءَ اِنت ءُ زالبول ھم کم شرپ کنگ بیتگ اَنت۔ روانک چہ بی وائی سی ءِ نیمگ یک ستاشانی ھاتر ءَ بیتگ۔”

دومی نیمگ ءَ بلوچ یکجھتی کمیٹی ءِ درشان ءِ رد ءَ آواران ءَ پاکستانی کارمنداں بلوچ یکجھتی کمیٹی آواران ءِ باسک بیھار داتگ اَنت ءُ سرجمیں میتگ تیرتج، سیاہ گزی، ھارونی ڈن، لانچ ڈنسر ءُ پیراندر انگیراں کُتگ۔ ءُ آواران ءِ نزیکیں ھنکین پوج ءِ سپاھیگ اوشتارنگ بیتگ اَنت۔

بلوچ یکجھتی کمیٹی ءِ رھشونانی گُشگ اِنت کہ مئے باسکاں گُشگ بیتگ کہ پاکستانی کارمنداں پون کُتگ ءُ بیھار داتگ کہ اگاں آیاں زھرشانی روانک کش اِت گُڑا آ چِست کنگ ءُ بیگواہ کنگ بنت۔ مروچی سھب ءَ پوج ءَ پریس کلب ھم بند کُتگ ءُ سپاھیگ اوشتارینتگ اَنت۔ ءُ بازار ءَ چیریں گل ءُ ھندی ڈیتھ اسکواڈز ءِ گردوکیں ٹولی یل کنگ بیتگ اَنت ءُ درستیں مردمانی چاریگ گیری کنگ ءَ اَنت۔

آیانی درشان ءِ رد ءَ دیریں دمگانی لوکل گاڑی دارگ بیتگ اَنت ءُ ڈرائیور بیھار دیگ بیتگ اَنت اگاں روانک ءَ رؤکیں مردم بازار ءَ سر کنگ بیت اَنت گُڑا آ وتی زمہ وار وت بنت۔ بلوچ یکجھتی کمیٹی ءِ رد ءَ بانک کریمہ ءِ گمانی اناگتی کوش ءِ ھلاپ ءَ مئے باسک مروچی زھرشانی کنگ ءَ دارگ بیتگ اَنت ءُ ھمے سوب ءَ مروچی بی وائی سی آواران ءَ وتی زھرشانی درشان کُت نہ کُتگ۔

زانگ بہ بیت بی ایس او آزاد ءِ گوستگیں چیئرپرسن کریمہ بلوچ گوستگیں ھپتگ ءَ بیست دسمبر ءَ یک شمبے ءَ بیگواہ بیتگ ءُ دو شمبے بزاں بیست ءُ یک دسمبر ءَ ٹورنٹو ءَ آئی ءِ جون آپ ءِ کِر ءَ دزکپتگ ۔

بانک کریمہ ءِ اناگتی مرگ ءِ ھلاپ ءَ بلوچستان ءَ زھرشانی یکشل ءَ برجاہ اَنت۔ شال، کراچی، گوادر ءَ ھوار بارکھان ءُ دگہ بازیں دمگانی تہءَ مزنیں کچے ءَ زھرشانی کنگ بیتگ اَنت ءُ دگہ بازیں دمگانی تہ ءَ زھرشانیانی جار ھم جنگ بیتگ اَنت۔

نبشتانک: ‏شکّلیں جنگانی پری زادگ

نبشتہ کار: نور مھمد نور

دی بلوچستان پوسٹ

‏دو روچ اِنت یک بدیں هالے منی گوشانی آتْراپاں گردان اِنت بلے منی دل اِنت کہ نہ منّ اِیت پہ من اِے باوری گپے نہ اِنت، وتی ءَ سرپداں کہ دیر اِنت وتی اندر ءَ مرتگ آں ، بلے مَرگ پہ ترا اِے وتسریں هالے دْروگیں گپے ، تئی پگر تئی جُهد اَنگت هم زندگ اِنت ءُ زندگ مان اِیت، کُجا تئی کردار ءُ کجا من گوں من چُشیں هچ لبز نیست کہ پہ تو نبشتہ ئی بہ کن آں بلے چُشیں هاٹیگ اوں منی تہ ءَ نیست کہ چُشیں گْرانیں گماں وتی تہ ءَ جاگہ دات بِہ کن آں ءُ چپت بہ باں ھچ مَگشاں، پمیشکہ دو لبز پہ وتی ناتوانی ءَ نبشتہ کنگ ءَ آں ءُ تئی اَکس دیما اِنت ‏بانک! تئی گُڈّی سپر تئی زندگ بوگ ءِ مانزمان اِنت ، اِے ارس ءُ هونانی سپر انگت هما داب ءَ برجاه اِنت-

‏هما کِشک اَنت مردم مَٹ بیتگ اَنت هما کِسہ اَنت بلے کارست دگر اَنت، مرچی پدا دگہ شورے بنا بیتگ ، پدا آه ءُ زاری اِنت پدا اکس اَنت ءُ مناں ، نہ سگّوکیں درد اَنت اِمبری ترا کَسی اَکس دست ءَ نیست ، تئی اکس اِنت کہ همک پیر ءُ جوان همک بْرات ءُ گُهار ءَ دست ءَ اِنت ءُ تئی لُنٹانی سر ءَ شیرکنیں بچکندے تالان اِنت کہ گْریتگیں چماں توان ءُ تاگتے بکشائیت اِے کشک ءِ مساپرانی راهشونی ءَ کنت‏ تئی توار تئی توار اَنگت هما داب ءَ مُهکم ءُ برجاه اِنت-

‏بانک! من هردیں لوٹاں کہ ترا بہ جیڑاں گڑا مات جمیلہ ءِ ترانگ ءَ الم کپ آں ءُ همے دمان ءَ بچکنداں کہ “شیر بلوچانی مادریں مات اَنت” کہ وتی سالونکیں بچ ءُ بانوریں جنکاں پہ واهگے رُودین اَنت پہ وتی زمین ءِ پاسداری ءَ کربان کن اَنت ءُ کنداں کندان ءَ آیانی ورنائیں جون ءَ کبرانی میار کن اَنت، پہ ما کبر زیبدار یا گلزمین ءِ آجوئیں دمگ-

‏ تئی چمانی تہ ءِ روکیں آس اِے گْواهی دَنت کہ چنچو هزاب چینچو درد تئی چماں دیستگ اَنت اِے زنده باد ءُ مرده باد ءِ نعرهاں ترا انچوش مهکم کرتگ اَت چو کہ بولان ءِ کلندریں کوه ءَ ات ئے‏پہ تو سرجمیں بلوچستان ارسیگ اِنت کوه درچک ءُ دار دْراه تئی جتائی ءِ آس بُن اَنت-

وهدے کہ من ترا وتا ءُ وتئی چاگرد ءِ مردماں جیڑاں تہ بژنیگ باں کہ اِے بزگیں راج دو روچ ءَ پد اَچ تو بے هال مہ بیت اسل ءَ راج ءَ میار هم نیست بزگ اِنت شُدیگ اِنت برے برے بے نسیبیں لاپ ءِ گماں چہ همک گم ءَ بے هال بیت.. جنگ ءِ تہ ءَ اِنت در پہ در اِنت همک روچ لاشے سمبهیت همک روچ نوکیں کارستے زُلم زورانی آماچ بیت-

همک روچ آه ءُ پریات اِنت پدا همک روچ یک ساه گِریں بے تواری یے مانشان اِیت. هرکس وتی روکیں دل ءِ لَهڑیں پاهارانی سارت کَنگ ءِ هاترا وتی رنگ ءَ جُهد ءَ اِنت بلے گپے زانئے من اِے رندی نہ لوٹاں کہ پہ ارزانی منی تہ ءِ روکیں آس سارت بہ بیت ، نہ لوٹاں اِے گم چہ کریابیں ڈوبر ءَ اِیر بئیت ءُ پہ مدامی گار بہ بیت من لوٹاں کہ همے روکیں آس همے رنگ ءَ منی دل ءُ جان ءَ ابد بہ مان اِیت-

‏تو سرپدئے ؟ تئی هم پگریں کُل هما سنگتاں سوگند وارتگ کہ پُشت ءَ چَک جنَگی نہ اِنت، دمبرگی نہ اِنت جنگجاه ءِ بامردانی همے پگر اِنت کہ کریمہ جُهد ءِ نام اِنت جُنزگ ءِ نام اِنت دم نہ برگ ءِ نام اِنت –

من هردیں کہ ترا جیڑاں تَوَنگر باں مُهکم باں پرچا کہ تو بلوچ ءِ گُلزمیں ءِ هما لاڑُکیں کاڑ ءِ تئی چم مدام پہ زمین راج ءُ زبان ءَ هون گْریوگ ءَ اتنت تئی تْراولیں پاد اِے گپ ءِ شاهدی ءَ دَینت کہ تو پہ راستی ءَ چینچو پند بُرّ اِتگ — تئی پگر بلوچستان ءِ همک کوه ءِ دلبند ءَ چو دردے ءَ رُستگ کہ هر بلوچ ءَ مارگی اِنت، دیم ءَ برگی اِنت

‏شکّلیں جنگانی پری زادگ ! تئ نام راجدپتر ءِ تاکانی سرا گوں هوناں نبشتہ اِنت تئی کِشتگیں درچکاں تاک ءُ بَر جتگ ، تئی دست ءِ بیرک تئی پُشت پداں چِتگ ءُ سرا بستگ پرچا کہ اِے راه ءِ مساپراں برے برے گور ءُ کپن هم نام ءَ نہ بیت-

‏گُڈ سرا ترا هال دیگ لوٹاں کہ تئی کاروان راهی اِنت هما رنگ ءَ کہ تو واب دیستگ اَت
‏هما سر ءُ هما سِنگ اِنت جنگ انگت برجاه اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بولان ءَ پوجی کاروان تراک ناکیں شوروانی نشانگ کُتگ دو کارمند کُشتگ ءُ ھپت ٹپی کُتگ اَنت- جیئند بلوچ

دی بلوچستان پوسٹ

بلوچستان ءِ دمگ بولان ءَ ناشُناسیں مردماں پاکستانی پوج ءِ کاروان ءِ سر ءَ بمب تراکے کُتگ، تراک بولان ءَ جھالاوان تنک ءَ کنگ بوتگ – تراک ءِ آسر ءَ پاکستانی پوج ءَ جانی ءُ مالی تاوان رس اِتگ –

اھوالکار ءِ رِد ءَ گوستگیں روچ ءَ پاکستانی پوج ءِ پانگس ءِ سر ءَ سلاہ بندیں مردماں اُرش کُتگ – آ اُرش ءَ پد پاکستانی پوج وتی دگہ بازیں کارمنداں ھمے دمگ ءَ آرگ ءَ بوتگ کہ نیم راہ ءَ پاکستانی پوج ءِ کاروان ءِ یک گاڑی یے تراک ناکیں شوروانی زد ءَ اتک ءُ لشکریاں جانی ءُ مالی تاوان رس اِتگ –

سرکاری بنشون ءِ نیمگ ءَ ھمے گوشگ بوتگ کہ اے اُرش ءَ شش پوجی کارمند ٹپی بوتگ اَنت-

دومی نیمگ ءَ بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے تراک ءِ زمّہ واری منّ اِتگ ءُ گوشتگ کہ مروچی مئے سرمچاراں بولان ءِ دمگ شاھرگ جھالاوان تنک ءَ پاکستانی پوج ءِ یک کاروان ئے تراکناکیں شوروانی نشانگ جوڑ کُرتگ- تراک ءَ دژمنیں پوج ءِ دو کارمند مُرتگ ءُ وھدیکہ پوجی کیپٹنے ءَ ھوار ھپت کارندہ ٹپی بوتگ اَنت-

جارکش جئیند بلوچ ءَ گوشتگ کہ بی ایل اے ءِ سرمچاراں پوجی کاروان ھما وھد ءَ نشانگ کُتگ کہ دژمن پوج گوستگیں شپ ءَ پوج ءِ پانگس ءِ دستیگ کنگ ءُ دژمن ءِ یازدہ کارندھانی کشوکیں سرمچارانی رندگیری ءِ ھاتر ءَ گیشیں سپاھی دیم دیگ ءَ بوتگ اَنت – سرمچاراں رندگیری کنوکیں دژمنیں پوج ءِ کاروان ءِ راہ ءِ سر ءَ تراک ناکیں شورو کل کُتگ تراکینتگ اَنت – تراک ءِ آسر ءَ دو کارمند ھما دمان ءَ مُرتگ ءُ پوجی کیپٹنے ءَ ھوار ھپت سپاھی ٹپی بوتگ اَنت، وھدیکہ یک گاڑی یے سرجمی ءَ تباہ بوتگ چریشی ءَ دژمنیں پوج یک رندے پد ءَ پدکنزگ ءَ لاچار بوتگ –

جارکش ءَ گوشتگ کہ بلوچ لبریشن آرمی ءِ جنگ یک آجو ءُ وت واجھیں بلوچستان ءِ جوڑ کنگ ءِ ھاتر ءَ انت داں ھما وھد ءَ ماں وتی گڈی منزل ءَ سر نہ بہ ایں، زورگپتیں پوج ءِ سر ءَ مئے اُرش برجاہ مان انت، ءُ زورگپتانی درآیگ ءَ تاں بلوچ راج ءِ پلامرزی ءُ جوانیں کمک ءَ اے اُرشانی تہ ءَ گیشی ارگ بیت اِنت –

بمب تراک ءَ ٹپی بوتگیں لس مھلوک ءَ چہ پھلی لوٹ آں ، چہ مھلوک ءَ لوٹ کن آں کہ ریاستی کامنداں گوں ھمک کاراں گِستا وت ءَ بہ کن اَنت – بیبگر بلوچ

دی بلوچستان پوسٹ

گوستگیں روچ ءَ بلوچستان ءِ دمگ پنجگور عیسی کھن زنگی ءَ فٹ بال گراؤنڈ ءِ نزیک ءَ ناشُناسیں مردماں ڈیتھ اسکواڈ کارمندانی گاڑی تراک ناکیں شوروانی نشانگ کُتگ، تراک ءِ آسر ءَ ڈیتھ اسکواڈ سَے کارمند ھما دمان ءَ بیران بوتگ ءُ یک کارندھے ٹپی بوتگ وھدیکہ تراک ءِ آسر ءَ سَے لس مردم ھم ٹپی بوتگ اَنت –

دومی نیمگ ءَ بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش زمّہ واری منّ اِتگ گوشتگ کہ گوستگیں روچ ءَ پنجگور عیسائی ءَ فٹبال گوازی ءِ ھلاس بوگے دہ ملٹ ءَ پد ڈیتھ اسکواڈ ءِ کارمندانی گاڑی ریموٹ کنٹرول بمب نشانگ کُتگ ، تراک ءَ ڈیتھ اسکواڈ ءِ کارمندانی سَے کارندہ مرتگ ءُ یکے سک باز ٹپی بوتگ – مُرتگیں کارندھانی تہ ءَ حسن جان ء محمد حُسین، رحیم جان ء دلجان، جاوید ء محمد جان جھمنند بوستان وھدیکہ زاھد ء محمد جان سک باز ٹپی بوتگ –
جارکش ءَ گوشتگ کہ اے کارندہ پنجگور بونستان ءَ شکیل پنام شکو ءِ چیردستی ءَ بلوچ راجی سرمچارانی شھیدی ءُ انوگیں پنجگور لشکر کشی ءَ تچکی ءَ ھوار بوتگ انت، کہ ھمے لشکر کشی ءَ گل ءِ جوانیں کماندار اُستاد ثناء بلوچ شھید بوتگ –

آئی ءَ دیمتر ءَ گوشتگ کہ اے کارندھاں پوجی پانگساں راشن سرکنگ ءُ سیاسی باسکانی آوار جنی ءَ ھوار دمگ ءِ تہ ءَ دُزی ءُ ڈنگی، بزگریں راج ءِ ننگ ءُ ناموس ءِ لگتمال کنگ ءَ ھم ھوار بوتگ انت –

جارکش ءَ گوشتگ کہ ما یکرندے پد ءَ پنجگور ءِ لس مھلوک ءَ چہ لوٹ کن ایں کہ آ ریاستی کارندھاں لس کاراں گستا بہ کن انت ءُ آھاں چہ دور بہ بنت، اے کارندھانی بگیری ءَ اے وڑیں اُرش دیمتر ءَ ھم برجاہ بنت –

جارکش بیبگر بلوچ ءَ گوشتگ کہ زیکیں تراک ءَ سَے مردمانی ٹپی بوگ ءَ ما آھانی کھول ءَ پھلی لوٹ ایں –

گُڈسر ءَ جارکش ءَ وتی درشان ءِ تہ ءَ گوشتگ کہ اے وڑیں اُرش بلوچستان ءِ آجوئی تاں برجاہ مان انت –

دی بلوچستان پوسٹ

سندھ ءِ بنجاھی شھر کراچی ءَ بیگواھیں انسانی ھکانی باسک راشد ھسین ءِ بیگواھی ءَ دو سال سرجم بیگ ءُ کریمہ بلوچ ءِ ناھکیں کوش ءِ ھلاپ ءَ وائس فار بلوچ مسنگ پرسنز ءُ سندھ نیٹورک ءِ نیمگ ءَ زھرشانی کنگ بیتگ وھدےکہ وائس فار مسنگ پرسنز آف سندھ ءِ باسکاں ھوار سندھی بیگواھیں مردمانی کھول ءُ چاگردی دامگ کارمرد کنوکاں زھرشانی ءَ بھر زرتگ –

زھرشانی ءَ راشد ھسین ءِ کھول، وائس فار بلوچ مسنگ پرسنز ءِ کسان کمک سرکماش ماما قدیر، بیگواھیں ڈاکٹر دین مھمد ءِ جنک مھلب بلوچ ءُ شبیر بلوچ ءِ گوھار سیما بلوچ ھوار بیتگ اَنت –

سندھ نیٹورک ءِ رھشوناں ھمے وھد ءَ گوشت: راشد ھسین ءَ ھوار سندھی، پشتون ءُ اردو گپ کنوک ءُ شیعایانی بیگواھی یک پیم ءَ زورانسری ءِ آماچ اَنت – زیردستیں راجاں اے جیڑھے سر ءَ جد ءُ جھد ءِ سوبمندی ءِ ھمتواری ءَ بیت کُت کنت –

زھرشانی کنوکاں گْوشت کہ انسانی ھکانی باسک پادمالی بلوچستان ءَ گوستگیں دھکاں گیش برجاہ اَنت بلے پادمالی گوستگیں دو دھکاں بیگواھیانی لڑ گیش بیتگ اَنت – اے وھداں بازیں کہ آیانی تہ ءَ نودربر، اھوالکار، وکیل، استاد، کواس ءُ ھمک تکاں بندوکیں ھزاراں مردم زورانسری ءِ بیگواھی ءِ آماچی دیمپانی کنگ کپتگ وھدیکہ سدانی کچ ءَ بیگواہ بیتگیں مردمانی زانگول کرتگیں جون دزکپتگ اَنت –

آیاں گْوشت کہ بلوچستان ءِ دمگ ھزدار توتک، پشین، پنجگور ءُ ڈیرہ بگٹی ءَ گاریں گور دزکپگاں انسانی ھکانی پادمالی ءَ یک دگہ درے گیش کرتگ اَنت مروچی وھدیکہ بلوچستان ءَ بلوچ رھشون بانک کریمہ ءِ درملک ءَ کوش ءِ سر ءَ زھرشانیانی تہ اَنت چریشی ءَ دو سال پیسر بیست ءُ شش دسمبر دوھزار ءُ ھژدہ ءَ انسانی ھکانی باسک راشد ھسین ڈنی ملک متھدہ عرب امارات ءَ زورانسری بیگواہ کنگ بیتگ کہ روچ ء مروچی ءَ بیگواہ اِنت –

گیشتر گپانی درنگازی راشد ھسین ءِ کھول ءَ گْوشت کہ راشد ھسین یک نودربرے بیتگ، بلوچستان ءِ دمگ ھزدار ءَ راشد ھسین ءِ چاردہ سالی ناکوزتک مجید زھری ءِ آوار جنگ ءَ پد آئی ءِ زانگولیں جون دزکپتگ، چریشی ءَ پد ھزدار ءِ نامی ئیں تاجر ھپتاد سالی ئیں ھاجی مھمد رمزان زھری اش تیرگواری کرتگ ءُ شھید کنگ بیتگ – وھد وھد ءِ گمزدگیں کھول ءِ مردم دزگیر کنگ بیتگ اَنت، لوگ ءُ کار ءُ بار سوچگ بیتگ اَنت ءُ بیھاری درچ برجاہ بیتگ اَنت – سرجمیں ٹک یک گزبناکیں زندگی ءِ آماچ بیتگ اَنت، پد ءَ آ لاچار بیتگ ءُ وتی لکانی مال ءُ دولت یلہ کرتگ ءُ دُبی ءَ شتگ اَنت –

آئی ءَ گْوشت کہ راشد ھسین ھم ھمے جاورانی دوچار بیتگ ءُ دُبی ءِ روگ ءَ لاچار بیتگ اود آئی ءَ مزوری کنگ بندات کرتگ بلے ڈنی ڈیھاں آ ھم پھریز کُرت نہ کرتگ – بیست ءُ شش دسمبر دوھزار ءُ ھژدہ ءَ وتی دگہ ناکوزتکانی ھمراھی ءَ سھب ءَ وتی کارے ءِ واستا روگ ءَ بیتگ راہ ءَ متھدہ عرب امارات ءِ چیریں ادارھانی کارمنداں گاڑی داشتگ ءُ راشد چہ گاڑی ءَ ایرگپتگ ءُ برتگ- ھما روچ ءَ راشد ءِ کھول ءَ ھوار بلوچ چاگردکار، انسانی ھکانی گلانی رھشوناں ھمک ساھت ءَ جھد کرتگ کہ راشد ءِ بارہ ءَ ھالے دز بہ کپ ایت کہ آ کجا اِنت، بلے ھچ ھال نہ بیتگ گڈی ءَ یک ھپتگے ءَ پد راشد امارات ءِ چیریں ادارھانی پوج ءِ ھمراھی ءَ آئی ءِ ناکو زتک ءِ لوگ ءَ آؤرتگ اَنت، راشد ءِ جاور ھما رنگ ءَ بیتگ اَنت کہ آ باز لَٹ ءُ کُٹ کنگ بیتگ، آ لوگ ءِ پَٹ ءُ ھنڈ ءَ راشد ءِ مباھل ءِ شوھاز ءَ بندات ءُ لوگ ءِ مردم ھم بیھار دیگ بیتگ اَنت کہ نِی شمئے ھم ھیر نہ بیت –

کھول ءِ رد ءَ چریشی ءَ پد راشد ھسین ءِ ھچ ھال نہ بیتگ، بیست ءُ ھپت جنوری ءَ یک ماھے ءَ پد پاکستانی رسانکدراں ھال شنگ اِتگ کہ پاکستانی پولیس ءِ نیمگ ءَ چینی قونصلیٹ ءِ بنجاھی کمکار راشد ھسین چہ شارجہ دزگیر بیتگ، چریشی ءَ پد سَے جولائی ءَ پاکستانی بنجاھی نامی ئیں رسانکدراں ھال شنگ بیتگ کہ راشد ھسین انٹرپول ءِ زور ءَ پاکستان ءَ آرگ بیتگ بلے کھول ءِ بازیں جھداں پد راستی پدر کرتگ کہ آیانی رد ءَ راشد ھسین بیست ءُ دو جون ءَ گیرکانودی ءِ رنگ ءَ لس بالیگے ءِ سر ءَ دالبندین ءَ آرگ بیتگ –

آیاں گپ کنان ءَ گْوشت کہ راشد ھسین ءِ بیگواھی ءَ دو سال سرجم بیگ ءَ پد متھدہ عرب امارات ءَ ھوار پاکستان ءَ آئی ءَ انسانی ءُ کانودی ھک دیگ نہ بیتگ اَنت بلکیں آ رسانکدراں ھالانی شنگ کنگ ءَ پد راشد ھسین جرمکار گوشتگ ءُ رسانکدراں سرھال کنگ ءَ اِنت -وھدےکہ دومی نیمگ ءَ پاکستان ءَ انسانی ھکانی کارکنوکیں وزیر شیریں مزاری ءَ چاگردی رسانکجاھاں گوشتگ کہ راشد ھسین ءِ دزگیر اِنت ءُ پاکستان ءِ زندانان اِنت –

آیاں دیمتر ءَ گْوشت: گوستگیں روچاں کریمہ بلوچ ءِ کوش، چریشی ءَ پیسر نامی ئیں اھوالکار ساجد ھسین بلوچ ءِ ناگتی مرگ مئے شَک ءُ گماناں گیش کنت کہ راشد ھسین بلوچ ءِ زندگی ءَ ناوشی اِنت – ڈنی ڈیھاں سیاسی پناہ زیروکیں رھشوناان ھوار دگہ ڈیھاں میاربندی ءِ زندگی گوازینگ مردم پھریزگ نہ اَنت گڑا پاکستانی ادارھانی دست ءَ مردم ءِ زندگی ناوشی اِنت –

بیان ءِ گڈسر ءَ انسانی ھکانی باسک راشد ھسین ءِ کھول ءَ انسانی ھکانی ادارھاں گوں دزبندی کرتگ کہ مئے گڈی اُمیت انسانی ھکانی میان اُستمانی ادارہ پرچاکہ پاکستانی آمیدگساں کیس ءِ دیم ءَ برگ ءَ ھچ گمانی گامگیج نیست، ما میان اُستمانی ادارھاں گوں دزبندی اِنت کہ آ متھدہ عرب امارات ءُ پاکستان ءَ راشد ھسین ءِ بیگواھی ءِ سر ءَ جست بہ کنت وھدےکہ کریمہ بلوچ ءِ کوش ءِ سر ءَ کینیڈین ءِ واکدار پَٹ ءُ پول بہ کن اَنت ءُ جرمکاراں کانود ءِ آمید ءِ سر ءَ بیار اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بنجاھی شھر دُزاپ ءَ ایرانی آمیدگس ءِ پرمان ءَ دو بندیگیں بلوچ پاھو داتگ اَنت –

پاھو داتگیں مردمانی پجار حمید میر بلوچ زئی ءُ مھربان براھوئی ء اھمد ھان ءِ ناماں زانگ بیتگ اَنت –

اھوالکار ءِ رد ءَ حمید میر بلوچ زئی پھرہ “ایرانشھر” شھر ءِ نندوک اِنت –

اھوالکار ءِ رد ءَ حمید میر بلوچ زئی ءِ کھولانی مردمانی گوشگ اِنت کہ ھپت سال ءِ بندیگی ءَ پد آ دزاپ ءَ پاھو دیگ بیتگ –

اھوالکار ءِ رد ءَ حمید میر بلوچ زئی نوزدہ اپریل دوھزار ءُ پانزدہ ءَ ایرانشھر ءِ ھند بیرک کوہ ءَ دو ایرانی لشکر ءِ کارمندانی کوش ءِ پژدر ءَ آئی ءِ سر ءَ دوئیں لشکری کارمندانی بھتام جنگ بیتگ اَنت ءُ ایرانی لشکر ءَ بھتام جتگ ءُ گوشتگ کہ آئی ءِ سیادی روکپتی بلوچستان ءِ ھکانی پد جنگ ءِ واستا نام گپتیں گل جیش العدل ءَ اِنت –

اھوالکار ءِ رد ءَ ھمید میر بلوچ زئی بیست ءُ ھشت نومبر دوھزار ءُ پانزدہ ءَ گرگ بیتگ ءُ لوگ ءِ مردمانی رد ءَ آئی ءِ زندانی ءَ ھپت سال سرجم بیتگ –

حمید میر بلوچ زئی ءِ کھولاں ایرانی لشکر ءِ ٹاہ رد کرتگ ءُ گْوشتگ کہ حمید میر بلوچ زئی دوھزار ءُ سیزدہ ءَ گرگ ءُ برگ بیتگ –

حمید میر بلوچ زئی ءِ وکیل ءِ رد ءَ کہ حمید میر بلوچ زئی گوست ءَ گرگ بیتگ ءُ آئی ءِ دزگیری دوھزار ءُ سیزدہ ءَ بیتگ ءُ آئی ءِ سر ءَ بھتام بیتگ کہ آئی ءِ سیادی گوں جیش العدل ءَ اِنت ءُ رند ءَ ایرانی لشکر ءِ بھتام آئی ءِ سر ءَ لڈگ بیتگ اَنت –

ھمے وڑ ءَ مھران مساپر کشیں مردمے بیتگ ءُ آئی ءَ سر ءَ بھتام بیتگ کہ آئی ءَ نِشہ باپاری کرتگ –

اھوالکار ءِ رد ءَ مھران براھوئی بیست ءُ ھشت دسمبر دوھزار ءُ ھبدہ ءَ ھما وھد ءَ دزگیر کنگ بیتگ آئی ءَ مساپر گون بیتگ ءُ روگ ءَ بیتگ کہ آ پولیس ءَ دزگیر کرتگ ءُ آئی ءِ گور ءَ نشہ دزکپتگ اَنت –

ھردوک گوستگیں روچ ءَ ایرانی آمیدگس ءِ پرمان ءَ پاھو دیگ بیتگ اَنت –

گرگ بیتگیں مردمانی بارہ ءَ آدینگ ءِ روچ ءَ دزاپ ءِ مسیت ءِ پیش امام ءَ گوشتگ کہ اے مردم بے میار اَنت ءُ اشانی ایرانی آمیدگس یلہ بہ کنت –

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ یک سد ءُ ھپتاد سَے روچ سرجم بوتگ –

دی بلوچستان پوسٹ

میڈیا کمیٹی ءِ سرکماش، کراچی بار کونسل ءِ انور میمن ءُ راجپوت ویلفئر ءِ رانا عبدالخالق راجپوت ءَ ھوار بیگواھیں سندھی باسکانی کھول ءُ ایکٹوسٹساں بنجل ءِ تر ءُ تاب کُرتگ ءُ بیگواھیں مردمانی کھولانی گون ءَ دلپدردی درشان اِتگ –

بیگواھیں راشد حسین بلوچ ءِ برازتک ماھزیب بلوچ، بیگواھیں سیاسی رھشون ڈاکٹر دین محمد بلوچ ءِ چُک مھلب دین بلوچ ءُ بیگواھیں نودربر رھشون شبیر بلوچ ءِ گھار سیماء بلوچ ءَ ھوار دگہ مردماں بنجل ءَ اتکگ ءُ وتی زھرشانی نبشتگ کنائینتگ اَنت –

ماما قدیر بلوچ ءِ گوشگ ات کہ ھر وڑیں زور پاکستانی ٹارچر سیلانی تہ ءَ ھوار، وتی من مانی ءَ چہ اے درسیں امل ءُ ٹارچر مروچی ھم کنگ بوگ ءَ انت ھما کہ رستری دروشم ءَ کائینت – ٹارچر سیلانی تہ ءَ بندیگیں مردمانی کھولاں تُرس ءُ بیھار دیگ ءُ آھانی یل کنگ ءِ لکانی ھساب ءَ زر گر انت بلے رند ءَ آھاں جن انت ءُ آھانی زانگولیں جوناں چگل دے اَنت –

آئی ءَ گوشتگ کہ انسانی ھکانی دنیا ءِ رھبند ءِ رِد ءَ دُرساں اے ھک ھست انت کہ وتی پھازگے ھاتر ءَ آمیدگس ءَ بہ رؤت، وتی مرزی وکیل ءِ بہ داریت، آزاد ءُ گیرجانبدار لس مردمانی دیم ءَ گپ بہ بیت بلے چیریں زنداناں بندیگ کنگ میان استمانی رھبندانی لگتمالی اِنت –

ماما قدیر بلوچ ءَ گوشتگ کہ بلوچ وتی زھرشانیاں چہ وتی توار ءَ انسانی ھکانی ادارھاں سر کنگے ھاتر ءَ ھر وڑیں جمھوری کاردانک ءَ وتیگی کنت ءُ وتی جد ءُ جھد ءَ کن انت –
آئی ءَ گوشتگ کہ رھبندانی تہ ءَ شک کدی ءُ کجام وھد ءَ پیلو کنگ بنت – مارا مزلوم ءُ ایردستیں راج ءَ دروگ ءِ آسرا داں کد دیگ بیت – زنداناں بندیگیں بلوچ ءُ یا بلوچ راج ءِ نمائنداگاں داوت دیگ نہ بیت کہ آ زوراکی بگیری ءَ توار چست بہ کنت اے درسانی بگیری ءَ دودمانیں دنیاءَ توار چست کنگی انت –

دی بلوچستان پوسٹ

نامی ئیں بلوچ زالبولیں رھشون ءُ بلوچ اسٹوڈنٹس آگنائزیشن ءِ گوستگیں چیئرپرسن کریمہ بلوچ ءِ کوش ءِ ھلاپ ءَ مروچی بلوچستان ءِ دمگ ھاران ءُ بارکھان ءَ بلوچ یکجھتی کمیٹی ءِ دزبندی ءَ مھلوک ءَ بازیں کچے ءَ زھرشانی کرتگ –

ھالانی رد ءَ ھاران ءِ شھر ءَ زالبول، چُک ءُ ورنایانی بازیں کچے ءَ دستاں اکس ءُ نبشتگیں بینرز چست کرتگ ءُ روانک کش اِتگ ءُ کریمہ بلوچ ءِ ناھکیں کوش ءَ ھواریں دستانی پدر کنگ ءِ لوٹ کرتگ –

ھمے وھد ءَ زھرشانی ءَ تران کنان ءَ گوشت اِت کہ کریمہ بلوچ ءِ کوش بلوچستان ءِ توار ءِ بے توار کنگ اِنت – کریمہ بلوچ بلوچستان ءِ یک مھکم ءُ سرجمیں توارے ءِ بنیاد ءَ کُشگ بیتگ –

تران کنوکاں گْوشت کہ سرجمیں بلوچستان زانت کہ کشندہ کَے اَنت، ءُ بلوچستان ءِ دگاں سر ءَ زھرشانیاں اے ھزارانی مردم دودمانیں دنیا ءِ دیم ءَ کُشندہ اش پدر کرتگ – آیاں گْوشت کہ کریمہ نِی جنگ ءِ چیدگ جوڑ بیتگ –

زھرشانی کنوکاں چہ کینیڈا ءِ سرکار ءَ لوٹ کرتگ ءُ گوشتگ کہ تچکیں رنگے ءَ پَٹ ءُ پول بہ کنت ءُ بلوچستان ءَ انساپ بہ دنت –

بلوچستان ءِ دمگ بارکھان ءَ سر بیتگیں ھالانی رد ءَ بلوچ یکجھتی کمیٹی ءِ دزبندی ءَ بارکھان ءَ سدانی کچ ءَ مھلوکاں زھرشانی کنان ءَ گْوشتگ کہ مروچی سرجمیں بلوچستان پدرد ءُ پرسیگ اِنت –

آیاں گْوشت کہ بلوچ زھگ ءِ جون ءَ سرجمیں بلوچستان یکجاہ کرتگ، مروچی بارکھان ءَ داں گوادر ءَ بلوچستان زھرشانیانی تہ ءَ گوزگ اِنت – ھمے وڑ ءَ گوستگیں روچ ءَ بلوچستان ءِ دمگ نسیر آباد، اوستہ مھمد ءَ سیاسی پاٹیانیاں ھوار نودربرانی گلاں زھرشانی کرتگ ءُ ڈیوا بلینتگ –

کشندھانی دزگیری ءِ لوٹ کرتگ ءُ گوشتگ کہ کریمہ بلوچ یک نہ ترس ءُ شیرزالیں زالبولے بیتگ آئی ءَ بلوچستان ءِ سیاست ءَ را یک ارواھے بکش اِتگ –

ھمے وڑ ءَ ھزدار ءَ ھم بلوچ یکجھتی کمیٹی ءِ دزبندی ءَ کریمہ بلوچ ءِ کوش ءِ ھلاپ ءَ زھرشانی روانک کشگ بیتگ –

روانک شھر ءِ دگانی سر ءَ تران بیتگ ءُ شھر ءَ مُچے ءَ بدل بیتگ ءُ روانک ءَ بازیں کچے ءَ چُک ءُ جنیناں بھر زرتگ ءُ کریمہ بلوچ ءِ ناھکیں کوش ایر جتگ ءُ گوشتگ کہ بلوچ دپتر ءَ زالبولانی مزنیں شرپے ھست –

آیاں گوشت کہ بلوچ زالبول بلوچستان ءَ ھم ریاست ءِ زُلم ءُ زوراکیانی آماچی ءِ ھواری ءَ نِی دراںڈیھاں ھم بلوچ زالبول ءُ بلوچ رھشون نشانگ کنگ بیگ ءَ اَنت –

ھمے وڑ ءَ بلوچستان ءِ دمگ پنجگور ءَ بلوچ یکجھتی کمیٹی ءِ نیمگ ءَ کریمہ بلوچ ءِ ناھکیں کوش ءِ ھلاپ ءَ زھرشانی روانک کشگ بیتگ –

روانک ءَ بازیں کچے ءَ سیاسی ءُ چاگردی مردمانی ھواری ءَ زالبول ءُ چُکاں ھم بھر زرتگ –

پنجگور ءَ زھرشانی ءَ بھر زیروکیں مردماں تران کنان ءَ گْوشت کہ کریمہ بلوچ ھما زالبول بیتگ آئی ءَ بلوچستان ءَ ھوار ھما زیردستیں راجانی واستا وتی توار برز کرتگ ءُ آئی ءَ میان اُستمانی دنیا ءَ ھم وتی ھکانی پد جنگ ءِ توار برز کرتگ –

آیاں گوشت کہ بلوچستان ءِ ناگیگیں جاوراں کریمہ بلوچ ھما کچ ءَ لاچار کرتگ کہ آ درانڈیھ ءَ بہ روت اود ءَ وتی راج ءِ ھکانی پد جنگ ءَ توار چِست بہ کنت بلے بلوچانی دشمن ءَ کریمہ بلوچ ءِ وڑیں شیرزال جھان ءِ پُر ایمنیں ڈیھاں ھم نہ بکش اِت ءُ وتی ھرجان جتگ –

آیاں گوشت کہ مئے دشمن ءِ دست بلوچستان ءَ ھمک مردمانی ھوناں ھونین اَنت نِی آئی ءَ درانڈیھاں ھم وت ءَ پدر کرتگ ءُ ایشی ءِ منانک ءَ دیگ ءَ اِنت بلوچانی کشندہ ما اِنت –

آیاں گوشت کہ بلوچستان ءَ نوزدہ سد ءُ چِل ءُ ھپت ءَ بہ گر داں روچ ءِ مروچی ءَ بلوچ مھلوک ءِ سر ءَ زُلم بیگ ءَ اَنت –

زانگ بہ بیت کینیڈا درانڈیھی ءَ جھمنندیں نامی ئیں بلوچ زالبولانی رھشون ءُ بلوچ اسٹوڈنٹس آرگنائزیشن آزاد ءِ گوستگیں چیئرپرسن کریمہ بانک کریمہ بلوچ ءِ ناھکیں کوش ءِ ھلاپ ءَ گوستگیں یک ھپتگے ءَ بلوچستان ءِ بازیں جاہ ءُ شھر، کُچَگی دمگاں زھرشانی درچ برجاہ اِنت، زھرشانی کنوکانی گوشگ اِنت کہ کریمہ بلوچ راجی جھد ءِ آجوئی ءِ پژدر ءَ کُشگ بیتگ –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ زھک ءَ ایرانی پوج ءِ تیرگواری ءَ یک مردمے بیران –

اھوالکار ءِ رد ءَ مروچی زھک ءَ ایرانی لشکر ءَ تیرگواری کرتگ ءُ یک مردمے کُشتگ، کُشتگیں مردم ءِ پجار عبداللہ قلندرزئی ء شیر اھمد ءِ نام ءَ زانگ بیتگ –

اھوالکار ءِ رد ءَ عبداللہ قلندرزئی ءِ سر ءَ ایرانی لشکر ءَ ھما وھد ءَ تیرگواری کرتگ کہ آ راہ ءَ روگ ءَ بیتگ ءُ آئی ءِ سر ءَ ایرانی لشکر ءَ تیرگواری کرتگ ءُ تیر آئی ءِ سرا لگ اِتگ ءُ آ بیران بیتگ –

اھوالکار ءِ رد ءَ روکپتی بلوچستاں ءَ بازیں ھنداں وھد وھد ءِ سر ءَ تیرگواریانی وئیل بوگ ءَ اَنت کہ آیانی جتا جتائیں مردم تیرگواری کنوک اَنت ءُ دومی نیمگ ءَ لس مھلوک ءِ گوشگ اِنت کہ تیرگواری وئیلاں ایرانی چیریں ادارھانی دست مان اِنت –