TBP Balochi

اگاں ما وتی جد ءُ جھد ءَ پردانی پشت ءَ یل بہ کن ایں گڑا پرد باند ءَ پدکنز انت راج کجا بہ روت – ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ بیگواھیں بلوچانی ھاتر ءَ زھرشانی برجاہ ، وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ ھپتاد ءُ شش روچ سرجم بوتگ –
چہ حیدرآباد ءَ جسقم ءِ کلانیں باسک نبی بخش چانڈیو، الھی بخش ابڑو، رسول بخش سندھی، ءُ دگہ مردماں بنجل ءِ تر ءُ تاب کرتگ بیگواھیں مردمانی کھولانی گون ءَ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گون ءَ باوست کنان ءَ گوشتگ کہ اے بلوچ ءِ مستریں سوبمندی انت کہ بلوچ ءِ راجدپتر ھزاراں سالی ئیں جد ءُ جھد ءِ راجدپتر اِنت- بلوچ وتی راج ءَ راہ رھبندانی سر ءَ آرگ انت بلکیں آؤرتگ اَنت – اگاں ما وتی جد ءُ جھد ءَ دھشت ءَ گوں بندوک بہ کن ایں گڑا دھشت باند ءَ پدکنز انت پد ءَ راج کجا بہ رؤت –

ماما قدیر بلوچ ءَ گوشتگ کہ اے پرایمنیں جد ءُ جھد شھیدانی کربانی، شھیدانی ھوناں چہ دیم ءَ اتکگ، اشی ءَ گوں ھچ وڑیں مردم ءَ بندوک مہ کن ایت، باند ءَ ھما مردم بلوچ ءِ لوٹاں چہ وتی زاتی لوٹاں دوستر مہ لیک ایت گڑا اشی تاوانی ءَ کَے پُر کنت –

آئی ءَ دیمتر ءَ گوشتگ کہ وھدے کہ ما روانک ءُ زھرشانی ءِ جار ءَ پرینیں گڑا بتیں مردم اشی ءِ بگیری ءَ پندل ساز انت کہ اد ءَ بمباری ءَ تباھی بیت، اے وڑیں مردم بہ گْوش انت کی زانت ءُ زانشت راہ دارگ ءُ ایردستی ءَ چہ مستریں تباھی ءُ بربادی کجام انت –

آئی ءَ گوشتگ کہ رسانکدرانی کمک ءَ چہ ھم پندل ساز کنگ ءُ بلوچ ءِ جد ءُ جھد ءَ ناشرکاری ءِ نام دیگ بوگ ءَ انت – تانکہ بلوچ چکچینی ءَ راہ ساپ کنگ بہ بنت –
گڈسر ءَ ماما قدیر بلوچ ءَ گوشتگ مارا پاکستان ھر وڑیں نامے بہ دنت بلے ما وتی پُرایمنیں جد ءُ جھد ءَ دنیا ءَ وتی نیمگ ءَ دلگوش ءُ وتی دوستگیں مردماں یل دائینگ ءَ –

دی بلوچستان پوسٹ

بلوچ آجوئیں لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ گل ءِ سرمچار عبدالواحد بلوچ آواران ءَ پاکستانی پوج ءِ گون ءَ میڑ ءَ شھید بوتگ، ما آئی ءَ را سھر چکیں دروت ندر کنیں کہ آئی ءَ تمردی ءَ دژمنیں پوج ءِ گوم ءَ جنگ کرتگ ءُ شھید بوتگ –

جارکش ءَ گوشتگ کہ سرمچار عبدالواحد بلوچ ء قادربخش آواران ءَ دژمنیں پوج ءِ گون ءَ جنگ دیان ءَ شھید بوتگ – آئی ءَ تمردی ءُ جوانیں رپکاں گوں جنگ دیان ءَ وتی ھمراھیں سنگتانی جنگ جاہ ءَ در کنگے ھاتر ءَ دژمن ءِ دیم ءَ چو دیوال ءَ مِک بوتگ ءُ جنگ دیان ءَ شھید بوتگ – اے جنگ ءَ دژمنیں دو کارمند مُرتگ ءُ سَے زدگ بوتگ اَنت –

میجر گْوھرام بلوچ ءَ گوشتگ کہ آجوئی ءِ جنگ ءَ عبدالواحد بلوچ ءِ دیمونی ءُ کرد بے درور انت، آئی ءَ پیش ءَ ھم باز براں دژمنے گون ءَ تمردی ءَ جنگ کرتگ گوست ءَ جنگے میان ءَ ٹپی ھم بوتگ –

جارکش ءَ گوشتگ کہ آئی ءِ جد ءُ جھد ءُ دیمونی ورنایانی ھاتر ءَ روکیں چراگ ءِ مان انت، آئی ءِ شھیدی آجو بلوچستان ءِ نیمگ ءَ گڈی منزل اِنت –

دی بلوچستان پوسٹ

گوستگیں شپ ءَ ناشُناسیں مردماں ھاران ءِ شھر ءَ باپ ءِ بنجاھی کارگس ءِ سر ءَ دز بمب اُرشے کُتگ، اُرش ءَ کارگس ءَ تاوان رس اِتگ ، جانی تاوان ءِ ھال نیست –

دومی نیمگ ءَ بلوچ سلاہ بندیں گل یو بی اے ءِ جارکش مزار بلوچ ءَ کارگس ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ گوستگیں شپ ءَ ھاران ءِ شھر ءَ مزنیں مسیت ءَ دگ ءِ سر ءَ برجاھیں سرکاری پلامرزی کنوکیں پاٹی باپ ءِ بنجاھی کارگس ءِ سر ءَ مئے سرمچاراں دز بمب اُرشے کُتگ –

آئی ءَ گوشتگ کہ باپ پاٹی ءِ جوڑ کنگے مول ءُ مراد بلوچستان ءِ تہ ءَ آجوئی لوٹوکیں ءُ راجدوستاں ترس ءُ بیھار دیگ، آجوئی ءِ پلامرزی ءَ چہ وت ءَ یک کر کنگ یا پہ مدامی آھاں بے توار کنگے ھاتر ءَ پاکستانی انٹیلیجنس ایجنسیانی گوشگ ءِ پد ءَ بلوچ راجی زرمبشت ءِ بگیری ءَ مراگش برجم دارگ ءَ باپ پاٹی رھشونءُ باسک ریاست ءِ چیردستی ءَ کار کنگ ءَ ھوار انت –

آئی ءَ گوشتگ کہ بلوچ راجی زرمبشت ءِ درسیں دژمن مئے نشانگ انت اگان آ راجداری بھانگ ءَ کنگ ءَ انت یا سلاہ بند انت –

گڈسر ءَ جارکش ءَ گوشتگ کہ مئے اُرش بلوچستان آجوئی ءَ تاں برجاہ مان انت –

دی بلوچستان پوسٹ

بلوچستان لبریشن فرنٹ ءِ جارکش میجر گْوھرام بلوچ ءَ شش پوجی کارندھانی کوش ءِ زمہ واری منّ اِتگ اَنت ناشناسیں جاھے ءَ رسانکدراں شنگ کرتگیں درشانے ءِ تہ ءَ گْوشتگ کہ مروچی سِی دسمبر ءَ چار شمبے ءِ روچ ءَ کیچ ءِ دمگ ڈنڈار ءَ سرمچاراں پاکستانی پوج ءِ گشتی ٹولی ءِ سر ءَ ڈنڈار بدولک ءِ ھند ءَ نشانگ کرتگ ءُ شش کارندہ کُشتگ اَنت-

میجر گوھرام بلوچ ءَ گْوشت کہ بلوچ مھلوک پاکستانی پوج ءُ آیانی کمکاراں گستا بہ بنت سرمچار کجام ھم وھد ءَ آیاں نشانگ کرت کن اَنت –

آئی ءَ گْوشت کہ زیردستیں بلوچستان ءِ آجوئی ءَ داں زورگریں پوج ءِ سر ءَ اُرش برجاہ مان اَنت –

بلوچ یکجھتی کمیٹی ءِ نیمگ ءَ مند ءَ کریمہ بلوچ ءِ “کوش” ءِ ھلاپ ءَ زھرشانی کنگ بیتگ، زھرشانی مند بلو ءَ بندات بیتگ ءُ تران بیتگ ءُ سورو ءَ سر بیتگ – ھمے پئیماں مستونگ ءَ ھم بلوچ نودربر رھشون بانک کریمہ بلوچ کینیڈا ءَ “کوش” ءِ ھلاپ ءَ زھرشانی کنگ بیتگ۔

دی بلوچستان پوسٹ

زھرشانی ءَ جنین ءُ چُکاں ھوار بازیں مردمے ءَ بھر زرتگ ءُ کریمہ بلوچ ءِ کوش ءِ ھلاپ ءَ اوگام جتگ ءُ سورو ءَ مُچے ءِ دروشم ءَ مُچ بیتگ اَنت ءُ اود ءَ ٰآیاں زھرشانی کرتگ ءُ گوشتگ کہ ریاست ءَ بلوچ ءِ نسل کُشی بازیں وھدے ءَ بندات کرتگ ءُ نِی اے نسل کُشی ءَ باز گیشی اتکگ –

ٰآیاں گوشت کہ بلوچانی نودربراں ھوار رھشون کُشگ بیگ ءَ اَنت اے زُلمانی دارگ ءِ ھاتر ءَ جھان ءِ انسانی ھکانی گل گامگیج بہ زور اَنت –

مند ءَ کریمہ بلوچ ءِ کوش ءِ ھلاپ ءَ کش اِتگیں روانک ءَ پوج ءَ بیڑ برتگ ءُ مندیگ کور ءَ آیانی سر ءَ زوراکی کرتگ ءُ مردم داشتگ اَنت –

آیاں گوشت کہ گوستگیں وھداں تربت ءَ ھیات نامیں یک نودربرے پوج ءَ کُشتگ ءُ آ یک بے میار ءُ لس نودربرے بیتگ ءُ ھمے وڑ ءَ آیاں گوشت کہ گلام مھمد بلوچ ھم بلوچانی یک مزنیں رھشونے بیتگ ءُ آ ھم پاکستانی پوج ءَ آوار جنگ ءَ پد شھید کرتگ ءُ ھمے وڑ ءَ اے کوش ءَ دراج کش کنگ بیتگ ءُ بلوچانی رھشوناں درملکاں ھم شھید کنگ ءَ اَنت –

ھمے وڑ ءَ مستونگ ءَ بلوچ یکجھتی کمیٹی ءِ نیمگ ءَ زھرشانی کنگ بیتگ –

زھرشانی شھر ءِ جتا جتائیں دگاں تران بیتگ ءُ ساروان پریس کلب ءِ دیم ءَ شھید سلطان چار راہ ءَ مُچے ءِ دروشم ءَ مُچ بیتگ –

زھرشانی ءَ چاگردی مردم، سیاسی پاٹیاں بھر زرتگ ءُ کریمہ بلوچ ءِ ناھکیں کوش ءِ ھلاپ ءَ زھرشانی کرتگ ءُ کریمہ بلوچ ءَ را سھر چکیں دروت ندر کرتگ –

زھرشانی ءَ تران کنوکیں مردماں تران کنان ءَ گوشت کہ بلوچانی سرڈگار پیسر ءَ ھونین کنگ بیتگ ءُ نِی اے ھونی ءِ دست بلوچانی ساہ ءِ گرگ ءَ درملکاں ھم سر بیتگ اَنت –

آیاں گوشت کہ بلوچانی رھشونانی کُشگ ءَ بلوچ ھلاس نہ بنت ءُ آ ھمے سرپد بنت کہ بلوچانی رھبر ءُ رھشونانی گرگ ءُ کُشگ ءَ بلوچانی نسل ھلاس بیت –

آیاں گوشت کہ کریمہ بلوچ ءَ ھمک تک ءَ بلوچانی توار چِست کرتگ ءُ مروچی کریمہ بلوچ ھمک بلوچانی دلاں جاڑیگ اِنت ءُ چوشیں راجی رھشون ءِ کرد ءُ سسّائیں پکر بلوچانی رھشونی ءَ کنگ ءَ اِنت –

آیاں گوشت کہ مروچی کریمہ بلوچ مئے میان ءَ جاڑیگ نہ اِنت بلے کریمہ بلوچ ءِ پکر مئے رھشونی ءَ کنگ ءَ اِنت کہ مروچی دگانی سر ءَ درکپتگیں بلوچ زالبول ھمیشی ءَ پدر کنگ ءَ اِنت کہ کریمہ ھمک لوگ ءَ جاڑیگ اَنت –

آیاں گوشت کہ بلوچاں وتی ھمک ھک ءَ توار چِست کرتگ ءُ بلوچانی رھشون کرناں چہ کرناں پیداک ءُ وتی سراں دیگ ءَ اَنت –

آیاں گوشت کہ چریشی ءَ پیسر سویڈن ءَ بلوچانی نامی ئیں اھوالکار ساجد ھسین ھمے وڑ ءَ گار کنگ ءُ کُشگ بیتگ ءُ ھمے رنگ ءَ عارف بارکزئی ھم کہ نامی ئیں نبشتہ کارے بیتگ ءُ آ ھم کُشگ بیتگ –

آیاں گوشت کہ ریاست ھمے سرپد بیت کہ ما وتی کشندھاں زانگ ءَ نہ اِنت بلے ما وتی کشندھاں زانگ ءَ اِنت ءُ ما اشی ءَ پدر کنگ لوٹ ایں کہ بلوچانی سر ءَ بیتگیں زُلماں دنیا سرپد بہ بیت –

زانگ بہ بیت کریمہ بلوچ ءِ بیست دسمبر ءَ کینڈا ءِ شھر ٹورنٹو ءَ گار بیتگ ءُ بیست ءُ یک دسمبر ءِ میانی شپ ءَ آئی ءِ جون یک کورے ءِ تہ ءَ دزکپتگ –

بلوچستان ءَ سیاسی ءُ لس مردمانی گوشگ اِنت کہ کریمہ بلوچ ءِ کوش ءَ پاکستانی چیریں ادارھانی دست ھوار اَنت-

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سراوان ءَ یک لوگے ءَ ایرانی پوج ءَ بیڑ برتگ ءُ اود ءَ دو نودربر آوار جتگ ءُ برتگ اَنت –

اھوالکار ءِ رد ءَ ھژدہ ءَ دسمبر ءَ ایرانی پوج ءَ سراوان ءَ یک لوگے ءَ بیڑ برتگ ءُ اود ءَ دو مردم آوات جتگ ءُ برتگ اَنت –

آوار جنگ بیتگیں مردمانی پجار ارسلان پُرکی ء مھمد سالہ جھمنند کُرشان سراوان ءُ فرھاد پُرکی جھمنند گورناگان سراوان ءِ ناماں زانگ بیتگ اَنت –

اھوالکار ءِ رد ءَ ارسلان یک نودربرے ءُ نیکراھی وانگ جاھے ءَ سرباز کوھن ءَ وانگ ءَ اِنت ءُ ارسلان بیست ءُ ھشت نومبر دوھزار ءُ نوزدہ ءَ یک برے ھم آوار جنگ بیتگ ءُ دوماہ ءَ زندانیانی پد یلہ کنگ بیتگ –

ھمے وڑ ءَ گوستگیں روچ ءَ دزاپ “زاھدان ” ءَ ھم ایرانی چیریں ادارھاں اھل سنت ءِ یک نات وانے کہ آئی ءِ نام قاری ضیاء الرحمان اِنت کہ آوات جنگ ءُ برگ بیتگ –

اھوالکار ءِ رد ءَ ایرانی پوج ءَ ھمے ماہ ءِ تہ ءَ اھل سنت ءَ بندوکیں بازیں مردم گپتگ ءُ برتگ اَنت –

دی بلوچستان پوسٹ

بلوچ یکجھتی کمیٹی ءِ رھشوناں کریمہ بلوچ ءِ کوش ءِ ھلاپ ءَ زھرشانیاں بھر زیروکیں مردمانی بیھار دیگ ءِ سر ءَ ترندیں زھرشانیانی جار جتگ –

اے گپ بلوچ یکجھتی کمیٹی ءِ رھشوناں شال ءِ پریس کلب ءَ پریس کانفرنس کنان ءَ گْوشتگ اَنت –

آیاں گْوشت کہ کریمہ بلوچ ءِ کوش ءِ ھلاپ ءَ سرجمیں ڈیھ ءَ زھرشانی بندات کنگ بیتگ اَنت ءُ بلوچستان ءِ بازیں جاھاں زھرشانیانی دارگ ءِ ھاتر ءَ مردماں ترسینگ ءَ اَنت ھنچش کہ گوادر، پسنی، آواران ءُ شال ءَ ھما مردم کہ زھرشانیاں بھر زیروک بیتگ اَنت آیانی لوگاں بیڑ برگ بیتگ ءُ بیھار دیگ بیتگ اَنت کہ کریمہ بلوچ ءِ کوش ءِ ھلاپ ءَ بیوکیں زھرشانیاں بھر مہ زور اِت، کریمہ بلوچ ءِ بنکی ھنکین ءَ ھم زھرشانی دارگ ءِ جھد بیتگ ءُ جائو ءَ ھم زھرشانی دارگ بیتگ اَنت -ما انسانی ھکانی میان اُستمانی گلاں گوں دزبندی کن ایں کہ آ بلوچستان ءَ آجوئی ءِ درشانی کنگ ءَ بندش اِنت چریشی ءِ سر ءَ گامگیج بہ زور اَنت ءُ بلوچانی سر ءَ بیوکیں زُلمانی داروکی ءَ بہ کن اَنت ءُ اے درچ ءَ ما ترندیں رنگے ءَ زھرشانیانی درچ ءَ بندات کنگ ءَ ایں کہ اشی ءِ بندات آیوکیں سال ءِ دوجنوری دوھزار ءَ بیست ءُ یک ءَ چہ شال ءَ بندات بیت اِنت ءُ اے زھرشانی سرجمیں ڈیھ ءَ کنگ بیت –

بلوچ یکجھتی کمیٹی ءِ رھشوناں گْوشت کہ کریمہ بلوچ ءِ کوش ءِ بارہ ءَ ٹورنٹور پولیس ءَ گیشیں پَٹ ءُ پول نہ کرتگ چُشکہ بنداتی پَٹ ءُ پول ءَ پولیس ءَ اے کیس” نان کرائمنل ” بزانکہ اے وئیل ءَ کسے ءِ دست مان بوگ ءِ شبینگ نیست اَنت ءُ چریشی ءَ پد جون کھول ءَ دیگ نہ بیتگ اُمیت داریں کریمہ بلوچ ءِ گُڈی واب جاہ آئی ءِ بنکی ھنکین ءَ کنگ بیت –

نبشتانک: چے نبشتہ بہ کن آں ؟

نبشتہ کار : داد شاشانی

دی بلوچستان پوسٹ

چے نبشتہ بہ کن آں ؟ کُجام لبز ءُ گال ءَ چے بنا بہ کن آں ءُ کُجام لبز ءُ گال ءَ آسر بہ کن آں ؟ کُجام گالبند ءَ پہ تو گچین بہ کن آں ؟ تو وت بُہ گْوش کُجام گالبند تئی جُھد ءُ جپا ءِ راستیں بزانت ءَ دَنت ءُ تئی مِھرانی درانگازی ءَ کنت ؟ ھمائیں کہ اے بدیں ھال من ءَ سر بوتگ جیڑگ ءَ آں چے بُہ گْوش آں چے نبشتہ بہ کن آں ؟ من ءَ بل من شَر شَریں نبشتہ کار ءُ زانتکاریں مردُماں گندگ ءَ آں ھیران اَنت اگاں کسے ءَ گیش جاھلی کُتگ پہ تو نبشتہ کنگ ءَ جُھد کُتگ گُڑا گالرد ئِے دو یا سے ءَ دیم ءَ نہ بوتگ اَنت منی ھیال ءَ ھر کس چو منی ءَ پہ نبشتہ کنگ ءَ اُومان کنت چار اِیت منی کِرا چُشیں گالبند ءُ گال نیست کہ تئی درانگازی ءَ بہ کنت گوں ارسیگیں چماں پد ءَ ند ءَ بند کنت ءُ تاک ءِ تَل ءَ دے اَنت ئِے دوئیں دستاں سر ءَ کن اَنت ءُ نند اَنت وتی سر ءَ ھیران بنت من بدل نہ بوتگ آں یا منی مجگانی توک ءَ نزوری ودی نہ بوتگ کہ ھچ نبشتہ کنگ نہ بوگ ءَ اِنت پرچا ؟ نہ بوگ ءَ اِنت بلے پرچا نہ بوگ ءَ اِنت ؟ اے کُجام سَبَب بیت کہ دو گالرد ءَ دیم ءَ بِہ ھاٹیگ باں اگاں کسے ءَ تئی نام ءَ نبشتہ کُتگ من ونتگ ءُ چار اِتگ منی ھیال ءَ آ نبشتانکاں تھنا تئی نام نبشتہ بوتگ بس تئی راستی ھما ھداں ایر اِنت انگت کسی ءَ تئی راستی نبشتہ نہ کُتگ تھنا تئی نام ءَ ۔۔۔ من کہ نبشتہ کنگ ءَ آں وت ھیران آں من کَی نام ءَ اِے نبشتانک ءَ نبشتہ کنگ ءَ آں اے گپ پک ءَ اِنت کہ تئی راستی ءُ مِھر ءُ جُھد ءُ جپاھانی درانگازی ءَ کنگ ءَ نہ آں باید وَ ھمیش اِنت من اے نبشتانک ءَ تئی نام ءَ نبشتہ مہ کن آں کسے کہ اے نبشتانک ءَ بُہ وان اِیت من تئی نام ءَ نبشتہ کُتگ منی سر ءَ شَر کند اِیت کہ اے مرد ءَ وتی دل ءَ بانک ءِ نام ءَ نبشتانکے گوں نبشتہ کُتگ وتی راجدوستی پدر کُتگ کہ من ھم بلوچ آں ۔

من کہ اے نبشتانک ءَ نبشتہ کنگ ءَ آں ھمے کوٹی ءَ نشتگ آں منی ھیال ءَ کوٹی تَرّگ ءَ اِنت برے دیم ئِے رودرآتک ءَ اِنت برے روبرکت ءَ اِنت برے زرگوات ءَ اِنت برے ایرگوات ءَ اِنت من ءَ گُمان بیگ ءَ اِنت زمین تَرّگ ءَ اِنت یا من اِمرُوز ءَ نہ آں دگہ ستالے ءَ زندگ آں ءُ زند گْوازینگ ءَ آں تئی روگ اِدا کس ءَ را باور نہ بیت تو مارا یل کُتگ ءُ شُتگ ئے ھر کس کہ تئی نام ءَ گیپت آئی ھیال ءَ تو ھما مردُم ءِ دیم ءَ نشتگ ئے گوں آئی ءَ دیوان ءَ ئے ءُ گْوشگ ءَ ئے اے جُھدے ، جُھدانی تھ ءَ جَھلی ءُ بُرزی کیت ءُ روت بلے جُھد وتی گاماں نہ دار اَنت جُھد وتی گُڈی مِنزل ءَ پہ جُنزان بنت تئی پُر بچکندگیں روہ مُدام گوں راج ءَ ھر سھت ءُ داماں گوں اِنت ءُ ھمے سکیں ءَ دیگ ءَ اِنت ھچ نہ بوتگ تئی دلبڈیانی لَڑانی لَڑ آسر نہ بیگ ءَ اَنت ھر کس ترا وتی کَش ءُ کِرا گندگ ءَ اِنت ءُ مارگ ءَ اِنت
منی ھیال ءَ اے گپ تئی جند ءَ باور نہ بیگ ءَ اِنت گندئے ؟ تو وت ءَ کدی چَہ راج ءَ ءُ زمین ءَ گِستا کُت نہ کن ئے نہ کہ دگہ کسے اے کار ءَ کُت کنت ! تو ھما بلوچ ءِ مڈی یے داں بلوچ مانیت تو مان ئے کسے کہ تئی زُبان ءَ گپ کنت بزان بلوچی ءَ گپ کنت آ ترا الم پجا کار اِیت ترا زانت ترا گند اِیت ترا گوں ھم دیون بیت تئی مِھران چَہ بِہ بھر نہ بیت ۔

انچو کہ کازی گْوش اِیت داں کوچگاں آسے بَلّ اِیت تو زندگ ئےداں بُرز ءَ استارے تِپ اِیت تو زندگ ئے-

بانُک تو زندگ ئے تو زندگ ئے تئی ھر گپ ءُ تران تئی ھر گْشتیں چو آیات ءَ یات اِنت بلوچ راج ءِ دل ءَ تو ھر تَلّو ءِ سر ءَ گپ ءَ ئے ءُ گْوشگ ءَ ئے ما زوراکی ءَ نہ منّ اِیں ما نہ منّ اِیں کہ کسے مارا ایر دست بہ کن ما نہ منّ اِیں کہ مئے ڈیھ ءَ کسے گوں بدیں چمے ءَ بچار اِیت ما نہ منّ اِیں کسے مئے مڈیاں بِہ مئے جُست ءَ دست سک بہ کنت ۔

ھر روچ تئی دیوان اِنت ھر روچ بلوچ راج ترا گوش دارگ ءَ اِنت ھر روچ تئی سکینانی ودار ءَ کنگ ءَ اَنت تو راج ءِ رھبر بوتگ ئے تو راج ءِ رھبر ئے تو ھر وھد ءَ راج ءِ رھبری ءَ کن ئے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

لچہ: بانک کریمہ ءِ نام ءَ

لچہ کار: شلی بلوچ

دی بلوچستان پوسٹ

بلوچستان ءِ شیریں زال پھر ءُ شان کریمہ اِنت
بچار مرچی ھمک شھر ءَ پدا جنزان کریمہ اِنت

ھمک لوگ ءَ پہ تو درکئیت کریمہ دروشمیں زالے
منی تمپ ءُ منی گوادر منی ھاران کریمہ اِنت

اے ھون ءِ روکیں کندیل ءَ دگہ رژنے من ءَ داتگ
منی ھاٹیگ منی مارِشت منی دیمپان کریمہ اِنت

نہ کنزیت ھچ وڑا پُشت ءَ تئی زوراکی ءَ بدواہ
گوں کوھیں توکل ءُ اوست ءَ پدا جنزان کریمہ اِنت

شلی داں منزل ءَ پلیں منی پگرانی رھشونیں
شلی آجوئی ءِ راہ ءَ منی ایمان کریمہ اِنت

دی بلوچستان پوسٹ

کریمہ بلوچ ءِ کوش ءِ ھلاپ ءَ سَے شمبے روچ ءَ یورپی ڈیھ نیدرلینڈ ءِ شھر ہیگ ءَ کنیڈین سفارتخانہ ءِ دیم ءَ بلوچ نیشنل مومنٹ (بی این ایم) ءِ نیمگ ءَ زھرشانی کنگ بوتگ ھمے وڑ بلوچستان ءِ شھر جعفرآباد ءَ ھم زھرشانی کنگ بوتگ –

بلوچ نیشنل مومنٹ (بی این ایم) ءِ نیمگ ءَ نیدرلینڈ ءِ شھر ہیگ ءَ کینیڈین سفارتخانہ ءِ دیم ءَ زھرشانی کنگ بوتگ، زھرشانی کنوکانی تہ ءَ انسانی ھکانی باسک، زالبول ءُ چُک ھم ھوار بوتگ انت –

زھرشانی کنوکاں کینیڈا ءِ ھکومت ءَ چہ لوٹ کتگ کہ کریمہ بلوچ ءِ بیرانی ءِ سر ءَ جوانی ءَ پٹ ءُ پول بہ کنت –
کریمہ بلوچ ءِ کوش ءِ بگیری ءَ بلوچستان ءِ شھر جعفرآباد ءَ ھم نودربرانی نیمگ ءَ چہ روانکے کشگ بوتگ –
بلوچ نودربر رھشون کریمہ بلوچ ءِ ماں کینیڈا ءَ بیگواھی ءَ پد آئی ءِ جون ءِ درآیگ ءَ پد بلوچستان ءَ ھوار پاکستان ءِ شھر ءُ دری ڈیھاں زھرشانی رِد بندات کنگ بوتگ اَنت – زھرشانی کنوکانی ھمے بھتام انت کہ کریمہ ءِ کوش ءَ پاکستانی چیریں ادارھانی دست مان انت –

بلوچ نودربر گل (بی ایس او) ءِ گوستگیں کمک سرکماش ءُ بلوچ نیشنل مومنٹ (بی این ایم) ءِ رھشون کریمہ بلوچ ءِ جون بیست ءُ دو ءُ بیست سَے دسمبرے میانی شپ کینیڈا ءِ شھر ٹورنٹو ءَ تیاب ءِ لمب ءَ پولیس ءَ دست کپتگ – چرائی پد پولیس ءَ پٹ ءُ پول ءَ پد ھمے گوشتگ کہ آئی ءِ کوش ءَ کسی دست مان نیست –

بلوچ نودربر رھشون ءِ مرگ ءَ پد بلوچستان، سندھ، پنجاپ، کے پی کے ءَ ھوار روکپتی ڈیھاں نودربر گل ءُ راجداریں گلانی نیمگ ءَ زھرشانی کنگ بوتگ –

پولیس ءِ پٹ ءُ پول ءِ رپورٹ ءَ پد بلوچ گلاں ھوار انسانی ھکانی ادارھاں اے رپورٹ ءِ پژدر ءَ زاھر کُتگ آھانی گوشگ انت کریمہ بلوچ ءِ شھیدی ءَ آئی ءَ دیگ بوتگیں بیھار بے دلگوش کنگ نہ بنت –

بلوچ رھشون ءِ شھیدی ءِ سر ءَ امریکی وکیل ءُ اسٹیٹ ڈپارٹمنٹ ءِ نائب سیکرٹری رابرٹ اے ڈسٹرو ءَ گوشتگ کریمہ ءِ دروشم ءَ دنیا یک رھشونے ءَ زبھر بوتگ – آ انسانی ھکانی توار ءِ توار ءِ بوتگ ءُ بیگواھیں مردمانی ھاتر ءَ توار چست کنگ ءَ بوتگ –

دومی نیمگ ءَ بلوچستان ءِ تہ ئِے راجدوستیں گلانی گوشگ انت کہ کریمہ بلوچ ءِ کوش ءَ پاکستان ءُ آئی ءِ اداراہ ھوار انت –

ھمے وڑ کریمہ بلوچ ءِ کوش ءِ بگیری ءَ مروچی بلوچستان ءِ شھر مستونگ ءَ ساراوان پریس کلب ءِ دیم ءَ ءُ مند ءَ ملا پازل چوک ءَ زھرشانی روانک کشگ بیت ءَ دگہ شھراں ھم زھرشانیانی جار پِرینگ بیتگ اَنت –