TBP Balochi

نبشتانک: پُرانی وشبو

نبشتہ کار: عمرمُراد

دی بلوچستان پوسٹ

پاکستانی لشکر ءِ دست ءَ ایوک ءَ یک کسانیں دمگے بالگتر کیلکور ءِ شہید بوتگیں بلوچ پُسّگ ءُ دگہ ھزار زوراکی ءِ نیم شلونگے داستانُکے 2014 ءھاجی آباد ءَ مزار ءِ ھلک ءَ بمبباری بیت مال دلوت لوگ جنگل سُچنت شش سالی جنکویے واشدہ ءُ دوسالی ماجد نامیں زھگے شہید بنت بازیں زالبولے زدگ بیت اے ھاندان من نہ زاناں اے وھداں کُجا ءُ چے پیم زندگی کنئگ ءَ انت ھاندان ءِ سرپرست مزار انت یک وھدے آسکانی تُربت ءَ بوتگ انت مروچاں نہ زاناں کُجا در پہ دراَنت گوں ٹپاں نالگ ءَ اَنت بالگتر کیلکور ءَ شہیدانی لَڈ(1) شہید دو 2 سالی ماجد جان/ ھاجی آباد کیلکور (2)شش 6 سالی جنکو شہید واشدہ ھاجی آباد کیلکور (3)شہید سالم جان ولد رحمت بالگتر لوپ 2012 (4) شہید سپاھان ولد ابراھیم سری گڈّگی، 2017 (5) شہید نیاز ولد آدم چیری گڈگی 2017 (6) شہید یاکوب ولد رھیم بکش سری گڈگی2018
(7) شہید موسیٰ فراز ولدشیرمہمدبالگتر لوپ(8) عبدو ولی ولد ولی مہمد بالگتر (9) شہید لونگ شکر ولد ھان مہمد
شہید ھیات بُلبُل ولد کمبر ۔بالگتر
شہید جلال ولد یوسُف بالگتر
(11) شہید اسلم جان بالگتر
(12) شہید مُراد بلوچ ولد اکبر بالگتر لوپ(13) شہید باھڈ بلوچ ولد ساھبداد بالگتر (14) شہید اسہاک ولد لال بکش چیری گڈّگی 2020 (15) شہید ساجد ولد چاکرسری گڈگی2020 کیلکور مادگ ءَ ھیلی کاپٹرانی بمباری ءَ 21 دسمبر 2020
(16) شہید رکّو ولد مدّت مادگ کیلکور 2020 (17) شہید اللہ داد ولد ھالک داد مادگ کیلکور 2020 (18) شہید دلجان ولد مدتّ مادگ کیلکور۔2020 21 دسمبر ھاجی آباد ءِ زیارت ءِ سرا ھیلی کاپٹرانی بمباری(19) مُراد مہمد ولد مسکان کیلکور (20) عبدُلواھِد ولد موسیٰ کیلکور (21) سعید ولد مہراب کیلکور
(22) ھمزاد ولد عمرکیلکور (23) شہید ھمید ولد مُلا انور زندان ءَ سزا داتگ تاں مرچیگ ءَ ایوک ءَ کیلکور بالگتر ءِ( 23) بیست ءُ سَے مردم شہید بوتگ ءُ آدگہ است سلامتیں ھمک مردین آدم لازم یکبرے گرگ بند کنگ ءُ گار ءُ بیگواہ کنگ بوتگ اَنت تاں شش ماہ تا پنچ سال رند آجو بوتگ انت دماگی ءُ جانی ابد مانیں نادُراہ جوڑ بوتگ اَنت

سدانی ھساب ءَ انگت مردم گار ءُ بیگواہ اَنت 80 ھشتاد درسد مردم الم یک ءُ دو رند ءَ دست ءُ پاد بستگ انت گرمیں پُلکانی تہ ءَ دیم پہ چیر واپینتگ ءُ روچ ءِ چارگ پرماتگ اَنت سُھب ءَ تاں شپ لٹّ ءُ زاہ داتگ انت ءُ یلہ کُرتگ اَنت ھمُک پیر ءُ آجز زھگ ءُ زالبول لٹشاپ ءُ زاہ ءُ بد کنگ بوتگ اَنت بے ھساب جنگل، مچکدگ ءُ لوگ سوچگ بوتگ اَنت ھزاراں مردم لَڈّینگ بوتگ بازیں مات ءُ پت برات ءُ گُھار چہ آوار جتگیں مردُمانی گماں ھرٹ اٹیک دلترک بوتگ ءُ مُرتگ انت

کیلکور لبزانکی چاگرد ءِ کتابجاہ ماندارگ بوتگ اسکول ءُ ھسپتال فوجی کیمپ جوڑ بوتگ اَنت چوکہ کیلکور بالگتر کوچگ ءُ کوھِستگی ھَندے مردُمانی لوگ کرگین ءُ کُڈّک اَنت مردماں اچ ھمے جنگلاں پِش ءُ دار زُرتگ ءُ گِس جوڑ کُتگ اَنت بلوچستان ءِ 70 درسد مھلوک کوچگ ءُ کوھاں نندوک انت مردماں ھماجاہاں ھلک جوڑ کُتگ انت کہ اود ءَ پہ لانک بوج ءَ جنگل یا شیپ ءُ کَڈ بہ بیت ھلک ءِ یک نیمگے زالبولانی لانک بوج ءِ ھاجت ءِ پیلو کنگ ءِ واستا بیت دوھمی مردین آدمانی ءُ یک جُدائیں نیمگے پہ مہمان ءُ مساپِراں بلے ھچ وڑیں چادر ءُ چاردیواری نیست بلوچ ءِ چادر ءُ چاردیواری ھمے کوہ ءُ جنگل اَنت کہ گوھر ءُ سردی ءَ اچ ھمے جنگلاں دار چِنگ ءُ ماندارگ بنت شپ ءَ وتارا تاپ اَنت ءُ روچاں کوہ دامُناں گوات اندیماں روتاپ کن اَنت پیسری لُٹ ءُ پُل ءَ سرمایہ دارانہ رواج ءَ بلوچ ءِ کٹّ ءُ کمائی اَنچو پُل اتگ کہ بلوچ ءَ سنگ ءُ ھاک ءُ سِمٹ ءِ گس جوڑ کُت نہ کُتگ انوگیں پاکستانی لشکر ھمُک ھلک ءِ بُرز تریں کوہ ءِ سر ءَ نشتگ کیمرہ ءُ دُور گند جتگ انت ءُ جنگل مانداشتگ انت بلوچ وتی آسودگی ءَ لانک ءَ ھم بوتک نہ کنت اے یک نہ سَگّوکیں دردے کہ بلوچ زالبولاں پہ کیمرہ ءُ دور گِند چارگ بیت ءُ شپاں سرچ لائٹ، تُرندیں روژنائیں ٹارچ جنگ ءُ چارگ بنت اے پہ بلوچ ءِ زندمان ءَ دوزھیں زندے ءَ چہ کم نہ انت بلے تنی وھدی یک ھَندی، دَمگی یا ڈنّی انسانی ھکّانی پانگپانے، صحافی ، سیاسی نُمائندگے ءَ اے زوراکیانی ایر جنگ ءَ یک لبزے ھم نہ گُشتگ اد ءَ مھلوک پُورھیں زندانے ءَ زند گوازینگ ءَ اِنت ھچ کار وتی تب ءَ کُرت نہ کنت سُھب ءُ بیگاہ وتی ڈگار یا دلوتانی چارینگ ءَ ھم چہ زور گیر لشکر ءَ رزا گِرگ لوٹیت زورگیر لشکر یا آئی داشتگیں چِریک گُنڈا ڈیتھ اسکواڈ کُجام وھد ءَ گوں مردماں کُجام زورکی ئے بلوٹ اَنت کن اَنت آھاں ھچ وڑیں جُست پُرسے پر نیست ءُ مردمانی واہ ءُ پریاد ھچ رسانکدر ءَ شنگ نہ بنت ھچ ادل ءُ انساپی اُگدہ دار اے زوراکیاں نبشتہ نہ کن اَنت ءُ ھچ وڑیں لگام ءُ پوستاد اے زوراکاں نیست اے کِسّہ، کیلکور ءَ ھوار گوارگو، مشکے، جھاؤ، گورکوپ، کُلبر، زامُران، بولان، ڈیرہ بُگٹی، کوھلو، کاھان، سرجمیں بلوچستان ءَ بوگ ءَ اَنت مردُم گیشتر کہ چہ تُرس ءَ وتی سرگوستاں بیان نہ کن اَنت دُنیا ءِ راجدپتر ءِ مستریں زوراکی اے وھداں ماں بلوچستان ءَ بوگ ءَ اَنت ایندگہ دُنیا چو بے زُبانیں دلوت ءَ نِدارہ چارگ ءَ انت بلوچ بس پہ بے وسی نشتگ ءُ وتی ھنکین ءِ پُراں بو چِنگ ءَ اِنت چندے سال ءَ پیش بلوچ ءِ شائر عطاشاد ءَ وتی شئیرے تہ ءَ ھمے وڑ گُشتگ بلوچ مرچی ھما ھال ءِ تہ اِنت۔

“کینگ ءُ کست ءِ جمبراِنت نَپت شلیت ءُ ھار کنت
وائے گِدان ءِ نِشتگیں گوات ءَ کن ئے سِپَر وتی “

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچ لبریشن آرمی ءِ نیمگ ءَ سال دوھزار ءُ بیست ءِ اُرشانی ھال “دکّ” گل ءِ تنجاہ جاہ”ھکل ” ءَ شنگ کرتگ کہ پنچ تاکانی تہ ءَ اِنت ءُ چریشی ءَ پیسر دک سالگشتی شش ماھی اُرشانی ھالانی تہ ءَ شنگ بیتگ –

سالگشت ھال ءِ تہ ءَ ھواریں انفوگرافک ءِ رد ءَ بلوچ لبریشن آرمی ءِ نیمگ ءَ سال دوھزار ءُ بیست ءَ شست ءُ چار اُرشانی کنگ بیتگ اَنت پاکستانی پوج ءِ چیک پوسٹانی دستیگ کنگ ءُ پنجاہ ءُ نُھ پاکستانی پوج ءِ کُشگ ءُ بیست ءُ ھشت اُرشانی تہ ءَ زدگ بیتگ اَنت -ھمے رنگ ءَ دَہ دمگی چریک کُشتگ ءُ زدگ کرتگ اَنت –

ھال ءِ رد ءَ سال دوھزار ءُ بیست ءَ بی ایل اے ءِ نیمگ ءَ بیست ءُ ھشت تراک بیتگ اَنت کہ چریشی ءَ سیزدہ پوجی ءُ دمگی چاریگانی گاڑی تباہ بیتگ اَنت –

ھال ءَ گوشگ بیتگ کہ بی ایل اے ءِ نیمگ ءَ یک فدائی آپریشنے کنگ بیتگ – ودیکہ لکیر ءِ تہ ءَ بولاب، کاھان، مارگٹ، ھرنائی، شال، مستونگ، نوشکی، کلات، ھاران، پنجگور، سوراب، کیچ، بلیدہ، تمپ، ھزدار، سبی، ھب ءُ کراچی ءِ نشانگانی پدر کرتگ ءُ اُرشانی دمگ پیشداشتگ اَنت –

دو ھزار بیست ءَ بیست ءُ نُھ جون ءَ بلوچ لبریشن آرمی نیمگ ءَ کراچی ءَ پاکستان ءِ مستریں بازار کراچی ءَ اسٹاک ایکسچینج نشانگ کرتگ – رپورٹ ءِ رد ءَ کراچی اسٹاک ایکسچینج ءَ بی ایل اے ءِ مجءد بریگیڈ ءِ اُرشکارانی واستا گچینی ءِ تاکے ھوار کرتگ ھمے رنگ یک تاکے ءَ “آجوئی ءِ شھیداں” سرتاک ھوار کرتگ کہ چریشی ءَ بیران بیتگیں بی ایل اے ءِ چاردہ جنگول پیشدارگ بیتگ اَنت –

ٹی بی پی گچینی

شھداد شمبے زئی

زامران مکران ءِ کیچ ءِ دمگ ءَ یک ھنکینے، کہ کیچ ءِ دمگ ءِ زربار روکپت ءُ روکپتی بلوچستان (سیستان و بلوچستان) ءِ سیمسری دمگ شھرستان سراوان ءِ زرباری ھند اِنت۔
زامران روکپتی (ایرانی) بلوچستان ءِ ھنکین بم پشت ءِ زربار ءُ وھدیکہ بلیدہ ءِ روکپتی زربار ءِ سر ءَ اِنت۔
گزی کور کہ گیشگور ءَ گوں ھوار بیت، زامران اِشی ءِ روکپت ءُ پنجگور ءِ دمگ ءِ پروم ھنکین ءِ زرباری روکپت ءِ کش ءَ اِنت۔ اے زرباری روکپت ءِ کوھی دمگاں زامران گُشگ بیت۔
زامران واکداری ھساب ءَ سَے بھرانی تہ ءَ اِنت۔

1- سے ونڈانی زامران: کہ ایشی ءِ تہ ءَ چار یونین کونسل بادئی، ناگ، سیاہ گیسی ءُ دربلی ھوار اَنت۔

2- بُرز زامران: کہ ایشی ءِ تہ ءَ زراگین، بُگان، ارچنان کاپار، گیشتر دان، چُر، ھیجی ءَ ھوار بازیں میتگ ھوار اَنت کہ واکداری ھساب ءَ تمپ ھنکین ءِ بھر اَنت۔

3- بگان زامران: کہ اِشی ءِ یک کسانیں بھریں واکداری ھساب ءَ روکپتی بلوچستان ءِ بھر اِنت۔

زامران بلوچستان ءِ یک راجدپتری ءُ کلاتی جاھے ءِ ھساب ءَ پرُارزشتیں ھندے۔ اے مزن ءُ دراجیں کوھی، راجدپتری کلاتانی، وشیں کورانی شنگ ءُ ساپ ءُ سُلوئیں برزیں چونگانی سرڈگار اِنت، کہ گرماگانی وھد ءَ گرم ءِ زور 45 ° ءَ سرگوز کنت ءُ سارتیانی وھد ءَ گرم کپان بیت ءُ -5 ° ءَ سر بیت۔ ھمے سوب اِنت کہ اد ءَ ھامین ءُ سروپانی نیبگ یکیں ڈگار ءَ گندگ بنت۔ زامران ءَ ھامین ءُ سروپاں ابید انار، انگور، جام، امب، مالٹا ءُ دگہ بازیں پیمیں نیبگ ءَ ھوار گلہ ءُ برنج ھم کشگ بیت وھدیکہ کوھی انجیر واجہ ھدائی دادانی پیم ءَ دست کپ اَنت ءُ شپانکی ءُ مال داری ھم یک پرارزشتیں کار اِنت ئِے –

چہ گوستگیں لھتے دھکاں زامران ءَ ھَور ءِ کمی ءِ سوب ءَ کِشت ءُ کشار ءِ تک ترندی ءِ آماچ بیتگ، دومی نیمگ ءَ ھدائی دادانی سبزگ ءِ کمی ءِ سوب ءَ مالداری ءِ کاھو ءُ بُچاں ھم سک تاوان بار بیتگ۔ سرکار ءِ نیمگ ءَ ھم روزگار ءِ آسراتی دیگ نہ بیگ ءِ ھساب ءَ اِنت، پمیشکا پہ ورگ ءِ ھاتر ءَ زامران ءُ کش ءُ کِرے ھندانی مردم چہ ایران ءَ تیل آرگ ءُ بلوچستان ءَ بھا کنگ ءِ باپاری ءَ ھوار کپتگ اَنت۔ تیزی ءَ ودوکیں بے روزگاری ءِ سوب ءَ انچیں میتگ ھم ھست کہ سرجمیں میتگ ھمے کار ءَ ھمگرنچ اَنت۔ اگاں کجام ھم سوب ءَ باپار اوشت ءِ آماچ بیت درست گژن ءِ آماچ بنت۔

گوستگیں دسمبر ءَ بلوچستان ءِ سرکار ءَ بنجاھی سرکار پرمان ءِ سرءَ یک جارے شنگ کُتگ اَت کہ ایرانی تیل ءِ باپاری ءِ سر ءَ بندش جنگ بہ بیت، اے جار ءَ پد زرداریں بلوچستان ءِ بے واریں شھریاں وتی لوگانی بےورگی ءِ جاور دِست اَنت ءُ جار بلوچستان ءِ زرکاری کوش نامینتگ اَت۔

ما اے گپ ءِ در گیجگ ءَ درکپتیں کہ ایرانی تیل ءِ کاروبار ءَ گوں بندوکیں مردم اے جار ءِ بارہ ءَ چی گُش اَنت؟ ما گوں بازیں مردماں دیوان کُت بلے تُرس ءِ سوب ءَ کس ھم پجار زاھر کنگ ءُ ھبر کنگ ءَ ساڑی نہ اَت۔

آ وتی ھاتر ءَ کرتارپور ءَ پچ کن اَنت ءُ مئے ھاتر ءَ آسن ءِ ٹٹ جن اَنت، پد ءَ گُش اَنت بلوچ گنوگ اَنت، گپ گوش نہ دار اَنت ، وھدے شما اَچ مارا مئے روزگار ءُ نگن ءَ پچگر ایت، ھمک چار گام ءِ سر ءَ مارا کمشرپ کن اِت گُڑا بلوچ الم گنوگ بنت۔ اے زامران ءِ جھمنند دلمراد ءِ چیریں نام ءِ گپ اَنت کہ تیل ءِ باپاری ءَ گوں ھمگرنچ اِنت، آئی ءَ وتی راستیں پجار ءِ پدر نہ کنگ ئے شرت ءَ پد مئے گون ءَ گپ کنگ ءِ ھاتر ءَ ساڑی بیتگ۔ اے تھنا دلمراد ءِ کسہ نہ اِنت بلکیں بلیدہ زامران ءِ ھمک مردم ءِ کسہ اَنت، کہ آیانی ورگ ءُ وردن ءِ یکیں وڑ ایرانی تیل ءِ باپاری ءَ گوں بندوک اَنت۔

دلمراد زامرانی نوکتریں جار ءَ چہ گیشتر ایرانی سیمسر ءَ چہ تُربت شھر ءَ داں آؤکیں پوجی چیک پوسٹانی سر ءَ کم شرپ کنگ ءِ سر ءَ گپ کنگ ءُ وتی دل ءِ زنگانی ریچان ءَ گش ایت۔

روکپتی بلوچستان ءَ گوں ھواریں روکپتی بلوچستان ءِ سیمسری ھنکین جالگی، سرکیزی ءُ ابدوئی بلوچستان ءِ لکانی مردمانی روزگار ءِ در اِنت۔ ھزارانی کچ ءَ مردم اد ءَ شُد، تُن ءُ شپانی واب ءَ ندر کن اَنت چہ ایران ءَ لھتے گیلن ڈیزل ءُ پٹرول ءِ واستا ودار دارنت ءُ نشتگ بنت کہ چہ آ نیمگ ءَ کسے چہ ایرانی گجر ءِ تیراں بہ رک ایت ءُ سیمسر ءَ سر بہ بیت، پد ءَ دلمراد ءِ پیمیں ھزاراں مردم کہ اد ءَ جالگی ءُ دگہ سیمسری ھندانی سر ءَ تیل بھا زیرنت ءُ بلوچستان ءِ کجام شھر ءَ بھا کن اَنت ءُ وتی آس روک جاہ ءَ روک کن اَنت۔

دلمراد گُش ایت کہ “چار شپانی بے وابی، گُشن، تُن ، سارتی ءَ پد وھدے مارا تیل رس ایت ءُ ما وتی کاروانانی دروشم ءَ دیم پہ سپر ءَ درکپگ ءَ بہ ایں مارا ایف سی (فرنٹیر کور کہ پاکستانی پوج ءِ جھلی گل اِنت) چیک پوسٹ ءَ یک شپ ءِ ءُ کدی گیشتر دارگ ءَ پد پنچ ھزار کلدار ءَ پد روان دے اَنت، جالگی ءَ چندے کلومیٹر دیر پیرہ راھگ ءَ پد ءَ ھمے پوشاک گوریں تُپنگیاں گوں دیم پہ دیمی بیت، پنچ ادار ءَ داں دار اَنت ءُ پجار ءُ جُست کنگ ءَ دو ھزار کلدار زیرگ ءَ پد گپ ٹھ اِیت۔”

دلمرا وتی بلوچی دزمال ءَ گوں پیشانی ءِ ریکاں دیر کنان ءَ وتی گپ ءِ برجاہ داران ءَ گُش ایت کہ “ پد ءَ ناگ ءِ ھنکین ءَ ایف سی چیک پوسٹ ءَ مارا سلتریں کم شرپی ءِ دیمپانی کنگ کپ ایت۔ اد ءَ ارشد پنّام ءِ ھُدّک نامیں سوبیدار ءِ ڈیوٹی ءَ اِنت، اِشی ءِ سیادی گوں پنجاب ءَ اِنت، آ تھنا مارا بلکیں مساپرانی اولاکاں ھم بازیں اداراں داریت ءُ زالبولاں کم شرپ کنت ءُ کش ءُ کری میتگی مردم کہ وشی ءُ سکیانی روچاں چہ اد ءَ اود رو اَنت کائنت، آیاں ھم روگ ءُ آیگ ءَ گیر انسانی رویشانی دیمپانی کنگ کپ ایت۔ کدی روگ ءَ کِل ایت ءُ کدی واتر روان دنت ءُ یک دومی ءِ وشی ءُ سکیانی تہ ءَ ھوار بیگ ءَ نیل ایت۔”

دلمراد زامرانی وتی دیمے سر ءَ زھر ءُ بزگی ءِ جزبگاں چیر دیگ ءِ جھد ءَ وتی چماں زمین ءِ نیمگ ءَ شھار دنت ءُ وتی گپ ءَ برجاہ داران ءَ گُش ایت “ یا لھتے ساھت ءَ زاہ ورگ ءَ پد ارشد سوبیدار چاہ ءُ آپ پوڑی دیگ ءَ پد ما تربت ءِ ھاتر ءَ درکپ اِنت۔ آئی ءَ پد درَاچکی ناگ ءَ پد ءَ ایف سی ءِ مردم گندگ بنت، ءُ پد ءَ ھما زاہ ءُ بدانی کسہ بندات بیت ءُ زر دیگ ءَ پد ساہ رک ایت۔ دہ دمان ھم نہ گْوز ایت کہ باھوٹ بازار تنک ءَ دگہ یک چیک پوسٹی ءِ دیمپانی کنگ کپ ایت، اے رھم دلیں سوبیدار مارا زاہ نہ دنت ءُ نہ کہ زر زیریت بلکیں بلوچ بھائی گُش ایت ءُ جُست کنت کہ شما ناشرکار بلوچ جنگول دِستگ اَنت؟ آیانی درگت ءَ سرپدی بہ دے اِت، آیانی چاریگی ءَ بہ کن اِت، ءُ ھمے پیمیں دگہ بازیں جُست کنگ بنت ءُ چہ اد ءَ ما دروگیں دل ءَ گوں کندوکیں دیم ءَ درکپ ایں۔ بِست دمان ءَ پد الندور چار راہ ءِ سر ءَ جنگی پوشاکاں سربستگیں کارمندانی گوں دیمپانی بیت۔ ساھتانی ودار، پد ءَ ھما جُست، ھما پسہ، پد ءَ چاہ ءُ آپ ءِ ھرچ ھما دردناکیں سپر روان بیت۔”

دلمراد ءَ وھدے ما جُست کُت کہ انچو کم شرپی ءَ پد ھم آ پرچا اے باپاری ءَ گوں بندوک اِنت گُڑا آئی ءِ گُشگ اَت کہ “ما چہ زامران ءَ در کپ ایں، تیل زیریں ءُ پد ءَ تربت ءَ رویں، اے نیام ءَ بازیں روچ گْوز اَنت، درستیں بزگی ءُ واری وتی جاہ ءَ، ما سرجمیں راہ ءَ یک نیمگے ءَ زاہ وران ءُ کم شرپی ءِ آماچ بہ ایں ءُ دومی نیمگ ءَ نیم ءَ چہ گیشتر کُٹ اتگیں زراں پوج بارت۔ ما اے درستیں شئے آں پمیشکا اوپار کن ایں پرچہ کہ ما لاچار اِنت، لوگ ءَ مئے زھگ پہ گُژن مہ مِر اَنت، اے باپاری ءَ ابید مئے کر ءَ دگہ روزگار نیست۔ بلے اے درست کم بیتگ اَنت کہ نی روزگار ءِ یکیں راہ ھم چہ مارا پچ گرگ بیگ ءَ اِنت۔ چہ ایشی ءَ شرتر اَت کہ ما یکیں رند ءَ کُشگ بہ ایں۔”

دلمراد گُش ایت کہ اے باپار ءِ بند بیگ ءِ سوب ءَ بلوچستان ءِ مردم زرداری ناگیگی ءِ آماچ بنت، آ اختر مینگل ءُ ڈاکٹر مالک ءَ گوں دزبندی کنت کہ شما مارا ایف سی ءِ زاھاں چہ رکینت وَ نہ کن اِت بلے ھدایے نام ءَ اے باپار ءَ بند بیگ ءَ مَیل ایت۔ دلمراد ءَ گُڈ سر ءَ جوش وران ءَ گُشت کہ “بلیدہ زامران ءِ ھپتاد ھشت آر ءِ آبادی ءِ ھاتر ءَ 4 ءَ 5 مزنیں ایف سی کیمپ ءُ 28 ءَ گیشتر چیک پوسٹ جوڑ اِنت، اِشانی تہ ءَ مردمانی کم شرپ کنگ ءُ واجہ کارانی پوجی افسرانی زر کَٹگ ءَ ابید دگہ ھچ نہ بیت۔ بلوچستان اِشانی ھاتر ءَ تلاھے جِنگ اِنت ءُ ما آئی ءِ وارس، پہ گُژن مرگ ءَ اِنت۔”

سرکار ءِ نیمگ ءَ نہ تھنا تیل ءِ باپار ءِ سر ءَ بندش جنگ بیتگ بلکیں روکپتی ءُ دراتکی بلوچستان ءِ اے ما گِشتگیں سیمسر ءِ سر ءَ ٹٹ مِک کنگ ءِ ھم کار بندات کنگ بیتگ، ءُ اے درسیں مساپری بزگی ءُ جنجالانیاں ابید پوجی کارمند دلمراد ءِ پیمیں باپاریاں زور دار اَنت ءُ ٹٹ جنگ ءِ زوریں مزدوری کنائین اَنت۔ ٹٹ ءِ پادگانی مِک کنگ ءَ پہ زر داشتگیں پوریاگرانی جاہ ءَ تیل بروکیں باپاری زور پوریاگری پرمایگ بیتگ اَنت ءُ ھمیشانی اولاکانی تیلاں ایر گیج اَنت ءُ ریک ھم ھمیشانی اولاکانی سر ءَ پُر کنگ بنت ءُ چہ آیاں کار گرگ بیت، یات بہ بیت بلوچ راجدوست، بلوچستان ءَ پاکستان ءُ ایران ءِ نیام ءَ بھر کنوکیں اے مانگیشتگیں سیمسر کہ گولڈ سمتھ کِشک ھم گُشگ بیت ایشی ءَ نہ من اَنت۔

وھدے ماں دلمراد ءَ جُست کُت کہ اے سیمسری ٹٹانی مک بیگ ءَ پد تیل ءِ باپار ءَ ابید آیانی زندمان ءِ سر ءَ چونیں سان کپ اَنت؟ گُڑا آئی ءَ گُشت کہ “روکپتی ءُ رودراتکی بلوچستان ءَ، ھاسیں پیماں زامران ءُ پروم ءَ بندوکیں ھنکین ءُ دمگ، روکپتی ءُ رودراتکی بلوچستان ءِ ھنکین شمسر، باسد، ایشوی، تھدیم ، دربلی، کٹگاں، گربن، میتہ، سنگ، ڈمبانی، تحتانی گتان، کسوئی، سیاہ گیسی، ملوئی، تلان سر، گربن، سرکیزے ، ھتک، ناگ، خان کلگ بادئی، پوگنزان، سادیم ءُ اسپیتین گر ءَ یک دومیگ ءِ سیاد ءُ وارس جھمنند اَنت۔ چہ کرناں مئے ابید جیڑہ ءُ جنجالاں مئے یک دومی ءِ نیمگ ءَ رؤگ ءُ آیگ بیتگ، ما یک دومیگ ءِ وشی ءُ سکیانی تہ ءَ ھوار بیگ ءَ اِنت۔ نی زامران ھم ٹٹ مِک کنگ ءُ جتا کنگ بیگ ءَ اِنت۔ چہ اِشی ءَ یک نیمگے ما وتی سیاداں چہ دیر بہ ایں ءُ ما یک دومیگیں وشی ءُ سکیاں ھوار بیت نہ کن ایں، گُڑا دومی نیمگ مئے زرکاری ءِ بزگی ءِ دھر ھم بندات بیت۔ ما چوناھا پدمنتگ اِنت، نی بیت کنت کہ پہ ترندیں بزگی ءُ شُد ءِ جاورھالانی ھاتر ءَ وت ءَ پیسر ءَ ساڑی کنگ لوٹ ایت ءُ ما پہ ایشی ءِ ھاتر ءَ ابید دزبندی ءَ دگہ ھچ کُت نہ کن ایں اگاں کسے اے انسانی ناگیگی ءِ دارگ ءَ وتی کردار ءَ پیلو بہ کنت۔”

بلوچستان پیسرا چہ بازیں جیڑھانی دیمپان اِنت، نی ھمے ھساب ءَ پھازگی ءِ نام ءَ بلوچستان ءِ جتاجتائیں دمگانی تہ ءَ ٹٹ جنگ ءِ کار بندات بیتگ، چہ اے کرد ءَ الم بے باوری ءُ واری ءِ جاورانی تہ ءَ گیشی کیت، ءُ ھمے ٹاھانی تہ ءَ راستی گندگ ءَ کیت کہ بلوچستان یک ایردستیں سرڈگارے ءِ پیم ءَ چارگ بیت اِنت ۔

دی بلوچستان پوسٹ

شال ءَ زالبولیں نرس ءَ لوگ واجہ ءُ دو چُک کُشتگ اَنت، وتکشی کنوکیں کُشندہ زالبول پولیس ءَ رکینتگ ءُ نادراہ جاہ ءَ سر کرتگ –

پولیس ءِ رد ءَ شال ءِ دمگ کینٹ ءَ زالبول سمیرا ءَ وتی لوگ واجہ ءُ دو چُک بے ھوش کرتگ ءُ گُٹ بُر اِتگ اَنت، جون بی ایم سی ءِ نادراہ جاہ ءَ برگ بیتگ اَنت ءُ اود ءَ آیانی جون چار ءُ ٹپاس کنگ بیتگ اَنت –

پولیس ءِ رد ءَ مرد ءِ پجار عرفان مسیح ءِ نام ءَ زانگ بیتگ ءُ کُشتگیں چُکانی اُمر چار ءُ شش سال گوشگ بیگ ءَ اِنت –

پولیس ءِ سرجن علی مردان ءِ رد ءَ سئیں مردمانی مرگ ءِ سوب گیشیں ھونریچگ ءِ سوب ءَ کُشتگیں مردمانی جون نادراہ جاہ ءَ ھشت دہ ادار ءَ پیسری بیتگ اَنت، ھرسئینانی گُٹ کارچ سر ءَ بُرگ بیتگ اَنت –

پولیس ءِ گوشگ اِنت کہ کُشندہ زالبول نرسے بیتگ، آئی ءَ کوٹی ءِ تہ ءَ گیس پچ کرتگ ءُ وتکُشی ءِ جھد کرتگ بلے ھمساھگاں زوت ھال دیگ ءَ پولیس ءَ وت ءَ رسینتگ ءُ آ دزگیر کرتگ ءُ نادراہ جاہ ءَ برتگ –

پولیس ءِ رد ءَ جون پوسٹ مارٹم ءَ پد بنکی ھنکین پنچاپ ءَ راہ دیگ بیتگ اَنت -بلے تنی وھدی کوش ءِ سوب سرپدی نہ بیتگ، پَٹ ءُ پول برجاہ اِنت، پولیس گیشیں پَٹ ءُ پول ءِ واستا زالبول ءِ گھتری ءِ ودار ءَ اِنت –

باھڑ مرید

دی بلوچستان پوسٹ

مئے چم ءِ دید گیمُرتاں
ھیالاں وتکُشی کرتگ
میار اَنت چول گواتانی
اے بیگواھی اے بے وانکی
جلاں گوں سُتکگیں لاشانی ھستیں پُر۔
گواہ اَنت زندمان ءَ کُل
ابدماناں شھیدے رِتکگیں ھونانی سُھریں رنگ
ماں مونجاں باں ماں جیڑاں باں
سُبکیں گواتے ایریچاں ماں پھم اِت باں
ماں پھم اِت باں وتی جندے تہ ءَ ھرسانی لوھاڑاں
گُباراں گِپتگیں چار راھی گیواراں
ھمُک روچ کُنٹ گندگ بیت
سر اِش گاراں برے بے لنکُک ءَ دَرپشاں
گُلیں دلبندا بولان ءِ اِشاں نکشینتگاں کسہ
شُلُونچَگ پہ زِر ءِ واب ءَ مگِند بیگواھ بئے روچءِ
ترارءَ تبدئے پیلوش اِیت
کوش اِیت شرتَگ ترا چو برف ءَ بادین اِت
نزانت اے تئی تب ءَ بزگ
تئی درور چو گُرک ءَ اِنت
شِپانک ھچبر پتو مِھرانی ھمباراں نہ سینگار اِیت
سُبکیں واباں ھمبازاں چہ تَلاں دَر رِچوکیں گوات
پُرش اَنت تَندانی دلبندا اے لھڑیں برمش
اے روچ ءِ اَھینیں ارواہ
اَڑین اَنت ساہ گِریں اِمروزے ارواہ ءَ
نہ دُرہ اَنت تراولیں پادانی بچکندگ
نزاناں پُشت ءِ پد کِنزگ گوں ھُکّاں دیم پہ دیمی ءَ
اِشانی تپتگیں ارواہ زمین ءَ مھر بکش ءَ اَنت اِشانی رپتگیں ارواہ دگہ ارواہ رودین اَنت
اِشانی پِگر کرنانی روانی بنت
اِشانی رپتگیں راھاں ھزاراں بچ رھادگ بیت
ما مرچاں ھادتیں کرنانی ھوشاماں
نمیرانیں شھیداں دُرھت بکشائیت
کریمہ زندگیں ھستیں توانہ اِنت
گوں ھمراھاں ھوں دوزواھاں
سلامی دَنت شھیدانی ارواھاں
نمیرانیں نمیرانیں نمیرانیں نمیران۔

اے ریاستی ڈیتھ اسکواڈ ءِکارمند ءَ سال دوھزار ءُ نوزدہ ءَ ملک آباد ءَ بی ایل ایف ءِ سرمچار ثناء پنّام ءِ جبران ءِ سر ءَ تیرگواری کتگ ءُ شھید کتگ – بیبگر بلوچ

دی بلوچستان پوسٹ

بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ ریاستی ڈیتھ اسکواڈ ءِ کارمند ءِ کوش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ تمپ ءِ دمگ کوھاڈ ءَ ریاستی ڈیتھ اسکواڈ ءِ کارمند عارف ءِ سر ءَ تیرگواری کُتگ ءُ کُشتگ –

جارکش ءَ گوشتگ کہ عارف گوستگیں بازیں سالاں ریاستی ڈیتھ اسکواڈ ءِ کارمند جمیل نامیں مردے ءِ چیردستی ءَ کار ءَ بوتگ – تمپ ءُ چپ چاگردی دمگاں دزی ءُ ڈنگیاں ھوار لس مھلوک ءِ بگیری ءَ پوجی لشکر کشیاں ھم پوج ءِ ھمراہ بوتگ – پوجی کارندھانی نیمگ ءَ عارف پہ دزی ڈنگی ءُ ملام گرگ ءِ مھار گٹ ءَ دیگ ءُ یل دیگ بوتگ – کہ آئی ءَ دمگی لس مھلوک تنگ کرتگ عارف ءَ سال دوھزار ءُ نوزدہ ءَ ملک آباد ءَ وتی دگہ ھمراھانی ھواری ءَ ھم سنتیں گل بلوچستان لبریشن فرنٹ ءِ سرمچار ثناء پنّام جبران ءِ سر ءَ ھم تیر گواری کتگ ءُ شھید کتگ –

گڈسر ءَ جارکش بیبگر بلوچ ءَ گوشتگ کہ ما لس مھلوک ءَ چہ یکرندے پد ءَ لوٹ کنیں کہ آ ریاستی کارندھاں گوں نزیکی مہ کن انت آھاں چہ دور بہ بنت ما کجام ھم وھد ءَ آھانی سر ءَ اُرش کرت کن ایں –

دی بلوچستان پوسٹ

سندھ ءِ مزن شھر کراچی ءَ وائس پار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ یک سد ءُ نود ءُ نُھ روچ سرجم بوتگ –
غفار جانانی، پاکستان پیپلز پاٹی ءِ کلانیں رھشون ءُ چاگردی مردماں بنجل ءِ تر ءُ تاب کرتگ بیگواھیں مردمانی کھولانی گوم ءَ دلپدردی درشان اتگ –

بیگواھیں انسانی ھکانی باسک راشد حسین بلوچ کھول ءَ اتکگ ءُ بنجل ءَ وتی زھر شانی نبشتہ کنائینتگ ءُ آئی ءِ بیگواھیں درگت ءَ پریس کانفرنس کتگ رسانکدراں گیشیں گپ جتگ انت –

وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ گوشتگ کہ پاکستانی وتگڑیں دانشور ءُ اینکر پرسن رسانکدراں کائنت ءُ بلوچ راجے کم شرپی ءَ کن انت بلے اے زر زیریں دانشور شرّی ءَ زان انت کہ اے دمگ ءِ تہ ءَ ایؤک ءَ بلوچ راج انت کہ مالدار ءُ ازت داریں راجے، مال ءُ مڈیاں چہ سریچیں سرڈگارے ءِ واھند انت –

آئی ءَ گوشتگ کہ میان استمانی برادری ءَ لوٹ ایٹ کہ وتی کرد ءَ پیلو بہ کنت ءُ مزلوم ءُ ایردستیں بلوچ راج ءِ ھر وڑ ءَ کمک ءَ بہ کنت آ ھما انسانی پرز ءَ پیلو بہ کنت کہ آئی ءِ زمّہ واری انت پرچاکہ ریاست ءِ پاکستان ءُ آئی ءِ ھاکم بلوچ راج ءِ سر ءَ زلم زوراکی کنگ ءَ انت، مروچی ھم پاکستانی پوج ءِ لشکر کشی برجاہ بوتگ، مروچی ھم بلوچ راجداریں باسک، دانشور، وکیل ، نودربر ءُ ھر پڑا چہ سیادی داروکیں مردم آوار جنگ ءُ بیگواہ کنگ بوگ ءَ انت –

آئی ءَ گوشتگ کہ سندھی ءُ بلوچ راج راجدپتری، دود ءُ ربیدگی ءُ ھونی سیادی ءَ ھوار انت دؤئیں ایردستیں راج یک وڑیں جیڑہ ءُ زورکی ءِ آماچ انت نوں دؤئیں راجانی راجدپتری ءَ یکجاھی المّی انت –

ماما قدیر بلوچ ءَ گوشتگ کہ اے گپ ءَ یات بداریت کہ میان اُستمانی براداری ھر پڑ ءَ وتی مپاداتاں اھمیت دنت پرچاکہ دنیا ءِ تہ ءَ نندوکیں ھچ وڑیں راج ءِ گوم ءَ آئی ءِ سیادی نیست کہ دگرانی گِس ءَ روکیں آس ءِ تہ ءَ وتی مڈیاں ءَ دور بہ دنت وت ءَ بہ سوچ ایت، اگاں اے وڑ بہ بوت اِنت گڑا مروچی سرجمیں دنیا ءَ مزلوم ءُ ایردستیں اے وڑ لگتمال نہ بوت اَنت-

دی بلوچستان پوسٹ

سر بیتگیں ھالانی رد ءَ بلوچستان ءِ بنجاھی شھر شال ءَ گیس ءِ تراک ءَ دو مردم زدگ بیتگ اَنت، گیس تراک ءَ لوگ ءَ ھم تاوان رس اِتگ –

گیشیں ھالانی رد ءَ شال ءِ دمگ رودراتکی شھدگ ءَ یک لوگے ءَ گیس پُر بوگ ءَ تراک بیتگ کہ اود ءَ دو مردم سُتکگ ءُ زدگ بیتگ اَنت –

زدگ بیتگیں مردم نادراہ جاہ ءَ درمان کنگ ءَ برگ بیتگ اَنت ءُ وئیل مروچی پیش اتکگ –

زانگ بہ بیت بلوچستان ءَ سارتی ءِ مانشان ءَ گیس ءِ ترند ءُ تیز بیگ ءِ سوب ءَ مھلوک وتی گیس ءَ نادلگوش بیگ ءُ آیانی جانی تاوان چِست کنگ کپگ ءَ اِنت –

ھمے رنگ ءَ ھزدار ءَ کرنٹ لگگ ءِ سوب ءَ مردمے بیران بیتگ،وئیل ھزدار ءِ شھر ءَ شاہ کمپلیکس ءِ نزیک ءَ پیش اتکگ –

دمگی مردمانی رد ءَ ھزدار ءَ لینانی ھرابی ءِ سوب ءَ کمبہ ءَ کار کنوکیں یک کارندھے بیران بیتگ –

کرنٹ ءَ بیران بیتگیں مردم ءِ پجار ولی مھمد ءِ نام ءَ پجارگ بیتگ ءُ بیران بیگ ءَ پد آئی ءِ جون چِست کنگ ءُ نزیکیں نادراہ جاہ سر کنگ بیتگ ءُ اود ءَ اژدری چار ءُ ٹپاس ءَ پد آئی ءِ جون کھول ءِ گور ءَ سر کنگ بیتگ –

دی بلوچستان پوسٹ

سر بیتگیں ھالانی رد ءَ گوستگیں شپ ءَ پنجگور ءَ ناشناسیں مردمانی تیرگواری ءَ یک مردمے بیران بیتگ –

وئیل پنجگور ءِ دمگ گرمکان ءَ پیش اتکگ اود ءَ ناشناساں تیرگواری کرتگ ءُ علی اھمد ء مھمد عمر کُشتگ –

دمگی مردمانی رد ءَ گوستگیں شپ ءَ گرمکان ءَ لوگی جیڑھے ءِ سر ءَ تیرگواری بیتگ کہ چریشی ءَ علی اھمد نامیں مردمے بیران بیتگ –

زانگ بہ بیت بلوچستان ءِ جتا جتائیں جاھاں لوگی جیڑھانی سر ءَ مردمانی کوشانی ھال سر بیگ ءَ اَنت ءُ بازیں کوشانی تہ ءَ گیرت ءِ بھتام بندگ ءُ مردم جنگ بیگ ءَ اَنت –

ھمے وڑ گوستگیں روچ ءَ بلوچستان ءِ سیمسری شھر چمن ءِ ھند جیلانی اردوزئی ءَ ناشناسیں پرپٹ سواریں مردماں تیرگواری کرتگ ءُ مھمد نعیم نامیں وریایے کشتگ –

نعیم ءَ گوازی ھلاس کرتگ ءُ نماز ءِ واستا اوشتوک بیتگ ھمے وھد ءَ ناشناسیں مردماں نعیم ءِ سر ءَ تیرگواری کُرتگ ءُ کُشتگ –

جون لیویز ءَ دستیگ کرتگ ءُ نادراہ جاہ سر کُرتگ ءُ اود ءَ اژدری چار ءُ ٹپاس ءَ پد آئی ءِ جون کھول ءِ گور ءَ سر کرتگ ءُ لیویز کارمنداں وئیل ناشناسیں مردمانی نام ءَ نبشتگ کرتگ ءُ پَٹ ءُ پول بندات کرتگ –