TBP Balochi

بالگتر ءَ تیرگواری کرتگ ءُ ڈیتھ اسکواڈ ءِ کارندہ مرزا بکتیار کُشتگ – بی ایل ایف

سر بیتگیں ھالانی رد ءَ کیچ ءظ کُچگی دمگ بالگتر چیری گڈگی ءَ ناشناسیں مردماں تیرگواری کرتگ ءُ یک مردمے کُشتگ –

کُشتگیں مردم ءِ پجار مرزا ء بکتیار ءِ نام ءَ زانگ بیتگ ءُ آئی ءِ سیادی ڈیتھ اسکواڈ ءَ گوں گوشگ بیتگ –

دومی نیمگ ءَ بلوچستان لبریشن فرنٹ ءَ بالگتر ءَ کُشتگیں مردم ءِ زمہ واری منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں بیان ءِ تہ ءَ گوشتگ کہ گوستگیں شپ ءَ بالگتر ءِ دمگ چیری گڈگی ءَ ساھت نُھ ءَ تیرگواری کرتگ ءُ ریاستی ڈیتھ اسکواڈ ءِ کارندہ مرزا ء بکتیار کُشتگ –

میجر گْوھرام بلوچ ءَ گوشتگ کہ کُشتگیں ریاستی چریک ڈیتھ اسکواڈ ءِ یک ٹولی ءِ سروک بیتگ – کُشتگیں چریک ءَ بالگتر، گڈگی، کیلکور، بلیدہ ءَ ھوار آپسر ءَ پُرکار بیتگ – کُشتگیں مردم ریاستی ڈیتھ اسکواڈ ءِ کارندہ بیتگ ءُ بلوچ سرمچارانی رندگیری کنگ، بلوچ پُسگانی آوار جنگ ءُ دگہ جرماں ھوار بیتگ کہ چریشی ءِ سر ءَ سرمچاراں نشانگ کرتگ ءُ کُشتگ –

میجر گوھرام بلوچ ءَ گوشتگ مہ اے وڑیں دراھیں مردم ھما کہ بلوچ راجی آجوئی ءِ جھد ءِ ھلاپ ءَ پرکار اَنت آ بیمناکیں رنگے ءَ نشانگ کنگ بنت –

بلوچ یکجھتی کمیٹی اسلام آباد ءِ نیمگ ءَ نودربر رھشون ءُ بی ایس او آزاد ءِ گوستگیں سروک کریمہ بلوچ ءِ یات ءَ یک روانکے کشگ بیتگ ءُ ڈیوا روگ بیتگ اَنت –

بلوچ یکجھتی کمیٹی ءِ نیمگ ءَ کش اِتگیں روانک ءَ اسلام آباد ءِ نودر، سول سوسائٹی ءُ انسانی ھکانی باسکاں بازیں کچے ءَ بھر زرتگ –

بھر زیروکاں کریمہ بلوچ ءِ جد ءُ جھد ءُ زالبولانی سیاست ءِ تہ ءَ مزنیں کردمانے تالان کنگ ءَ داد بکشگ بیتگ –

بلوچ نودربر رھشون کریمہ بلوچ ءِ جسد گوستگیں ماہ ءِ دسمبر ءَ کینیڈا ءِ شھر ٹورنٹو ءَ یک کورے ءِ تہ ءَ دزکپتگ اَت آئی ءِ جسد دو روچ ءَ پیسر چہ کینیڈا ءَ کراچی ءَ آرگ بیتگ اود ءَ آئی ءِ جسد بلوچستان ءَ آرگ بیتگ ءُ آئی ءِ کل ءُ کسارت بنکی ھنکین تمپ ءَ کنگ بیتگ –

کریمہ بلوچ بیست ءُ یک دسمبر ءَ ناگتی کینیڈا ءَ بیگواہ بیتگ ءُ دومی روچ بیست ءُ دو دسمبر ءَ ٹورنٹو ءِ پولیس ءَ آئی ءِ جسد دزکپتگ ءُ آ ناگتی مرگ گوشتگ –

بلوچ گلانی نیمگ ءَ کریمہ بلوچ ءِ کوش ءَ پاکستانی چیریں ادارھانی نیمگ ءَ گوشگ ءَ اَنت چریشی ءِ سوب ءَ بلوچ یکجھتی کمیٹی ءِ نیمگ ءَ چہ بلوچستان ءَ ھوار پاکستان ءِ دگہ شھراں ءُ امریکی ءُ پورپی ڈیھاں زھرشانی کنگ ءَ اَنت-

جرمنی ءِ شھر فیلفیلڈ ءَ یک Café Exil نامیں آرگنائزیشنے ءِ نیمگ ءَ سَے شمبے ءِ روچ ھخ زھرشانی برجم دارگ بیتگ کہ چریشی ءَ بلوچ سیاسی باسکاں ھوار جرمنی ءِ بازیں سیاسی ءُ چاگردی مردماں بھر زرتگ ءُ جرمنی ءِ واکداراں جان مھمد ءِ دارگ ءِ لوٹ کرتگ –

زھرشانی کنوکانی رد ءَ جان مھمد ھمے سال ءِ بیست ءُ دو جنوری ءَ واربرگ ءَ دزگیر کنگ بیتگ ءُ ڈی پورٹ سنٹرل ءَ برگ بیتگ ءُ آئی ءَ بیست ءُ ھپت جنوری ءَ جرمنی ءِ واکدار یک بالیگے ءِ سر ءَ پاکستان ءَ برگ ءَ اَنت –

جان مھمد ءِ سیادی بلوچستان ءِ بنجاھی شھر شال گوشگ بیگ ءَ اِنت ءُ آئی ءَ سیاسی پرکاریانی سر ءَ لشکری کارمندانی ترس بیتگ –

آئی ءِ رد ءَ آ پاکستانی پوج ءِ نیمگ ءَ جنگ ءِ جھد کنگ بیتگ –

زھرشانی کنوکانی گوشگ اِنت کہ جان مھمد اپریل دوھزار ءُ نوزدہ ءَ جرمنی ءَ سیاسی پناہ ءِ دزبندی ءَ شتگ – آئی ءِ سیاسی پناہ ءِ رد بیگ ءَ جرمن ءِ واکداراں آ بیلفیلڈ ءِ بنجاھی امیگریشن آفس (زیڈب) دزگیر کرتگ ءُ آ پد ءَ بیورن ءَ برگ بیتگ –

ایمنسٹی انٹرنیشنل ءُ دگہ انسانی ھکانی ادارھانی رد ءَ بلوچستان ءَ سیاسی باسکانی دزگیر کنگ یا بیگواہ کنگ ءُ لَٹ ءُ کُٹانی نشانگ کنگ ءُ آیانی لاشاں ویرانگاں دور دیگ بنت –

زھرشانی کنوکانی گوشگ اِنت کہ بلوچ رھشون کریمہ بلوچ یک ماھے ءَ پیسر کینیڈا ءَ کُشگ بیتگ ءُ ھمے رنگ ءَ بلوچ اھوالکار ساجد ھسین ءِ گون ءَ ھم ھمے رنگ ءَ بیتگ،کہ سویڈن ءَ بے ساھے ءَ دزکپتگ اَت –

آیاں گوشت کہ ایمنسٹی انٹرنیشنل یک رپورٹے ءِ رد ءَ اے گپ ءِ منانک ھست اِنت کہ پاکستان ءِ زربار روکپت ءِ استان بلوچستان ءَ نودربر، باسک، اھوالکار ءُ انسانی ھکانی کارکنوکانی سر ءَ لَٹ ءُ کُٹ ءُ بیگوھیانی درچ برجاہ اَنت”-

زھرشانی کنوکانی گوشگ اِنت کہ جان مھمد بلوچ نیشنل مومنٹ ءِ یک پُرکاریں باسکے ءُ آ فروری دوھزار ءُ بیست ءَ شال ءَ جان مھمد ءِ لوگ ءِ سر ءَ ناشناساں بیڑ برتگ ءُ جان مھمد ءِ برات ءُ آئی ءِ پِت لَٹ ءُ کُٹ کنگ بیتگ اَنت ءُ لوگ ءَ جاڑیگیں زالبول توپکانی کُنداکاں مانبندگ بیتگ اَنت –

زھرشانی کنوکاں جرمنی ءِ واکداراں المی ءَ جان مھمد ءَ ڈیھ ءَ در نہ کنگ ءِ لوٹ کرتگ ءُ سرجمی ءَ پھزداری ءِ لوٹ کرتگ –

زھرشانی کنگ ءَ پد بی ایس او آزاد جرمنی ھنکین رھشون شارھان نذر ءُ دگراں دمگی مئیر ءِ سکریٹری ءَ گوستگیں روچ ءَ بیوکیں آن لائن دزنویس پیش کرتگ ءُ جان مھمد ءَ ڈیھ ءِ دارگ ءَ مردماں گوں دزبندی کرتگ –

بلوچ نودربر رھشون ڈاکٹر ماہ رنگ بلوچ ءَ شھیدانی مانشجاہ نیوکاھان ءَ بی ایس او آزاد ءِ گوستگیں سروک کریمہ بلوچ ءِ گائبانی نماز جنازہ ءِ وانگ ءَ پد جاڑیگیں مردماں گوں تران کنان ءَ گوشتگ کہ ھما راج ءِ دیدانک جنگ اِنت ءُ آئی ءِ راجمانی دیمونیانی ھلاس کنگ ناسرجم اِنت –

آئی ءَ گوشت کہ مئے دیدانک ءَ مئے لاشانی زانگول کنگ یا کمشرپی کنگ ءَ ھلاس نہ بیت پرچاکہ شھیداں گوں وتی ھوناں اے دیدانک رودینتگ –

ڈاکٹر ماہ رنگ بلوچ ءَ گوشت کہ دو روچ ءَ پیسر کریمہ بلوچ ءِ لاش ءِ دزگرگ ءِ واستا آئی ءِ کھول ءِ گون ءَ ھما رنگیں رویش بیتگ اَنت آ شرمیگ اَنت، یک نیمگے ءَ ریاست گوش ایت کہ من اے کوش ءَ دزمانجن نہ آں ءُ پد آئی ءِ لاش اے رنگ ءَ ترسگ ءَ گڑا ھمے چیزے پدراھی ءَ کنت تو اے کوش ءَ ھوارے –

آئی ءَ گوشت کہ کریمہ بلوچ ءِ لاش ءُ آئی ءِ کھول ءَ زورانسری گاڑی ءَ سوار کنگ ءُ تمپ ءَ روان دیگ بیتگ اَنت، بیت کنت ریاست ھمے چیز ءَ وتی مازگاں داریت کہ اے دیدانک ءَ داشت کن آں ھما دیدانک ءِ واستا کریمہ بلوچ ءَ وتی زند ندر کرتگ اے ریاست ءِ بے سوبی اِنت پرچاکہ اے دیدانک شنگ بیگ ءَ اِنت –

ڈاکٹر ماہ رنگ ءَ گوشت کہ ھما روچ ءَ سرجمیں تمپ بند کنگ بیتگ، سدانی کچ ءَ چک، کماش ءُ ورنا ءُ زالبول جسد ءِ کل ءُ کسارت کنگ ءَ پوج ءَ داشتگ اَنت تانکہ مردم تمپ ءَ مہ رو اَنت ریاست گوش ایت جنگ ھلاس بیتگ اے آئی ءِ بھبیانگی اِنت بلوچ جنگ زندگ اِنت –

نودربر رھشون ءَ گوشت کہ نِی ھمک بلوچ ءِ دیدانک ھما اِنت کہ مئے شھیدانی بیتگ ھاکم ءُ مزلوم ءِ میان ءَ بس زُلم ءِ زوراک اِنت آ مئے ساہ ءِ سر ءَ ھاکمی کنگ لوٹگ اِنت مارا آئی ءَ را گوشگ لوٹ ایت کہ اے سرڈگار مئے ھک اِنت اے ساہ مئیگ اَنت ترا ھچ ھک نیست اِنت کہ بلوچ ءِ لُٹ ماری ءَ بہ کن –

آئی ءَ گوشت کہ اے تئی پُرشتگی اِنت مانشانانی پُروشگ ءَ سسائیں دیدانک ھلاس نہ بیت اِنت یکیں شپ ءَ تو کریمہ ءِ مانشجاہ پروشتگ ءُ مروچی آ بلوچستان ءِ مات جوڑ بیتگ –

آئی ءَ گوشت کہ مروچی ما ھما جاہ ءَ اوشتوک اِنت اے لس جاھ ئِے نہ اِنت بلکیں اد ءَ بابا ء بلوچ ھیر بکش مری ءِ مانش اِنت ءُ آئی ءِ نہ کُٹوکیں دیدانک کہ ھروھد ءَ جد ءُ جھد ءَ بیتگ –

آئی ءَ گوشت کہ بلوچ وتی ڈیھ ءِ واھند وت اَنت ءُ تو وتی توپکانی زور ءَ مارا ھلاس کُت کن ئے بلے مئے دیدانک ءَ ھچبر ھلاس کت نہ کن ئے –

ماہ رنگ ءَ گوشت کہ ھما رنگ ءَ ھیر بکش ءِ دیدانک برجاہ بیتگ ھمے رنگ ءَ کریمہ ءِ دیدانک ھم زندگ مان اِیت ھروھدے دشمن کہ آئی ءِ مانش ءِ نیمگ ءَ چار اِت گڑا ھما دیدانک چو مھلبیں پل ءَ سرپ اِیت –

آئی ءَ گوشت کہ وھدیکہ زیردستانی گور ءَ زندگی ءِ واستا پش کپ ایت تھنا دیمونی پشکپ ایت وھدیکہ آئی ءَ سرپدی بیت کہ ھما لُٹ ءُ پُل کنوکیں ھاکم ءَ سرجمیں دود پروشتگ آئی ءِ دیم ءَ گپ کنگ گناہ اِنت ھک ءِ پد جنگ گناہ اِنت گڈی چیز پشکپ ایت آ زندگی اِنت ءُ مروچی بلوچانی ھمک زھگ گیر انسانی درچانی ھلاپ ءَ وتی زندگی ءِ کربان کنگ ءَ ساجو اَنت –

آئی ءَ گوشت کہ مروچی مارا اھد کنگ لوٹ ایت کہ اے زندگی، وتن مئیگ اِنت ما گیش لُٹ ءُ پُل ءَ اوپار کرت نہ کن ایں ءُ کریمہ بلوچ ءِ دیدانک ءَ زندگ داریں –

سھب ءَ داں ایف سی ءَ ھزدار ءِ عیدگاہ وتی انگر ءَ کرتگ ءُ مردم تہ ءَ پُترگ ءَ نئیشتگ اَنت بازیں جھداں پد مردم تہ ءَ روگ ءَ سوبمند بیتگ اَنت – بی این پی ءِ دمگی سروک شفیق الرحمان ساسولی

سر بیتگیں ھالانی رد ءَ بلوچستان ءِ دمگ ھزدار ءَ بلوچ زالبول رھشون ءُ بی ایس او آزاد ءِ گوستگیں سروک کریمہ بلوچ ءِ گائبانہ نماز جنازہ وانگ بیتگ، نماز جنازہ بی این پی ءِ دمگی سروک شفیق الرحمان ساسولی ءِ سروکی ءَ وانگ بیتگ –

نماز جنازہ ءَ بازیں مردمے ءَ بھر زرتگ ءُ کریمہ بلوچ ءِ ارواہ ءَ دوا کرتگ،جنازہ ساھت دو ءُ چِل ءُ پنچ دمان ءَ وانگ بیتگ –

شفیق الرحمان ساسولی ءَ گوشتگ کہ مروچی کریمہ بلوچ ءِ گائبانہ ءِ نماز جنازہ ءِ واستا مردم جاڑیگ بیتگ اَنت ءُ ھمے وھد ءَ ایف سی ءَ ھزدار ءِ عیدگاہ سرجم ءَ انگر کرتگ ءُ مردم تہ ءَ پُتریگ ءَ نئیشتگ اَنت بلے بازیں منت ءُ واہ زاریاں پد ما تہ ءَ شتگ ءُ جنازہ ونتگ –

شفیق الرھمان ءَ ٹی بی پی ءِ اھوالکار ءَ گپ کنان ءَ گوشت کہ جنازہ ءِ وانگ ءَ دمگ ءِ ملا توار پِر جتگ اَنت بلے دمگ ءِ ملا ساڑی نہ بیتگ چریشی ءِ سر ءَ نماز جنازہ وت وانینتگ ءُ کریمہ بلوچ ءِ ارواہ ءَ دروتی ندر کرتگ –

شفیق ساسولی ءَ گوشتگ کہ کریمہ بلوچ بلوچ راجی گیرت اِنت کہ آئی ءِ لاش ءِ کمشرپی کنگ ءُ پد ءَ دمگ ءِ مردماں جنازہ ءَ بھر زورگ ءَ نیلگ اے پدردی ءِ اشی ءَ ھمینکس ایر بہ جن آں کم اِنت –

زانگ بہ بیت کریمہ بلوچ ءِ گائبانہ نماز جنازہ بلوچستان ءِ بنجاھی شھر شال ءَ ھوار بازیں جاھاں کیچ، سربندن، بلیدہ ءُ گوستگیں روچ ءَ پنجگور ءَ ھم کریمہ بلوچ ءِ گائبانہ نماز جنازہ وانگ بیتگ-

چاگردی رسانک جاھاں کریمہ بلوچ ءِ جون ءِ کمشرپی کنگ ءَ ایر جنگ ءَ اَنت ءُ ھمے رنگ ءَ گوستگیں شپ ءَ کریمہ بلوچ ءِ مانش ءِ کمشرپی ھم کنگ بیتگ –

چاگردی رسانک جاھاں شنگ بیتگیں ھالانی تہ ءَ چاگردی رسانککار زھر ءِ درشان ءَ کنگ ءَ اَنت کہ پیسر ءَ کریمہ ءِ جند ءَ ترس مان بیتگ پد ءَ آئی ءِ لاش ءَ ترس مان بیتگ ءُ نِی آئی ءِ مانش ءَ ھم ترس مان اِنت –

بلوچ یکجھتی کمیٹی ءِ نیمگ ءَ ءِ دزبندی ءَ شال، تربت، بلیدہ ءُ سربندن ءَ کریمہ بلوچ ءِ گائبانہ نماز جنازہ وانگ بیتگ –

سر بیتگیں ھالانی رد ءَ بلوچستان ءِ بنجاھی شھر شال ءَ بلوچ یکجھتی کمیٹی ءِ دزبندی ءَ کریمہ بلوچ ءِ گائبانہ نماز جنازہ شھیدانی مانشجاہ ءَ وانگ بیتگ – چریشی ءَ بازیں کچے ءَ زالبول ءُ چُکاں بھر زرتگ ءُ کریمہ بلوچ ءَ را سھر چکیں دروت ندر کرتگ –

ھمے وھد ءَ “لمہ ء وتن ” زندہ باد ءِ اوگام جنگ بیتگ – زانگ بہ بیت بی ایس او آزاد ءَ کریمہ بلوچ “لمہ ء وتن ” ءِ نام ءِ داد داتگ –

ھمے رنگ ءَ کیچ ءِ بنجاھی شھر تربت ءَ ھم کریمہ بلوچ ءِ گائبانہ نماز جنازہ وانگ بیتگ – نماز جنازہ ساھت یازدہ ءَ تربت ماڈل اسکول ءَ بیتگ – ھمے وھد ءَ زالبولانی بازیں کچے ساڑی بیتگ اَنت – نماز جنازہ ءَ پیش کریمہ بلوچ ءِ یات ءَ دو دمان ءِ بے تواری ءِ مھتل بیگ ءَ پد دراھیں مردماں کریمہ بلوچ ءَ را سھر چکیں دروت ندر کرتگ –

ھالانی رد ءَ نماز جنازہ ءِ وانگ ءَ پد ایس ایچ او امام دبنگ ءَ پولیس ءِ بازیں کچے ءِ ھمراھی ءَ بیڑ برتگ تربت سول سوسائٹی ءِ سروک گلزار دوست ءُ دگہ مردمانی دزگیری ءِ جھد کرتگ ءُ چریشی ءَ دز جنگی بیتگ –

زانگ بہ بیت گائبانہ نماز جنازہ ءِ وانگ ءَ پیسر پولیس ءِ بازیں کارمندے ءَ ماڈل اسکول گراؤنڈ انگر ءَ زرتگ –

ھمے وھد ءَ بھر زیروکانی گوشگ اِنت گوستگیں روچ ءَ تمپ ءِ روگ ءَ نئیشتگ اِت ءُ چریشی ءِ سوب ءَ تربت ءَ گائبانہ نماز جنازہ ونتگ –

ھمے رنگ ءَ سربندن ءَ بانک کریمہ بلوچ ءِ نماز جنازہ وانگ بیتگ ءُ آئی ءِ ارواہ ءَ دوا کنگ بیتگ –

بلوچ یکجھتی کمیٹی ءِ نیمگ ءَ شنگ بیتگیں جار ءِ پد ءَ گوشگ بیتگ کہ بانک کریمہ بلوچ ءِ جنازہ ءَ بھر زیروکیں ڈاکٹر ماہ رنگ ءُ دگہ ھمراھانی دمگ ءَ درکنگ ءَ ایر جن آں –

بلوچ یکجھتی کمیٹی ءِ بنجاھی جارکش ءِ نیمگ ءَ شنگ بیتگیں درشان ءِ تہ ءَ گوشتگ کہ بلوچ راجی رھشون شھید بانک کریمہ ءِ جنازہ ءَ ھواریں زالبول لشکری کارمند ءُ دمگ ءِ پھزدارانی نیمگ ءَ ترسینگ ءُ توپک ءِ زور ءَ دمگ ءَ درکنگ ءُ گلینگ ءَ ترندی ءَ ایر جن آں ءُ اے کانود ءُ ھکانی لگتمالی اِنت –

جنازہ ءَ ھواریں ڈاکٹر ماہ رنگ بلوچ ءَ ھوار دگہ زالبول رھشون ءُ باسکانی ھمراھی ءَ گوستگیں روچ ءَ تربت ءَ شھید بانک کریمہ ءِ نماز جنازہ ءِ بھر زورگ ءَ روگ ءَ بیتگ آ ڈی بلوچ ءِ ھند ءَ سیکورٹی فورسز ءُ ڈپٹی کمشنر ءِ زور ءَ تربت ءِ شھر ءَ روگ ءَ دارگ بیتگ اَنت –

بنجاھی جارکش ءَ گوشت کہ شھید بانک کریمہ بلوچ ءِ جسد ءِ کل ءُ کسارت کھول ءِ منگ ءَ ابید چہ کراچی ءَ ابید تمپ ءَ دیم دیگ، کراچی ءَ نماز جنازہ ءِ دارگ رینجرز ءُ پولیس ءِ بازیں کارمندانی اوشتارینگ بیتگ ءُ بھیا باگ گراونڈ ءِ بند ءُ مردماں جنازہ ءِ دارگ، ابید ءِ جار ءَ دمگانی انگر کنگ، نیٹورک ءِ بند کنگ نِی تربت ءَ سیاسی زالبول ءُ باسکاں روگ ءَ نیلگ ءُ توپک ءِ زور ءَ دمگ ءَ درکنگ اے وَ تچک تچک زُلم ءُ ناانساپی یے –

جارکش ءَ وتی بیان ءِ گڈسر ءَ گوشت کہ بلوچ زالبول رھشون ءُ باسک اگاں کجام تاوان ءِ رس اِت گڑا آئی ءِ زمہ وار ریاست ءُ آئی ءِ مزنیں واکدارانی سر ءَ لڈگ بیت اِنت –

جارکش ءَ گوشت کہ بلوچ راج ءَ گوں دزبندی کن آں آ زالبولانی تریسنگ ءُ آیانی سر ءَ توپک کشگ ءُ دمگ ءَ گلینگ ءِ ھلاپ ءَ یکجاہ بہ بنت ءُ توار چِست بہ کن اَنت –

سر بیتگیں ھالانی رد ءَ پنجگور ءِ ڈیم ء سر ءَ یک تیرسپتگیں جونے دزکپتگ، جون تیر جنگ ءُ کُشگ بیتگ –

جون ءِ پجار اسد ء منیر جمھنند تسپ ءِ نام ءَ زانگ بیتگ، وتی ھمراھانی ھمراھی ءَ شتگ ءُ واتر آئی ءِ بے سائیں جون دزکپتگ –

دمگی مردمانی رد ءَ اسد گوستگیں روچ ءَ وتی ھمراھانی ھمراھی ءَ پکنک ءَ شتگ ءُ مروچی آئی ءِ تیرسپتگیں جون دزکپتگ –

جون پھزداراں چِست کرتگ ءُ نادراہ جاہ ءَ سر کرتگ ءُ اود ءَ آئی ءِ اژدری چار ءُ ٹپاس ءَ پد آئی ءِ جون کھول ءِ دست ءَ داتگ، کوش ءِ سوب زانگ نہ بیتگ –

ھمے وڑ بلوچستان ءِ تیابدپی شھر پسنی ءَ یک مردمے ءِ جون دزکپتگ –

جون پسنی فیش ھاربر اتھارٹی ءِ نزیک ءَ دزکپتگ، جون پولیس ءَ دستیگ کرتگ ءُ نادراہ ءَ سر کرتگ ءُ اود ءَ اژدری چار ءُ ٹپاس ءَ ڈاکٹراں گوشتگ کہ بیران بیتگیں مردم ءِ مرگ ءِ سوب نشہ ءِ آماچی ءَ بیتگ –

بی ایس او آزاد ءِ بنجاھی جارکش ءَ وتی شنگ کرتگیں درشان ءِ تہ ءَبانک کریمہ بلوچ ءِ جد ءُ جھد ءِ ستاشانی کنان ءَ گوشتگ کہ شھید بانک کریمہ بلوچ جھد ءِ ترپوکیں استال بیتگ ءُ آئی ءِ جوانیں دیمونی ءُ بے کچوئیں جد ءُ جھدانی سر ءَ آئی ءَ “لُمہ ء وتن ” داد ءِ نام ءَ یات گیری بیت اِنت –

آئی ءَ گوشت کہ کریمہ بلوچ ءِ راجی زرمبشت ءِ ھما سروکیں رھشون ءَ آ جھان ءِ نامی ئیں زالبولانی لڑ ءَ ھوار بیتگ – بانک کریمہ بلوچ ءَ بی ایس او آزاد ءِ پتر ءَ راجی جھد ءَ ھوار بیتگ ءُ شھیدی ءَ داں بلوچ راجی زرمبشت ءَ یک پرکاریں رھشونے ءِ کد ءَ اوشتوک بیتگ – آئی ءَ بلوچستان ءِ دگاں بہ گر داں کُچگاں برو ءُ اسکولاں بہ گر داں کالجاں برو بلوچ ڈیھ ءِ وابیں ھیال ءِ ترومینگ ءَ جد ءُ جھد کرتگ –

جارکش ءَ دیمتر ءَ گوشتگ کہ بانک کریمہ بلوچ ءَ بی ایس او آزاد ءِ کوپگ یک ھنچیں وھدے ءَ پھریز اِتگ کہ وھدےکہ بلوچستان ءَ زُلم ءُ زوراکیانی درچ ترند بیتگ اَنت، سیاسی باسکانی بیگواہ کنگ، لاشانی دزکپگ برجاہ بیتگ، گل ءِ سر ءَ بندشی ءُ ریاستی زوراکی سر ءِ تہ ءَ مِک بیتگ اَنت “لُمہ ء وتن ” ءُ دراھیں مشکل ءُ جنجال لگت داتگ ءُ جد ءُ جھد ءِ دامن گپتگ ءُ مھکم کنگ ءَ یک جوانیں کردے پیلو کرتگ – یک آشوبی رنگے ءَ آئی ءَ نا ایوک ءَ بلوچ راج ءِ واستا بلکیں ھر ھما دنیا ءِ زیردستیں راجانی واستا رھشونی ءِ کرتگ – بانک کریمہ بلوچ ءِ دیمونی ءَ بلوچ راج ھچبر بے ھیال کرت نہ کنت ءُ آئی ءِ جد ءُ جھد داں آؤکیں پدریچ ءِ رھشونی ءَ کنت –

جارکش ءَ وتی درشان ءِ گُڈسر ءَ گوشت کہ “لمہ ء وتن ” ءَ وت وتی زانت ءُ سساہ ءَ بلوچ راجی نپانی واستا ندریگ کرتگ چریشی ءَ دراھیں پھناتاں بندوکیں مردم ھماھی ءِ سان ءَ اَنت “لمہ ء وتن ” ءِ سیاسی جد ءُ جھد ءِ راہ ءَ وتی راجی زرمبشت ءَ رژنائیں رژنے بکش اِتگ ءُ آئی ءِ بے کچوئیں جد ءُ جھد راجدپتر ءَ سھریں تاکاں گوں نبشتگ کنگ بیت اِنت –