TBP Balochi

گوستگیں روچ ءَ گورکوپ ءَ پاکستانی پوج ءِ لشکر کشی ءِ میان ءَ آوار جنگ بیتگیں جمعہ یل کنگ بیتگ ءُ دومی نیمگ ءَ پروم ءِ کوھی دمگاں گوستگیں روچ ءَ پوج ءِ جاڑیگ بیگ ءِ ھال بیتگ اَنت –

دی بلوچستان پوسٹ

سر بیتگیں ھالانی رد ءَ گوستگیں روچ ءَ کیچ ءِ دمگ گورکوپ ءَ پاکستانی پوج ءِ لشکر کشی ءِ میان ءَ آوار جنگ بیتگیں جمعہ یل کنگ بیتگ –

گورکوپ ءَ گوستگیں بازیں روچاں پوج ءِ لشکر کشی برجاہ بیتگ اَنت ءُ بازیں مردمانی لوگ ءُ جاگہ سوچگ بیتگ اَنت –

لشکر کشی ءِ میان ءَ پاکستانی پوج ءَ جمعہ ء ابراھیم آوار جتگ ءُ برتگ دمگی مردمانی رد ءَ جمعہ یک شوانگے کہ لشکر کشی ءِ وھد ءَ کوھی دمگاں شوانگی ءَ بیتگ ءُ پوج ءَ دزگیر کرتگ ءُ مروچی آ یلہ کرتگ –

ھمے وڑ ءَ گوستگیں روچ ءَ پنجگور ءِ دمگ پروم ءِ کوھی دمگ جاڈین ءِ کَش ءُ گوراں پاکستانی پوج گوں جنگی ازباباں شتگ –

دمگی مردمانی رد ءَ گوستگیں روچ ءَ پوج ءَ کوھی دمگ انگیر ءَ کرتگ ءُ کوہ ءِ تہ ءَ پُترتگ اَنت ءُ مروچی ھم کوھی دمگاں پوج جاڑیگ بیتگ –

دمگی مردمانی رد ءَ کوھی دمگاں لشکر ءِ جاڑیگ ءَ ھمے گمان کنگ بیگ ءَ اِنت کہ مزنیں لشکر کشی ءِ کنگ ءَ اِنت –

دمگی مردمانی رد ءَ پوج ءَ راہ ءُ در بستگ اَنت ءُ مردماں روگ ءُ آیگ ءَ نیلگ ءَ اِنت –

زانگ بہ بیت بلوچستان ءِ بازیں جاھاں پاکستانی پوج ءِ لشکر کشی برجاہ اَنت ءُ سیاسی مردمانی بھتام اِنت کہ پوج لس دمگانی سر ءَ بیڑ بارت ءُ اود ءَ جھمنندیں مردماں تاوان دیگ ءَ اِنت –

پنجگور پروم ءَ لشکر کشی ءِ بارہ ءَ پوجی واکدارانی نیمگ ءَ تنی وھدی لشکر کشی ءِ ھال دیم ءَ نیاتکگ اَنت –

دی بلوچستان پوسٹ

سر بیتگیں ھالانی رد ءَ بلوچستان ءِ دمگ نصیر آباد ءَ ناشناسیں مردمانی تیرگواری ءَ دو مردم بیران بیتگ اَنت –

پولیس بنشون ءِ رد ءَ ناشناسیں مردماں پولیس ءِ کارگس ءِ نزیک ءَ کچھی پل ءَ ناشناسیں مردماں تیرگوار کرتگ ءُ مھمد اختر ءُ عبدالستار بیران بیتگ اَنت –

پولیس ءَ جون چِست کرتگ نادراہ جاہ ءَ سر کرتگ اَنت، اود ءَ اژدری چار ءُ ٹپاس ءَ پد جون کھولانی گور ءَ سر کنگ بیتگ اَنت ءُ گیشیں پَٹ ءُ پول برجاہ اِنت –

ھمے وڑ ءَ بلوچستان ءِ دمگ دالبندین ءَ یک جونے دزکپتگ، جون بیگواھیں مردمے ءِ بیتگ –

گیشیں ھالانی رد ءَ چار ماہ پیسر بیگواہ بیتگیں اللہ داد ء عبدالرحمن جھمنندکلگ مینڈوکی ءِ ھڈ سوران ءِ ھند ءَ دزکپتگ اَنت –

کیو آر ایف ءِ لشکر ءِ کماندار کریم جان نوتیزی ءِ سروکی ءَ پھزدار جون ءِ جاہ ءَ شتگ اَنت اود ءَ آیاں جون چِست کرتگ ءُ نادراہ جاہ ءَ برتگ –

جون ءِ گوشت ھلاس بیتگ ءُ ھُشکیں ھڈ پَشکپتگ اَنت –

دی بلوچستان پوسٹ

سندھ ءِ مزن شھر کراچی ءَ وائس فا بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ یک سد ءُ نود ءُ ھپت روچ سرجم بوتگ سندھ بار کونسل ءِ وکیل برادری ءُ دگہ مردماں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ شھیدی نوں مھرے درونت اِنت، زندے اے سپر ءَ سرپدی نیست بلے راستی روچ ءَ دست جنگ انت کہ دیمونی وتی اسل دروشم ءَ پمے ھاتر ءَ بے ھیال کنت کہ آئی ءِ رھبندانی یک بھرے ھالیگ اِنت –

آئی ءِ گوشگ ات کہ ریاستی تاکتور ھمک روچ بلوچستان ءَ ھون آس گوارگ انت ھمک روچ نوکیں داب ءَ انسانی ترس ءُ زلم زوراکی دیم ءَ آیگ ءَ انت – ھر ھما دمگ ءَ کہ بلوچ راجی پُرایمنیں جد ءُ جھد پراہ شاھگانیں چاگردی بن ھشت ھست انت ریاستی تاکت سرجمیں بلوچستان ءَ سلاہ بندیں زوراکی ءُ وڑ وڑیں پندلاں نشانگ بوگ ءَ انت –

ماما قدیر بلوچ ءَ گوشتگ کہ ھاکم زمینی راستی ءَ ھرچی آیانی مازگاں کیت ءُ بلوچستان ءَ برجاھیں پوجی لشکر کشی ءَ چہ انکاری انت بلے پوجی لشکر کشیاں نہ منّگ یک دگہ ساھگے کہ گوستگیں ماہ ءَ بولان ءِ جتا جتائیں دمگاں مزنیں کچے ءَ لشکر کشی کنگ بوتگ اَنت –

دی بلوچستان پوسٹ

سر بیتگیں ھالانی رد ءَ مستونگ ءَ گیس ءِ بند کنگ ءِ ھلاپ ءَ مھلوک ءَ زھرشانی کرتگ، زھرشانی کنوکاں شال ءُ کراچی ءَ رؤکیں شھدگ بند کرتگ ءُ گیس کمپنی ءِ گاڑی انگیر کرتگ –

مھلوک ءِ گوشگ اِنت کہ سوئی سدرن گیس ءِ واکداراں مستونگ ءِ گیس بند کرتگ کہ چریشی ءَ سارتی ءِ مانشانی ءَ مھلوک ءِ لوگاں گیس نیست اِنت –

زھرشانی کنوکانی گوشگ اِنت گیس میٹر ءَ گیس ءِ واکدار واتر بہ کن اَنت اگاں ناں زھرشانی درچ گیش کنگ بنت –

گیس ءِ واکدارانی گوشگ اِنت میٹر ءِ بل ءِ پُر نہ کنگ ءِ سوب ءَ میٹر گون وت برتگ –

گیس ءِ واکدارانی گوشگ اِنت مستونگ ءِ مھلوک ءِ سر ءَ لکانی کلدار گیس ءِ پُرکنگی اَنت بلے آیاں پُر نہ کرتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ ریگان ءَ دو گاڑیانی ٹکر ورگ ءَ پنچ مردم بیران بیتگ اَنت –

اھوالکار ءِ رد ءَ روکپتی بلوچستان ءِ دمگ نرمشیر ءَ دراتکگیں گاڑی دیم پہ ریگان ءَ روگ ءَ بیتگ اَنت کہ دو راھی چاتگال ءَ دگ ءِ وئیل ءِ آماچ بیتگ اَنت –

وئیل ءِ سوب ءَ پنچ مردم بیران بیتگ اَنت ءُ یکے زدگ بیتگ، زدگ بیتگیں زالبولے بم ءِ نادراہ جاہ ءَ برگ بیتگ –

وئیل ءِ بارہ ءَ ایمبولنسانی سروک علی پور ءَ رسانکدراں گپ کنان ءَ گوشتگ کہ اے وئیل ءَ چار مردم ھنچش بے کساس سُتکگ اَنت ءُ آیانی ھُشکیں ھَڈ پش کپتگ اَنت ءُ اشانی تہ ءَ یکے نادراہ جاہ ءِ برگ ءِ وھد ءَ بیران بیتگ –

اھوالکار ءِ رد ءَ وئیل ءَ یک زالبولے ھم ھوار اِنت کہ آ بے کساس سُتکگ ءُ بم ءِ نادراہ جاہ ءَ برگ بیتگ ءُ اود ءَ آئی ءِ جاور نگیگ گوشگ بیگ ءَ اَنت –

وئیل ءَ ھردوکیں گاڑی سُتک اَنت ءُ وئیل ءَ پد آس کُشیں گاڑی سر بیتگ ءُ آس اش کُشتگ –

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ روکپتی بلوچستان ءِ سیمسری دمگ سراوان ءَ ایرانی پھزداراں سَے سد ءُ نود ءُ پنچ سیر نشھانی دستیگ کنگ ءِ ٹاہ داتگ –

ایرانی سیمسر ءِ داروکیں پھزدارانی بنشون ءِ رد ءَ مروچی چیریں ھالے ءِ سر بیگ ءَ سیمسراں سنگر گپتگ ءُ نشتگ ءُ دو پرپٹاں لَڈ اِتگیں دو سد سیر نشہ دستیگ کرتگ اَنت –

ایرانی سیمسری بنشون ءِ رد ءَ نشہ باپاریاں پاکستان ءَ نشہ پرپٹاں لڈ اِتگ ءُ دیم پہ ایران ءَ آیگ ءَ بیتگ اَنت ھمے وھد ءَ پھزداراں گپتگ اَنت –

ایران ءِ پھزدار ءِ بنشون ءِ رد ءَ دگہ یک ھنچیں جاھے ءَ سراوان ءِ ھند روتک ءَ یک لوگے ھم انگیر کرتگ ءُ اود ءَ یک سد ءُ نود ءُ پنچ سیر نشہ دستیگ کرتگ اَنت –

دی بلوچستان پوسٹ

مولم شناسانی رد ءَ بلوچستان ءِ بازیں جاھاں آؤکیں بیست ءُ چار ادارانی تہ ءَ مولم سارت ءُ دُرشک بیت اِنت ءُ تیابدپی ھنداں نمبی بوگ ءِ گمان اِنت ءُ ھمے ھپتگ ءِ گڈسر ءَ سرجمیں اُستان ءَ نوکیں سارتی ءِ آیگ ءِ گمان کنگ بیتگ –

مولم شناسانی رد ءَ بلوچستان ءِ بازیں جاھاں ھمے بنداتی ءَ سارتی ترندیں سارتی ءِ تہ ءَ کمی اتکگ –

اُستان ءِ گوریچانی نیمگ ءَ مولم سارت ءُ دُرشک بیت اِنت ءُ گوریچانی روکپت ءِ کوھی دمگاں مولم سارتی ءِ مانشان اِنت –

مولم شناسانی رد ءَ بیست ءُ چار ادارانی تہ ءَ اُستان ءِ برزی دمگاں مولم سارت ءُ دُرشگ بیت اِنت –

اُستان ءِ تیابدپی ھند گوادر، پسنی ءُ جیونی ءَ نمبی مولم ءِ گمان اِنت ءُ چریشی ءَ ابید ھمے ھپتگ ءِ گڈسری روچاں نوکیں سارتی ءِ پیداک اِنت کہ چریشی ءِ سوب ءَ مولم یکدم سارت بیت ءُ گرم ءِ زور یک رندے پد ءَ جھل کپ ایت –

نبشتانک: ناکو مشکتی

نبشتہ کار: ھدایت بلوچ

دی بلوچستان پوسٹ

بیگاہ ءِ وھد اَت من گوں سنگتاں گوازی گنگ ءَ اتاں روچ جَھل روان ات مات ءَ من ءَ توار کُت بیا پُلّو دست نماز بگر مگرب نزدیک انت تو وانگ ءَ پشت کپ ئے۔ من گُشت ھاں من کایاں کمو سبر گوازی ھلاس بیت ۔

گشے دل پہ وانگ ءَ ھچ بر نہ ات روچ گار بوان ات مات ءَ پد ءَ توار کُت بیا پُل جان تئی پت ترا بگندیت کہ تو تنی وھدا گوازی کنگ ءَ ئے ترا ھبر دنت ما سنگتاں گوازی بس کُت ءُ من تچان بوت دیم پہ گیلن ءِ آپاں شُتاں زوت زوت ءَ دست نماز گپت وتی اسپیتُکیں کُلاہ سر ءَ کُرت ءُ سی پارہ بگل ءَ رُپت دیم پہ مسیت ءَ رھادگ بوت آں –

نماز ءَ ھلاس بوت وھدے من مُلایے لٹانی ترانگ ءَ کپتان دل ءَ نہ گُشت مدرسہ ءِ نیمگ ءَ چَک بہ جن پاد ھمراہ نہ ات اَنت بلے لاچار ات اَنت مدرسہ ءَ وانگ بندات بوت منی دیم ءَ سِپارہ ایر ات ءُ دلگوش گوں عشا ءِ بانگ ءَ ات کدین بانگ ءِ توار بیت ءُ من لوگ ءَ رواں –

نماز ءَ رند وھدے لوگ ءَ شُت آں نان دیم ءَ کُرت ءُ وتی بَلُک توار کُرت امیّ کمو سبر کن کسہ ءَ بندات مکن من نان ءِ وراں پد ءَ گڑا من چہ کسہ ءَ پشت کپ آں بلُک ءَ گُشت شر انت نان بور گڑا کسہ بندات بیت من نان ورگ ءَ اتاں اے دوران ءَ بی ایس او مئے دمگ ءَ سرگرم ات بی ایس او ءِ سنگت وتی جلسہ ءُ ریلیانی ءِ کاران سرگرم ات اَنت ھمک بلوچ ورنا ءِ دل ءَ آجوئی ءِ ھب ءُ واھگ جُنز اِتگ ات۔

مئے میتگ ءَ کماشے ھست اَت شپ ءَ نماز ءَاھت گڑا کماش ءَ وتی سانو ریڈو ءِ گون ات مُدام شپ ءَ کہ نماز ئِے کہ ونت منی پت ءِ ھمراھی ءَ مئے لوگ ءَ سرے جت ئِے –

دیوان ءُ چاہ ءِ ورگ ءَ رند پاد اھت ءُ وتی لوگ ءَ شُت لوگ نزدیک ات اَنت اے کماش ءَ بی ایس او ءِ سنگتانی ءُ جلسہ ءُ ریلی کنوکیں مردمانی تب ھچ نیست اَت –

گُشت ئِے اے مردم سکیں ناسرپداں سر گوں سنگ ءَ چوں ڈِگ دیگ بیت؟ من گشان مئے نو جوان پھک گنوک اَنت ما آزاتی نہ لوٹ آں ما وت آزات آں مدام ھنچین گپ ئِے جَت من ءَ پہ اے کماش ءِ ھنچیں گپاں سک بد اھت من دل ءَ گشت اے کماش ءَ راج دوست ءُ زمین ءِ دوستی ھچ نیست۔

اے زوراکیاں ھچ نہ گندیت یا نزاناں اے چونیں انسانے بلے ھیر من ھچ گُشت نہ کُرت کہ من کسان ات اَنت منی ھبر اشی دیم ءَ ھچ نہ ات اَنت کماش ءَ وتی سانو گوں شیشگ ءُ پُلاں دیم ءَ ایر ات کماشءَ چاہ ءِ گُلمب ءِ گپت ءُ توار کُت بَلُک تو ھروچ کسہ جتگ مروچی من کسہ جن آں کماش ءَ وتہ ھبر بندات کُرت آ وھد وھد بوتگ انت کہ ما مشکت ءَ برتی بوتگ اِنت مشکت ءِ سلتان پہ بلوچاں سک مھروان بوتگ ما گوں زپّاریاں چو جنگ کُرتگ ما بلوچ سکین بھادر بوتگ اِنت ما بالی گراباں سوار بوتگ اِنت دریا ءِ تہ ءَ گشتگیں مشکت ءِ دریاء مشکءِ کوہ ھے ھے مشکت سکین وشین جاگھے بوتگ۔

بلوچاں وتی سر پہ مشکت ءَ داتگ مشکت ءِ سلالہ ءَ کبرستان ءِ ھست دُرس ھمے بلوچانی قبر انت کہ جنگ ءَ کُشگ بوتگ انت مشکت چوش آجو بوتگ کماش ءَ کمرزانی یے بستگ ات ءُ چاہ ءَ گُٹ گُٹ ءَ ورگ ءَ ات ءُ وتی دیم ءَ روان ات کہ ما چو زھم جتگ ما دُرست پھک بے توار ءَ نشتگ ءُ کماش ءِ کسہ ءَ گوشدارگ ءَ ایں من وتی دل ءَ گُشت اے کماش ءَ کہ پہ دَرامدیں راجانی واستا انچو کُربانی داتگ گڑا وتی باریءَ پرچا پادے درھنت –

وھدے کہ ھمے بلوچ ءِ جند پہ وتی راج ءِ باندات ءِ روژنائی ءَ وتی رکینگ ءِ جُھد ءَ اِنت پرچا چو نہ وش انت ھما بلوچ ءَ کہ وتی راج ءَ چہ زوراکی چامپٹاں رکینگ ءِ جھد ءَ انت ھما بلوچ اشی ءِ چماں رَد کنگ ءَ انت پرچا ؟ اے بی ایس او والاھاں پرچا چو بد ءُ رَد کنت پرچا ھمے بھادری ترا اِد ءَ بلوچستان ءَ گوں نہ انت ھمے جُست منی دل ءَ جوش سرشان بیگ ءَ اَت کہ اے کماش پرچا چُشیں نابودے کہ وتی راج ءِ وشھالیں باندات اشرا پہ وتا پہ وتی راج ءَ دوست نبیت زانا اد ءَ بلوچ ءِ کاروان ءِ تہ ءَ متاہ ءُ کلدار نیست ات یا ھدا بزان چے چے من جیڑگ ءَ اتاں من پاد اھت شُت آں وتی بَشانگ ءِ تہ ء وپت آں وتی دلءَ بس ھمے جیڑ ات آ مردمے ءَ کہ پہ وتی راج ءِ وشھالی ءَ نہ بیت آ مردم زندگیں راجانی تہ ءَ شمار نہ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: یاتے گوں کریمہ بلوچ ءَ

نبشتہ کار: باھڈ مرید

دی بلوچستان پوسٹ

شپ نوکی پہ سھب بوگ ءَ رھادگ اَت میتگ نوں کمو کمو آگہ بوگ ءَ اَت کُروساں ساھتے بوتگ اَت کہ بانگ دیگ ھلاس کتگ اِت اِش من ھم زیکیں سپر ءِ ژندی ءَ انگت ژند اِتاں چم ماں ماہ ءَ سک کتگ اِت اَنت ءُ باندات ءِ سپر ءِ بارو ءَ جیڑگ ءَ اِتاں کہ من ءَ شھر ءَ روگی اَت۔ گوں ھمے جیڑگاں روچ ءَ ٹِک دات من چہ تھت ءَ اِیر کپتاں دیم پہ بان ءَ رھادگ بوتاں کہ اناگہ ءَ دل ءَ گْوشت کہ بانُک ءَ گوں ھالے بِہ گر، چی ءَ کہ دیر اَت مئے ءُ آئی ءِ ھال نہ بُوتگ اَت۔ من گوانکو کَش اِت ءُ آئی ءَ را کال کُت دو رینگ ءَ پد آئی ءَ کال چِست کُت۔
ھیلو!
ھیلو!
ھال کن تو جُوڑ ءُ وش بوتگ ئے؟ دِیر اِنت ھال نہ کُرتگ ھالے ءَ کپتگ ئے زاناں زھیر نہ کنت پہ بودِشت ءِ چاھاں! اگاں ناں کول ء مردمانی ءَ در مُلک ءِ وشیاں زُرتگ۔

اِناں، اے وڑ نہ اِنت من وش ءُ برابراں بودِشت ءِ چاھانی یات کیت۔ کُلیں بلوچستان یاد کیت! دَر مُلک ءُ وشی ھاھاھا!مردم ھرچی گْوش اَنت بہ گْوش اَنت راج اِنت، اوپار کنگی اِنت دیمتر ءَ ھم اوپار کنگ کپ اِیت یک رژنائیں روچے کیت درست شر بنت۔

میار اسَل ءَ مئیگ اِنت، من ایشی ءَ وتی نِزوری سرپد باں بوت کنت کہ منی جند ءِ تہ ءَ اِنچو بُود مان نہ بوتگ کہ مروچی سنگت اے پیمیں بُھتام جن اَنت، بلے ھیر! تو ھالاں دئے، میتگ ءُ ھند چون اَنت؟ مردم چون اَنت؟ بلّک اِزگُل چون انت؟ مرچاں انگت جکّ اِیت یا ناں؟ باریں ھما کُنر چون بُوت گندئے دیوان ءَ واتر کنگ ءِ وھد ءَ ما ساھگ ءِ چیر ءَ نشت اِیں ءُ دم بال ءَ کُت، پد ءَ منّان ءَ گُشت کہ گندئے ما چو اے کُنر ءِ پیم ءَ آجو بوتین اِیں چوں وش اَت موسم ءِ ھمراھی ءَ سبز ءُ گیمُرتگ اَت ایں پد ءَ ما ءُ شما سک کند اِت ءُ گُڈسر ءَ وت ھم سک کند اِت ئِے گوں۔

دراہ برابر اَنت کُنر ھم سلامت ءُ ھست اِنت، بلے، مرچاں بَر نہ کنت پرچا کہ مرچاں ھمُک روچ پوجیانی گاڑی ھمے راہ ءَ چہ گْوز اَنت کُنر ءِ جھلی لمب والا ریاں شِتگ اَنت دنزاں دراھیں تاک ءُ ٹال گیمُرینتگ اَنت ءُ سوتکال ءِ کور ءَ بان گِس جوڑ کرتگ اِش، بنجل اِش کتگ دگہ دراہ برابر اَنت سلامتی اِنت دو (2)(ماہ سرجم بوت)من ءَ تئی اے نہ وشیں ھال سر بوت کہ تو گار ئے پد ءَ اے ھال ھم اتک کہ تو شھید کنگ بوتگ ئے۔ بلے من ءَ انگت باور نہ کنت چی ءَ کہ تو چُش کُت نہ کن ئے۔

تو چون چو اِشتاپی ءَ مارا یلہ کن ئے ءُ روئے!بلے، اے دراہ واب اِت اَنت۔ اے گپ راستے بوت کہ تو مارا یلہ داتگ ءُ پہ مکھیں گلزمین ءَ شھید بوتگ ئے ھو، اے انچیں راھے مرچی توئے باندا مناں پونشی آ اِنت اے راہ ءَ ھر بلوچ ساڑی اِنت پہ شھید بوگ ءَ۔

بلے!بلے، بانُک پھل کن، من وت وَ نہ گُشتگ بلے، گْوشوکاں کہ گُشتگ گڑا منی اے گناھگاریں گوشاں ھم اِش کتگ بزاں ھما دیواناں من نِندوک بوتگاں بَس گوش داشتگ گوں کہ بانُک مرچاں شر شر نہ اِنت۔چہ وتی ھند ءُ دمگاں بیھال اِنت وتی ڈیھ ءَ چہ شموشکار اِنت۔

دَر مُلک ءَ اِسپیت کُتگ ھمود ءَ نِشتگ آسودگ اِنت باندا وڑے کنت وتی دو سے سیاد بارت آباد بیت نُوں مشکُل اِنت کہ وتی ھند ءُ دمگاں گیر بیار اِیت مرچاں ھچ سیاسی کاراں گندگ نہ بیت۔ گْوش ئے زاناں کینیڈا ءِ دولت ءَ زَر داتگ کہ بَس ھاموش بو بہ نِند ھچ مہ گْوش بس نند ءُ ور بلے پھل کن بانُک تئی شھیدی ءَ منی سِینگ ءَ کَلے جَت کہ آ کَل نو باریں کدی پُر بہ بیت۔

تئی داتگیں ھر سبک من وتی اے ڈائری ءِ تہ ءَ نبشتہ کتگ اَنت من ھردیں کہ اے ڈائری ءَ پچ کناں تاں چم تئی جتگیں دزنِبشت ءَ کپ اَنت ءُ چم رسیگ بنت منی بالاد اَچ من ءَ جتا بیت۔ چہ جند ءَ چَٹ بے سما باں چم آپُلُک بنت کوٹی ءِ دروازگ ءَ چہ تہ ءَ بند کناں ننداں سک گرِیواں۔ ھیسکاں ھیسکاں داں دم بہ براں۔

من اے واستا دروازگ ءَ بند نہ کناں کے کَسے من ءَ گنِد اِیت بلکیں اے واستا کہ مئے سیاسی سنگت ھمے گْوش اَنت کے اے وَ کپتگ دلیں مردمے لگوریں انسانے اے راہ ءَ سنگت شھید کَنگ بنت، بیگواہ کَنگ بنت، مہ گِر ئے کہ گِریوگ انسان ءَ نِزُور کنت۔

بلے بانُک مرچی من گِریواں، دل ءِ سیر ءَ۔۔۔سنگت چے گْوش اَنت نہ گْوش اَنت من ءَ ھچ پرک نہ کنت۔

وھدے من گِریوگ ءَ دم براں ننداں ارساں ساپ کناں ءُ جیڑاں کہ ناھاراں باریں ترا کُجام ھال ءَ شھید اِش کرتگ۔ باریں اِیشاں ترا چنکدر درد ءُ رنج داتگ باریں تو اے ساھت ءَ چنچو بے وس بوتگ ئے۔ باریں تو اے ساھت ءَ چُنت رند ءَ بلوچ راج گوانک جتگ۔ باریں اِیشاں ترا ٹارچر سِل ءِ تہ ءَ ورگ داتگ کہ ناں باریں اے ساھت ءَ ترا کُوٹ گور ءَ بوتگ کہ ناں۔۔ بازیں دگہ۔

بلے! بلے، من دل ءَ زاناں کے تو اے ساھت ءَ ناں ڈیھ ءَ بیھال بوتگ ئے ناں کہ وتی ھند ءُ دمگاں، ناں راج ءَ ناں کہ درچک ءُ داراں ءُ ناں کہ سنگتانی نام، ناں کہ تنزیمی رازے پدر کتگ ناں کہ تئی چماں چہ پِٹّے ارس در اتکگ چی ءَ کہ تو یک دلیریں شیرزالے بوتگ ئے۔ تئی دلیری ءِ کسہ ماں دپتراں نکش بیت۔ تاں اے جھان ھست تو نمیران ئے۔

بلے!بلے چے؟ بلے سینگار اِتگیں تلّو کرتکگ اَنت ءُ ودار ءَ اَنت کہ تو پدا بیائے وت ءَ بہ سینگار ئے بلے نوں تو ساڑی نہ ئے باریں اے گرانیں بار ءَ ما وتی کوپگاں زرت کنیں کہ ناں بلے وشیں ھال اِش اِنت کہ چہ تئی شھیدی ءَ پد بلوچستان پد ءَ آشوبی چھرگ جَنگ ءَ اِنت ارواہ آسودگ بات، گڑا ھوار اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بالی پٹ ءَ تیل سر کنوکیں پاکستان اسٹیٹ آئل ٹینکر ءِ سر ءَ بوتگیں اُرش ءِ زمّہ واری ءَ منّ ایں – میجر گْوھرام بلوچ

سربوتگیں ھالانی رِد ءَ کیچ ءِ بنجاھی شھر تربت ءَ ناشُناسیں سلاہ بندیں مردماں بالی پٹ ءَ تیل سرکنوکیں ٹینکر ءِ سر ءَ اُرش کُتگ –

اُرش تربت ءِ دمگ سیٹلائٹ ٹاؤن ءَ بنجاھی دگ ءِ سر ءَ کنگ بوتگ ، اُرش ءَ ٹینکر ءَ تاوان رس اتگ بلے ھچ وڑیں جانی تاوان ءِ ھال نیست –

زانگ بہ بیت تربت ءُ پسنی ءِ بالی پٹاں پی ایس او تیل سرکنت، گوستگیں شپ ءَ ھم ٹینکر ءِ سر ءَ ھما وھد ءَ اُرش کنگ بوتگ وھدیکہ آ بالی پٹ ءِ نیمگ ءَ رؤگ ءَ بوتگ –

دومی نیمگ ءَ بلوچ آجوئی لوٹوکین سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ ٹینکر ءِ سر ءَ بوتگیں اُرش ءِ زمہ واری منّ اِتگ –

جارکش گْوھرام بلوچ ءَ گوشتگ کہ گوستگیں شپ ءِ ادار ھشت ءَ مئے سرمچاراں کیچ ءَ تربت بالی پٹ ءِ نزیک ءَ سیٹلائٹ ٹاؤن ءَ بالی پٹ ءَ تیل سر کنوکیں پاکستان اسٹیٹ آئل (پی سی او ) ٹینکر ءِ سر ءَ اُرش کُتگ –

جارکش ءَ گوشتگ کہ اُرش ءَ ٹینکر ءُ آئی ءِ کاردار ءَ تاوان رس اتگ – اے وڑیں اُرش بلوچستان ءِ آجوئی ءَ تاں برجاہ مان انت –