TBP Balochi

لچہ: بانک کریمہ ءِ یات ءَ

لچہ کار: ازیز سنگت

دی بلوچستان پوسٹ

نہ مُرتگاں من زندگاں
من زندمان ءِ دامن ءَ
چُو گواتے ءَ شِیکگ ءَ
چو کُوکرے ءَ بستگ آں
من آزمان ءَ رُستگ آں
زمین ءَ اچ مہ دُور باں
رُدان باں بلان باں
چو سنج ءَ من نشان باں
پہ گلزمین ءَ مادریں
پُلے آں بھارے آں
نہ ُمرتگاں من زندگاں

من زندمان ءِ دامن ءَ
من درچکے آں سبزُوکیں
چو زامُر ءَ رُستگیں
تلاریں مات بندے ءَ
ماں لیب گوات ءِ شِیکگاں
چو سازے ءَ ھوار ات آں

دلانی چاڑیں مھرے ءَ
چو ماتے ءَ پہ بچے ءَ
جگر بریجان ءُ بُنگرات
ھما بزانتیں مارشاں
کہ لہڈیں دردے سینگ ءَ
ءُ زمین ءِ گم وتی کُتگ
مُریدیں شْھ ءَ سگّتگ
چہ آس ءُ آپ ءَ گُوستگ آں

ھما مئے ڈیھ ءِ سر مچار
ھما مئے ڈیھ ءِ پُسّگ اَنت
ھما پکیریں مُولم اَنت
ھما بلوچ ءِ واھگ اَنت
ھما ازیز ءِ جبزگ اَنت
ھما مئے راج ءِ کُوپگ اَنت
ھما مئے رُژن ءِ کاروان
ھما مئے زند ءِ ھمسپر
ھما مئے ڈیھ ءِ وارس اَنت
ھما مئے ڈیھ ءِ وارس اَنت ۔۔۔۔!

سندھی راجدوست ءُ انسانی ھکانی باسکاں دروگیں بھتامانی پژدر ءَ دزگیر کنگ ءُ بیگواہ کنگ ءَ اَنت – سورٹھ لوھار

دی بلوچستان پوسٹ

چہ کراچی ءَ انسانی ھکانی باسک ءُ بیگواھیں مردمانی واستا توار چِست کنوکیں کامریڈ ساگر مکیش سلاہ بندیں مردماں آوار جتگ –

گیشیں ھالانی رد ءَ ایکٹویسٹ ساگر مکیش کراچی ءَ گارمنٹس ءِ کار ءَ بیتگ ءُ گوستگیں شپ ءَ سلاہ بندیں مردماں آوار جتگ ءُ بیگواہ کرتگ –

ساگر مکیش ءِ ھمراھی ءَ ساگر ءِ آوار جنی ءِ بھتام سیکیورٹی ادارھاں جتگ، آئی ءِ ھمراہ ءِ رد ءَ ساگر مکیش انسانی ھکانی باسکے بیتگ ءُ بیگواھیں مردمانی واستا توار چِست کنوکے بیتگ –

کراچی ءَ ساگر مکیش پی ٹی ایم ءِ زھرشانی ھوار بیگ ءِ ھمراھی ءَ سیاسی ءُ نودربرانی زھرشانیاں ھوار ھم بیتگ ءُ آ یک رندے پیسر ءَ ھم بیگواھی ءِ آماچ بیتگ –

بلوچستان ءِ رنگ ءَ کراچی تھ ئِے ءُ سندھ ءَ زورانسریانی آوار جنگ چریشی ءَ ھم پیش اتکگ اَنت ھمے رنگ ءَ سندھ ءِ بیگواھیں مردمانی یلہ کنائینگ ءِ ھاتر ءَ سندھ سباء شدکشیں ھرتالی بنجل ھیدر آباد ءَ برجاہ اِنت –

سندھی بیگواھی کھولانی گل وائس آف سندھی مسنگ پرسنز ءُ سندھ راچدوستیں پاٹی چہ سندھ ءَ بیگواھیاں لشکری ءُ چیریں ادارھانی دزمانجنی گوش اَنت –

وائس فار آف سندھی مسنگ پرسنز ءِ کنوینر سورٹھ لوھار ءِ رد ءَ لشکری سندھی راجدوست ءُ انسانی ھکانی باسکاں آوار جن اَنت ءُ بیگواہ کن اَنت – آئی ءں گوشگ اَت بازیں بیگواھیں مردمانی سر ءَ دروگیں بھتام لَڈگ بیتگ اَنت ءُ آیانی دزگیری پدر کنگ بیتگ اَنت –

سورٹھ لوھار ءِ رد ءَ لھتے روچ پیسر سی ٹی ڈی کراچی ءَ پنچ ماہ ءَ بیگواھیں منصور جونیجو کہ کراچی ءَ دزگیری ءِ پدر اِش کرتگ –

دی بلوچستان پوسٹ

بلوچستان ءِ دمگ سبی ءَ پاکستانی پوج ءِ کارندہ بمب تراکے ءِ نشانگ کنگ بیتگ اَنت چریشی ءَ چار کارندہ بیران ءُ پنچ زدگ بیتگ اَنت –

سبی ءِ دمگ سانگان ءِ کوھی ھنداں پاکستانی پوج ھما وھد ءَ نشانگ کنگ بیتگ کہ ایف سی ءِ کارندہ تراک چاری ءَ دگ ءَ ٹپاسگ ءَ بیتگ اَنت

تراک ءَ زدگ بیتگیں کارندہ ھیلی کاپٹر ءِ سر ءَ شال ءَ برگ بیتگ اَنت –

اھوالکار ابرار اھمد ءَ ایف سی ءِ جنگ بیتگیں کارندھانی بارہ ءَ ٹوئٹر ءَ نبشتگ کرتگ کہ مروچی سبی سانگان ءَ بمب اُرشے ءَ نائک عمران، لانس نائک معاروف، سپاھی جمیل ءُ ایوب جنگ بیتگ اَنت –

اُرش ءَ پد پوج ءِ گیشیں کارندہ تراک جاہ ءَ سر بیتگ اَنت ءُ ارشکارانی پَٹ ءُ پول اش بندات کرتگ اِت –

دی بلوچستان پوسٹ

نامی ئیں بلوچ زالبول رھشون ءُ بلوچ نودربر گل آزاد ءِ گوستگیں سروک کریمہ بلوچ ءِ یات ءَ سندھ ءِ بنجاھی شھر کراچی ءَ ڈیوا روک کنگ ءُ آئی ءِ ستاشانی کنگ بیتگ –

مروچی چار شمبے ءِ بیگاہ ءَ مھلوک ءِ بازیں مُچے ءَ کراچی ءِ پریس کلب ءِ دیم ءَ مُچ بیتگ ءُ ڈیوا ءِ روک کرتگ اِت، کریمہ بلوچ ءِ یات ءَ ڈیوا روک کنوکیں نیاد ءَ زالبول، چُک ءُ نودربراں بھر زرتگ –

ھمے وھد ءَ بھر زیروکیں مردماں گْوشت کہ کریمہ بلوچ ءِ جد ءُ جھد، دیمونیاں بلوچ راج ءِ دل ءَ کوھے ءِ پیم ءَ چیدگ بنت – آیاں گوشت کہ کریمہ بلوچستان ءِ شیرزالیں زال ءَ کرناں داں یات کنت ءُ آئی ءِ بے کچوئیں دیمونیاں مروچی بلوچستان ءَ راجی درد کہ چِست بیتگ اے کریمہ بلوچ ءِ زندگ بیگ ءُ دشمن ءِ مرگ ءِ نشانی اِنت –

نیاد ءَ بھر زیروکیں مردمانی دستاں کریمہ بلوچ ءِ اکس بیتگ اَنت کہ آیانی سر ءَ کریمہ بلوچ ءِ جد ءُ جھد ءِ ستاشانی نبشتگ اَنت –

ھمے رنگ ءَ گوستگیں روچاں فرانس ءِ بنجاھی شھر پریس ءَ ھم کریمہ بلوچ ءِ یات ءَ ڈیوا روک کنگ بیتگ ءُ آئی ءِ جد ءُ جھد ءِ ستاشانی بیتگ اَنت –

زانگ بہ بیت کریمہ بلوچ نامی ئیں بلوچ زالبول رھشون ءُ بلوچ نودربر گل آزاد ءِ گوستگیں سروک بیتگ ءُ آ گوستگیں سال بیست دسمبر ءَ کینیڈا ءِ شھر ٹورنٹو ءَ ناگتی بیگواہ بیتگ ءُ دومی روچ ءَ آئی ءِ جون یک کھورے ءِ تہ ءَ دزکپتگ –

کریمہ بلوچ ءِ ناگتی “کوش” ءِ ھلاپ ءَ بلوچستان، پاکستان ءَ ھوار بازیں ڈیھاں زھرشانی ءُ بلوچ راجدوست تکانی نیمگاں ریاست ء پاکستان ءِ سر ءَ آئی ءِ شوربندی ءِ نیمگ ءَ کوش ءِ بھتام ءَ جنگ ءَ اَنت –

بلے کریمہ بلوچ ءِ جون تنی وھدی کینیڈا پولیس ءِ گور ءَ اِنت ءُ بلوچستان ءِ راجدوستیں پاٹی کینیڈا ءِ سرکار ءَ تچکیں رنگے ءَ پَٹ ءُ پول ءِ لوٹ ءَ کنگ ءَ اَنت –

دی بلوچستان پوسٹ

سر بیتگیں ھالانی رد ءَ کیچ ءِ دمگ تمپ ءَ ناشناسیں پرپٹ سواریں مردماں تیرگواری کرتگ ءُ یک مردمے کُشتگ –

لیویز بنشون ءِ رد ءَ تمپ ءِ ھند کوھاڈ ءَ ناشناسیں سلاہ بندیں مردماں تیرگواری کرتگ ءُ عارف بھادر کُشتگ –

لیویز بنشون ءِ رد ءَ وئیل ءَ پد لیویز کارمنداں جون چِست کرتگ ءُ دمگ ءِ نادراہ جاہ سر کرتگ ءُ اود ءَ اژدری چار ءُ ٹپاس ءَ پد جون کھول ءِ دست ءَ دیگ بیتگ –

دمگی مردمانی رد ءَ عارف بھادر دمگ ءَ ھستیں ڈیٹھ اسکواڈ ءِ جمیل ملک ءِ سروکی ءَ سلاہ بند بیتگ ءُ دمگ ءَ ناشری ءُ دگہ کاراں دزمانجن بیتگ –

سیاسی مردمانی بھتام اِنت کہ پاکستانی پوج ءُ چیریں ادارھاں سرجمیں بلوچستان ءَ ڈیتھ اسکواڈ کرتگ جوڑ کرتگ ءُ آ لس مردمانی آوار جنگ ءُ کُشت ءُ کوشاں ھوار اَنت –

زانگ بہ بیت گوست ءَ تربت ءَ ملکناز نامیں زالبولے کُشگ بیتگ اَت ءُ آئی ءِ کسانیں زھگ برمش زدگ بیتگ اَت –

بلوچستان ءَ ھواریں سیاسی ءُ چاگردی مردماں ملکناز ءِ کوش ءِ ڈیتھ اسکواڈ ءِ سر ءَ لڈ اِتگ اَت چریشی ءَ دمگ ءَ ڈیتھ اسکواڈ ءِ واستا سروکی کنوکیں سمیر سبزل دزگیر کنگ بیتگ اَت –

گوستگیں روچاں ملکناز ءِ کوش ءِ سر ءَ کیچ ءِ آمیدگس ءَ سمیر سبزل ءَ را دو سال ءِ بندیگی ءِ سزا داتگ اَت –

بلوچستان ءَ ھوار بلوچ سیاسی مردمانی زھرشانی ءُ گوشگ اِنت کہ بلوچستان ءَ ڈیتھ اسکواڈ ھلاس کنگ بہ بیت ءُ لس مھلوک ءِ زندمان ءِ تہ ءَ ایمنی آرگ بہ بیت –

ٹٹ جنوکیں ءَ دو ٹیکنیشن انجینئر ءُ دو پوجی کارمند کُشتگ اَنت- بیبگر بلوچ

دی بلوچستان پوسٹ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں روکپتی ءُ رودراتکی بلوچستان ءِ سیمسری دمگ عبدوئی ءَ ٹٹ جنوکیں کارمندانی سر ءَ اُرش کُرتگ،
اُرش ءَ ٹٹ جنوکیں کارمنداں جانی تاوان رس اتگ – اھوالکار ءِ رِد ءَ یک انجینیرے ھم بیران بیتگ –

دومی نیمگ ءَ بلوچ راجی آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں بیگاہ ءَ کیچ زامران ءِ دمگ عبدوئی ءِ ھری کور ءَ ٹٹ جنوکیں کارمندانی سر ءَ دورجنگیں توپک ءُ وتکاریں سلاھاں گوں اُرش کتگ –

جارکش ءَ گوشتگ کہ اے اُرش ءَ دو ٹیکنیشن انجینئر ءُ دو پوجی کارمند مرتگ اَنت-

جارکش بیبگر بلوچ ءَ گوشتگ مئے اے وڑیں اُرش بلوچستان ءِ آجوئی ءَ تاں برجاہ مان انت –

دی بلوچستان پوسٹ

سر بیتگیں ھالانی رد ءَ لسبیلہ ءِ دمگ بیلہ مساپر برینن کوچے وئیل ءِ آماچ بیتگ کہ چریشی ءِ آسر ءَ دو لیویز کارمنداں ھواف ھشت مردم بیران ءُ دو زدگ بیتگ اَنت –

مساپر بریں کوچ چہ پنجگور ءَ کراچی ءَ روگ ءَ بیتگ بنجاھی شھدگ ءَ اوتھل ءِ نزیک ءَ لیویز چیک پوسٹ ءِ سر ءَ لیویز ءِ کارمنداں پَٹ ءُ پول کنگ ءِ واستا دست داتگ بلے بریکانی جنگ ءَ کوچ شِترتگ کہ چریشی ءِ سوب ءَ کوچ ءَ سواریں شش مساپراں ھوار دو لیویز کارمند بیران ءُ بیست ءُ دو زدگ بیتگ اَنت –

زدگ بیتگءں ایدھی ایمبولینس ءَ جام غلام قادر ءِ نادراہ جاہ ءَ برتگ اَنت –

ھمے وڑ ءَ ھزدار ءَ شال ءُ کراچی ءَ رؤکیں شھدگ ءِ سر ءَ پَرپٹ ءُ ترند رؤکیں گاڑی ءِ میان ءَ ٹکر وری بیتگ کہ چریشی ءَ یک مردمے بیران ءُ سَے زدگ بیتگ اَنت –

لیویز بنشون ءِ رد ءَ ڈبل دگ ءِ سر ءَ ترند رؤکیں گاڑی ءُ پرپٹے ءِ میان ءَ ٹکر وری بیتگ چریشی ءَ پرپٹ سوار بیران ءُ گاڑی ءَ سواریں سَے مردم زدگ بیتگ اَنت کہ آ نادراہ جاہ ءَ برگ بیتگ اَنت –

زدگ بیتگیں مردمانی درمان نادراہ جاہ ءَ بیگ ءَ اِنت ءُ جاور اش گھتر اَنت بیران بیتگیں مردم ءِ پجار عبدالحکیم ءِ نام ءَ زانگ بیتگ –

زانگ بہ بیت بلوچستان ءَ ھمک روچ دگ وئیلانی ھال پیداک اَنت کہ آیانی گیشتریں سوب دگانی پُرشت ءُ پروشی گوشگ بیگ ءَ اِنت –

دی بلوچستان پوسٹ

سندھ ءِ بنجاھی شھر کراچی ءَ وئس فار بلوچ مسنگ پرسنز ءِ زھرشانی برجاہ، زھرشانی ءَ چار ھزار ءُ یک سد ءُ نود ءُ ھشت روچ سرجم بیتگ – چہ سکھر ءَ یامین سندھی، چہ ملیر ءَ سیاسی ءُ چاگردء باسک اویس ستار بلوچ، سوبان بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

وی بی ایم پی ءِ رھشون ماما قدیر بلوچ ءَ آؤکیں مردمانی گون ءَ گپ کنان ءَ گْوشت کہ پاکستان ءَ بلوچستان ھما دمگ اِنت کہ اود ءَ پوج ءِ ھاکمی ھَلگ ءَ اِنت ءُ پوج ءَ بے کساس ءَ واک گون اَنت پرچاکہ اے ڈیھ ءِ ھما شرتریں جاہ اِنت ءُ سیاسی مھلوک ھروھد ءَ پوج ءِ چیر ءَ پُترتگ اَنت –

آئی ءَ گوشتگ اَت کہ بلوچستان ءِ مھلوک ءِ مروچی ھم یک مزنیں رنگے ءَ جنگ بیگ ءَ اَنت، چریشی ءَ آ زندگ بیگ ءِ ھک، سیادانی گِندوک ءِ ھک، نبشتگ کنگ ءُ گپ کنگ ءِ ھک چوناھا زگر کنگ ءِ ھک ھم چہ مردماں پُلگ بیتگ اَنت بلے دراھیں پابندیاں ابید ھم مروچی بلوچستان ءِ تھ ئِے دروشم سرجم ءَ ایمنی ءِ جد ءُ جھد ءَ دیم ءَ بران اِنت –

ماما قدیر ءَ گوشت کہ یک نیمگے ءَ ھما اَنت کہ پُر ایمنیں جد ءُ جھد ءَ دیم ءَ برگ لوٹ اَنت ءُ سرانی دیمونی ءَ دیگ ءُ گاریں گورانی تہ ءُ کَل بیگ ءَ اَنت ءُ دومی نیمگ ءَ ھما اَنت جمھوریت اَت وشنوف اَنت بلے راستی ءَ بدچھرگے ءِ اوگامانی سر ءَ مھلوک ءَ رپینگ لوٹ اَنت –

آئی ءَ گْوشت کہ ھکانی نام ءِ سر ءَ جوڑ بیتگیں کمیشنی ھک ابید رُزوائی ءَ دگہ ھچ نیست، کُشندہ، جلادانی نیمگ ءَ کشتگیں ءُ زیردستیں مردمانی گون ءَ ھچ جیڑہ، کجام امن ءُ شاتمانی، اے گورانی تہ ءَ توار پیداک اَنت کہ مئے ساہ ءُ جان ءِ ھساب ءَ کسے بہ کنت –

مستونگ ءَ دھکانکاراں بجلی ءِ گیشیں بندشی ءِ سوب ءَ شال ءُ کراچی ءِ دگ بند کتگ، مساپر ءُ ھرتال کنوکانی میان ءَ جنگ ءُ چوپ بیتگ یک مساپرے زدگ بیتگ –

دی بلوچستان پوسٹ

سر بیتگیں ھالانی رد ءَ بجلی ءِ گیشیں بندش ءِ سوب ءَ مروچی مستونگ کھڈ کوچہ ءِ ھند ءَ شال ءُ کراچی ءَ رؤکیں دگ دھکانکاراں بند کرتگ ءُ نندان جتگ –

دھکانکاراں گوشتگ اَت کہ بجلی ءِ واکدار گیشیں بندش کنگ ءَ اَنت چریشی ءَ سارتی ءِ مانشان ءَ بجلی نہ بوگ ءَ آیانی کِشت ءُ کشار تاوان بیگ ءَ اَنت –

دھکانکاراں کھڈ کوچہ ءِ ھند ءَ دگ بند کرتگ ءُ نندانک جتگ ءُ چریشی ءَ رؤکیں مساپر مھتل بیتگ اَنت ءُگاڑیانی دراجیں کتار دگ ءِ سر ءَ مُچ بیتگ اَنت –

ھمے وھد ءَ ھرتال کنوک ءُ مساپرانی میان ءَ جنگ ءُ چوپ بیتگ ءُ یک مساپرے زدگ بیتگ –

ھال ءِ سر بیگ ءَ مستونگ ءِ اسسٹنٹ کمشنر عائشہ زھری ءُ ایس ڈی او زھرشانی کنوکانی گور ءَ گپ ءُ تران ءَ سر بیتگ اَنت –

چریشی ءَ پد زھرشانی کنوک ءُ دمگ ءِ پھزدارانی میان ءَ گپ ءُ تران سوبمند بیتگ ءُ زھرشانی کنوکانی لوٹ منّگ بیتگ ءُ زھرشانی ھلاس کنگ بیتگ –

زھرشانی کنوکانی گون ءَ گپ ءُ تران ءَ دمگ ءِ پھزار اسسٹنٹ کمشنر مستونگ عائشہ زھری ءُ ایس ڈی او ھوار بیتگ اَنت –

زانگ بہ بیت گوستگیں روچ ءَ مستونگ ءَ گیس ءِ بندش سوب ءَ ھم شھدگ بند کنگ بیتگ ءُ دومی نیمگ ءَ گیس ءِ واکداراں گوشتگ کہ مستونگ ءِ مھلوک ءَ گیس ءِ بِل پُر نہ کرتگ ءُ چریشی ءِ سوب ءَ گیس بند کنگ بیتگ –

دی بلوچستان پوسٹ

سر بیتگیں ھالانی رد ءَ مروچی ایرانی آمید گس ءَ روکپتی بلوچستان ءِ بنجاھی شھر دُزاپ ءَ یک بلوچے پاھو داتگ –

گیشیں ھالانی رد ءَ پاھو دیگ بیتگیں مردم ءِ پجار انور عالی زئی ء رھیم ءِ نام ءَ زانگ بیتگ –

اھوالکار ءِ رد ءَ انور دو سال ءَ پیسر نشہ باپاری ءَ ایرانی چیریں ادارھاں دزاپ ءِ دمگ جون آباد ءِ میتگ کریکشان ءَ دزگیر کرتگ ءُ دزاپ ءِ زاندان ءَ برگ بیتگ ءُ اود ءَ دو سال ءِ بند بیگ ءَ پد ایرانی آمیدگس ءَ آئی ءِ سر ءَ پاھو ءِ ھکم داتگ چریشی ءِ سر ءَ مروچی آ دزاپ ءَ پاھو دیگ بیتگ –

ھمے رنگ ءَ روکپتی بلوچستان ءَ انسانی ھکانی واستا پُرکاریں بلوچ فعلین کمپن ءَ ھم گوشتگ کہ دُزاپ ءَ یک بلوچے پاھو دیگ بیتگ کہ آئی ءِ نام انور عالی زئی ء رھیم اِنت –

اھوالکار ءِ رد ءَ روکپتی بلوچستان ءَ گوستگیں سال ءِ گڈی ماہ ءَ بہ گر داں انیگ ءَ پانزدہ بلوچ ایرانی آمیدگس ءَ پاھو داتگ اَنت ءُ آیانی تہ ءَ لھتے ءِ سر ءَ سیاسی بھتام ءُ لھتے ءِ سر ءَ نشہ باپاری ءِ بھتام جنگ بیتگ ءُ پاھو دیگ بیتگ اَنت –

دمگی مردمانی رد ءَ روکپتی بلوچستان ءَ زورگار نہ بوگ ءِ سوب ءَ لس مردم ھنچیں ساہ گریں زورگاراں دزمانجن بیگ ءُ زوال بیگ ءَ اَنت –

دمگی مردمانی رد ءَ روکپتی بلوچستان ءَ بازیں مردمے ھمے رنگ ءَ سیمسری باپاری تیل کشی ءَ ایرانی گجر ءِ تیرانی آماچ بیگ ءُ کُشگ بیگ ءَ اَنت ءُ بازیں مردمے ھمے رنگ ءَ نشہ باپاری ءِ سر ءَ دزگیر کنگ ءُ کُشگ بیگ ءَ اَنت –

دمگی مردمانی رد ءَ روکپتی بلوچستان ءَ دو ورنا سیاسی بھتام ءِ سر ءَ پنچ سال ءَ پیسر گرگ ءُ برگ بیتگ اَنت –

دمگی مردمانی رد ءَ مارا ترس اِنت یک برے اے دوئیں مردمانی ھم پاھو ءِ ھال ڈاھینگ بیتگ ءُ گمان ھمے بیگ ءَ اِنت کہ اے دوئیں مردماں ھم ایرانی آمیدگس پاھو دنت –

گپتگیں ھردوکیں مردمانی پجار مولوی امان اللہ بلوچی ءُ ھاپِز مھمد رھیم کوھی ءِ نام ءَ زانگ بیتگ اَنت کہ ھردوک پنچ سال پیسر ایرانی چیریں ادارھاں ایران ءِ بگیری ءَ سیاسی بھتام ءِ سر ءَ دزگیر کرتگ اَنت –

زانگ بہ بیت مروچی سراوان ءَ روکپتی بلوچستان ءُ رودراتکی بلوچستان ءِ سیمسرانی پھزداراں سَے سد ءُ نود ءُ پنچ سیر تریاک ءِ دستیگ کنگ ءِ ٹاہ داتگ –

ایرانی سیمسری پھزداراں ھمے گوشتگ اَت کہ دو پرپٹاں دو سد سیر نشہ ءُ دگہ یک لوگے ءِ تہ ءَ یک سد ءُ نود ءُ پنچ سیر نشہ دستیگ کرتگ اَنت –