TBP Balochi

ھما راج زندگ مان انت کہ وتی جانانی کربانی ءَ دے اَنت، جد ءُ جھد کن انت ءُ مرگ ءَ امباز انت، ھما راج کہ چہ مرگ بہ ترس اِیت آھانی نام نشان گار بیت – ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ بیگواھیں بلوچانی ھاتر ءَ زھرشانی برجاہ ، وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ ھپتاد ءُ پنچ روچ سرجم بوتگ – جئے سند متھدہ محاز ءِ کلانیں باسک عبدالحکیم ، نور محمد، میر محمد ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وی بی ایم پی ءِ رھشون ماما قدیر بلوچ ءِ گوشگ ات کہ اِلم ءُ زانتیں دیمونی دیگ ءِ ھک ءَ ھچ وڑیں تاگت پچ گپت نہ کنت، دنیا ءِ تہ ءَ ھما راج زندگ مان انت کہ جد ءُ جھد کن انت ءُ وتی پرزندانی یل کنائینگے ھاتر ءَ مرگ ءَ وت امباز انت، ھر ھما راج مرگ ءَ تُرس ءَ دژمن ءِ دیم ءَ پد بہ کنزیت گڑا آ راج ءِ نام نشان گار بیت بلے من ءَ وتی راجے سر ءَ پھر انت کہ دژمن دیم ءَ پد نہ کنز اَنت –

آئی ءَ گوشتگ کہ منی راج بیگواھیں مردمانی یل کنائینگے جد ءُ جھد ءَ انت کہ آئی ءِ برورد ھر بلوچ ءَ رس انت، پرایمنیں جد ءُ جھد کجام ھم مات تھنا بوتگ اَنت – ریڈ انڈین ھمے ھاتر ءَ ھلاس بوتگ انت کہ آھاں جنگ نہ کرتگ –

آئی ءَ گوشتگ کہ جد ءُ جھد ءَ چہ پدکنزوکیں مردماں چہ جد ءُ جھد ءَ ھچ بدلی نہ بوتگ، من امیت داراں کہ منی مات ءُ گھار گوں من ءَ ھوار ھر کس اے گامگیج ءِ سر ءَ آھاں سنگسار کن انت –

گُڈسر ءَ ماما قدیر بلوچ ءَ گوشتگ کہ مروچی مئے جد ءُ جھد ءَ بس ھسابی لھتے مردم نہ انت بلکیں ھزارانی کچ ءَ مات ءُ گْوھار، برات، کماش ورنا اے جھدے بھر انت –

دی بلوچستان پوسٹ

سر بیتگیں ھالانی رد ءَ مروچی بلوچستان ءِ دمگ سوراب ءِ بازار ءَ ناشناسیں مردماں پاکستانی پوج ءِ گاڑی دزبمباں گوں اُرش کرتگ –

دمگی مردمانی رد ءَ پاکستانی پوج ءِ گاڑی ءِ سر ءَ ھما وھد ءَ ناشناساں اُرش کرتگ آ بازار ءَ وردنی ءِ زورگ ءَ اتکگ بیتگ ءُ ناشناسیں مردماں دزبمباں گوں اُرش کرتگ، اُرش ءَ پاکستانی پوج ءَ جانی ءُ مالی تاوانانی دیمپانی کنگ کپتگ –

دومی نیمگ ءَ بلوچستان ءِ آجوئی ءِ لوٹوکیں سلاہ بندیں گل بلوچ لبریشن آرمی ءَ سوراب ءَ بیتگیں اُرش ءِ زمہ واری منّ اِتگ –

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ رسانکدراں شنگ کرتگیں بیان ءِ تہ ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ ءُ گوشتگ کہ مروچی سوراب ءِ بنجاھی بازار ءَ پاکستانی پوج ءِ یک گاڑیے دزبمباں گوں نشانگ کرتگ –

جارکش ءَ گْوشت کہ اُرش ءِ آسر ءَ زورگریں پوج ءِ بازیں کارندھے زدگ بیتگ اَنت –

جارکش جیئند بلوچ ءَ گوشت کہ ما شور کرتگ کہ زورگریں پوج ءُ آئی ءِ کمکاراں کجام ھم جاہ ءَ نشانگ کن ایں – بلوچ راج چہ زورگریں پوج ءَ ھروھد ءَ وت ءَ دور بہ دار اَنت ءُ وتی پھریز ءَ بہ کن اَنت دانکہ کجام ھم دگہ جانی ءُ مالی تاوانانی دیمپان مہ بنت –

جارکش ءَ گوشت کہ مئے اُرش زورگریں لشکر ءُ آئی ءِ کمکارانی سر ءَ بلوچستان ءِ آجوئی ءَ داں برجاہ مان اَنت –

نبشتانک: اے ڈیھ بلوچ ئیگ اِنت

نبشتہ کار: آجو بلوچ

دی بلوچستان پوسٹ

ھمک ھما زور گیر ءُ اشغالگِر ءِ تُرس بیتگ کہ اگاں ھمے کوردید ءُ زلُم آماچیں راج دیم پہ زانت ءُ زانِشت ءِ نیمگ ءَ سر بہ جنت گڑا اَلّم اِنت کہ آ راج یا بنی آدم نوکیں آشوبے ءُ زْرمبشے پہ وتی چاگرد ءُ مھلوک ءَ ساز اِت کنت چشکہ ما اگاں وتی زمانگ ءُ اَھد ءِ آدینک ءَ بہ چاراں گڑا مارا ھزاراں چُشیں زمین زادگیں بچانی کِرد دیم ءَ کیت کہ آیاں تنگھیں سر داتگ اَنت بلے زمین نہ داتگ۔

اے کُل چہ زانت ءُ زانگ ءَ پُر انت الم نہ اِنت کہ کَسے ءَ دانکہ پی ایچ ڈی ءُ ایم فِل ءِ ڈِگری نہ گپتگ بزاں آ راج دوست ءُ ھاک دوست بیت نہ کنت بلے ھما سِنچ ءُ پِگر کہ ھما شھیدانی بیتگ ، ھما زانت ءُ مارِشت کہ من گُلام کنگ بیتگاں، زوراک ءَ منی جنت رنگیں زمین ، منی گِس سوتکگ ءُ مھشر جوڑ کُرتگ ءُ ابید ء چہ مزاھمت ءَ دِگہ وس نیست۔

دُشمن من ءَ ھرچ رنگ ءُ دروشم ءَ ولگوج کنگ ءُ ھلاس کنگ ءِ جھد ءَ اِنت گڑا من ءَ ھم گوں ھوناں وتی ڈگار سبزینگی اِنت۔

گڑا ھمے شعور (گِھزانتی) راجانی وشھالی ءُ آجوئی ءِ سَوَب جوڑ بنت بلوچ راج ءِ ھم ھمے ھال اِنت اے زورگیریں زوربر ءَ بلوچ گُلام دارگ ءِ ججد کُرتگ ءُ مھلوک ءِ سوچ ءُ سِنچ گوں سانکلاں اڈینگ ءِ کوشست کُرتگ مرچی دُشمن داں ھدّے ءَ سوبمند بیتگ بلے سرجم ءَ ناں۔

مرچی ھم بلوچ ءِ ھزاراں بچاں وتی ساہ بکشاتگ پہ اے گُلزمین ءِ رکّینگ ءَ گوادر بہ بیت یا بولان، سیاجی بہ بیت یا کاھان بلوچ ءِ بچاں ھر وھد ءَ راج ءُ زمین ءِ پاسپانی کُرتگ مرچی دشمن چہ بلوچ پُسگانی تُرس ءَ برے پندلے سازیت برے بلوچ ءِ دلبند ءِ سر ءَ سیاہ ماریں سی پیک ءِ رنگ ءَ برے بلوچستان ءِ سینگے دِرتگ ءُ ٹٹ ءُ کُبل اش جتگ گوادر ءُ تیوگیں بلوچستان ءَ پہ وتی مھلوک ءِ پھازگ ءِ ھاتر ءَ تھنا یکیں مرچی ایں گوادر ءِ ٹٹ کنگ نہ اِنت ھپتاد ءُ سَے سال اِنت کہ اے لگوریں دژمن ءَ تھنا بلوچستان ناں بلکیں بلوچ مھلوک ھم زندانی کتگ ءُ آستو آستو بلوچ ءِ پدریچ کُشی ءَ کنگءَ اِنت –
پمشکا سید زھور شاہ ھاشمی گُش ایت کہ

“جھ بہ جن بے ساری ءُ بے زانتی ءَ شھمات کن
کہ تئی بیگواھی ءِ سامان سرجم  بیتگ آں”

اے گالاں سید ھما وھد ءَ گش ایت کہ سید بلوچ راج ءِ نزانتکاری ءُ نادانی ءُ کم ھکلی ءَ گندیت ءُ سید ھم زانت کہ اگاں اے راج ھمے داب ءَ وت ءَ بہ داریت گڑا آیوکیں چیزے سالانی تھا بلوچ ءِ نام چہ جھان ءَ ءُ چہ دپتراں ھم گار ءُ نیست بیت بلے سید اے ھم زانتگ کہ تنیگہ انگت ھملءجیئند ، مھراب ھان ءُ بلوچ ھان ءِ وڑیں بھادُریں بلوچانی پِگر زندگ اِنت پرچہ کہ پِگر ھچ بر گار نہ بیت –

گڑا سید گشیت کہ‏

“کمبری دَؤرے پدا کاریں ءُ ماں جان ءَ پَہل
مکَھیں ماتانی مِھر ءُ دوستی ءِ شیراں کنیں”
“راہ مئے بستگ اگاں کوہ ءُ تلار ءُ گریشگاں
گوں وتی سرپنجگاں شیری، رھے بُرّاں کنیں”

سید ءَ ھما وھد ءَ دیستگ ءُ زانتگ کہ مئے بدواہ چینچو بلد ءُ چو روباہ ءَ چالاک اِنت ءُ مئے مھلوک چہ زانت ءُ زانگ ءَ پشت کپتگ،مئے راج بے سمائی ءَ واب اِنت مئے مردماں بدواہ اَرزان ءَ ریپینت کنت ءُ زوت آیانی پِگر ءُ سنچ آں سانکلاں گوں مان اڈینیت ءُ مئے وتن ءُ مئے زمین ءُ زِر ءَ بارت ءُ مئے زبان ءُ دودربیدگ ءُ مئے راج ءَ چہ بُن ھلاس کنت پمشکا سید ءُ مئے آ دگہ شھزانت ءُ بَلدَیں مھلوک ءَ ھر وھد ءَ وتی راج ءُ کوم گوں وتی گال ءُ گُپتار ءُ کِرداراں گوں راج دوستی ءُ زمین دوستی ءِ نیمگ ءَ شونداتگ انت۔

مرچی کُل جھان گندگ ءَ اِنت کہ ھما ھمل کہ گوں پُرتگیزاں جنگے کُت ساہ یے دات بلے زِرے رکّینت اے ھما زِر اِنت ،ھما بلوچ اِنت بلے کُج اَنت ھما کہ بلوچے چہ زِر ءَ دور کنگ ءِ پندل اش ساز اِت ھما کہ اے زِر ءِ چولاں چیر ترینت انت اے زِر بلوچ ءِ بیتگ ءُ بلوچ ءِ زِر اِنت اے زِر وتی زھگاں پَجّہ کاریت انچو کہ بلوچ ءِ شکر ورنائیں بچاں زوراک ءِ دیم داشتگ انچُش اے زِر ءَ ھم گوں بلوچ ءَ وپا کُتگ ءُ درآمدیں مھلوک گوں وتی تمردیں چولاں چیرترینتگ ءُ ایر موش کُتگ اَنت۔ ما ءُ زِر پھر بندیں ءُ مارا سِتک اِنت کہ ھما شھیداں کہ پہ وتن ساہ داتگ ءُ ھما کہ انگت کوہانی دامُن ءَ نشتگ ءُ بدواہ ءِ راہ بستگ اِش، ھما کہ سر اِش دستانی دل ءَ اِنت پہ وتن سوگاتے کن اَنت ھما کہ چو ریھان ءَ ھاک بوہیں بارود اِش جان ءَ بستگ پہ لگوریں بدواہ ءِ سوچگ ءَ ، ھما بچ وتی مات ءَ وتی زمین ءَ وتی دریا ءَ وتی راج ءَ پھاز اِت کن اَنت پہ بند ءُ اِشکیل ءَ پِگر بندیگ نہ بنتاے گوادر ءُ بولان بلوچستان اَنت ءُ بلوچ ءِ بیتگ انت، بلوچ ئیگ اَنت ءُ بلوچ ءِ بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان: بولان، مند، دشت ءَ پاکستانی پوج ءِ لشکر کشی برجاہ، بولان ءَ مروچی دومی روچ ءَ پوجی بالگرداں تیرگواری کرتگ –

دی بلوچستان پوسٹ

سربوتگیں ھالانی رِد ءَ بلوچستان ءِ دمگ بولان ءَ پاکستانی پوج ءِ نیمگ ءَ مروچی دومی روچ ءَ ھم لشکر کشی برجاہ انت، لشکر کشی ءَ بمب گواریں بالگرداں بازیں ھنداں برزی ءَ تیرگواری ھم کُرتگ –

گیشیں ھالانی رِد ءَ گوستگیں روچ ءَ چہ بندات بوتگیں لشکر کشی ءَ برجاہ انت، پوج ءِ مزنیں کساسے جمبرو، تلانگ، کمان، جھالاوان، لونی، میژداری پیش گامی کنگ ءَ انت ءُ ھمے میان ءَ دمگ ھالیگ کنگ بوگ ءَ انت –

اھوالکار ءِ رِد ءَ پوج ءَ بالی گرابانی کمک ھم گون انت، مروچی دومی روچ ءَ کوھی دمگاں بالگرداں تیرگواری ھم کرتگ –

اے لشکر کشی دو روچ پیسر جھالاوان تنک ءِ دمگ ءَ بندات کنگ بوتگ، کہ دو روچ پیسر سلاہ بندیں مردماں یک پوجی پانگسے ءِ سر ءَ اُرش کتگ، پانگس دستیگ کُتگ ءُ پوجی ساز ءُ سامان ھم گوں وت برتگ انت – پد ءَ رند ءَ پوج ءِ مزنیں کساسے ءَ لشکر دمگ ءَ آرگ بوتگ اَنت اھانی سر ءَ دوبر تراک ناکیں شورواں گوں اُرش کنگ بوتگ –

دومی نیمگ ءَ کیچ ءِ دمگ مند ءِ کوھی دمگاں ھم گوستگیں دو روچاں چہ پاکستانی پوج ءِ لشکر کشی برجاہ انت –
اھوالکار ءِ رِد ءَ مند سُھریں کوہ ءِ کوھی دمگاں پاکستانی پوج پُترتگ ءُ زوراکی کنگ ءَ اِنت-

دمگی مردمانی رد ءَ گوستگیں شپ ءَ پاکستانی پوج ءِ بیست گاڑی ءُ دَہ سینکلانی کاروانے کوھی دمگانی تہ ءَ رؤگ ءَ گندگ بوتگ اَنت ءُ ھمے وڑ ءَ مروچی سُھب ءَ ھم پاکستانی پوج ءِ دگہ پانزدہ گاڑی گوں دو ایمبولینسانی ھواری ءَ ھمے دمگ ءَ رؤگ ءَ گندگ بوتگ انت-

ھالکار رِد ءَ پاکستانی پوج سُھریں کوہ ءُ کُنٹانی ءِ کوھی دمگاں زوراکی کنگ ءَ اِنت – دنیگت ءَ ھچ وڑیں جانی ءُ مالی تاوانانی ھال نیست –

ھمے وڑ دشت مزن بند ءِ کوہ ءَ ھم پاکستانی پوج زوراکی کنگ انت –

اھوالکار ءِ رِد ءَ چہ دشت ءُ مند ءَ پاکستانی پوج ءِ کاروان دیم پہ کوہ ءَ شتگ اَنت-
مروچی بانگواہ ءَ دشت ءِ دمگ بل نگور ءِ بنجل ءَ زورگیریں پاکستانی پوج ءِ کاروانے دیم پہ گورگی ءُ بانسر ءِ نیمگ ءَ شتگ-

ھمے وڑ ءَ چہ مند ءَ پاکستانی لشکر ءِ بازیں گاڑی ءُ پرپٹ ئِے کترینز ءَ چہ دیم پہ کوہ ءِ نیمگ ءَ شُتگ انت –

ھالانی رِد ءَ زال کلّگ، بانسر، چرپان، بے پات، ننگارو ءُ کترینز ءِ کنڈگ پاکستانی پوج ءَ بستگ اَنت ءُ لھتے لشکری کارمند کوہ ءِ توک ءَ پُترتگ ءُ دیم ءَ جُنزان اَنت-

دمگی مردمانی گوشگ اِنت کہ مزن بند ءُ سُھریں کوہ دوئیں جاگھاں پاکستانی لشکر پُترتگ ءُ لشکر کشی کنگ ءَ اِنت، پوجی کارمندانی مُچ بوگ ءَ دمگ ءَ شریں رنگے ءَ ھالانی سر نہ بیگ ءَ دنیگت ءَ ھچ وڑیں تاوانانی ھال نیست –

دی بلوچستان پوسٹ

یونائیٹڈ بلوچ آرمی ءِ جارکش مزار بلوچ ءَ ناشناسیں جاھے ءَ وتی شنگ کرتگیں درشان ءِ تہ ءَ گْوشتگ کہ گوستگیں روچ ساھت پنچ ءَ مئت سرمچاراں کوھلو ءُ کاھان ءِ میانی دمگ چپی کچ ءِ ھند ءَ بند ساچی شرکت ءُ زوگریں پوج ءِ کارندھانی سر ءَ مزنیں سلاھانی گون ءَ اُرش کرتگ –

آئی ءَ گْوشت اُرش ءَ زورگریں لشکر ءَ زورگرے شرکت ءَ جانی ءُ مالی تاوانی دیمپانی کنگ کپتگ –

جارکش ءَ گْوشت کہ بلوچ راج ءِ منّگ ءَ ابید زورگریں ریاست وتی لُٹ ءُ پلیں دستاں مھکم کنگ ءَ بند ساچیانی نام ءَ دیمروی دیگ بلوچ راج ءِ سر ءَ زورانسری گپتگ کہ اشی ءِ اجازت دیگ ھچبر دیگ نہ بیت اِنت –

جارکش ءَ گْوشت کہ زورگریں ریاستی لشکر ءُ بلوچستان ءَ نہ منّوکیں شرکت ءُ آیانی سر ءَ داشتگیں پھزدارانی سر ءَ مئے اُرش بلوچستان ءِ آجوئی ءَ داں برجاہ مان اَنت –

بلوچی لُکّیں تامر “دژمان ” چاگردی رسانکجاھاں نوکیں سال ءِ جنوری ماہ ءَ شنگ بیگی اِنت –

دی بلوچستان پوسٹ

تامر ءَ بلوچستان ءِ پدمنتگیں ندارگ پیش دارگ بیتگ اَنت تامر ءِ ازمکار بلوچی زبان ءِ مزن نامیں ازمکار شاہ ابن شین ءَ ھوار دگہ ازمکاراں وتی ازم ءِ درانگازی کرتگ –

شاہ ابن شین ءَ ٹی بی پی ءِ ازم ءُ گوازی اھوالکار ءَ گوں گپ کنان ءَ گْوشت کہ تامر ءِ تہ ءَ سَے کسہ ندارگ پیش دارگ بوتگ اَنت –

شاہ ابن شین ءَ گْوشت کہ لُکّیں تامر “دژمان ” ءِ تہ ءَ تھیٹر ءِ شش ھنچیں ازمکاراں کار گرگ بیتگ اَنت کہ آیاں چِد ءُ پیسر تامرانی تہ ءَ ھچبر کار نہ کرتگ –

شاہ ابن شین ءَ گْوشت کہ تامر ءِ تہ ءَ بلوچی زبان ءِ جوانیں ازمکار شاھنواز ھم ھوار اِنت کہ آ بلوچی زبان ءِ ازمکاری ءَ مزنیں نامے دار اِیت –

شاہ ابن شین ءَ گْوشت کہ تامر ءِ تہ ءَ کسہ پدمنتگیں راجمانے ءِ سر ءَ اِنت کہ اود ءَ انساپ، ریا ءُ رو ءُ مردم گری ءِ نام ءِ وجود نیست اِنت –

شاہ ابن شین ءَ گْوشت کہ ما چاگرد ءِ یک ھنچیں سرھالے ءَ تامر جوڑ کرتگ کہ چِد ءُ پیسر بلوچی تامرانی تہ ءَ اے کسے ءَ اے بارہ ءَ کسہ نبشتگ نہ کرتگ –

شاہ ابن شین ءَ گْوشت کہ تامرکاری ءِ تہ ءَ ھر تک ءَ ھرکسی وتی پِڑ اِنت کہ کجام رنگ ءَ تامرانی واستا کار بہ کنت ءُ بلوچی زبان ءِ نام ءَ رژناہ بہ کنت –

آئی ءَ گْوشت کہ مئے گور ءَ ردکار، بتکار، سوجکار باز وھداں یکیں مردم اِنت ءُ لاچاری اِنت بلے دگہ چیزے ءَ ھم اے وڑ ءَ یکیں تک ءَ الم نِزور بیت اِنت ءُ بلوچی تامرکاراں اے چیز دلگوش کنگ لوٹ ایت ءُ گڑا تامرکاری ءِ گام ترند بیت کن اَنت ءُ بلوچی تامرکاری دیمروی کنت –

آئی ءَ گوشت کہ تامر ءِ سر ءَ کمے کار بیتگ ءُ آؤکیں سال ءِ بنداتی ماہ “جنوری ” ءَ تامر ریڈیو زرگوات یوٹیوب ” چینل ءَ شنگ کنگ بیت اِنت –

تامر ءِ تہ ءَ ردکاری انور شاہ، اکسکاری نوروز یوسف ءُ تامر ءِ کسہ نویس ءُ سوج کار شاہ ابن شین اِنت –

آزمانک: من لگورے نیاں

نبشتہ کار: رفیع شاکر

دی بلوچستان پوسٹ

یک ھاموش ءُ تارمویں شامے اَت، جنگل ءَ ھر نیمگ ءَ مُج ءُ دنز تالان اَت۔ جنگ ءَ ٹپّی بوگ ءِ سوب ءَ آ لنگ کنان ءَ روگ ءَ اَت ھما اسپتیں گُد ءِ چُنڈ کہ آئی ءِ وتی ٹپّاں بَستگ اَت آ پیڑاپ ءِ وڑ ءَ وش وش ءَ چہ ھوناں سُھر ءُ نمب بوگ ءَ اَت روگ روگ ءَ آئی ءَ چہ وتی کیسگ ءَ سگریٹ ءِ ڈبی کَشّ اِت ءُ پَچ کُت چار اِت ئِے بس یک سگریٹے پَشت کپتگ ات۔

آئی ءَ گوں ھمے جیڈگ ءَ سگریٹ پد ءَ کیسگ ءَ کُت کہ ھروھدے کبرستان ءِ نزیّک ءَ سربہ بیت گڑا ھمود ءَ سگریٹ ءَ روک کنت پرچے کہ کبرستان ءَ سپر نیمگ بیت۔داں کبرستان ءَ کہ آ سر بوت آئی ءَ مار ات کہ سک ژند ءُ پند اِنت، درچک ءِ چیر ءَ نِشت تُپنگ ئِے گوں درچک ءَ تِکہ کُت ءُ چہ چاگل ءَ آپ ئِے وارت جان کَشّ ئِے کُت ءُ پد ءَ سگریٹ ئِے روک کُت۔ چہ گوات ءِ تیزی ءِ سوب ءَ درچکانی ھُشکیں تاک آئی ءِ مودانی سر ءَ رچگ ءَ اِت اَنت۔ سگریٹ ءِ دو کَش جنگ ءَ پد آئی ءِ گوشاں ھُشکیں تاکانی سر ءَ کَسے ءِ گردگ ءِ توار کپت۔

آئی ءَ چار اِت کہ چہ راستیں کَش ءَ یک زیباھیں جنکے آئی ءِ نیمگ ءَ پیداک اِنت۔ چہ جنک ءِ سر بوگ ءَ پیسر گوات ءَ آئی ءِ جان ءِ وشبو تاں بیبگر ءَ سَر کُت۔ گوں بارگ ءُ دراجیں بالاد ءَ اِشتاپ اشتاپ ءَ بیبگر ءِ نیمگ ءَ مَلَّگ ءَ اَت۔ گوں ھر کدم ءَ آئی ءِ شُوتکیں گْور چِست ءُ جھل بوگ ءَ اِت اَنت۔آئی ءِ چماں بے ساری ءِ دریا تچگ ءَ اَت، پَچیں مود چہ گوات ءِ سوب ءَ آئی ءِ سینگ ءِ سر ءَ کپتگ اِت اَنت آ گورانی ٹھلاں چیر دئ۔یگ ءِ ناکامیں کوشستے کنگ ءَ ات بیبگر یاگی ئیں جُنز ءِ چہ مُچ سنگتاں بَلد،بیدار ءُ ھر جنگی وڑ ءُ پیم ءِ زانوگریں سپاھی یے اَت، بلے اے وھد ءَ آ چہ ھوش ءُ سار ءَ شُتگ اَت آئی ءِ دستاں ھمنچو تاکت مان نیست اَت کہ تُپنگ ءَ چِست بہ کنت، سگریٹ آئی ءِ دست ءَ پُر جوڑ بوتگ اَت ھروھدے کہ جنک آئی ءِ نزیک ءَ سر بوت آئی ءَ چار اِت اے وَ مھپری اِنت، آئی ءِ کسانی ءِ ھمراہ ءُ مھبت۔ اسکول ءِ زمانگ ءَ بیبگر یک ساھتے ھم چہ مھپری ءَ دور نہ بوتگ بلے نوں چہ جنگ ءِ سوب ءَ بیبگر ھَپت سال ءَ رَند آئی ءَ گِندگ ءَ اَت۔مھپری آئی ءِ کَش ءَ نِشت ءُ ھاموش اَت۔

اے پدی آ ھچ کندگ ءَ نہ اَت آئی ءِ چم گِلگ کنگ ءَ ات اَنت آئی ءِ لُنٹانی سُھری ھلاس بوتگ اَت ترکِتگ ءُ سیاہ ترِتگ ات اَنت بیبگر اوں ھِچ گپ ءَ نہ اَت آئی ءِ اوں ھپت سال مپھری ءِ جتائی ءَ گوازینتگ اَت بلے دوئیں زالمیں وھد ءِ دیم ءَ بے وس اِت اَنت .بیبگر ءِ چماں ارس ترمپ ترمپ ءَ رچگ ءَ اِت اَنت ءُ ھمے جیڈگ ءَ اَت کہ ما جنگ پمیشکا بندات کُت کہ مئے دراھیں مردم یکجاہ بہ بنت بلے اے جنگ ءَ تنیگا وَ مارا چہ دراھیناں جتا کُتگ ءُ مھپری آئی ءِ ارساں پہ وتی گُشان ءَ ساپ کنگ ءَ اَت۔

اچانک دروازگ ءِ کڑی ءِ توار ءَ بیبگر ءَ چہ واب ءَ سما کُت، سپاھی کوٹی ءِ تہ ءَ پُترِت ءُ گشت ئِے ترا سالے بیت اِد ءَ بندیگ ئے بلے من ھر وھد ءَ اتکگ آں شپ ءُ نیم شپ ءَ بلے ترا واب نہ بوتگ دوشی باریں تو چوں واب کپتگ ئے؟ بیبگر ءَ سپاھی ءِسر ءَ سک زھر آیگ ءَ اَت کہ آئی یکیں ساھت ءُ دمان ءَ مھپری ءَ را چہ آئی سک دور بُرت بلے ھِچ نہ گُشت ئِے ءُ بس بچکند ات ئِے سپاھی ءَ گشت شر گھنٹھے ھست چہ تئی پاھو ءِ وھد ءَ۔ گُسل ءُ نماز ءُ دگہ ھرچی زلوری کار ھست بہ کن کہ گھنٹھے ءَ پد تو آزاد بئے چہ زندگی ءِ درد ءُ رنجان۔

بیبگر پاد اتک جان ءِ شُست نوکیں گُد ئِے گور ءَ کُت سپاھی ءَ چاہ آؤرت ءُ گشت ئِے دگہ کار ھست بگُش بیبگر چاہ دیم ءَ کُت اَنت ءُ سپاھی ءَ را گُشت ئِے ھو دو کار ھست اگاں کُت ئِے کن ئے۔ سپاھی ءَ گشت بہ گُش الم کنان ئِے، بیبگر ءَ گشت من ءَ کاگد ءُ کلمے بدئے من یک نمدی یے نبشتہ کن آں میتگ ءَ برو ھمے نمدی ءَ مھپری ءَ بہ دئے ءُ یک سگریٹے بیار گوں ۔

سپاھی ءَ سگریٹ کاگد ءُ کلم آؤرت بیبگر سگریٹ روک کُت ءُ نمدی ءِ نبیسگ شرو کُت نمدی یے تہ ءَ نبشتہ ئِے کُت “داں اے نمدی ترا سر بہ بیت من مُرتگ آں تو وَ دیریں ھمے پھمِ اتگ کہ من مُرتگاں بلے آ ھال دروگے کہ سپاھیاں تالاں کُتگ۔ یک شپے ءَ دژمن ءَ کوہ ءَ مئے گِدان ءَ اُرش کُت بالاچ ءُ کمبر ءُ دگہ دو سنگت شھید اِش کُت بلے من ٹپیّ بوت آں من ءَ سپاھیاں دزگیر کُت من ءَ سالے بیت کہ ھمد ءَ زندان ءَ بوتگ آں مروچی منی پاھُو ءِ روچ اِنت من بس ھمنچو گش آں تو کسانی ءِ وڑ ءَ انگت زیبا ئے، من ءَ امیت اِنت کہ تئی زیباھی ءُ سسّاءُ سوچ گیشتر بوتگ انت ۔

تو چو گلزمین ءِ پَیم ءَ من دوست بئے من لگور نیاں اگاں من سلاہ دور بہ داتیں گڑا ایشاں من ءَ نوکیں زندگی یے بکشات بلے من ءَ لگوری ءِ زند ءِ زلورت نہ اِنت تئی ءُ گلزمین ءِ دیوانگ بیبگر-

بیبگر سپاھی ءَ نمدی دات ءُ دیم ءَ پاھو ءِ جاگہ ءَ روانگ بوت سپاھی ءَجُست کُت گُڈی واھشت؟بیبگر ءَ گُشت ھو من ءَ یک دمانے ھیالانی دنیا ءَ روگ ایوک ءَ بِل اِت سپاھیاں بیبگر ایوک کُت ۔

بیبگر ءَ دوشیگیں “تھاریں شام”ءِ واب ءَ مھپری ءِ گُشاں ءَ یات کنگ ءِ جھد کُت ءُ پچکندے جت ئِے ءُ سپاھی ءَ اشارہ کُت کہ انوں من پہ مِرگ ءَ تیار آں سپاھی ءَ پاھو ءِ چِٹ چِک اِت ءُ ھمد ءَ چہ بیبگر ، جنگ ، مھپری ،سنگت ءُ گلزمین ءِ کسّہ ھلاس بُوت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سربیتگیں ھالانی رِد ءَ بلوچستانءِ بنجاھی شھر شال ءَ تیرگواری وئیل ءَ یک مردمے ٹپی ءُ ریل ءِ لپاشگ ءَ یک مردمے بیران، چمن ءَ دگ ءِ وئیل ءَ دو مردم بیران یکے ٹپی۔

بلوچستان ءِ بنجاھی شھر شال ءَ تیرگواری یے وئیلے ءَ یک مردمے ٹپی بوتگ پولیس ءِ رِد ءَ شال سریاب دگ ءِ سر ءَ دو مردم وت ماں وت اڈیتگ اَنت، ھمے میان ءَ توپک ءِ آس برگ ءَ شکیل نامیں مردمے ءَ تیر لگ اِتگ ءُ ٹپی بوتگ ۔

دمگی پولیس ءَ ٹپی بوتگیں مردم نادراھجاہ ءَ بُرتگ اَنت ءُ اے درگت ءَ گیشیں پٹ ءُ پول کنگ ءَ اَنت۔

چمن شھدگ ءِ سر ءَ ڈیمپر ءُ گاڑی ءَ ڈیک ورگ ءِ سوب ءَ یک مردمے بیران بوتگ ءُ یکے ٹپی ۔

دمگی لیویز ءِ رِد ءَ دوشمبے ءِ روچ ءَ شال ءُ چمن ءِ شھدگ ءِ سر ءَ پیرعلیزئی ءِ نزیک ءَ ڈمپر ءَ گوں گاڑی ءَ ڈیک وارتگ ڈیک ورگے سوب ءَ روح اللہ ءُ گلام جیلانی بیران بوتگ انت وھدیکہ انبیا نامیں مردمے ٹپی بوتگ ۔

لیویز ءَ ٹپی ءُ بیران بوتگیں مردم دمگی نادراہ جاہ ءَ سرکُتگ انت لیویز ءِ گوشگ انت کہ ڈیمپر ڈرئیور ءَ ڈیمپر ءَ پلیٹ پِر نہ بوتگ ، اے درگت ءَ گیشیں پٹ ءُ پول برجاہ انت ۔

ھمے وڑ ءَ شال ءَ دگہ وئیلے ءَ ریل ءِ لپاشگ ءَ یک مردمے بیران ریسکو: بنشون ءِ رِد ءَ شال ءَ سریاب کسٹم نزیک ءَ ریل گاڑی ءِ لپاشگ ءَ یک مردمے بیران بوتگ اژدری چار ءُ ٹپاس ءِ ھاتر ءَ جون نادراہ جاہ ءَ برگ بوتگ ءُ پد ءَ کھول ءَ دیگ بیتگ ۔

نامی ئیں بلوچ زالبولیں رھشون ءُ بلوچ اسٹوڈنٹس آگنائزیشن ءِ گوستگیں چیئرپرسن کریمہ بلوچ ءِ “کوش” ءِ ھلاپ ءَ مروچی بلوچستان ءِ دمگ ھورماڑہ ءُ واشک ءَ زھرشانی کنگ بیتگ۔

دی بلوچستان پوسٹ

ھالانی رد ءَ ھورماڑہ ءُ واشک زالبول، چُک ءُ ورنایاں اکس ءُ نبشتگیں بینرز چست کرتگ ءُ زھرشانی کُتگ ءُ کریمہ بلوچ ءِ “کوش” ءَ ھواریں دستانی پدر کنگ ءِ لوٹ کرتگ ۔

زانگ بہ بیت کینیڈا ءَ درانڈیھی ءَ جھمنندیں نامی ئیں بلوچ زالبولیں رھشون ءُ بلوچ اسٹوڈنٹس آرگنائزیشن آزاد ءِ گوستگیں چیئرپرسن بانک کریمہ بلوچ ءِ گوستگیں ھپتگ ءَ بیگواہی ءُ پدا “کوش” ءِ ھال دیما اتکگ اَت۔

بانک کریمہ ءِ “کوش” ءِ ھال ءِ سربیگ ءَ پد سرجمیں بلوچستان آئی کوش ءِ ھلاپ ءَ گوستگیں یک ھپتگے ءَ بلوچستان ءِ بازیں جاہ ءُ شھر، کُچَگی دمگاں زھرشانی درچ برجاہ اِنت، زھرشانی کنوکانی گوشگ اِنت کہ کریمہ بلوچ راجی جھد ءِ آجوئی ءِ پژدر ءَ کُشگ بیتگ ۔

یات بہ بیت مروچی آواران ءُ تمپ ءَ کریمہ بلوچ ءِ “کوش” ءِ بگیری ءَ بیوکیں زھرشانی دارگ بیتگ اَنت ءُ تمپ ءَ لس مردماں پوج ءُ استانی فورسزانی دیما اوشتاتگ اَنت ءُ اوگام ھم جتگ اِش۔

دی بلوچستان پوسٹ

سندھ ءِ مزن شھر کراچی ءَ بیگواھیں بلوچانی ھاتر ءَ زھرشانی برجاہ ، وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ ھپتاد ءُ چار روچ سرجم بوتگ- چاگردی مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بیگواھیں مردمانی کھولانی پُرایمنیں جد ءُ جھد سپر ھر روچ ءِ درایگ ءَ گوں ریاستی ءِ زوراکیاں راجدپترے تہ ءَ نویسگ انت – دسمبر ءِ ماھے بندات ءَ ھم ریاستی ھاکمانی ھون ریچیں لشکر کشیاں گوں بندات بوتگ اَنت – کلات ، مستونگ ءَ چہ بگر پنجگور،گچک، آواران ءُ بولان ءَ تاں پاکستانی پوج لس بلوچانی سر ءَ بیڑ اش برتگ ءُ آھانی گس اش تباہ کرتگ انت –

آئی ءَ دیمتر ءَ گوشتگ کہ اے لشکر کشیاں بازیں کساسے ءَ چُک ءُ زالبول ٹپی بوتگ انت وھدیکہ بلوچستان ءِ بازیں دمگاں ریاستی ادارھانی جوڑ کرتگیں ڈیتھ اسکواڈز پارلیمانی وزیرانی چیردستی ءَ کار کنگ انت –

ماما قدیر بلوچ ءِ گوشگ ات کہ پاکستانی پوج ءَ بالی گرابانی اُرش برجاہ داشتگ انت، گوستگیں روچاں یک لوگے ءِ سر ءَ بمبگواریں بالگردانی تیرگواری ءَ چہ ھپت مردم کُشگ بوتگ کہ آ پد ءَ بلوچ سلاہ بند کُرتگ دیم ءَ آرتگ انت بلے آ ابید سلاہ بستگیں لس مردم بوتگ انت، پرچا کہ بلوچ سلاہ بندیں جنگول بید سلاھاں نیا انت لوگان نہ نند انت -و

آئی ءَ گوشتگ کہ ریاست بلوچ لس مھلوکاں وتی نشانگ کنگ ءُ بلوچ ءِ چکچینی ءَ کنگ ءَ انت- پاکستانی پوج وتی چیریں ادارھانی گوم ءَ ھوار انت ءُ بدنامیں دُز ڈنگ، نشہ باپاری کنوکاں یکجاہ کنت بلوچستان ءِ ھر دمگ ءَ ڈیت اسکواڈز جوڑ کنت سیاسی باسک، رھشون ءُ دگہ پگرانی منوگراں نشانگ کن انت یا پاکستانی فوج ءِ دست ءَ آوار جنائین انت –